I Peter

PETER

LAIKHAK KHATNA

Chibaibukna

I Peter 1

1 Peter, Jesu Krist sawltak in, 

Pontas gamte, Galatia gamte, Kappadosia gamte, Asia gamte, leh Bithinia gamte, a Pasian thu a khualjin a kikhenjakte kiangah. 2 Thumang ding leh Jesu Krist sisan thehding a kha hihsiangthou jal a Pa Pasian theihkholhna dungjuia telte kiangah.                                                 

Hehpihna leh khamuanna na kiang uah sukpungin omta hen.

Kinepna hing

3 Misi lak a kipan a Jesu Krist thohkikna jiak a a khuatuahna thupitak dungjuia kinepna hing tang ding eite hung suangkhia kikpa, Pasian leh i Toupa uh Jesu Krist Pa pen phat in om hen! 4 Goutan setheilou, van a nou a ding a khamsa muding in, 5 hun nunung chiang a kilang ding hundamna muding a ginna jal a Pasian ding hundamna muding a ginna jal a Pasian silbawl theihna a kep na hi uhi.                                                                         

6 Hua ah hahpak in na kipak ua, hilehzong tuin apoimohleh engbawlna tuamtuam in lungkham tadih mahle uchin zong, 7 na ginna diktak uh etkhiatna pen kham meia etkhiat ahihnung a mangthang jel sang a manphajaw, Jesu Krist hung kilakni chiang a pahtawina leh zahbawlna leh thupina a muh a aom theihna ding in. 8 Mungailoupi in, amah na it ua, tuin amah mukei nanle uchin zong, na gingta ua. Kipahna genguallouh leh thupina a dim in na kipak uhi, 9 na ginna uh atawpna, nakha uh hundamna pen mu in.     

       

10 Hih hundamna thu pen, na kiang ua hundamna hung tung ding thu nagenkholh Jawlneite’n akan ua, pilvang tak in asuikhia uhi. 11 Krist thuakna leh anung a hung jui ding thupina ana matheihsak laiun, Krist Kha amauh sung a om in bangchik hunin ahia, ahihkeileh bangcih bang hun in ahia atheihsak chih zonkhiat tum in. 12 Van a kipan a Khasiangthou hung kisawlkhia panpih a na kiang ua tangthupha gentute’n amauh a ding guak hilouin hinanleh eite dingin, hua na kiang ua thu kigensawnte nna asem uh chih na kiang uah suklat in a om hi. Hua silte pen vantungmite’n zong et a ut uh hi.

Siangthou a hing ding a sapna

13 Tuajiakin na lungsim kawng uh gak unla; pilvang un; Jesu Krist hung kilak chiang a hehpihna nou ahung puakding pen atawp dong in lam-et un. 14 Thumangtakte bangin, na theihlouh lai ua na nidanglai utnate uh bang a omlou in. 15 Hinanleh nou hung sampa a siangthou bangin nou zong na gamtatdan jousiah uah siangthou un; 16 ajiak pen, “Siangthou un, ajiak kei kasiangthou hi,” chih gelh ahi.                                                                        

17 Tualeh deihsaktuam neilou a michih a nasep dungjuia vaihawmsaktu pen Pa chia sam nahih uleh, hihsan a na vaihawmlai hun uh lauhdan siam in zang un. 18 Na pu leh pate uapat tawndan a na muh uh na omdan  uh bangmah hilou a pat sil sethei daan dangka leh kham a tat na hikei ua; 19 hinanleh Belamnou demnabei leh nin banglou sisan bang a Krist sisan manpha a tat na hijaw uh chih nathei uhi. 20 Amah peh leitung kisaiamma pek in guatkholh in aom taktak ngeingut a, hinanleh hih hun nunungte ah nou a dingin suklat in a omta hi. 21 Amah jiakin misilak a kaithoupa leh thupina piapa Pasian na gingta uhi.              

22 Unaute tung a itna dailou nei ding khop a Kha jiak a thutak juia na kha uh na hihsiangthou tak jiak un, it petmah in lungtang siangthouin khat leh khat ki ittuah un. 23 Khaichitang setheilak ah hillouin, hinanleh setheilou Pasian thu tangtawn a hing jing leh omjing lak a paingthak na hijaw uhi. 24 Ajaik pen,                                                                                            

“Taksa jousiah hampa bang ahi a,                                                                                                        tualeh mihing thupina zong                                                                                                                 hampapak bang ahi.                                                                                                                    

Hampa pen avul a,                                                                                      

apak zong apulh hi,                                                                                                                

25 hinnanleh Toupa thu pen tangtawn                                                                                        

in a omjing hi.”                                                                                                                         

Tualeh hihpen na kiang ua tangthupha manga thu kigenpen ahi hi.

I Peter 2

Suangpi hing leh Nam siangthou

1 Tuajiakin gitlouhna josiahte, khemna jousiahte, lepcianate kithangsiatnate tualeh kigensiatnat koihkhia un. 2 Naungek suakthakte bangin na khantouh theihna ding un Pasian thu nawitui siangthou lunggulh un. 3 “Toupa pen mihehpih siamtak ahi chih na theikhak tak ua ahihleh.”                                                                                                                                

4 Amah, mite deihlouh, hinanleh Pasian tel leh manpha suangpi hing bang kiang a hung pai in. 5 Nou zong suanghingte bangin, Jesu Krist jiak a Pasian deihdan khalam kithoihna lan ding a siampu siangthou leh khalam inn a lamtouh na hi uhi. 6 Tuajiakin Laisiangthou ah zong:                                                                                                                                               

“ Ngai un, Zion ah aning a suang                                                                                                                    poimoh pen,                                                                                                                            

 tualeh manphatak kalem hi;                                                                                                            

kuahileh amah gingtate pen                       

azahlak kei ding hi,”                                                                                      

chih gelh ahi.                                                                                                                          

7 Tuajiakin nou agingtate diangin, amah mah amanpha ahi; hinanleh agingtaloute ding in,

“ Innlamtute suang deihlouh                                                                                                                            huami pen aning a suang                                                                                                               

poimoh pen ahung hita hi.”                                                                                        

8 Tualeh         

“ Kipaihna suang leh,                                                                                                               

thangpaihna suangpi tawh.”                                                                                                            Ajiak pen a thumanlouh jiak un thu ah a kipalpuk uh, huachibang ding a guatmawng zong ahi uhi.                                                                                                                          

9Hinanleh avakna lamdangtak a lutding a mial a kipan nou hng samkhiapa pahtawina na suklattheihna ding un noupen chitel thupi aiampu, nam siangthou, abik a Pasianmite na hi uhi. 10 Nidanglai in Pasian mite na hikei ua, hinanleh tuin Pasian mite na hita uh; zahngaihna tanglout nahi ua, hinanleh tuin zahngaihna na muta uhi.

Pasian sila

11 Ittakte aw, mikhual leh khualjin bang na hihjiak un kha doudaljing taksa utnate tawpsan dingin kung ngen hi. 12 Sil gilou bawlte bang a ahung gensiat chiang ua, na nasephoih amuhte uh jiak a veh a na om chiang ua Pasian apahtawi theihna ding un, Jentelte lak ah na gamtatdan uh kilawmtak in om hen.                                                                           

13 Toupa jiakin mihing dan bawl jousiah nuaiah kithuhlut un, thuneihpen kumpipa kiangah hiam, 14 ahihekeileh sil gilou bawlte leh silhoihbawlte phat ding a amah hungsawl ahihjiak in gam uktute kiangah zong. 15 Ajiakpen na silhoih bawl ua mimawte motna na sukdaih uh Pasian deihdantak ahi. 16 Mi zalente bangin, tualeh na zalen na uh pen, gitlouhna kikhumna ding a zanglou in, hinanleh Pasian silate bang in om un. 17 Mi jousiah zahbawl un, sanggampihte it un, Pasian lau un, kumpipa zahbawl un.

Krist thuakna etsakna

18 Silate aw, laudan siam in na pute uh kiangah kituhlut un, ahoihte leh a nunnemte kaing guak ah hilou in, lungtang  khauhte kiangah zong. 19 Ajiak pen Pasian lam a  sialehpah theihna jiak a, mi’n gimna leh dikloutak a bawlna athuakleh, hihpen pahtat taka ahi. 20 Bang jiak in ahia ichihleh na diklouhna jiak ua khuttum a suk natuah un kuhkaltak in thuak mah le uchin, pahtat bang ahia nalawh uh? Hinanleh silhoih nabawl uh huajiakin nathuak unla kuhkaltak in thuakle uchin, huapen Pasian kipahpih lam ahi. 21 Huachibang bawl ding a sap nahi ua, ajiak Krist in zong akhap a najuih ding uh, na etton ding un hung nutsiat in eite tangin a nathuakta hi. 22 Aman khialhna mawng mawng abawl kei a, tualeh akam ah zong khemna thu apawt kei hi. 23 Enghou a a omlai in a thukkei a; athuaklai in zong , a vaukei hi; hinanleh diktattak a ngaihtuahpa kiangah akikemsak jawhi. 24 Eite khaialhna lam a si a, hinanleh diktatna lam a i hintheihna dingin aman ama pumpi ah i khialhnate kros dawn ah apua a, amah kivuakna hualte ah sukdam in na omta uhi. 25 Ajiak belam bangin na na lammangta uh a, hinanleh tuinjaw belampu leh nakha uh vangtu kaingah na hung kikkikta uhi.

I Peter 3

Zi leh pasalte

1 Tuachimah bangin nou zite aw, na pasalte uh kiang chiat ah kituhlut un. Tuachi’n, kuahiam khat in Pasian thu gingtakei nanleh, Pasian thu lou a zite uh gamtatdan a zoh in a omthei ding hi, 2 lauhdan siamkawm a na gamtatdan siangthou uh a etchiang un. 3 Na kivonna uh pualam kivonna samphekte leh, kham khi awhte ahihkeileh puansilh a kivonna hilou in. 4 Lungtang a mihing thupu’k thunuailut leh nunnem lpuansilh setheilou hijaw hen, huapen Pasian mitmuh in amanpha mahmah hi. 5 Ajiak pen tuachimah bangin nidanglai a numei siangthou Pasian gingtate zong amau pasalte thuthu a om in ana kivon uhi. 6 Sarah in Abraham Toupa chia sam a athu aman mahbang in. Lauhman hilou a ahoih a na gmatat uhleh Sarah tanute na hi uhi.             7 Tuachimah bangin, nou pasalte aw, na thumna uh dal a a omlouhna dingin hinna hehpihna tangkhawm ding na hihjiak un. Numei pen bel kekbaihjaw bang a ngaiin, na zite uh pahtawi kawm in theihna dungjuiin amauhtawh omkhawm un.

Sildik bawljiak a haksa thuakna

8 Atawppen in, khat leh khat, kilainat tuah in, lungsim munkhat pua unla, sanggam ki it bangin kamsiam unla, lungnem un. 9 Gitlouhna gitlouhna a thuklou in; housiatna zong housiatna a thuklou in, hinanleh, alehlam ah, gualjawlna tang ding a sap na hi uh chih thei in, vangbuakjaw un. 10 Ajiak,                                                                                                           

“ Hinna deih leh nihoihte mu ut in,                                                                                                       gilou a pan alei venghoih henla,     

tualeh amuk zong khemna thu                                                              

genlou dingin venghoih hen.                                                                          

11 Gilou tawpsan henla;                                                                                                                                 lemna zong henla delhjui hen.                                                                               

12 Ajiak Toupa mitpen midiktatte                                                                                                                                 tungah atu a,                                                                                                                              

  tualeh abil zong athumna lam                                                                                                                         uah adawh hi;                                                                                                               

Hinanleh Toupa mit in silgilou                                                                                                                        bawlte adou hi.”                                                                                 

13 Tualeh silhoih juitute nahih uleh kua in ahia nou poi hung khoih ding? 14 Hinanleh diktatna jiak a nathuak uleh, na hampha uhi! Ahung vauna uh laukei unla, zong lungkia kei un. 15 Hinanleh na lungtang uah Toupa Pasian pen a siangthou hi chi’n ngaihsun un. Tualeh nou a om kinepna jiak a hung dong jousiahte nunnemtak leh lauhdan siam a dawng ding in bangchiklai peuh in kiveng gige un, 16 Krist a na gamtatdan hoih uh dikloutak a hung demte, silgilou bawl bang a ahung gensiatnate , a hung hih minsiatnate, ua a jumtheihna ding un sialehpha theihna hoihtak nei in. 17 Ajiak hihpen Pasian lemsak ahihleh silgilo bawljiak a thuaksang in, silhoih bawl jiak a thuak ahoihjaw hi. 18 Ajiak pen Pasian kiang a ahung puitheihna dingin Krist in zong khialhnate jiakin khatvei a thuakta a, midik in midiklou tangin, taksa in hihlup in a om a, hinanleh kha a suk-hing in a om hi, 19 hua kha in avapai a thongsung aom khate kiangah thu a vagen hi. 20 Huate’n nidanglai a, Noah damlai a long bawl sungteng, Pasian thuakzohna in a ngaklaiin a thumang kei ua, hua longah mi tawmnou khat, huapen mi giat hinna tuia hundam in aom uhi. 21 Hua lim etsakna in, baptisma in zong, tuiin taksa nitna koihmang hilou in, hinanleh Pasian lam a sialehpha theihna hoih dawnna suklungkimna hijaw in Jesu Krist thohkikna in ahung hundamta hi, 22 amahpen van ah apaita a, vantungmite leh, thuneihnate leh, sil bawltheihnate a thunuai a koih in Pasian jiatlam ah a omta hi.

I Peter 4

Hinkhua kikhelna

1 Tuajiakin eite a ding a Jesu Krist in taksa a hung thuaksakta ahihman in, nou jong huachibang lungsim in kithuam un; ajiak pen kuapeuh taksa a thuaksa in khialhna a tawpsanta hi. 2 Ahun omlaiteng taksa a mihing utnalam bang a hing  taloua hinanleh Pasian deihdan a a hinjawkna ding in. 3 Ajiak huknate, sa utnate, uain hainate, uainmun nopnate, ankuang luinate, tualeh milim biakna kihdakhuaite a i omlaia Jentelte deihlambawlna i tu-masang hinkhuate uh ahunta hi. 4 Huasan ah amauh nopbawl luatna banga na bawllouh uh lamdang asa ua, nou ahung gensiajel uhi. 5 Huate’n mihing leh misite vaihawm ding a mansa a ompa kiangah a tanchin uh agen ding uhi. 6 Taksa a om mihing bang a vaihawmsak a aom ua, kha a Pasian bang a a hintheihna ding un, hihjiakin akiang uah tangthupha gen in aom hi.

Pasian silpiak kemhoihtute

 7 Hinanleh siljousiah tawpna ding pen anaita hi, huajiakin lungsim diktak pua unlas thum kawm in pilvang un. 8 Tualeh sil bangkim tungah, khat leh khat ngainatak in ki ittuah chiat un, ajiak ki it tuahna in khialhna tampi akhuhkhum hi. 9 Phunchiak louin khat leh khat kijintun tuah chiat un. 10 Michih in silpiak na muh bangjel un Pasian hehpihna kemtu hoihtakte bangin, huate in na kesepsak tuahchiat un. 11 Kuapeuhin thu agen leh Pasian kam a thupawt bangin gen hen; mi kuapeuhin thu nna asepleh Pasian in hanta a piak bangjel in sem hen, Jesu Krist jal a Pasian pen sil bangkim a pahtawi a a omtheihna ding in. Amah kiangah tangtawn tangtawn in pahtawina leh lalna omta hen. Amen.

Kristian hihjiak a gimthuakna

12 Ittakte aw, nou ze-et ding a na tung ua ze – etna hungtung pen sillamdang bang ahia hungtung bangin ngaihtuah kei un. 13 Hinanleh Krist thuaknate kikoppih na hihjiak un kipak un, tuachi’n athupina ahung kilat chiangin nou zong nakpitak a nuam in na kipak ding uhi. 14 Krist min jiak a phawki na hih uleh, na hamha uhi, ajiakpen thupina kha leh Pasian kha natung uah aom hi. Amauh lam thu ah amauh pen gensiat ahi a, hihnanleh noulam thu ah pahtawiin aom hi. 15 Hinanleh nalak ua kuamah in tualthat bangin hiam, guta bangin hiam, silgilou bawl basngin hiam ahihkeileh midangte silbawl gensiami ahihjiak in hiam thuakkei hen. 16 Ahihhang in mi kuapeuhin Kristian ahihjiak a athuakelh, jumkei hen, hinanleh hih tungtang jiakin Pasian pahtawijaw hen                                     

17 Ajiak Pasian innkuante lak ah vaihawmna pat hun a hungtungta hi; tualeh eite a pat ahihleh Paaian tangthupha gingtaloute bang ahita diai le? 18 Tualeh                                                             

“Midiktat bawn hundam ahih hamham leh;                                                                     

mikhialte khoiah akilang tading ua le?”                                                                     

19 Tuajiakin, kuapeuh Pasian lemsak dungjuia thuakten silhoih bawl in akha uh siamtu gin-omtak kiang a bangin a kiang ah kemsak hen.

I Peter 5

Pasianmite

1 Na lak ua upate pen kei na upa hihpih uleh Krist thuakna theihpihtu leh, thupina hung kilang ding zong tanpihtu in, kung hasot hi. 2 Nalk ua Pasian belam pawl omte vak un, alou theilou ahihjiak hilou in, utthu jaw in, metna nin deihjiak hilou in, lingsim a deih taktak jaw in. 3 Pasian goutante tung a kithuneisak louin,hinanleh pawlte etton hiding in. 4 Tualeh belampu lianpen ahungkilat chiangin thupina lallukhu tultheilou na muding uhi. 5 Tuachimah bangin, nou khanglaite upate nuaiah kituhlut un. Ahi, na un un khat leh khat kithuman tuah chiat unla, kingiamkhiatna in kithuam un, ajiak “Pasian in mi kiliansakte adou a, hinanleh mi kingiamkhiatte hehpihna apia hi.” 6 Tuajiakin ahuntak a nou ahung pahtawi theihna dingin, Pasian khut hattak nuaiah kingiamkhiat un. 7 Aman ahung ngaihsak jing jiakin na lungkhamna jousiah uh a tungah nga un. 8 Pilvang unla, kiveng gige in om un. Ajiak na melmapa uh Dawimangpa humpinalkai humham bangin, nek ding zongin avak kawikawi hi. 9 Na sanggmte uh leitung a omte tungah hauchibang gimthuaknate atung hi chih dou un. 10 Hinanleh Krish Jesu mang a tangtawn thupina ding a eite haungsampa, hehpihna Pasian, tomkhat sung nathuak nung un nou ahung hoih bukimsak in, ahung hihkip in, ahung hihhat in, ahung omdetsak ding hi. 11 Amah kiangah tangtawn tangtawn in pahtawina leh lalna omta hen. Amen.

Mangpha khakna leh gualjawlna

12 Sanggampa gin-omtak a ka theih Sila khut in nou hasotna leh, huapen Pasian hehpihna diktak idinna uh ahi chih theisak kawm in na kiang uah tomkimtak in kung gelh ahi. 13 Nou tawh elkhawm, Babilan aom saptuamte’n, chibai ahung buk uhi; tuachimah bangin ka tapa Marka in zong ahung buk hi. 14 Itna a kitawp in khat leh khat chibai kibuk un. Krish ah aom noute jousiah khamuanna om hen. Amen.