Back To Top
PETER
LAIKHAK NIHNA
II Peter 1
Chibai bukna
1 Simon Peter, Jesu Krist sila leh sawltak in, Pasian leh i hundampa Jesu Krist diktatna jal a ginna manpha itanbang tangte kiang ah:
2 Pasian leh i Toupa Jesu Krist theihna jiakin na tung uah hehpihna leh khamuanna sukpung in omta hen.
Pasian sapna leh telna
3 Amah thupina leh hoihna a ei hungsampa theihna jiakin a Pasian silbawltheihna bangin, hinna leh Pasian ngaihsakna lam thu a sil jousiah ahungpia hi. 4 Tuajiakin thuchiam manpha leh thupi mahmahte ahung pia hi, tualeh hihte jiak a, utna jiak a leitung a siatna ompen taikhiatsan in, Pasian hinna kikoppihte nung hitheita ding uhi. 5 Hinanleh hihte jiak mah in, thanop suah unla, na ginna uah hoihna hel unla, na hoihna uah theihna hel unla; 6 na theihna uah mahni kithununna hel unla, mahni kithunna ah thuakhatna hel unla, tualeh na thuak-hatna uah Pasian ngaihsakna hel unla; 7 na Pasian ngaihsakna uah sanggamte itna hel unla, sanggamte itna ah itna hel un. 8 Ajiak hih silte noua ahih a akhanjel leh, i Toupa theihna lam ah chiing leh gahlou in na omkei ding uhi. 9 Ajiak kuahileh hih silte tasam pen mittaw ahi a gamlapi a mutheikei a, tualeh a nidanglai khialhnate a pat a silsianga omna zong a manghilhta hi.
10 Tuajiakin, unaute aw, nou hung kisapna leh telna chiansak dingin kuhkal un, ajiak pen hihte na bawl uleh na pukngai mawng mawng kei ding uhi. 11 Tuachi’n Jesu Krist i Toupa leh hundampa kumtawn gam a lutna nou ahung kipia talua thamtham ding hi.
12 Hih silte jiakin leh hihte theiin, thutak na kiang ua om a na kipna uah hua silten pen hung theisak gige dingin ngaihsaklou in ka om mawng mawng kei ding hi. 13 Ahi, hih puan inn a ka omsung teng, nou hung theisak in hung tok-halh gige hoih kasa hi. 14 I Toupa Jesu Krist in ahung etsaktak mahbang in, hih ka puan inn koihmangna a hungtung pai ding chih ka thei hi. 15 Tuathamlou in, ka sihnung chiang a hih silte na theihjingna ding un pilvang in theihtawp ka suah ding hi.
Krist thupina mitmuh ngeia theihpihna
16 Ajiak pen i Toupa Jesu Krist sil bawltheihna leh ahung paikikna thu kungtheihsak laiun tangthu piltak a ngaihtuah khia a juite ka hikei ua, hinanleh athupina mit amute ka hijaw uhi. 17 Ajiak pen aman Pa Pasian kiang a kipat in pahtawina leh thupina amu a; huachihlai in thupina nasatak a pat in hichibang aw akiang ah a hungtung a, “ Hih ka Tapa ittak, ka kipahna mahmah ahi!” 18 Tualeh mualsiangthou a akiang a ka omlai un hih aw pen van a kipan a hungpawt, koumah ngeiin zong kaja uhi.
19 Tualeh genkholhna thu kipjawsem zong inei uhi. Khua ahungvak a na lungtangte ua jingsol aksi ahung suah masiah, munmial a vak om a ngaihsak bang ua na hih uleh na bawlhoih ding uhi. 20 Laisiangthou a genkholhna thu himhim kuaman ama thu a alehkhiat ding ahikei, chih theimasa un. 21 Ajiak pen genkholhna thu himhim mihing deihdan a pawt ahikei a, Pasian misianghthouten Khasiangthou phut ahih bang jel un anagen uh ahijaw hi.
II Peter 2
Jawlnei takloute
1 Hinanleh mi lak ah Jawlnei takloute zong ana om ua, tuachimah bangin nalak uah sia takloute zong ahung om ding uh a, amauhte’n amauhte leipa Toupa hilhial kitheihmoh bawl in mi hihsiathei gindan diklou aguk in ahung pualut ding uhi. Amauhte tungah thakhat in siatna atungsak ding uhi. 2 Tualeh mi tampite’n, siatna lampi ahung jui ding ua, amauh jiakin lamdik pen gensiat ahi ding hi. 3 Tualeh deihgoh mahmah nate jiakin juauthu in amauh punna dingin ahung zang ding uhi. Nidanglai a na tung ua a vaihawmna akhawl kei ding a, tualeh asiatna uh zong akhawl thei ding hi!
4 Ajiak vantungmiten sil ahihkhial laiun Pasian in akhawi keia, hinanleh gawtmun ah apaia vaihawmsak a om ding in mialna khaute in akanjaw hi. 5 Tualeh amah ngaihsaklou leitung tungah tuichim tungsak in, nidanglai leitung a khawikei a, hinanleh diktatna thugenpa, Noah, midang sagih tawh a hundamta hi. 6 Sodom leh Gomorrah khuapite pen vut a suaksak a siatna tang ding in a mohpaih a Pasian ngaihsaklou hung om dingte etsakna dingin abawlta hi.
7 Tualeh migiloute omdan thanghuaite thuakgimsak a om Lot midik pen, a hunkhiata hi. 8 Hua midikpa pen, akiang ua a omlai in, amit in amu a, abil in aja a, danlou bangtak a a silbawlte un a lungsim diktat pen ahihna mahmah hi. 9 Tuachi’n Toupa’n amah ngaihsak mite pen khemna a pat hutkhiatdan athei a, tualeh midiktatloute pen vaihawmni chiang a dingin gawt kawmkawm a sitdan athei hi, 10 tualeh abik in utna thanghuai lam a sa dan bang a om leh, vaihawmna simmohte ahi uhi. Mot hansan leh genhak ahi ua, thupina ngahte agensiat unzong a laukei uhi. 11 Vantungmi hat leh silbawltheiten bawn Toupa maiah a tungthu uh gensak in a gensia-ngam kei uhi. 12 Hinanleh, hih ganhing gilou, ngaihtuahna neilou mat a hihmang dingte bang a a theihsiamlouh uh silte agensia ua. Tuachi’n amauh siatna ah a beimang siang ding uhi, 13 tualeh sunlaia ankuang lui buaia nuamsa mi ahihjiak un diktatlouhna man amu ding uhi. Na kiang a ankuang alui un thanghuaina gensiatna ahi uhi! 14 Angkawmna mit a dim, khialhna tawpsan theihlouhte anei uhi. Mi kiploute a khempuk ua, enhatna lungsim apua ua, hamsiathuak tate ahi uhi! 15 Lamdik ataisan ua a vakmang ua, diktatlouhna thaman ngainapa Beor tapa Balaam lampi ajuita uhi; 16 hinanleh amah pen agitlouh jiakin taihilh in aom a; sabiltung hamtheilou mi ham a ahung ham in Jawlnei motna a khamta hi.
17 Huate pen tuikul tui omlou, huih mutleng kawikawi meilum bang ahi uhi; amau a dingin mialna thuk penpen tangtawn a sit ahi. 18 Ajiak pen thuginalou chiakjen a gen in, gilou a omte a pat a suaktajoute pen taksa utna ah hukna in akhempuk nak uhi. 19 Amauh siatna sila hihpum in, mite suahtatna thu achiam jel uhi; mi zoh a a omna huamah in amauh sila in asimjel uhi. 20 Ajiak pen, Toupa leh hundampa Jesu Krist theihna jiak a leitung thanghuainate a nutsiatsan nung ua, huamah a ata’nkik ua zoh a aom uleh, amau a dingin aomdan nunung uh pen apatna sangin asiajaw hi. 21 Ajiak diktatna lampi theihnung a, thupiak siangthou akiang ua kepsak a om pen nungngatsan sang in, diktatna lampi theilou ana hile uh amauh dingin ahoihjaw ding hi! 22 Ajiak pen,
“Ui ama luakmah ah akikkik a,”
tualeh,
“Vokpi kisilsiangsa buannawi a kisil ding a kik,”
chih thupil diktak mah bangin amauh tungah ahung omta hi.
II Peter 3
Toupa hungpai nang thuchiam
1 Ittakte aw, tua, na kiang ua ka gelh, hih laikhak nihna ahi; hua tegel ah theihkhiatthak kikna in na lungsim siangtak uh ka tokthou hi. 2 Jawlnei siangthoute’n ana genmasak uh thute , tualeh kou Toupa leh hundampa sawltakte thupiak ngaihsak jing a na omna ding un. 3 Hih thei masa un, ni nunung lam ah simmoh hatte, amauh utna bang a gamta ahung om ding ua, 4 tualeh, “A hung paikik nang thuchiam khoiah ahia aom? Sil siamchil a kipat sil bangkim pilehpute ihmutnia kipat aom ngaingai bangin aomjel!” achi ding uhi. 5 Ajiak hihte a kitheimoh bawl jel uhi, Pasian thu in nidanglai in vante ahung om a leizong tuilak a pat leh tuilak ah ana om hi, 6 hua-ah hualaia leitung ompen tuin atum a amangta hi. 7 Hinanleh tu-a om vante leh lei pen hua thu jiak mah in Pasian ngaihsaklou mite vaihawmna leh manthatna ni a ding a koihhoih in, meia gawt ding a kholkhawm in a omta hi.
8 Hinanleh ittakte aw, hih silkhat manghilh kei un, Toupa ngaih in nikhat pen kum sangkhat bang ahi a, tualeh kum sangkhat zong nikhat bang ahi. 9 Mi khenkhatte’n jekai asak bang un Toupa pen a thuchiam lam ah a jekai kei hi, hinanleh kuamah manthat deihlou a, mi jousiah kisik ding deih in, eimah lam ah a dawhjou ahijaw hi.
10 Hinanleh Toupa ni pen jan a guta bangin a hungtung ding hi, huani chiangin vante pen ngaihtak a ging in amang ding a, tualeh silbulte pen meisa a haitui ahi ding a, leizong asung a nasem omte tawh halmang in aom ding hi.
11 Tuajiakin hih silte jousiah pen beimang ding ahihjiak in, omdan siangthou leh Pasian ngaihsakna lam ah mi bang chibang hiding nahi ua le, 12 Pasianni hungtung ding kinem leh kilawp in, huani in vante pen hung kang in amang ding a, tualeh silbulte zong meisa a haituiin a omta ding hi. 13 Hitalehzong en, a thuchiam dungjuiin, asung a diktatna omna, vanthak leh leithak i kineppih ahi.
14 Tuajiakin, ittakte aw, hih silte lam-en in, nin banglou leh dembei a, khamuangtak a ana om a muh na hihtheihna ding un kuhkal un. 15 Tualeh i Toupa dohzohna pen hundamna in sim un. I sanggampa ittak Paul in akiang a piak pilna dungjuia na kiang ua agelh bang in. 16 A laikhakte jousiah ah hih silte tungtang agenphial hi. Hua ah thu theihsiam haksate aom a, huate pen mi pillou leh mi kiploute’n Laisiangthou mundang alakkhial bang un lakhial in amauh siatna dingin azang nak uhi.
17 Tuajiakin nou, ittakte aw, nou hua thute na theihkholh jiak un pilvang un, atuachih keileh migiloute khialhna puimang a om in na kipna ua pan in napuk kha ding uhi. 18 Hinanleh i Toupa leh hundampa Jesu Krist hehphihna leh theihna ah hung khanglian un. Amah kiangah tu leh tangtawn in thupina omta hen! Amen.
