Luka

LUKA

GELH TANGTHUPHA

Luka 1

1 I lak ua ataktak a sil na om, mi tampite’n phuankhiat na ding ngaihtuah a gelh ana tup uh: 2 Atu’ng a pan a mit a mute leh thu nagelhte’n a hunghilh bang un, 3 Theophila aw, abul a kipan sil bangkim kiteltak a theihkimna neiin ka enchain a, kijom jel a na kiang a gelh hoih kasa hi. 4 Masang a nang hung kihilh thute adik na hi chih na theihna ding in.

Baptispa Johan pian ding genkholhna

5 Judea gam a Herod kumpi a apan laiin, amin Zakariah kichi siampi nasem khat a om a, tualeh azi Aaron tanute khat ahi a, amin Elizabeth ahi. 6 Amau nupa Pasian mitmuh in midik ahi ua, Toupa thupiakte leh dante dembei in a juikim uhi. 7 Hinanleh Elizabeth achi’n jiakin ta anei kei ua, amauh a upa tuak mahmahta uhi.

8 Tualeh hichi ahung hi a, aman a huntan dungjui a Pasian mai a siampi nna sem a aom laiin. 9 Siampu tawndan dungjuiin Pasian tempul sung a alut chiang a gim namtui hal ama tan ahi, 10 tualeh gin namtui kihal sung in mipite’n apualam ah thumna ana nei uhi. 11 Tuachi’n Pasian vantungmi khat gimnamtui kihalna maitam jiatlam ah dingin a kiangah ahung kilak a, 12 Zakariah in amuh takin adihguih a, ahung lauta hi. 13 Hinanleh Pasian vantungmi in a kiang ah, “Zakariah, lauken! Na thumna jak ahita hi, nazi Elizabeth in tapa ahung neisak ding a, amin Johan naphuak ding ahi. 14 Tuachi’n nang nuam in na kipak ding a, mi tampite amah pianni-in akipak ding uhi! 15 Pasian ngaih in amah milian ahi ding a, uain ahihkeileh khamtheih dang mawng mawng adawn kei ding, anu gilsung a kipan Khasiangthou in adim ding hi. 16 Tuachi’n Israeltate tampi Toupa a Pasian uh lam ah a kilehkik sak ding hi. 17 Tualeh pate lungtang tate lam a ngasak ding leh, thu mang loute midiktat pilna lam ngasak ding leh, Toupa ding a mi honkhat mansa a omsak ding a na bawlkholh dingin Elijah lungsim leh silbawl theihna tawh Toupa mai ah apai ding hi,” achi hi.

18 Tuatakin Zakariah in Pasian vantungmi kiangah, “Hihmi bangchi’n ka theithei dia? Keilah upata ing a, ka zi zong a upata mahmah hi,” achi a.

19 Tuachi’n Pasian vantungmi in a dawnga a kiangah, “Kei Gabriel, Pasian maia ding pen ka hi; tualeh na kiang a hihthu gen ding leh hihthu kipak huaite hilh ding a sawl ka hi. 20 Hinanleh ngaiin, ahun bang a hung tung ding hihthu ka gente na gintatlouh jiakin, hih silte ataktak ahung tun masiah hamtheilou in na om ding a, bangmah na genthei kei ding,” achi hi.

21 Tualeh mipite’n Zakariah angak ua, Pasian tempul sung a asawt om seng jiakin lamdang asa uhi. 22 Hinanleh a hungpawt in akiang uah thu a genthei takei a; tuatak in tempul sung ah kilakna amu hi chih atheita ua; ajiak akiang uah akhut in theihsakna abawl a, tuachi’nhamtheilou in a omjingta hi.

23 Tualeh hichi ahung hi a, a nasep ni achin takin inn ah apaita hi. 24 Tuachi’n ni tomkhat zoh in azi Elizabeth ahung gaita a, kha nga sug a kibu a, agen a. 25 “Mi lak a ka minsiat sel dingin, Toupa’n ahung muh in ka tung ah hichi bangin abawlta hi!” achi hi.

Jesu pian ding genkholhna

26 Tualeh Elizabeth gai a khagukna ah Pasian in a vantungmi Gabriel Galili gam a khuapi khat amin Nazareth kichi ah, 27 Nungak siangthou khat, David suan a mi, amin Joseph kichipa zi ding a kikhamsa kiangah asawl a, tua nungak siangthou min ahihleh Mari ahi. 28 Tualeh vantungmi a kiangah alut a, “Chibai nang nakpitak a deihsaknu, Toupa na kiangah aom hi! Numei lak a hamphanu nahi!” achi hi.

29 Hinanleh amahnu’n amah amuh takin a thugente a lunghimohta mahmah a, bangchi dan a chibai hungbuk adiam aw? chi’n aki ngaihtuah hi. 30 Tuachi’n Pasian vantungmi in amahnu kiangah, “Mari, lauken; Pasian a pan deihsakna natang hi. 31 Ngaiin, nagai ding a, tapa na nei ding a, amin Jesu naphual ding ahi. 32 Amah milian ahung hi ding a, tungnungpen Tapa akichi ding; tualeh Toupa Pasian in a kiangah apa David laltouna apia ding hi. 33 Tualeh Jakob suante tung ah kumtawn in vai ahawm ding a, agam in beini anei nawn kei ding hi!” achi hi.

34 Tuachi’n Mari-in vantungmi kiangah, “Kei nungak siangthou hi-ing a, hih bangchi’n a hithei diai? Pasal lah neilou ing a?” achi hi.

35 Tuachi’n vantungmi-in adawng a akiang ah, “Khasiangthou natung ah ahung tung ding a, Tungnungpen silbawltheihna-in ahung liahkhuh ding; tuajiakin nang a pat hung piang ding zong siangthou Pasian Tapa chih ahi ding hi. 36 Tualeh ngaiin, na sanggamnu Elizabeth in zong a upat nung in tapa khat apaita hi, achi’ng achihnu uh, a khagukna ahita hi. 37 Ajiak ahihleh Pasian dingin a hitheilou bangmah aom kei hi,: achi hi.

38 Tuachi’n Mari-in, “En-in, kei, Toupa silanu ka hi, nagen bangbang in ka tungah hung tung hen,” achi a. Tuachi’n vantungmi-in apaisanta hi.

Mari in Elizabeth a vehna

39 Huanite  in Mari athou a; singtang ah Judea gam khuapi khat ah apaipah vingveng hi. 40 Tuachi’n Zakariah inn ah alut a Elizabeth chibai abuk hi. 41 Tualeh hichi ahi a, Elizabeth in Mari chibaibuk ajak takin, asung a naungek a kitawm a, tuachi’n Elizabeth pen Khasiangthou in ahung dimta a; 42 tuachi’n aw ngaihtak in ahung kikoukhia a; “nang numei tengteng lak ah hamphanu nahi, nagil a gah zong ahampha hi! 43 Ka Toupa nu ka kiang a nungpai bangchi dan ahia? 44 Ngaiin, nung chibaibuk husa gin kabil a alut takin, ka naubu sung a om naungek nuam in akitawm hi. 45 Tuachin agingtanu zong ahampha hi; Toupa’n akiang a thugen tangtung ding ahih jiakin!” achi hi.

Mari phatna la

46 Tuachi’n Mari-in:

            “ka hinna in Toupa apahtawi a,

47 Tualeh kakha zong a hundampa

            Pasian tung ah a kipak hi,

48 Ajiak aman asilanu nam ngiam dan alimsak a!

            Ngaiin tu a kipan in khangthak jousiahin hampha a hungchi ding uhi.

49 Amah mihat in ka tung ah sil thupitak ahung

      bawlta a;

            tualeh amin zong siangthou ahi.

50 Tualeh amah laudan siamte tungah ahehpihna akhang akhang in a omtou pek ding hi.

51 Aban in a thahatdan a ensak a, mi kiliansakte a  

      Lungsim suangtuah nate uh athehjak sak hi.

52 Mihatte a laltouna ua kipan a kaikhia a,

            Mi ngiamte a tawisangta hi.

53 Gilkialte silhoih in ataisak a,

            Hinanleh mi hausate khutguak in a sawlmangta

        hi.

54 Azahngaihna theihjingna in,

            A sila Israel a panpih ta a;

55 Tangtawn a ding a ipu leh pate,

            Abraham tualeh asuan leh khakte kiang a agen

       bangbang in!” achi hi.

56 Mari Elizabeth kiangah kha thum vela tam a, tuachi’n a inn ah apaikikta hi.

Baptispa Johan pianna

57 Tualeh Elizabeth nausuah hun a hungtungta a, tuachi’n tapa ahung neita hi.

58 A innvengte leh a sanggamte’n Toupa’n hehpihna thupitak atung ah a langsakta chih anaja ua, a kipahpih mahmah uhi.

59 Tualeh hichi ahung hi a, a nigiatni in naungek teptan dingin ahung zohpih ua, amin dingin apa min la in Zakatriah aphuak sawm uhi. 60 Hinanleh anu in, “Hilou e! amah Johan kichi ding ahi,” achi hi.

61 Hinanleh amau’n a kiangah, “Nabeh naphung lak ah hihbang min nei kuamah om nailou pi!” achi ua. 62 Tuachi’n amau’n apa kiangah chiamtehna bawl in, amin dingin bang phuak lei nadeih a? achi ua.

63 Aman laigelhna pek a ngen a, “Amin Johan ahi,” chi’n agelh a, tuatakin aun un lamdang asa chiat uhi! 64 Tuachi’n akam ahung kihong pai a, alei ahung kiphel a, ahung ham a, Pasian aphatta hi. 65 Tuachi’n akiang ua tengte jousiah ahung lauta ua, tualeh hihthu Judea gam singtang jousiahin a lungtang uah agel chiat uh, “Hih naungek bang chibang ahung hitazen diam maw?” chi-in, Toupa khut in amah a ompih hi.

Zakariah genkholhna

67 Apa Zakariah Khasiangthou in ahung dimta a, a genkholh a:

68 “Toupa Israel Pasian phat in om hen!

                        Ajiak aman amite hungveh a a hung tanta hi.”

69 A sila David suante lah ah,

                        hundamna kii ahung siamsakta hi.

70 Leitung pianchil apat Jawlnei

siangthoute kam a anagen mahbang in;

71 I melmate lak a kipan in leh ahung huate

jousiah khut a kipan hundam a i om ding thu.

72 I pu leh pate kiang a zahngaihna achiam

bawl dingin leh a thukhun siangthou theigige dingin.

73 Ipu Abraham kiang a a kichiamna,

74 I melmate lak a pan ahung hutkhiat a,

lauloua a nna iseptheihna ding;

75 I damsung teng a amituh a siangthou leh

diktat tak a om ding in.

76 Tualeh “Naungek, nang,

tungnung pen Jawlnei ahung kichi ding hi.

Ajiak a lampite bawl dingin

Toupa maiah napai ding hi,

77 A khialnate uh ngaihdamna ding a

amite kiang a hundamna theihna pia ding in.

78 I Pasian uh hehpihna nemnou jal in,

tunglam  a kipan nisuak in ahung khohta hi

79 miallak a leh sihna lim nuai a toute tanvak ding leh

khamuanna lampi a i kengte kal suansak ding in,”

achi hi.

80 Tuachi’n naungek a hung khanglian a; a khalam ahung hat hiai hiai a, Israelte kiang a ahung kilak masiah gamdai ah a omjing hi.

Luka 2 

Jesu pianna

(Mat. 1.18-25)

1 Tualeh huahun laiin hichi ahi a, Kaisar Augustus in leitung pumpi minkhum ding thu apia a, 2 (Tualeh hihpen Siria gam a Kurinias gam uktu ahihlai a minkhumna masapen ahi). 3 Tuachi’n mijousiah minkhum dingin amauh khuapi chiat uah apaita ua.

4 Tuachi’n Joseph zong Galili gam a Nazareth khua a kipan in Judea gam a David pianna khuapi Bethlehem ah apaitou a (David innkuan pihte leh akhak asuan a mi ahihjiak in). 5 Mari, azi kham gaisan laitak tawh minkhum dingin apaita a, 6 huasan a aom laitak un a nauneih ahung hunta hi. 7 Tuachi’n ata masa in pasal a neikhiata a, puannem in atuama, zintunna inn amauh a ding in mun a omlouh jiakin gan ankuang sungah asial hi.

Belampute leh vantungmite

8 Tualeh huagam ah belampute a belamte uh ching a jan a gam a giak aom ua.

9 Ngaiin, Toupa vantungmi khat akiang uah ahung kilak a, Toupa thupina in akim uh asalvak a, tuatak in alau mahmah ua, 10 hinanleh vangtungmi in akiang uah, “Laukei unla! Ngaiun, michih a dingin tangthupha kipak huai mahmah nou kungpuak hi.

11 Tuni-in noua dingin david khuapi ah hundampa apiangta, amah Krist Toupa ahi!

12 Tualeh hih nou a dingin chiamtehna ahi ding; naungek puannem a tuam gan an piakna kuang a lum namu ding uhi,” achi a.

13 Thakhat in vangtungmi kiangah van mipite ahung kikhawm ua, Pasian aphat ua:

14 “Tuangnung pen ah Pasian thupi henla,

                        leitung  a kipahpih mahmah

                                    mihingte kiangah lemna leng hen!”

achi uhi.

15 Vantungmite’n amauh van a apaisan tak un, “Tuin Bethlehem khua pha in ipai ding ua, Toupa’n a hunghilh hungtung pen iva en ding uh,” a kichi ua.

16 Tuachi’n apai mengmeng ua, Mari leh Joseph tawh, gan an piakna kuangsung a naungek lum avamu ua,

17 Avamuh tak un a naunegk tanchin vantungmi-in agente agen thangta uhi. 18 Tualeh ajakha jousiahin hih belampute thugen lamdang asachiat uhi. 19 Hinanleh Mari-in hithute jousiah a lungtang ah a vom jing a, a ngaihtuah jingta hi. 20 Tuachi’n belampute’n, a kihilh bang ngeia sil bangkim azak ua amuh jiak un Pasian pahtawi leh phat kawm in a kilehkikta uhi.

Jesu Pasian tempul a kilatna

21 Tualeh a teptanna ding nigiat ahung chin in, amin dingin sul a aom masang a vantungmi in aphuaksa Jesu aphuakta uhi.

Jesu tempul ah

22 Mosi dan dungjui a aki siansuahni uh a hungtun in, Jesuralem khua ah amah avatonpih ua, Toupa mai a alat ding in. 23 Toupa danthu a agelh dungjuiin, “Ta pasal sul hong masa peuhmah Toupa a ding a sehtuam ahi,” achi ding uhi. 24 Tualeh Toupa danthu a kigen dungjui in; vakhu kopkhat hiam, palva nou nih hiam kithoihna a lan ding in.

Simeon kipahthu genna la

25 Tualeh ngaiin, Jesuralem ah pasal kaht amin Simeon kichi a om a; amah ahihleh midiktat leh Pasian ngaihsaktak ahi a, Israelte khamuanna ding a ngakjing a, atung ah Khasiangthou a om hi. 26 Tuachiah Krist Toupa amuh masiah asi kei ding chih Khasiangthou in ana theihsak mawng ahi hi. 27 Tuachi’n Kha theihsak in tempul sung ah avalut a; naungek Jesu anu leh apa in dan ngaina bang a atung a bawlsak dingin ahung zohpih tak un, 28 Aman ana angpom a, Pasian aphat a:

29 “Thuneitu Toupa, Na kamchiamsa bang in,

                        tu in na sila khamuang takin na paisak ding a;

30 Na hundamna ka mit in amuhta’k jiak in,

31 Hua mijousiah muh a na bawl pen;

32 Jentelte kiang a kilakna vak leh nami Israelte thupina dingin,”

achi hi.

33 Tualeh naungek tungtang thu agen anu leh a pan lamdang asa mahmah ua. 34 Tuachi’n Simeon in amauh agualjawl a, anu Mari kiangah ngaiin,”Hih naupang Israelte lak a mi tampi pukna ding leh dinkhiatna ding a she ahi, gensiat a om ding chiamtehna ding ahi. 35 ahi, nangmah ngei lungtang zong namsau in asun pailet ding a, tuachia mi tampite lungtang a ngaihtuahnate akilat theihna dingin,” achi hi.

Anna kipahthu genna

36 Tualeh Asher nam a mi, Phanuel tanu, Anna kichi numei Jawlnei khat a om a; amahnu teksia ahita a, akiten zoh uh kum sagih a pasal kiangah a om a, 37 tuachi’n amahnu meithai kum sawmgiat leh li hial ahi a, Pasian tempul paisan louin sun leh jan in annngawl kawm a thum in Pasian abia jel hi. 38 Tualeh huachih laitak in amah a hung pai a, Pasian kiangah kipahthu agen a, Jerusalem tatna lam en jousian kiangah Jesu tanchn agen hi.

Nazareth a kilehkikna

39 Tuachia Joseph leh Mari-in Toupa dan dungjui a siljousiah a bawlzoh un Galili gam ah amuh khua mah Nazareth ah a kilehkikta uhi. 40 Tuachi’n naungek hung khang in khalam ah a hung hatta a, pilna in ahung dimta a, Pasian hehpihna atung ah aom hi.

Naungek Jesu tempul ah

41 Tualeh kum teng in paikan kut hun in anu leh apa Jerusalem ah a hawhjel ua. 42 Tualeh amah kum sawmlehnih ahih lai in dan dungjuiin ankuang luina ah a hawhtou ua. 43 Tualeh ankuang lui khit a a kilehkik lai un, naupang Jesu’n Jerusalem ah a omsan a, hinanleh anu leh apa in ahtei kei uhi; 44 tuachi’n apawllak uah om hinanteh achi ua, nikhat lam a paikhinta ua, a sanggam lah uleh ameltheih lah uh azong ua. 45 Tuachia mauh louh tak un amah zong kawm kawm in Jesuralem ah aki nungleh kik ta uhi. 46 Tualeh hichi ahi a, nithum nung in  Pasian tempul sung ah siate lak a tou a, athugen uh ngaikhia leh, amauh thu doing a om ava muta ua. 47 Tualeh athu jataphot in a theihdan leh a dawndan lamdang asa mahmah uhi. 48 Anu leh apa in amuh tak un lamdang asa mahmah ua, anu in akiang ah, “Tapa bangding a hichi bang a hungbawl na hia? En-in napa leh ken lunghimoh takin kung zong uhi,” achi hi.

49 Tuatakin aman akiang uah, “Bang ding a hungzong nahi ua? Ka pa inn a om ding ka hi chih theilou nahi uh hiam?” achi hi. 50 Hinanleh amau’n akiang ua a thugen atheisiam kei uhi.

51 Tuachi’n amauh ajuisuk a, Nazareth khua a hungtung ua, athu uh mang in aom a, hinanleh anu in hih sil kigen jousiah a lungtang ah avom gige hi. 52 Tuachi’n Jesu pilna ah leh taksa ah ahung khanglian deuhdeuh a, Pasian leh mihing deihsak in a hung om deuhdeuh ta hi.

Luka 3

Baptispa Johan in lampi sial

(Mat.3.1-12; Mrk. 1.1-8; Jhn.1.19-28)

1 Tiberia Kaisar vaihawm kum sawmlehnga kum in Pontia Pilat Judea gam vaihawmtu ahi a, Herod Galili gm kumpipa ahi a, a sanggampa Philip Ituria leh Trakonotis kumpipa ahi a, tualeh Lisanias ahihleh Abilene gam kumpipa ahi a, 2 Annas Kaiapha siampi ahi ua, huahun laiin gamdai a om Zakariah tapa Johan kiangah Pasian thu a hungtung hi. 3 Tuachi’n amah Jordan luikim gam jousiah ah apai a, khialhnate nagihdamna ding kisilna baptisma thu agen a. 4 Jawlnei Isaiah laibu a:

            “Gamdai a kikou aw khat in;

            “Toupa lampi sial unla;

            A lampite tangsak un!

5 Guamte sukdim ahi ding a,

mual leh tangte sukngiam ahi ding;

                        tualeh mun kawite suktang ahi ding a,

                                    lampi pholte suknam ahi ding.

     6 Tuachi’n mijousiahin Pasian

                        Hundamna amu ding uhi chia

                        Kigelh bang in!”

Mipite kiangah Johan in thu agen hi

7 Tuachi’n aman akiang a baptisma tang ding a hungpai mipite kiangah, “Nou gul suante aw! Pasian thangpaihna hungtung ding a kipan suakta ding a kuan nou hung taihilh ahia? 8 Tuajiakin kisikna ching gah hungnei masa phot un, tualeh Abraham kapu uh ahi chi’n na lungsim un ngaihtuah kei un, ajiak Pasian in hih suangtangte Abraham tate in a dingsakthei hi! 9 Tu mahmah in singbul chin ah hei koihkhit ahita. Tuajiakin singkung gahhoih neilou jousiah phuk in mei lak ah apaijel uh,” achi hi.

10 Tuachi’n mipite’n akiang ah, “A tuachihleh kou bang kabawl ta ding ua le?” chi’n a dong ua.

11 Aman adawng a akiang uah, “Kuapeuh puan ak nih nei in aneiloupa hawm hen, tualeh kuapeuh an nei in tuachimah bang in bawl hen,” achi hi.

12 Tuachi’n siah dongpa zong baptisma tang ding in a hungpai a, akiang ah, “Siapa, kou bang ka bawl ding ua?” achi a.

13 Tuachi’n aman a kaing ah, “Nang ding a ahung bikhiahzah val siah dong nawnken,” achi hi.

14 Tuachimah bang in galkapte’n zong a kaingah, “Tualeh kou bang ka bawl ding ua?” chi’n adong ua.

Tuachi’n aman akiang uah, “Kuamah vaulau kei un, ahihkeileh diklou pi-in ngoh kei un. Na nitha uh tawh lungkim un,” achi hi.

15 Mipite’n lam etna aneih ua, Johan tung thu a a lungtang ua Krista hi kha dia aw, ahikei dia aw, chia a ngaihsut lai un, 16 Johan in adawng a akiang uah, “Ken tui in noute kung baptis ngei ngut a, hinanleh kei sang a hatjaw leh thupijaw khat a hungpai hi, a khedap khau sutding in zong ka chingkei, aman Khasiangthou leh mei in ahung baptis ding, achi hi. 17 A phikphek akhut ah atawi a, aman abuh phual hoihtakin japsiang kilkel ding a, buhtakte a anbuk ah a koihkhawm ding a, hinanleh buhkhemte pen mei mittheilou tawh ahal ding hi.”

18 Tualeh hasotna thu tampi mipite kiangah agen hi. 19 Hinanleh kumpipa Herod, a sanggampa Philip zi Herodia jiak leh asil gilou bawlte jiakin Johan in aphawk jiakin.

20 Tualeh atung a te tengteng behlap in Johan thong ah akhumta hi.

Johan in Jesu a baptisna

(Mat. 3.13-17; Mrk.1.9-11)

21 Tuachia mi tengteng a baptis zoh in, hichi ahung hi a, Jesu’n zong baptisma a tangta a; tualeh athum laiin van ahung kihong a, 22 Khasiangthou vakhu bang a taksa a om in hung kumsuk in atung ah ahung tuang a. Tualeh van a pan in aw khat a hungsuak a, “Nang  ka tapa deihtak nahi, na tungah ka kipak mahmah hi,” achi hi.

Jesu khanggui thu

(Mat. 1.1-17)

23 Jesu’n thugen a pat chil in amah kum sawmthum vel ahita a, mi ngaih dan in Joseph tapa ahi a, hua pen Heli tapa ahi a, 24 hua pen Mathat tapa ahi a, huapen Levi tapa ahi a, huapen Mekhi tapa hi a, huapen Jannai tapa ahi a, huapen Joseph tapa ahi a, 25 huapen Mattathiah tapa ahi a, huapen Amos tapa ahi a, huapen Nahum tapa ahi a, huapen Esli tapa ahi a, huapen Naggai tapa ahi a, 26 huapen Maath tapa ahi a, huapen Mattathiah tapa ahi a, huapen Semei tapa ahi a, huapen Joseph tapa ahi a, huapen Judah tapa ahi a, 27 huapen Joanna tapa ahia, huapen Rhesa tapa ahi a, huapen Zerubbabel tapa ahi a, huapen Shealtiel tapa ahi a, huapen Neri tapa ahi a, huapen Melkhi tapa ahi a, huapen Addi tapa hi a, huapen Kosam tapa ahi a, huapen Elmodam tapa ahi a, huapen Er tapa ahi a, 29 huapen Joshua tapa ahi a, huapen Eliezer tapa ahi a, huapen Jorim tapa ahi a, huapen Matthat tapa ahi a, huapen Levi tapa ahi a, 30 huapen Simeon tapa ahi a, huapen Judah tapa ahi a, huapen Joseph tapa ahi a, huapen Jonam tapa ahi a, huapen Eliakim tapa ahi a, 31 huapen Melea tapa ahi a, huapen menam tapa ahi a, huapen Menan tapa ahi a, huapen Matthat tapa ahi a, huapen Nathan tapa ahi a, huapen David tapa ahi a, 32 huapen Jessai tapa ahi a, huapen Obed tapa ahi a, huapen Boaz tapa ahi a, huapen Salmon tapa ahi a, huapen Nahshon tapa ahi a, 33Amminabad tapa ahi a, huapen Ram tapa ahi a, huapen Hezron tapa ahi a, huapen Perez tapa ahi a, huapen Judah tapa ahi a, 34 huapen Jakob tapa ahi a,huapen Isak tapa ahi a, huapen Abraham tapa ahi a, huapen Terah tapa ahi a, huapen Nabor tapa ahi a, 35 huapen Seruk tapa ahi a, huapen Reu tapa ahi a, huapen Peleg tapa ahi a, huapen Eber tapa ahi a, huapen Shelah tapa ahi a, 36 huapen Kainan tapa ahi a, huapen Arphasad tapa ahi a, huapen Shem tapa ahi a, huapen Noah tapa ahi a, huapen Lamek tapa ahi a, 37 huapen Mathuselah tapa ahi a, huapen Enok tapa ahi a, huapen Jared tapa ahi a, huapen maharlalel tapa ahi a, huapen Kainan tapa ahi a, 38 huapen Enosh tapa ahi a, huapen Seth tapa ahi a, huapen Adam tapa ahi a, huapen Pasian tapa ahi.

Luka 4

Jesu khem a omna

(Mat.4.1-11; Mrk.1.12,13)

1 Tuachi’n Jesu pen Khasiangthou a dim in Jordan lui apat in akileh kik a gamdai ah kha puiin a om a. 2 Ni sawmli sung setan khem in a omta a, tualeh huanite in bangmah ane kei a, atawp in agil ahung kialta hi. 3 Setan in a kaingah, “Nang, Pasian Tapa nahihleh hih suang tanghou suak ding in thu piin,” achi a.

4 “Hinanleh Jesu’n, ‘Mihing tanghou guak in ahing kei ding a, Pasian kam a thuchin pawt in ahingjaw ding, chih gelh ahi,’ chi’n adawng hi.

5 Tuachi’n setan in mualsang tung ah a paipihtou a, tomnou khat sung in leitung kumpi gam jousiah a ensak a. 6 Tualeh akiang ah,”Hih tengteng tung a thuneihna leh athupina kung pia ding, ka kiang a piak ahihtak jiakin, ka piaknuam taphot kiangah ka piajel hi. 7 Tuajiakin kei nungbiak leh aun in nang a ahi ding,” achi a,

8 Jesu’n adawng a akiang ah, ”Ka nunglam ah om in setan; Toupa na Pasian nabia ding a; ama nna guak nasep ding ahi, chih gelh ahi!’ “ achi hi.

9 Tuachi’n setan in Jerusalem ah apaipih a, tempul tungvum ah akoih a, akiang ah, “Nang, Pasian Tapa nahihleh hihsan a pan in kekhiasuk in. 10 ‘Aman nang hung humbit dingin a vantungmite thu apia ding a.’ 11 ‘Tuachi’n amau’n akhut un ahung nadom ding uh; atuachih keileh na keng in suang nasuihkha ding, chih gelh ahi,’ achi a.

12 “Hinanleh Jesu’n adawng a aking ah, ‘Toupa na Pasian ze-et ken, chih ahi,’” achi hi.

13 Tuachia setan in akhemna ding teng a akhemzoh in ahun lemtang a ding in apaisanta hi.

Nazareth ah Jesu’n nasep apan

(Mat.4.12-17; Mrk.1.14,15)

14 Tuachi’n Jesu Kha silbawltheihna neiin Galili gam ah akileh kikta a; tualeh a tanchin hua gamkim jousiah ah athang suak ta hi. 15 Tuachi’n kikhopna inn ah thu ahilhjel a, mijousiah pahtawi in a omta hi.

Nazareth ah Jesu adeih kei uh

(Mat.13.53-58; Mrk.6.1-6)

16 Tualeh akhanletna khua Nazareth a hungtungta a; a bawldan ngaina bang in khawlni-in kikhopna inn ah alut a sim dingin adding a. 17 Tuachi’n a kaingah Jawlnei Isaiah laibu apia ua, tuachi’n aman tua laibu aphel a, hihthu kigelhna santak amu a:

18 “Mi gentheite kiang a tangthupha gen ding a nungsawl jiakin,

                        Toupa Kha ka tung ah a om hi.

            Aman lungtang khasiate damask ding leh,

                  Saltangte kiang a suahtakna thu leh

                        Mittawte kiang a mitvak neihkikna thu leh bawlsiat

                        Thuakte pawtsakna ding

            19 Toupa lungkim kum thug en ding in a hungsawl hi,”

chih.

            20 Tuachi’n laibu ajial a, nna sepsakpa kiangah a piakik a atouta hi. Tualeh kikhopna inn a om jousiah mit a tung ah atuta hi. 21 Tuatakin aman akiang uah, “Tuni in hih Pasian Laisiangthou thu najak un a tangtungta hi,” achi hi.

            22 Tuachi’n mijousiahin athu atheihpih ua, akam a pawt hehpihna thute lamdang asa mahmah uhi. Tualeh amau’n, “Hihpa Joseph tapa hilou amaw le?” achi uhi,

23 Tualeh aman akiang uah, “Nou hih thupil, ‘daktor, nang leh nang ki damask in,’ Kapernaum khua a na silbawl ka najak jousiah uh, hiah nangma khua lam ah zong bawl in, nungchi ngei ding uhi, achi hi. 24 Tuachiang in aman, Adiktak in kung hilh ahi, Jawlnei kuamah amah khualam ah kipahpih in a omngai kei.” 25 Hinanleh thutak kung hilh ahi: “Elijah damlai a kum thum leh khaguk van akikhak a leitung pumpi a kial nasatak atunlai in Israel gam ah meithai tampi a om uhi. 26 Hinanleh Sidon gam a Sarepta khua a meithainu khat kiang ah chihlouh alak ua kuamah kiang ah Elijah sawl ahi kei hi. 27 Tualeh Jawlnei elisa damlaiin Israel gam ah phak tampi aom uh, hinanleh Sireami Naaman chihlouh kuamah suksiangthou in aom kei uh,” achi hi.

            28 Tualeh kikhopna inn a omten hihthu ajak tak un aheh mahmah ua, 29 Tuachi’n a dingdok ua, amah khua a kipan in adelhdok ua, akhua gei kawl a sawnkhiat ding in apaipihta uhi. 30 Hinanleh amahpen mipite kawmkal ah akigelkhia a a paimangta hi.

Dawinin pai damsakna

(Mrk.1.21-28)

            31 Tuachi’n Galili gam a khua khat Kapernaum ah ahung paisuk a, khawlni-in amauh thu ahilh hi. 32 Tualeh thunei tak a agen jiakin a thuhilhdan lamdang asa mahmah uhi.

            33 Tualeh kikhopna inn sung ah dawiniin pai mi khat a om a, aw ngaihtakin akikou khia a, 34 “Kou guak in hung omsak in; Nazareth Jesu? Nang kua na hiam chih kungthei hi, Pasian Misiangthou na hi!” achi hi.

            35 Tuatakin Jesu’n atai a, “Dai inla, asung a apat in hungpawt in!” achi a. Tuachi’n dawi in amah alai ua apuksak zoh in amah liamsak louin asung a pat in ahung pawtdok hi.

            36 Tuatakin aun un lamdang asa mahmah ua, “Hih bangthu ahi a le? Thuneitak leh silbawlthei takin dawininte thu apia a, apawt uh!” chi in akihou ua. 37 Tuachi’n huakim gam munchin ah a tanchin athangta hi.

Simon sungnu leh midangte damsakna

(Mat.8.14-17; Mrk.1.29-34)

            38 Tuachi’n amah kikhopna inn a pan a pawtkhia a, Simon inn ah apaita hi. Tualeh Simon sungnu nasatak in ana nattun a; tuajiakin amah a dingin ana ngetsak ua. 39 Tuachi’n Jesu amahnu geiah adding a, a nattun atai a, tuachi’n aphata hi; amahnu zong kintakin ahung thoukhia a, ana uh asepsak ta hi.

      40 Tualeh nitumkuan ahunghih in natna tuamtuam a damlou nei jousiahin a kaingah ahung paipih ua; tuachi’n aman atung chiat uah akhut anga a, a damsakta hi. 41 Tualeh dawininte zong, “Nang Krist, Pasian Tapa nahi, chia kikou in mi tampite sung a pat ahung pawtdok uhi!”

            Tuachi’n aman amauhte atai a, aham ding uh aphal kei hi; ajiak Krista hi chih athei uhi.

Jesu’n kikhopna inn ah thu agen

(Mrk.1.35-39)

            42 Tuachi’n khua ahung vak in, apawt a gamdai mun ah apaita a, mipite’n amah a zong ua, a kiangah ahungpai ua, amauh apaisan louhna ding un tuk asawm ua. 43 Hinanleh aman akiang uah, “Khua dang ah zong Pasian gam tangthupha ka gen ding ahi; hua ding a sawl kahihman in,: achi hi.

            44 Tuachi’n Galili gam a kikhopna innte ah athupuak ahilhjel hi.

Luka 5

Jesu’n nungjui masate asapna

(Mat.4.18-22; Mrk.1.16-20)

            1 Nikhat mipite’n Pasian thu ngai ding a aboh huthut laiun, Jesu Gennesaret nawng geiah adding a. 2 Nawng geiah gunkuang nih om amu a; hinanleh ngaman mite a gunkuang uh nusia a a ngente uh sawp in aom ua. 3 Tuachi’n gunkuang lak a khat, Simon a pen ah atuan a, piaugei a pat themkhat kitawl deuh dingin a ngen a, tuachi’n gunkuang lak a khat, Simon a pen ah atuang a, piaugei a pat themkhat kitawl deuh dingin a ngen a, tuachi’n atou a, mipite gunkuang sung a pat in thu ahilhta hi.

            4 Tualeh a thugen zoh in Simon kiangah, “Lithuklam naih unla nga man dingin na ngente uh khuh um,” achi a

            5 Simon in adawng a akiang ah, “Siapa, jankhuavak in gimtak in ka pang ua, bangmah ka mankei uhi; hinanleh na thu in ngen ka khuh ding,” achi hi. 6 Tualeh hih abawl jawh un ga tampi akhuhkha ua; a ngen uh akek diakdiak a. 7 Tuatakin gunkuang dang a tou alawite uh hungpai a panpih dingin akhut ajap a, amauh zong ahungpai ua, gunkuang tegel a sungdim ua, tuachi’n tum dingin akisahial ta hi. 8 Simon Peter in hih a muhtak in, Jesu kengbul ah khupbok in, “Toupa! Hung paisan in, mikhial ka hi!” achi hi.

            9 A ngamat uh amah leh alawite’n lamdang asak mahmah jiak un. 10 Tualeh Simon kithuahpih Zebedi tate Jakob leh Johan in zong lamdang asa uhi. Tuachi’n Jesu’n Simon kiangah, “Lauken; tu a pat in mihing naman ta ding,” achi hi

            11 Tuachi’n a gunkuangte uh luipiau a ahung tawldok zoh un, bangkim anusia ua amah ajuita uhi.

Phak khat damsakna

(Mat. 8.1-4; Mrk. 1.40-45)

            12 Tualeh hichi ahung hi a, khuakhat a aom lai in, ngaiin, mikhat apumtang a phak in atuam aom a; Jesu amuhtak in amaiah a khupbok a, “Toupa, na ut leh nung siangsakthei hi!” chin a ngen a.

            13 Tuatakin Jesu’n akhut a tungah akoih a, “Ka ut hi,” “Siangthouta in!” achi a. Tuachi’n manlang takin aphakna in ama anusia ta hi. 14 Tualeh aman, “Kuamah hilh ken, hinanleh pai inla siampute kiangah vakilak in; amauhte theihsakna dingin Mosi thupiak bang in kisiansuahna dingin sil valan in,” achi hi.

            15 Hinanleh a tanchin athang nasa jawsem a; tualeh mipi tamktak athu ngaikhia ding leh a natnate uh ki hihdamsak dingin a hungpai uhi. 16 Tuachi’n amah gamdai ah paituam a athumta hi.

Jesu’n jeng khat damask

(Mat. 9.1-8; Mrk.2.1 -12)

            17 Tualeh nikhat hichi ahung hi a, thu ahilhlai in, Galili leh Judea gam khuachin leh Jerusalem a kipan-a hungpai Pharisaite leh dansiamte a kiangah atou ua, amauh damsakna dingin Toupa hihdam theihna akiang uah a om a. 18 Tualeh ngaiin, mi’n jeng khat lupna in ahung jawng ua; tualeh amah a jawnglut theihna ding leh a koihtheihna ding a ngaihtuah ua. 19 Hinanleh mipi jiakin jawnglut theih nang amu kei ua inntung ah akahtou ua, inntung phetvang in alaitak a Jesu maiah alupna tawh a khaikhia suk uhi. 20 Tualeh aman aginna uh amuhtak in a kiangah, mihing na khialhnate ngaihdam ahita hi, achi hi

            21 Tuachi’n Laigelhmite leh Pharisaite’n. “Pasian gensia hihpa kua ahia! Pasian guak loungal kuan ahia hih khialhna ngaidam thei!” chi in a ngaihtuah ua.

            22 Hinanleh Jesu’n angaituah uh athei a akiang uah, Bang ahia na lungtang ua na ngaihtuah uh? 23 Na khialnate uh ngaihdam ahita,’ chih khoipen abaihlam jaw ei? Achi a

24 Mihing Tapa in leitung ah khialh ngaidam theihna anei hi, chih na theihna ding un,” jeng a damloupa kiangah, “Thou inla na lupna la inla, na inn ah paita in kungchi ahi!” achi a.

            25 Tuachi’n amah a thoutoupai a, alupbna la-in Pasian phat kawn in a innlam ah apaita hi. 26 Tuatakin amuhte’n aun un lamdang asa mahmah ua, Pasian a phat ua, “Tualeh tuni’n sillamdang takmai imu uh chi’, alau mahmah uhi!”

Jesu’n Levi asapna

(Mat.9.9-13; Mrk.2.13-17)

            27 Tualeh hih silte tengteng zoh in apawt khia a, siah dawnna zum a tou amin Levi kichi siah dawngtu khat amu a; a kiangah, “Hung juiin,” achi a. 28 Tuachi’n aman bangkim nusia in dingtou in anung ajuita hi.

            29 Tuachi’n Levi in a inn ah Jesu a dingin annkuang luina thupitak anei a, hua ah siah dongtute tampi leh midang tampite’n a ankuang uh a umpih uhi. 30 Hinanleh a Laigelhmite uleh Pharisaite a nungjuite tung ah aphun ua, “Bangding a siah dongte leh mikhialte tawh ne a dawnkawm nahi ua?” achi ua

            31 Tuatakin Jesu’n a dawng a akiang uah, “Mi chidamte’n daktor a poimoh kei ua, mi chinate’n a poimoh jaw uhi. 32 Midiktatte sam ding a hungpai ka hikei a, mikhialte sam a kisiksak ding a hungpai ka hijaw hi,” achi hi.

Anngawl thu a dokna

(Mat.9.14-17; Mrk 2.18-22)

            33 Tualeh amauhte’n a kiangah, “Bangding a Johan nungjuite’n anngawl jel uh a, thumna aneijel ua, tualeh Pharisaite nungjuite’n zong huachimah bang in abawl ua, hinanleh nang nungjuite’n ne a dawn ahi ua,” achi ua.

            34 Tuachi’n Jesu’n akiang uah, “Moupuite kiang a mouneipa a om laiin moupuite an na ngawlsak ngai uai le? 35 Hinanleh alak ua pat mouneipa lakmang hun ahung tung ding a, huani chiangin a ngawl ding uh,” achi hi.

            36 Tuahi’n aman akiang uah, gentehna thu zong agen a, “Kuaman puanthak in puanlui aphawh ngaikei; phawhta henla hileh anih in akek ding a, tualeh athak them pen alui tawh akituak kei ding hi. 37 Tualeh kuaman uain thak sasvun thawllui ah akoih ngaikei, koihta henla hileh uainthak in savun thawlluipen apokjak sak ding a, a kibua ding, tualeh athoi zong asia siang ding hi. 38 Hinanleh uainthak pen savun thawlthak a koih ding ahi, tuachi’n anih un abit ding uh! achi hi. 39 Mi kuaman uain lui adawn zoh nung un athak a duhpai ngaikei uh; “Aluimah limjaw,’ achi uhi.”

Luka 6

Khawlni tan thua dokna

(Mat. 12.1-8; Mrk. 2.23-28)

       1 Tualeh hichi ahung hi a, kawlni khat in buhleilai tuan in apaisuak a, a nungjuite’n buhvui asiktan ua, akhut ua nuaisiang in ane ua. 2 Tualeh Pharisai kuate hiam in a kiangah, “Bangding a khawlni a bawl sianglou na bawl uh ahia?” achi ua.

            3 Tuachi’n Jesu’n adawng a, “David in agilkial laia asilbawl uh sim khalou nahi uh maw?

4 Tuachia Pasian inn a alut a, siampite loungal nek sianglou tanghou alak a, anek a tualeh alawite kiang a zong apiakthu,” achi hi.

            5 Tualeh aman akiang uah, “Mihing Tapa hi khawlni Toupa ahi,” achi hi.

Khutjaw damsakna

(Mat.12.9-14; Mrk.3.1-6)

            6 Tualeh hichi ahung hi a, khawlni dang in kikhopna inn ah alut a, thu ahilh a, tualeh huasan ah mi khat khut jiatlam jeng ana om a. 7 Tuachi’n Laigelhmite leh Pharisaite’n ahekna ding a muhtheihna ding un, khawlni a a damsakleh a damsaklouh adap et ua. 8 Hinanleh aman a ngaihtuah uh athei a, khutjawpna kiangah, “Thou inla alai ah dingdok in,” achi a, tuachi’n amah athou a, a dingdokta hi. 9 Tuachi’n Jesu’n akiang uah, “Silkhat kung dong ding hi, khawlni a silhoih bawl ahia asiang sil hoihlou? Hundam ahia asaing hihlup?” 10 Tuachi’n akim a omte jousiah a en kawikawi a, khutjawpa kiangah, “Na khut zandok in,” achia. Tuatakin aman azan a; akhut langkhat bang in adamta hi.

            11 Tuatakin amauh ahehta mahmah ua, Jesu tung a abawl dan ding uh khat leh khat kihouta uhi.

Nungjui sawmlehnihte telna

(Mat.12.9-14; Mrk.3.1-6)

            12 Tualeh huahun laiin hichi ahung h I a, mual ah thum dingin apai a, Pasian kiangah jan khuavak in athum hi. 13 Tualeh khua ahung vak takin a nungjuite asam a; alak ua pat sawmlehnih atel a, amin uh zong sawltakte ahisak hi. 14 Simon (aman Peter zong achih) leh a sanggampa Andru, Jakob leh Johan, Philip leh Bartholomai; 15 Mathai leh thoma, Alphai tapa Jakob, tualeh Simon (Zealot achih uh,) 16 Tualeh Jakob sangampa Juda, tualeh a mansakpa Juda Iskariot ahi uhi.

Jesu thuhilhna leh damsakna

(Mat.4.23-25)

            17 Tuachi’n amauh tawh a kitonsuk a, munjang ah adding a, a nungjuite mi tampi leh Judea gam pumpi leh Jerusalem a kipan leh Tura leh Sidon lam a tuipi geia kipan mipi tampitak tawh, huate pen a thugen ngai ding leh a damlouh nate uh damask ut in a hungpai ua. 18 Tualeh khanin bawl gentheihte zong a hungpai ua a damsiangta uhi. 19 Tualeh amah a kipan-a sil bawltheihna pawtkhia a miteng adamsak jel jiakin mipite’n aun un amah khoih atum uhi.

                        Hamphatnate leh tunggikna

                                    (Mat.5.1 -12)

            20 Tuachi’n a dakkhia a, a nungjuite en in agen a,

                        “Nou migentheite na hampha uhi;

                                    van gam nou a ahihjiak in!

            21 “Nou tu a gilkialte na hampha uhi;

                                    tai ding nahihjiak un!”

                        “Nou tu a kapte aw, na hampha uhi;

                                    nui ding nahihjiak un!”

            22 Mihing Tapa jiak a mi’n ahung huat ua ahung pampaih ua, ahung phawk ua namin uh ahoihkei chia ahung paihmang chiang un, na hampha uhi! 23 Hih ni-in kipak unla nuam in kidiang un, ngaiun, van ah na nuamman uh athupi jiakin. Huachi mah bang in napu napate un Jawlneite ana bawl uhi.

            24 “Hinanleh nou mihausate tung agik hi;

                        na khamuanna uh namuhtak jiak un!”

            25 “Nou, tu a vahte aw, natung uh agik hi;

                        nagil uh hungkial ding ahihjiak in!”

            “Nou tu a nuite aw, natung uh agik hi;

                        lungkham a kap ding nahihjiak un!”

            26 “Mijousiahin a hungphat chiang un natung uh agik hi;

                        ajiak huachimah bang in apu apate un Jawlnei takloute tung ah ana bawl uhi.”

Melmate it ding

(Mat.5.38 -48; 7.12)

            27 “Hinanleh nou ka thu ngaikhiate kiangah kung hilh ahi: Na melmate uh it unla, ahung mudahte limbawl un. 28 A hung hamsiatte vangbuak unla, ahung simmohte thumsak un.

29 Na pheta hung beksaktu kiangah alang khat zon doh in, tualeh na puantual uh hung laksaktu kiangah na puan-ak uh zong it kei un. 30 Na kiang a hung ngen jousiah kiangah ngenkik nawn kei un. 31 Tualeh mi’n natung ua silhoih abawl ding nadeih bang un, n ou zong amauh tung ah bawl un.

            32 “Hinanleh nou hung itte guak na it uleh, pahtakna bang nalawh ding ua? Mikhial tenzong amauh itte a it uhi! 33 Tualeh natung ua hoihte tung guak a nahoih uleh pahtakna bang nalawh ding ua? Mikhial ten zong huachi bang in abawl uhi. 34 Tualeh muhkik na kinepna kiang guak a na batlaksak uleh pahtakna bang nalawh ding ua? Mikhialte’n zong azahmah mukik dingin mikhialte kiangah a batlaksak uhi! 35 Hinanleh nou na melmate uh it unla, hoih bawl un, bangmah muhkik kinem louin batlaksak un. Tuachi’n na nuamman uh a thupi ding a, Tungnungpen tate na hi ding uhi; aman mi kipakdan theiloute leh mikhialte ahehpih hi. 36 Huajiakin napa uh mihehpih asiam mah bang in nou zong mihehpih siam un.

Midangte tungtang vaihawmna thu

(Mat. 7.1-5)

            37 “Thu khen kei un, tuachi’n thu khensak in na omkei ding uh, mohpaih kei un, tuachi’n mohpaih in na omkei ding uh. Tualeh ngaihdam un tuachi’n ngaihdam in na om ding uhi. 38 Pia un, tuachi’n piak in na om ding ugh, sawndet in, hentaak in, tualeh letjen in na angsung uah piak in na om ding uhi. Nou mauh tehna mah in tehsak in na om ding uhi.”

            39 Tualeh aman akiang uah gentehna thu khat agen a, “Mittaw in mittaw khat a lamkaih theih ding maw? Anih un kuakhuk ah kiakhawn talou ding uh maw? 40 Nungjuimi pen a siapa tung ah aom ngaikei, hinanleh mi hoihtak a sinsak zoh chiangin asiapa bang in a omthei hi.

            41 “Tualeh bangding a nangma mit a singtun om mulou a, na sanggampa mit a ninthem om mu na hia? 42 Nangma mit a singtun om mulou pia na sanggampa kiang a, ‘Sanggampa na mit a ninthem om hung laksak ning,’ bangchia na chih ahia? Nang milepchiah! Namit a singtun om pen lakhia masa inla, tuahileh na sanggampa mit a ninthem om lakkhiat ding chiantak in na muthei ding hi.

Singkung leh agahte

(Mat.7.16-20; 12.33-35)

            43 “Ajiak ahihleh sing hoih agah asia ngai kei a, tualeh singsia zong gahhoih in angahnai kei hi. 44 Singchih agah ah kithei ahi. Ajiak mi’n lingkung ah theipi alou ngai kei ua, tualeh lingnawk lak ah zong grep alou ngai kei uhi. 45 Mihoih in alungtang goubawm hoih a kipaninsilhoih ahung suahkhia a, tualeh migilou in a lungtang goubawm sia a kipanin sil hoihlou ahung suahkhia hel hi. Bangjiakin ahia ichihleh lungtang a dimlette akam in ahung gen hi.

Innlam nihte

(Mat.7.24 - 27)

            46 “Tualeh noute’n ka gen bawllou pia bangding a, “Toupa’ hungchi nahi ua? 47 Kuahileh ka kiang a hungpai a, ka thugente ja a, tualeh juite bang chibang mi ahi ua kung ensak ding; 48 Amauhte pen innlampi thuktak tou a suangpi tung a suangphum lem tawh kibang ahi; tuachi’n tui ahung khang a tui hat in tua inn ahung khoh a ahihling jou kei, dettak a lam ahihjiak in. 49 Hinanleh za-ngal a juiloute pen suang phum loua, leitung maimai a innlam tawh kibang ahi; huapen tui hat in ahung khoh a, apukpai hi, tualeh hua inn siatdan anasia hi, achi hi!”

Galkap zalamkai silapa damsakna

(Mat.8.5-13)

            1 Tualeh mipite jak a athugen tengteng azohkhit in Kapernaum khua ah alut a 2 Tualeh galkap zalamkai kuahiam sila deihtak achi ana a, asi dekdek a. 3 Tuachi’n aman Jesu tanchin ajaktak in, akiang ah a hungpai a, a silapa damsak ding a ngen ding in Juda upate a kiangah asawl a. 4 Tuachi’n amauhte Jesu kiang avatun un, “Amah hi bawlsak taka hi. 5 Ajiak ahihleh aman I mi nam uh a it a, tualeh ka kikhopna inn uh zong ama hung lamsak ahi,” chi’n hoihtak in a ngen ua. 6 Tuachi’n Jesu amauh tawh a hungpaita a, tualeh inn a pat gamlalou ahungtun in, tua galkap zalamkaipa’n a lawmte a kiangah asawl a, “Toupa, kigimsak nuam dah main, ajiak ka innsung na lutna tak ahikei hi, 7 tuajiakin kei zong na kiang a paitak in ka kingaihsun kei a, athu in genlechin ka silapa dammai ding ahi. Ajiak kei zong mi thunuai a om ka hi a, ka nuaiah zong galkapte a omsawn a. Khat kiangah, ‘Pai in!’ ka chihleh a pai a, adang khat kiang ah, ‘Hung pai in!’ ka chihleh a hungpai a, tualeh ka silapa kiangah, ‘Hih bawl in!’ ka chihleh a bawljel,” achi hi.

            9 Jesu’n hihthute ajak takin amah lamdang asa mahmah a, a kinunghei a mipi amah juite kiang ah, na kiang uah kung hilh ahi, “Israelte lak ah zong hizahta a ginna lian ka mukha kei hi achi hi!”

            10 Tuachi’n hua amisawlte innlam ah apaikik ua, sila damlou a ompa pen dam in amuta uhi.

Jesu’n meithainu tapa a kaihthohna

            11 Tualeh huakhit in hichi ahung hi a, amah Nain khua kichi khat ah apaia, tualeh a nungjuite leh mi tamtak in ajui ua. 12 Khuapi kongkhak gei a hungtun in, ngaiin misi khat ahung jawngdok ua, anu tapa neihsun ahi a, amahnu meithai ahi a, tualeh hua khua a mipi tampitak akiang ah aom uhi. 13 Tualeh Toupa’n amahnu amuhtak in ahehpih mahmah a, tuachi’n a kiangah, “Kap ken,” achi a. 14 Tuachi’n a hungpai a, akuang honsa akhoih a, tuatakin ajawngtute adinkhawl uhi. Tuachi’n aman, “Tangval! Thou in, kungchi ahi!” achi a. 15 Tuatakin hua misi pen ahung thoukhia a, ahung hamta hi; tuachi’n aman amah anu kiangah a piakhiata hi.

            16 Tuatakin mi jousiah ahung lauta ua, Pasian apahtawita ua, “I lak uah Jawlnei thupitak ahun suakta!” Tualeh “Pasian in amite ahung vehta hi!” achi uhi.

            17 Tualeh hih a tungtang thu pen Judea gam pumpi leh akim akiang a gamjosiah ah a thangsuakta hi.

Baptispa Johan pan a kamtaite

(Mat.11.2-19)

            18 Tualeh Johan nungjuite’n hihthu jousiah amah avahilh ua. 19 Tuatakin Johan in a nungjuite lak a minih asam a, Jesu kiangah asawl a, “Hung paidingpa nahi hiam? Ahihkeileh midang na hungaihlai ding ka hi uh hiam?” chi in.

            20 Tualeh akiang a hungtun un, “Baptispa Johan in ahung paidingpa nahihiam? Ahihkeileh midang hungaih lailai ding ka hi uh hiam?” chia na kiang a ahung sawl ka hi uh, achi ua.

            21 Tualeh hualaitak in Jesu’n mi tampi, chinate, hipi veite tualeh dawimatte adamsak a, tualeh mittawte mit asuk vaksak a. 22 Tuachi’n Jesu’n adawng aakiang uah, “Paikikta unla nasil muh uleh na jakte uh Johan vahilh un, bang chibang a mittawte mit hungvakta a, kengbaite ahung paitheita a, miphakte ahung siangthouta a, bilbingte’n a hung jatheita a, misite kaihthoh in ahung omta a, tualeh tagahte kiangah tangthupha gen in a omta hi, chih. 23 Tualeh kuapeuh ka tung a lung hihmohna mulou pen ahampha ahi!” chi hi.

            24 Tualeh Johan misawlte apai nung un aman mipite kiang ah: “Bang en ding a gamdai a paikhia nahi ua? Pumpeng huih mutling maw? 25 Ahihkeileh bang en ding a paikhia nahi ua? Puannem silh maw? Ngaiun, puanthupi silh leh mi nuamsate pen kumpipate inn ah ahi aom uh! 26 Ahihkeileh bang pen en ding a pawtkhia nahi uhiam? Jawlnei maw? Ahi ka hungchi ahi, Jawlnei sang a thupi jaw ahi. 27 Ngaiin, ka kamtai namai ah ka sawl a, aman na maiah na lampi abawl ding, chih atanchin kigelh pen amah ahi.’ ” 28 “Numei suan lak ah baptispa Johan sang a thupijaw Jawlnei aom kei, hinanleh Pasian gam a neupen zong amah sang in a thupijaw hi, chih kung hilh ahi,” achi hi.

            29 Tualeh athu jajousiah leh siah dongte’n Johan baptisma tang in Pasian siam atan uhi. 30 Hinanleh Pharisaite leh dansiam mite’n akiang ah baptisma tanglou in Pasian in amauh a ding a a lemguatsak pen anialta uhi.

            31 Tuachi’n Toupa’n, “Tulai khangthakte bang tawh kateh dia aw? Tualeh bangchi bang ahi ua? 32 Amauh ahihleh naupang van juakna mun a tou a, khat leh khat kikou tuah a, theile kung mutsak ua nalam kei ua! ‘Kung kah uleh zong nakap tuan kei ua; kichite bang ahi uhi!’ 33 Bangjiakin ahia ichihleh, baptispa Johan pen anlah nelou uain lah dawnlou in a hungpai a, tuachi’n nou dawipai ahinachi uhi. 34 Tualeh Mihing Tapa pen ne leh dawn in a hungpai a, tuachi’n nou, En un! Anhaipa, uain haipa, siah dongte leh kikhialte lawnpa!’ na chijel uhi. 35 Hinanleh pilna pen ata tengteng in siam atan uhi,” achi hi.

Jesu keng thaunuhna

            36 Tualeh Pharisaite lak a khat in amah an anekpih ut a, tuachi’n amah Pharisiaipa inn ah alut a, annkuang ah atouta a. 37 Tualeh ngaiin, hua khua a om mikhial numei khat in Jesu Pharisaipa inn ah anne in atou chih atheih in alabastar bawm in sathau namtui a hungtawi a. 38 Anung ah a kengbul ah kapkawm in ading a, a kengphangte a mittuiin a hihkawt a, a samin asiak a, a kengpek atawp a, sathau namtui anuh hi. 39 Tualeh Pharisai amah sampa in hua a muhtak in a lungsim in, “Hihpa Jawlnei ahihleh hih akhoihnu kua ahia, tualeh bang chibang mi ahiam chih theileh kilawm a, a mahlah mikhial ahia!” achi hi.

            40 Tuatakin Jesu’n adawng a akiang ah, “Simon, na kiang ah gennuam khat kanei hi,” achi a. Tuachi’n aman, “Siapa, gen in” achi hi.

            41 “Sum batlaksaktu kuahiam khat in leibatu nih anei a, Khat in makhai ja nga aba a, tualeh khat in sawmnga.

            42 Tualeh aditna ding aneihlouh tak un anih un a ngaihdam tuakta hi. Tuajiakin hunghilh in alak ua kuapen in amah a itjawdiak diam?” achi a. 43 Simon in adawng a”A ngaihdam tamjawpa in hiding in ka ngaihsun achi a.” Tuachi’n aman, “Na chidik hi,” achi a. 44 Tuachiah amah numeinu lam anga a, “Simon kiang ah hih numeinu namu ei? Na innsung ah kung lut a, nang ka keng silna ding tui nungpia kei hi; hinanleh amahnu’n a mittui in ka kengpek asil a, asam in asiak hi. 45 Nang tawpzong nungtawp kei a, hinanleh numeinu’n ka hunglut a pat ka keng tawp akhawl naikei hi. 46 Nang ka lu sathau nungnuh kei a, hinanleh hihnu in, ka kengpekte sathau namtui ahung nuh hi. 47 Tuajiakin kung hilh ahi; a khialhna tampi ngaihdam ahita hi; a it mahmah jiak in; hinanleh ngaihdam tawn in a itna aneu hi,” achi hi.

            48 Tualeh aman numeinu kiang ah. “Na khialhnate ngaihdam ahita hi,” achi hi.

            49 Tualeh amah tawh ankuang a toukhawmte’n alungsim un, “Khialhnate zong ngaihdam hihpa kua ahia?” a kichi ua.

50 Tuatakin aman numeinu kiang ah, “Naginna in ahung hundamta hi, khamuang tak in paita in,” achi h i.

Luka 8

Numei nih Jesu nna sepsakte

            1 Tualeh hichi ahung hi a, Jesu thuhilh kawm leh Pasian gam tangthupha gen kawm in khuapi leh khuata ah avak kawikawi a, sawmlehnihte a kiangah a om uhi.

2 Tualeh numei kuate hiam, dawipai damkik leh natnate a pat damkik Mari Magdalini achih uh, a sung a pat dawi sagih pawtdohnanu tawh,

3 tualeh Herod dangka kemtu Chuza zi Joanna tawh, Susana tawh, tualeh midang tampite tawh ahi ua, huaten aneihsa un a nna asepsak jel uhi.

Khaichi thehpa gentehna

(Mat. 13.1-9; Mrk.4.1-9)

4 Tuachi’n mipi tampitak ahung kikhawn ua, khuachin a mi akiang a ahung pai tak un, gentehna thu agen a:

            5 “khaichi theh[a a khaichi theh in akuan a; tualeh athehlai in khenkhat lamsik ah atu a, mi’n atuanchil a, tungleng vasaten anengaita uhi. 6 Tualeh khenkhat suangtung ah atu a, apoutak in alei anawm louh jiakin avulpaita hi. 7 Tualeh khenkhat loulingnei lak ah atu a, tuachi’n ling tawh a hung poukhawm a, adeplumta hi. 8 Tualeh khenkhat leihoih ah atu a, ahung pou a, alehja in agahta hi,” achi a.

            Tualeh hihthute agen khit in akikou a, “Kuapeuh jakna ding bilnei jousiahin ja hen!” achi hi.

Gentehna thu omjia

(Mat. 13.10-17; Mrk.4.10-12)

            9 Tuachi’n a nungjuite’n hih gentehna thu bang chihna ahia? chin amah adong ua.

10 Tuachi’n aman, “Pasian agam thugukte noute theih ding phal ahina, hinanleh midangte kiangah gentehna guak a gen ahi; mujing ngala amuh louhna ding uleh, jajing ngala atheihsiam louhna ding un.”

Jesu’n gentehna te ahilhchian

(Mat. 13.18-23; Mrk.4.13-20)

            11 “Hua gentehna thu ahihleh hih a hi:  Buhchi pen Pasian thu ahi. 12 Lamsik a tute ahihleh thu jate ahi uh, tuachi’n dawimangpa a hungpai a, thu a lungtang ua pat a lamang hi, a gintat ua hundam a a omlouhna ding un. 13 Suangtung ate ahihleh hichi bang ahi uh, azak tak un thu kipak takin apom ua; tualeh hihte’n jung anei kei ua, tomkhat sung agingta ua, khemna atuah chiang un apukjel uhi. 14 Tualeh loulingnei lak a tute ahihleh thu jate ahi ua, ajak nung un apai ua, khawsak ding dan ngaihtuah nate, hausaknate tualeh damsung nopsak nate’n adep a, agah piching ngaikei hi. 15 Hinanleh leihoih a tute ahihleh lungtang siangthou leh hoih in athu aja ua, apom ua, tualeh kuhkal tak a gah suangte ahi uhi.

Meivak zang a gentehna

(Mrk. 4.21-25)

            16 “Mi kuaman meivak adet chiangin kuan in a khuhngai kei, ahihkeileh lupna nuaiah zong a koihngai kei hi. Alut jousiahin vak a muhtheihna dingin meivak tuna ah akoihjaw hi. 17 “Kilanglou ding a im bangmah aom kei a, tualeh theihlouh ding a kisel bangmah aom kei hi.

18 “Tuajiakin bang chi’n ahia najak uh pilvang un, ajiak ahihleh kuapeuh aneite piak beh ahi ding a, tualeh kuapeuh aneiloute aneihsun zong laksak ahi ding hi,” achi hi.

Jesu nu leh a sanggamte

(Mat. 12.46-50; Mrk.3.31-35)

            19 Tualeh anu leh a sanggamte a hungpai ua, hinanleh mipi jiakin akiang atungthei kei ua. 20 Tuachi’n, “Na nu leh na sanggamte nang hung munuam in inn pualam ah adding uh chi’n ahilh ua.” 21 Tuatakin aman adawng a akiang uah, “Ka n leh ka sanggamte ahihleh Pasian thu ngaikhia a juite ahi uh, “ achi hi.

Jesu’n tui kihot adaisak

(Mat. 8.23-27; Mrk. 4.35-41)

            22 Tualeh hichi ahung hi a, nikhat a nungjuite tawh gunkuang ah ahung tou ua, aman akiang uah, “Nawng galkhat lam ah ipai ding uh achi a,” tuachi’n gunkuang phel in awlta ua. 23 Tualeh a kitawl laiun amah a ihmuta a, tualeh tua nawng tung ah huihpi ahung langsuk a, a gunkuang uh tuiin adimta a, tuachi’n lauthawng huaitakin ahung omta uhi. 24 Tuatakin amauhte a kiangah ahung pai ua, aphong ua, “Siapa, Siapa! Mangthang ding ka hita uh!” achi ua. Tuachi’n amah a hungthou a, huih leh tui kihot ataita a, tuachi’n atawp a, ahung daita hi. 25 Tuakhit in aman akiang uah, “Na ginna uh khoia om ahia?” achi a. Tuachi’n amauh layuin lamdang asa mahmah ua, “Hihpa bang chibang mi hi ahia? Huihte leh tui nasan thu apia a, athu amang uh!” achi ua.

Gadara gam a dawinin pai damsakna

(Mat.8.28-34; Mrk.5.1-20)

26 Tuachi’n Galili gal a om Gadarate gam ahung tung ua. 27 Tualeh amah gam a akaidok takin hun sawtpi dawnin pai kuahiam khat in khuapi a pat amah ana kituah pih a; tualeh aman puan asilh kei a, inn mawng mawng ah zong a om kei a, hanmual lak ah a omjel hi. 28 Tualeh aman Jesu amuh takin, a kikou a, amaiah apuk a, tuachiah aw ngaihtak in, “Jesu nang tungnung pen Tapa, kei leh nang bang bawlding nei ihia? Hung hihgim lou dingin kung ngen ahi!” achi hi. 29 Aman dawinin hua mipa sung pat a pawt ding a thu ana piaktak jiakin, tameipi dawinin in ana mankhata a, sikkhau leh kol bulhsak in a omta a, tualeh aman a kikannate a phutan a, gamdai ah dawi delhmang in a om hi.

30 Tuachi’n Jesu’n akiang ah, “Na min bang ahia?” chi’n a dong a,

“Aman, ‘Nuai,’” achi a; asung a dawi tampi lut ahihjiak in.

31 Tualeh amau’n kawkhuk thukpi a paikik ding a thu pialou dingin akiang ah a ngen ua.

            32 Tualeh huamun ah vok-hon tampi ata ua, amau’n huate sung a alut phalsak dingin a ngen ua, tuachi’n aman aphalsak hi. 33 Tuatakin dawite hua mipa sung a pat pawtkhia in vokte sung ah alut ua, vok honte nawnglam ah munken a pat a taisuk us, tui valh in asita uhi.

            34 Tualeh akawite’n sil omdan amuh tak un atai ua, hihthu khuapi leh khua neu ah avagen uhi. 35 Tuatakin bang thu ata chia en ding in ahung pawt ua; Jesu kiang ahung tun uleh dawimatpa puansilh a, lungsim hoihtak pua a Jesu kengbul a tou amu ua, tuatakin alauta uhi. 36 Tualeh amauhte’n dawimatpa damsak in ahung omdante ana hilh ua. 37 Tuatakin Gadara gam kimvel a mi jousiahin alau mahmah jiak un amah akiang uapan paimang dingin a ngen ua; tuachi’n amah gunkuang sung ah alut a akik kikta hi. 38 Tualeh a sung a dawi pawtnapa’n akiang a omden dingin a ngen a.”

Hinanleh Jesu’n amah asawl khia a. 39 “Na inn ah paikik inla, Pasian in natung a bangchituk a silthupi hung bawlsak ata ale, chih vahilh in,” achi a.

Tuatakin amah apaita a, Jesu’n sil thupitak amah ding a abawlsak khuapi pumpi ah a phuangjakta hi

Jaira tanu leh numei sipawt damsakna

(Mat. 9.18-26; Mrk.5.21-43)

40 Tualeh hichi ahi a, Jesu ahung kinungleh kik in mipi’n amah kipak takin ana vaidawn ua, ajiak aun ua amah nangak jing ahi uhi. 41 Tualeh ngaiin, pasal khat amin Jaira kichi kikhopna inn a vaihawmtu ahung pai a, Jesu kengbul ah a khupbok a a inn a vaihawmtu ahung pai a, Jesu kengbul ah a khupbok a a inn a hawhding in a ngen a, 42 ajiak aman tanu kum sawmlehnih vel pha khatguak anei a, amah laitat in alum a.

Hinanleh Jesu apai takin mipi’n atuam lutlut ua. 43 Tualeh numei khat kum sawmlehnih sipawt, aneih jousiah daktorte kiang a joubeita, hinanleh kuaman adamsak zohlouh. 44 Anung ah a hungpai a, apuan mong akhoih a tuachi’n asipawt akangta hi. 45 Tuatakin Jesu’n, “Kua ahia ahung khoih?” achi a.

Tualeh mi jousiahin kei hiking achihchiak tak un, Peter leh alawite’n, “Siapa mi jousiahin hung tuam a, hungneh lutlut ua, kua ahia ahung khoih nachih,” achi ua.

46 Jesu’n, “Kua ahiam khat in ahung khoih hi, ajiak sil bawltheihna ka sung a pat in apawt hi chih kathei hi,” achi hi. 47 Tuachi’n numeinu’n akiphual theihlouh amuh takin , kithing kawm in a hungpai a, amaiah apuk a, mipi jousiah maiah a kiangah akhoihna san leh ahung ampai dan a phuangta hi. 48 Tuachi’n Jesu’n a kiang ah, “Tanu, khamuangtak in om in; naginna in ahung damsak ahi. Lungmuangtak in paita in,” achi hi.

49 Aman hichi a thu agenlai in kikhopna inn vaihawmtu inn a kipan in mikhat a hungpai a, “Na tanu asita hi, Siapa hihbuaidah main.” Achi hi.

50 Hinanleh Jesu’n hih ajaktak in adawng a, a kiangah, “Lauken; gingta main tuachi’n amah adamdok kik ding,” achi hi.

51 Tualeh innsung a aluttak in Peter tawh Jakob tawh Johan tawh tualeh naupang apa leh anu chihlouh kuamah lut aphal kei hi. 52 Aun un amahnu kah in ana mau vengvung ua, hinanleh aman, “Kap kei un; asi ahikei a ihmu ahijaw!” achi hi.

53 Amau’n amahnu asita chih atheih un amah anuihsan uhi. 54 Tualeh aman aun un a sawldok siang a, amahnu khut in atu a, “Nungak thou in!” chi’n asam a. 55 Tuatakin akha ahung paikik a, a thoukhiapai a, tuachi’n amahnu nek ding piading in thu apia hi. 56 Tuatakin anu leh apa’n lamdang asa mahmah ua; hinanleh hua sil kibawl pen kuamah hilhlou dingin aman amauh a khamta hi.

Luka 9

Sawltak sawmlehnihte nasep

(Mat,10.5-15; Mrk. 6.7-13)

1 Tuachi’n aman anungjui sawmlehnihte a samkhawm a, dawi jousiah tung a silbawltheihna leh thuneihna tualeh natnate damsak theihna apia a. 2 Amauhte Pasian gam thug en ding, damloute damsak dingin a sawlkhiata hi. 3 Tualeh aman akiang uah, “Na zinna ding un chian hiam, thungpi hiam, tanghou hiam, dangka hiam bangmah keng kei un; puan tungsilh zong nih keng kei un. 4 Na lutna inn uah tungden unla tualeh hua inn a kipanin paikhia un. 5 Tualeh ahung kipahpih lou peuhmah pen hua khuapi a kipan-a na pawtdok chiang un amauh mawhpaihna dingin na kengpek ua leivui thingkhia un,” achi hi.

6 Tuachi’n apaikhia ua, tangthupha genkhawm in leh munchin a mite damsak in akhua akhua ah apaita uhi.

Herod buaina

(Mat.14.1-12; Mrk. 6.14-29)

7 Tuachi’n kumpipa Herod in a silbawl jousiah anaja a; alung buaita a, ajiak khenkhat in Johan ahung hingkik ahi achi ua. 8 Khenkhat in Elijah ahung hingkik ahi, achi ua, tualeh midangte’n tanglai a Jawlneite khat ahung hingkik ahi achi uhi. 9 Tualeh Herod in, :Johan lah a ngawng tanta ing a; hinanleh hichi bang a athu kajak hi kua ahi diam aw?” achi a. Tuachi’n amah muh a utta hi.

Jesu’n sangnga avakna

(Mat. 14.13-21; Mrk.6.30-44; Jhn.6.1-14)

10 Tualeh sawltakte’n ahung kinungleh un a silbawl jousiah uh amah ahilh ua, tuachi’n Hesu’n amauh apui a, Bethsaida kichi khuapi a gamdai munkhat ah apai tuampih a. 11 Mipite’n tua atheihtak un amah ajui ua, tualeh aman amauhte ana kipahpih a, akiang uah Pasian gam thu ahilh a, damsak ngaite adamsak hi.

12 Tualeh nitum kuan ahung hih in sawmlehnihte a hungpai ua a kiangah, “I kim ua khuapite leh gamte a paia giahna leh nek ding zong dingin mipite sawlkhia in, hihsan gamdai mun ahi,” achi ua.

13 Hinanleh aman akiang uah, “Nou a nek ding uh pia un,” achi hi.

Amau’n, “Mipi hizahpi nek ding i valei sak keileh tanghou nga leh nga nih guak chihlouh ngal, bangmah i neikei uhi?” achi ua. 14 Ajiak amauh mi sangnga vel hi uhi.

Tuachi’n aman anungjuite kiangah, “Sawmnga jel in ahawn hawn in tousak un,” achi a.

15 Tuachi’namau’n abawl ua, a tousak ta uhi. 16 Tuachi’n aman hua tanghou ngate leh nga nihte ala a, vanlam entou in agualjawl a, abalkek a a nungjuite kiangah mipite mai a lui dingin apia hi. 17 Tuachi’n ane ua avahchiatta uh; tualeh anekval uh aneng lawh sawmlehnih aluak dim uhi.

Peter in Jesu Krista hi achihna

(Mat. 16.13-19; Mrk.8.27-29)

18 Tualeh hichi ahi a, amah guak a athum laiin a nungjuite a kiangah a om ua; aman akiang uah, “Mipite’n kei kua ka hi hungchi ua?” chi’n adong a.

19 Amau’n adawng ua, “Baptispa Johan ahi,” a hungchi uh; “Hinanleh khenkhat in Elijah ahi a hungchi ua; tualeh adangte’n tanglai a Jawlneite lak a khat hung thoukik ahi, a hungchi uh,” achi ua.

20 Aman akiang uah, “Ahihleh nou kei kua ka hi nungchi ua?” achi a. Peter in adawng a, “Pasian Krist nahi.” Achi hi.

Jesu’n asih ding leh athohkikna ding agenkholh

(Mat .16.20-28; Mrk.8.30-9.1)

21 Tuachi’n aman hihthu kuamah hilhlou dingin akhamta hi. 22 “Mihing Tapa in sil tampi athuak ding a; upate, siampite, Laigelhmite deihlouh in aom ding a, thah in aom ding, tualeh nithum ni’n kaihthoh in aom ding hi,” achi hi.

23 Tuachi’n aman amauhte tengteng kiangah, “Mi khatpeuh in kanung ajuih nuam leh amah kimanghilh in nisial a across pua in hungjui hen. 24 Ajiak kuapeuh a hinna humbit ut in ata’n ding a, hinanleh keimah jiak a a hinna ta’n te a humbit ding ahi. 25 Mi’n leitung pumpi nei henla, amah ki mangsak hiam ahihkeileh ki siatlawh in omtaleh! amah a dingin bang a phatuam dia? 26 Kuapeuh keimah leh ka thu jumpihte pen mihing Tapa in ama thupina tawh a Pa thupina tawh vantungmi siangthoute thupina tawh ahung pai chiangin amauh azumpih ding hi. 27 Hinanleh adiktak in kung hilh ahi, hihsan a dingte Pasian gam amuh masiah uh, sihna chiamlou ding aom uh,” achi hi.

Mellamdanna

(Mat. 17.1-8; Mrk. 9.2-8)

28 Tualeh hichi ahung hi a, hihte agenzoh nung nigiat ding bang in aman Peter, Johan leh Jakob apui a mualtung ah thum dingin apai a. 29 Tualeh athum laiin amel omdan ahung lamdangta a, apuansilhte a hung vam a, ate-selhsawlh a. 30 Tualeh ngaiin, minih amah tawh akihou ua, huate Mosel eh Elijah ahi uhi. 31 Amauh thupina a kithuam in akilak  ua, Jerusalem khua a sihna ahihkim ding thu agen uhi. 32 Hinanleh Peter leh akiang  a omte a ihmut uh asuak mahmah a, hinanleh a hunghalh tak un Jesu thupina leh akiang a ding minihte amuta uhi. 33 Tualeh hichi ahung hi a, akiang a kipan a paikhiat un Peter in Jesu kiangah, “Siapa, ei a dingin hihsan a om ahoih hi! Hamphengbuk thum ilam ding a, nang a dingin khat, Mosi a dingin khat tualeh Elijah a dingin khat,” achi a; (Athugen zong theilou pi’n.)

34 Tuachia agen laiin meilum ahung kaia, amauh ahung khuh a, meilum lak a aluttak un alauta uhi. 35 Tualeh meilum lak a kipan aw ahung suak a, “Hih ka Tapa deihtak ahi, athu ngai un” chi in.

36 Tualeh aw adaihtak in Jesu guak amuta ua, tualeh a sipdide a, huahun laiin asilmuhte uh kuamah ahilh kei uhi.

Naupang dawinin mat damsakna

(Mat. 17.14-18; Mrk.9.14-27)

37 Tualeh hichi ahung hi a, ajingni a mual a kipan ahung kumsuk un, mipi tampitak in amah ana dawn ua. 38 Tualeh ngaiin mipi lak a pat mikhat hung kikou in, “Siapa! Kung ngen ahi, ka tapa en in; ka tapa neihsun ahihjiak in! 39 En in, khanin khat in aman a, thakhat khat in akikou khia a, tualeh chilphuan kaijen in a bawlgim jel a, nakpitak a sidup in a nusia jel hi. 40 Na nungjuite kiangah hawlkhia dingin ka ngen a, a delhdokthei kei uh,” achi hi.

41 Jesu’n adawng a, “Ginna beite leh khangthak hilhhakte aw! Na kiang uah bangtan om a hung thuakpih ding ka hia?” “Na tapa hiah hung paipih in,” achi a.

42 Tualeh amah ahung pailai, dawi-in apuksak a bawlgim hi. Tuatakin Jesu’n dawinin atai a, naupang adamsak a, apa kiangah apiata hi.

Jesu’n asih ding agenkholh nihveina

(Mat.17.22,23; Mrk.9.30-32)

43 Tualeh aun un Pasian silbawl theihna thupitak tuh lamdang asa mahmah ua.

Hinanleh michih in Jesu silbawl jousiah lamdang asak laiun aman a nungjuite kiangah, 44 “Hihthu kigente na bilsung uah lut heh; ajiak Mihing Tapa mite khut a matsak a om ding ahi,” achi hi. 45 Hinanleh amau’n a thugen atheisiam kei ua, atheihlouh ding ua im ahihjiak in. Tualeh athugen amah adong ngam kei uhi.

Kua lianpen ding

(Mat.18.1.5; Mrk. 9.33-37)

46 Tuachi’n alak ua kua alianpen dia chih thuin kiselna ahung neita ua.

47 Jesu’n a lungtang ua a ngaihtuah uh athei a, naupang khat ala a, ageiah atou sak a, 48 akiang uah, “kuapeuh ka min a hih naupang kipahpih tuh kei hung kipahpih ahi, tualeh kei hung kipahpih tuh a hungsawlpa kipahpih ahi, nouteng lak a aneupen tuh alianpen ding ahi,” achi hi.

Alangpang lou taphot nang a ahi

(Mrk.9.38-40)

49 Tualeh Johan in adawng a, “Siapa, mikhat naming a dawite notdok kamu ua, ei ahung juihlouh jiakin ka khamta uhi,” achi a.

50 Jesu’n akiang uah, “Amah khamkei un,” “ajiak, ei hung doulou tuh eilam a pang ahi,” achi hi.

Samaria khua in Jesu vaitun nuamlou

51 Tualeh hichi ahung hi a, laktouh a aom ding hun a hungtun in, Jerusalem khua a pai ding in amai angat tinten a. 52 Amasang ah kamtai mi asawl a, tuachi’n amah napaiin amah ding a guatsa diam a nakoih dingin Samariamite khua khat ah alut hi. 53 Tualeh amau’n Jerusalem lam a paiding bang a amel alat jiakin amah ana kipahpih kei ua.

54 Tualeh a nungjuite Jakob leh Johan in hih atheihtak un, “Toupa, Elijah bawl bang in amauh kangmang dingin van a kipan in mei samkhialei hoih nasa diam?” achi ua.

55 Hinanleh amah a kihei a, amauh atai a, “Bang chiang lungsim puami nahih uh kitheilou nahi uh. 56 Ajiak Mihing Tapa mite hinna hihsia ding a hungpai hilouin, hundam dingin hungpai ahijaw,” achi hi.

Nung juidingte theihna

(Mat.8.19-22)

57 Tualeh hichi ahung hi a, lampi a pailai un mikhat in a kiangah, “Toupa napaina teng ah hung juining,” achi a,

58 Jesu’n a kiangah, “Si-alte’n kua anei ua tungleng vasate’n zong bu anei uh; hinanleh Mihing Tapa-in alu ngakna ding zong a neikei,” achi hi.

59 Tuachi’n aman midang khat kiangah, “Hung juiin,” achi a, hinanleh aman,

“Toupa, kapa vavui masa phot ning,” achi a,

60 Jesu’n a kiang ah, “Misi-in amisi uh kivui uhen, hinanleh nang pai inla Pasian gam thu vagen in,” achi a.

61 Tualeh midang khat in zong “Toupa hungjui ning; hinanleh ka inn a mite kampha in hung khasak masa phot in,” achi.

62 Jesu’n a kiang ah, “Mi kuapeuh langkawn tukawm a nunglam en pen Pasian gam mi hitak ahi kei,” achi hi.

Luka 10

Nungjui sawmsagihte sawlna

1 Hih silte nung in Toupa’n midang sawmsagih zong aguat a, ama painang khuachin leh munchin ah amai ah nih nih in asawl hi. 2 Tuachi’n aman akiang uah, “Buh lak ding atam mahmah a, hinanleh asemtute atawm uhi; tuajiakin abuh lading a nasem dingte hung sawlkhia dingin buh neipa kiangah ngen un. 3 Pai un! ngai un, ngia hon lak a belamnou bang in kungsawl ahi. 4 Dangka-ip hiam, thungpi hiam, khedap hiam keng kei un; tualeh lampi ah kuamah chibai buk kei un. 5 Tualeh inn na lutna phot uah, amasa pen in, ‘Hih inn ah khamuanna tung hen.’ Chi un. 6 Tualeh hua-ah khamuanna ta aom leh na khamuanna uh atung ah aom ding a; a om keileh na khamuanna uh noukiang ah ahung kinungleh kik ding. 7 Tualeh hua inn ah omjing unla, a hungpiak bang un ne unla dawn un; ajiak nasemtu thaman mutak ahi. Inn khat a pat inn khat ah kisuan lehleh kei un. 8 Khua na lutna phot uah ahung na kipahpih uleh namai ua alui taphot uh ne un, 9 hua-ah adamlou omte hihdam unla, akiang uah, ‘Pasian gam na kiang uah a hungtungta,’ chijel un. 10 Hinanleh khua na lutna phot uah ahung na kipahpih kei uleh akhua kongjing ah pai unla, 11 ‘Na khua leivui uh ka kengpha ua bang nasan natung uah ka tatsiang uh; ahihhangin Pasian gam na kiang uah a hungtungta chih thei un!’ chi un. 12 Hinanleh kung hilh ahi, huani chiangin hua khuate thuak ding sang in Sodom khua thuak ding adan a omjaw ding!

Jesu’n a thumanglou khuate ataina

(Mat.11.20-24)

13 “Korazin natung agik hi! Bethesda natung agik hi! Na kilanga sil thupi kibawlte Sidon leh Tura a kibawl hileh sawtpi a pan la-ip silh a vut lak ah touin a kisikkhin ta ding uhi! 14 Hinanleh vaihawmni chiangin nou thuak ding sang in Tura leh Sidon thuak ding adan a omjaw ding hi. 15 Tualeh, nang Kepernaum! Vantan a tawisang, misi khua ah puaksuk in na om ding hi!”

16 “Kuapeuh na thugen uh ngaikhia tuh kei hung ngaikhia ahi uh; tualeh kuapeuh nou hungnial tuh a hungsawlpa nial ahi uh,” achi hi. 17 Tualeh sawmsagihte kipaktak in ahung tungkik ua,”Toupa, naming jiakin dawite nangawn ka thu-un a om uh!” achi ua.

18 Aman akiang uah, “Setan van a kipan-a tunphe bang a hungkia kamu hi, achi a. 19 Ngai un gulte leh mom-aite totden theihna leh melma silbawltheihna jousiah tung a thuneihna kungpia hi. Bangmah in ahung hihna kei ding hi. 20 Hinanleh dawite na thuthu ua aom jiakin kipak kei unla, van a naming uh gelh ahihjiak in kipakjaw un,” achi hi.

Jesu kipahthu genna

(Mat. 11.25-27; 13.16,17)

21 Huahun laitak in Jesu Khasiangthou in akipak a, “ Pa aw, van leh lei Toupa! Nang, mipilte leh misiamte kiangah hihthute n aim a, naungekte kiang a naphuan jiakin kung pahtawi hi; ahi, Pa, huachibang bawl nang ngaih a ahoih hi.

22 “Siljousiah kapa’n kei ahung piakhiata hi. Tapa kua ahia chih Pa loungal kuaman athei kei; tualeh Pa kua ahia chih Tapa leh akiang a atheihsak nuamnate loungal kuaman athei kei,” achi hi.

23 Tuachi’n a nungjuite lam anga a, aguk in, “Na silmuhte uh amu mitte ahampha hi! 24 Ajiak kung hilh ahi, Jawlnei tampite leh kumpi tampite’n na silmuhte uh muh a ut ua, hinanleh amu kei uh, tualeh najakte uh zong jak a ut ua, ajakei uh,” achi hi.

Samaria mihoih gentehna

25 Tualeh ngaiin dansiam mi khat a dingkhia a amah ze-etna in, “Siapa, tangtawn hinna ka neihtheihna dingin bang ka bawl dia?” achi a.

26 Aman a kiang ah, “Dan laibu ah bang akigel ei? Bang nachi sim ei?” achi a.

27 Aman adawng a, “Toupa na Pasian tuh na lungtang tengteng in, nakha tengteng in, na hatna tengteng in tualeh na lungsim tengteng in na it ding ahi; tualeh nangmah na ki it mahbang in na innvente zong na it ding ahi,’” chi’n, achi a.

28 Tuachi’n Jesu’n akiang ah, “Na dawng dik ngel hi, hichi’n bawl in, na hing ding hi,” achi hi. 29 Hinanleh amah siam kitan ut in Jesu kiangah, “Ka innveng kua ahia?” achi a. 30 Tuachi’n Jesun adawng a, “Mi kuahiam khat Jerusalem a pat Jeriko ah apaisuk a, suamhatte atuakkha a, huate’n apuansilh asutsiang sak ua, avua ua, siloubep in anusiata uhi. 31 Tuachi’n siampi khat tua lampi ah hung paisuk kha laizang a; amah amuhtak in lampi gei langkhat ah apelta hi. 32 Tuachibang mah in Levi mi khat huamun a hungtun in, a en a, lampi gei langkhat ah apelta hi. 33 Hinanleh Samaria mi khat khualjinlai huapa omna mun a hungtung a, amah amuhtak in ahehpih mahmah a. 34 A kiangah apai a, aliamnate sathau leh uain buak in atuamsak a, ama gantung a tuangsak in zinbuk ah apaipih a, a enkolta hi. 35 Tualeh ajingni a apai dingin makhai nih alakhia a, zinbuk neitu kiangah apia a, ‘Amah na enkol inla, hih ban a nasen zahzah kung paikik chiangin kung piakik ding,’” achi hi.

36 “Ahihleh hih mi thumte lak ah kuapen gutate tuakpa innveng hiding in na ngaihtuah a?” achi hi.

37 “Aman atung a khuatuahna neipa achi a.”

Tuachi’n Jesu’n akiang ah, “Pai inla nang zong hihbang in vabawl in,” achi hi.

Mari leh Martha

38 Tualeh hichi ahung hi a, apai laiun khuakhat ah alut ua, numei khat amin Martha in a inn ah atungsak hi. 39 Tualeh amahnu’n Mari kichi sanggamnu khat anei a, amah Jesu kengbul ah atou a, a thugen angai hi. 40 Hinanleh Martha pen nek bawlin abuai mahmah a, Jesu kiangah ahung pai a, “Toupa, ka sanggamnu’n kei guak nek bawl a ahung ngansiah khawk salou nahi maw? Hung huh dingin sawl in!” achi a.

41 Jesu’n adawng a, a kiangah, “Martha, Martha! Sil tampi na ngaihtuaha buai nahi, 42 hinanleh sil khatguak apoimoh hi; Mari-in tanhoih atelta a, huapen laksak louh ding ahi,” achi hi.

Luka 11

Toupa thumna

(Mat. 6.9-13; 7.7-11)

Tualeh hichi ahung hi a, mun khat a athum laiin, tualeh athum zoh in a nungjuite khat in a kiang ah, “Toupa, Johan in a nungjuite ahilh bangin ka kiang uah thumdan hunghilh in,” achi a.

2 Aman akiang uah, “Na thum chiang un:

“Ka Pa Uuh van a om:

            Na min kizahtak hen;

                        Na gam hungtung hen.

Na deihlam van a a kibawl bangin,

            Leiah zong kibawl hen.

3 Nisial a ka nekkhop uh an hung pian

            4 Ka tung ua khialte ka ngaihdam bang un,

                        Kou khialhnate zong hung ngaidam in.

                        Khemna ah hung kailut kenla

                        Gilou lakpan hung hunkhiajaw in,’ ”

chi un, achi hi.

            5 Tualeh aman akiiang uah, “Na lak ua kuahiam in lawm khat nei henla, jankim laiin a kiangah vapai henla, ‘Lawm aw, tanghou beuthum hung batlaksak in. 6 Ajiak ka lawm khat khualjin ka kiangah ahung paia, amai a lui ding bangmah ka neikei chi henla!’ 7 Tualeh aman innsung panin dawng henla, ‘Hung hihbuai ken! Kot khak ahita a, tualeh ka tate zong ka kiangah lupna ah a ihmuta uh, hung thouin kung piathei kei na chileh.’ 8 Kunghilh ahi, alawm ahihjiak a vathouin vapia kei mah leh zong anget teitei jiakin vathou in adeih zahzah avapia ding hi. 9 Kunghilh ahi: Ngen un, tuachi’n piak in na om ding uh; zong uh, na mu ding uh; tualeh kiu un, honsak in na om ding uhi. 10 Ajiak kuapeuh a ngen in a ngah a, kuapeuh azong in amu a, kuapeuh akiu tuh honsak in a om ding hi. 11 Na lak ua pate kuahiam khat in tapa in tanghou ngen leh kuan suang apia dia? Ahihkeileh ngasa ngen leh kuan ahia nga tang a gul pia ding? 12 Ahihkeileh aktui ngen leh kuan ahia mom-ai  piading? 13 Tualeh nou migiloute’n bawn na tate uh silhoih piakdan na theih uleh na Pa uh van a om in a ngente kiangah Khasiangthou piakdan hahtheih tazen lou ding maw!” achi hi.

Jesu leh Beelzebul

(Mat.12.22-30; Mrk. 3.20-27)

14 Tualeh Jesu’n dawi hamtheilou khat ahawlkhia a, tualeh hichi ahi a, dawi apawttak in hamtheilou pen ahung hamtheita a; tuachi’n mipi’n lamdang asa mahmah ua, 15 hinanleh alak ua khenkhat in “Dawimangpa Beelzebuljal a dawite a hawlkhiat ahi,” achi ua.

16 Adante’n amah ze-etna in van a pan a chiamtehna a ngen ua. 17 Hinanleh aman angaihtuah uh ana thei a, akiang uah, “Gam amah leh amah kidou taphot a mangthang hel hi; tualeh innsung khat zong a kidou leh apukjel hi. 18 Setan zong amah leh amah akidou leh bang chi’n agam a dingthei dia? Beelzebul jal aq dawite hawlkhia nung chi ua. 19 Tualeh ken Beelzebul jal a dawite ka hihleh na tapate un kua jal a hawlkhia ahia le? Tuajiakin amauhte noute hung vaihawmsak dingte ahi uh! 20 Hilehzong ken Pasian khutzung vang a dawite ka hawlkhiat leh Pasian gam na kiang uah a hungtung taktak ahita hi.”

21 “Mikhat in galvan kim a a inn aveng chiangin a inn abit a. 22 Hinanleh amah sang a hatjaw khat ahung paia, ahungzoh chiangin a kivonna galvan jousiah alaksak a, aneih leh lam alaksakte ahawmjal jel hi.

23 “Kuapeuh keilam a pangloute kei hung dou ahi ua; tualeh kuapeuh ahung lak khawmpih lout uh athehjak ahi, achi hi.

Dawinin kinunglehna

(Mat. 12.43-45)

            24 “Dawinin pen mi sung a kipan a pawtkhiat in khawlna ding zongin gamgaw mun lak ah avak kawikawi a, hinanleh amukei a; ‘Kei pawtna inn mah ah ka paikik mai ding,’ achi a. 25 Tualeh ahung pai takin phiatsiang a zephoihsa in amuta hi. 26 Tuatakin apai a, amah sang a giloujaw dawi adang sagih ahung puia, asung ah alut ua, atengta uhi. Tualeh huapa omdan  nunung pen  amasa sang in ahung siajawsemta hi,” achi hi.

Kipahna diktak

            27 Tualeh hichi ahung hi a, hih thute agen laiin, mipi lak a pat numei kuahiam khat ahung kikou khia am “Nang hung kipaina gil ahampha hi, tualeh nanawi tepte tawh!” achi a. 28 Hinanleh aman, “Ahi, hinanleh Pasian thu ja a juite ahampha jaw uh!” achi hi.

Chiamtehna a ngen uh

(Mat. 12.38-42)

            29 Tualeh mipi ahung kikhop khawm laiun, aman akiang uah, “Tulai khangthakte khang giloutak ahi uh! Chiamtehna azong ua, hinanleh Jawlnei JOna chiamtehna loungal chiamtehna  dang piak ahikei ding uh. 30 Ajiak Jona Ninevi khua a mite a ding a chiamtehna ahih bang in Mihing Tapa zong tulai khangthakte dingin chiamtehna ahi ding. 31 Simlam kumpinu vaihawmni chiangin tulai khangthakte tawh ahung thou ding a, siamlouh atangsak ding hi; ajiak Solomon pilna ngaikhia dingin leitawp a pan ahung pai hi; Solomon sang a thupijaw hiah a om hi. 32 Ninevi khua mite vaihawmni chiangin tulai khangthakte tawh athou ding ua, siamlouh atangsak ding uh, ajiak Jona thugen jiakin amauh a khialhnate uh akisik uh; ngaiin Jona sang a thupijaw hiah a om hi! achi hi.

Meivak a pat thuhilhna

(Mat. 5.15; 6.22,23)

            33 “Mi kuamah in meivak adet chiangin bemkhawm ah akoih ngai kei’ lawh nuaiah zong akoih ngai kei, ahung lutte’n avak a muhtheihna ding un meivak tuna ah  akoihjaw hi. 34 Taksa vakna mit ahi a, tuajiakin namit achim chiangin na taksa zong aun in avak suak hi, hinanleh namit ahoihlou chiangin na taksa zong amial hi. 35 Tuajiakin nasung a vak om pen mial ahihlouhna dingin pilvang in. 36 Tuajiakin na taksa apumpia avak a, amialna mun a om kei leh meivak vakphatak in a hung tanvak bang in avaksuak siang ding,” achi hi.

Jesu’n Pharisaite leh Laigelhmite ademna

(Mat. 23.1-36; Mrk. 12.38-40)

37 Tualeh a thugen laiin Pharisai kuahiam khat in akiang ah an ne dingin amah achial a; tuachi’n an ne dingin alut a atouta hi. 39 Toupa’n akiang ah, “Nou Pharisaite’n nou leh kuang a pualam na silsiang gut ua; hinanleh na sunglam uh duhgawlna leh gitlouhna in adim hi. 40 Nou mimawte, apualam siamtuin asunglam song siam lou ahi maw? 41 Hinanleh nasil neihte uh migentheite kiangah piajaw un; tualeh ngaiun, sil jousiah nou dingin asiang hi.

42 “Hinanleh Pharisaite aw, natung uh agik hi! Ajiak nou lengmaselte, lounamsiate tualeh anteh louhingte sawm a khat napia ua, vaihawmna dill eh Pasian lungsiatna lah na thudon kei uh. Hihte ahi na bawlding uh, adangte bawllou tuan lou in.

43 “Nou Pharisaite aw, natung uh agik hi! Ajiak nou kikhopna inn ah touna hoih penpente leh van juakna mun a min chibai ahung buk ding nadeih uhi. 44 Nou Laigelhmite leh Pharisai lepchiahte aw natung uh agik hi! Ajiak nou hankhuk, min ahihlam theiloua atung a ava paikhakjel nate bang nahi uh,” achi hi.

45 Tuachi’ndansiammite lak a khat in adawng a, akiang ah, “Siapa, hihbang a na thugen in kou zong hungtai na hi!” achi hi.

46 “Nou dan siammite zong natung uh agik hi! Nou van-gik puak-hak taktak mi na puasak ua, houlah hua van-gikte nakhut menglang khat un zong nakhoih nuam kei uhi. 47 Na tung uh agik hi! Ajiak nou Jawlneite han nalam ua, amauhlah napu napate uh thah ahi hi.48 Na pu napate uh ahoih hi chi’n na theihpih uhi, ajiak amau’n Jawlneite ana that ua, nou ahan uh nalamsak uhi. 49 Tuajiakin Pasian pilna in zong akiang uah, “Jawlneite leh sawltakte kasawl ding ua, khenkhat abawl genthei ding uhi.’ 50 Leitung siamchil a kipan a kisuah Jawlnei jousiah sisan phu tulai khangthakte tungah a kilathei ding hi, 51 Abel sisan kisuah a pat maitam leh Pasian tempul kikal a si Zakariah sisan tan in; achi hi. Adiktak in kung hilh ahi, hih phuba pen tulai khangthakte tungah akila ding hi! 52 “Nou dansiammite aw, natung uh agik hi! Ajiak nou pilna chabi na lamang ua, nou lah na lut kei ua, mi alut dingte zong nakham uhi!” achi hi.

53 Tualeh aman hihtute agen laiin Laigelhmite leh Pharisaite’n amauh thu tampi gensak tum in hahtok in atawng panta ua, 54 siamlouh atansak theihna ding un a hamkhelh na mat tum in atang gige uhi.

Luka 12

Milepchiahte tung a vauna

(Mat. 10.26,27)

            1 Huachih laiin mipi simsenglouh khat leh khat kituanpai hial a ahung kikhop tak un, aman a masapen in a nungjuite kiangah, “Pharisaite tol, lepchiahna lak ah kiveng un. 2 Ajiak kilanglou ding a khuh bangmah aom kei a, tualeh theihlouh ding a kiphual zong bangmah aom kei. 3 Tuajiakin, mial a nagen taphot uh vak ah jak in aom ding a; tualeh innsung tawng a bilkawm a nagen uh inntungvum ah tangkoupih in aom ding hi, achi hi.

Kua ahia lau ding

(Mat. 10.28 -31)

            4 “Tualeh nou ka lawmte aw, kung hilh ahi, taksa sisak thei a, tuazoh chiang a bangmah dang bawltheih neinawnloute lau kei un. 5 Hinanleh kua ahia nalau ding uh kung hilhkholh ding: Athah nung a zong gawtmun a paihtheihna thuneihna neipa amah lau un; ahi, kung hilh ahi, amah lau un!

            6 “Vatou nga daan dangkasik nih in ajuak jel uh hilou maw? Tualeh alak ua khat zong Pasian maiah manghilh in a om kei hi. 7 Hinanleh nalu ua samzangte nangawn simsiang ahi. Tuajiakin lau kei un; vatou tampi sang in na manpha jaw uhi!

Krist Pulakna leh nialna

(Mat. 10.32,33; 12.32; 10.19,20)

            8 “Kunghilh ahi, kuapeuh mi mai a kei hung gum taphot mihing Tapa in zong Pasian vantungmite mai ah agum ding hi. 9 Hinanleh mi mai a kei hung kitheihmoh bawl tuh Pasian vangtungmite mai ah kitheihmoh bawl in a om ding.

            10 “Kuapeuh Mihing Tapa kalh a thugen tuh a gensiatna ngaihdam ahi ding a, hinanleh Khasiangthou kalh a thu gent uh agensiatna ngaihdam ahi kei ding hi. 11 “Tualeh nou kikhopna innte, thukhentute, tualeh thuneitute mai a ahung paipih chiang un bang chi in, bang thu in ka dawng dia, ahihkeileh bang ka gen dia chi’n lungkham kei un. 12 Ajiak Khasiangthou in ahuntak in nagen ding uh ahung hilh ding hi,” achi hi.

Mihaupa gentehna

13 Tualeh mihon lak a khat in, “Siapa, ka sanggam kiangah kapa uh hung nutsiat gou hung kihawmpih dinging en in,” achi a.

14 A man akiang ah, “Mi kua in ahia kei natung ua vaihawmtu hiam, tan hawmtu hiam a hungbawl?” achi hi. 15 Tualeh aman akiang uah, “Pilvang unla, enna lak ah kiveng uh; ajiak hauhsak mihing hinpih hilou hi.” achi hi.

16 Tualeh aman gentehna thu khat agen a, “Mi hausa kuahiam khat alou a piang ahung tam mahmah ta a. 17 Tuachi’n alungsim in aki ngaihtuah a, ‘Ka buh leh balte koihna ding lah ka neikei a, bang lawh ding kadiam aw? chi’n aki ngaihtuah a. 18 Tualeh hichi’n bawlning, Ka anbukte kaphel dig a, alianjaw kalam ding; tuachi’n hua-ah ka buh leh balte leh kavan jousiah kakoih ding, achi hi.  19 Tualeh ka kha kiangah ka kha aw, kum tampi sung a dingin sil tampi naneita a; tawldam inla ne in, dawn in tualeh nuamtakin om in!’ Ka chi ding, achi hi. 20 Hinanleh Pasian in akiang ah, ‘ Nang mimaw, tujan chiah na hinna hung ki laksak ding ahi, hua nasil kholkhawmte kua a ding ahita diai?” achi hi,

21 “Amah guak ding a gou kikhol a, Pasian lam a hausa lout uh hichi bang ahijel hi,” achi hi.

Pasian gintat ding

(Mat. 6.25 -34)

            22 Tuachi’n aman a nungjuite kiangah, “Tuajiakin kung hilh ahi, bang ahia ka nek ding, chi’n na hinna thu uleh, bang ahia ka silh ding chi’n na taksa ding un lungkham kei un. 23 Hinna nek ding sang in athupi jaw a, tualeh taksa zong puansilh sang in athupi jaw hi. 24 Va-akte ngaihsun un, abuh atuh kei ua at zong a atkei uh; hinanleh Pasian in amauhte avak hi! Nou vasate sang a bang zahta a manphajaw na hi ua? 25 Tualeh nalak ua kua in ahia lungkham jiak a adin tongkhat abehlap thei? 26 Tuachia nou hua sil neupen bawn na balwthei kei uleh bang ding a adangte lungkhampih nahi ua? 27 Lili pak khandan ngaihtuah un, na asem kei ua khau a khek kei uh; hinanleh kung hilh ahi, Solomon zong a thupina tengteng a kijep in zong hih lilipakte lak a khat bang a zep in aom kei hi. 28 Tuachia gam a hampa tunia hing a ajing a meikhuk a paihmai ding bawn Pasian in huachituk a ajepleh. Aw nou ginna tawmte, bangzah takin silhsak in na om ding uai?

            29 “Tualeh nanek ding uhiam, nadawn ding uhiam, zong kei un. 30 Ajiak leitung a namte’n hihte jousiah azong uh; tualeh na Pa un hih silte na poimoh uh chih athei hi. 31 Hinanleh nou Pasian gam zongjaw un, tuachi’n hih silte piakbeh in na om ding uhi, achi hi.

Van ah gou khol un

(Mat. 1.19-21)

            32 “Pawltawmte aw, laukei un; ajiak na kiang uah kumpi gam piak na Pa uh kipak na lamtak ahi. 33 Na neih jousiah uh juak unla, migentheite kiangah pia un; van ah guta paihlouhna leh samek neksiat louhna ah dangka-ip luitheijou leh gou setheilou hikholjaw un. 34 Ajiak nagou uh omna ah na lungtang uh zong a om ding hi.

            35 “Na kawng uh gak unla, na meivak uh zong kuangsak jing un, 36 mi apu kitenna ankuang luina a pat a hungpai a kongkhak ahung kiuh chiang a na honsakpai thei ding a na ngakjing bangin om un. 37 Apu in hungpai chiang a mah nangak jing a amuh silate a hampha uhi! Adiktak in kung hilh ahi, akawng uh agak ding a, amauhte ankuang ah a tousak ding a, anek uh a bawlsakta ding. 38 Tualeh janlai in hiam, thawh hun in hiam, ahungpai a, hua chibang a amuh hua silate ahmpha uhi! 39  Hinanleh hih thei un, guta hungpai ding hun inn nei pa’n thei henla hileh aveng ding a a inn aphetvang sak kei ding. 40 Tuajiakin nou zong kiging jingin om un, ajiak na gintaklouh laitak un Mihing Tapa ahung pai ding hi,” achi hi.

Sila gin-om leh gin-omlou

(Mat. 24.45-51)

            41 Tuachi’n Peter in a kiangah, “Toupa, hih gentehna koukiang guak a nagen ahia, ahihkeileh mi jousiah kiangah zong?” achi a.

            42 Toupa’n, “Dangka kemtu gin- om leh piltak, apu in ahun teng a atan ding uh hawmsak ding a a innkuan pihte tung a vaihawmtu ding a abawl ding kuapen ahita diam le? 43 Apu a hungpai chiang a sila huachibang a bawl ahung muh ding pa pen ahampha hi!” 44 Diktakin kung hilh ahi, amah aneih jousiah tung a vaihawmtu in abawl ding hi. 45 Hinanleh hua sila pa’n kapu hung paizok kenteh chi’n asilanu asilapa navua taleh, tualeh ne in dawn in nakham taleh, 46 Hua silapa pu pen a gintalouh ni khat in atheihlouh kal in a hungpai ding a, tunnih asuah ding a gingloumite tan bang a tangsak ding hi. 47 “Tualeh sila apu deihlam theigige napi a na kiging lou leh apu deihlam a zong gamtang lou pa, tamvei vuak ahi ding. 48 HInanleh theilou pi a vuakna thamching a silbawlpa tawmnou khat a vuak ahi ding. Ajiak kuapeuh tampi kipiakna kiangah tampi akiphut ding a, tualeh mi’n tampi akepsak kiangah atamjawsem aphut ding uhi, achi hi.

Jesu Krist mihingte khentu

(Mat. 10.34-36)

            49 “Leitung a mei khiasuk ding a hungpai ka hi, tu in zong kangpaileh chi na ing e! 50 Hinanleh baptisma tan ding ka nei, hua ka tangtun masiah ka om nuamlou hina e! 51 Leitung a lemna lengsak ding a hungpai in nung ngaihtuah uh maw? Hibaih lou, kung hilh ahi, kikhenna omsak ding a hungpai ka hijaw hi. 52 Ajiak tu a kipan in innsung khat a om mi nga a kikhen ding ua, nih in thum adou ding a, thum in nih adou ding. 53 Pa in tapa, tualeh tapa in pa, nu in tanu, tualeh tanu in nu, innpinu in amounu, amounu in innpinu adou ding,” achi hi.

Hun theihna

(Mat. 16.2,3)

            54 Tualeh aman mipite kiangah zong, “Nou tum lam a meikai namuh chiang un guah ju ding ahi nachi pai ua, huachi’n ahung om ngei a. 55 Tualeh  sim huih a hunglan natheih chiang un khualum ding ahi nachi ua; tuachi’n a hung lum hi. 56 Nou milepchiahte aw! Van leh lei omjia lah na theisiam ngal ua, bangding a tulai hun omdan theisiam lou nahi ua?” achi hi.

I langte tawh kilemna

(Mat. 5.25,26)

            57 “Tualeh bangdin nouman thu adik a kikhen lou nahi ua? 58 Hung hekpa tawh thukhentu kiang nazot lai un, lampi ah kilep theihna khat zong teitei in, atuachih keileh vaihawmtu maiah ahung tut ding a, vaihawmtu in miman lamkaipa kiang ah ahung pekhia ding a, tualeh miman lamkaipa’n thong ah ahung kumkha ding hi. 59 Kung hilh ahi, paisasan khat nangawn na piakkim masiah hua a kipan in napawt ngai kei ding hi,” achi hi.

Luka 13

Kisik ding ahihkeileh sih ding

            1 Huachih hun laiin, Galili gam a mite Pilat in athah a, a sisan uh a Pasian biakna sa tawh ahal khawmsak uh thu Jesu kiangah hunghilh mi bangzah hiam a om ua. 2 Jesu’n adawng a akiang uah, “Huachibang sil athuak jiak un hua Galilimite Galili gam a mijousiah sang a khialjaw diak in na ngaihsun uh hiam? 3 Kunghilh ahi! Hilou e, nou zong na kisik kei uleh huachibang mah in na mangthang siang ding uhi, achi hi. 4 Ahihkeileh siloam innsang in apukkhuma anetlup mi sawmlehgiatte zong Jerusalem khua a tengte jousiah sang a khialjaw a ngaihtuah nahi uhiam? 5 Kunghilh ahi, hilou e, nou zong na kisik kei uleh huachibang mah in na mangthang ding uhi.” achi hi.

Theipi kung gahlou gentehna

            6 Aman hih gentehna zong agen a, “Mi kuahiam khat in garep huan ah theipi kung suan khat anei a, tualeh agah ahung zong a, khat zong amukei a. 7 Tuatakin aman grep huanbawlte kiangah, ‘Ngaiin, kum thum sung hih theipi kung agah kung zong a, khat zong ka mukei hi. Phuk maiin! Bangding a mun dal a om ahia?’ achi a. 8 Hinanleh aman adawng a akiang ah, ‘Toupa tukum zong omsak nalai in, akimkawt in katou ding a, leihoih in ka phungvuk ding. 9 A hung gah leh ahoih ahi ding a; ahung gah kei a ahihleh, tuachiang in na phuk na ding,’ “ achi hi.

Khawlni a numei khat damsakna

10 Tualeh aman khawlni-in kikhopna inn khat ah thu ahilh a. 11 Tualeh ngaiin, kum sawm leh giat hatlouhna dawi in amat numei khat aom a, a ngum akul a, a dingtang thei mawng mawng kei hi. 12 Jesu’n amah amuhtak in asam a,  “Numei, na hatlouhna a pat khahkhiat na hita!” achi hi.

13 Atung ah akhut a nga a, tuachi’n thakhat in ahung tangpai a, Pasian a phatta hi.

14 Tualeh khawlni a Jesu’n mi a damsak jiakin kikhopna inn vaihawmpa ahehta a, mipite kiangah, “Mihing nasepna ding niguk sung aom hilou maw; hua sung in hungpai unla hung ki  hihdamsak ta unla, kawlni a hilou in!” achi hi.15 Tuatakin Toupa’n amah adawng a, “Nang milepchiah! Khawlni-in na bawng uh hiam na sabiltung uh hiam akhihna a pat sut in tui dawnsak dingin na kaikhia jel uh hilou maw. 16 Hih numei Abraham tanu ahih tawh, ngaiin, setan in kum sawm leh giat sung amat khawlni a agakna sutsaklou ding maw?” achi hi. 17 Tualeh aman hihthute agentak in, a melmate jousiah ajumta ua; mipite pen a silthupi bawlte jiakin akipak chiat uhi.

Annkam tang leh tol gentehna

(Mat. 13.31; Mrk. 4.30-32)

            18 Tuachi’n aman, “Pasian gam bang chibang ahia? Bang tawh tehkak ding ka hia? 19 Hih pen mi’n ankam tang khat alak a, ahuan a apaihlut bang ahi; huapen ahung pou a, akhang a, sing lianpi ahung hi a, tualeh tungleng vasate’n aba giahna in anei uh,” achi hi. 20 Tualeh, “Pasian gam pen bang tawh genteh ding ka hia? achi kik a. 21 Hih pen tol, numei in alak a, tehna thum dim annel ahel a athoh masiah aphum bang ahi,” achi hi.

Kong kawchik

(Mat. 7.13,14,21-23)

            22 Tualeh aman thu hilhkawm in Jerusalem lam juanin khuapi leh khuaneute tuan in apijel a.  23 Tuachi’n mi khat in akiang ah, “Hundam a om dingte tawm noukhat hi uh maw?” achi a.

            Jesu’n akiang uah, 24 “Kong kawchik ah lut sawm teitei un; ajiak kung hilh ahi, mi tampi’n lut asawm ding ua, alutthei kei ding uhi. 25 Inn neitu khatvei athoh a kot akhak zohchiah, nou inn pualam a ding in, “Toupa, Toupa, kong hung honin chia kong nakiuh chiang un, aman na kiang uah, Khoilammi nahi ua, kung theingai kei!’ chi’n ahung dawng ding hi. 26 Tuatakchiah nou, ‘Na maiah kane un ka dawn ua, tualeh ka kongjing uah thu nahilh hi; nachi ding uh!’ 27 Hinanleh aman, ‘Kunghilh ahi, khoilammi nahi ua kung theikha kei. Nou silgilou bawlte jousiah, ka kiang a pat paimang un, ahung chi ding hi!’ 28 Abraham leh Isak leh, Jacob leh Jawlneite jousiah Pasian gam a om namuh ua, nou pualam a paihkhiat a om nahih uh nung kitheih chiang un, huasan ah kahleh hagawina aom ding! 29 Tualeh suahlam leh tumlam leh, simlam leh, mallam a pat in mi ahung pai ding ua, Pasian gam ah atou ding uhi. 30  Tualeh ngaiun, a nunungpente amasapen a pang ding aom ua, tualeh amasapente zong a nunungpen a pang ding aom uhi,” achi hi.

Jesu’n Jerusalem a it

(Mat. 23.37-39)

            31 Huani mah in Pharisai kuate hiam ahung pai ua, a kiangah, “Pawt inla hihmun a pat paimang in, ajiak Herod in thah hungsawm hi,” achi ua.

            32 Aman akiang uah, pai unla, hua sial kiangah hihthu vagen un, ngaiin, tuni leh jingchiang dawite notkhia in natnate damsak in nithum ni-in kajou ding hi. 33 Bangteng hileh tuni tawh, jingchiang tawh, ajingkik tawh ka paijel ding hi, ajiak Jerusalem ah Jawlnei sih ngaina hilou ahi, achi hi.

Jesu’n Jerusalem akah khum

            34 “Aw Jerusalem, Jerusalem! Jawlneite that leh na kiang ua hung kisawlte suang a na denglum! Akpi-in anoute a khanuai a opkhum bangin bangzah vein a tate opkhum kasawm a, hinanleh na ut kei uhi! 35 Ngaiun, na inn uh ahawm a nutsiat in a omta hi; tualeh adiktak in kung hilh ahi, “Toupa min a hungpai ahampha hi, nachih masiah uh nung mukei ding uh,’ ” achi hi.

Luka 14

Khawlni a damlou damsakna

            1 Tualeh hichi ahung hi a, khawlni a Pharisai lamkhai khat inn a an ne ding a apaiin a enkhia ua. 2 Tualeh ngaiin, amaiah chibawk a damlou mi khat aom a, 3 Jesu’n dansiamte leh Pharisaite ahoupih a akiang uah, “Khawlni-in sukdam asiang hiam sianglou?” achi a.

            4 Amauh adai chiat ua, tuachi’n aman damlou pen atu a, adamsak a, a paisakta hi. 5 Tuachi’n akian uah, “Na lak ua kuan ahia, na sabiltung uh hiam, na bawngtal uh hiam guamkhuk ah hiataleh, khawlnia zong kaikhialou ding,” achi hi.

            6 Tualeh amau’n hih thute a dawngthei kik takei uhi.

Kingaih ngiamna gentehna thu

7 Tualeh amisapte un munhoih pen ateljel uh amu a, akiang uah genteh thu in agen a: 8 “Kitenna a kuahiam in ahung sap chiangin touna hoihpen ah toukei un, ahuachihkeh nang sang a mizah huaijaw ana sam kha ding a, 9 nang hungsampa leh amah na kiang ah hung pain, ‘hihpa tounang awn in, ahung chi ding a, nang jumtakin mun ngiam pen ah nava tou kha ding hi,’ 10 ‘Hinanleh ahung kisap chiangin pai inla mun hoihlou pen ah vatou jaw in; tuachi’n a hung samtu ahung pai chiangin na kiangah lawm asang deuh ah hungtou in, ahung chithei ding a.’ tuatak chiangin na an nekpihte zahbawl in na om ding hi. 11 Kuapeuh amah kingaisang tuh angiam  diing a, tualeh amah kingaingiam tuh tawisang in a om ding,” achi hi.

            12 Tuachiah aman ankuang luipa kiangah zong, “Sun ankuang hiam, jan ankuang hiam nalui chiangin, nalawmte, na sanggamte, na innkuanpihte tualeh naveng mihausate zong sam ken; a huachihkeh amau’n zong ahung sam kha ding ua a hungthuk kha ding uhi. 13 Hinanleh ankuang nalui chiangin, tagahte, piangsualte kengbaite tualeh mittawte samjaw in. 14 Tuachi’n na hampha ding hi; ajiak amau’n ahung thukjou kei ding ua, midiktatte thokkik chaingin thuk in na om ding hi,” achi hi.

Kitenna ankuang gentehna

(Mat. 22.1-10)

            15 Tualeh a an nekpihte khat in hihthu ajak in akiang ah, “Pasian gam a an nedingte ahampha hi!” achi hi. 16 Tuachi’n aman akiang ah, mi “Kuahiam khat in ankuang luina thupitak abawl a. 17 Tualeh annek hun in mi achialte kiangah, ‘Hung paiun tuin bangkim amanta!’ vachi dingin silapa asawl a. 18 Tualeh amau’n  ki thutuak in suanlam anei chiat ua, amasa pen in akiang ah, ‘Lou kaleita a a en ding a kapai poimoh hi, nung ngaihsiam kung ngen hi.’ Achi hi.

19 Adan in, ‘Bawngtal tuahnga kaleita a, asiat aphat en ding a kapai poimoh hi, nung ngaihsiam kung ngen hi,’ achi a. 20 Tualeh adang khat in,’zi ka neita atuajiakin kung paithei kei hi,’ achi a.

21 Tuachi’n hua silapa ahung paia, huathute apu a hunghilh a, tuachiah hua inn neipa heh in, a silapa kiangah, ‘Kongjing leh daining lak ah kintakin pai inla, tagahte, piangsualte, mittawte tualeh kengbaite hih teng ah hung puilut in,’ achi hi. 22 A silapa’n, ‘Nung thupiak bang in ka bawl jouta a, hinanleh mun a awng nalai hi,’ achi hi. 23 Tuachi’n apu in a silapa kiangah, ‘Lamlian leh daipam ah pai inla ka inn a dimtheihna dingin mi hung jawllut hamham in, achi hi.

24 Ajiak kung hilh ahi, ka misapte khat mah in zong ka ankuanglui a chiamkha kei ding uhi!’ ” achi hi.

Nungjui hihna man

(Mat. 10.3,38)

            25 Tualeh mipi thupitak tawh amah apaita ua, tualeh amah aki nunghei a, akiang uah 26 “Mi kuapeuh ka kiang a hungpai in, apa, anu, atate, a sanggamte, asanggamnu leh amah hinna nangawn tawh ahuat kei leh ka nungjui ahithei kei ding. 27 Tualeh kuapeuh a kross pua a hung juilou tuh ka nungjui ahithei kei ding. 28 Tualeh nou kuapeuhin innsang lam sawm in alamzohna ding aneih leh neihlouh ding tou masa phot a alut ding zah tuat masalou ding kua nahi ua? 29 A tuachih kei leh suangphum alepzoh nung in lamjou kei taleh amu jousiahin nuihsan in, 30 ‘Hihpa’n innlam pan ngal a hinanleh a jouthei takei!’ achi kha ding uh. 31 Ahihkeileh kumpipa kua ahiam kumpi dang dou ding a kuan ding in, tou masa phot a, amah dou ding a mi singnih tawh hung kuanpa mi singkhat tawh atuah ngam ding leh ngamlouh ding ngaihtuah masa lou ding? 32 Ahihkei vanglakleh kumpi khat pen gamlapia aom laiin kilemna thuchiam ngen dingin palai asawl ding hi. 33 Tuachimah bangin noulak ah aneih jousiah paisan lout uh ka nungjui ahithei kei ding.”

Pannabei chi

(Mat. 5.13; Mrk. 9.50)

            34 “Chi ahoih a hinanleh alimna beitaleh bangchin a alkik thei dia? 35 Leia dingin ahoihkei ding a, ekvum dingin zong ahoih kei ding, mi’n apaikhia uh. Kuahileh jakna ding a bil nei jousiahin ja hen!” achi hi.

Luka 15

Belam mang gentehna

(Mat.18.12-14)

            1 Tuachi’n siah dongte leh mikhialte jousiah athu ngaikhia dingin akiang ahung juan ua, 2 tualeh Pharisaite leh Laigelhmite’n, “Hihpa’n mikhialte a kapawlpih a, an anekkhawmpih!” chi’n aphun ua 3 Tuachi’n amah hih gentehna akiang uah agen a:

            4 “Na lak ua mi kuahiam in belam ja nei henla, alak a khat mansuah taleh, sawmkua leh kuate gamdai a nusia a amangpen amuh masiah vazonglou ding kua nahi ua?  5 Tualeh amuh takin kipak takin aliangkou apua a 6 tualeh inn atun in lawmte leh a innvengte a samkhawm a, ;Hung kipahpih un, ka belam mang ka mukikta hi!’ achi hi.  7 Kung hilh ahi, huachimah bangin midik kisikna ding neilou samkua leh kuate tung ah sang in mikhial khat kisik tung ah van ah kipakna alianjaw ding.

Dangka mang gentehna

            8 “Ahihkeileh numei kuahiam khat in daan dangka sik sawm neiin, khat mansuah taleh, meivak de a, inn phiat a, amuhkik masiah kua ahia hoihtak a zonglou ding? 9 Tualeh amuhkik chiangin alawmte leh a innvengte asam khawm a, ‘Hungkipahpih un ka dangka mansuah ka mukikta hi!’ achi hi. 10 Kunghilh ahi, tuachimah bangin Pasian vantungmite mai ah mikhial kisik khat tung ah kipahna a om hi.”

Tapa taimang gentehna

            11 Tuachi’n aman, “Mi kuahiam khat in tapa nih anei a. 12 Tualeh a naupangjaw pa’n apa kiangah, ‘Pa, gou katan ding teng hungpia in,’ achi a. Tuachi’n apan a dangka amauh ahawmsak ta hi. 13 Tualeh nisawt lou nung in a tapa naupangjaw pa’n atanteng aun in ala khawm a, khual gamlapi ah azinta hi. Tualeh huamun aha neih teng paktat takin ava zangbeita hi.

14 Hinanleh aun a ajakbei takin tuagam ah kial nasatak a hungtungta a, nek ding ahung ki tasamta hi. 15 Tuachi’n amah apai a, huagammi khat avabelta a, huapa’n amah vok an piading in loulam ah anasawl a. 16 Tualeh vok nek be hawngte a agil vahsak a ut mahmah a; kuaman lah bangmah apia kei hi. 17 Hinanleh amah leh amah ahung kiphok takin, ‘Ka pa kiang a kilawh silate annek senglouh a nei a atamtam utawh, keilah gilkial a siding himai ing a!  18 Ka thou ding a, kappa kiangah ka pai ding a, akiang ah, “Pa, van a tungah leh nangma mitmuh in sil ka bawlkhialta hi. 19 Na tapa chihtak zong ka hinawn kei, na kiang a kilawh na silate khat bangin hungbawl in, ka chi ding,” achi hi. 20 Tualeh athou a, apa kiangah ahung paita a.

            “Hinanleh gamlapi a aom lain, apa’n anamu a, ahehpih mahmah a, atai a, a ngawng kawi a, atawp a. 21 Tualeh a tapa in akiang ah, ‘Pa,’ ‘vantung leh nang mitmuh in sil ka bawlkhialta, na tapa chitak zong ka hinawn kei,’ achi hi. 22 Hinanleh apa’n asilate kiangah, ‘Kintakin! Puan hoihpen hung lakhia unla, silhsak un; a khut ah khutsip bulhsak unla, a keng ah khedap bulhsak un. 23 Tualeh bawngnou thautak hung la unla, gou un, tuachi’n ine ding a kipak takin I om ding uh! 24 Ajiak ka tapa pen asi a, ahubg hingkikta hi,’ achi a. Tuachi’n kipak takin a omta uhi.

            25 “Tualeh a tapa upajaw pen lou ah aom a, inn ahungtun kuan in, sil tumging leh lam tahwmging a jata a, 26 Tutakin asilate khat asam a, hihte bang ata le? chi’n adong a. 27 Tualeh amah pa’n a kiang ah, ‘Na naupa a hungtung a,’ ‘dam leh hoih a amuhkik jiakin napa’n bawngnou thautak athah ahi,’ achi hi. 28 Tuatakin amah ahehta a, alutnuam takei a; tuajiakin apa hung pawt khia a, ahung jawl a. 29 Tuachi’naman adawng a apa kiang ah, ‘Ngaiin kum hijahpi hungvak ing a, khatveimah zong na thupiak juikhiallou ing a, huachi in zong kalawite tawh gualnop ka bawlna dingin kelnou khat zong nung piangai kei! achi hi. 30 Hinanleh na tapa kijuakte kiang a na dangka teng vazangbeipa a hungtun takin amah a dingin bawngnou thautak nagohsak pai hi!’ achi hi. 31 Tualeh apa’n a kiang ah, “Tapa,’ ‘nang na kiang a omjing nahi a, ke neih jousiah zong nang a ahi. 32 Kipak tak leh nuamtak a i om ding hilou maw? Ajiak hih inaupa asi a ahung hingkikta hi; amang a i mukikta hi,’ achi hi.

Luka 16

Dangka kemtu diktatlou gentehna

            1 Aman a nungjuite kiangah hihthu zong agen a, “Mi hausa kuahiam in dangka kemtu khat anei a, amahpa’n a dangka amok zakthang sak chi’n a kiang ah ahek uhi. 2 Tuatakin amah asam a akiang ah, ‘Na tungthu kaja hi bangchi ahia? Na dangka kep thu hungpia in, tubansiah dangka kem in napang nawn kei ding,’ achi hi. 3 Tuachi’n dangka kem pa’n a lungsim in, bang chi ding kata le? ‘Ka pu inlah ka dangka kep hung tawpsak ding ahita a, leitawh lah ngaplou ing a, khutdoh lah jum ing a. 4 Dangka kem ahung tawpsak chiang a a inn ua ahung omsak theihna ding un ka bawldan ding ka theita!’ achi hi. 5 Tuachi’n  apu dangka bate asam khawm a, a masapen kiangah, ‘Kapu a bangjah ahia nabat?’ achi hi. 6 ‘Aman sathau tehna jakhat,’ achi a. Tuachi’n aman akiang ah, ‘Nalai la inla toukin inla sawmnga gelh in,’ achi hi. 7 Tuachi’n adang khat kiangah, ‘Nang bangzah ahia nabat?’ achi a. ‘Aman buh tehna jakhat.’ achi a, ‘Nalai la inla sawmgiat gelh in,’ achi hi. 8 Hua dangka kemtu diktatlou pa apu in alemsiam jiakin aphat ta hi, ajiak vak tate sang in hih leitung tate atulai thu ua apil jawk jiak un.”

            9 “Tualeh kunghilh ahi, na dangka lem un nalawm ding uh kibawl un; hua abei hun chiang a tangtawn a omna a nou zong a hung omsak theihna ding un. 10 Kuapeuh tawm nou khat tung a gin-om tuh tampi tungah zong agin-om hi; tualeh kuapeuh tawmnou khat tung a gin-om lout uh tampi tungah zong agin-om kei ding hi. 11 Huajiakin diktatlouhna dangka tung a na gin-om kei uleh, kuan ahia nou dangka tak hung kemsak ding? 12 Tualeh midang tung a bawn na gin-om kei uleh, kuan ahia nou atak hung pia ngam ding?

            13 ”Sila khat hua in khat a it ding a; ahihkeileh khat gum in khat ahua ding hi. Pasian nna leh dangka nna na semkop thei kei ding uh,” achi hi.

Jesu’n Pharisaite ataina

(Mat. 11.12,13; 5.31,32; Mrk.10.11,12)

            14 Tualeh dangka ngaina Pharisaite’n zong hihthu aja ua, amah anuihsan ua. 15 Aman akiang uah, ‘Mi mitmuh a siamtan tumte nahi uh; hinanleh Pasian in na lungtang uh athei hi; ajiak mihing lak a pahtawi a om Pasian mit muh in kihdakhuai taka hi.

            16 “Dan leh Jawlneite thu baptispa Johan hung om tan chiang aom a; huabansiah Pasian gam tangthupha akigen a, tualeh mijousiahin hua-ah lut asawm chiat uhi. 17 Tualeh danthu neunou khat aman sang in van leh lei aman abaihlam jaw hi.

Mi hausapa leh lazar

            19 “Mi hausa kuahiam khat a om a, puan sandup leh puan malngat asilh a, niteng in nuamsatak in a om hi. 20 Tualeh lazar kichi apumtang a meima a dim a kawngkhak bul a alupsak jel uh khut doh khat a om a, 21 mi hausapa dohkhan a pat kateh neng kia pouh nek a ut a, uite ahung pai a ameima aliahsak jel uhi. 22 Tualeh hichi a hung hi a, tua khutdohpa asi a, vantungmite’n Abraham angsung ah apaipih ua. Tualeh mi hausapa zong asi a, vui in a omta a, 23 tualeh gawtmun ah gimthuak in aom a, adaktou a, gamlapi a om Abraham leh a angsung a Lazar om amuta hi.  24 Tuachi’n a kikou a, ‘Pa, Abraham! Ka tungah zahngai inla, Lazar akhut muk tuia diahkawt a ka lei hung votsak dingin hung sawl in, hih meikuang ah kagimmahmah hi!’ achi hi. 25 Hinanleh Abrahamin, ‘Tapa, nang na damlaiin silhhoihte na kimuh a, tuachi bang in Lazar in sil hoihloute amu chih gelkhia in; hinanlehtu’n amah khamuan in aom a, nang gimthuak in na om hi. 26 Tualeh hihtelou zong kou leh nou kikal ah guam thupitak koih in aom hi; hihlam a kipan noulam a paisawmte paitheihlouh nang in leh noulam a pat a hihlam a hung paisawmte paitheihlouh nang in achi hi.’ 27 Tualeh aman, ‘Ahihleh Pa, amah ka pa inn a sawl dingin kung ngen hi, 28 sanggam pasal nga kanei a, amauh vahilh hen.Ahuachih keileh amauh zong hih gimthuakna mun ah a hungpai kha ding uh, achi hi.’ 29 Abraham in a kiang ah, ‘Amau’n Mosi leh Jawlneite anei uh; huate thu ngaikhia uheh,’ achi hi. 30 Tuachi’n aman, ‘Hilou e, Pa Abraham! Misi lak a mi khat akiang uah vapaileh akisik ding uh,’ achi hi. 31 Aman, ‘Mosi leh Jawlneite thu a ngaihkhiat nuam kei uleh misi lak a kipat mi khat thoukik nanleh zong a taksan tuan kei ding uhi.” achi hi.

Luka 17

Jesu’n ataihilh

(Mat. 18.6,7,21,22; Mrk. 9.42)

            1 Tuachi’n aman nungjuite kiangah, “Puknate omlou thei ahikei, hinanleh pukna omsaktu tung agik hi! 2 Hih mineute lak a khat apuksak sang in, a ngawng ah buhgawini suang awhsak in tuipi ah kipai leh amah a dingin ahoihjaw ding hi.” 3 Pilvang un!

            “Na sanggam pa’n natung a sil a bawlkhial leh phawk in, tualeh akisik leh ngaidam in. 4 Nikhat sung a natung a sil sagihvei abawl khial a sagihvei na kiang a, ‘Ka kisik hi,’ chia nanglam ahung kihei kikleh na ngaihdam ding ahi,” achi hi.

Ginna

            5 Tualeh sawltakte’n Toupa kiangah, “Ka ginna uh khangsak in,” achi ua. 6 Toupa’n, “Annkam tang khat bang ginna naneih uleh hih kawl sathau kung kiangah, ‘Na kibawtkhia inla tupi ah na kisuan in nachi ding ua!’ na thu uh amang ding hi.

Sila mohpuakna

            7 “Nou lak a kua nahi ua, loukai hiam, belam ching ahiam a sila khat nei a, lou a pat hungtun chian a pai inla an neding in toungal in ana chi ding? 8 “Ka nek ding hung bawlsak inla, nakawng gak inla, ka nek a ka danzoh masiah ka nek ding bawl in, huazoh chiangin nang ne-in nadawn ding, chijaw lou ding maw?” 9 Aman hua silapa kiangah thu kipia bang a abawl jiakin apakta ei le? 10 Huachi mahbang in nou zong na kiang ua thupiak jousiah na bawlzoh chisng un, ‘Sila phatuam lou ka hi uh ka bawl ding mawng uh ahi ka bawl uh, chi un,’ “ achi hi.

Jesu’n phak sawm adamsakna

            11 Tualeh hichi ahung hi a, Jerusalem juan a apai in Samaria leh Galili gam atuan paisuak a. 12 Tuachia khuakhat a alut phak sawm in ana lamdawn ua, amauh gamlapi ah ading ua 13 tualeh aw ngaihtak in akikou ua, “Jesu! Siapa! Ka tung uah zahngaiin!” achi ua.

            14 Tualeh aman amauh amuhtak in akiang uah, “Pai unla siampute va ki ensak un,” achi a. Tualeh hichi ahung hi a, apai lai un ahung siangthouta uhi.

            15 Tualeh alak ua khat in adamta chih ahung kitheih takin akik kik a, aw ngaihtak in Pasian aphat a. 16 Jesu kengbul ah a khupbok a, kipahthu agen hi, amah Samaria mi ahi. 17 Tuachi’n Jesu’n adawng a, “Sawm hilou maw suksiangthou a om; kuate khoia om ta ula?  18 Hih gamdangmipa chihlouh Pasian phat ding ahung kik kik kuamah akimu kei,” achi hi. 19 Tuachi’n aman a kiang ah. “Thou inla, paita in, na ginna in ahung damsakta hi,” achi hi.

Hung tung ding kumpi gam

(Mat. 24.23-28, 37-41)

            20 Tualeh Pharisaite’n Pasian gam hungtun hun ding adok uleh aman adawng a akiang uah, “Pasian gam muhtheih in a hungtung kei hi. 21 Tualeh, ‘En un, hihtak ah!’ ahihkeileh, ‘En un, huatak ah!’; zong achi kei ding uh, bangjiakin ahia ichihleh, ngaiun, Pasian gam pen nalak uah aom hi,” achi hi.

            22 Tuachi’n aman a nungjuite kiangah, “Mihing Tapa damlainite nikhat bek na muhnuam ni uh ahung om ding, hinanleh na mukei ding uhi. 23 Tualeh amau’n na kiang uah, ‘En un, hiteng ah!’ ahihkeileh, ‘En un, huatak ah!’ ahung chi ding ua, pai kei unla, anung uh zong juikei un. 24 Tunphe van mong langkhat a aphet a, van mong langkhat lam tanpha asalhvak mahbang in mihing Tapa zong ahung paini in ahi ding. 25 Hinanleh hua masang in sil tampi athuak ding a, tulai khangthakte deihouh in aom ding hi. 26 Noah damlai a sil omdan bang in Mihing Tapa hung paikik ni chiangin zong ahi ding hi. 27 Noah gunkuang a alut a tui ahung let a, aun ua a hihlupni atun masiah ane un, adawn ua, zi anei ua, tualeh zileh ta in akipia tuah uhi. 28 Tuachimah bang in Lot damlai in zong aom ua, ane un adawn ua, alei ua ajuak ua, asuan un alam uhi. 29 Hinanleh Sodom khua a pat Lot apawt ni-in van a pat in mei leh kat aju a, aun un a kanglumta hi. 30 Tuachimah bang in Mihing Tapa hung kilakni chiangin ahi ding hi.

            31 “Tuani chiangin kuahileh inn tung a om innsung ah a dangka omte lading in kum kei hen; tualeh huachi mahbang in kuapeuh lou a om zong hungkik kik kei hen. 32 Lot zi theijing un! 33 Mi kuapeuh a hinna humbitna zong in ata’n ding a, tualeh kuapeuh ahinna ta’n in ahumbit ding uhi. 34 Kunghilh ahi, huazan in lupna khat ah minih alum ding a: khat lakmang in aom ding a, khat nutsiat in a om ding. 35 Numei nih ansu in a om ding a, khat lakmang in a om ding a, khat nusiat in a om ding.” 36 Lou ah minih aom ding ua, khat lakmang in aom ding a, khat nutsiat in aom ding, achi hi.

            37 Tualeh amau’n adawng ua akiang ah, “Toupa khoi ah la?” achi ua,

            Aman akiang uah, “Saluang omna phot ah langta zong a omkhawm ding uh,” achi hi.

Luka 18

Thuikhenmi leh meithainu gentehna

            1 Tuachi’n Jesu’n mi’n lungkialou a athum gige ding uh ahi chih theihna dingin akiang uah gentehna thu khat agen a. 2 “Khuapi khat ah Pasian zong laulou tualeh mihing zong bangmah a simlou vaihawmtu khat a om hi. 3 Tualeh hua khuasung ah meithai khat zong om a; amahnu akiang ah a hungpai a, “Ka langpa tung ah phuba hung laksak in!” achi hi. 4 Tualeh amah tomkhat sung a ut kei a, hinanleh a nung in a lungsim in, ‘Pasian laulouin mihing bangmah in simkei nanleng zong, 5 hih meithainun ahung sukbuai jiakin aphuba ka laksak ding; ahuachih keileh hungh paithithe leh, ahung gimsak kha ding!” achi hi.

            6 Tuachi’n Toupa’n “Thukhentu diktatlou thugen ngai un. 7 A tung ah dohjou tadih nanleh, amitelte, sunleh jan a amah samte phuba laksaklou ding ahi hiam? 8 Kung hilh ahi, aman aphuba alaksak pai ding hi. Hinanleh Mihing Tapa a hungpai hun chiangin leitung ah tuabang ginna ahung muna diam?” achi hi.

Pharisaipa leh siah dongtu gentehna

            9 Tualeh aman mi amah midiktat a kingaihtuah a midangte simmoh kuate hiam kiangah hih gentehna thu agen a,  10 “Mi nih Pasian tempul ah thumna nei dingin apai tou ua: khat Pharisai ahi a, adang khat siah dongtu ahi. 11 Pharisaipa ading a, amah guak in thumna anei a, ‘Pasian, midang vau a sum laksakte, dikloute, angkawmte, bang ka hihlouh jiak leh, hih siahdongpa bang ka hihlouh jiakin natung ah ka kipak hi. 12 Kal khat sungin nihvei ka ngawl a, kaneih jousiah sawm a khat kapia jel hi,’ achi a. 13 Tualeh siah dongpa gamla tak ah dingin, van lam zong a enngam kei a, hinanleh, ‘Pasian kei mikhial tung ah zahngaiin!’ chi’n a awm atum a.

14 Kung hilh ahi, khat pen sang in hihpa siamtang in a inn ah a paisukta hi; kuapeuh amah kingaithupi peuhmah a ngiam ding a, tualeh mi amah kingaingiam peuhmah tawisang in aom ding,” achi hi.

Jesu’n naupang neuter a gualjawl

(Mat. 19.13-15; Mrk. 10.13-16)

            15 Tuachi’n akhoih dingin a kiang ah naungekte a hungpaipih ua, hinanleh nungjuite’n amuhtak un anatai ua, 16 hinanleh Jesu’n amauh asam a, “Naupang neute ka kiangah hung paisak unla, kham kei un, Pasian gam hichibang mite a ahih jiak in. 17 Adiktak in kung hilh ahi! Kuapeuh Pasian gam naupang neute bang a kipahpihlou tuh, asung ah alut kei ding,” achi hi.

Jesu’n tangval mihaupa a thuhilhna

(Mat. 19.16-30; Mrk. 10.17-31)

            18 Tualeh vaihawmtu khat in a kiangah, “Siapa hoih aw, tangtawn hinna ka tantheihna dingin bang ahiam ka bawl ding?” chi-in adong a.

            19 Jesu’n a kiang ah “Bang ding a hoih hung chi na hiam?” “Mi khat guak chihlouh kuamah ahoih aom kei, hua ahihleh Pasian ahi. 20 ‘Angkawm ken, tualthat ken, gu ken, theihpihtu diklou in pang ken, nanu leh napa zahtak in chihte,’ “ achi a.

            21 Aman, “Hihte jousiah kaneu a pat kana juih ahita hi,” achi a.

            22 Jesu’n hihthute ajak takin a kiangah, “Silkhat nasam nalai hi, naneih jousiah juak inla, mijawngte kiangah pia in, tuachi’n van ah gou na nei ding tuazohchiang in hungpai inla, hung jui in,”achi hi. 23 Tualeh aman hih ajak in a lungkham mahmah a, mi hausa mahmah ahih jiak in.

            24 Tualeh Jesu’n a lungkham mahmah chih amuh in, “Mi hausate a dingin Pasian gam lut haksa hina tazen e! 25 Mi hausa Pasian gam a alut sangin sangawngsau phinbil vang a alut paisuak abaihjaw hi,”achi hi.

            26 Tualeh hihthu jatuten, “Tuachi ahihleh kua hundam in a omjou dia?” achu ua.

            27 Hinanleh aman, “Mihing ding a sil hihtheiloute Pasian dingin ahi thei hi,” achi hi. 28 Tuachi’n Peter in, “En-in! Kou bangkim nusia in kung jui uhi,” achi hi.

            29 Jesu’n akiang uah, “Adiktak in kung hilh ahi, Pasian gam jiak a a inn hiam, anu leh apa hiam, a tate hiam nusia tuh 30 tu adamsung ngeiin aleh tampi tualeh hun hungtung ding a tangtawn henna tawh mulou ding kuamah a om kiei,” achi hi.

Jesu’n asih ding a genkholh thumveina

(Mat. 20.17; Mrk. 10.32-34)

            31 Tuachi’n aman sawmlehnihte apaipih tuam in akiang uah, “Ngaiun! Jerusalem a paitou ding ihi a, Mihing Tapa tungtang thu Jawlneite laigelh jousiah ahung tangtung ding hi. 32 Amah Jentelte khut ah piak khiat ahi ding a; chiamnuih bawlnan azang ding ua, jumhuai takin abawl ding ua, chil asiatkhum ding uh. 33 Tualeh avua ding ua, athat ding uh; tualeh nithum nin athoukik ding,” achi hi.

            34 Amau’n hih silte atheisiam kei ua, hih thute alak uah phual in aom a, thu kigente zong athei kei uhi.

Mittaw khat sukdamna

(Mat. 20.29 – 34; Mrk. 10.46-52)

            35 Tuachi’n hichi ahi a, Jeriko khua atun kuan in mittaw kuahiam khat khutdoh in lamgei ah ana tou a. 36 Aman mipi pai thawmging aja a, “Bang thu ata?” chi’n adong a

            37 Amau’n “Nazareth Jesu pai ahi.” Chi’n ahilh ua.  38 Tualeh aman, “Jesu! David Tapa! Ka tung ah zahngain!” chi’n akikou a.

            39 Tuachi’n amasate’n dai dingin atai ua, hinanleh amah, “David Tapa! Ka tung ah zahngaiin!” chi’n aki hahkou sem a.

            40 Tuachi’n Jesu adinkhawl a, amah akiang a hung paipih dingin thu apia a; tualeh a akiang a hungtun in ana dong a, 41 “Na tung ah bang hung bawlsak leng na ut ei? achi a. Aman, “Toupa, muhtheih ka ut hi,” achi a.

            42 Jesu’n a kiangah, “Mutheita in! Na ginna in ahung daksak ahi,” achi hi.

43 Tualeh thakhat in ahung mutheita a, Pasian pahtawi kawm in amah ajuita a; tualeh mijousiahin hih amuh tak un Pasian aphatta uhi.

Luka 19

Zakai

            1 Tuachi’n Jesu Jeriko khua ah alut a, apaisuak a. 2 Tualeh ngaiin, mikhat amin Zakai kichi, siah dong lamkhat khat aom a, amah mi hausatak ahi. 3 Tualeh aman Jesu mi bang chibang ahiam chih muh asawm a, hinanleh mipi lak ah adin a ngiam jiakin amu thei kei hi. 4. Tuachi’n ana matai a, a en dingin theipi kungah akah a, aman hua lampi hungjui ding ahihjiak in. 5 Jesu huamun ahungtun in, adaktou a, amah amu a akiang ah, Zakai, “Kintakin hung kum in, ajiak tuni’n na inn ah hungtung ding ka hi,” achi hi.

            6 Tuatakin kintakin akum a, kipak takin amah a zintunta hi.  7 Hinanleh amau’n hih amuh tak un, “Mikhialte  inn a tung dingin apai tave!” chi’n aphun uhi.

            8 Tuachi’n Zakai ading a, Toupa kiangah, “Toupa, en in! ka dangka kimkhat mi gentheite kiangah ka pia ding a, tualeh mi neihsa khat peuh diklou tak a kalak aom leh alehli in kadin ding,” achi hi.

            9 Jesu’n akiang ah, “Tuni’n hih inn ah hundamna a tungta hi, amah zong Abraham tapa ahihjiak in.  10 Ajiak mangthangte zong ding leh hundam ding a Mihing Tapa hungpai ahi,” achi hi.

Talent gentehna thu

(Mat. 25.14-30)

            11 Tualeh hih thute a ngaihkhiat lai un Jerusalem anaih ta’k jiak leh Pasian gam hungtung pai ding a ngaihsut jiak un gentehna thu khat agen beh hi. 12 Aman huajiakin agen a, “Mi thupi kuahiam khat kumpi gam khat la a hung kileh kik dingin khual gamla tak ah ahawh a.

13 Tualeh aman a sila sawmte asam a, ‘Dangka-eng sawm akiang uah apia a, tualeh kung paikik masiah hihtawh summet na bawl un,’ akiang uah achi hi. 14 Hinanleh amite’n amah ahua ua, ‘Hihpa katung ua vaihawm dingin ka deihkei uh chi’n anung ah palai asawl uhi.

            15 “Tualeh hichi ahung hi a, gam avanei a, ahung kilehkik in, a dangka peipung dan uh theihna dingin a sila dangka apiakte a kiang ah asam sak a. 16 Tuachi’n khatnapa ahungpai a, “Toupa na dangka-eng sawm in apung hi,’ achi a. 17 Aman a kiangah, ‘Hoih e,’ ‘nang sila hoih! Sil tamnou khat tung a na gin-om jiakin khuasawm tung a vaihawmtu in pang in,’ achi hi. 18 Anihnapa ahung pai a, ‘Toupa, na dangka-eng nga in apung hi’ achi a. 19 Aman tuachi mahbang in a kiangah, ‘Nang zong khua nga tung a vaihawm in pang in achi hi.’ 20 Tuachi’n adang ahung pai a. ‘Toupa en-in, na dangka-eng hiah aom hi, kinawtna puan in ka tu’n a hoihtak in ka kem hi.

21 Ajiak migumtat nahi a kung lau hi, na koihlouh zong nala a, tualeh na tuhlouh zong na-at hi’ achi a.  22 Aman a kiangah, ‘Nang sila gilou! Na kamsuak ngeiin siamlouh kung tangsak ding. Migumtat kahih a, ka hoihlouhna a zong ka lak a, tualeh ka tuhlouhna a zong ka-at nathei hi. 23 Atuachi nahihleh kungtun chiang a ka dangka apung tawh ka laktheih ding a ka dangka dangka inn a na koihlou na hia?’ achi hi. 24 Tuachi’n aman agei a dingte kiangah, ‘A dangka laksak unla, sawm neipa kiangah pia un,’ achi hi. 25 Hinanleh amau’n a kiang ah, ‘Toupa, aman dangka sawm anei!’ achi ua; 26 ‘Ajiak kung hilh ahi,’ ‘kuapeuh aneite piakbeh ahi ding a, tualeh kuapeuh aneiloute aneihsun zong laksak ahi ding hi. 27 Hinanleh ka melmate atung ua ka vaihawm ding deihloute hungpui unla, kamai ah that un!” achi hi.

Jesu gualjou a Jerusalem a alutna

(Mat. 21.1-11; Mrk.11.1-11; Jhn.12.12-19)

            28 Tualeh aman hichibang thu agenkhit in a lamkaih a, Jerusalem lam juanin apaitou ua.

29 Tualeh hichi ahi a, Olive kichi mual a Bethphage leh Bethani khuagei a hungtun un a nungjuite lak a minih asawl a 30 “Namai ua khua ah vapai unla, na lut chiang un sabiltung nou kuamah tuanngai nailouh navamu ding uh, sut unla, hungkai un. 31 Tualeh mi kuapeuhin bangding a nasut uh chia a hungdok uleh, Toupa’n apoimoh hi, chi’n akiang uah gen un,” achi hi.

            32 Tualeh asawlte avapai ua, akiang ua agen bangbang in avamu uhi. 33 Hinanleh sabiltungnou asut uleh aneiten akiang uah, “Sabiltung nou bangding a nasut uh ahia?”  achi ua.

            34 Amau’n, “Toupa’n adeih a ahi” achi ua, 35 tuachi’n Jesu kiangah ahung kai ua. Tualeh sabiltung nou tungah apuante uh aphah ua, atung ah Jesu atousak uhi. 36 Tualeh apailai in lampi ah apuante uh aphah ua.

            37 Tuachi’n atun ding kuan a Olive mual kumsukna ding takah nungjui mipi jousiahin asil thupi bawlte jousiah amuh jiak un akipak ua aw ngaihtakin Pasian apahtawi ua: 38 “Toupa min a hungpai kumpipa ahampha hi, van ah lemthu leng henla, tungnungpen ah thupina om hen!” chi in

            39 Tualeh mipu lak a Pharisai khenkhat in, “Siapa, na nungjuite phawk in,” achi ua.

            40 Aman adawng a akiang uah, “Kung hilh ahi, hihte adaih uleh hih suangte akikou pai ding uhi.”

Jesu’n Jesrusalem akah khum

            41 Tualeh a tunkuan in khuapi amu a akahkhum a,  42 “Aw nangmah ngeiin tu nahun sung be’k in na khamuanna hung thei leteh maw! Hinanleh tuin aw na muhlouhna dingin akiphualta hi! 43 Ajiak hichibang nite natung ah a hungtung ding, na melmate in na kimkot in leikulh akhawh ding ua, na kimkawt in pawt theilouin ahung umkhum ding ua.

44 Tualeh nang leh natate tualsatna in ahung nei ding ua, na sung ah suang khatbek kithuap in a nusia kei ding uh; ahung kivehlai na theihlouh jiakin chi in!”

Jesu’n Pasian tempul a suksiangna

(Mat. 21.12-17; Mrk. 11.15-19; Jhn.2.13-22)

            45 Tuachi’n amah Pasian tempul sung ah alut a, siljuakte leh leite a hawlkhia a,

46 akiang uah, “Ka inn ahihleh tumna inn kichi ding ahi, chih gelh ahi. Hinanleh nou gutate kua innabawl uhi!: achi hi.

            47 Tualeh aman niteng in tempul ah thu ahilh a, hinanleh siampite, Laigelhmite leh mipi lamkaiten amah sukmang atum uhi, 48 hinanleh mipi jousiahin lunglut tak a athu angaihkhiat jing jiak un alwhna ding dan atheikei uhi.

Luka 20

Jesu thuneihna thu a dokna

(Mat. 21.23-27; Mrk. 11.27-33)

            1 Tualeh hichi ahi a, Pasian tempul ah thu hilh a, tangthupha agen laiin, nikhat siampite leh Laigelhmite upate tawh ahung pai ua 2 tuachi’n a kiang ah, “Kua thu in ahia hih silte nabawl? Kuan ahia thu ahung piak?” Hung hilh in, achi ua. 3 Hinanleh aman adawng a akiang uah. “Ken zong silkhat kung dong ding hi. Hung dawng un, 4 Johan baptisma van a kipan ahia, ahihkeihleh mihing a kipan?” achi a.

            5 Tuatakin amauh a kingaihtuah ua, “ ‘Van a kipan chileila, ahihleh bangding a gingta lou?’ Hung chi ding a. 6 Tualeh, ‘Mihing a kipan ahi chileila,’ mipi jousiahin suangin ahung deng ding uh, ajiak Johan hi Jawlnei ahi a chihchiat jiak un,” 7 Tuachi’namau’n, “Khoia pat ahia chih ka genthei kei uh,” chi’n adawng ua.

            8 Jesu’n akiang uah, “Ken zong bang thuneihna a hih silte bawl ka hiam chih kung hilh kei ding ahi.” achi hi.

Grep huan gentehna thu

(Mat. 21.33-46; Mrk. 12.1-12)

            9 Tuachi’n mipite kiangah hih gentehna thu agen a, “Mi kuahiam khat in grep huan abawl a, grep huanbawlmite kiangah asan dingin apia a, tualeh gamtuam ah sawtpi tam dingin paita hi.

10 Tualeh agah lawh hun in grep huan a agah ana piak ding un grep huanbawlmite kiangah a silate khat asawl a; hinanleh grep huanbawlmite’n amah anavua ua, khutguakin asawlmang ta uhi. 11 Tuachi’n aman sila dang asawl kik a, amah zong anavua ua, jumhuaitak in abawl ua, khutguakin asawlmangta uhi. 12 Tuachi’n aman athumna asawl kik a, amah zong ana hihliam ua, adelhdokta uhi. 13 Tuachi’n grep huanneipa’n, ‘Bang chi bawl ding kadiam? Ka tapa ittak ka sawl ding hi, amah be’k amuh chiang un amah anajah khamoh kei ding uh!’ achi hi. 14 Hinanleh grep huanbawlmite’n amah amuh tak un, ‘Hihpa gouluah dingpa ahi, agou itantheina ding un ithat ding uh!’ chi’n aki hou ua, a thatta uhi.

            “Tuajiakin, grep huanneipa’n atung uah bang chi’n abawl tadia le?” 16 “A hungpai ding a grep huan midangte kiangah apia ding hi” achi a.

            Amau’n hihtu ajak tak un, “Tuachi liangjaw tundah hen!” achi ua.

            17 Tuachi’n aman amauhte a en a,

“Ahihleh hihthu kigelh bang hiam?

      ‘Inn lamte suang deihlouh pen tuapen mah

            aning a suang poimoh pen ahung hita.’

Chih, achi a.

      18 Kuapeuh hih suangtung a puk tuh a kitattawng ding a; tualeh kuapeuh apukkhum tuh aguaijan ding hi,” achi hi.

Siah thu a dokna

(Mat. 22.15-22; Mrk. 12.13-17)

            19 Tualeh hua hunlai mah in siampite leh Laigelhmite’n amah mat asawm ua, hinanleh mipite alau uh, ajiak hua gentehna amauh demna a agen ahi, chih athei uhi.  20 Tuachi’n amah ata’ng ua, gam ukpa vaihawmna leh thuneihna atuttheihna ding un athu genkhialh man dingin midik kipang enkhiami asawlkhia ta uhi. 21 Tuachi’n amau’n a kiang ah, “Siapa, diktakin nagen a, na hilhjel, tualeh kuamah khentuam neilouin Pasian lampi diktakin nahilh hi chih ka thei uhi.

22 Kou a dingin Kaisar kiang a siah piak asiang hiam siang lou?” chi’n adong ua.

            23 Hinanleh aman a ze-et uh a thei a akiang uah, bangding a hung ze-et nahi ua? 24 “Makhai khat hung ensak un. Kualim leh kua laigelh ahia atuang?” achi a. Amau’n adawng ua, “Kaisar a,” achi ua.

            25 Aman akiang uah, “Tuajiakin Kaisar silte Kaisar kiangah pia unla, Pasian silte Pasian kiangah pia un,” achi hi.

            26 Tuachi’n mite maiah athu gen khialh mat ding amu takei ua, adawnna lamdang asa mahmah ua, adaita uhi.

Sihna a pat thohkikna thu a dokna

(Mat. 22.23-33; Mrk. 12.18-27)

            27 Tualeh thohkikna a om kei chi Sadukaite lak a mi khenkhat kiangah a hungpai ua, amah adong ua, 28 “Siapa, ‘Mosi-in kuapeuh a sanggam pa’n zi aneih a taneilou a asihsan leh anaupa’n zi aluah ding a, a upa dingin chi khahsak ding ahi,’ chi’n ahung gelhsak hi. 29 Tuin sanggam pasal sagih aom ua, atak pen in zi anei a, ta neilou in asi a. 30 Tuachi’n anihna in alauah a, ta neilou in asi a,  31 tualeh athumna in aluah a, tuachimah bangin asagihna in aluah a, ta neilou in asi chiatta uhi. 32 Atawpna in numeinu zong asita hi. 33 Tuajiakin thohkikni chiangin amahnu kua zi ahita diai? A sagih unlah zi-in aneichiat ua,” achi ua.

            34 Jesu’n adawng a akiang uah, “Hih leitung tate akiteng ua, tualeh zi leh ta in akinei uhi.

35 Hinanleh huahun chiang a jautak ding leh misi lak a pat thohkikna ajautak ding a aguatte akiteng kei ua, zi leh ta in zong akinei kei uhi. 36 Amauhte si zong asi nawn kei ding uh; ajiak vantungmite bang ahi ua; tualeh thohkikna tate ahihjiak un, Pasian tate ahi uh. 37 Misi kaihthoh in a om ding chih Mosi in zong sawlbuk mun ah :Toupa tuh Abraham Pasian, Isak Pasian tualeh Jakob Pasian achih lain a theisakta hi. 38 Amah misi Pasian ahi kei a mihing Pasian ahijaw hi; jiak ama ngaihin mi jousiah ahing hi,” achi hi.

            39 Tuachi’n Laigelhmite khenkhat in adawng ua, “Siapa, nagen dik hi!” achi ua. 40 Huanung in amau’n thu dang mawng mawng a dongngam nawn kei uhi.

Messiah thu a dokna

(Mat.22.41-46; Mrk.12.35-37)

            41 Tualeh aman akiang uah, “Krist hih David tapa ahi bang chidan a achih uh ahia? achi a. 42 Amah David ngeiin sam laibu ah,

                        ‘Toupa’n ka Toupa kiangah: ka jisat lam ah tou inla

            43 Na melmate nakeng ngakna a ka bawl masiah,’

achi a.  44 Tuajiakin David in amah Toupa’; achihleh bang chidan a a tapa hithei ding ahia?” achi hi.

Dan siate Jesu’n atai

(Mat. 23.1-36; Mrk. 12.38-40)

            45 Tuazoh in mipi kikhawmte jousiah jak in a nungjuite kiangah, 46 :puan-ak tual silh a vak ut, vanjuakna munte a chibai buk bang, kikhopna inna touna hoihpente leh ankuang luina a mun hoihpente tan ngaina Laigelhmite lak ah kiven un; 47 meithaite innsung anegam ua, mi khemna in sawtpipi thumna anei uh! Tuachibang mite’n siamlouh ahahtan sem ding uh!” achi hi.

Luka 21

Meithainu thohlawm

(Mrk. 12.41-44)

            1 Tualeh a dakkhia a, mihausate’n thohlawm bawm a dangka akhiat lai uh amu a, 2 tualeh aman meithainu jawng mahmah khat in paisasan nih akhiat lai zong amu a. 3 Tuatakin aman, “Adiktak in kung hilh ahi, amauhte tengteng sang in hih meithai jawng mahmahnu in akhia tamjaw hi. 4 Ajiak amauhte tengteng in aneihval uh Pasian thawhlawm bawm ah akhia ua, hinanleh aman ahinna ding a aneihsun teng a khiasiang hi,” achi hi.

Jesu’n Jerusalem siat ding thu a genkholhna

(Mat. 24.1,2; Mrk. 13.1,2)

            5 Tuachi’n kuate hiam in Pasian tempul thu, suang hoihtakte leh silpiak hoihtakte a zephoih ahihdan agen uleh aman, 6 “hih nasil muhte uh ahihleh sukchimlouh a suang khat tunga khat kichiang mawng mawng a omlouh hun a hungtung ding hi,” achi hi.

Buaina leh gimthuaknate

(Mat. 24.3-14; Mrk. 13.3-13)

            7 Tuachi’n amau’, “Siapa, hih silte bangchik chiang ahung om dia? Tualeh hih silte a hungtun ding chiangin bang theihsakna ahung om dia?” chi’n adong ua.

            8 Tualeh aman, “Khem a na omlouhna ding un pilvang un. ‘Krist ka hi!’ tualeh ‘Ahun tung ding ahita!’ chi’n mi tampite kamin in a hungpai ding uhi. Tuajiakin mauhte juikei un. 9 Hinanleh kidou thu leh buai thute najak chiang un lau kei un; ajiak hih silte hungtung masa ding mawng ahi; hinanleh atawpna ahung tungpai naikei ding hi,” achi hi.

            10 Tuachi’n aman akiang uah, “Nam tuam in nam tuam tualeh gam tuam in gam tuam adou ding. 11 Tualeh mun tuamtuam ah jin thupitak aling ding a, kialte hungtung in, hiite ahung leng ding; tualeh van a pat in sil lauhhuaite leh chiamtehna thupite ahung om ding hi. 12 Hinanleh hih silte atun ma in nou thong lak ah hungpaipih in ahung bawl genthei ding ua, ka min jiakin kumpipate mail eh vaihawmte mai ah ahung paipih ding uhi. 13 Hinanleh hihpen nou a dingin theisakna ahi ding. 14 Tuajiakin bangchi dawn ding chih ngaihtuah masalou dingin na lungtang uh kipsak un, 15 ajiak na melma jousiah un ahung dou ua, ahung sel theihlouh ding uh kam leh pilna kung pia ding hi. 16 Tualeh nanu leh napate uh, na sanggamte uh, nabehte uleh nalawmte un zong ahung mansak ding ua, nalak ua khenkhatte ahung hihlum ding uhi. 17 Tualeh kamin jiakin mijousiah huat in na om ding uhi. 18 Hinanleh nalu ua na samjang khat zong a mangthang kei ding hi. 19 Na kuhkal na uah na hinna uh na humbit ding uhi.

Jerusalem siat ding Jesu’n agen

(Mat. 24.15-21; Mrk. 13.14-19

            20 “Hinanleh galkapte’n Jerusalem a umkhum namuh chiang un amanthaina ding anaita chih thei un.  21 Huahun chaingin Judea gam a omte mualung ah tai uhen, asung a omte pawtdok uhen; tualeh gam gam a omte zong asung ah lut kei uhen. 22 Ajiak thu kigelh jousiah a tangtunna ding a ‘Huanite pen phuba lakni,’ ahi ding. 23 Hinanleh huani chiangin agaite leh ngaungek nawiteplai neite tung agik hi! gamsung ah haksatna thupitak leh hihmite tung a thangpaihna tung ding ahihjiak in. 24 Tualeh amauhte namsau hiam in asi ding ua, namchin kiangah sila a puiin aom ding uhi; tualeh Jentelte hun bukim masiah Jerusalem pen Jentelte totden in aom ding hi.

Mihing Tapa hungpai nang

(Mat. 24.29-31; Mrk. 13.24-27)

            25 “Tualeh ni leh kha leh aksite ah chiamtehna aom ding a; leitung ah namchin haksatne leh mangbatna a om ding; tuipi kihot in aging veng vung ding. 26 Mite launa jiak leh leitung a sil hungtung dingte ngaihtuahna jiakin a sibup ding uh; van silbawl theihnate kihihling ding ahihjiak in. 27 Tuachi’n amauhte’n Mihing Tapa silbawl theihna leh thupina thupitak tawh meilak a hungpai amu ding uhi. 28 Hih silte a hungtun kipat chiangin entou unla, dakkhia un, ajiak na tatna ni uh ahung naita hi,” achi hi.

Theipi kung gentehna

(Mat. 24.32-35; Mrk. 13.28-31)

            29 Tuachi’n aman akiang uah gent4ehna thu khat agen a: “Theipi kung leh singkung jousiah en un. 30 Anah ahungsel tak chiangin doupi ahung naita chih namu ua nathei uhi. 31 Tuachimah bangin hih silte ahungtun namuh chiang un Pasian gam ahung naita chih thei un.

            32 “Adiktak in adiktak in kung hilh ahi, sil jousiah a tangtun kim masiah tulai khangthakte amang kei ding uhi. 33 Van leh lei a mang ding a, hinanleh ka thu amang kei ding hi.

Kiveng gige akul dan

            34 “Hinanleh pilvang un ahuachih keileh nekvah taluat leh uain kham leh damsung khuasak ngaihtuahna in na lungtang uh adim talua kha ding a, tuachi’n huani na theihlou kal un a hungtung kha ding hi. 35 ajiak thang kipel bang a leitung pumpi a omte jousiah tung a tungchiat ding ahihjiak in. 36 Tuajiakin hih silte tengteng pelding leh Mihing apa maia dingtak ding a guat na hihtheina ding un bangchiklai peuhin thum unla, limsak hing un,” ahi hi.

            37 Tualeh aman sunaliin Pasian tempul ah athu ahilh a, jan chiangin a pawtdok a, Olive mual ah ava omjel hi. 38 Tuachi’n mipi jousiah jingsang in a kiangah tempul ah athu ngaikhia dingin ahung pai uhi.

Luka 22

Jesu thahsawmna

(Mat. 25.1-5; Mrk. 14.1,2; Jhn. 11.45-53)

1 Tualeh tanghou tol sawhlou ankuang luina paikan kut achih uh ahung naita a.  2 Tualeh Siampite leh Laigelhmite’n amah athahtheihna ding uh a ngaihtuah ua; mipite lah alau ua.

Juda Iskariot muanhuai louhna

(Mat. 26.14-16; Mrk. 14.10,11)

            3 Tuachi’n sawmlehnihte lak a pang Juda amin khem Iskariot achih uh sung ah setan alut a. 4 Tualeh apaita a, akiang ua Jesu amatsak theihna dingdan siampite leh Laigelhmite ava kihoupih hi. 5 Tuatakin amauh akipak mahmah ua, amah dangka piak digin ana chiamta uhi. 6 Tuachi’n aman lem asata a, mipi omlouhkal a matsakna ding lemtang a zongta hi.

Paikan kut nunungpen

(Mat.26. 17-25; Mrk. 14.12-21; Jhn. 13.21-30)

            7 Tuachi’n tanghou tol sawhlouhni paikan kut belam nou gohni ding ahungtungta hi.

8 Tualeh aman Johan leh Peter asawl a: “Pai unla paikan kut inekna ding un hung vabawlsak un,” achi hi.

            9 Tuachi’n amaui’n a kiangah, “Khoitak ah hung vabawlsak le ung nadeih a?” achi ua. 10 Aman akiang uah, “Ngai un, khuapi sung a nalut chiang un tuibel pua pasal khat in ahung natuak ding a; alutna inn ah juilut un, 11 tuachi’n a inn neite kiangah: ‘Siapa’n ka nungjuite tawh paikan kut ka nekna ding uh mikhual inndan khoitak ahiam? Ahung chi hi, chi’n gen un. 12 Tuachi’n aman inndan tungnung lianpi, guatsa a om khat ahung ensak ding; huasan ah bawl un,” achi hi.

            13 Tuachi’n apai ua, agen bangin a vamuta ua; paikan kut abawlta uhi.

Toupa nitak an

(Mat. 26.26-30; Mrk. 14.22-26; 1 Kor. 11.23-25)

            14 Ahun ahung chin takin atouta ua, sawmlehnihte’n zong atoupih ua. 15 Tuachi’n aman akiang uah, “Ka thuakma in hih paikan kut noutawh nek ka ut mahmah hi! 16 Ajiak kung hilh ahi, Pasian gam a sukbukim ahih masiah hih ka nenawn kei ding hi,” achi hi.

            17 Tuachi’n nou ala a, kipahthu agenzoh in, “Hih la unla kihawm un. 18 Ajiak Pasian gam a hungtun masiah grepgah tui ka dawn nawn kei ding hi,” achi hi.

            19 Tualeh tanghou ala a, kipahthu agenzoh in abalkek a, akiang uah apia a, “Hih ka taksa nou a ding a piak ahi, nung theihjingna ding un hih bawljel un,” achi hi. 20 Tuachimah bangin nitak an anekzoh un nou ala a, “Hih nou ka sisan a thukhunthak, nou a ding a luangkhia pen ahi.

            21 “Hinanleh, ngaiun! A hung mansak dingpa khut ka kiangah doknan tungah aom hi! 22 Mihin Tapa pen a kiguatsa bangin apaitakpi ding hi; hinanleh amansakpa tung agik hi!” achi hi. 23 Tuachi’n amauhtte hichibang bawl ding alak ua kuapen hi ding ahi chi’n aki dongtuahta uhi.

A lianpen hihding kituhna

            24 Tualeh amauh lak a kua ahia alian pen a she ding chi a kinialna zong aom a. 25 Aman akiang uah, “Jentelte kumpipate atung uah laltak in aom ua, tualeh atung ua thuneitute pen, ‘Mi hoihna ding bawltute achi uhi.’ 26 Hinanleh noupen hichi bang na hikei ding uh; nalak ua lianpen tuh naupangjaw bang in om henla; tualeh a thupipen tuh nekbawl bang in omjaw hen.

27 Ajiak annkuang imtu leh nek bawltu kua ahia alianjaw? Hinanleh kei tuh nalak ua nek bawltu bangin ka om hi.

            28 “Hinanleh nou pen khemna katuah sung a hung onpihte nahi uhi;

29 tualeh ka Pa’n kei gam ahung guatsak bangin nou dinging am kung guatsak hi.

30 Ka gam a ka dohkan a nanek ua, nadawn ua, tualeh Israel nam sawmlehnihte vaihawmsak a, lal touna a na toutheihna ding un, achi hi,”

Peter kitheihmoh bawl ding Jesu’n a genkholhna

(Mat. 26.31-35; Mrk. 14, 27-31; Jhn. 13.36-38)

            31 Tualeh Toupa’n, “Simon, Simon! Ngaiin, setan in buh bang a ahung septheihna dingin ahung ngen hi. 32 HInanleh na ginna aman louhna dingin kung thumsak ahi. Na kiheikik chiangin nasanggamte hihkip in,” achi hi.                                                    

            33 Hinanleh aman a kiangah, “Toupa nang tawh thong leh sihna ah zong pai ka ngap hi!” achi a.

            34 Tuachi’n aman, “Peter, kung hilh ahi, thumvei nung kitheihmoh bawl masiah tunin ak akhuang kei ding.” Achi hi,

Dangka ip, thungpi leh namsaw

            35 Tualeh aman akiang uah, “Nou dangka-ip beia, thungpi beia, tualeh khedap beia kungsawl laiin sil khatbek na kitasam uai le?” achi a, amau’n “Tasam lou,” achi ua.

            36 Tuachi’n aman akiang uah, “Hinanleh tuin, dangka-ip neiin keng henla tuachibang mah in thungpi neiin zong tualeh namsau neilouin apuantual juak henla, lei hen. 37 Ajiak kung hilh ahi, amah pen, ‘dan bawtsiatute lak ah asimtel uh,’ chih gelh pen ka tungah a tangtung ding mawng ahi, ka tungtang thute tungkim ahita.” Achi hi.

            38 wtsiatute lak ah asim amau’n, “En in Toupa! Hihsan ah namsau nih aom hi!” achi ua. Amana kiang uah, “A hun hi!” achi hi.

Gethsamani huan ah Jesu

(Mat.26.36-46; Mrk.14.32-42)

            39 Apawtkhia a, angaina bangin Olive mual ah apai a; tualeh a nungjuite’n zong ajui ua.

40 Amun atun un aman akiang uah, “Khemna a na lutlouhna ding un thum un,” achi hi.

            41 Tualeh amah suang a denphakna ding chiang ah apaituam a, akhup din a, athum a.

42 “Pa aw, lem nasak a ahihleh hih nou ka kiang a pan suankhia in, hinanleh kei thu hilouin nang thu hijaw hen,” achi hi. 43 Tuatakin van a pan vantungmi khat a kiangah ahung kilak a, amah ahung hatsak hi. 44 Amah agim mahmah a, ahah thum jawsem a, tualeh a khua-ul sisan bangin mal lian taktakin leiah ahung takkhia a.

            45 Athum zoh in dingkhia in a nungjuite kiangah ahung pai a, amauhte lungkham jiakinihmu in ahung mu a. 46 Tuachi’n akiang uah, “Bang ding a ihmu nahi ua? Khemna a na lutlouhna ding un thou unla thum un,” achi hi.

Jesu matna

(Mat. 26.47-56; Mrk.14.43-50; Jhn. 18.3-11)

            47 Tualeh athu agen laitakin ngaiin, mipi honkhat ahung pai ua, tualeh sawmlehnihte lak a khat Juda achih uh ahung lamkai a, tawp sawm in Jesu kiang ahung naih a. 48 Hinanleh Jesu’n a kiangah, “Juda, Mihing Tapa tawp a matsak ding nachi maw?” achi hi.

            49 Akim a mi omten sil hung om ding amuh un, “Toupa, namsau in ka satding uai?” achi ua.  50 Tualeh alak ua mi khat in siampi silapa asat a, abil jiatlam asatkhiat sak hi.

            51 Hinanleh Jesu’n ahoupih a, “Hichitan ah hunsak un!” achi a, tuachi’n abil atham a adamsakta hi.

            52 Tualeh Jesu’n akiang a hungpai siampite leh Pasian tempul a lamkaite leh upate kiangah, “Guta man ding bangin namsau leh khetbuk tawiin nungpai uh maw?

53 Na kiang uah niteng a Pasian tempul a ka om laiin lah ka tungah khut nakha kei ua, hinanleh tuin nahuh uh ahi, tualeh mial thuneihna hun ahi,” achi hi.

Peter in Jesu a kitheihmoh bawlna

(Mat. 26.57, 58, 69-75; Mrk. 14.53, 54,66-72; Jhn. 18.12-18, 25-27)

            54 Tuachi’n amah aman ua, apaipih ua, siampi inn sung ah a pailutpih uhi. Tualeh Peter in gamla tak a pat agal juih a. 55 Amau’n huangsung lai ah mei atawh ua, atoukhawm ua, Peter zong alak uah avatou a. 56 Tualeh meigeia atou laiin nungak kuahiam khat in amu a, hoihtak in a en a, “Hihpa zong a kiang a om ahi!” achi a.

            57 Hinanleh aman, “Numei, amah ka theikha kei!” chi’n aki theihmoh bawl hi.

            58 Tualeh tomkhat zoh in midang khat ina mukik a, “Nang zong alak ua mikhat nahi!” achi a.

            “Ka hikei, nangpa!” achi hi.

            59 Tuachi’n dakkal khat ding zoh in midang khat in, “Hihpa zong akiang a om himah ve aw, Galilimi himah veh!” achi tinten a.

            60 Hinanleh Peter in, “Na thugen ka theikei nangpa!” achi a.

            Tualeh athugen laitak in ak ahung khuangta hi. 61 Tualeh Toupa akihei a, Peter a en a, Peter in “Tuni’n ak khuanna in thumvei nung kitheihmoh bawl ding,” chia Toupa’n akiang a achihpen ahung theidok a. 62 Tuatakin Peter apawtkhia a, akap huthut ta hi.

Jesu nuihjat bawlna leh vuakna

(Mat. 26.67, 68; Mrk. 14.65)

            63 Tualeh Jesu mantute’n amah chiamnuih bawlnan anei ua, avua ua. 64 Tualeh amai a tuamsak zoh un amai abeng ua, “Kua ahia hung vua? Gen in!” chi’n adong ua. 65 Tualeh thudang tampi in amah gensia in akawk uhi.

Jesu siampi mail eh vaihawmte mai ah

(Mat. 26.59 – 66; Mrk. 14.55-64; Jhn.18.19-24

            66 Khuavak takin siampite leh Laigelhmite ahung kikhawm ua, a vaihawmna mai uah apaipih ua. 67 “Krist nahi hiam? Hung hilh  in.” achi ua.

            Aman akiang uah, “Hung hilh nan leng zong na gingta kei ding uh; 68 tualeh ken zong nou thu hung dong leng nung dawng kei ding uh, pai zong nung paisak kei ding uhi. 69 Tubansiah Mihing Tapa pen Pasian silbawl theihna jiatlam ah atouta ding hi,” achi hi.

            70 Tuachi’n aun un, “Ahihleh Pasian Tapa nahi maw leh?” achi ua.

            Aman akiang uah, “Nung chihmah bang un ka hi,” achi a.

            71 Tualeh amau’n, “Bang theihsakna dang ipoimoh nawn lai ding ua! Eimah ngeiin akamsuak ijata uhi!” achi uhi.

Luka 23

Jesu Pilat mai ah

(Mat. 27.1,2,11-14; Mrk. 15.1-5; Jhn. 18.28-38)

            1 Tuachi’nmipite aun un ading ua, amah Pilat kiangah apaipih ua, 2 hihpa’n “Kei Krist kumpipa ka hi chia Kaisar kiang a siah tawi akham leh ka chite uh atokbuai ka thei uhi.” Chi’n ahek ua.

            3 Tuachi’n Pilat in, “Judate kumpipa nahi maw?” chi’n adong a. Aman adawng a, “Na chih bangin ka hi,” achi a.

            4 Tualeh Pilat in siampite kiang leh mipite kiangah, “Hihpa tung ah bangmah mohna ka mukei hi,” achi hi.

            5 Hinanleh amau’n, “Hihpa’n galili gam a pat hihtanin Juda gam khuachin ah mipite thu hilh in mipite a tokbuai veu hi,” chi’n ahahpan sem uhi.

Jesu Herod mai ah

            6 Galili gam thu ajak takin, “Pilat in huapa Galili gammi ahihleh hihloouh adong a.” 7 tualeh Herod vaihawmna nuaia om ahi chih atheih takin Herod kiangah asawl a, hualaiin amah zong Jerusalem a om ahih jiak in. 8 Tualeh Herod in Jesu amuh takin akipak mahmah a; atanchin anajak jiakin hun sawtpi a pat kimuhpih ut mawng ahi a; muh zong akinem hi. 9 Tuachi’n aman a kiangah, thu tampi adawng a; hinanleh aman bangmah in adawng kei hi. 10 Tualeh siampite leh Laigelhmite a dingkhia ua, nasiatakin ahek uhi. 11 Tualeh Herod leh a galkapte’n Jesu asimmoh bawl ua, chiamnuih bawlnan azang ua, puan thupi asilhsak ua, Pilat kiangah a sawlkikta uhi. 12 Tualeh huani mah in Herod leh Pilat akihou theita uhi; hua masang ana ki houtheilou ahi uhi.

Jesu siding a thutanna

(Mat.27.15-26; Mrk. 15.6-15; Jhn.18.39, 19.16)

            13 Tuachi’n Pilat in siampite, lamkaite leh mipite asam khawn a. 14 A kiang uah, “Mi atokbuai chia hihpa ka kiang a nungpui uh ahi a. Tualeh ngaiun, namai ua hoihtak a ka etchian nung in na hekna uah a tung ah bangmah diklouna ka mukei hi. 15 Herod in zong amu kei, ajiak nou akiang ah kungsawl a, ngaiun, sihna khop hial bangmah abawl kei hi. 16 Tuajiakin, ka jep ding a, ka khahmai ding,” achi hi. 17 Ajiak ankuang luini a mi khat akiang ua a khahkhiat sak teiteio ding ahi hi.

            18 Amauh kituak takin akikou ua, “Hihpa hih mangthang inla! Barabba hung pawtsak in!” achi ua. 19 (Huapa khuapi sung a helna jiak leh tualthah jiak a thong a tang ahi.)

            20 Tuajiakin Pilat in Jesu akhah dok nuam a, akiang uah thu agen kik a. 21 Hinanleh amauh akikou ua, “Kross ah kilhden in! KRoss ah kilhden in!” achi ua.

            22 Tuachi’n aman athumveina dingin akiang uah, “Bang jiak in ahia? Bang ahia a bawlkhialh! Sihna khop hial atung ah bangmah ka mukei hi; tuajiakin ka jep ding a, ka khahmai ding,” achi hi.

            23 Hinanleh amau’n aw ngaihtak in, kross a kilhden dingin a ngen teitei ua. Tuachi’n amauh aw leh siampite aw in ajou jawta hi.  24 Tuachi’n Pilat in anget bang ua bawl dingin thu atanta hi. 25 Tualeh helna leh tualthahna jiak a thong tang angetpa uh akhah a, Jesu ahihleh a ut ut ua bawl dingin a piakhiata hi.

Jesu kilhden a omna

(Mat. 27.32-44; Mrk. 15.21-32; Jhn. 19.17-27)

            26 Tualeh amah apaipih lai un gamlam a kipan-a hungpai Kurini gammi Simon aman ua, Jesu nunglam a pua dingin atung ah kross angata uhi.

            27 Tualeh amah kah a mau jenjun numei hon in ajui ua. 28 Hinanleh Jesu’n amauhlam hung nga in, “Jerusalem tanute aw! Kei hung kah kei unla, nou a ding leh na tate ua dingin kapjaw un. 29 Ajiak ngaiun, hichi bang nite a hungtung ding a, “Tuani chiangin achiingte leh nau paingailouhna gilte tualeh naungek tepngailouh noite ahampha uhi!’ achi ding uh. 30 Tuachi’n amau’n mualte kiangah, ‘Hung netkhum un!’ Tualeh ta’ngte kiangah, ‘Hung khuhkhum un!’ achi ding uh. 31 Ajiak sing hing a bawn hih silte abawl uleh, singgaw ah bang akibawl tazen diai?” 32 Amah tawh midang migilou nih zong hihlup dingin apui ua. 33 Tualeh “Kalvari,” achih muh uh hualam ah kross ah akilhden ua migiloute tawh, khat ajiatlam a tualeh khat aveilam ah akilhden uhi. 34 Tuachi’n Jesu’n. “Pa, amauhte ngaidam in! A silbawl uh atheikei ua hi.” achi hi.

            Tualeh apuansilh kihawm in ai asan uhi. 35 Tualeh mipite’n a en gige ua tuachi’n lamkaite’n, “Midang bawn a hundam vele; Pasian mitel Krist ahih taktak leh amahleh amah ki hundamta henla!” chi’n a enghou ua.

            36 Galkapte’n zong chiamnuih bawlnan azang ua, hungpai in uain thuk apia ua, 37 Tualeh. “Judate kumpipa nahih taktakleh nangmah leh nangmah ki hundam in!” achi uhi.

            38 Tualeh a lutung lam ah Grik leh Latin leh Hebrai ham in, “HIHPA JUDATE KUMPIA AHI,” chia kigelh atuang hi. 39 Tuachi’n migiloute kikhaite lak a khat in, “Krist nahihleh nangmah ki hundam inla, kou zong hung hundam tanla!” achi a.

            40 Tualeh khat pen in amah phawkkawm in adawng a, a kibang a ahung kigawt theiin, “Pasian laulou lai nahi hiam? 41 Eipen gawttak mawng ihi; ajiak isilbawlte man mu ihi; hinanleh hihpa’n bangmah abawlkhial kei,” achi hi. 42 Tuachi’n aman Jesu kiangah, “Toupa nagam na tunchiang in hung theigige in aw!” achi a.

            43 Jesu’n a kiang ah, Adiktak in kung hilh ahi, “Tuni’n ka kiangah paradis ah na om ding hi,” achi hi.

Jesu sihna

(Mat. 27.45-56; Mrk. 15.33-41; Jhn. 19.28-30)

            44 Tualeh dakgukna ding vela hi a, dakkuana tan dongin leiting jousiah ahung mialta a.

45 Tuachi’n a ni ahung mialta a, Pasian tempul puanjak akimlai ah ahung kekta hi. 46 Tualeh Jesu aw ngaihtak in a kikou a, “Pa! Na khut ah ka kha kung kemsakta hi!” achi a; tualeh hua achih zoh in akha akhahta hi.

            47 Tuachia galkap jalamkaipa’n sil omdan amuh in, hihpa pellou in midik ahi hi chi’n Pasian aphatta hi.

            48 Tualeh hua etnop a en ding a hung paikhawm mipite jousiahin sil omdan amuhtak un a awm uh tum kawmkawm in Innlal ah apaikikta uhi.  49 Hinanleh ameltheihte tengteng leh Galili gam a amah hunjui numeite gamlapi ah ading ua, hih silte a en gige uhi,

Jesu vuina

(Mat. 27.57-61; Mrk.15.42-47; Jhn. 19.38-42)

            50 Tualeh ngaiun, mikhat amin Joseph kichi vaihawmtu aom a, amah mihoih leh midik ahi a. 51 Aman avaihawm uleh asilbawl uh zong lem anasakpih kei a; Amah Judate khuapi Arimathaimi ahi a, Pasian gam ngak jing a om ahi. 52 Hihpa Pilat kiangah apai a, Jesu luang a ngen a. 53 Tuachi’n ala a puannem in atuam a, kyamah sialngai nailouh suangkhuak kuak hank hat ah asialta hi.

            54 Huani pen kiginni ahi a, khawlni ahung naita hi. 55 Tualeh Galili gam a amah tawh hungjawkte’n zong anung ajui ua, ahan leh aluang kisial dan amu uhi. 56 Tuachi’n apaikik ua sil namtui leh sathau namtuite asiam ua. Tualeh thupiak dungjuiin khawlni a akhawlta uhi.

Luka 24

Jesu thohkikna

(Mat. 28.1-10; Mrk.16.1-8; Jhn.20.1-10)

1 Tualeh nipikal ni masa ni-in jingsang matakin a gimnamtui bawlte uh tawiin, numei dang kuate hiam tawh han ah ahung pai ua. 2 Hinanleh suang han a pat likkhiatsa in amu ua, 3 tuachi’n asung ah alut ua Toupa Jesu luang amu kei uhi. 4 Tualeh hichi ahung hi a, huajiaka a lungbuai laiun ngaiin, mi nih puan teselhsolh silh in agei uah ahung ding a. 5 Tuachi’n amauh laua leia a khupbok laiun, amau’n akiang uah, “Bangding a misi lak a mihing zong nahi ua? 6 Hihsan ah aom nawn kei a, a thoukikta hi; Galili gam a aom laia na kiang ua agen thei un: 7 ‘Mihing Tapa ahihleh mikhialte khut ah matsak in aom ding a, kross ah akilhden ding ua, tualeh nithum ni-in athoukik ding,’” achih achi a.

            8 Tualeh amau’n athugente ahung theidokta uhi. 9 Tuachi’n anung paikikta ua, hih silte jousiah sawmlehnihte leh midante jousiah kiangah ahilhta uhi. 10 Amauhte Magdalini tawh Joanna leh Jakobnu Mari tawh tualeh akiang ua om numei dangte tawh ahi ua. Hih silte sawltakte kiangah ahilhta uhi. 11 Tualeh athugen uh thu maimai bangin a ngaihsut ua; ana taksan kei uhi. 12 Hinanleh Peter a dingkhia a, han ah avatai a, tualeh kun a a et leh puannemte guak om amu a, sil omdante lamdang asak takin a paimangta hi.

Emmau lampi a Jesu kilakna

(Mrk. 16.12,13)

            13 Tualeh ngaiin, alak ua mi nih Emmau kichi khua khat Jerusalem a pat mel sagih a gamla ah hoh dingin apai ua. 14 Amauh hih sil hung omte jousiah thu ah ahoulim ua. 15 Tualeh hichi ahung hi a, houlim a aki doktuah laiun, Jesu’n ahung naih a mauh tawh a zawkkhawmta a;

16 hinanleh amah atheih louhna ding un amit uh sukvaihsak in aom hi. 17 Tualeh aman akiang uah, “Na paikawn ua na kihoulimna uh leh na dahna thu uh bang ahia?” achi a. 18 Tuachi’n khatpa amin Kleopa kichi pen in adawng a akiang ah, “Tulai a sil omdante na theihlouh, Jerusalem a nagguak mikhual nahi hiam?” achi hi.

            19 Aman akiang uah, “Bang silte ahia?” achi a.

            Tualeh amau’n a kiangah, “Nazareth Jesu, Pasian leh mijousiah mitmuh a asilbawl leh thugen Jawlnei minthang tak tungtang thu,” 20 “Amah siampite leh ka lamkaite un sitak a siamlouh atansak ding un a piakkhiat ua, kross-a akilhden thu uh. 21 Hinanleh kou Israelte tantu ding amah ahi chih ka kinem uhi!” Tualeh hihte lou zong, hihte atunzoh tuni anithum ni ahita hi.

22 Tualeh ka lawilak ua numei khenkhat han a matak a vapaite’n lamdand satakin ahung koih uhi, 23 a luang amuhlouh takun ahung kinungleh kik ua, ahing kikta chia hunghilh vantungmite zong kamu uh, achi ua. 24 Tualeh ka ompihte lak ua khenkhat han ah avapai ua, numeite gen bang takin ava mu ua, hinanleh amah amu tuankei uhi,” achi ua.

            25 Tuachi’n aman akiang uah, aw mimawte leh, Jawlneite thugen jousiah taksan nuamloute (taksan ding a lung ngongte) 26 “Krist in hih silte thuak a athupina a alut ding mawng hilou amaw?” achi hi. 27 Tualeh Mosi leh Jawlngeite laibu a pan in Laisiangthou pumpi a amah tungtang kigelhte akiang uah a hilhchianta hi.

            28 Tuachi’n apaina ding khua uh tungpai ding ahita ua, amah gamla tak a paisuak sawm bangin aom a; 29 hinanleh amau’n akhouh ua, “Ka kiang uah ta’m main, nitaklam ahita a, tualeh ni zong tum ding ahita hi,” achi ua. Tuachi’n akiang ua omdingin alutta hi. 30 Tualeh hichi ahung hi a, amauh tawh dohkan a atouin, tanghou ala a, agualjawl a, tualeh abalbek a, akiang uah apia a. 31 Tuachi’n amit uh ahung vakta a, amah atheita uhi; tuatakin amah amit muh uapat amangta hi. 32 Tualeh amau’n “Lampi a ahung houpih a, Pasian Laisiangthou thute ahung hilhchian laiin ilungtang sung ah akuang hial hilou amaw?” a kichi ua.

            33 Tualeh huahun laitak mah in athoukhia ua, Jerusalem khua ah aki nungleh ua, sawmlekhat omkhawmte leh akiang ua omte amu uhi. 34 Amau’n, “Toupa tuh athoukik taktak ahi!Simon kiangah zong akilakta!” ana chi ua.

            35 Tuatakin amau’n zong lampi a sil hung omte leh tanghou abalkek a amah atheihkhiat dante uh ahilh uhi.

Sawltakte kiang a Jesu kilakna

(Mat. 28.16-20; Mrk. 16.14-18; Jhn. 20.19-23; Nst. 1.6-8)

            36 Tualeh hihtute agen laiun Jesu ngei alak uah ahung ding a, “Na kiang uah khamuanna om hen,”achi hi.

            37 Hinanleh amauh a chija mahmah ua, tualeh alau ua: sikha mu bangin aki ngaihsun ua. 38 Tualeh aman akiang uah, “Bangding a mangbang nahi ua? Tualeh bangding a na lungtang ua ginglahna hung om ahi hia?  39 Ka khutte leh ka kengte en-un, kei mahmah hilou ka hi hiam? Hung tham unla en-un; sa leh guh nei a nungmuh bang un, kha in sa leh guh aneikei hi,” achi hi.

            40 Hihte agen zoh in amauh a ensak a. 41 Hinanleh akipak seng jiak ua agingtat louh uleh lamdang asaklai un aman akiang uah, “Hiah nek ding nanei uh hiam?” achi a. 42 Tualeh amau’n a kiangah nga kikang gawk hat leh khuaiju khalkhat apia ua, 43 aman hua ala a, amai uah aneta hi.

            44 Tuachi’n aman akiang uah, “Mosi dan leh Jawlneite laibute leh Psam bu a ka tungtang kigelh jousiah ahung tangtun ding dan tawh ka omkhawm lai a na kiang ua ka thugente hihte ahi,” achi hi.

            45 Tualeh Pasian laibute a theihtheihna ding un a lungtang uh ahonsakta hi.

            46 Tuachi’n aman akaing uah, “Hichi bang a gelh ahi: Krist in gim athuak ding a, nithum nia misi lak a kipan a thoukik ding mawng ahi, 47 Tualeh kisik na leh khialh ngaidamna tuh amah min in Jerusalem a pat in namchin lak ah gen ahi ding. 48 Nou hih silte theihpihtu nahi uhi.

49 Ngaiun, ka Pa silchiam natung uah ka sawl ding hi; hinanleh tunglam a kipan a sil bawltheihna a thuam nahih masiah uh Jerusalem khuapi ah om kinken un,” achi hi.

Jesu van kahna

(Mrk. 16.19,20; NNst. 1.9-11)

            50 Tualeh amauh Bethani tanpha in apaipih a, aban ajak a, amauh agualjawl a. 51 Tualeh hichi ahung hi a, a gualjawl laitakin amauh apaisanta hi. 52 Tualeh amau’n amah abia ua, kipak mahmah in Jerusalem ah akileh kik ta uhi.  53 Tualeh Pasian tempul ah Pasian phat leh pahtawiin a omjingta uhi.