Philemon

PHILEMON

KIANG A SAWLTAK PAUL LAIKHAK

Chibai bukna

1 Paul, Jesu Krist a koltang leh, I sanggampa uh Timothi in,

Ka lawm ittak uh leh ka naseppih uh Philemon kiang ah, 2 tualeh ittak i sanggamnu uh Apphia leh ka galkappih uh Arkippa kiang ah, tualeh na inn a saptuam kikhawmte kiang ah;

3 I Pa uh Pasian leh i Toupa uh Jesu Krist a kipan hehpihna leh khamuanna na kiang uah om hen.

Philemon itna leh ginna

4 Ka thumnate ah na min lougige in, ka Pasian kiang ah kipahthu ka gen hi. 5 Toupa Jesu lam leh misiangthoute jousiah lam a itna leh ginna na neihdan ja in 6 Na ginna kikoppihna pen Jesu krist a nangmah a om silhoih jousiah a theihkimna lam a ahung phattuam theihna ding in. 7 Ajiak sanggampa aw, na itna ah muanna leh hehnepna thupitak ka nei uhi, nang jiakin misiangthoute lungtang ahalhthakta hi.

Onesima a ding Paul ngetna

8 Tuajiakin akilawm hun bawl ding a nang thu hungpiak hih Krist ah kin gap mahmah nanleng zong, 9 itna jiakin keimah, Paul, putek leh tu a zong Jesu Kist a koltang in kung ngenjaw ahi. 10 Ka koltanna a ka neihkhiat ka tapa, Onesima, a dingin kung ngen hi. 11 Amah pen tumasang in nang a dingin a phatuam kei a hinanleh tun nang leh kei dingin “a phatuamta” hi.

12 Amah kung sawlkikta a, tuajiakin, keima lungtang ahi a, kipaktak in napom in. 13 Amah pen ka tangthupha kolbulhna a nangmah tang a nna hung sepsak dingin ka kiang a omdensak ka ut mahmah a; 14 hinanleh nang ki panpihsak teitei ka utkei a, na utthu a hih ahihtheih jawkna dingin na thulouin bangmah ka bawlnuam kei hi.

15 Ajiak hun tomkhat sung nang a hungkhen pen tangtawn a amah na neihjawk na ding zong ahi maithei hi. 16 Hinanleh tuinjaw sila banga hilouin sila sang a hoih, unau deihtak bangin kei dingin deihuam ahi a, nang ding semin houh taksa leh Toupa ah a bangchihih jawsem tadiai!

17 Tuajiakin na kithuahpih bang a nung ngaihtuahleh, keimah ngei bangin napom in. 18 Na tung a bawlkhial aneih a, bat bangmah aneihleh zong, keima bat in nakoih in. 19 Keimah, Paul in, hihpen ka khut ngeia kagelh ahi: keiman ka ditsak ding hi.(Hinanleh keikiang ah bat na neia nang mahmah zong na kiba chia ka ganna ahi kei hi.) 20 Ahi, unaupa, nang a kipan-a kipakna Toupa hung neisak in! Krist ah ka lungtang hung hihhalhsak in.

21 Na thumanna a kimuang in leh, ka gen sang a thupijaw a na bawl ding Gita in, na kiang ah kung gelh ahi. 22 Bangteng hileh kei ding n zong tuna ding inn khat hung na ngaihtuahsak in, na thumnate uh jiakin na kiang ua piak a ka om ding ka kigingta hi.

Chibaibuk tawpna

            23 Krist Jesu a ka koltangpih Epaphra in chibai ahung buk hi, 24 tualeh Marka,Aristarkha, Dema, tualeh Luka, ka naseppihten zong.

            25 I Toupa uh Jesu Krist hehpihna nakha uh kiangah om hen. Amen.