Marka

MARKA

GELH TANGTHUPHA

Marka 1

Baptistpa Johan thugen

(Mat. 3.1-12; Luk 3.1-18; Jhn. 1.19-28)

1 Pasian Tapa Jesu Krist tangthupha kipatna; 2 Jawlnei Isaiah laibu ah:

“Ngaiin, ka sawltak na maiah ka sawl a,

aman na lampi abawl ding.’

3 Gamdai a kikou aw khat in,

‘Toupa lamlian sial unla;

a lampite tangsak un!’ ” achi,

hia gelh bang in.

4 Johan in gamdai ah a baptist a, “sil bawlkhialte ngaihdamna ding a kisikna baptis thu gen in a hungpawt hi.” 5 Tualeh Judea gam a mi jousiah leh Jerusalem a omte a pawt ua, a kiangah apai ua, a khialhna uh phuangkhia in , Jordan luiah akiang ah baptistma atangchiat uhi.     6 Tualeh Johan in sangawngsau mul puan in asilh a, savun kawng-gak in akawng a gak a, kauphe leh khuaiju ane hi. 7 Tualeh, “Ka nung a hungpaipa kei sang a hatjaw ahi. Kun-a ama khedap khau sutding nangawn chinlou ka hi. 8 Ken tuin nou kung baptist a, hinanleh aman Khasiangthou in noute a hung baptist ding chi’n thu agen hi.”

Jesu Baptisma tanna leh khem a omna

(Mat. 3.13-4.11; Luk 3.21,22; 4.1-13)

9 Tualeh huahun laiin hichi ahi a, Jesu Galili gam Nazareth khua a kipan in a hung pai a, Johan kiangah Jordan luiah baptisma a tangta a. 10 Tualeh tui a pat ahung pawttak in, van akihong a, Khasiangthou vakhu bang a hung kumsuk, atung a tuang amu a. 11 Tualeh van a pan aw khat a hungging a’ “Nang ka Tapa deihtak na hi, na tungah ka kipak mahmah hi,” achi hi.

Jesu khem a omna

12 Tuakhit phet in kha-in amah gamdai ah a-sawl khia pai a, 13 Tuachi’n Setan khem a om in gamdai ah ni sawmli a om a. Gamsa gilou lak ah a om a, vantungmite’n a nna a sep sak uhi.

Jesu’n nasep apan

(Mat 4.12-22; Luk 4.14, 15; 5.1-11)

14 Johan thong a akhum nung un,Jesu Pasian gam tangthupha gen in Galili gam ah ahung pai a. 15 “Ahun a tungta, Pasian gam anaita hi! Kisik unla tangthupha gingta un!” chi-in. 16 Tualeh Jesu Galili tuipi piau a avak na ah, Simon leh a sanggampa Andru tuipi a ngenkhuh a mu a, amauhte ngamanmi ahi uhi. 17 Tuachi’n Jesu’n akiang uah, “Kei hungjui un, mihing man dingin nou kungbawl ding hi,” achi hi. 18 Tuatak in amau’n a ngente uh nusia in amah ajuipai uhi.

19 Hua a kipan themkhat a paibehlaileh, Zebidi tapa Jakob leh a sanggampa Johan amu a, amau a ngen uh phawh a gunkuang sung a om ahi ua. 20 Tualeh aman amauhte asam pai a; amauh tegel in zong apa uh Zebidi pen a migoihte utawh gunkuang sungah nusia in ajuita uhi.

Dawimat pasal khat

(Luk 4.31-37)

21 Tuachi’n Kapermuan khua ah avalut ua; khawlni-in kikhopna inn ah alutpai a, thu hilh hi. 22 Tualeh Laigelhmite banglou a, thuneihna neimi bang a amau thu ahilhjiak in, a thuhilh lamdang asa mah mah uhi.

23 Tualeh a kikhopna inn uah dawinin pai pasal khat a om a; a kikoukhia a,

24 ka tang un hung omsak in, “Nazareth Jesu nang tawh kou bang bawl ding nei ihia? Koute hih mangthang ding a hungpai nahi maw? Nang kua nahia chih kungthei hi. Pasian Misiangthou mahi!” achi hi.

25 Hinanleh Jesu’n a phawk a, “Dai inla, asung a kipan in hungpawt in!” achi a.

26 Dawinin in amah engbawl a ngaihtak a kikou in asung a kipan a hung pawt khia hi.

27 Tualeh aun un lamdang asa mahmah ua, tuachi’n, “Hihbang ahia? Bang chibang thuhilhna thak ahia?Aman thuneitakin dawininte nasan thu apia a, athu amangjel uhi!” chi in, a kidong tuah uhi.

28 Tualeh Galili gam kin tengah gamchin ah atanchin athangsuak pai hi.

Jesu’n mi tampi adamsak

(Mat. 8.14-17; Luk .4.38-41)

29 Tualeh kikhopna inn a pan ahung pawtkhiat khit un Simon leh Andru inn ah, Jakob leh Johan tawh alutpai ua. 30 Simon sungnu nattun a damlou in lupna ah ana lum a, tuathu Jusu ahilhpai uhi. 31 Tuachi’n amah hungpai in, akhut atuin a phongtou a, tuachi’n a nattun a damta a, a nna uh a sepsakta hi.

32 Tualeh nitaklam nitum nung in damlou jousiah leh dawimatte a kiangah ahung paipih uhi. 33 Tualeh khuapi sung a mi jousiah kotpi bul ah ahung ki khawmkhawm ua.

34 Aman mi tampi te natna tuamtuam a nate a damask a, dawite tampi zong a hawlkhia a; hinanleh dawite’n amah kua hihiam chih thei ahihman in, aham uh aphalkei hi.

Jesu’n Galili ah thu agen

(Luk. 4.42-44)

35 Jingsang baihtak in, khuavak ma in, Jesu athou a, a pawtkhia a, munsip ah apai a, huamun ah athumta hi. 36 Tualeh Simon leh akiang a omten zong ua, 37 Amah amuhtak a kiangah, “Mi jousiahin nang hungjong uhi!” achi uhi.

38 Aman akiang uah, “Aban a khuate ah paini. Hualak ah zong ka thupuak ka phuankhiat theih nang in, tua mah kungpaina san ahi,” achi hi. 39 Tuachi’n a kikhopna inn uah a thupuak gen in Galili gam teng ah apai kawikawi a, dawite a hawlkhia hi.

Phak damsakna

(Mat. 8.1-4; Luk. 12-16)

40  Phak mi khat a kiangah a hungpai a, amai a khupdin in; “Na ut leh nung siangthousak thei hi, chi’n ahung ngen ngutngut a.” 41 Tuachi’n Jesu’n amah a lainat mahmah a, akhut ajan a, akhoih a, “Ka ut hi, na siangthouta in!” achi hi. 42 Hihthu agen khitkhit in, phak in amah a nusiapai a, ahung siangthouta hi. 43 Jesu’n khauhtak a khamna tawh amah a sawlkhiata hi. 44 “Kuamah kiang ah bangmah genlou dingin pilvang in. Hinanleh Siampu kiang ah vakilak inla, na kisiansuahna dingin Mosi-in sil a sehte lan in, a theichet na ding un,” achi hi.

45 Hinanleh amah a paikhia a tua thu mipi lak ah a genjakta hi. Tuabang ahihman in Jesu a langtang in khuapi ah a lutthei takei a, gamdai kuamah omlouhna ah a omjawta hi. Hinapi’n munteng a pat in a kiangah mite a hungpaijel uhi.

Marka 2

Jesu’n mi jeng a damsakna

(Mat. 9.1-8; Luk. 5.17-26)

1 Ni bangjah hiam nungin Jesu Kapernuam khua ah a om chih mipite’n athei uhi. 2 Tuachi’n kongkhak kim tanpha a omna ding omlou khop in mi tampi ahung kikhawmpai ua, Aman a kiang uah thu agen a.3 Mijeng khat mi li in hungjong in a kiangah ahung paipih ua .4 Tualeh mi tamjiak a jesu kiangnai a ahung paitheilou tak un , aom na in tung ahong ua; aphehvang zoh un mi jengpa alupna tawh a khaikhia suk uhi. 5 Jesu’n aginna uh amuhtak in jeng a damloupa kiangah “Tapa na khialhnate ngaidam ahita,” achi hi.

6 Hinanleh Laigelhmite khenkhat huamun  a tou aom ua; a lungsim un, 7 “Bangding a hihpa’n Pasian gensia a hichibang a thu gen ahia? Pasian chihlou kua ahia khialhma ngaidamthiei!” chi’n a ngaitua uhi.

8 Hinanleh Jesu’n a lungsim un huachibang in a ngaituah uh chi akha-in athei a. Amana kiang uah, “Hichibang bangding a na lungsim ua ngaihtuah nahi ua? 9 Mijeng kiang ah, ‘Na khialhnate ngaihdam ahita,’ chih leh, ‘Thou inla na lupna la inla paita in, chih khoi a baihlam jaw ei’? 10 Hinanleh mihing Tapa in leitung ah na khialhnate uh ngaidam theihna anei chih natheihna ding un,” mijeng kiang ah, 11 “Thou inla, na lupna la inla na innlam ah paita in kungchi ahi!” achi hi.

12 Amah a toupai a, alupna la-in aun ua amitmuh un a pawtdokta hi. Tuachi’n aun un lamdang asa ua, “Hichibang mawng mawng i mungai naikei uh!” chi’n Pasian aphatta uhi.

Levi sapna

(Mat. 9.9-13; Luk 5.27-32)

13 Tuachi’n amah tuipigei ah apaikhia kik a, tualeh mipi jousiah a kiangah a hungpai ua, aman thu anahilh hi. 14 Tuachia apailai in Alphai tapa Levi siah donnna zum a tou amu a. Amah a kiangah, “Hung juiin achi a,” tuachi’n a dingkhia a, amah ahuita hi.

15 Tualeh hichi ahung hi a, Jesu’n Levi inn ah an a im a, siah dongmi leh mikhial tampite’n Jesu leh a nungjuite a impihchiat ua. Tampi ahi ua, a nung ajui uhi. 16 Tualeh Laigelhmite leh Pharisaite’n siah dongmite leh mikhialte tawh an anekkhawm uh amuhtak un, amau’n a nungjuite kiang ah, “Bang-chidan ahia siah dongmite leh mikhialte tawh anek a, adawn?” achi ua.

17 Jesu’n hih ajaktak in, akiang uah, “Mi chidamte’n daktor a poimohkei ua, hinanleh mi chinate’n a poimohjaw uhi;mi diktatte sam ding a hungpai ka hi kei a, mikhialte kisiksak ding a hungpai ka hijaw hi,” achi hi.

Anngawl thua dokna

(Mat. 9.14-17; Luk 5.33-39)

18 Johan nungjuite leh Pharisaite’n an a ngawljel ua. Tuachi’n a hungpai ua a kiangah, “Bangding a Johan nungjuite leh Pharisaite’n an ngawl uh a, na nungjuite’n an a ngawllouh uh?” achi ua.

19 Tualeh Jesu’n a kiang uah, “Mouneipa akiang ua a om lain Mou neipa lawmte’n an a ngawl ngai uh maw? Mou neipa amauh tawh akiang ua a omsawt laisiah an a ngawlkei ding uhi! 20 Hinanleh Mouneipa akiang ua kipan a puakmang ni a hungtung ding a, tuachi’n huani chiangin a ngawl ding uhi.

21 “Mi kuaman puanlui puanthak them in a phawngai kei, phawh nanle uh, a phawhna pen in aluipen a kaikek ding a, asiajaw sem ding hi. 22 Tualeh mi kuaman uain thak savun thawl luiah athunngai kei, thuntale uh uain thak in savun thawl lui aphukek ding a, uain akibua ding a amangthang ding hi. Uain thak savun thawlthak a thun ding ahijaw hi,” achi hi.

Khawlni tan thu a dokna

23 Tualeh hichi ahi a, khawlni in Jesu buhleilak ah apaisuak a. Apaikawm un a nungjuite’n buhvuite ajut ua. 24 Tuachi’n Pharisaite’n a kiangah, “En in, bangding a amau’n khawlni a bawl sianglou bawl uh ahia!” achi ua.

25 Aman akiang uah, “David leh a lawite a taksap ua, a gilkiallai ua a silbawl uh simkhalou nahi umaw? 26 Abiathar siampi ahih lai a, Pasian inn a lut a Siampute chihlouh nek sianglou tangkou sehtuam anek a, alawite kiang a zong apiak  thute,” achi hi.

27 Tualeh aman akiang uah, “Khawlni mihing a ding a siam ahi a, mihing khawlni a ding a siam hilou hi. 28 Tuajiakin Mihing Tapa ahihleh khawni Toupa ahi,” achi hi.

Marka 3

Khut jeng mi khat

(Mat. 12.9-14; Luk. 6.6-11)

1 Tuachi’n kikhopna inn ah a lutkik a, huasan ah khutjeng mikhat a om hi. 2 Tualeh mi pawlkhat in amah a hektheihna ding un  khawlni –in a damask leh damsaklouh adap-et ua. 3 Jesu’n khut jengpa kiangah, “Mipi maiah ding in,” achi a, 4 Tuachi’n Jesu’n amaute kiang ah, “Khawlni a silhoih bawl maw asiang,silsia maw? Hundamna maw asiang, hihlup maw?” chi in dong hi.

Hinanleh amauh adaidide ua. 5 A lungtang uh atakjiak a lungkham leh hehkawm a amauhte a et kawikawi nung in, “Khut jengpa kiangah na khut jan in,” achi a. Aman a jankhia, tuachi’n a langkhat bangin ahung damsiangta hi. 6 Tuachi’n Pharisaite a pawtkhia ua Jesu thah ding dan Herod pawl a mite tawh a kikum uhi.

Mi tampi’n a zui uh

7 Hinanleh Jesu a nungjuite tawh tuipi lam ah apaita ua; Galili gam a kipan mipi tamtak in anung ajui ua, 8 a silbawl thupi dan ajak un, Judea gam a kipan, Jerusalem khua a kipan, Idumai gam akipan, Jordan gal a kipan, Tura leh Sidon khuakim a kipan in, mipi tamtak a kiangah  a hungpai ua. 9 Mipite jiakin  amah a ding a gunkuang neu khat mansa a koih ding in a nungjuite thu ahilh a, atuachih kei le ahung nehgawp ding uh, achi hi. 10 Aman mi tampi ana damsakta a, tuachi’n natna nei jousiahin amah a khoihkhak theina ding un abawh lutlut uhi. 11 Kha giloute’n amah amuhtak un amai a puk in, “Nang Pasian Tapa nahi chi in a kikoujel uhi!”

12 Hinanleh aman amah kua hihiam chih gendoklou dingin khauhtak in akham hi.

Jesu’n nungjui sawmlehnite atel

(Mat. 10.1-4; Luk 6.12-16)

13 Jesu mualtung lam ah kahtou a, adeihtuamte a sam a, amau a kiangah avapai ua. 14 “Tualeh a kiang a om ding leh a thupuak gen a asawl ding in sawmlehnihte a namdet a, 15tualeh damloute damsak theihna leh, dawite nohdok theihna thuneihna nei ding in.”

16 Ama seh sawmlehnite hihte ahi uh: Simon (Peter chia amin aphuak pa); 17 Zebidi tapa Jakob leh a sanggampa Johan, (Aman Bonerges a sa, “Huapen van ging tapa chihna ahi”); 18 Tualeh Andru, Philip, Bartholomai, Mathai, Thoma, Alphai tapa Jakob, Thaddai, Kananmi Simon, 19 tualeh a mansakpa Juda Iskariot zong ahi uh; tuachi’n amaute innsung ah alut uhi.

Jesu leh Beelzebul

(Mat. 12.22-32; Luk .11.14-23; 12.10)

20 Tualeh amauhte an na-ngawn netheilou khop in mipi ahung kikhawm kik ua. 21 A inkuanpihte’n hihthu ajaktak un, “A lungsim venglou ahita chi in pummat asawm uhi,” 22 Tualeh Laigelhmite Jerusalem a pat a hungpaisukte’n, “Beelzebul pai ahi, dawimangpa jiakin ahi dawite adelhdok achi ua.”

23Tuachi’n Jesu’n amauhte asam a akiang uah gentehna in thu agen a, “Bangchi’n Setan in Setan adelhdok diai? 24 Gamkhat kilangkhen in kidouleh agam ading thei kei ding. 25 Tualeh innsung khat kilangkhen in kidouleh, hua inkuan zong adingdok kei ding hi. 26 Setan zong amah leh amah kidou in kilangkhen leh adingdok jou kei ding a, a mangthang jaw ding hi.

27 “Mi kuaman mihatpa ka’n masa loupi in mihatpa inn a lut in van a hihsiatsak ngaikei, a ka’ntawm jawh chiangin ahihsiatsak thei pan ding hi.

Ngaidam theihlouh khialhna

28 “Adiktak in kung hilh ahi, mihing tate akhialhna jousiah uh leh Pasian gensiatna lam a a gensiatna jousiahte uh ngaidam ahi ding ua. 29 Hinanleh kuapeuh khasiangthou gensia bangchiktan in ngaihdam ahikei ding a, tangtawn khialhna a lauhhuai ah aomjaw ding,” achi hi. 30 “Dawinin –pai ahi achijiak ua hihthu agen ahi.”

Jesu nu leh a sanggamte

(Mat. 12.46-50; Luk 8.9,10)

31 Tuanung in anu leh a sanggamte a hungpai ua, inn pualam a dingin amah sam dingin mi asawl uhi. 32 Tualeh akim ah mipi atou diamduam ua, a kiangah , “Inn pualam ah nanu leh na sanggamte’n ahung jong uh,” achi ua.

33 Tualeh aman akiang uah, “Ka nu leh ka sanggamte kuate ahia?” achi a.34 Tuachi’n akim a toute a en kawikawi a, “En un! Ka nu leh ka sanggamte! achi hi. 35 Kuapeuh Pasian deihlam bawl taphot ka sanggampa, ka sanggamnu leh kanu ahi,” achi hi.

Marka 4

Khaichi thehpa gentehna

(Mat. 13.1-9; Luk 8.4-8)

1 Tualeh aman tuipi piau ah  thuhilh apan kik a, tualeh mipi tamtak a kiangah ahung kikhawm ua, tuachi’n tuipi tung a gunkuang sungah alut a, atou a, tualeh mipi jousiah tuipilam nga in tuipi piau ah leitak ah aom uhi. 2 Tuachi’n aman gentehna zang in thu tampi amauhte ahilh a:

3 “Ngaikhia unla! En un, khaichithehpa khaichi theh ding in a kuan a. 4 Tualeh hichi ahung hi a, athehlai in, khenkhat lamsik ah atu a; tungleng vasate hungpaiin anejouta uhi. 5 Khenkhat suangsilei, lai tamlouhna lak ah atu a; lei asahlouh jiakin a poupai a. 6 Hinanleh ni ahungsan in ahaivul a; tualeh jung aneihlouh jiakin a gawsiangta hi. 7 Tualeh khenkhat ling lak ah atu a; alingte hung khang in adepmangta a, gah anekei uhi. 8 Hinanleh khenkhat leihoihlak ah atu a, apou a, hungkhang in gah anei a, aleh sawmthum, aleh sawm guk tualeh jakhat bang in ahung pungta hi,” achi hi.

9 Tualeh aman akiang uah, “Jakna ding bilnei jousiahin ja hen!” achi hi.

Gentehnate omjia

(Mat.13.10-17; Luk 8.9,10)

10 Hinanleh amah guak a a omlai in, sawm leh nihte tawh akiang a omten gentehna thu adongchian ua. 11 Tualeh aman akiang uah, “Nou kiangah Pasian gam thugu’k piak ahi a, hinanleh pualam mite a ding in pen, bangkim gentehna a gen ahi, 12 tuachi’n,

‘Muh jaw muthei ua

a theisiam kei ding uh;

ja jaw ajathei ua, angaihna a theikei ding uh.

Ahuachih keileh denchiah ahung kiheikik kha ding ua,

a khialhnate uh ngaidam ahi kha ding uh,” achi hi.

Buhchithehpa gentehna Jesu’n ahilhchian

(Mat. 13.18-23; Luk. 8.11-15)

13 Tualeh aman akiang uah, “Hih gentehna thu theisiamlou nahi uh maw? A tuachih leh bangchi’n gentehna thudang tengteng na theisiamta ding uale? 14 Buhchithehpa’n thu atheh ahi. 15 Tualeh lamgei a thu athehte hichibang ahi, thu ajaktak un manlamg takin Setan hung paiin a lungtangte ua thute a laksak pai hi. 16 Tualeh tuachimah bang in suangsilei a thehte hihte ahi uh; amau’n thu ajaktak un kipaktak in a sangpai uhi. 17 Hinanleh a mauh ah jung aneikei ua, tomnou khat sung a om uhi. Tuangung in thu jiak a gimthuakna hiam, vuakna hiam ahung om chiangin akipuk pai uhi. 18 Tualeh ling lak a kithehte hihte ahi uh, amau’n thu aja ua, 19 leitung hinkhua ngaihsutnate, hauhsak utna khemnate, leh sil dangdang deihgohnate hunglut in thu adep a, gahtheilou in a omta hi. 20 Hinanleh leihoihlak a thehte hihte ahi uhi. Thu ja a, sa’ng a, aleh sowmthum bang, aleh sawmguk bang tualeh jakhat bang in agah uhi,” achi hi.

Meivak leh chi a pat kihilhna

(Luk. 8.16-18)

21 Aman akiang uah a genkik a, “Meivak akoihna a koihlou a, lawhnuai hiam, lupna nuai hiam a koihding in kuan hungtawi ngai a? 22 Thanglou ding a im bangmah a omngai kei a, langlou ding a phual bangmah a omngai kei. Kuapeuh jakna ding a bilnei jousiahin ja uhen!”

24 Tuaci’n aman akiang uah, bang ahia najak uh pilvang un; natehna nagaimah un ahung tehsak ding ua, tualeh nou a ngaikhiate kiang ah, ahung piak behlap ding uh atamjaw piak in na om ding uhi. 25 “Kuapeuh anei kiangah piakbeh ahi ding a; hinanleh kuapeuh aneilou kiangah aneisun zong laksak ahi ding,” achi hi.

Khaichitang khandan a gentehna

26 Tualeh aman, “Pasian gam pen min lei a khaichi atuh tawhbang ahi; 27 Janchiah a ihmu a, sunchiah athoujel a, khaichi anapou in, anakhang a, hinanleh bangchi a pou a, bangchi a khang ahia chih a theikei. 28 Leiin amah in gah ahung suahjel a; amasan anah tuazoh chiah avui, tuazohchiah avui a atang. 29 Hinanleh agah ahungmin chiangin buhlak ahuntak man in kawite in a at paita hi, achi hi.”

Ankam tang a gentehna

(Mat. 13.31,32,34; Luk 13.18)

30 Tuachi’n aman, “Pasian gam bang tawh itehkak tadiai?” Ahihkeileh “Bangtawh tehkhin a gen ding ita ua? 31 Ankam chi tangkhat leia akituh chiang, lei a khaichitang tengteng sang in neupen nanleh. 32 Atuhkhit nung un a hungpou a, loupa jousiah sang in ahung lianjaw a, balianpipi a hungnei a, tuachi’n tungleng vasate alim ah agiak uhi, huachibang mah ahi,” achi hi.

33 Tualeh hichibang gentehna thu tampi in a jaktheih khomkhom un, thu akiang uah agen jel hi. 34 Hinanleh aman gentehna louin akiang uah thu agenngai kei. Tuualeh amauh guak a aom chiang un a nungjuite kiangah sil bangkim a hilhchian jel hi.

Jesu’n huihpi adaisak

(Mat. 8.23-37; Luk. 8.22-25)

35 Tuani mah in, nitaklam a hunghih in, aman akiang uah, “Galkhat lam ah igalkah ding uh,” achi a, 36 Amau’n mipite a paisan zoh un, gunkuang aom bangbang in amah apaipih ta ua. Tualeh akiang uah gunkuang neu dang zong aom hi. 37 Tualeh huihpi hattak ahunglang a, tui kihotte, gunkuang sung ah a hunglut juajua a; tuachi’n gunkuang a hungdim phialta hi. 38 Hinanleh amah gunkuang mawng langkhat lam ah tangkham kham in ihmu in a om a. Tualeh  a phong ua a kiangah, “Siapa, ka manthai ding uh khawk salou nahi maw?” achi ua.

39 Tuachi’n amah ahungthou a, huih atai a, tualeh tuipi kiangah, “Dai in! Om khinkhian in!” achi a. Tuachi’n huih a tawpta a, a sipdideta hi. 40 Hinanleh aman a kiang uah, “Bangding a hichilau nahi ua? Ginna himhim na neihlouh uh bang chidan ahia?” achi hi.

41 Tualeh amauh lau chitak in alauta ua, “Hihpa bang chibang mi ahia? Huih leh tuipi nangawn in athu aman uh!” chi in khat leh khat a kichituah uhi.

Marka 5

Jesu’n Gerasinmi khanin a damsakna

(Mat. 8.28-34; Luk 8.26-39)

1 Tuachi’n tuipi gal Gerasin mite gam a hungtung ua. 2 Tualeh gunkuang a pat ahung pawtkhiattak in, mi khat han a pat a hungpawt in amah anatuak pai  a. 3 Amah hanlak a teng ahi a; tualeh kuaman sikkhau nangawn in a hentheikei uhi. 4 Kol bulh in sikkhau in anakanta ua; hinanleh sikkhaute a bottan a, kolte a botsia jel a, kuamah in a thujohkei uhi. 5 Tualeh sun leh jan in mualte leh hante ah omjing in akikou a, suang in aki-at jel hi.

6 Aman gamla tak a pat Jesu amuh tak in, tai in, a vabiata a, 7 Tualeh amah aw ngaitak in a kikou a, “Jesu Pasian tungnung pen Tapa! Nang leh ken bang ahia bawlding kaneih? Hung gimsak lou dingin Pasian min in kung ngen hi!” achi hi. 8 Aman a kiangah, “Nang khanin, hihpa sung a pan hung pawt in!” ana chita hi.

9 Tuachi’n aman, “Na min bang ahia?” chi in adong a. Tualeh aman a kiangah, “Ka min ahihleh ‘Nuai ahi,’ tampi ka hihjiak un!” achi a. 10 Hua gam a ten hua gam kipan amauh sawlmanglou dingin a kiangah angen ngutngut a.

11 Tualeh huasan ah mual pang ah vok tampi aom a. 12 Tuachi’n dawininte jousiahin, “Vok sung hungsawl in asung ua ka luttheihna ding un,” chi in akiangah a ngen ua. 13 Tuachi’n Jesu’n amauh thu apia a, tuachi’n Dawininte a pawtkhia ua, vok honte sangnih bang ahi ua, vok honte ken a pat in tuipilam juan in hahtai in a hungtai ua; tuilak ah a kialumta uhi.

14 Tuachi’n vok chingte atai ua, hih thu khuapi leh gam teng ah ahilhta uhi. Tualeh bang sil hungtung ata chia en ding in mipite ahung taikhawm uhi. 15 Tuachi’n amaute Jesu kiangah a hungpai ua, dawi-mat nuaikhat paipa puan silh a, lungsim ngaina pua a anatou ahung mu ua; tuatakin alauta uhi. 16 Tualeh amauhte’n dawimatpa tung a sil tundan leh vok omtan amauh anahilh ua.

17 Tuachi’n amah tawh agam ua pat a pawtkhia dingin a ngenta uhi.

18 Tualeh amah gunkuang sung a aluttak in, dawinin paipa in, “Nang tawh pai ka ut!” chi in a kianga om dingin a ngen a.

19 Hinanleh Jesu’n a phalkei a, a kiangah, “Na inn ah, na lawite kiangah pai inla, Toupa’n nang a ding a silthupi ahung bawlsak dante leh, nang ahung hehpih dante vahilh in,” a chijawta hi.

20 Tuachi’n a pai a, Jesu’n amah a ding a sil thupi a bawlsak dante Dekapoli khua ah a tangkoupih ta a, mi jousiahin lamdang asa mahmah uhi.

Jaira tanu leh numei sipawt damna

(Mat.9:8-26; Luk 8.40-56)

21 Jesu gunkuang a galkhat lam ahung tunkik takin mipi tamtak akiang ah ahung paikhawm ua, tualeh amah tuipi gei ah a om a. 22 Tualeh ngaiin, kikhopna inn a vaihawmte lak a mikhat amin Jaira kichi a hungpai a, Jesu amuh takin a kengbul ah khupbok a. 23 “Ka tanu naupang nou asi dekdek a, ahung dam a, a hintheihna dingin, hungpai a atung a nakhut nga ding in kungngen hi!” chi’n, chitaktak in a ngen hi.

24 Tuachi’n Jesu amah tawh apaita a, mipi tampi in ajui ua, aboh lutlut uhi.

25 Tualeh numei khat kun sawmlehnih sipawt a damlou aom a, 26 Daktor tampi lak a pam sil tampi a nathuak in, aneih jousiah ana jangjouta a, hinanleh bangmah a phatuamkei a, khawk jawsem a. 27 Aman jesu tanchin ajaktak in, anung ah mipi lak ah hungpai a, apuan a khoih a. 28 “Apuan maimai khoihkha lengzong ka dam ding hi,” chi’n a ngaihsun hi.

29 Thakhat in asipawt pen akangta a; anatna adamta hi chih ataksa tung ah akithei hi. 30 Tualeh Jesu’n a sung a kipan in silbawltheihna apawt chih atheipai a, mipilak ah akihei kawikawi a, “Kua ahia ka puan khoih?” achi a.

31 Hinanleh a nungjuite’n a kiangah, mipi in ahung phuk lutlut na mu vele, kua ahia hung khoih nachih, achi ua.

32 Tualeh aman hua sil bawlnu muh sawm in adak kawikawi a. 33 Hinanleh numeinu in atung a sil kibawl athei a, lau leh chitun kawm in a hungpai a, amaiah khupbok in, a kiangah thudik jousiah ahilhta hi. 34 Tualeh aman amahnu kiang ah, “Tanu, na ginna in ahung damsakta hi, pai inla, na natna a kipan na dam tawntungta in,” achi hi.

35 Aman hibang a thu agen laiin, kikhopna inn a vaihawmpa inn a kipan mi a hungpai ua, “Na tanu asita ve, bangding a siapa buaisak nalai nahia?” a hungchi ua.

36 Jesu’n hih thu ajaktak in, kikhopna inn a vaihawmpa kiang ah, “Lauken gingta mai in,” achi hi. 37 Tualeh aman Peter leh Jakob leh Jakob sanggampa Johan chihlouh in amah ajuih uh aphal kei. 38 Tuachi’n amah kikhopna inn a vaihawmpa inn ah a hungtung a, ana buai vengvung leh kap a na mau vengvungte amu a. 39 A valut a akiang uah, “Bangding a kap a mau vengvung nahi ua? Naupangnu asi anikei, a ihmu ahi!” achi hi.

40 Tualeh amauhte’n amah a nuihsan ua, ahihhang in aman aun un a notkhia a, naupangnu nu leh pa leh a jawhpihte a paipih a, naupangnu omna ah alut ua. 41 Tuachi’n aman naupang akhut in akai a akiang ah, “Talitha kumi,” achi a. Tuapen, “Nungaknou, thouin, kungchi hi!” chihna ahi.

42 Tuacih’n numei naupang a thoua a paipai ngal a, (amahnu kum sawmlehnih mi ahita a), tuatakin a mau’n lamdang asa mahmah uhi. 43 Hinanleh aman akiang uah, hih kuamah in theikei heh achi tinten a, “Tualeh nek ding banghiam pia ding in, thu apia hi.”

Marka 6

Nazareth ah Jesu a deihkei uh

(Mat. 13.53-58; Luk 4.16-30)

1 Tuachi’n hua a kipan in apawt a, ama tenna gam ah a hungpai a, tua leh a nungjuite’n amah ajui ua. 2 Tualeh khawlnia hunghih in, kikhopna inn ah thuhilh apanta a, tualeh mi tampi athu zate’n “Hipa’n hih thute khoia pan a amuh ahia? A kiang a pilna kipia bangpilna ahia? Akhut in hijahta a silthupi abawl bang chidan ahia? 3 Hihpa Mari tapa Jakob, Jos, Juda leh Simon sanggampa, sing nasep sempa hilou amaw? A sanggamnute zong hihsan a ikiang ua om hilou ahi uh maw?” achi ua. Tuachi’n atung ah alungkim takei uhi.

4 Hinanleh Jesu’n a kiang uah, “Jawlnei jaw ama gamsung leh ama inkuante lak leh ama insung ah chihlouh jahbawllouh in a omngai kei hi,” achi hi.

5 Mi damloute tung a akhut nga a adamsak chihlouh ngal hih gam ah sillamdang a bawlthei kei hi. 6 Tualeh a gintatlouh jiak un lamdang asa mahmah hi. Tuachi’n khuate ah  thu hilh in avak kawikawi hi.

Sawltak sawmlehnite sawlkhiatna

(Mat. 10.5-15; Luk.9.1-6)

7 Tualeh aman sawmlehnihte a kiangah a samkhawm a, nihnih in asawlkhia a, tualeh Dawininte tung a thuneih zong apia hi. 8

“Tualeh a khualjinna uah chiangkhut chihlouh bangmah, thungpite,tanghoute, leh akawng a dangka pualou ding in thu apia hi. 9 Hinanleh khedap bulh unla, puan-ak nih keng kei un ,” achi hi. 10 Aman akiang uah, “Inn khatpeuh a na lutchiang un, huamun a na pawtkhiat masiah uh tua inn ah tung kinken un. 11 Tualeh kuapeuhin ahung tunsaklouh ua, nathu uh zong a ngaihnuam kei uleh, tua a pan na pawtchiang un, amauh mawhpaihna ding na kengtaw ua leivui thingkhia un. Adiktak in kung hilh ahi, vaihawmni chiang in tua khua thuak ding sang in Sodom leh Gomorrah thuak ding adan a omjaw ding!” achi hi.

12 Tuachi’n amauh a pawtkhia ua mite kisik dingin thu ahilh uhi. 13 Tualeh amauhte’n dawi tampi a notdok ua, damlou tampi sathau nuh in a damsak uhi.

Baptistpa Johan sihna

(Mat. 14.1-12; Luk 9.7-9)

14 Tualeh kumpi Herod in anaja a, amin athanta’k jiakin, “Baptist Johan misi lak a kipan-a hung thoukik a! Huajiakin hih sibawltheihnate’n amah ah sem ahive,” achi hi.

15 Adangte’n, “Elijah ahi achi ua,” Midangte’n, “Jawlnei ahi, Jawlneite lak a khat ahi,” achi ua.

16 Hinanleh Herod in hihte ajaktak in, “Alu ka tansakpa Johan ahi ve! Misi lak a pan hung thoukik ahi!” achi hi. 17 Herod in a sanggampa Philip zi Herodia a kitenpih tak jiakin Herodia jiakin mi asawl a, Johan a mansak a, ka’n in thong ah akhumta hi. 18 Ajiak Johan in Herod kiangah, “Na sanggampa zi na kitenpih dan ngaina ahikei!” aca chi hi.

19 Tuajiakin Herodia in amah a mudah a thah a ut a, hinanleh a thatthei kei hi. 20 Herod in Johan hi midiktat leh siangthoutak ahi chi athei jiakin a lau a, amah ana humhum a; athu ajak in a lungkham a, hinanleh kipaktak in a ngaikhia jel hi.

21 Tuachi’n Herod in a pian ni-in ami thupite, galkap lamkai liante, Galili gam a miliante a ding a jahna ankuang aluilai in hun lemtang a hung omta a. 22 Tualeh Herodia tanu a hunglut a, alam a, tualeh Herod leh a kiang a toute a kipaksakta a, kumpipa’n numei naupangnu kiangah, “Na deihdeih hung ngen in? Kung piading ,” achi a.23 “Bang khatpeuh nung nget taphot, kungpia ding, ka gam kimkhat tan in zong chi in amahnu kiangah a kichiam hial hi!”

24 Tuachi’n amahnu vapawt khia in anu kiangah, “Bang ka ngen dia?” chin ava dong a.

Tualeh amahnu’n , “Baptispa Johan lutang,” anachi hi.

25 Kintakin kumpipa kiang ah hunglut in a kiangah, “Tu leh tuin Baptistpa Johan lutang kuang khat in hungpia lechin ka ut!?” chi-in a ngen a.

26 Tuachi’n kumpipa a lungkham mahmah a, hinanleh a chiamsa ahihman in leh a kiang atoute jiakin a nial nuam kei a. 27 Tuachi’n kumpipa’n athat ding in mikhat a sawlpai a, amah paiin thong sung a alu a vatanta a; 28 a lutang kuang khat in a hungtawi a, numei naupang kiang ah apia a; tualeh numei naupangnu’n anu kiangah a piata hi. 29 A nungjuite’n ajaktak un aluang avala ua, han ah avuita uhi.

Jesu’n mi sangnga avakna

(Mat. 14.13-21; Luk. 9.10-17; Jhn . 6.1-14)

30 Tuachi’n sawltakte Jesu kiangah ahung kikhawm ua, a silbawlte jousiah uleh a thuhilhnate uh a hunghilh ua. 31 Tualeh aman akiang uah, “Noumau guak in hungpai unla, munsip ah tomkhat hung khawlphot un,” achi a. Ajiak atung akuan ki phamat den ahiman in an nekna ding hun nasan amukei uhi. 32 Tuachi’n amauhte gunkuang in munsip ah atuampai ta uhi.

33 Hinanleh mipite’n apailai uh amu ua, mi tampi in amah athei ua, khuapite a pan keng in a hungtai ua, ana makhelh in a kiangah ahung pai khawm ua. 34 Tualeh Jesu ahung pawtkhiat takin,mipi tampitak a muta a, chingtu bei belam bang ahihjiak un a hehpih manmah a; tuachi’n thu ahilh panta hi. 35 Sun hun tamjaw ahung manzoh tak un, a nungjuite hungpaiin a kiangah, “Hih gamdai mun ahi a, hunlah a jekaita a; 36 I kim a gamte leh khuate a vapai a nek ding aki leitheihna ding un amauhte sawlkhia in, tanghou nek ding bangmah lah aneingal kei ua,” achi ua.

37 Hinanleh aman akiang uah, “Nou nek ding pia un,” chin dawng a.

Tualeh amauhte’n a kiang ah, “Tanghou makhai zanih man kava lei un nek ding ka pia ding uh maw?” achi ua.

38 Hinanleh aman akiang uah, “Tanghou phel bangjah nanei ua? Pai unla va en un,” achi a.

Tualeh amau’n atheihtak un, “Phei nga leh ngasa nih,” achi ua.

39 Tuachi’n aman akiang uah, mipite loupa tung a apawl pawl a tousak ding in amauhte thu apia hi. 40 Tuachi’n amauh agual gual in jakhat khat bang sawmnga nga bang in atouta ua. 41 Tualeh aman tanghou phelnga leh ngasa nih alakzoh in vanlam a entou a, gual ajawl a, tanghoute a balkham a, amai ua luisak dingin a nungjuite kiang ah apia a; tualeh ngasa homsakta hi. 42 Tuachi’n amaute’n aun un ane ua, avahchiatta uhi. 43 Tualeh amau’n tanghou nente leh ngasa nente a luak ua, lawh sawmlehnih a dim hi.

44 Tualeh tanghou nete pasal piching sangnga bang ahi uhi.

Jesu tuipi tungah keng in apai

(Mat.14.22-33; Jhn. 6.25-21)

45 Jesu’n mipite a sawl khiat sungin a nungjuite galkhat lam Bethsaida khua a na mapai dingin gunkuang ah atousak pai hi. 64 Tualeh amaute tengteng a sawlkiat khit in thumna neiding in mual ah apaita hi. 47 Nitak a hunghih in, gunkuang tuipi laiah a omta a; amah guak in gam ah a om hi. 48 Tuachi’n Jesu’n nungjuite huih in aleh lamlam a amut  jiaka gunkuang hot a hahpan a pang amu a, khuavak kuan in amah tuipi tung ah keng a hungpaiin amau lam a hungjuan a, amau paisan suak asawm a. 49 Tualeh a mauhte’n tuipi tung a keng a pai amuhtak un, “Sikha khat hinteh!” achi ua, akikou khia ua. 50 Amau’n amah amuchiat ua, abuaita uhi.

Hinanleh aman amauhte a houpihpai a, “Khamuang takin om un! Keimah ka hi. Laukei un!” achi hi. 51 Tuakhit in amah gunkuang sung ah akiang uah akah a; huih a khawlta hi. Tuachi’n amauhte’n genzohlouh khop in lamdang asa mahmah uhi. 52 A lungtangte uh atak jiakin amau’n tanghou a sil omte atheisiam nawn kei uhi.

Gennesaret a damnate

(Mat. 14.34-36)

53 Amauhte a galkah khit un, Gennesaret gam a hungtung ua, tuamun ah gunkuang a khihta ua. 54 Amauhte gunkuang a pat a hungpawt tak un, mipite’n amah a theipai ua. 55Tua gam kim tengteng ah atai ua,  aom hi chih atheitak un, damloute alupna pum in ahung jawng hial ua. 56 Khuata hi’n khuapi hi’n ahihkeileh gam hitaleh a lutna taphot ah damloute van juakna mun bang ah alumsak ua, a puanmong bek khoihtehi a ngen ua. Tualeh a khoikha taphot adam jel uh.

Marka 7

Khanglui upate thugousiah sinsakna

(Mat.15.1-9)

1 Tuachi’n Jerusalem a kipan a hungpai Pharisaite leh Laigelhmi khenkhat akiang ah ahung paikhawm ua. 2 Tualeh amauhte’n a nungjuite khenkhat in khut nin pum a tanghou a nek uh a muta ua, nin chih in, khut sillouh chihna ahi.

3 Pharisaite leh Judate’n upate thugousiah apom tinten jiak un a khut uh hoihtak a asil kei uleh ane ngai kei uhi. Tuapen khanglui thugousiahte ajuihna uh ahi hi. 4 Van juakna mun a kipan apaichiang un zong, a kisilphot kei uleh ane ngai kei uhi. Tualeh thugousiah dang tampi achi’n uh aom, nou, noupi bilnei, taubel, lupna sil chihte.

5 Tuachi’n Pharisaite leh Laigelhmite’n, “Bangding a na nungjuite upate thugousiah bang a omlou a, khut sawplou a tanghou ne uh ahia?” chi’n adong ua.

6 “Aman akiang uah, Isaiah in nou milepchiahte thu ana genkholh dik talua hi! Hih bangin ana gelh hi:

            ‘Hihte’n amuk un a hung zahtak ua,

            hinanleh a lungtang uh keia pan in a gamla hi.

7 Tualeh a thuhilhna ua mihing thupiakte ahilh jiak un ahung biak uh athawn ahi,

chih gelh ahih bang in!’

8 “Pasian thupiakte koihkhia in, mihing thugousiahte najuih  tinten jiak uh ahive, noupi leh nou sil leh adang hichibang mah tampi na chiin uh,” achi gi.

9 Aman akiang uah, “Na thugousiahte uh na zuihtheina ding ua Pasian thupiakte nialdan na siam mahmah uhi. 10 Mosi-in, ‘Na nu leh na pa zahtakin,’ tualeh ‘Anu leh apa samsia si heh,’ achi hi. 11 Hinanleh nou, ‘Mi’n anu hiam apa hiam kiangah nung phattuampihna ding korban ahita,’ achihleh, (Huapen, Pasian kiang a lat, chihna ahi), 12 Tuazoh chiangin anu leh apa a ding bangmah sepsak naphal nawn kei uhi. 13 Na thugousiah uh mi na piaksawn na un Pasian thu bangmahlou na suah uhi. Tuabang sil tampi nabawl uhi,” achi hi.

 Mihing ninsak silte

(Mat.15.10-20)

14 Tuachi’n Jesu’n mipite sam in akiang uah, “Na un un ka thugen ngaikhia unla, theichian un. 15 A pualam pan a mihing sung a lut in mi aninsaktheibangmah omlou hi. Hinanleh amah sung pan a hungpawt silte in mi aninsakjaw hi.” 16 Jakna ding a bil neiin, ja hen! Achi hi.

17 Mipite nusia a inn sung a alutkhit in a nungjuite’n gentehna thu a dongchianta ua. 18 Tuachi’n aman akiang uah, “Nou zong huachipi a theisiamna neilou nahi uh maw? Bangpeuh pualam a kipan a mihing sung a lut in, amah aninsakthei kei, chih theilouh nahi uhiam? 19 Ajiak ahihleh, a lungtang sung a lut loua, a gilsung a lutjaw a, nek chiteng siangsak a dailenna a pawtkhia mai ahi chih theilouh maw?” achi hi.

20 Tualeh aman, “Mihing sung pan a pawtkhiate in mihing ninsak hi. 21 Sunglam a, mihingte lungtang a kipan in, ngaihtuahna giloute, angkawmnate, thanghuainate, tualthahnate, 22 Guktatnate, ennate, gitlouhnate, khemhatnate, huknate, mitsipnate, gensiatnate, kiletsaknate, mot-huainate, 23 Hih silgiloute jousiah sunglam a pat hungpawt in mihing aninsak jel hi,” achi hi.

Numei khat ginna

(Mat. 15.21-28)

24 Huamun pan in amah ding khia in Tura leh Sidon gam ah apaita a, inn khat sungah alut a, inn khat sungah alut a, kuamah in a theihlou ding a ut a, hinanleh a kiphualthei kei hi. 25 Numei khat, a tanu naupang khanin pai in, a tanchin anaja a, tuachi’n hung paiin a kengbul ah a ku’n a. 26 Numeinu Grik mi ahi a, Suria gam Phoinisia khua a piang ahi, pianna lam ah Siro-Phoinikimi ahi. Amahnu in a tanu sung a khanin nohkhiat sak ding in a kiangah a ngen hi. 27 Hinanleh Jesu’n a kiang ah, “Tate hungvah masa phot uheh, tate tanghou laksak a uite kiang ah paih ahoihkei,” achi hi.

28 Tualeh amahnu’n a kiangah, “Toupa,” hih jaw ahi a, “hinanleh dohkan nuai a uite’n zong tate tanghou neng kia anejel uh hi!” chi’n a dawng hi.

29 Tuachi’n aman a kiangah, “Hibang a nagen man in paita in, dawi na tanu sung a kipan in a pawtta hi!” achi hi

30 Tualeh amahnu inn a hungpai takin, atanu dawiin a pawtkhiatsan, lupna a lum ahung muta hi.

Mi bilbing leh ham theilou damsakna

31 Tuachi’n Tura leh Sidon gam a pawtsan kik a, Dekapoli gam Galili tuipi a hungtungta hi. 32 Tuachi’n mikhat bilbing, ham zong ham chian theilou a kiangah ahung zohpih ua, atung a akhut ngading in a ngen ua. 33 Tualeh aman mipi lak a kipan apaipih tuam a, akhutjungte in a bilsung a khoihsak a, achil asiat a, tualeh alei a khoihsak a. 34 Tuachi’n vanlam a entou a, anak-huai a, “Ephatha,” achi a, “Hung kihong in!” chihna ahi.

35 Abil a hungvang pai a, aleigui akiphel a, ahung hamsiang theita hi. 36 Tuachi’n aman kuamah hilhlou dingin thu apia a, hinanleh a hahkham leh a hahgen jawsem uhi. 37 Tualeh genzohlouh khop in lamdang asa ua, “Aman sil jousiah a bawlhoih a! Bilbingte azasak a, hamtheiloute a hamsak thei jel!” achi uhi.

 Marka 8

Sangli vakna

1 Tuanite in, mipi atam mahmah ua, nek ding bangmah aneikei ua, Jesu’n a nungjuite asam a akiang uah, 2 “Mipite tuin ka kiangah nithum nek ding neilou a om uh ahihtak man un ka hehpih mahmah hi. 3 Gilkial in a inn uah nungsawl leng lamkal ah husam kha ding uh, khenkhat houh ahung kipatna uh gamlapi ahi,” achi hi.

4 Tuaci’n a nungjuite’n, “Mi’n hih gamdai ah tanghou tawh hih mipite bangchi’n a avahsakthei dia?” chi’n adawng ua.

5 Aman, “Tanghou bangzah nanei ua?” chi in amauh adong a.

Tualeh amau’n, “Sagih,” achi ua.

6 Tuachi’n aman mipite tual a tou ding in thu apia a; tualeh tanghou sagihte ala a, kipahthu agen a, abalkek a amai ua lui dingin a nungjuite kiangah apia a; tuachi’n mipite mai ah aluita uhi. 7 Amau’n ngasa themkhat zong anei ua; aman gual ajawl a, hihte zong amai ua lui ding in thu ahilh a. 8 Tuachi’n ane ua, a khamchiat ua; a khamval nen uh bawm lianpi sagih dim in aluak uhi. 9 Ane teng mi sangli bang ahi ua; tuachi’n aman amauhte a paisakta hi. 10 A nungjuite kiangah gunkuang sungah atuangpai a, Dalmanutha gam a tungta uhi.

Pharisaite’n chiamtehna azong uh

(Mat. 16.1-4)

11 Tuachi’n Pharisaite a hungpai ua, amah ze-etna dingin amah a pan van a kipan-a chiamtehna zong in amah a kisel pih uhi. 12 Hinanleh amah nakpitak in akhuisa a, “Bangding a tulai khangthakte’n chiamtehna zong uh ahia? Adiktak in kung hilh ahi! Tulai khangthakte kiangah chiamtehna mawng mawng piak ahikei ding!” achi hi.

13 Tualeh amauhte nusia in gunkuangsungah tuang in a galkhat lam ah apai hi.

Pharisaite leh Herod pawlte tol

(Mat. 16.5-12)

14 A nungjuite’n tanghou akeng manghilh ua, tanghou phelkhat chihlouh gunkuang sungah tanghou dang aneita kei uhi. 15 Tuachi’n aman akiang uah, Pharisaite tol leh Herod pawlte tol lak ah kiveng unla, pilvang un, achi hi.

16 Tualeh amaun, “Tanghou I neihlouh  jiak hinteh,” chin a kingaituah ua.

17 Hinanleh Jesu’n atheihtak in akiang uah, “Bangding a tanghou na neihlouh jiak ua kingaituah nahi ua? Tutan a zong theitheilou leh theisiamlou lai nahi uh maw? Na lungtang uh tak nalai ahi maw? 18 Mit nei napi’n mulou nahi umaw? Tualeh bil nei napi’n zalou nahi uh maw? Thei gige nawnlou maw? 19 Mi sangnga a ding tanghou phelnga ka balkhap laiin a neng bangzah ahia naluak uh?” achi a.

Amau’n a kiangah, “Sawmlehnih,” achi uhi.

20 “Mi sangli a ding sagih ka balkhap laiin, aneng bawm bangzah ahia naluak uh?” a chikik leuleu a,

Amau’n, “Sagih,” achi ua.

21 Tuachi’n aman a kiang uah, “Bang achi ei, theisiam lou maw?” achi hi.

Bethsaida ah mittaw damsakna

22 Tuachi’n Bethsaida a hungtung ua; a kiangah mittaw khat a hungpua ua, amahpa khoih dingin a kiangah a ngen ua. 23 Tuachi’n aman mittawpa a khut in atu a, khua pulam ah apaipih a. Tualeh amit ah achil asia a, atung ah akhut akhoih a, “Sil khatpeuh a muthei leh theihlou adong hi.”

24 Tualeh amah a daktou a, “Mite sing bangin paiin ka mu hi,” achi hi.

25 Tuachi’n aman amit ah akhut a khoikik a. Adaktou sak a, tuachi’n ahung damta a, mi zousiah chiantak in ahung muta hi. 26 Tuachi’n aman a inn lam uah asawl a akiang ah, “Khuasung ah lut kenla,” khuasung a mi kuamah hilhken, achi hi.

Peter in Jesu Krist ahi chia a phuanna

(Mat. 16.13-20; Luk 9.18-21)

27 Tuachi’n Jesu leh a nungjuite Kaisaria Philippi khua juan in a paikhiata ua. Tualeh lampi ah aman a nungjuite kiangah, “Mi’n kei kua ahi a hungchi ua?” chi’n adong a.

28Amau’n a kiang ah, “Baptistpa Johan ahi, ahungchi uh, hinanleh khenkhat in Elijah ahi, ahungchi uh, tualeh midangte’n Jawlnei lak a khat ahi, a hungchi uh, chi’n a dawng ua.”

29 Aman a kiang uah, “Ahihleh nou kei kua ka hi nungchi ua?” achi a,

Peter in a kiangah, “Khrist nahi,” chi’n adawng hi.

30 Tuachi’n aman a tanchin kuamah hilhlou dingin amauhte khauhtak in akham hi.

Jesu’n a thuakgim leh asih ding a genkholh

(Mat. 16;21-28l Luk. 9:22-27)

31 “Tualeh Mihing Tapa in sil tampi a thuakdingte, upate, siampite, Laigelhmite deihlouh a aom ding, thah a aom ding, nithum nunga a thohkik ding thu amauh a hilhpanta hi.” 32 Aman hih thute langtang takin agen a, tuachi’n Peter in amah paipih tuam in atai a. 33 Hinanleh amah a kihei a, anungjuite a en a, Peter atai a, “Setan, Ka nung ah pai in, Pasian silte na ngaihsun kei a, mihing silte na ngaihsunjaw hi,” achi hi.

Kross pua a anung juih ding

34 Aman mipite tawh a nungjuite a kiang a asapkhit in akiang uah, “Kuapeuhin ka nung a juihnuam leh, amah kimanghilh in a kross pua in hungjui hen, achi hi. 35 Kuapeuh a hinna it in ata’n ding a, hinanleh kuapeuh ka min jiak leh tangthupha jiak a hinna ta’n in a humbit ding. 36 Mi’n leitung pumpi nei henla ahinna ta’n taleh amah a ding in bang aphatuam diai? 37 Ahihkeileh mi’n a hinna ta’ng in bang apiathei diai? 38 Kuapeuh tulai khangthak angkawm leh sil gilou bawlte lak a keimah leh ka thu zumpih, Mihing Tapa-in a vanmi siangthoute toh a Pa thupina a kivon a hungpai hun chiangin huapa aman zong ajumpih ding,” achi hi.

Marka 9

1 Tualeh aman akiang uah, “Adiktak in kung hilh ahi, hihsan a ding khenkhatte Pasian gam sil bawltheihna toh hungtung amuhma un, sihna chiamlou ding a om uh,” achi hi.

Mellamdanna

(Mat. 17:1-13; Luk. 9:28-36)

2 Niguk nung in Jesu’n Peter, Jakob leh Johan a tonpih a atuam in mual sangtak tung khat ah amauh guak in apaipih a, tualeh amai uah amel omdan ahung lamdangtaa a, 3 a puansilhte leitung a puansawpte’n asawp ngou theihlouh khop hial a vuk bang a ngou in ate selsel hi. 4 Tualeh Elijah Mosi tawh a kiang uah ahung kilak ua, Jesu tawh akihou ua. 5 Tuachi’n Peter in Jesu ahoupih a, “Rabbi, ei a dingin hihsan a om ahoih hi, hampheng buk thum i bawl ding a, nang a ding khat, Mosi a dingin khat, Elijah a dingin khat,” achi hi. 6 Alau mahmah jiak un gen ding bangmah atheikei uhi.

7 Tualeh meipi hungpai in amauh a hungtuam a, “Tualeh meilak pan aw hungging in, hih ka Tapa deih tak ahi, athu ngai un!” achi hi. 8 Kintakin akim akiang uh a en ua, Jesu chihlouh akiang uah midang kuamah a mutakei uhi.

9 Mual a pan ahung kumsuk laiun, “Mihing Tapa misi lak a kipan athohkik khit masiah asilmuhte uh kuamah hilhlou ding in thu apia hi.”

10 Tuachi’n hihthu avom kinkenta ua, “Misi lak a pat thohkik achih bang achihna adiam aw?” chi’n a kidong uhi. 11 Tualeh amauhte’n a kiangah, “Bangding a Laigelhmite’n Elijah hungpai masa ding ahi, chi ahi ua?” chiin adong ua.

12 Tuachi’n aman akiang uah, “Siljousiah bawlhoih thak ding in Elijah hungpai masa him ahi. Tualeh sil tampi athuak ding a, tualeh mudah leh simmawh bawl in a om ding chi a mihing Tapa tangthu bang chidan a gelh a na om ahia? achi hi. 13 Hinanleh kung hilh ahi, Elijah ahung paikhinta hi tualeh a tanchin agelh bangbang un atung ah a ut ut un abawlta uh,” achi hi.

Jesu’n naupang dawimat a damsakna

(Mat. 17.14-21; Luk .937-43)

14 Tualeh amah nungjuite kiang a hungtun in, aki’m ua mipi tampitakte leh Laigelhmite’n anasel lai uh amu hi. 15 Mipi jousiahin amah amuh tak un lamdang asa ua, a kiangah a taipai ua, chibai abuk uhi. 16Tualeh aman Laigelhmite kiangah, “Amauh tawh bangthu houlim na hi ua?” chi’n a dong hi.

17 Tuachiang in mipi lak a mi khat in, “Siapa, ka Tapa dawi hamtheilou nei na kiangah kung zohpih hi. 18 Tualeh a matna mun teng ah apuksak jialjial a, akam ah chilphuan apawt a, aha agawi a, agawng hulhul a, tuachi’n na nungjuite kiangah hung hawlkhiatsak ding in ka gen a, hinanleh amau’n a hawlkhiathei kei uh,” chiin adawng hi.

19 Tuachi’n aman akiang uah, “Khangthak ginna neiloute aw! Bangtan na kiang uah om ding ka hia? Bangtanvei hung thuakthei ding ka hia? Amah ka kiangah hung paipih un!” chi in adawng hi. 20 Tuachi’n a kiangah ahung paipih ua.

Tualeh dawiin amah amuhtak in naupangpa hahtak in a bawlgenthei a, tual ah kipuk in chilphuak kai niainuai in a, kilik vutvut a. 21 Tuachi’n aman apa kiangah, “Hichi bang a aom na bangtan ahita a?” chi’n adong a.

Tualeh aman, “A naupan lai a pat ahita,” achi hi. 22 “Tuachi’n amah bawlsiat sawm in tamveipi meiah leh tuiah a sawnpuk a. Hinanleh nang banghiam bawltheih naneihleh, hung hehpih inla hung panpih in!” achi hi.

23 Jesu’n a kiangah, “Na gintat theih photleh! A gingtami a dingin bangkim ahithei hi,” achi hi.

24 Tuatakin naupangpa pa ngaitak in a kikou a, “Tuachi’n mittui luang pum in Toupa ka gingta hi, ka ginlahna ah hung panpih in!” achi hi.

25 Jesu’n mipi hungtai khawm lai amuhtak in, dawinin atai a, a kiangah, “Hamtheih louhna leh bilbingna dawi,” “Thu kungpia hi, asung a pat hung pawt khia inla lutkik nawn ken!” achi hi.

26 Tuachi’n dawinin a kikou khia a, hahtak in abawl genthei a, asung a pat ahung pawtkhia ta a,  naupangpa misi bangin ahung om a, mi tampite’n, “Asi ahi!” achi uhi. 27 Hinanleh Jesu’n akhut a tuin akaithou a tuachi’n amah ahung thouta hi.

28 Tualeh amah inn sung a ahunglut takin, a nungjuite’n, “Bangchia kou hawlkhia theilou ka hi ua le?” chin aguk in adong ua.

29 Tuachi’n aman akiang uah, “Hibangte pen thumna leh anngawlna chihlouh, bangmah in apawtsak theikei,” achi hi.

Jesu’n asih ding a genkholh

(Mat. 17.22, 23;Luk 9.43b-45)

            30 Tuachi’n hua a kipan a paikhia ua, Galilli gam anawk ua, aman kuamah thei ding a dei kei hi.31 A nungjuite a dingin thu ahilh a akiang uah: “Mihing tapa mihingte khut a matsak in a om ding a, athat ding uh. Tualeh a thahkit nung uh nithumni changin a thoukik ding, “ achi hi.

32 Hinanleh amau’n athugen atheisiam kei ua, amalah a dongngam ngal kei uhi.

Kua alianpen dia?

(Mat. 18.1-5;Luk. 9.46-48)

33 Tuachi’n kapernaum khua a hung tung a, innsung a aomlai in aman akiang uah, ‘Hua lampia bangthu ahia na kisel uh?” chi’n a dong a.

34 Hinanleh, lampi ah ilakj uah kua ilianpen dia? Chia akiselkhit jiak un, ham lou in a om uhi.35 Tuachi’n amah atou a, sawmlehnite asam a akiang uah, “Kuapeuh a masapen hih ut tuh mi teng teng sang in nunungpen in aom ding a, tuachi’n mi teng teng na sem in a om ding hi,” achi hi. 36 Tuakhit in naupangnou khat ala a alak uah adingsak a, tuazoh in a pom a akiang uah, 37 Kuapeuh ka min a hichibang naupang neute lak akhat kipahpih in kei hung kipahpih ahi ding; tualeh kuapeuh kei hung kipahpih tuh, kei hung kipahpih ahi kei ding ua, kei hungsawkpa kipahpih ahijaw uhi, “ achi hi.

Jesu’n kituam bawlna akham

(Luk. 9.49,50)

38 Johan in akiangah, “Siapa, ei hungjuilou namin a dawite hawlkhia mikhat kamu ua, ei hung juihlouh jiakin ka kham uh, “ achi a.

39 Hinanleh Jesu’n a kiangah, “ Amah kham kei un, kuamah ka min a sillamdang a anung a kei hung gensiapai thei aom kei.40 Kuapeuh ei hungdou loute eilam a pang ahi ua.41 Kuapeuh Krist a nahihjiak ua kamina tui noukhat dawn ding hungpai tuh, adiktak in kung hilh ahi, a nuamman amansuah kei hial ding hi.

Jesu’n dan diklou a gamtangte avau

(Mat. 18.6-9; Luk. 17.1,2)

42 “Hinanleh kuapeuh kei hung gingta neunoute lak a khat puksak pen, a ngawng ah buhgawina suang lianpi awhsak uh henla, tuipi ah khiale uh, amah a dingin ahoihjaw ding hi. 43 Na khut in khialhna a ahung puksak leh, tankhia in. Khut nih nei a gawtmun mei mittheilou a pai sang in, khut tan a hinna a lut nang a ding in ahoihjaw hi. 44 ‘Athan uh sihlouhna leh meikuang mihlouhna ah.’ 45 Na keng in khialhna a ahung puksak leh , tankhia in. Keng nih neia gawtmun mei mitheilou a paih a na om sang in, kengbai a hinna a lut nang a dingin ahoihjaw hi. 46 Athan uh sihlouhna leh meikuang mihlouhna ah.47 Na mit in khialhna a ahung ouksakleh, kheikhia in! Mit nih nei a gawtmun mei mittheilou a paih a na om sang in, mit khat nei a Pasian gam a lut nang a ding ahoihjaw hi. 48 ‘Athan uh sih louhna leh mei amih theilouhna ah.’

49 “Michih mei a alsak in aom ding ua, tualeh kithoihna zousiah chi a alsak in aom ding hi.

50 “Chi ahoih hi, hinanleh chi in a alna mansuah taleh bangchi’n na alsak kik diai?

“Nouman chi kineih unla, khat leh khat kilem in om un,” achi hi.

Marka 10

Kitenna leh kikhulna

(Mat. 19.1-12; Luk.16.18)

1 Tuachi’n hua a kipan ading a Judea gam ah Jordan gal lam ah apaita hi. Tualeh a kiangah mipite ahung kikhawm kik ua, tuachi’n a bawl ngaina mah bangin amauhte thu a hilhkikta hi.

2 Pharisaite hungpai in a kiangah, amah ze-et nan, “Mi’n azi akhul asiang diam?” chi’n adong ua.

3 Tuachi’n aman akiang uah, “Mosi in bangchi’n thu ahungpia a?” achi hi.

4 Amau’n, “Mosi in kikhulna lai gelh a khul aphaljel hi,” achi ua.

5 Jesu’n akiang uah, “Na lungtang uh atakjiak aveleh hih thupiak noua ding a ahung gelhsak. 6 Hinanleh sil kisiamchil a pan in, ‘Pasian in aman numei leh pasal in asiam hi.’ 7 ‘Hih thu jiakin pasal in anu leh apa apaisan ding a, azi atu tinten ding, 8 tuaaleh anih un taksa pumkhat ahung hita ding uh.’ Tuachi’n nih ahi nawn takei ua, taksa pumkhat ahung hijawta uhi. 9 Tuajiakin Pasian in agawmsa mihing in khen kei hen,” chi’n a dawng hi.

10 Innsung ah a nungjuite’n hih thu mah ana dangkik ua. 11 Tuachi’n aman akiang uan, “Kuapeuh azi khul a, midang neiin azi ang akawmsan ahi. 12 Tualeh numei in zong a pasal khen a midang tawh a kiteng leh, angkawm ahi,” achi hi.

Jesu’n naupang neute a gualjawl

(Mat. 19.13-15; Luk. 18.15-17)

13 Tuachi’n a tham dingin naupang neute a kiangah ahung zohpih ua, hinanleh nungjuite’n a hung paipihte ana tai ua. 14 Hinanleh Jesu’n hua amuhtak in, alung nuammoh mahmah a akiang uah, “Naupang neute ka kiangah hung paisak unla, amauhte kham kei un, vangam pen hichibang mite a ahi. 15 Adiktak in kung hilh ahi, mi kuapeuh naupang neute bang a Pasian gam sanglou pen asung ah alut kei ding hi,” achi hi. 16 Tuachi’n amauhte a ang ah atawi a, atung uah akhut nga in gual azawlta hi.

Jesu’n tangval hausa thu ahilh

(Mat. 19. 16-30; Luk. 18.18-30)

17 Tualeh lampai pai ding a apawtkhiat laiin, mi khat a kiang ah hungtai in, a maiah khupdin in, akiang ah, “Siapa hoih aw, tangtawn hinna ka tantheihna ding in bang ahia ka bawl ding?” chi’n adong a.

18 Tuachi’n Jesun akiang ah, “Bangding a hoih hungchi nahia? Mi khat guak loungal kuamah a hoih a omkei, hua pen Pasian ahi,” achi hi. 19 Thupiakte nathei vele; angkawm ken, tualthat ken guken, theipihtu taklou in pangken, mi khemken, na nu leh na pa zahtak in, chihte achi hi.

20 Tuachin’n aman a kiangah, “Siapa aw, hihte tengteng ka naupan laia pan kajuih ahita,” achi hi.

21 Tuachi’n Jesu’n amah a en a, a itta a, a kiangah, “sil khat na tasamlai hi, achi a; pai inla, naneih jousiah juak inla migentheite kiangah pia in, tuachi’n van ah gou nanei ding, tuakhit chiang in hungpai inla kross pua in hungjui in,” achi hi. 22 Hinanleh hih thute ajakin adah mahmah a, lungkham takin a paimangta siltampi nei ahihjiak in.

23 Tuachi’n Jesu’n a enkual a a nungjuite kiangah, “Mi hausate a dingin Pasian gam a lutding bangzahta a haksa a tazen a!” achi hi.

24 Tuachi’n nungjuite’n a thugen lamdang asa mahmah ua. Hinanleh Jesu’n adawng kik a akiang uah, “Tate aw, dangka muangte a dingin Pasian gam a lut bangzahta a haksa ahia! 25 Mihausa Pasian gam a lut sangin, sangawngsau phin bilvang a lutpaisuak abaihjaw” achi hi.

26 Tuachi’n amau’n a thugen lamdang asa mahmah ua, “A tuachihleh kua hundam in a omjou dia?” chi’n akihou ua.

27 Hinanleh Jesu’n amauh a en a akiang uah, “Huapen mihing a dingin sil hitheilou ahi a, hinanleh Pasian a dingin ahi kei; Pasian a dingin sil jousiah ahithei hi,” achi hi.

28 Tuachi’n Peter in a kiangah, “En in, kou sil bangkim paisan in kungjui ua,” chi’n ahung gen pan a.

29 Tuachiah Jesu’n “a dawng a,adiktak in kung hilh ahi, kuapeuh keimah jiak leh tangthupha jiak a inn hiam, sanggampa hiam, sanggamnu hiam, apa hiam, anu hiam, azi hiam, atate hiam, gamte hiam nusia tuh, 30 tu damsung mahmah in, tu hun mahmah in innte, sanggampate,sanggamnute, nute, tate, gamte, bawl gentheihnate tawh alehja a mukiklou ding a om kei, tualeh hun hungtung ding a tangtawn hinna tawh. 31 Hinanleh mi tampi a masapente a nunungpen ahung hi ding ua, a nunungpente a masapen ding uh,” achi hi.

Jesu’n asih ding a genkholh a thumveina

(Mat. 20.17-19; Luk 18.31-34)

32 Jerusalem khua a hawhtou ding a, lampia apailai un, Jesu amai uah apai a; amau’n lamdang asa mahmah ua. Tualeh ajuih pum un alau uh a. Tuachi’n aman sawm lehnihte atuam in apaipih kik a atung a sil hungtung dingte ahilh panta hi.33 “Ngaiun, Jerusalem khua ah hawhtou ding ihi ua, Mihing Tapa siampite leh Laigelhmite kiang a matsak in aom ding. Tualeh amah siding in siamlouh atangsak ding ua, tuateh Jentelte kiangah apia ding uhi, 34 chiamnuih bawlnan ajang ding ua, ajep ding ua, chil asiatkhum ding ua tualeh athat ding uh; tuachi’n nithum nin a thoukik ding,” achi hi.

Jakob leh Johan sil ngetna

(Mat.20.20-28)

35 Tualeh Zebedi tapate Jakob leh Johan, a hungpai ua a kiangah, “Siapa aw, na kiang a kung nget taphot uh nung bawlsak ka deih uhi,” achi ua.

36 Tuachiah aman a kiang uah, “Nou a dingin bang hung bawlsak leng na ut ua?” achi a.

37 Amau’n a kiangah, “Na thupina ah na jiatlam ah khat na veilam ah khat hung tousak in,” achi ua.

38 Hinanleh Jesu’n akiang uah, “Na nget uh na theikei ua ahi. Ka nou dawn ding na dawnthei ding uai? Ka baptisma tan ding na tangthei ding uai?” achi a.

39 Amau’n a kiangah, “thei e,” achi ua. Tuachi’n Jesu’n akiang uah, “Ka nou dawn ding na dawnthei ngut ding uh, ka baptisma tan ding zong na tangthei ding uh. 40 Hinanleh ka jiat lam leh ka veilam a tou ding pen kei hungpiak ding ahikei a, Pasian in a bawlsakte uh a ding ahijaw ding hi,” achi hi.

41 Tualeh sawmte’n hihthu ajaktak un Jakob leh Johan tung ah a lungkim takei ua. 42 Hinanleh Jesu’n amauhte a kiangah asam a akiang uah “Jentelte tung a vaihawm ding a aguatte uh atung uah a lal mahmah uh, tualeh a milian te un atung uah a thunei mahmah uh, chih nathei uhi. 43 Hinanleh nou lak ah jaw hichibang ahikei ding. Hinanleh kuapeuh nalak ua milian hih utte na sila un a pangjaw ding hi. 44 Tualeh kuapeuh nalak ua masapen hih ut tuh mi tengteng silain  apang ding hi. 45 Mihing Tapa hial zong na sepsak a om dingin a hungpai kei a, hinanleh nna sem ding leh mi tampi tatna ding a ahinna pia ding in hungpai ahijaw hi,” achi hi.

Bartimai mittaw damsakna

(Mat. 20.29-34; Luk. 18.35-43)

46 Tualeh Jeriko khua a hungtung ua; Jesu Jeriko a kipan in a nungjuite leh mipi tampitak tawh apawt laiun, Timai tapa mittaw Bartimai khutdoh in lamgei ah atou a. 47 Tualeh aman Nazareth Jesu ahi chih ajaktak in, “Jesu! David Tapa! ka tungah zahngai in!” chi’n a kikou panta a.

48 Tuaci’n mi tampite’n dai ding in ataihilh ua. Hinanleh aman, “David Tapa, ka tungah zahngai in!” chi’n aki hahkou semsem a.

49 Tuachi’n Jesu adinkhawla, “amah sam ding in thu apia a.”

“Tuachi’n amau’n mittawpa asam ua, a kiangah, thou in, aman a hungsam hi, achi ua.

50 Aman zong apuan silhpaiin a ding khia a, Jesu kiangah a hungpai hi.

51 Tuachi’n Jesu’n amah ana houpih a, “Nang a ding in bang hung bawlsak leng na ut ei?” achi a. Mittawpa’n a kiangah, “Rabboni, mutheih ka ut,” achi hi.

52 Tuachi’n Jesun a kiangah, “Paita in, na ginna dampih hiteh,” achi a.

Tuachi’n a mutheipai a, lampi ah Jesu ajuita hi.

Marka 11

Jesu gualjou a Jerusalem a lutna

(Mat. 21:1-11; Luk. 19:28-40;Jhn. 12:12-19)

1 Tualeh Jerusalem khua tung ding a akisak uh, Olive mual a Bethphage leh Bethani khuagei atun un, aman a nungjuite minih a masawl a. 2 Akiang uah, “Na mai ua khua ah pai unla; khuasung na lutphet chiang un sabiltung nou khau a kikhih kuamah tuanngailouhna na muding uhi. Sut unla hungkai un. 3 Tualeh kuapeuhin, bangding a hih nabawl? a chih uleh, Toupa’n a deih hi, hiah a hung koikikpai na ding,” chi un, achi hi.

4 Tuachi’n a paita ua, kongjing a kongkhak pualam ah sabiltung nou kikhih avamu ua, tuachi’n asut uhi. 5 Hinanleh huasan a ding kuate hiam in, akiang uah, “Bangding a sabiltungnou sut nahi ua?” achi ua.

6 Tuachi’n amau’n Jesu thupiak bangin a kiang uah agen ua. Tuachi’n a paisakta uhi. 7 Tuachi’n sabiltungnou Jesu kiangah a hungkai ua, atung ah apuante uh aphah ua; amah atung ah a tuangta hi. 8 Tualeh mi tampi in lampi ah apuante uh aphah ua, tualeh adangte’n gam a sawlpang sat in lampi aphah ua. 9 Tuachi’n amai lam a paite leh anung lam a hung juite’n: “Hosanna! Toupa min a hungpai ahampha hi! 10 Toupa min a hungtung ding Ipa David lalgam ahampha hi! Tungnung pen ah Hosanna!” achi ua.

11 Tualeh Jesu Jerusalem khua ah apai a, tempul sung ah alut a. Tuachi’n siljousiah a et kawikawi khit in nitaklam a hunghita a, sawmlehnihte tawh Bethani khua ah a paita uhi.

Theipi kung hut

(Mat. 21:18,19)

12 A jingni’n, Bethani khua pan a hung pawt nung un, agil ahung kialta a. 13 Theipi kung tehnei gamlapi ah amu a, banghiam agah ka muh khakleh chi’n avapai a. Avatun takin, atehguak chihlou bangmah avamuta kei a; theipi gah hun ahihlouh jiak in. 14 Jesu’n ahoupih a sing kiangah,  “Bangchiklai peuh in kuaman nang a kipat gah nenewn takei hen!” achi a.

A nungjuite’n hih  aja uhi.

Jesu’n tempul a suksiangna

(Mat. 21:12-17; Luk. 19:45-48; Jhn. 2:3-22)

15 Tuachi’n Jerusalem khua atung ua; Jesu tempul sung ah avalut a tempul sung a vanjuak leh leite a notkhia panta a, tualeh dangka khekte dohkan leh palva juakte tounate a khuhleh sak hi. 16 Tualeh kuamah in tempul sung a van alut paisuakpih uh a phal kei hi. 17 “Tuachi’n aman akiang uah, “Ka inn nam jousiah a ding in thumna inn achi ding uh chia kigelh hilou maw.’ Hinanleh nou gutate khukpi in nabawl uhi!” chi’n ahilh hi.

18 Laigelhmite leh siampite’n hih ajaktak un amah a thahtheihna ding uh azongta ua; mipi teng in a thuhilh lamdang asak jiak un, amah a lauta uhi.

19 Nitaklam ahunghih in, khuapi a pat a pawtkhiata hi.

Theipi kung pat zilding

(Mat. 21.20-22)

20 Jingsang a apailai un theipi kung a tung a pat ajungtan a gaw amu ua. 21 Tualeh Peter in, theikhia in a kiangah, “Rabbi, En in, theipi kung na samsiat pen avulta!” achi hi.

22 Tuachi’n Jesu’n a dawng a akiang ah, “Pasian gingta un. 23 Adiktak in na kiang uah kung hilh ahi, Kuapeuhin hih mual kiangah, na kisuan inla tuipi ah na kipai in, chia a lungtang a ginlahna neilou a, tualeh agen bang in ahung tangtung ngeingei ding hi chih gingta jousiahin, agen bangbang in amu ding uhi. 24 Tuajiakin kung hilh ahi: Sil bangkim nathum ua na nget chiang un, amusa in kingai un, tuachi’n namu ding uhi, achi hi. 25 Tualeh thum a na din chiang un, kua tung hiam a thubuai banghiam naneih uleh, amah ngaidam un, na Pa uh van a om in nou tatkhialhnate zong ahung ngaihdam theihna ding in.” 26 Hinanleh na ngaidam kei uleh, na Pa uh van a om in zong nou tatkhialhnate ahung ngaidam kei ding hi.

Jesu thuneihna aginglah uh

(Mat. 21.23-27; Luk. 20.1-8)

27 Tuachi’n amauhte Jerusalem khua ah atungkik uhi. Tempul sung a avak kawikawi laiin siampite, Laigelhmite leh vantang upate akiang ah a hungpai ua 28 amau’n akiang ah, “Bang thuneihna in ahia hih sillamdangte nabawl? nakiang ah hibang sil lamdang bawltheihna thuneihna kua’n hungpia ahia?” chi’n adong uhi.

29 Hinanleh Jesu’n adawng a akiang uah, “Ken zong noute thu khat kung dong ding, hung dawng un, tuachiah ken zong bang thuneihna tawh hih silte bawl ka hia chih noute kung hilh ding. 30 Johan baptisma, van a hung kipan maw: ahihkeh mihing a hung kipan? Hung dawng un?” achi a.

31 “Tualeh amauh leh amauh a kingaituah ua, ‘van a kipan,’ chilei la, ‘Bangding a athu gingtalou nahi ua?’ hung chi ding a. 32 ‘Mihing a pat chileila, mipite a laujel ua,’ ”(Mi zousiah in Johan Jawlnei taktak in asim ua.) 33

Tuachi’n amauhte’n adawng ua Jesu kiangah, “Ka theikei uh,” achi ua.

Tualeh Jesu’n a dawng a akiang uah, “Ken zong kua thuneihna tawh ahia hih silte ka bawl chin kung hilh kei ding,” achi hi.

Marka 12

Grep huan bawl giloute genteh na

(Mat. 21.33-46;Luk 20.9-19)

1 Tuachi’n aman gentehna in akiang uah thu agen panta a, “Mi khat in grep huan abawl a, daiin a umkual a, grep suknang khuk atou a, innsang alam hi. Tualeh grep huanbawlmite kiangah asan in apia a, gamdang ah khual azinta hi 2 Huan a agah atan ding grep huan bawlmite kiangpan a vala ding in grep huanbawlmite kiangah silate khat asawl hi. 3 Tualeh amauhte’n ana man ua, avua ua, tuachi’n khut guak in asawl mangta uhi. 4 A sila dang khat akiang uah a sawlkik a, amauhte’n suang in ana deng ua, alutang aliam sak ua, zahlaktak in anabawl ua ana sawlmangta uhi. 5 Tuachi’n aman adang khat a sawlkik a, amah anathat ua; adang tampi zong, khenkhat avua ua, khenkhat athat uhi. 6 Tuajiakin tapa khat aneilai a, a it mahmah, ‘Ka tapa ana zahtak ding uh chi’n atawp in a tapa akiang uah a sawlta hi.’ 7 Hinanleh grep huanbawlmite’n, ‘Hihpa a gouluah dingpa ahi, hungpai un, amah ithat  ding uh, tuachi’n a gouteng ei a ahimai ding!’ a kichi ua. 8 Tuachi’n aman ua, amah athat ua, grep huan pualam ah apaikhia uhi.”

9 “Tuajiakin grep huan neipa’n bang abawl tadia le?” chi’n adong a, “Amah hungpai in ahih mangthang ding a, grep huan midangte kiangah apia ding hi. 10 Hih Laisiangthou simkha ngailou nahi uh maw?

            ‘Inn lam mite sung deihlouh huamah aning a suang poimoh pen ahung suak hi.

11 Hihpen Toupa bawl ahil; Tualeh hihpen imit muh in a lamdang hi!’ ” chih, achi hi.

            12 Tualeh hih gentehna thu amauh demna a agen ahi chih athei jiak un atung ah khut akhak sawm ua, hinanleh mipite alau uhi; tuachi’n amah anusia ua, apaisanta uh.

Siah piak ding thu a dokna

(Mat.22.15-22; Luk 20.20-26)

13 Tuachi’n amau’n a kam a thute a amah amattheih nang un, Pharisaite leh Herod pawl a mi khenkhat a kiangah a hungsawl ua. 14 Akiang a hungtun un amau’n a kiangah, “Siapa, midik na hi a, mikuamah na laukei hi. Ajiak mi maizah tuam na neikei a, diktakin Pasian lampi thute na hilhjel chin ka thei uhi. Kaisar kiang a siah piak asiang hiam? siang lou? Ka pia ding uam, ka piakdah ding uam?” achi ua.

15 Hinanleh aman a lepchiah dan uh athei a, akiang uah, “Bangding a hung ze-et nahi ua? Makhai khat hungtawi un ka en ding,” achi a.

16 Tuachi’n amau’n ahung tawi ua, tuachi’n aman akiang uah, “Hih kua lim leh kua laigelh ahia?” achi a.

Amau’n akiang ah, “Kaisar a,” achi ua.

17 Tuachi’n aman adawng a akiang uah, “Kaisar silte Kaisar kiangah pia unla, Pasian silte Pasian kiangah pia un,” achi hi.

Tuatakin amau’n lamdang asa mahmah uhi.

Thohkikna thua dokna

(Mat. 22.23-33; Luk. 20.27-40)

18 Tuachi’n Sadukaite misi thohkikna aom kei chite akiang ah a hungpai ua, 19 “Siapa, Mosi in, ‘Mi khat a sanggampa sita henla, azi taneilou in nusia taleh azi aluah ding a a sanggampa dingin chi akhahsak ding chi’n ahung gelhsak hi.’ 20 Tuin sanggam pasal sagih a om ua, a masapa in zi anei a, asi a, chikhah beiin a nusiata hi. 21 Tualeh anihna in amahnu ala a, chikhak neilou in asi a, tualeh athumna zong hua chimah bang in a om a, 22 tuaci’n a sagihna pa’n aluah a, asi a, chikhak neilou in a nusia hi. A tawp khakna in mumeinu zong asita hi. 23 Tuajiakin, thohkikni chiangin, amauh a thohkik chiang un, numeinu kuapen zi ata diai le? Asagih un zi in aneichiat ua” chi’n adong ua.

24 Jesu’n amauh adawmg a akiang uah; “Laisiangthou leh Pasian silbawltheina natheih jawsam uh a omlouh jiak tak a bawlkhial hilou nahi umaw? 25 Misi lak a kipan a thohkikni chiang un zi leh pasal a kitengkik ding a hinawn kei ua, van a vanmite bang ahijawta ding uhi. 26 Hinanleh misite kaihthoh a aom ding uh thu tawh kisai Mosi laibu ah, loubawk kuang a pan Pasian in, ‘Kei Abraham Pasian, Isak Pasian leh Jakob Pasian ka hi chia a houpih dan simkhalou nahi uh maw?’ 27 Amah asite Pasian a hikei a, ahingte Pasian ahijaw hi. Tuajiakin nou na theikhial mah mah uhi!”

Thupiak lianpen thu a dokna

(Mat. 22.34-40;Luk 10.25-28)

28 Tuachi’n Laigelhmite lak a khat a hungpai a, akisellai uh aja a, Jesu’n amauh hoihtak in adawng chih athei a, akiang ah, “Thupiak jousiah lak ah thupiak masapen bang ahi diai?” chi’n adong a.

29 Jesu’n adawng a, “Thupiak jousiah lak a masa ahihleh: ‘Ngai un, aw Israel! Toupa I Pasian, Toupa khat ahi a.30 Tuajiakin Toupa na Pasian uh na lungtang tengteng in, na kha tengteng in, na lungsim tengteng in, tualeh na hatna tengteng in na it ding ahi.’ Hih thupiak masapen ahi. 31 Tualeh anihna ahihleh, hihbang ahi: ‘Nangmah na ki it bang in na innvengte na it ding ahi.’ Hihte sang a thupiak lianjaw dang a omkei, achi hi.”

32 Tuachi’n Laigelhmipa’n a kiangah, “Na gendik, Siapa! Thudik nagen ngut Pasian khat guak a om, amah chihlouh Pasian dang a om kei. 33 Tualeh amah lungtang tengteng, theihna tengteng, kha tengteng tualeh hatna tengteng a it a, tualeh eimah i ki it bang a ivengte it sillat leh kithoih jousiah sang in thupijaw a ahoihjaw hi,” achi hi. Hua nungsang kuaman thu mawng mawng a dongngam nawn kei uhi.

34 Tualeh aman piltak a adawm Jesu’n a muh takin, a kiangah, “Pasian gam a pan na gamla kei hi,” achi hi.

Krist David Tapa

(Mat. 22.41-46; Luk 20.41-44)

35 Tuachi’n Jesu’n tempul a thu ahilhlai in, amauhte a houpih a, “Bang chidan a Laigelhmite’n Jesu David Tapa ahi, chi u ahia? 36 David amah mah-in khasiangthou in: ‘Toupa’n ka Toupa kiang ah: Na galte uh nakeng totphah a kabawl masian, ka jiat lam ah touin,’ achi, chih ahi ngal a.

37 Tuajiakin David amah mah in zong “Toupa’; achihleh; bangchi’n amah a Tapa ahithei diai?” achi a. Tualeh mipi vantang in kipaktak in athu a ngaikhia uhi.

Jesu’n Laigelhmite a taihilh

(Mat. 23.1-36; Luk 20.45-47)

38 Tuachi’n aman akiang ua a thuhilhna ah, “Laigelhmite lak ah pilvang un, amauh puantual silh a vak a ut ua, van juakna muk lak a chibaibuk a ut uhi, 39 kikhopna inn sung ah touna hoih adeih ua, tualeh nekkhawm nate ah munhoih adeih uhi. 40 Meithaite innsung a negam ua, mi khemna ding in sawtpipi thumna anei uhi. Hihte’n siamlouh tansakna thupitak amu ding uhi!” achi hi.

Meithainu daan dangka

(Luk. 21.1-4)

41 Tuachi’n Jesu dangka kholna bawm maiah atou a, tualeh mipite’n dangka khawlna ah dangka a khiat uh amu a. Tuachi’n mi hausa tampite’n tampi pi-in a khia ua; 42 tuachi’n mijawng meithai khat hungpai in daan dangka makhai nih a hungkhia a, guadran khat tawh kikim ahi. 43 Tuachi’n aman a nungjuite asam a akiang uah, “Adiktak in na kiang uah kung hilh ahi, mijawng meithainu’n midang tengteng sang in akhia tampen hi. 44 Amau’n aneihsa val uh akhia ua, hinanleh amahnu’n aneih jousiah a hinna ding teng akhia hi,” achi hi.

Marka 13

Jesu’n tempul siat ding a genkholh

(Mat. 24.1,2; Luk . 21. 5,6)

1 Tualeh tempul apat apawtkhiat khit takin, a nungjuite khat in a kiangah, “Siapa, en-in! Hih a suangte omdan leh a innte omdan bang chibang ahia!” achi hi.

2 Tualeh Jesu’n adawng a akiang ah, “Hih inn thupitakte na mu maw? Sukchip louh a suang khat tung a khat kichiang mawng mawng hihsan ah namu kei ding hi,” achi hi.

Hun tawpni ding etsakna

(Mat. 24.3-14; luk. 21.7-19)

3 Olive mualtung a tempul tawh ki galsaina mun a atoulai in, Peter, Jakob, Johan leh Andrute’n atuam in ahoupih ua, hihte bang hunchiang a hung hi ding ahiam? 4 “Tualeh hihte hung tangtunna ding chiamtehna bang ahi ding a, koute hunghilh in,”achi uhi.

5 Tuachiah Jesu’n , a dawng a akiang uah, “kuaman ahung khemlouhna ding in pilvang un. 6 Mi tampi, ‘Keimah Jesu ka hi!’ chi’n ka min in a hungpai ding ua, mi tampi a khemjou ding uhi. 7 Hinanleh kidou leh kidou thuthang na jakchiang un, lungbuai kei un; hihbang silte ahung om ding mawng ahi, hinanleh atawpna ahinai kei ding. 8 Namtuam leh namtuam ahung kidou ding ua, tualeh gam tuam leh gam tuam a kidou ding uhi. Tualeh mun tuamtuam ah zin aling ding a, kial leh buaina hung om inchin. Hihte nauvei kipatna ahi uhi.

9 “Hinanleh noumah kipilvang un, vaihawmmite kiang ah ahung piakhia ding ua, kikhopna insung bang ah ahung jep ding ua, keimah jiakin gam ukte leh kumpipate maiah amauh theihpihtu ding in hung paipih ding uhi. 10 Tangthupha nam zousiah kiangah gen masak ahi ding hi. 11 Hinanleh ahung mat ua ahung piakdok hun chiang un lunkham masa kei unla, bang ka gen tadia chi’n ngaihtuah masa kei un. Hinanleh huahun a nang hung kipia thute bek gen in; ajiak agentu nang na hikei a, Khasiangthou in agenjaw ding hi. 12 A sanggampa’n a sanggampa thah ding in a mansak ding a, Pa in a tate a mansak ding a; tualeh tate’n nu leh pate adou ding ua a thatsak ding uhi. 13 Ka min jiakin mi jousiah huat na hung hi ding ua. Hinanleh kuapeuh atawptan a thuakjoute hundam in aom ding uhi.”

Chijat-huai leh lauh huaite

(Mat. 24.15-28; Luk. 21.20-24)

14 Jawlnei Daniel in anagen, “hihmangtu kihdak om a dinlouhna ding a ding namuh chiang un” (asim jousiahin a omjia thei heh!) “huahun chiangin Judea gam a omte mualte ah tai uhen. 15 Inntung a omte innsung a van omte lading in lutdah hen. 16 Tualeh lou a omte apuante lading in kikdah hen. 17 Hinanleh hihni chiangin agaite leh naungek neite tung agik hi! 18 Tuajiakin hih hunte phalbilai ahihlouhna ding in thum un! 19 Ajiak hih nite chiangin gimthuakna thupitak ahung om ding a, hihbang Pasian in sil asiam tung a pat tunitan in ana omngai naikei a; tunung chiangin zong a omngai nawn kei ding hi. 20 Tualeh Pasian in hihnite tomsak kei henla hileh, mihing kuamah mawng mawng a suakta aom kei ding a; hinanleh a mitelte jiakin hihnite a tomsakta hi.

21 “Tuachi’n mi kuahiam in na kiang a, ‘En in, Krist hiah a om! Ahihkeh, ‘En in, amah huah a om!’ achihleh taksan kei in. 22 Ajiak Krist taklou leh jawlnei taklou ahung pawt ding a, tualeh ahung khemna dingin chiamtehna lamdang taktakte ahung ensakding a, hitheileh houh atelte na-ngawn a khemkhia ding hi. 23 Hinanleh, ki pilvang un! En un, siljousiah kung hilhkhinta hi

Mihing Tapa hungpai na ding

(Mat. 24.29-31; Luk. 21.25-28)

24 “Hinanleh hua nite tua gimthuakna tunzoh chiangin, ni amialta ding a, tualeh kha zong avak nawn kei ding, 25 van a aksite ahung kia ding a, van a aom van sil bawltheihnate akiling ding hi. 26 Tuatak chiangin Mihing Tapa sil bawltheihna leh thupina lianpi tawh meipi lak a hungpai amu ding uhi. 27 Tuachi’n aman vantungmite asawlkhia ding a, atelte lei ningli a kipan, leitawp a kipan in vantawp dong in a khawmkhawm ding uhi.

Theipi kung pan a hilhna

(Mat. 24.32-35; Luk.21.29-33)

28 “Tualeh theipi kung a pat gentehna zil un. Aba ahung meng a atehte ahung sel chiangin doupi anaita chih nathei uhi. 29 Huachimah bang in hih silte ahungtun namuh chiang un, amah ahung naita kongkhak bul ahung geita, chih thei un. 30 Adiktak in kung hilh ahi, hih sil jousiah a tunkim masiah tulai khangthakte amang kei ding uhi. 31 Van leh lei a mang ding a, hinanleh ka thu amang kei ding hi.

Ani leh hun kuaman theilou

(Mat.24.36-44)

32 “Hinanleh huani leh hun Pa loungal, kuamah in, van a om vantungmite’n zong, Tapa in zong, athei kei hi. 33 Ahun ding na theihlouh jiak un pilvang unla, kiging zing a om in thum un. 34 Ajiak pen mihing Tapa ahihleh mi khat a inn nusia a, asila kiang a thuneihna pia a, tualeh a nasep ding uh piachiat a, khual gamlapi a vazin tawh kibang ahi. 35 Tuajiakin kigingjing un; inn neipa hungpai ding hun nitak lam hiam, jankimlai hiam, akkhuan in hiam, ahihkeileh jingsang in hiam chih nathei kei uhi. 36 A tuachih keileh thakhat a hungpai in, ihmu in ahung kukha ding hi. 37 Tualeh na kiang ua ka gen mijousiah kiang a ka gen ahi!”

Marka 14

Jesu thah sawmna

(Mat.26.1-5; Luk. 22.1,2; Jhn.11.45-53)

1 Tuachi’n ninih nung in paikan kut leh tanghou tol sohlouh kut aom a; tualeh siampite leh Laigelhmite’n amah  khembawl a, mat a, thahtheina ding dan a songsong uhi. 2 “Hinanleh kut ni in hihdah hen, atuachih keileh mipi lak ah buaina aom kha ding,” achi uhi.

Bethani khua a Jesu thaunuhna

(Mat. 26.6-13; Jhn. 12.1-8)

3 Tualeh Bethani khua a phak Simon inn a aomlai a, ankuang im a atoulai in, numei khat alabaster bawm a spaiknard thau namtui mantamtak tawiin a hungpai a; tuachi’n amahnu in abawm atatkek a, alutung ah asungta hi. 4 Hinanleh alak uah lungkim lou khenkhat aom ua, “Bangding a hih thau namtui amawk a hihbei ahia? 5 Hih makhai zathum sang a tamjaw a zuak a mijawngte kiang a piaktheih ding hi a!” achi ua; tuachi’n amahnu tung ah aphunta uhi.

6 Tuachi’n Jesu’n, “Amahnu aom om in omsak un! Bangding a vahihbuai nahi ua? Aman keia dingin silhoih asem hi. 7 Ajiak pen mijawngte na kiang uah a omjing ua, na ut hun teng un na panpihthei uh, hinanleh keipen na kiang uah ka omjing kei hi. 8 Amahnu’n a bawlthei tawp abawlta ahi, ka sapum vuiding a thau hung nuhkhawlh ahi. 9 Adiktak in kung hilh ahi, leitung pumpi a hih tangthupha akihenna phot ah hihnu silbawl zong amahnu theihzingna dingin akigen ding hi,” achi hi.

Juda muan huailouhna

(Mat. 26.14-16; Luk. 22.3-6)

10 Tuachi’n sawmlehnite lak a khat, Juda Oskariot pen amah mansak dingin siampite kiangah avapai a. 11 Hihthu azak tak un amauh a kipak mahmah ua, tuachi’n amah dangka piak ding a chiamta uhi. Tuachi’n aman amatsakna ding lemtang a zongta hi.

Nitak an nunungpen

(Mat. 26.17-25; Luk. 22.7-14, 21-23; Jhn. 13.21-30)

12 Tualeh tanghou tol sahlouh kut ni masapen, paikan kut Belamnou agoh ni un, a nungjuite’n a kiangah, “Paikan kut ankuang na nektheih na dingin khoiah vabawl le ung na tu a?” achi ua.

13 Tuachi’n aman a nungjuite nih asawlkhia a, akiang uah, “Khuapi sung ah valut unla, tuachi’n pasal tuibel pua khat tawh na kituak ding uah, amah jui un. 14 A lutna penpen, hua inn neipa kiangah, ‘Siapa’n ka nungjuite tawh paikan ankuang ka nekna ding uh mikhual inndan khoitak ahia?’ achi, chi un. 15 Tuachi’n aman inndan tungnung liantak, van omsa leh guatsa diam ahung ensak ding; huamun ah ei a ding bawl un,” achi hi.

16 Tuachi’n a nungjuite apai ua, khuapi sung ah alut ua, tualeh akiang ua agen bangbang in amuta ua, tuachi’n paikan ankuang abawlta uhi.

17 Nitak lam ahinghih takin amah sawmlehnite tawh a hungpai ua. 18 Tualeh toua anek laiun Jesu’n, “Adiktak in kung hilh ani, an ka nekkhawmpih nalak ua mikhat in ahung mansak ding hi,” achi hi.

19 Tuachi’n a lungkham panta ua, a kiangah, khat khat in, “Kei kahi maw?” achi ua, abanban in adongta uhi.

20 Tuachi’n aman adawng a, a kiang uah, “sawmlehnihte lak a khat, kuang a ka an sawkkhawmpih ahi. 21 Mihing Tapa ahihleh a tanchin kigelh bangbang a pai ding ahi a; hinanleh Mihing Tapa mansak dingpa tung agik hi! Huapa pianglou hivetleh amah a dingin ahoihjaw ding hi!” achi hi.

Toupa nitak an

(Mat. 26.26-30;Luk. 22.14-20; 1Kor 11.23-25)

22 Tuachi’n anek laiun Jesu’n tanghou ala a, a gualjawl a, tuachi’n a balkek a, akiang uah apia a, “la unla ne un,” “Hih ka taksa ahi,” achi a.

23 Tuachi’n nou ala a, kipahthu agenzoh in, a kiang uah apia a; aun un adawn chiat uhi. 24 Tuachi’n aman akiang uah, “Hih ka sisan a thukhunthak mi tampi a ding a luang pen ahi. 25 Adiktak in kung hilh ahi, Pasian gam a athak ka dawnni atun masiah greptui ka dawnnawn kei ding,” achi hi.

26 Tuachi’n  amau’n  la-khat asakzoh un, apawt khia ua, Olive mual ah apaita uhi.

 Peter kitheihmoh bawl ding Jesu’n a genkholhna

(Mat.26.31-35; Luk. 22.31-34; Jhn. 13.36-38)

27 Tuachi’n Jesu’n akiang uah, “Tuja’n chiangin na un un lungkia in nung taisansiang ding uhi, ajak, ‘Belampu ka jep ding a, Belam honteng aki thehjak ding uh,’ chih gelh ahi. 28 Hinanleh ka thohkik nung chiangin Galili ah namai uah ka pai ding,” achi hi.

29 Peter in akiang ah, “A un un lungkia in hung taisan nanle uh, ken kung taisanngai kei ding!” achi hi.

30 Jesu’n akiang ah, “Adiktak in kung hilh ahi, tuni’n , tujan chiangin ak nihvei akhuan ma-in thumvei nung kitheimoh bawl ding,” achi hi.

31 Hinanleh aman khauhtak in, “Nang tawh sikhawm ding hinanleh zong, kung kitheimah bawl kei ding!” achi hi.

Tuachimah bang in aun un achi chiat uhi.

Jesu’n Gethsemani huan ah athum

(Mat.26.36-46; Luk. 22.39-46)

32 Tuachi’n amau Gethsemani kichi mun khat a hungtungta ua; tualeh aman a nungjuite kiangah, “Ka thum sungteng hihsan ah anatou un,” achi a. 33 Tualeh Peter, Jakob leh Johan apui a, lung kham sengseng in ahung mangbangta a. 34 Tuachi’n akiang uah, “Ka kha sihna khop hial in a lungkham hi; hihsan ah ana om unla, kiging gige un,” achi hi.

35 Aman themkhat avapai gamla deuh a, tual ah apuksuk a, ahihtheihleh jua hun in amah apelhtheihna dingin athum hi. 36 Tualeh aman, “Abba-Pa,” sil zousiah Nang a dingin ahithei hi; hih nou kei a pat in lamang in; hinanleh, kei thu hilouin, Nang thu hijaw hen, achi hi.

37 Tuachi’n a hungpai a, amauh ihmusa in amu a, tuakakin Peter kiangah, “Simon, ihmu nahi uh maw? Dakkal khat zong kiging a omzoulou nahi uh maw?” 38 “Khem a na omlouhna ding un kiging jing unla thum un. Kha injaw angap a, hinanleh taksa in azoukei,” achi hi.

39 Tuazoh in paikhia in ava thumkik a, agenngai mah ava genkik a. 40 Tuachi’n ahung paikik a, amauh ihmu in ahung mu jel a, a ihmut uh asuak sengseng jiakin; amau’n adawn dingdan uh athei kei uhi.

41 Tuachi’n a thumveina in ahung pai a, akiang uah, “Ihmu leh tawldam a om lailai nahi uh maw? Ahunta hi! Ahun zong a tungta! Ngaiun, Mihing Tapa mikhialte khut a piakkhiat ahita. 42 Thou un, ipai ding uh. En un, kei hung mansak dingpa anaita hi!” achi hi.

Jesu mat a omna

(Mat.26.47-56; Luk.22.47-53; Jhn. 18.3-12)

43 Tuachia thu agen laiin, sawmlehnihte lak a khat, Juda pen siampite leh Laigelhmite leh upate a kipan in namsau leh khetbuk tawiin mipi tampitak tawh a hungtung pai a. 44 Tualeh amah mansakpa in: “Ka tawp penpen, amah ahi, man unla, hoihtakin paimangpih un,” chi’n chiamtehna ape masa khinta hi.

45 Tualeh a hungtun takin avanaihpai a, “Rabbi Rabbi!” chi’n avatawpta a. 46 Tuachi’n amau’n atung ah khut akha ua, amanta uhi. 47 Tuachiah akiang ua dingte lak a khat in namsau adok a, siampi suakpa asat a, abil a satkhia hi. 48 Tuachi’n Jesu’n amauh adawng a akiang uah, “Guta manding bang hial in namsaute leh khetbukte keng in kei man dingin nung kuan uh maw? 49 Niteng in noute tawh tempul ah thuhilh in ka om jing a, nungman kei ua, hinanleh Pasian Laisiangthou thu a tangtun ngei ding ahi,” achi hi.

50 Tuachi’n aun un anusia ua, ataita uhi.

51 Tualeh tangval kuahiam khat in puannem khat silh in amah a jui a, tuachi’n tangvalte’n ana man ua; 52 tuateh a puannem nusia in a saguak in ataita hi.

Jesu vaihawmte mai ah

(Mat. 26.57-68; Luk. 22.54,55,63-71; Jhn. 18.13, 14, 19-24)

53 Tuachi’n Jesu siampi mai ah apaipih ua; tuachi’n amah tawh siampite, upate leh Laigelhmite jousiah ahung kikhawm ua. 54 Tualeh Peter in gamlapi ah, siampi innsung tan dongin ajui a; tuachi’’n silate tawh a toukhawm a, mei a awi hi. 55 Tuachi’n siampite leh vaihawmna inn a om jousiahin Jesu a thahtheina ding un ahekna ding ajong ua; hinanleh amukei uhi. 56 Mi tamtak in juau thuin ahek ua, hinanleh ahekna te uh a kituak kei hi.

57 Tuachi’n mi kuate hiam a dingkhia ua juauthu in ahek ua; 58 “Hih khut a bawl tempul ‘Ka hihsia ding a, nithum sung in khut a bawllouh adang khat ka lam ding, aman achih kaja uh, achi ua.” 59 Hinanleh huachi’n zong a kituakthei tuak kei uhi. 60 Tuachi’n siampi alaiah ading dok a, Jesu kiangah, “Bangmah a dawnglou maw? Hihte hung hekna bang chidan ahia?” chi’n adong hi. 61 Hinanleh amah a daidide a, bangmah in a dawng kei hi. Tuachiah siampi in a kiangah, “Nang Hampha Tapa krist na hi hiam?” chi’n a dong kik a.

           

62 Tuachi’n aman , “Ka hi,” tualeh “Mihing Tapa sil bawltheihna jiatlam a tou a, van meipi lak a hungpai na mu ding uhi!” achi hi.

63 Tuatakin siampi-in a puante a bawtkek a, “Theihpihtu dang bang ding I chilai dia! 64 Pasian a gensiat na jata uh, bangchi nasa ua?” achi a.

Tuatakin aun un amah siatak in siamlouh atanta uhi.

65 Tuachi’n khenkhat in achil asiat panta ua, amai atuamsak ua, khut in atum ua, tuachi’n a kiangah “Gen in achi ua!” Tualeh silate’n zong a khutpek un abeng uhi.

Peter in Jesu a kitheih mawh bawlna

(Mat. 26.69-75; Luk. 22.56-62; Jhn. 18.15-18, 25-27)

66 Tualeh Peter, nuailam a innpi huang sung a aom laiin, siampi sila nungakte lak a khat a hungpai a. 67 Tuachi’n amahnu’n Peter mei awi a om amuh in, a en a, “Nang zong Nazareth Jesu tawh kilawi nahi,” achi hi.

68 Hinanleh aman kitheihmoh bawl in, “Ka theikha kei,” achi a. Tuachi’n innlim ah ava pawtkhia a, tuachi’n ak a khuangta hi.

69 Tualeh nungak khat in amah a mukik a, a kiang a dingte kiangah, “Hihpa alak ua khat ahi,” a chijel a. 70 Hinanleh aman a kitheimohbawl kik a, tomkhat zoh in a kiang a dingten Peter kiangah,

“Alak ua khat hijenteh: ajiak Galili mi nahi a, naham in zong a kithei hi,” achi ua.

71 Hinanleh aman, “Tua na migenpa uh ka theikha kei! chi’n hamsia lawh in a kichiamta hi!”

72 Tuachi’n a nihveina in ak ahung khuangta a, tuatak in Peter in Jesu’n a kiang a, “Ak nihvei khuan ma-in thumvei nung kitheih mawh bawl ding hi,” achih thu a theikhia thak a, tuachi’n huathu a ngaihtuah a akapta hi.

  

Marka 15

Jesu Pilat maiah

(Mat. 27.1,2, 11-14; Luk. 23. 1-5; Jhn. 18.28-38)

1 Jingsang ahung hih takin siampite’n upate, Laigelhmite leh vaihawm pawlte jousiah tawh kihoukhawm na anei ua, tualeh Jesu ahen ua, apaipih ua, Pilat kiangah apiata uhi. 2 Tuachi’n Pilat in akiang ah, “Nang Judate kumpipa nahi hiam?” chi’n adong a.

Tua khit in aman a kiangah, “Ahi nachih bang in” chi’n adawng hi.

3 Tuachi’n siampite’n sil tampi in a ngawh ua, hinanleh aman bangmah in adawng kei hi. 4 Tuachi’n Pilat in a dong kik a adiang ah, “Bangmah a dawnglou maw? En-in, ahung hekna tengpi uh!”

5 Hinanleh Jesu’n bangmah in a dawng tuan keij lai hi, tuatak in Pilat in lamdang asa mahmah hi.

Jesu thah ding a thutanna

(Mat. 27.15-26; Luk 23.13-25; Jhn. 18.39; 19.16)

6 Tualeh Pilat in kut ankuang luini chiangin thongkia khat anget penpen uh a pawtsakjel hi. 7 Tualeh amin Barabba kichi, a gitlouhna lam a tualthat agitlouh pihte tawh thong tangkhawm khat aom a. 8 Tuachi’n mipite’n, ngaihtak a kikou in, nidang a amau ding a a bawlsak ngaina bang a bawl dingin a ngen panta ua. 9 Hinanleh Pilat in akiang uah, “Judate kumpipa na kiang ua kung khah na ut uh hiam?” achi a. 10 Siampite’n engsiatna tawh Jesu amah kianga a piak uh ahi chih atheihjiak in.

11 Hinanleh siampite’n aman Barabba akiang ua a khahtheih nangin mipite atokthou ua. 12 Pilat in adawng a akiang uah, “Achihleh Judate kumpipa nachihpa uh bang lawh leng na ut ua?” achikik a.

13 Tuachiang in amauhte’n “Kross ah kilhden in!” chi’n ahung kikou kik ua.

14 Tuachi’n Pilat in akiang uah, “Bangjiak in, aman  bang khialhna nei ahia?” achi a.

Hinanleh amauhte’n, “Kilhden in!” chi’n ngaih sem in akikou uhi.

15 Tuakhit in Pilat in, mipite lungdam sak a tu man in, Barabba a pawtsak a; tualeh Jesu ajep zoh in kross a kilhden dingin apiata hi.

Galkapte’n Jesu a simmoh bawl uh

(Mat. 27.15-26; Luk. 23.13-25; Jhn. 18.39; 19.16)

16 Tuachi’n galkapte’n amah kikhopna innsung Praitoriam achih uah apaipih ua, tualeh galkap jousiah a samkhawm ua. 17 Tuachi’n amah puan sandup asilhsak ua, linglukhu aphan ua, a lutung ah akhusak ua, 18 “Chibai Judate kumpipa!” chi’n zahna apia uhi. 19 Tuachi’n alu pumpeng in asat ua; chil asiat khum ua, tualeh khupdin in abia uhi. 20 Chiamnuih bawlna a azakzoh un, puan sandup amah apat a lakhia ua, ama puanmah asilhsak ua, Kross a kilhden dingin apaihihta uhi.

Jesu kilhden a omna

(Mat. 27.32-44; Luk.23.26-43; Jhn. 19.17-27)

21 Tuachi’n amau’n mikhat Simon, Kurini gam a mi, Aleksander leh Rafa pa, gam lam a kipan a hungpai, kross pua ding in a pummat ua. 22 Tuachi’n amau’n Golgotha mun ah amah ahung paipih ua, “Hih pen Luguh mun chihna ahi.” 23 Tuakhit in murah tawh kihel uain adawn dingin apia ua, hinanleh aman asang nuam kei hi. 24 Tualeh kross a amah a kilhden zoh un, atan ding chiat uh theihna dingin ai asan ua, a puansilhte a kihawmta uhi. 25 Tualeh amah a kilhden hun uh ahihleh dak thumna tuamlak ahi a. 26 Tualeh a ngawhna uh atung ah, “JUDATE KUMPIPA,” chi’n laimal in akigelh hi. 27 Amah tawh guta suamhat nih akilhkhawm ua; khat ajiat lam ah, adang khat aveilam ah. 28 Tuachi’n Laisiangthou in, “Amah mikhialte tawm simkhawm ahita hi,” chih a tangtungta hi.

29 Tualeh ageia mi sukvak touvakte’n alu uh lohkhum in, “Ehe! Nang tempul hihsia a nithum ni a lamkik ding pa! 30 Nang leh nang kihunkhia inla kross a pan hung kumsuk tanla,” achi ua.

31 Tuachimah bangin siampite’n zong, Laigelhmite tawh a enghou ua, “Aman midangte a hundam a, amahleh amah aki hundamthei kei a. 32 Israelte kumpipa Krist tuin kross a pan hung kumsukleh atave, imuh a igintat theihna ding un!” achi ua. Kross a akilhden khawmpihte’n zong amah ahousia uhi.

Jesu sihna

(Mat.27.45-56; Luk.23.44-49;Jhn. 19.28-30)

33 Tuachi’n dakguk a hunghih in gam pumpi ah dak kuana dongin khimpi ajing hi. 34 Dak kuana hunghih in Jesu ngaihtak in ahung kikoukhia a, “ELOI ELOI LAMA SABAK THANI?” chi in, tuapen, “Ka Pasian, ka Pasian, bangding a hung taisan na hiam?” chihna ahi.

35 A kiang a ding mi khenkhatte’n azaktak un, “En un, aman Elijah asam!” achi ua. 36 Tuachi’n kuahiam khat vatai in sponzi uain thuk in adaih dim a, pumpeng dawn ah akoih a, adawn dingin apia a, “Amah guak in omsak un! Amah lakhia dingin Elijah a hungpai ei i en ding uh!” achi ua.

37 Tuachi’n Jesu aw ngaitak in a kikoukhia a, a kha akhahta hi.

38 Tuachi’n tempul puanjak atunglam a pat atawtan phelnih kisuahin ahung keksuk a. 39 Tualeh amailam a ding galkap zalamkai pa in, hihbang a akikou leh akha akhahte amuhtak in, “Hihpa Pasian Tapa taktak ahi!” achi hi.

40 Gamlapi a pan agal et numei khenkhat zong aom ua, tuate lak ah Mari Magdalini, Jakob naupangjaw leh Jos nu Mari tualeh Salomi ajau uhi. 41 Amauhte Galili gam a aom laia anungjuia a nna sepsakte ahi ua, tualeh numei dang tampi Jerusalem a amah tawh kitontoute zong aom uhi.

Jesu vuina

(Mat. 27.57-61; Luk. 23. 50-56; Jhn. 19.38-42)

42 Tualeh nitak lam ahung hih in, kisakkholhni ahihjiak in, huapen khawlni ma-a ni ahi a. 43 Joseph Arimathai khua mi, vaihawmtu zah omtak, Pasian gam ngak jing a om, a hungpai a, hangsan takin Pilat kiangah alut a, Jesu luang ava ngenta a. 44 Tualeh pilat in asihpai lamdang asa mahmah a, tuachi’n galkap zalamkai asam a, akiang ah, asihna asawtta hiam, chi’n adong a. 45 Tualeh galkap jalamkaipa a pat atheichian takin Pilat in aluang Joseph apiata hi. 46 Tuachi’n aman puannem alei a, amah a lakhia a, puannem in atuam hi. Tualeh suang khuakkuaksa han khat ah asialta a, tuachi’n suang khat hankot ah a likkhumta hi. 47 Tualeh Mari Magdalini leh Jos nu Mari-in asialna a en uh hi.

Marka 16

Jesu thohkikna

(Mat.28. 1-8; Luk 24.1-12; Jhn.20.1-10)

1 Khawlni beitak in, Mari Magdalini, Jakob nu Mari leh Salomite’n vapai a amah anuh ding uh silnamtui alei ua. 2 Nipikal ni masapen jingsang matak nisuah phet in amauhte han ah a hungpai ua. 3 “Kuan han kongkhak a pan suang hung likkhiatsak ding ata diam?” chi’n a kihou ua. 4 Hinanleh amauhte adaktouh uleh han kongkhak suang likkhiatsa a om amu uhi. Asuang pen alet a lian ahi. 5 Tualeh hankhuk sung a alut uleh, tangval khat puanngou tualtak silh a ajiatlam pang a tou amu ua, alauta uhi.

6 Hinanleh aman akiang uah, “Laukei un, aki kilhlum Nazareth Jesu na zong uhi, amah a thoukikta hi! En –un, asialna uh. 7 Hinanleh pai unla, a nungjuite leh Peter kiangah, ‘Galili gam ah namai uah apai hi; na kiang ua agensa mah bangin, huasan ah amah na mu ding uhi, chi’n vahilh un,’ ” achi hi.

8 Tuachi’n a pawtkhia ua; han a pan in manlangtak in ataita ua, lamdang asak jiak un a kithing ua, tualeh alau jiak un kuamah kiangah bangmah agenkei uhi.

Jesu Mari Magdalini kiang ah aki lak

(Mat. 28.9,10; Jhn. 20.11-18)

9 Tualeh Jesu nipikal ni masapen jingsang matak a athohkik zoh in, asung a dawinin sagih a hawlkhiat saknu Mari Magdalini kiangah akilak masapen hi. 10 Amahnu apai a, amah tawh omkhawm jelte, amah su’n a kapte avahilh hi. 11 Tualeh amauhte’n amah ahing ahi, chih leh amah nu’n amu hi chih ajak hang un, ataksan kei uhi.

Jesu nungjui nihte kiangah a kilak

(Luk. 24.13-35)

12 Tuakhit in, amauh lak a minih gam lam juan a apailai un, meltuam pua in akiang uah akilak a. 13 Tuachi’n amauhte avapai ua nungjui dangte kiangah avahilh ua, hinanleh amauhte’n ataksan kei uhi.

Nungjuite kiang a Jesu kilakna

(Mat. 28.16-20; Luk.24.36-49; Jhn. 20.29-23; Nst.1.6-8)

14 Tuanung in dohkan kim a atoulai un, nungjui sawm leh khatte kiangah akilak a; a thohkik zoh nung a mute thugen ataksan louh jiak un, ataksan louhna uh leh a lungtangte uh atakjiak in aphawk hi.

Sawl khiatna

15 Tualeh aman akiang uah, “Leitung pumpi ah pai unla silsiam jousiah kiangah tangthupha vagen un, achi hi. 16 Kuapeuh agingta a baptisma tangte hundam in aom ding uhl; hinanleh kuapeuh agingtaloute siamlouh tang in aom ding hi. 17Tualeh a gingtate hih chiamtehnate in ajui ding hi: Ka min in dawite a hawlkhia ding ua, hamthak in aham ding uh; 18 Amauhte’n akhut un gulte aman ding ua; sihna gu dawn nanle uh; tua in amauhte anasak kei ding; damloute tungah khut anga ding ua, adam ding uhi.”

Jesu van kahna

(Luk. 24.50-53; Nst. 1.9-11)

19 Tuachi’n Toupa’n akiang ua thu agen khit in, amah van ah laktouh in aom a, Pasian jiatlam ah atouta hi. 20 Tuakhit in nungjuite apai ua mun chinteng ah thu agen ua, Toupa’n amauhte a seppih a, ajui chiamtehnate’n athupuak a hihkipsak jel hi. Amen.