Galatiate

GALATIATE

KIANG A SAWLTAK PAUL LAIKHAK

Galatiate 1

Chibai bukna

1 Paul, mihing apat hilou, mihing vang a zong hilou, Jesu Krist leh Pa Pasian misi lak a amah kaithoutu  vang a hijaw in. 2 Tualeh ka kiang a om unau jousiahte’n Galatia gam asaptuam jousiahte kiang ah:

3 Pasian leh i Toupa Jesu Krist kiang a kipan hehpihna leh khamuanna nakiang uah om hen.

4 Amah pen Pasian leh i Pa uh deihdan dungjuiin tulai gitlouhna khang hun a kipan a hung suahtaksak theihna dingin i khialhnate ta’ng in a kipiata hi. 5 Pasian kiang ah thupina tangtawn tangtawn in omjingta hen! Amen.

Tangthupha khat

6 Krist hehpihna a nou hung samtu amah a pat tu kikal a tangthupha dang a na kisuansan uh lamdang kasa hi. 7  Huapen, “Tangthupha dang ahi kei a,” hinanleh nou hung hihbuai in Krist tangthupha a hiloulam a hei ut mi khenkhat a om uhi. 8 Hinanleh kou hi in, ahihkeileh vangtungmite hitaleh tangthupha na kiang ua ka gen uh loungal tangthupha dang mawng mawng na kiang ua hung kigen a om leh hamsiat in om hen!  9 tuma a ka gen bang un tuin zong ka genkik ahi, tangthupha na muhpen uh loungal tangthupha dang mi kuapeuhin na kiang ua a hunggen leh hamsiat in om hen!

10 Ajiak, ken tuin ken tuin mihing dihsakna ahia ka jon? Ahihkeileh Pasian a! Ahihkeileh! Mihing suklungkim sawm ka maw leh? Mihing suklungkim sawm nalai hileng Krist sawltak ka hikei ding hi.

Paul sawltak ahung hihna

11 Hinanleh unaute aw, ka tangthupha genpen mihing lam thu ahi kei chih kung theisak hi. 12 Ajiak mihing a pat ka muhzong ahi kei a, mihing hilh zong ka hi hikei hi, hinanleh Jesu Krist kilakna jiak a ka muh ahijaw hi.

13 Ajiak tu-ma a Judamite biakdan a ka omlai a ka tungtang, bang chibang a Pasian saptuamte theihtawp a bawlgenthei a,  tobuaitu ka hihdan na jata uhi. 14 Tualeh  ka pu leh pate thugin a phattuam ka ngaihdiak jiakin Judate biakdan lam ah zong ka chipihte lak ah ka khangual tampi tungah kana leng hi.

15 Hinanleh kanu gilsung a ka omlai a pat hung na koihtuamtu leh a hehpihna a hung samtu Pasian in. 16 Jentelte lak a a tangthupha ka gentheihna dingin a Tapa pen keimah kiang a kilaksak hoih asaklai in, taksa leh sisan ka dong kai a, 17 Jerusalem khua ah kei sang a swaltak himasajawte kiang ah zong ka paitou kei a, hinanlehArabia gam ah ka paijaw a, tualeh Damaska khua ah kung kilehkik ta hi. 18 tuachi’n kum thum nungin Jerusalem khua ah Peter kimuhpih dingin ka paitou a, a kiangah nisawm leh ni nga ka va om hi. 19 Hinanleh Toupa sanggampa Jakob chihlouh sawltak dang khatbek ka mu kei hi.

20 Tuin na kiang ua ka thugelhte, en un, Pasian mai ah ka juaukei hi!

21 Huanung in Suria gam leh Silisia gam ah ka paita hi. 22 Tualeh Judea gam a Krist a om saptuamte meltheihlouh in ka om nalai hi. 23 Hinanleh, “Tuma a ei hung bawlgenthei pa’n khatvei laia a suksiat taak ginna pen tuin a tangkoupihta hi!” chih thu guak aja uhi. 24 Tualeh amau’n keimah jiakin Pasan aphatta uhi.

Galatiate 2

Paul leh sawltak dangte

1 Tuachi’n kumsawm leh kumli nungin Barnaba tawh Jerusalem ah ka paitou kik a, Tita zong ka zohpih uhi. 2 Tualeh kilakna dungjuiin ka paitou a, Jentelte kiang a ka thangthuppha genpen a kiang uah ka hilh a, atuachih keileh bangchidan hiam in atawn a tai ka hikha ding hi. 3 hitalehzong ka kiang a om Tita pen Grikmi ahihhang in tep tansak teitei in a om kei a, 4 tualeh huapen sila ahung tansak theihna ding ua, Krist Jesu a i zalenna enkhia ding a, aguk a hunglut unau takloute jiakin ahi. 5 Hinanleh tangthupha thutak pen na kiang ua a omjing theihna dingin dakkal khatsung maimai zong a thunuai ua kipialut naisailou ka hi uhi.

6 Hinanleh mi zah-om deuh a ka gemte lak ah pen bamg chibang ahita un zong kei dingin akhawk kei, mi zah om a ka gente n bangmah ahung gensak tuankei uhi 7 Hinanleh gensak naksang  in, teptanloute tangthupha ka kiang a kepsak in a om chih a thei uhi. 8 Ajiak teptante sawltak hi ding a Peter kiang a nasemtu mah in, Jentelte sawltak hiding in keimah ah sil thupitak in abawl hi. 9 Tualeh khuam bang hial a om Jakob, hung kipia atheihtak un kou Jentelte kiang a pai a, amauh teptante kiang a pai ding in kei leh Barnaba kipawl khawmna khut jiatlam ahung pia uhi. 10 Migantheite ka theihjing uh adeih ua, huapen ken zong ka bawlsawm mawng ahi.

Antiok a Paul in Peter aphawkna

11 Hinanleh Antiok khua a Peter a hungpai takin, demna a om jiakin a maitang ah ka na salh hi. 12 Ajiak aman jakob kiang a pat mi kuate hiam ahung paima un teptante a laujiak in a tawp kik a, atuam omta hi. 13 Tualeh Judami dangte zong amah tawh alepchiah ua; tuachi n Barnaba nasan zong alepchiah na uah puimang in a omta hi. 14 Hinanleh tangthupha thutak bang a ginhuaitak bangin a omkei uh chih ka muh tak in, Peter kiangah, a un ua amai uah, “Nang, Judami hi chin a,Judate om bang a omlou a, Jentelte om bang a na om ngal leh bangding a Jentelte Judami ombang a omsak sawm na hia?”ka chi hi.

Ginna jiak a hundamna

            15 “ Eipen Jentel mikhialte i hikei ua,” Judami mawng a piang i hi uhi. 16 Dan silte bawljiak in mi siamtansak in a om kei a, hinanleh Jesu Krist gintatna liuliau in siamtang in a om uh chih ithei uhi. En zong dan silbawl jiak hilou a, Krist ginna jiak a siamtang a i omtheihna dingin Jesu Krist pen i gingta uhi, ajiak dan silte bawljiak in kuamah siamtang in a om kei ding hi. 17 Hinanleh Krist a siamtang a omsawm kawm pi a eimah ngei zong mikhialte i nahiheh, tuajiak in Krist khialhna nasemtu ahi diai leh? Hibaih baihlou! 18 Keimah in ka silbawlsiatte bawlpha kik taleng, dan bawtsiatu ka hi chih ka kitheisak giap ahi ding hi. 19 Ajiak pen Pasian lam a ka hintheih nangin, dan jiakin dan lam ah ka sita hi.  20 Krist tawh kilhden in ka omta hi, hinanleh ka hing hi. Keimah hing hinawnlou in, Krist keimaha hing a hing ahijaw hi; tualeh tu a taksa aka hinna pen, ahung it a ka tang a kipiapa Pasian Tapa ginna a hing ka hi. 21 Pasian hehpihna pen bangmah lou in ka koih kei, ajiak dan jiak a siamtanna om ahihleh Krist amawkna a si ahi ding hi.

Galatiate 3

Dan ahihkeileh ginna

1 Galatia mimawte aw! Na lak ua, na mitmuh ngei ua Jesu Krist pen kilhden a a om chiantak a hilhchian a omta, hua thutak juilou ding a kuan hung bummaw na hita ua! 2 Na lak ua kipan hih ka thei nuam hi, dan silte na bawljiak un amawleh kh na muh uh, ahihkeileh na ngaihkhiak ua na gintat jiak un? 3 Hichi lawm lawm a maw na hi uh hiam? 4 Sil huazahpi amawkna a thuak na hi uh maw? A mawkna bang na hitalwh! 5 Tuajiakin, na kiang ua kha hung piatu leh, nalak ua sillamdang bawltu in dan silte jiakin ahiam abawl ahihkeileh na ngaihkhiat jiak ua na gintat jiak uh maw?

6 “Abraham in Pasian agingta a, huapen a diktatna a simsak ahih mahbang in.” 7 Tuajiakin ginna a omte, huate mah Abraham tate ahi uhi chih thei un. 8 Tualeh Laisiangthou in gin jiakin Pasian in Jentelte siam atangsak ding chih theikholh in, Abrahamkiangah, “Nang ah nam jousiah gualjawl in a om ding uh,” chi n tangthupha a nagenta hi. 9 Tuachi ahihjiak in; ginna a omte pen migin om Abraham tawh gualjawl khawm in a om uhi.

10 Ajiak dan silbawlte a om jousiah pen hamsia nuai a om ahi uh. Ajiak hihbang a gelh ahi, “Dan laibu a bawl ding a kigelh jousiah juijing loute pen hamsiat in a om uhi!” 11 Hinanleh, Pasian mitmuh in kuamah dan a siamtang a om kei ding uh chih akichianhi, “Ajiak midiktat pen ginna in ahing,” chih ahi. 12 Hitaleh zong dampen ginna a piang ahi kei a, hinanleh, huachibang a bawlte pen huate ah ahing ding hi.

13 Krist pen eite tang in hamsiat in a hung om a, dan hansiatna a pan ahung tankhiata hi, ajiak hihbang a gelh ahi “Singdawn a khailup taphot hamsia thuak ahi uhi.” 14 Tua Abraham tung a gualjawlna pen Jesu Krist jiak a Jentelte tung ah a hung om a, eiten kha chiam pen ginnna jiak a  muhtheihna ding uh ahi.

Dan leh thuchiam

15 Unaute aw, mihing dan in ka gen ahi; hihpen mihing thukhun hinanleh, sukkip ahihleh kuaman a bawlsia ngaikei a, ahihkeileh abehlap ngaikei uhi. 16 Tuin, Abraham leh asuante kiangah ahi hih thuchiam ana kipia. Aman tampite genna bangin, “nasuante kiangah,” achi kei a, mikhat thu gen bangin, “nasuan kiang ah” a chijaw hi, huapen Krist a hi. 17 Tualeh hih ka gen ahi, Pasian in Krist a sukkip sa thukhun pen, kum jail leh  kum sawm thum nung a  hung om bangin thuchiam pen bangmah lou suah ding in hihmang  thei kei hi.18 gouluah ding pen dang jiakk ahileh,thucham jiak ahita kei ding hi, hinanleh pasian in thuchiam jiakin hih Abraham ana piata hi.

19 Atuachihleh bang ding a dan om ahia? Hihpen chi-suang, a kiang a thuchiam piak a ompa, a hung pai masiah bohsiat nate jiak in behlap in om a, vantung mite zong a palai khut a sukkip ahi. 20 Tualeh palai pen mikhat guak a ding a palai ahi kei a, hinanleh Pasian khat ahi.

                                    

Dan siltup

21 Danpen Pasian thu chiam kalh ahi diah leh? Hibaih lou! Hinna piathei dan ana ki piata hitaleh siam tan sak na pen dan jiakin ana om teitei ding hi . 22 hinan leh JesuKrist a gin jak a thuchiam pen  a gingtate  a kipiak theina ding in; laisiangthou in mi jousiah kialhna nuaiah a kulhkhumta hi. 23 Hinanleh ginna ahung tunma in dan a gakkhum in i na om ua, hung kilang ding ginna ah kep in i om uhi. 24 Tuajiakin dampen ginna  jiak a siam itan thei na ding a Krist kiang a hung puiding, a hung hilhtu ahi hi. 25 hinanleh ginna a hungtun nuangin, a hunghilhtu nuaiah i om nawn kei uhi.

26 Ajiak na un un Jesu Krist ginna jiakin Pasian tate na hi  uhi. 27 Ajiak nalak ua Krist a  a baptisma tang jousiah Krist a kivon na hita uhi. 28 Hua ah Judami, Grikmi  a om nonkei, ajiak na unpi un Jesu Krist a a pum khat na hita uhi. 29 Tualeh huachiah Krist a na hihtak ua ahileh, Abraham suan, thuchiam dung juia gouluah dingte a hi uhi.

Galatiate 4

             1 Tuin hichi’n ka chi hi, gouluahtu ding pen bangkim tung a lamkai hinanleh naupang ahihlai siah sila tawh kilamdanna a neituan kei hi. 2 Hinanleh apa hun guat atun masang siah in akemtu leh a enkoltute nuai ah a omjaw hi. 3 Tuachimah bangin ei zong, naupang i hihlai in, leitung silte nuai ah sila in i om uhi. 4 Hinanleh ahunbi ching a hungtun tak in, Pasian in a Tapa, numei suan in dannuai a piang in ahung sawlkhiata hi, 5 Ta hihna i tantheihna ding a, dan nuai a omte tankhia ding in.

6 Tualeh ta na hihjiak un Pasian in a Tapa kha pen, “Abba Pa!” chi a kikou in na lungtang uah ahung sawlkhiata hi. 7 Tuajiakin sila na hinawn kei ua, hinanleh tan a hijawta ta na hijawta uhi, tualeh ta  nahih uleh, tuachi’n Krist vang a Pasian gouluahtu na hi uhi.

                      

Paul in Galatiate a ding a ngaipoimoh

8 Tuachi hinanleh, Pasian na theihna un, a pianjia mawng a Pasian hiloute nna nasem uhi. 9 Hinanleh tuin Pasian na hungtheih nung ua, ahihkeileh Pasian theihmi na hung hih nung ua, bang chidan a sil jawngkhal leh manlouhte sila a lutkik ut a kiheikik na hi ua? 10 Nite, khate, hunte, na tang nak uhi. 11 Bangchi hiam a natung ua athawn a ka sepgim khak ding kung lausak hi!

12 Unaute aw, kung ngen hi, keimah bangin om un. Ajiak kei zong noumah bangin ka om hi. Ka bangmah na hihkhial kei uhi. 14 Tualeh ka taksa a nou a ding a etkhiatna ompen na simmawh kei ua, ahihkeileh na nial kei uh, hinanleh Pasian vantungmi bang leh, thamlou in Krst Jesu banghial in nung pom uhi. 15 Ahihleh vangpha na kisakna uh khoia om ata le? Achihleh bang gualjawlna in ahia na kipak uh? Ajiak hitheileh bawn na mit uh kheikhia in nung piahial ding uh chih theihpihna kungnei hi. 16Thutak kung hilh jiak a na melma uh hung suakdok kata maw leh?

17 Amau’n kilawptak in nou ahung zong ua, hinanleh ahoihlam ahi kei, nou amauh na zontheihna ding ua hung puaseh sawm ahijaw uhi. 18 Hinanleh, na kiang ua ka om guak hilou in, bangchiklai peuh a ahoihlam zong a omjing ahoih hi. 19 Ka tanoute aw, noumah a Krist siam piching a aom masiah nausuak nat thuak in, kung thuak kik hi. 20 Tuin na kiang ua om a ka aw hih lamdang ka ut mahmah hi, ajiak na tung thu uah kung lungkham pih hi!

Hagar leh Sarah gentehna

21 Hung hilh un, nou dan nuaia om utte, danthu ngaikhialou na hi uh maw? 22 Ajiak hihbang a gelh ahi, Abraham in tapa nih anei a, khat pen a silanu tawh tualeh adang khat pen ahihleh zalennu tawh. 23 Hinanleh silanu lak a pen taksa dan a piang ahi a, zalennu lak a pen thuchiam jiak a piak ahi, chih. 24 Hih thu bang gentehna ahia. Ajiak hih numei nihte thukhun nihte ahi uhi; khatpen Sinai mual a pat sal a taang ding a taneinu ahi a, huapen Hagar ahi. 25 Tualeh Hagar pen Arabia gam a Sinai mual ahi, tulai a om Jerusalem, tualeh a tate tawh sal a taangkhawm kigenna ahi. 26 Hinanleh tunglam Jerusalem ahihleh a zalen a, huapen i un ua nu ahi. 27Ajiak hichi’n akigelh hi,

“ Aw Nang, taneilou a chignu!

Kipak in, nang nausuaknat

thuaklounu;

ngaihtak in kikou khia in!

ajiak pasal neinu sangin a ta’ng a

omnu in ta anei tamjaw hi.”  

28 Tuin unaute aw, eite pen Isak banga thuchiam tate i hi uhi. 29 Hinanleh huahun laia taksa dan a piang in kha dan apiang a bawlgenthei a, tuachimah bang in tuin zong ahi hi. 30 Hitalehzong Laisiangthou in bang a gen a? “Silanu pen a tapa tawh delhmang un; silanu tapa in zalennu tapa tawh gou a luahkhawm kei ding hi,” achi hi. 31 Tuachi’n unaute aw, silanu tate i hikei a, zalennu tate ihijaw uhi.

Galatiate 5

Na zalenna kemhoih in

1 Tuajiakin, sila hinawnlou ding a Krist in a hung zalensakna ah dingkip unla, sila hakkol ah ta’ngkik nawn kei un,

2 Adiktak in! Keimah Paul in na kiang uah ka gen ahi, tep natan uleh Krist nou a dingin bangmah phatuamlou ding ahi. 3 Tualeh teptante jousiah kiangah, dan jousiah juihding nabat uh ahi, chih kung theisak kik hi. 4 Nou, dan a siam kitngsak jousiahte, Krist pen nou a dingin a phatuam lou ahita a, hehpihna a pan na pukta uhi. 5 Ajiak kou, kha jiakin ginna a siamtanna kinepna pen kilawptak in ka ngak uhi. 6 Ajiak, Jesu Krist ah teptan pen bangmah aphatuam kei a, teptanlouh zong bangmah a phatuam kei hi, hinanleh itna tungtawn a sem ginna a phatuam hi.

7 Hoihtak in na tai uh, thutak juilou dingin kuan ahia ahung dal? 8 Hih khemna pen nou hung samtu a pat ahikei hi. 9 “Tol themnou khat in tanghou beupi ajelsuak hi.”10 Nou lungsim dang na ngaihtuah kei ding uh chih Toupa ah kung muang hi, hinanleh nou hung hihbuaitu in, kua  hitaleh zong, atung a thutanna athuak ding hi.

11Tualeh unaute aw, ken teptan thu gen nalai kahihleh , bangding a hihgentheih a om nalei ka hia? Atuachi ahihleh Kros a kipalpukna pen abei ahita ding hi. 12 Nou hung hihbuaite ki satkhia maileh ka ut hi!

13 Ajiak unaute aw, zalen ding a sap na hi ua, na zalenna uh taksa ding a lemtanna in zong kei unla, hinanleh itna in khat leh khat na kisepsak tuah jaw un. 14 Ajiak, “Nang mah na ki it bangin na innvengte na it ding ahi,” chih thu tengkhat ah danthu jousiah sukbukim in a om hi. 15 Hinanleh na kihei ua, na kinek tuah uleh na kihihmang louhna ding un pilvang un.

Kha leh mihing omdan

16 Tuachi’n hih ka gen hi, kha ah om un, tuahileh taksa utna na hihtangtung kei ding uhi. 17 Ajiak taksa in kha a dou a, kha in taksa a dou hi. Ajiak sil na bawlsawmte uh na bawl theihna ding un, hihte pen a kikalhtuah uhi. 18 Hinanleh kha lamkaih a na om uleh dan nuai a om na hi kei uhi.

19 Tualeh taksa silbawmna, kingaina, thanghuaina, hukna; 20 milim biakna, bumna, muhdahna, kihauna, tualthahna hehna, mahni angsung khualna, omtuamna; 21 deihgohna, tualthahna, uainkhamna, gualnop bawlnate,leh huachibang dang dangte ahi. Huachibang bawlte’n Pasian gam aluah kei ding uh, chia masang a kung hilhtak mahbang in, kung mahilh hi.

Kha gah

22 Kha gahte ahihleh, itna, kipahnai khamuanna, thuakzohna, nunnemna, hoihna, gin omna, 23 omdan siamna, kidek theihnate ahi. Hihte kalh in dan a omkei hi. 24 Tualeh Krist a ahi mite’n taksa pen alunggulhna leh aduhgawlna tawh a kilhdenta uhi. 25 Kha a hing I hihleh, kha mah in i om ding uhi. 26 Khat leh khat i kikhem kei ding ua, i ki engsiattuah kei ding uhi.

Galatiate 6

Khat leh khat puakgik kidawntuah ding

1 unaute aw, mi kuahiam a hihkhialhna a matkhiat a a omleh, nou kha mite ngei zong khemna na tuakkha ding chih ngaihtuah in, huachi bang mi pen nunnemna lungsim tawh dingsak kik un. 2 Khat leh khat na puakgikte uh kidawn chiat unla, tuachi’n Krist dan hihbukim un. 3 Ajiak mi kuahiam khat bangmah hiloupi a aki ngaihsang leh, amah leh amah kikhem ahi. 4 Hinanleh michih in ama nasep ki etchianjaw hen, tuachi’n midang tung hilou in a mahmah tung ah a kipak ding hi. 5 Ajiak michih in a puakchiat akipuak ding ahi.

6 Thuhilh a ompa in ahilhtu kiang ah silhoih jousiah piaphal hen.

7 Khem in om kei un, Pasian pen simmawh gual ahi kei hi, ajiak mi’n atuh khatpeuh, huamah a atding uhi. 8 Ajiak taksa lam a tuhpan taksa lam a siatna a atding a, hinanleh kha lam a tuhpan kha lam a tangtawn hinna a atding hi. 9 Tualeh silhoih bawl i chimtak kei ding uh, ajiak i lungkiat keileh ahuntak in i atding uhi. 10 Tuajiakin, hun lemtang i neih bangjel un mi jousiah kiang ah silhoih i bawl ding uh, adiak in ginna a i innkuanpihte kiangah i bawl ding uhi.

                                                  

Thutawp genna leh chibai bukna

11 Keima khut mahmah a, na kiang ua ateng lianpipi a laikhak kunggelh en un!12 Taksa a kilat-hoih sawmten teptan dingin nou ahung sawl teitei uhi, ajiak bangmah dang hilou in, Krist Kros jiak a gimthuakna a thuaklouhna ding un ahi hi. 13 Ajiak, amauh teptan mawngte’n zong danthu a juituankei uhi, hinanleh na taksa ua kiletsakpih ding a neihtheihna ding un tep tanle uchin chih adeih uh a hiphet hi.14 Hinanleh ken, i Toupa Jesu Krist kros chihlouh ngal ka suanlouh ding dan Pasian in a hungkham hi; amah jiakin leitung kei dingin kilhden ahita a, tualeh kei leitung dingin asi ka hita hi. 15 Ajiak pen Krist Jesu ah siamthakna loungal; teptan, ahihkeileh teptanlouh hitaleh, bangmah aphatuam kei hi. 16 Tualeh hih danbang a om jousiahte tungah khamuanna leh kituahna om hen!

17 Tu-a kipat in kuaman hung tokbuai nawn kei uh hen, ajiak ka taksa ah Toupa Jesu ciamtehna ka pua hi.

18 Unaute, i Toupa Jesu hehpihna na kha uh kiangah om hen. Amen.