Tita

TITA

KIANG A SAWLTAK PAUL LAIKHAK

Tita 1

 Chibai bukna

        1 Paul, Pasian sila leh Pasian mitelte ginna dungjui leh Pasian ngaihsakna bang a thutak theihna lam a Jesu Krist sawltek in, 2 juautheilou Pasian in hun kipatma pek a achiamsa tangtwn henna kinepna ah, 3 hinanleh Pasian i hundampa uh thupiak dungjuia ka kiang a kepsak a om thu tangkupeh jiakin ahuntak ah athu pen suklat in a omta hi.

           4 Ginna munkhat lam thu a ka tapa Tita kiang ah:

           Pa  Pasian leh Toupa Jesu Krist i hundampa uh kiang a kipan hehpihna,

Zahngaih, tuleh hua khamuanna om hen.

Krit ah Tita nasep

            5 Hih jiakin ahi Krit tuikulh gam a ka hung nutsiat, sil bawl zohlouh a omte na bawlzohna ding leh, kung thupiak bang a khuachin a upate na guatheih ding in: 6 khuahileh demnabei, zi-khat nei, ginomtak tatsiatna leh thuzohlouhna neilou tate nei ahihnak uleh. 7 Ajiak saptuam lamkai pen Pasian dangka kemtu ahihjiak in damnabei ahih ngeingei ding ahi. Mi genhak lou, hehbaih lou, uain khamhat lou, mivuak-hat lou, dangka dua-am lou ahih ding ahi. 8 Hinanleh mi houpihdan siam, hoihnalam deih, lungsim dik, midiktat, misiangthou, mahni kithunun ahih ding  ahi. 9 Thugin diktak a nialkalhtute a hasottheihna ding a diklouhdan uh a theisak theihna ding in. Amah kihilhna sa bang a thu pen a tukkip jing ding ahi.

             10 Ajiak pen mi thumanglou, thug en-mawk mawkte, leh mikhemhatte tampi aom uhi; adiak in amauhte teptanlou lak a mi ahi uhi.11 Huate kam pen humsak ding ahi, punna nin deihman in thu ahilhlouh ding uh ahilh ua, mi innkuan sung a tokbuai jel uhi. 12 Amauh lak a khat, a Jawlnei uh khat in, ‘krit gammite pen juau genjingte, gamsa giloute, thadah anhaite ahi uh,’ chi’n agen hi. 13 Hih theihpihna thu dik ahi. Tuajiakin ginna lam a ahung diktheihna ding un hahtak in taihilh in, 14 Judate tangthu leh thutak nungheisante thupiak a ngaihsak louhna ding un. 15 Misiangthou a ding in sil jousiah asiangthou hi, hinanleh mibuak leh gingloute a dingin bangmah asiang aom kei hi. A lungsim uleh a sialehpha theihna uh asiang lou ahita hi. 16 Pasian ka thei uh chi in aphuang ua, hinanleh a silbawl un anial uhi. Huat-huaite, thumangloute, tuale silhoih bawl ding a chingloute ahi uhi.

Tita 2

Thugin dik hilh in

            1 Hinanleh nang, thugin dik tawh kituak thute genjaw in. 2 Putekte pen omtan hoih, zahtak-huai, kidekthei, tualeh ginna leh, itna leh, thuaktheihna a diktak hiding in hilh in. 3 Pitekte zong huachimah bangin siangthouna tawh kituak a gamtang ding leh, dikloutak a mihek-hat leh uain hai hilou a, silhoih hilhtu hiding in hilh in, 4 tuachia amau’n numei khanglaite pen lungsim diktak nei a apasalte uh itding, atate uh itding, 5 Pasian thu pen gensiat a aom louhna ding a kiveng a siangthou a aom a, innsung nna sem a hoihtak a aom a, a pasalte uh thu mang a hoihtak a a omtheihna ding a ataihilh theihna ding un hanthawn in.

           6 tuachimah bangin tangvalte pen lungsim diktak pua ding in hasot un. 7 Sil jousiah ah silhoih bawlna lam a etton dingin kimusak inla, thugin ah kipumkhatna aom dan, a siangthou dan, atak dan bang ensak in, 8 thugen diktak gensiat guallouh bang akilat a; langpangtu kuahiam in na tung a sil gilou gen ding neiloua a zahlak theihna ding in.

           9 Silate pen apute uh thu mang ding leh midawnhat lou dingin leh; sil housiah a akipahna lam ua omgige ding in hasot in, 10 Pasian I hundampa uh thuhilhna thu pen sil housiah a ajephoih theihna ding ua, khut ommoh lou a gin-omna hoih jousiah musakjaw ding in.

           11 Ajiak hundamna hungtut Pasian hehpihna pen mi tengteng kiangah ahung kilangta hi, 12 hua in ahihleh Pasian ngaihsak louhna leh leitung utnate tawpsan a, tu-khang a lungsim siangthou leh, diktattal leh Pasian ngaihsak a om in, 13 hua kinepna Pasian thupi leh I hundampa uh Jesu Krist kilakna ding thupitak pen ngak in I om ding uh chih  a hunghilh hi. 14 Aman I gitlouhna jousiah ua pat ahung tattheihna dingin leh amah ding a silhoih bawl a phattuamngai leh teltuam hiding a ahung hihsiangthou theihna dingin i taang un a kipiata hi.

          15 Hih thute gen inla; hanthwn inla tualeh thuneitak in vau in. Kuaman nang hung simmoh kei hen.

Tita 3

Kristian hinkhua

            1 Amauhte vaihawmtute leh thuneitute kiang a kituhlut ding in, thumang ding in, silhoih taphot bawl ding a kimansa a om ding in, 2 mi kuamah gensialou ding in, migi in, mi housiah kiang a ki ngiamkhiatna ensak dingin hilhpha in. 3 Ajiak eite ngei zong hidanglai in mimawte, humangloute, khem a omte, utna leh nopna chituam tuam nabawlte, gilou leh thangsiajing a omte, kihdakhuaite tualeh khat leh khat kimudahte i nahi uhi. 4 Hinanleh mihing tung a i hundampa uh Pasian chitna leh itna ahung kilat hung in, 5 diktatna eiten ibawlte uh jiak hilou in, pianthakna in leh a zahngaihna dungjuiin ahung hundamta hi. 6 Hua Khasiangthou pen Jesu Krist i hundampa uh jiak in I tung uah kichingtak in ahung sungbua ta hi, 7 a hehpihna a siamtansak a om in, tangtawn kinepna dungjui in gouluahtute ding a suam in i omngei ding uhi.

8 Kuapeuh Pasian gingtasate’n silhoih bawl ding ngaihtuah jing uhen chih thu pen agin-om ahi, tualeh hihthute pen khauhtak a na ganjing ka deih hi.

Hihte pen mihing dingin ahoih a tualeh aphatuam hi. 9 Hinanleh dokna mothuaite, khangtusutte, kinialnate leh danthu a kikalhnate pen sil phatuamlou leh bangmahlou ahi. 10 Gindan diklou neimi pen khatvei nihvei nahilhzoh nungin nial in, 11 huachibang mipen a lampial in a khial a, amah leh amah suamlouh kitangsak ahi chih nathei uhi.

Thuhilhna nunung

12 Artema hiam, Tikika hiam na kiang ua kungsawl chiangin Nikopoli khua ah ka kiang ah hungpai teitei sawm in, ajiak huamun ah phalbi sung om ka sawm hi. 13 Jenas danthu thei leh Apollo a khualjinna ua bangmah a aksap louhna ding un, kintak in sawlkhia in. 14 Tualeh eima mite zong gahloua a omlouhna ding un apoimohna kin a azak ding silhoih bawl kijilsak in.

15 Ka kiang a omte jousiahin nang chibai a hungbuk hi. Ginna a ei hung itte chibai nabuk in. Na kianguah hehpihna om hen. Amen.