Back To Top
TIMOTHI
KIANG A SAWLTAK PAUL LAIKHAK NIHNA
II Timothi 1
Chibaibukna
( 1.5: Nst. 16.1, 1.11: 1Tim. 2.7 )
1Paul , Jesu Krist a om hinna thuchiam dungjui a Pasian deihna bang a Jesu Krist sawltak in;
2 ka tapa deihtak Timothi kiang ah:
Pa Pasian leh Krist Jesu I Toupa kiang a kipan a hehpihna leh, zahngaihna leh, tualeh khamuanna om hen.
Kipahthu genna leh hanthawnna
3 Sun leh jan a tawplou a ka thumnate a kung theihjing jiakin, kapi leh pute nabawl mahbang in sialehpha theihna siantak nei a na ka sepjingpa ka Pasian kiangah kipahthu ka gen hi. 4 Kipahna a ka dimtheihna dingin na khituite theihjingin, nangmah hung muh ka ut mahmah hi. 5 Ginna taktak nangmah a ompen ka theigige a, hua ginna pen amasapen in napi Loisi ah aom a, nanu Uenisi ah zong aom a, tualeh nangmah ah zong aom chih chiantakin. 6 Tuajiakin, ka khutngak jiak a Pasian silpiak nangmah a ompen mutkuang dingin kung theisak kik hi. 7 Ajiak Pasian in launa kha a hungpia kei a, hinanleh sil bawltheihna leh, itna leh, lungsim siangthouna kha a hungpia jaw hi.
8 Tuajiakin I Toupa thu theisakna pen jumpih kenla, kei amah a hen tapa zong hung jumpih ken, hinanleh Pasian sil bawltheihna bangjel a tangthupha jiak a gemthuakna thuakpihtu hijaw in. 9 Amah i silbawlte dungjui hilou in, ama guat leh hehpihna dungjuiin ahung hundam a, sapna siangthou in ahung samta hi. Hihpen lei kisiam masang a Krist Jesu a ahung piak ahita hi. 10 Hinanleh ahung hundampa Jesu Krist kilakna jiakin tuin hihhat in a omta hi, aman sihna hihmang in tangthupha jiakin hinna leh sihtheih louhna pen vak ah a hungtunta hi. 11 Hua tangthupha pen Jentelte theisak dingin thugentu ding leh, sawltak ding leh thuhilh sia ding a guat ka hi hi. 12 Tualeh hihjiak in ahi hih silte zong ka thuak. Hinanleh zong ka jum kei hi, ajiak ka gintatpa ka thei hi, tualeh akiang a ka kepsak huani a dingin a kembitthei chih chiantak in ka thei hi. 13 Krist Jesu a om itna neiin, thudikdan ka kiang a na jakte tukip in. 14 I sung a om Khasiangthou in nang ahung kepsak thutak kemhoih in.
15 Asia gam a omjousiahte kei a pat a pialmangta uh chih nathie hi, alak uah Phigela leh Hermojini apang uhi. 16 Toupa’n Onesiphora innkuanpihte kiang ah zahngaihna pia hen ajiak aman ahung hihhalh jeljel a, ka kolbulh zong a jumpihkei hi, 17 Rom khua a hungtun in ahung limzon a, ahung mukhia hi. 18 Huani chiang a Toupa kiang a amuh ding Toupa’n phalsak hen! Tualeh Ephesa khua a sil tampi a ka na asep jiak hoihtakin nathei hi.
II Timothi 2
Jesu Krist galkap gin-om
1 Tuajiakin nang, ka tapa Krist Jesu a om zahngaihna ah hattak in om in. 2 Tualeh theihpihtu tampi lak ah ka kiang a thu naja’kte huate pen mi muanhuai, midangte zong hilhsawnthei dingte kiangah kemsak in.
3 Tuajiakin Jesu Krist galkap hoihtak bangin gimthuak hung thuakpih in. 4 Galkap hiding a telpa a kipahsak theihna dingin; galkap kuamah kidoulai in hih damsung khuasaknate in a kihihbuai ngaikei hi.
5 Tualeh kidemnate ah mi pang nanleh zong dan bang a abawlkeileh khuksak in aom tuankei hi. 6 Louneitu semgim in agah tangmasapa ahi ding hi. 7 Ka thugen ngaihtuah in, Toupa’n nangpen sil jousiah ah theihsiamna a hungpia ding hi.
8 Jesu Krist, David suan a mi pen, ka tangthupha gen dungjui in misi lak a kipat kaithoh in aom hi chih theihing in, 9 hua tangthupha jiakin silgilou bawlte bangin hen a om in haksatna ka thuaklawh hi. Hinanleh Pasian thu pen hen in a omkei hi. 10 Tuajiakin Krist Jesu a om hundamna pen, tangtawn a om thupina tawh a muhtheihna ding un, telte jiakin sil jousiah ka thuak hi. 11 Hih thugen adik hi:
“Ajiak amah tawh sita ihihleh, amah tawh I hingkhawm ding a.
12 I thuakleh,
amah tawh vai i hawmkhawm
ding a,
amah i kitheihmoh bawl leh,
aman zong ahung kitheihmoh
bawl ding hi.
13 Eite gin-om keilei zong,
amah a gin-om jing a,
amah leh amah a kitheihmoh
bawltheih sam kei hi.”
Pasian pom nasemtu
14 Thu phatuamlou, a ngaikhiatute a ding a siatna higiap thu a kiniallou dingin hihthute theisak jing inla, Toupa maiah thu pia in. 15 Thutak thu diktak a khen in, jumna ding neilou nasemtu bang a, Pasian pomta’k hiding a nangmah kipia dingin theihtawp suah in. 16 Hinanleh Pasian zahta’klouna thugen mawk mawkte taisan in, ajiak huachibangte’n mite Pasian ngaihsaklouh lam ah apui gamla deuhdeuh uhi. 17 Tualeh athu un meimasia nek bangin amauh ane ding hi. Alak uah Himenais leh Philetas apang uhi. 18 Huachibang mite’n thutak apialsan ua, thohkikna aom khinta chi’n mi khenkhatte ginna a sukmangsak hi. 19 Hinanleh Pasian suangphum kippen ading nalai a, hih chiamtehna anei hi: “Toupa’n amah a hi te athei hi,” tualeh, “Michih Krist min lou taphot in gitlouhna paisan hen,” chih.
20 Hinanleh inn thupi sung ah kham leh sumsan belte guak aom kei a, sing leh leia bawl bel zong aom hi, khenkhat manphatak a zak ding in, khenkhat manphaloutak a zak ding in. 21 Tuajiak mi hua silninte lak pan a aki suksiangleh, apu ding a bel it-huai, siangthou, apu a ding a zaktaak, silhoih jousiah a ding a mansa a om bang ahi ding hi. 22 Khangnou utnate taisan inla, hinanleh lungtang siangthou a Toupa samte tawh diktatnate, ginnate, itnate, lemnate, delhjaw in. 23 Hinanleh kihaunate apiangsak veu chih thei in; kiselna mot-huai leh pilhuailoute ah pang ken. 24 Tualeh Toupa silate pen kisel ding ahikei a, hinanleh mijousiah tung a migitna, thuhilhsiam, thuaktheihna ahijaw ding ahi, 25 Pasian in thutak atheihna ding un kisi’kna apiak khak leh chiin a kalhtute pen kingiamkhiat tak in a thuhilh ding ahi. 26 Tuachi’n khua ahung theithei ding ua, amauhte sila ding a man a aut ut a bawlpa setan thang a kipan a suakta thei ding uhi.
II Timithi 3
Ni nunungte
1 Hinanleh hih zong thei in, ni nunung lam ah hun lauhuai taktakte ahung om ding hi. 2 Ajiak mi amauh ki itte, dangka ngainate, kiliansakte; kisatheite, Pasian gensiate, nu leh pa thu mangloute, kipakna dan theiloute, siangthouloute; 3 itna neiloute, ngaihdamna neiloute, juau a mi hekte, mahni ki thununloute, mi huhamte, hoihna mawng mawng neiloute; 4 mi puisia lamkaite, genhakte, kisatheite, Pasian it sang a amauh kipakna itjawte bang a hiding uhi; 5 Pasian ngaihsak bakna anei ding ua hinanleh a silbawltheihna ataksan kei ding uhi. Huachibang mite a pan ki hemkhia in. 6 Ajiak huachibang lak ah mi pen innte bang ah lut in a khialhna uh giktak pua numei mawdeuhte sal a man a, duhgawlna chinteng a puimangte ahi uhi, 7 ziljing napi a thutak theipha ngailoute ahi uhi. 8 Tualeh Janne leh Jambre in Mosi adou bang un hihte’n zong thutak adou gige uhi. Lungsim siasa mi, ginna lam a Pasian pomlouh mi ahi uhi. 9 Hinanleh huaval a bawlthei kei ding uhi, ajiak amawldan uh mijousiah kiangah ahung kilang ding hi, Janne lah Jimbre ahung kila’k bang in
Thuhilhna nunung
10 Hinanleh nang ka thugin, ka hindan, ka siltup, ka ginna, ka thuaktheihdan, ka itna, ka kuhkaldan, 11 Anitok khua leh, Ikonium khua leh, Listra khua a bawlgentheihna ka tuakte na theisiang hi! Hinanleh huate tengteng ah Toupa’n ahung hunkhia hi. 12 Ahi, mi Krist Jesu a Pasian ngaihsak a omsawm jousiahin bawl gentheihna a thuak ding mah uh ahi; 13 hinanleh migilou leh mikhemhatte pen mi khem leh khem a om in asiasuak deuhdeuh ding uhi. 14 Hinanleh nang, kuakiang a pat najil ahia chih theijing in, najilsa leh theihchiansak a na omna silte ah omjing in, 15 tualeh nang pen na naupanglai a pat Krist Jesu a ginna jiak a hundamna mukhop a nang hung hilhpilthei Laisiangthou thei na hita hi. 16 Laisiangthou jousiah Pasian hukhahkhum a piak ahi a, thuhilhna ding, kitaihilhna ding, ki sukdikna ding, tualeh diktatna lam a thuhilhna ding bang in aphatuam hi, 17 Pasianmi pen na hoih jousiah sem ding a kimtak a kithuam a a bukimtheihna ding in ahi.
II Timothi 4
( 4.10: Kols. 4.14; Philm. 24; 2Kor. 8.23; Galt.2.3; Tit. 1.4)
1 Tuajiakin Pasian mai leh a kumpi gam a hungkilak chiang a, mihing leh misite vaihawmsak dingpa Jesu Krist maiah thu kungpia hi: 2 Thu gen in, ( ahun ah zong ahunlou ah zong ), pangjel in thuakjoutak a thuhilh kawm in theichiansak inla, taihilh inla, hasot in. 3 Ajiak thuhilhna dik a ngaihkhiat nuamlouh uh hun hungtung ding ahi a, abilte uh ajet jiakin amauh deihbang in a kiang uah lamkai a khawm ding uhi. 4 Tualeh abilte uh thutak a pat a heimang ding ua, tangthu lam nga in a dawhta ding uhi.
5 Hinanleh nang, sil jousiah ah pilvang inla, gim thuakjou inla, tangthupha genna lam na sem inla, na nasep hihtangtung in.
6 Ajiak tuin keipen, dawn ding a lat bangin luikhiat in ka omta a, ka paikhiat hun a tungta hi. 7 Kidouna hoih ka doukhinta a, ki taidemna ah ka taikhinta hi, ginna ka kemta hi. 8 Tuinjaw diktatna lallukhu kei ding in koih in a omta, tuapen Toupa, vaihawm diktak in, huani chiangin a hungpia ding hi, tualeh kei kiang guak ah hilou in, kuapeuh amah kilakna itte tengteng kiangah zong a pia ding hi.
Mimal kithuhilhna
9 Kintak in ka kianah hungpai teitei in. 10 Ajiak Dema in tulai leitung a ngaihnat jiakin ahung paisanta a, Thessalonika ah apaita hi; Kresken pen Galatia ah apaita hi, Tita pen Dalmatia gam ah apaita hi. 11 Luka guak ka kiang ah aom hi. Marka chial inla ka kiang ah hung paipih in, ajiak thu nasepna lam ah keia dingin a phatuam mahmah hi. 12 Tikika pen Ephesa khua ah ka sawlta hi. 13 Nungpai chiangin, Troas khua a Karpa kiang a puan-ak tual ka nutsiat pen laibute tawh hung pua in, adiak in savun laibute pen. 14 Aleksander sumsan siksekpa ka tung ah agilou mahmah hi; Toupa’n anasep bangjel in a thuk ding hi. 15 Amah apat nang zong pilvang in, ajiak aman I thute a hahdal mahmah hi.
16 Ka dikna thu ka gen masak lain kuaman ahung panpih kei a, mijousiahin ahung taisan siang jawta uhi. A khialhna uh pua in omtuan kei uhen chi’n Pasian kiang ah ka ngen hi! 17 Hinanleh Toupa’n ahung dinpih a ahung hihhatta hi, tangthupha kigen pen kintak a keijiak a theih a aom a Jentelte jousiahin a jaktheihna ding un. Tualeh humpinelkai kam a pat in suahtatsak in ka omta uhi. 18 Tueleh Toupa’n migilou chinteng lak a pat in ahung suaktasak ding a, a van gam ah bittak in ahung tu tding hi. A kiang ah tangtawn tangtawn in thupina omta hen! Amen.
Mangpha khakna leh gualjawlna
19 Prisila leh Akuila, tualeh Onesiphora innkuanpihte chibai hung buksak in. 20 Erasta pen Korin khua ah a omdenta hi; Trophima ahihleh Mileta khua ah damlou in ka nusiata hi. 21 Phalbi ma-in hung paisawm teitei in.
Eubulaste, Pudente, Linate, Klaudiate, unau jousiahin chibai a hungbuk uhi.
22 Toupa Jesu Krist na kha kiangah om hen.
Hehpihna na kiang ah om hin. Amen.
