Hebraimite

HEBRAIMITE

KIANG A LAIKHAK

Hebraimite 1

Pasian in a Tapa tungtawn in thu agen

(Jhn. 1.1-4)

               1 Pasian, nidanglai a pulepate kiang a lam tuamtuam leh hun tuamtuam a Jawlneite zang a thu nagenpa in, 2 hih ni nunungte ah a Tapa in i kiang ah thu a genta hi, amahpen sil jousiah luahtu dingin aguat a, leitungte zong amah tungtawn in asiam hi. 3 Amahpen a thupina vak leh a mihing hihna lim phuangkhialeh, sil jousiah a silbawltheihna thu a tungding dingin, a mahmah in i khialhnate a silsiang zoh in tunglam ah jiatlam ah a touta hi, 4 vantungmite sang a min ngaihjaw a muhbang ngeiin amauh sang a hoihjaw gouluahtu ding a siam ana hita him ahi.

Tapa vantungmite sangin lianjaw

5 Ajiak vantungmite lak ah Pasian in kuakiang ah ahia hihthute gekhakna a naneih ngai,

“Nang ka Tapa nahi a; tu-nin kung neikhiata hi.”

Chihleh,

“Amah dingin Pa ka hiding a, amahpen kei ding in Tapa ahi ding”

6 Hinanleh, Ta masapen leitung a ahung puilut kik laiin,

“Pasian vantung mite jousiahin amah bia uhen,” achi hi. 7 Tualeh vantungmite tungtang thu ah hichiin achi hi,

“Aman vantung mite pen huih in asiam a, tualeh ana semtute meikuang in asiam hi,” chi hi. 8 Hinanleh Tapa tungtang thu ah hihthu agen hi,

“Aw Pasian, na Laltouna tangtawn tangtawn dongin omding hi, diktatna Lalchiang zong nagam Lalchiang ahi.

9 Nang diktatna na it a tatkhialhna na na hua hi. Tuajiak in Pasian, na Pasian in nangoen na lawmte sang atungtuang jaw in kipakna thau ahung nuhta hi.”

10 Tualeh nang, Toupa, atu’ng in leitung kingakna na phum khinta, tualeh vantungte zong na khutsuak  

ahi,.

11 Amauhte ahung mang ding a, hinanleh nang na omgige hi; amua pen aun un puansilh bangin ahung lui

dinga;

12 puan bang in na jail ding a, a khekta ding uhi. Hinanleh nang a ngaimah na hi a nakum ten zong bei ni

anei kei ding hi. 13 Hinanleh vantungmite lak kuapen kiangah ahia hihthu gebkhak na ana neihngai,

“Na melmate na kengkoihna a ka bawl masiah ka jiatlam ah tou in,”

chih. 14 Amauhte jousiah hundamna gouluah dingte nna sepsak ding a sawlkhiat nasepna khate hilou uh a hiam?

Hebraimite 2

Ngaihsak ding a vauna

1 Tuajiak in i thujaksate uh i ngaipoimah diak ding uhi, atuachih keileh i tolhmang san khading uhi. 2 Ajiak vantungmite jang a thu kigen bawn akip a, tatkhialhna leh thumanlouhna chinteng in a kithuahpih nuamman diktattak amuh uleh, 3 hichituk a thupi  hundamna thu  ngaisaklou a i om leh bangchiin ahia i suahtak ding uh? 4 Pasian in zong chiamtehnate, sillamdangte, lamdang tuamtuam leh, khasiangthou silpiakte in, ama deihdan dunghouin amauh a theihpih hi.

Hundamna hung lamkaihtu

(Psa.8.1-9)

5 Ajiak aman a tanchin i gen uh, tunung chiang a hung om ding leitung pen, vantungmite  nuaiah                                                         akoih kei a. 6 HInanleh mikhat in khoimun hiam ah:

“Mihing bang ahi hiam hizata a na ngaihsak;

ahihkeileh mihing Tapa zong bang ahi hiam hizahta a na khuahtuah?

7 Nang vantungmite sangin

amahpen themkhat ngiamjaw in na siam a;

thupina leh zahna na khusak a, na khut nasepte tungah na koihta hi.

8 “Sil jousiah a thuthu a om ding in

akengnuai ah nakoihta hi”

chi’n ana theisak ta hi

“Sil jousiah a thuthu a om ding a anuai a akoih jiak in”, anuai a akoihlouh bangmah aom kei hi. Hinanleh tu leh tuin sil jousiah anuai a kikoih in i munai tadih kei uhi.

9 Hinanleh Jesu pen, Pasian hehpihna jiak a michih a ding a sihna a cheptheihna ding a, sihna a thuakna ding jiakin themkhat vantungmite sang a ngiamjaw a bawl aom a, thupina leh zahna khuksak a om in i mujaw uhi. 10 Ajiak amah a ding a sil jousiah om a amah hiak a bangkim ompa a ding pen, ta tampite thupina a puilutna a, a hundamna uh bawltu pen gimthuaknate jiak a sukbukim ahih akilawm mawng ahi.

11 Ajiakpen hihsiangthoutu leh hihsiangthoute pen khat a pat ahi ua, huajiakin aman amauhte pen unaute chih ajumkei hi. 12 Tuachi’n,

“Ka unaute kiangah na min ka phuangkhia ding a;

kikhawmte lak ah la sa in kung phat ding hi.”

chi in. 13 Tualeh, “ Amah ah ka ginna ka koih ding a,” achi kik hi. Tualeh, “En un keileh Pasian hung piak naupangte achi kik hi.

14 Tuachi’n, naupangte pen taksa leh sisan tangkhawm ahih jiak un, amahngei in zong huamah bang a hungtang hi, sihna jiak a sihna thuneitu, dawi, a sukmang theihna ding in, 15 sih laujiak a adamsung teng uh saltang a om jousiahte a suahtatsak theihna ding in. 16 Ajiak aman vantungmite panpihna a piakei a, hinanleh Abraham suante a panpih jaw hi. 17 Tuajiakin mi a ding a khialna thupha tawina ding a, Pasian lam silte a siampi mi khuatuahthei leh gin-omtak ahihtheihna dingin, sil housiah a a unaute bangbang a bawl a ahung ompen amah a dingin apoimoh him ahi. 18 Ajiak amahngei in zong khemna tuak a ana thuaktak jiakin, khemna thuakte apanpih thei hi.

Hebraimite 3

Jesu Mosi sangin alianjaw

1 Tuajiakin, unau siangthou, vanlam sapna tangte aw, i thugin uh sawltakte leh, siampi Krist Jesu ngaihtuah un. 2 Pasian innsung mite jousiah lak a Mosi agin-om mahbang in, amah pen aguattu kiang ah a gin-om hi. 3 Ajiak inn sang a alamtu pahtawia aom jawk bang ngeiin, amahpen Mosi sang a thupijaw a sim ahita hi. 4 Ajiak inn jousiah mi kuahiam khat lam ahia, hinanleh sil jousiah alamtu Pasiam ahi. 5 Tualeh Mosi pen khuanung a thu hung kigen dingte theihsakna dingin, Pasian innsung nasemte jousiah lak ah sila bangin agin-om taktak hi 6 Hinanleh, krist pen, Tapa bang in ama innsung ngei a agin-om ahi, a tawpdong a i hahkatna uleh i kinepna kipakna uh i tukdet phot uleh a innsung mite ihi uhi.

Pasianmite a ding tawldamna

(Psa. 95.7-11)

7 Tuajiakin, Khasiangthou te gen bang in

“Tunia a aw najak uleh,

8 gamdai a ze-etni a ahih thangpaih bang un,

na lungtang uh khauhsak kei un,

9 hualaiin na pulehpate un ahung khem ua, ahung ze-et ua,

tualeh kum  sawmli sung ka silbawl a muta uhi.

10 Tuajiakin, hua suante tungah ka hehta a,

‘tualeh amau’n a lungtang un a ngaihtuah khial gige ua,

ka lampite zong a theikei uh,’ kachi hi.

11 Tuchi’n ka thangpaihna in ka kichiam a:

Ka tawldamna ah alutkei ding uh!”

chi in.

12 Pilvang un, unaute, atuachih keileh Pasian hing a pat paikhia dingin nalak ua mi khattou sungah gitlouhna, lungtang gilou ahung omkha ding hi. 13 Hinanleh “Tuni,” akichih lain nitengin khat leh khat ki hasottuah jaw un, atuachih keileh nalak ua mi kuahiam khat khialhna a khemna a hihkhauh in na omkha ding uhi. 14 Ajiak i ginna kipatna uh a tawpdong a kiptak a i tukkip pouh uleh Krist tanpihtute i hita uhi.

15 Tualeh:

“ Tunia, a aw najak uleh,

a hehsak lai uh bangin na

lungtang uh khauhsak kei un,”

chih ahihlai in.

16 Ajiak khenkhat in ajak hang un a hihthangpai uh, ahita in zong Izipt gam a pat Mosi puokhiatte hilou ahi-uh maw le? 17 Tuin kuate tungah ahia kum sawmli sung lungkim loua a om? Sil bawlkhialte, gamsaia aluang uh lumte tungah hilou amaw. 18 Tualeh a gingtaloute kiang loungal kua kiangah ahia, “Tawldamna ah na lutkei ding uh,” chia a kichiamna? 19 Tuachi’n gintatlouhna jiak a lutthei takei uh chih imu uhi.

Hebraimite 4

Pasian chiam tawldamna

1 Tuajiakin, i lau ding uh, atuachih keileh a tawldamna a lutna ding thuchiam omjingnapi’n nalak ua mi khattou chinglouin na omkha ding uhi. 2 Ajiak amau kiang a gen ahih mahbang in; tangthupha pen i kiang a gen ahi a, hinanleh thu a jatute a ginna tawh akizoplouh jiakin, athujakte uh pen amau’n a phattuampih kei uhi. 3 Ajiak ei a gingtasate pen hua tawldamna ah i lutta uhi,

            “Ka tawldamna ah a lutkei ding uh:

            ‘Ka thangpaihna a ka kichiam mahbang in!”

laitung siamchil a pat nnate siamzohsa hitamahleh, chia agen mahbang in. 4 Ajiak aman munkhat ah nisagih ni thu hichibang in agen hi, “ Tualeh Pasian in nisagih ni in a nasep jousiah a pat a tawldamta hi,” chi in. 5 Tualeh hihmun ah, “Ka tawldamna ah a lutkei ding uh,” achi kik hi 6 Tuajiak in mi khenkhat tawldamna ah alut ding uh thuchiam a omnaklai jiakin leh, nidang a tangthupha gen masaknate a thumanlouh jiak ua alutlouh jiak un. 7 Hun sawtpi ningin David ah, “Tuni” chi’n bangni ahiam khat a guatkik a:

            “Tunia, a aw najak uleh,

na lungtangte uh khauhsak kei

un.”

            8 Ajiak Joshua in amaute tawldamna na piakhinta hileh, tuanung in aman nidang thu agen kei ding hi. 9 Tuajiakin Pasian mite a dingin tawldamna khat aom nalai hi. 10 Ajiak Pasian in ama nasepte a khawlsan mahbang in ama tawldanna a lutte zong a nasepte uapat a khawlta uhi. 11 Tuajiakin hua tawldamna a lut ding in hahpan in i pang ding uhi, atuachih keileh ni khattou hue gintatlouhna etsakna bang a om in i puk kha ding hi.

            12 Ajiak Pasian thu pen ahing a, sil a bawlthei a, namsau hiamtuah saingin ahiamhaw a, henna leh kha, tualeh guhtuah leh chintuiguh khenthei khop in asunthei a, lungtang a ngaihtuahnate leh tupte theikhentu ahi. 13 Tualeh silsiam khatzong ama mitmuh a kisal bangmah a omkei a, hinanleh akiang a i tanchin i tutna dingpa mitmuh in silhousiah guaktang leh kihongsa ahi.

Jesu Siampi

            14 Tuachiin, vante a paisuak Siampi, thupitak Jesu, Pasian Tapa, Ineih jiakin i thugin uh i pomkip ding uh ahi. 15 Ajiak i hatlouhnate uh hung thuakpih khalou siampi inei kei a, hinanleh eimah bang a lamchinteng a khemna tuaksa, khialjong khiallou nei i hijaw uhi. 16 Tuajiakin zahngaihna i tantheihna ding un leh taksap hun chiang a panpihna ding hehpihna leh zahngaihna i mutheihna ding un, hangsantak in hehpihna laltouna pen inaih ding uhi.

Hebraimite 5

Siampite a ding chinnate

            1 Ajiak siampi milak a kiladokte pen khialhnate jiaka silpiakte kithoihnate alatkhawm theihna dingin, Pasian lam silte a mite a ding a pansak ahi uhi. 2 Aman bangmah thieloute leh lamkhialte tungah hehpihna a neithei hi, ajiak amah ngeizong alat apoimoh hi. 4 Tualeh hua pahtawina pen, Aaron asap bang a Pasian in asap louh ngal, mi kuamah in amah a ding in a kilak ngaikei hi.

Melkizedek tangtawn siampu

            5 Tuachimah bangin Krist zong siampi a siam a om ding in amah leh amah a kitawisang kei hi, hinanleh a kiang ahm

“Nang Ka Tapa na hi tuni’n kung neikhia hi.”

6 Aman muntuam khat a,

“Nangpen Melkizedek bang a tangtawn siampu nahi,”

chia agen mahbang in.

            7 Aman taksa a aomlai nite in, sihna lak a amah hundamtheipa kiangah nakpitak a kap leh khitui luangkawm in thumna leh ngetna alat nungin, Pasian laudan a siamjiak in ngaihkhiat in a om hi. 8 Tapa hinanleh zong, a silthuakte lakpan thumandan ajilta hi. 9 Tualeh sukbukim a hung om in, a thumangte jousiah a dingin tangtawn a hundamna thuneitu a hunghita hi, 10 Melkisedek omdan bang a siampi in Pasian in a bawlta hi.

Puklou ding a taihilhna

            11 Amah tungtang gen ding tampi ka nei ua, na ngaihpeih louh jiak un agenchian zong ahaksa hi. 12 Ahun lam ngaihtuah injaw heutu hikhinta hile uchin kilawm hi a, Pasian thubulte kuahiam khat in a hunghilh ngaikik na hita uhi. Tualeh an-gum hilou a, nawitui kiphamoh bang na hunghita uhi. 13 Ajiak mawitui nejousiah naungek ahihjiak un diktatna thu ah theihna aneikei uhi. 14 HInanleh an-gum pen mi pichingte, a ngaihtuahna uh jang a atheih theihna uh hihjoitate a ding ahi.

Hebraimite 6

Pukna lauhuai

            1 Tuajiakin Krist thubulte nusia in pichin lam i manoh ding uhi. Silbawl sisa a pan kisiknate, Pasian lam a ginnate; 2 baptistma thuginte leh, khut ngakte leh misi thohkikna thu leh tangtawn vaihawmna thute. 3 Tualeh Pasian in ahung phalsakleh hihte i bawl ding uhi!

            4 Ajiak khatvei hihvak a om a, vanlam silpiak chiamta a, Khasiangthou tansak a om a; 5 tualeh Pasian thu hoih leh hun huntung ding a sil bawltheihnate chiamkhinte pen, 6 apukua ahihleh, kisik ding a siamthak gual ahikei uhi! Pasian Tapa amauh a ding a kilhlum kik leh sialphou ahihjiak un.

            7 Ajiak lei atung a ju guahtou na dawnjel in, amauh ding a lou na kikhawhte ding a, anteh louhing nektheih hung suah in Pasian a pat gualjawlna amu uhi. 8 Hinanleh lingkungte leh pen, deihlouh in a om a, tualeh hamsialawh in a om a; atawpna pen meia hal ahi

            9 Hinanleh ittakte aw, kou hichibang in gen mahle ung, noupen hih sang a hoihjaw leh hundamna tawh kituah khawm silte nabawl uh kunggingtauhi. 10 Ajiak amin a nna nasep uleh na itna uh na suklat uh, misiangthoute nna nasepsak ua, tualeh tua nna nasep jing uh pen manghilh dingin Pasian pen diktatlou ahikei hi. 11 Tualeh noute kuapeuhin kinepna theihchianna kim muding in, atawp dong in taimachiat le uchin chih kung deih mahmah uhi. 12 Ki thadahsak lou a, hinanleh ginna leh thuakzohna jiak a thuchiam gouluahtute omdan enton te na hih uh kung deih hi.

Pasian thuchiam pellou

            13 Ajiak Pasiam in Abraham kianga a thuchiam theihlouh jiakin, amah leh amah a kichiam a 14 “Gualjawl zong kung gualhawl taktak ding a tualeh pungzong kung pungsak ding hi,” chi in. 15 Tuachi’n aman dawhjoutak a athuak mualsuah nungin silchiam pen amuta hi. 16 Ajiak mihingte pen, amau sang a lianjaw in a kichiam veu ua, tualeh thu namdetna ding a kichiamna pen amauh a dingin kinialna jousiah suktawpna ahi. 17 Huachibang in, Pasian in thuchiam gou luahtu dingte kiangah ngaihtuahna kiptak a kikhikkik theilouhdan nasatak a ensak nuam in huapen kichiamna in a hihkipta hi. 18 Huapen Pasian juauthei ahihlouhna, kikhekkik thieilou sil nihte hiak a, eite kihumbitna ding a imai a kinepna kikoih pen tuding a taiten hasotna thupitak i neihna ding un ahi 19  Hih kinepna pen, henna sikkip in inei a, chiantak leh kiptak tauleh puanjak sung a lut ahi. 20 Hua ah Jesu, Melkizedek omdan bang a tang tawn a siamlpulal a siam in, eite ding a ma kaiin ana lutta hi.

Hebraimite 7

Hebraimite 7 Siampu Melkizedek

(Gen. 14.17-20)

            1 Hih Melkizedek, Salem Kumpipa, Pasian tungnung pen siampu, kumpipate vathat joua hung paikik Abraham nadawnpa in amah pen a gualjawlta a, 2 amah kiangah Abraham in zong aneih jousiah “Sawm akhat” apia hi. Amin omjia ahihleh, (Amin masa pen in “Diktatna Kumpipa,” tuaban ah, Salem Kumpipa chihna ahi a, tuapen “Lemna kumpipa,” chihna ahi.) 3 Amah pen pa zong neilou, nu zong neilou, khanggui neilou, ompatni neilou, hintawpni neilou, hinanleh Pasian Tapa bang a bawl, tawpni neilou a siampu a omjing ahi.

            4 Tuin chi suangtu Abraham mahmah in zong gal sil laksak a pat silhouhte a pat sawm a khat a apiaknapa. Hihpa thupidan ngaihtuah sin ua. 5 Tualeh Levi suante lak a siampu nasep mutaphot in danthu dungjuiin mite a pat sawm a khat lak ding thu amu ngei uhi, huapen a unaute lak ah ahi, huapen Avraham khakl a pat pawt hinanle uh, 6 Hinanleh amau a pat a khanggui laksawn a omloupa’n Abraham a pat sawm a khat ala a, thuchiamte neipa a gualjawlta hi. 7 Tualeh aneujawpen alianjaw in a gualjawl hi chih nialguallouh ahi. 8 Tualeh hihsan ah, mihing sijelte’n sawm a khat a ngah ua; hinanleh huasan ah, amah hingjing hi chia atanchin theihsak a ompa in a ngah hi. 9 Levi, (sawnm a khat ngahtu in zong,) Abraham kiangah sawm akhat apia hi. 10 Ajiak Melkizedek in ava lamtuah lain amahpen apa khal ah aom nalai hi.

            11 Tuajiakin, Levi siampu hihna a bukimna muhtheih hitaleh, ajiakpen hih nuaia mite’n danthu ana mu uhi. Aaron omdan bang a chih hilou a, Melkizedek omdan bang a siampu dang ahung om apoimoh bang ahia? 12 Ajiak pen siampu hihna ahung kikhektak jiakin, danthu zong ahung kikhek apoimah sem hi. 13 Bangjiakin ahia ichihleh a tungtang a hihthu kigrnna pen namtuam a nasem a omkei uhi. 14 Ajiak I Toupa uh pen Judah nam a pat hung piang ahi chih chiantakin alang hi, hua nam thu ah Mosi in siampu tawh kisai thu bangmah a genkei hi.

Melkizedek bang siampu dang

            15 Tualeh Melkizedej imdan bang siampu dang ahung om jiakin ka thugen uh a kichian sem hi 16 Amah pen taksa thupiak danthu bang a hungjpai hilouin, hinanleh hintawp neilou sil bawltheihna neia hungpai ahijaw hi. 17 Ajiak aman, “Nang pen Melkizedek omdan bang a, tangtawn siamjpu na hi chi’n atheisak hi.” 18 Thupiak om masapen, hatlouhna leh phattuam louhna jiakin paih in a omta hi. 19 Ajiak danthu in bangmah a hihbukim kei a; alangkhat ah, kinepna hoihjaw ahung pualut hi, hua tungtawn in eite’n Pasian inaih uh ahi.

            20 Ajiak kichiamna omlou in; amah pen siampu a bawl ahita hi. 21 Ajiak amauhte pen kichiamna omlou a siampu a siam ahi ua, hinanleh amah pen a kiang ah,

“Tuopa a kichiam a,

a lunghiekik kei ding,

Nang pen Melkizedek omdan

bang a tangtawn a siampu nahi,”

chia genpa kichiamna a siam na hi.

22 Tuachimah bangin Jesu pen thukhun hoihjaw hihkiptu a siam ahung hita hi.

            23 Amauh pen sihna jiak a pandensak theihlouh ahih jiak un, siampu a natam ngut ua. 24 Hinanleh hihpa tangtawn a omjing ahihjiak in, siampu hihna khektheihlouh anei hi. 25 Tuajiakin amah a Pasiam kiang a hung paite pen amau a ding a ngetsak ding a a hingjing jiakin atawptan in a hundamthei hi.

            26 Ajiak hichibang siampi siangthou, khansialou, ninbanglou,. Mikhialte lak pan a kituamkoih, tualeh vante sang a sanfjaw a siam pen ei a dinfin akilawm mawng ahi. 27 Aman hua siampite lat bangin, nitengin, ama khialhnate jiak a kithoihna lan masa in, huazoh chiangin mite khialhna alat a ngaikei hi. Ajiak aman hihpen amah leh amah a kilat in ngamden dingin khatvei thuin ana jouta hi. 28 Ajiak dan in mihing hatlouhna neite siampu in aswpjel a; hinanleh kichiamna thu, dan nung a hung om in ahihleh, Tapa, tangtawn a ding a hihkim khitsa pen a guatjawta hi.

Hebraimite 8

Jesu i Siampi lian uh

            1 Tuin i thugente lak a poimoh pen ahihleh hih ahi, bante a thupi pen, Laltouna jiatlam a tou, huachibang siampi i nei uhi. 2 Mihing phuh hilou, Pasian phuh, mun siangthou leh puanbuk taktak a nasemtu pen.

            3 Ajiak siampi jousiah silpiakte leh kithoihnate lan ding a guat ahi ua, tuajiakin hih siampi in zong banghiam khat lat ding aneih apoimoh hi. 4 Ajiak leitung a ana om hilehjaw, danthu bang a silpiakte lantu siampute ana om jiak un, siampu in a pangkei ding hi. 5 Huate in banlam silte etsakna leh lin nna asemjel ua; Mosi, in puanbuk lam ding a akisak laia, Pasian in ahilh bangin, ajiak aman, ” Mualtung a etton ding a hung ki musak dungjuiin sil jousiah bawl ding in pilvang in,” achi hi. 6 Hinanleh tuin thuchiam houhjawte tung a bulphuh thukhun hoihjawsem palai ahih mahbang in nasepna hoihjaw ana tangta hi.

            7 Ajiak thukhun masapen dem bei, adiklouhna omlou ana hitaleh anihna pen ding min ngaihtuah lou ding ahi. 8 Ajiak amauhte demna in aman hihthute agen a:

“Ngaiin Isreal innkuante leh,

Judah innkuante tawh, thukhunthak ka bawl hun

          ding nite hungtung ding ahita,”

 Toupa’n ahi hi;

    9 Izipt gan a kipan a pu leh pate uh puikhia ding a,

a khut ua ka tuk nia akiang ua ka thukhun pen bang hilou in.

Ka thukhun a aom gige louh jiak un, ken zong amauh ka ngaihsak kei hi, Toupa’n achi hi.

10 Ajiak pen hua nite nung chiang a

Isreal innkuante kiang a ka thukhun ding pen hih ahi

      Toupa’n achi hi:

A lungsim uah ka dan thupiakte

ka koih ding a,

a lungtang uah ka gelh ding.

tualeh amauh a dingin a Pasian

         uh ka hi ding a,

 tualeh kei ding in amauh ka mite

             ahi ding uhi.

   11 Amau kuamah in

“Toupa theiin,’

chi’n a invengte leh a

sanggamte a thuhilh nawn kei ding a.

Ajiak aneupen a pat alianpen tan in,

aun un a hungthei ta ding uhi.

12 Ajiak a diklouhnate uah ka zahngai ding a,

 a khialhnate uleh a gitlouhnate

uh zong ka theigige nawn kei ding hi”

13 Aman, Thukhunthak, chia agen jiakin a masapen a luisakta hi. Tuachi’n alui ahung upata pen amang ding kuan ahita hi.

Hebraimite 9

Van leh lei a biakna

            1 Tuachi’n thukhun masapen in zong Pasian nasepna dante leh hih leitung lak a mun siangthou a nanei taktak hi. 2 Ajiak puanbuk a kibawl a, amasapen ahihleh , meivak khoihna len, dohkan leh, tanghou koihna mun siangthou akichite ahi. 3 Tualeh puanjak nihna nungah mun siangthou pen kichi puanbuk aom hi. 4 Huasan ah gimnamtui halna kham bawm leh thukhun singkuang leh kham tuia luankhum asung a manna omna kham bel leh, Aaron chiangsel leh, thukhun suangpekte omna aom hi. 5 Tualeh atung ah zahngeihna touna liah in thupina Cherubmite a om uh. Huate tungthu pen tuin akim sepsep in i genthei kei ding uhi.

            6 Tualeh hih silte hichibang a guatkholh ahih chiangin, siampute’n Pasian nna sem ding in puan inn masapen sungah alutjel uhi, 7 hinanleh dannihna ah siampi guak, kumteng in khatbei, ama khialhna leh mipite khialhna a ding a alat ding sisan tawilou hilou in alutjel hi. 8 HIh in ahihleh, puanbuk dantean masapen aom laisiah mun siangthou pen a lutna lampi a kilang nailou ahi, chih Khasiangthou ahung tehisak hi. 9 Huapen tulou hun tehkakna ahi, huasan ah sialehpha thaihna lam a abiatu houh bukimsak theilou silpiakte leh kithoihnata alanjal uhi, 10 huate pen nekte, dawnte, kisuksiangna tuamtuante, leh taksalam dante guak ahi.

            11 Hinanleh Krist pen silhouh hung om dingte siampi ding a hungpai in puanbuk lianjaw leh bukimjaw khut a bawllouh, huapen, silsiam lak a ahikei chihna ahi. 12 Kelte leh bawngnoute sisan a hilou in, hinanleh amah mah sisan ngeiin, eite a ding a tatkhiatna muin mun siangthou ah ngamden dingin khatveiin ana lutta hi. 13 ajiak bawngtalte leh kelte sisan leh bawngla vutvam mi nin tung a theh inbawn taksa asianthousak leh, 14 Krist, tangtawn kha jiak a gensiat bei a Pasian kiang a kilan sisan in, Pasian hing nna sem ding in, silbawl sisa a pat in na sialehpha thiehna uh bangzahta in siangthousak tazen diam!

            15 Tualeh hih jiakin amah pen thukhun thak palai ahi a, thukhun masa nuaia tatkhialhnate a pat a tatkhiatna ding a asihtak jiakin, sapten tangtawn a gouluah ding thuchiam pen a tangthei ding uhi.

            16 Ajiak pen thukhun omna peuh ah thukhungtu sihna zong a om ngeingei ding ahi, 17 ajiak pen mihingte asih nungin thukhun in thu aneipan giap hi, a thukungtu adamsung teng pen thu mawng mawng a neikei hi. 18 Tuajiakin thukhun masa ngeizong sisan panglou in sukkip ahikei hi. 19 Ajiak Mosi in danthu dungjuia kithuhilhna jousiah mi kiang a agenzoh in bawngnoute leh kelnoute sisan pen, tui tawh khausandup tawh, hussop tawh ala a, tualeh laibu leh mipite jousiah atheh a. 20“Hih pen Pasian in ahung piak thukhun sisan ahi,” chi in. 21 Tuachimah bangin aman puanbuk leh nasepna kuang leh nou, vanzak jousiah sisan a hihsiangthou phial in a om a, sisan suahlou in ngaihdamna a omkei hi.

Krist kithoihna in khialhna a lamang

            23 Tuajiakin vanlam a sil omte batpihte pen hihte a hihsiang a aom ding him ahi, hinanleh vanlam sil taktakte pen hihte sang a kithoihna hoihjawte a hihsiangthou a aom ding ahi. 24 Ajiak Krist pen a taktak etsakna, khut a bawl mun siangthou ah alut kei a, hinanleh tuin Pasian maiah eite tang a kilang dingin van ah a lutjawta hi. 25 Siampi kumteng a ama sisan hilou tawikawm a mun siangthou a alutjel bangin, amah pen amah leh mah kilan dingin a lutngaikei hi, 26 huachilou hileh leitung siamchil a pat tamvei a thuakkhinta ding hi. Hinanleh tu huntawp ah amah pen khialhna sukbeina ding a amah kilan tawm dingin khatvei ahung kilangta hi. 27 Tualeh mihing a dingin khatvei sih seh ahia, hinanleh hihzoh chiangin vaihawmna a om ding. 28 Tuachimah bangin Krist zong, mi tampite khialhna puamang ding a khatvei lat in aom a. Amah kilawmptak a na ngaktute kiangah khialhna panglou in hundamna mu dingin anihveina ahung kilang kik ding hi.

Hebraimite 10

Krist kithoihna khatvei a ding a manden

            1 Danthu pen silhoih hung om dingte lim ahi a. Alim taktak ahihlouh jiakin kumsial a kithoihna alat jelte un ahung naihtute a bukimsak joukei hi. 2 Atuachilou hileh, alat uh tawptalou ding uh maw, ajiak abiatute pen khatvei hihsiangthou a omte in khial kitheihna a neinawn kei ding uhi. 3 Hinanleh hua kithoihnate ah kumteng in khialhnate kiphawk khiatna aom hi. 4 Ajiak pen bawngtalte leh kelte sisan in  khialhnate a lamangthei kei hi.

            5 Tuajiakin leitung a a hungpailai in aman:

 “Kithoihna leh sillat na deih

            kei a,

hinanleh pumpi khat nung

bawlsak hi;

6 halmang sillatte leh khialhna

sillatte ah,

nang kipakna na neikei,

achi hi.

7 Tuachi’n ken, ‘Ngaiin,

       laibu jial ah keima thu gelh

ahi,

na deihlam bawl ding in kungpai

hi, Pasian aw,”

ka chi hi.

8 “Masang in kithoihna leh silpiak leh halmang sillatte leh khialhna kithoihna na deihkei a,” hua ah kipahna zong na keikei hi. Huate pen danthu bang a lat ahi, a chihtak in. 9 Tuachi’n aman, “Ngaiin, na deihlam bawl ding in kung pai hi, Pasian aw,” achi hi. Anihna a tunding theihna dingin aman amasapen a lamangta hi. 10 Hua deihna lam a Jesu Krist pempi khatvei ngamden ding a lat jiakin hihsiangthou in i omta uhi.

            11 Tualeh siampu tengin niteng a nna sem in, khialhnate lamang theilou kithoihna ngaimah lan jeljel in ading uhi. 12 Hinanleh Krist in tangtawn a ding a khialhnate ding a kithoihna khat alat nungin, Pasian jiatlam ah a touta hi. 13 Huanungsiah a melmate akeng ngakna a bawl ahih masiah uh a ngakjingta hi. 14 Ajiak aman sillat khat in hih siangthousate pen tangtawn a dingin a hihbukimta hi.

            15 Thamlouin khasiangthou in zong ikiang uah ahung theisak hi, ajiak aman,

16 “Huanite nung chiang a

na kiang ua ka thukhun ding pen

hih ahi, Toupa’n chi:

a lungtangte uah ka dante ka koih

ding a,

tualeh alungsimte uah ka gelh

ding hi,”

chia a genkhit nung in. 17 Tuachi’n aman,

“A khialhnate uleh danlou

bangtak a a gamtetnate uh ka

theigige nawn kei ding hi,”

achih behlap nalai hi. 18 Tuachibang ngaihdamna omna phot ah, khialhna a dingin sillat aom nawn kei ding hi.

Pasian lam naihna

            19 Tuajiakin unaute, Jesu sisan jiak a mun siangthoupen a lutngamna nei in, 20 ei a ding a siangthou bik a ahung bawlsak lamthak leh hing ah puanjak (huapen a taksa chihna ahi) kantan in. 21 Tualeh Pasian innkuanpihte tung a siampi ineih jiak in. 22 Sialehpha theihna hoihlou a pat i lungtang uh thehsiang a om in, i pumpite uh zong tuisiang a sil a om in, tualeh ginna theihchetna lungtang diktak tawh inaih ding uhi. 23 I kinepna thuphuan pen uh linglou kei in i tudet ding uhi, ajiak amah thuchiam hungpeitupa a gin-om hi. 24 Tualeh itna leh silhoih bawlna lam a kitokthou dingin khat le khat i kingaihtuah ding uhi. 25 Khenkhatte omdan bang a i kikhopnate uh tawpsan louin, hinanleh khat leh khat kihasot tuah jawin, tualeh ni a hungnai semsem chih na muh mahbang un ki hasottuah sem un.

             26 Ajiak pen thutak theihna ineih nung a utna neia ikhialh teitei uleh, khialhnate ding a kithoihna a om nawn kei hi. 27 Hinanleh vaihawmna laouhuai kichiantak lam etna banghiam leh doudaltute kangmang ding thangpaihna meiah a omjawta ding hi! 28 Kuapeuh Mosi dan deihloumite pen theihpihtu nih leh thum thu in zahngaihna beiin asijel uhi. 29 Pasian Tapa tuanden a, thukhum sisan amah suksiangthouna pen sil nadanmai a sim a, tualeh hehpihna kha thangpaisak pen! Hua sang a bangchituk a gawtna thupijaw ahia thuak leh kilawm a na ngaihtuah uh? 30 Ajiak pen, “Phulak himhim kei lak ding ahi, keiman ka thukding hi.” Toupa’n achi, chihleh, Toupan amite vai ahawm sak ding, chia gentu amah ithei uhi. 31 Pasian hing khutsung a puk pen sil lauhuai mahmah ahi!

            32 Hinanleh nidanglai a, hihvak a na omnung ua, thuakna haksatakte na thuaklai nite uh ngaihtuah kik un, 33 langkhat ah phawknate leh gimtuaknate thuak in na om ua, langkhat ah ahihleh huachibang a bawl a omte thuakpihtute na hung hi uhi. 34 Ajiak nou ka kolhbulhna ah nung lainat ua, van ah gou hoihjaw leh omjing ding na neih uh kithiin, na van uh hung laksakte uzong kipaktak in na thuakjawta uhi.35 Tuajiakin, nuamman thupitak muding a na kimuanna uh; paikhia mawngmawng kei un. 36 bangjiakin ahia ichihleh, Pasian deihlam na bawlzoh ua, thuchiam pen na muthieihna ding un, thuakzohna na poimoh uhi. 37 Ajiak pen

“Tomkhat zoh chiang in

ahung paidingpa a hungpai

ding;

ajekai nawn kei ding hi.

38 Tuachi’n midiktat ginna in a hing

ding a;

hinanleh a nungtolh leh pen,

ka kha in amah ah kipahna a

neikei ding hi.”

39 Hinanleh eite pen mangthang ding a nungtolhte lak a mi i hikei ua hinanleh hinna humbit ding a gingtate lak a mi i hijaw uhi.”

Hebraimite 11

Ginna omjia

            1 Tualeh ginna pen sil kinepnate theihchianna, sil muhlouh te aom a theihna ahi. 2 Ajiakpen hihthu ah upate’n pahtat alawh uhi.

3 Ginna in leitungte  pen Pasian thu a suktuah khawm ahi chih ithei a, tuachi’n sil kimute zong sil kilangte asiam ahikei hi.

Abel, Enok leh Noahte pan a etsakna

            4 Ginna in Abel in Kaina sangin kithoihna hoihjaw Pasian kiangah alan hi. Huajiakin mikiktat ahi chih theihsak alawh a, Pasian in a silpiakte a theihpih a; huajiakin sikhin napi’n, thu agen nalai hi.

            5 Ginna jiakin Enok sihna mulou dingin lakmang in a om a; tualeh Pasian in a lakmang jiakin, muh in aom takei. Lakmanga a omna in Pasian a kipaksak hi chih theihsakna anei hi. 6 Hinanleh ginna louin amah kipaksaktheih gual ahikei hi, ajiak kuahileh Pasian kiang a hung pai in amah aom chih leh, amah guntuhtak a zongmite kiang a nuamman piatu ahi chih agintat ding ahi.

            7 Ginna in Noah, sil muhnailouhte thu Pasian hilh a na om in. Pasian lauhdan siam in a gamtang a a innkuanpihte hutdamna dingin kuang abawl a. Huatawh leitung siamlouh a tangsakta a ginna jiak a om diktatna gou luahtu ahung hita hi.

            8 Ginna in Abraham in anung chiang a gou ahung tan ding mun a sap a aom laiin a thumang a; tualeh khoilam a pai ding chih zong theilouin, a paikhia hi. 9 Ginna in gamchiam ah , mi gam a teng bangin ana tengjing a, thuciam kibanga a gouluahpeh ding Isak leh Jakob tawh, puan innte ah, ateng uhi. 10 Ajiak aman suangphum dettak nei, Pasian lam leh bawl khuapi pen a ngakjing hi.

            11 ginna in Sarah in zong nau paitheihna anei a, achiamtu pen muanhuai a asehjiak in ateknung in ta anei hi. 12 Tuajiakin asisa tawbang, mikhat a pat in, van a aksite bang a tam leh, tuipi piau a sehnel bang a simsenglouh ahung suakta hi.

            13 Hihte jousiah ginna neiin sil chiamte tanglou in asita uhi. Hinanleh gamlapi a pat galmuh in apomkip uhi. Leitung ah mikhual leh khualjin ihi uhi chih ana phuangta uhi. 14 Ajiak hichibang thu genten gamtuam khat azong uh chih chiantakin aphuang uhi. 15 Tualeh amau’n ahung pawtna uh gam lunggulh taktak le uh pen, kik kikna hunlemtang ana muta tham ding uhi. 16 Hinanleh tuin, gam hoihjaw deih ana hi ua, huapen, vangam ahi. Huajiakin a Pasian uh Pasian chih a sap a jumnawnkei ua; ajiakpen amauh a dingin khuapi khat guatsa in akoih uhi.

            17Ginna in Abraham, ze-et a aom in, Isak alan a, thuchiamte tangpa in a tapa tang neihsun alan hi. 18 “Isak ah na suante akisam ding,” kichipa pen. 19 Pasian in misi lak a pan in zong amah a kaithouthei hi chia ngaihsun in; hua a kipan in etsakna in amah a mukikta hi.

20 Ginna in Isak in sil hungtung dingte tawh kisai in Jakob leh Isau a gualjawl hi.

            21Ginna in Jakob in, Joseph ta tegel a gualjawl a, tualeh a chiangkhut tawn a kingam in Pasian abia hi.

            22 Ginna in Joseph in, a sihkuan in Isreal tate pawtkhiat ding thu agen a, tualeh aguhte tungtang ah thu ahilh hi.

            23 Ginna in Mosi apianlai in, naungek melhoihtak ahi chih amuhtak un khathum sung a nulehpa phual in a om a; kumpipa thupiak zong a laukei uhi.

            24 Ginna in Mosi, ahung pichin nung in, Pharaoh tanu tapa chih a om a utkei a. 25 Tomkhat sung khialhna nopna mansang in Pasianmite tawh gimthuakna a teljawta hi. 26 Krist kisimmohna pen Izipt gam goute sang a thupijaw a ngaiin, ahiak a nuamman muh ding lam a enjaw hi.

            27 Ginna in aman kumpipa thangpaihna laulouin Izipt gam anusia a, muhtheihlouhpa pen muhtheih bang a ngaiin athuak paisuak hi. 28 Ginna in paikan kut leh sisan thehna a bawl a, tamasa thattu in amauh a khoihkhak louhna ding in.

            29 Ginna in amauh leigaw a pai bangin tuipi san akan au, Izipt gammite’n zong huabang in bawl a sawm ua, hinanleh tuilak ah atumta uhi.

            30 Ginna in Jeriko kulhbang ni sagih avialh nung un achimta hi. 31 ginna in kijuaknu Rahab zong gingloumite tawh amangthang khawm kei hi, aman enkhiatute khamuangtak a ana jintun jiak in.

            32 Tualeh bang ahia ka genbeh lai ding? Gideon thute, Barak thute, Samson thute,Jepthah thute, David thute, Samuel thu leh Jawlneite thu genning chileng hun in ahung daih kei ding hi. 33 Huate’n kumpi gamte ala au, diktatna asemkhia ua, thuciamte atang ua, humpinelkaite kamachihsak ua, 34 meikuang thahatna a hihmit ua, namsua hiam apel ua, hatlouhna a pan in hatsakin aom ua, kidouna ah a hangsan mahmah ua, agalte uh pangkhawm adelhjak uhi. 35 Numeite’n a misi uh thoukik amu uhi. Midangte zong gawt in aom ua, thohkikna hoihjaw a muhtheihna dingun, hutkhiatna a deihkei uhi. 36 Midangte’n nuihjat bawlna leh vuakna athuak nalai ua.

Ahi, tualeh kolbulh leh thong a khum in aom uhi. 37 Suang a denlup in aom ua, sing-atna a attan in aom ua, khem in aom ua, namsau tawh satlup in om au,belam vunte leh kelvunte silhsak in a vakthap ua, gentheitak in gimthuak in, bawlgentheih in aom uhi, 38 Huate a dingin leitung omna tak ahikei hi. Gamdaite ah, mualte ah, guamte ah, leikawhawmte ah avak kawikawi uhi.

            39 Tualeh hihte jousiahin a ginna jiak un phatna nangah khin nan le uh, silchiam a tangkei uhi, 40 ajiak eite panglou a amah hih bukim a aom louh na dingin, Pasian in eite a dingin sil hoihjaw khat ahung piata hi.

Hebraimite 12

Pasian eite Pa

            1 Tuajiakin, eite zong theihpihtu meipi thupitak umkimkual a i om uh mahbang in, ahung giksakthei jousiahte leh khialhna baihlamtak a eite hung mantu pen i koihkhia ding ua, imai a kitaidemna om a kuhkaltak in itai ding uhi. 2 I ginna uh siamtu leh hihbukimtu Jesu lam en in, aman amai a om kipahna jiakin jumnate zong khawksalou in, kross ah gimna a thuak a! Pasian laltoun ajiatlam ah a touta hi.

            3 Ajiak na lungsim ua nabah ua, na lungkiat louhna ding un, amah tung a mi helte nialkalh na thuakhoupa hgaihsun un, 4 Khialhna douin sisan pawtjen in na pang naikei uhi. 5 Tualeh hasotna thu tate hilhbang a na kiang ua kigen na manghilhta uhi.

“Ka tapa, Toupa sawina simmawh

kenla,

a taihilh a na om in zong lungkia

ken.

      6 Ajiak Toupa’n a itte a sawisa a,

tualeh ta adeih jousiah azepjel

hi.”

  7 Sawina nathuak uleh Pasian in a tate bawl a hung bawl ahi; pa sawilouh ta kua aom ngai a? 8 Hinanleh ta jousiah tan ngaina sawina nathuak kei ua ahihleh, jawlta na hi ua, ta taktaklou na hi uhi. 9 Huate ban ah zong, eite hung sudiktuu taksa a pa inei ua, tualeh amauh i zahtak uhi. Hua sang a khate Pa thuthu a i om jawk ua i hin ding uh hilou amaw! 10Ajiak amau’n ni tomnou khat ding a hoih asak bang jel ua ahung sawi uh ahi a, hinanleh aman ahihleh eite phattuamna ding a, ama siangthouna i tattheihna dingin a hungsawi ahi.11 Sawina pen akithuak laiin kipak-huai abang kei a khasiat ahuaijaw hi, hitalehzong anung chiangin ahihleh huachia sawi a omte dingin diktatna gah khamuan omtak asuakjel hi.

Thuhilhnate leh vaunate

            12 Tuajiakin khut kaikhiate leh khup jawte hatsak un! 13 Tualeh na kengte ua dingin lampi tang bawl un, kengbaite guh a kilawilouh na dingin, hinanleh huate hihdamjaw un.

            14 Mi jousiah tawh kituahna leh siangthoun a delhjou jel un, huate louin kuaman Toupa a mungaikei ding hi. 15 Pilvangtak in en un atuachih keileh kuahiam khat Pasian hehpihna a chingjoulou na omkha ding ua; tualeh khaatna jung banghiam hungsel a nou hung hihbuai in, hua in mi tampite hihbuai in aom kha ding hi. 16 An kamkhat a ta upa hihna juakpa Esau bang a angkawmhattu hiam, ahihkeileh Pasian zahloumi kuahiam a omkha ding. 17 Ajiak pen hua nunglam in, gualjawlna gou pen luahsawm in, mittui luangpum in kuhkaltak in zongnanleh, kisikna ding hun a muhlouh jiakin deihlouh in a omta hi chih nathei uhi.

            18 Ajiak pen nou mual khoihkhak theih leh meia kang, vomna leh, mialna leh huihpi leh, guahpi lanna mun, 19 tualeh pengkul ging leh, thugen gingte omna a hungpai na hikei ua; hua aginzate’n ahihleh akiang uah huathu a kigenkik nawnlouh na dingin a ngen uhi. 20 Ajiak, “Gamsa nangawn in zong hua mual a khoihkhak leh, suang a denlup ahih keileh thaltang a kaplup ding ahi,” chih thupiak pen amau’n a thuakjou takei uhi. 21 Tualeh, hua a asilmuh uh pen alauhhuai mahmah a, Mosi in, “Ka hahlau mahmah a ka kithing hi!” achi hi.

22 Hinanleh noute pen Zion mual leh Pasian hing khuapi, van Jerusalem, simzohlouh vantungmi hon leh, 23 khawmpilian leh van a min kigelhta piang masa saptuam kiangah leh, ni jousiah vaihawmtu Pasian kiang leh, midiktat hihbukim a omte khate kiangah leh, 24 thukhun thak palei, Jesu kiang a leh, Abel a sang a sil hoihjaw ngen sisan thehkawm a hungpai na hijaw uhi.

25 Thugentu pen na deihlou khak ding pilvang un; ajiak leitung a thugentu a deihlouh ua bawn suaktelou ahih uleh, van a kipan thu hunggentu amah i kiheisan uleh i suakta sem kei ding uhi! 26Tuachi’n a aw in lei alingsak a; hinanleh tuin “Khatvei leiguak hilouin van zong kalingsak kik ding chi’n thu achiamta hi.” 27 Tuin hihthu, “Khatvei ka hihling ding,” chih in sil kilingloute a omden jing theihna dingin, sil kilingloute a omden jing theihna dingin, sil kilingte, pen silsiam bang a suanmang in a om ding chih a theisak hi.

28 Tuajiakin, kumpi gam sukling guallouh ngahjiak un, zahtak leh Pasian lauhdan siamkawm a saantaak taktak a Pasian nna i septheihna ding un hehpihna inei ding uhi; 29 ajiak i Pasian uh pen kakmanghat mei ahi.

Hebraimite 13

Pasian bangchi kipaksak ding

            1 Unau ki itna omsak jing un. 2 Mikhualte hoihbawl ding manghilh kei un, ajiak huachibang bawl in mi khenkhaten theiloupe’n vantungmite ana zintun uhi. 3 Thong sung a kan a omte pen amauh tawh kankhawm a om bangin theijing un, tualeh gelgawtna thuakte, nou zong pumpi a om na hih jiak un theijing un. 

4 Mi jousiah lak ah kitenna zahbawl in om henla, tualeh lupna zong hihbuah louhin om hen; hinanleh nu leh pa kal a thangtatte leh angkawmte pen Pasian in vai a hawmsak ding hi. 5 Na omdan uh deihgohna panglou in hihen, nasil heihsun uh tungah lungkim un; ajiak aman, “Bangmahchik in kung nusiangai kei ding a, tai zong kung taisan ngaikei ding hi,” achi hi. 6 Tuachi’n hangsan takin,

“Toupa pen a hung panpihtu

ahi a;

ka laukei ding hi.

Mihing in bang ahung bawl thei

dia?”

ichi ngam uhi.

            7 Na tung ua thuneitute leh na kiang ua Pasian thu gentute theijing un; a omdan ua sil hung omkhiate ngaihtuah unla, a gindan uh jui un. 8 Jesu Krist pen jani leh tuni leh tangtawn in a ngaingai ahi hi. 9 Thugin tuamtuamte leh lamdangte puakmang in omkei un; ajiak pen lungtang hehpihna a hihkip thu ahoih hi, nekding a hihkip ding ahikei, huachibang lungkhamten huate ah phattuamna a mutuan kei uhi.

            10 Biak buk nasemtute’n a nektheihlouh na uh maitam inei uhi. 11 Siampi in khialh thoihna ding mun siangthoua asisan a lutpihjel gan luangte ahihleh huan pualam ah a halmangjel uhi. 12 Tuajiakin Jesu’n zong ama sisan tawh mite khialhna a hihsiangthou theihna dingin kulh kongkhak pualam ah a thuakta hi. 13 Tuajiakin amah a simmohna uh pua in a kiahgah huang pualam ah i paikhia ding uhi. 14Ajiak hihsan ah a omjing ding khuapi i neikei ua, hinanleh khuapi hung om ding pen izong uh ahijaw hi. 15 Tuajiakin, ama vang in, pahtawina kithoihna pen Pasian kiangah tawplou in ilan ding uhi, huapen amin a i kipahn aphuankhiatna muk gahte ahi. 16 Hinanleh silhoih bawl leh silphal pen manghilh kei un, ajiakpen huachibang kithoihnate ah Pasian a kipak mahmah hi.

            17 Na tung ua thuneitute thu mang unla a thu un om un. Ajiak pen na tungtang  thu uh gendingte bangin na kha uh a hungvensak uhi. Huapen lunggimtak a bawllou a kipaktak a a bawltheihna ding un. Lunggimtak a abawl uh nou a dingin a phatuamkei hi.

            18 Kou a dingin hung thumsak un; ajiakpen sil bangkim ah diktak a gamtat ut in, sialehpha theihna hoihtak ka nei uh chih ka thei hi. 19 Hinanleh kintak a na kiang ua sawlkik a ka omtheihna dingin, hihpen abiktak in na kiang uah kung ngen hi.

Gualjawlna

            20 Tuin khamuanna Pasian, i Toupa un Jesu Krist misi lak a kipan a a kaithoupa, tangtawn a thukhun sisan jal a balampu thupitak in, 21 Jesu Krist jal a mitmuh a adeihlam taphot bawl ding in silhouh chinteng ah nou hung hihbukim hen, amah kiangah thupina tangtawn tangtawn in omta hen! Amen.

Mangpha khakna

            22 Tualeh unaute, hasotna thu ngaithei teitei dingin kng ngen hi, ajiakpen thu tomnoukhat in na kiang uah kung gelh hi. 23 I sanggampa uh Timothi khakkhiat in a omta chih na theita un; a hung paipaileh, amah tawh nou kung muding hi.

            24 Nou hung lamkaihte jousiah leh misiangthoute jousiah chibai hung na buksak un. Itali gam a mite’n chibai ahung buk uhi.

            25 Na kiang uah hehpihna om hen. Amen.