Philippite

PHILIPPITE

KIANG A SAWLTAK PAUL LAIKHAK

Philippite 1

Chibai bukna

1 Paul, leh Timothi, Jesu Krist a misiangthou jousiahte kiang leh, saptuam upate kiang leh panpihtute kiang ah:

2 I Pa uh Pasian kiang leh i Toupa uh Jesu Ktist kiang a kipan hehpihna leh khamuanna na kiang uah om hen.

Paul in simtute a dingin a thumsak

3 Noute kung phokkiat tengin ka Pasian kiang ah kipahthu ka gen a; 4 ka thum tengin kipaktak in noute a dingin kung ngetsak gige hi 5 apatni a pat a tunitan a tangthupha a nung ki pawlpihna u jiak in. 6 Amah na sung ua nahoih sep pankhintu in, Jesu Krist ni tanpha in huapen abawl bukim ngei ding chih muanngamna ka nei hi. 7 Na un ua na tungtang uh thu a ken hichi bang lungsim ka neihpen adik mawng ahi. Ajiak nou ka lungtang ah kung vomjing hi; na un ua ka kalbulhna leh tangthupha venna leh hihkipna thu a hehpihna ka tanpihte na hi uhi. 8 Ajiak, Krist lainatna in na un un kung ngai mahmah hi chih Pasian ahung theihpihtu ahi. 9 Tualeh theihtheihna leh theihkhen theihna tengteng a na itna ua a hungtam semsem ding hih ahi ka nget, 10 tuachia silhoih mahmahte nung theih ua; Krist ni tan a ataktak leh bawlkhial bei nung hihtheihna ding un. 11 Pasian thupina ding a Jesu Krist a om diktatna gah a dim in.

Hin Krist ahi

12 Hinanleh unaute aw, ka tung a siltungte pen tangthupha phuanjaksem a a omna ding a hungtung ahi chih natheih uh ka deih ahi. 13 Tuachi’n Innpi vengpawlte jousiah leh a dang tengteng kiangah ka kolbulhnate pen Krist ah ahi chih a kichianta hi. 14 Tualeh Toupa a unau tamtak in ka kalbulh jiak a ginkipna nei in, Pasian thu laulou a gen ding in a hangsan deuh deuhta uhi.

15 Khenkhatte’n thangsiatna leh kihauna jiakin Krist a tang koupih ua, tualeh khenkhatten deihsakna jiakin zong agen uhi. 16 Pawlkhatte’n ka kolbulh thuakna ki behlapsak sawm in, taktak hilou in, mahni angsung khualna in, kikalhna dingin Krist a tangkouhpih uhi. 17 Hinanleh pawlkhat in ahihleh tangthupha gum ding a om ka hihdan thei in, itna jiakin a gen uhi.

18 Achihleh bang akhok a, lam jousiah ah, akhem hi in atak hitaleh Krist pen tangkoupih in a omta himhim ahi. Tualeh hua ah ka kipak ahi, ahi, ka kipak jel ding hi. 19 Ajiak hih in thumna uh leh Jesu Krist kha piakna jiakin ka suahtakna ahung suak ngei ding chih ka thei hi. 20 Ka lam etna bang leh ka kinepna bang dungjuiin bangmah ah hihjum in ka om kei ding a, hinanleh ka hansan jing mahbang in, tuin zong, ka hinna in hiam, Krist pen ka pumpi ah hangsanna kim in hihlet in ka om ding hi. 21 Ajiak kei ding in hin Krist ahi a, sih punna ahi. 22 Hinanleh taksa a hin ka tan hihenla, huapen ka sepgah hitaleh, teljawk ding ka theikei hi. 23 Ajiak nih tegel kal ah haksatak a phuk in ka om hi.  Paimang a Krist kiang a om utna ka nei a, huapen ahoihjaw mahmah hi; 24 hitalehzong, taksa a om pen nou jiakin apoimohjaw hi. 25 Tualeh hih ginkipna nei in,na ginna uh khanletna ding leh naginna ua na kipakna ding un nou tawh ka omjel lai ding hi chih ka thei hi, 26 na kiang ua kung paikikna jiak a, kei ding a Jesu Krist a na kipahna uh a tamsem theihna ding in.

27 Na umdan uleh Krist tangthupha kituaksak phot phot un, hung pai a nou kung muh ahiam, ahihkeileh ka omlouh a zong na tanchin uh, kha khat a na dinkip dan uleh, lungsim khat nei a, tangthupha thugin a na hahpan dan uh ka jaktheihna ding in. 28 Tualeh bangmah ah na melmate uh hihlau in omkei un; huapen amauh a ding  a manthaina chiamtehna diktak ahi a, hinanleh nou a ding in pen hundamna, tualeh huapen Pasian a kipan ahi. 29 Ajiak, Krist jiak anou amah na gintat uh guak hilou a, amah jiak a thuak zong na thuak ding uh ahi chih piak na hi uhi. 30 Keimah a hichibang kidouna na muhsa uleh, tu-a keimah a om najak bang uh, nou zong na nei uhi.  

Philippite 2

Krist ki niamkhiat na leh thupina

1 Tuajiakin Krist a ki hehnepna bang, ki itna khamuanna bang, kha ki pawlkhawmna bang a omleh , 2 lungsim kibang a om in, itna kibang nei in, tup kibang leh lungsim munkhat a om in ka kipahna hih bukim un. 3 Angsung khual a huaihamna hiam ahihkeileh ki thupisakna hiam in, bangmah bawl hikei hen, hinanleh lungsim ngiamtak in michih in amah sangin midang hoihjaw in ngaisun chiat hen. 4 Na lak ua mi kuapeuh in amah lunglutna guak enkei henla, midang lunglutna zong en uh hen. 5 Jesu Krist a zong om hih lungsim nou ah zong om hen:

      6 Amah pen Pasian bang a om in,

Pasian tawh kibang a om pen sil

khiatlahhuai in a ngaituah kei a.

    7 Hinanleh, amah leh amah ki

ngaisanglou in, sila bangin ahung om a,

mihing bang a siam in ahung om hi.

     8 Tualeh mihing lim leh mel bang pua in,

amah hung ki ngiamkhiat a,

sihna tanpha in thu ahung mang a,

kross a sihna tandong in zong.

     9 Tuajiakin Pasian in amah pen

thupitak in a tawisangta a min

laklak a min tungnung pen  a piata hi.

    10 Tuachia Jesu min a mi jousiah,

van a sil omte, lei a sil omte,

tualeh leinuai a sil omte a khupdin ua,

    11 lei chinteng in Jesu Krist pen

Pa Pasian thupina ding a,

Toupa ahi chih a phuantheihna ding un.

Vak bang a leitung a vak ding

12 Tuajiakin ka itte aw, ka omsung guak hilou in, hinanleh ka omlouh lai a zong thu na manjel mahbang un. Lau leh ling kawm in na hundamna uh semkhia un. 13 Ajiak ama kipahpih lam silhoih bawl ding a hung utsaktu leh hung semsak ding a bawltu Pasian ahi.

14 Sil jousiah niallou leh phunlou in bawl lun, 15 khangthak gilou leh genhakte lak a leitung vakte  bang a na vaknate uh lak un. Dembei leh bawlsiat neilou Pasian tate nung hihtheihna ding un, 16 hinna thu tukip in, Krist ni chiang a ken athawn in ka tai kei a, athawn in ka gimkei chia ka kipak theihna ding in.

17 Ahi, na ginna sillat uleh na nasepna tung ua kei Pasian a ding a dawn ding bangin buakkhiat in om tamah leng zong, ka kipak hi, tualeh na un un kung kipahpih hi. 18 Huajiak mah in nou zong kipak unla, kei zong hung ki pakpih un.

Timothi leh Epaphrodita

19 Hinanleh na tanchin uh ka theih a lungmuang tak a ka omtheihna dingin, Timothi na kiang uah hungsawl pai dingin Toupa Jesu ah ka kilam en hi. 20 Ajiak ka kiangah huachi bang a gin-om tak a nou hung kem ding mi ka neikei hi. 21 Ajiak mi jousiahin Jesu Krist silte zonglou in, amauh a ding chiat a zongta uhi. 22 Hinanleh Toupa in a Pa nna asep bangin, aman tangthupha ah kei ahung seppih chih theichianna amah ah na nei uhi. 23 Tuajiakin bang chibang a ka om ding ka theihchian hunhun in amah hung sawlkhiat pai ka kinem hi. 24 Hinanleh kei mahmah ngei zong hung paipah ding in Toupa ah gintatna ka nei hi.

25 Hilehzong, ka sanggampa leh, ka naseppih leh, ka galkappih, na kamtai uh leh ka taksapna a hung ki thuahpihtu Epaphrodita na kiang ua hung sawl poimah kasa hi. 26 Ajiak na un un a hungngai mahmah a, a damlouh thu na jakjiak un a lungkham mahmah hi. 27 Ajiak sidektak in a china ngutngei a, hinanleh Pasian in a hehpih a, amah guak hilou in, hinanleh kei zong ahung hehpih hi, kei ding a lungkhamna tung a lungkhamna a omkhawm louhna ding in. 28 Tuajiakin amah poimohngaih tak in kung sawl hi, amah na muhkik chiang ua na kipak ua, tualeh kei lungkhamna zong adaihdeuh na ding in. 29 Tuajiakin  amah pen Toupa ah kipaktak in na sang un, tualeh hua chibangte na zahbawl un, 30 ajiak kei ding in Krist nasepna ah aman a hinna zong khawksalou in, ana sidektak hi.

Philippite 3

Diktatna diktak

1 Atawppen in, ka unaute aw, Toupa ah kipak un, kei a dingin angaimah gelh a chimtakhuai kei a, hinanleh nou a dingin ahoihjaw hi. 2 Uite lak ah kiveng un , sil gilou bawlte lak ah kiveng un, taksa atgawpte lak ah kiveng un. 3 Ajiak eite kha-a Pasian bia teptante i hi a, tualeh Jesu Krist ah i kipak mahmah a, hinanleh taksa ah pen suanding i neikei uhi. 4 Taksa lam ah chilei zong suanding ka nei maithei, mi dang kuahiam in taksa lam a suanding neia a kigen leh, ken kanei sem hi. 5 Nigiat ni a teptan, Israel nam, Benjamin phung, Hebrai lak a Hebrai hidiak, dan theilam a Pharisai. 6 Phattuam ngai lam a saptuamte bawlgentheitu. Danbu-a diktatna lam a gensiatbei ka hi. 7 Hinanleh, sil kei ding a punna jousiah pen Krist jiakin manna in ka simta hi.8 Ahi taktak ngut hi; Jesu Krist ka Toupa theihna hoihtak jiakin sil jousiah manna in kasim ahi. Amah jiakin sil jousiah manna in kasim ahi. Amah jiakin sil jousiah ka ta’nta a, tualeh Krist ka tantheina dingin huate tengteng ninneng bangin ka ngai hi. 9 Tualeh danbu a om bang a keimah diktatna nei hilou a, hinanleh Krist ginna jiak a om, ginna a Pasian a kipan diktatna pen nei a amah a muh a ka omtheihna ding in. 10 Tuachia amah leh athohkikna ka theina leh, amah thuakgimna ka kikoppihna bang ka theihtheihna ding in, 11 bang chidan hiam bek a misi lak a pat thohkikna ka tankhakleh chi in.

Siltup manawh a tai ding

12 Hua tangkhinta ka hikei a, bukim khinta zong ka hikei. Hinanleh Jesu Krist in kei a hungmatna, huamah ka mattheih sam na ding in ka delh ahi. 13 Unaute aw, keipen mankhinta in ka kingai kei a, hinanleh silkhat ka bawl hi, nunglam a sil omte manghilh in, tualeh mailam a sil omte delh in. 14 Jesu Krist a Pasian sapna sang nuamman mu dingin phaktawpna ka delh hi.

15 Tuajiakin, ei apiching deuhdeuh tengin hichibang lungsim i  nei chiat ding uhi. Tualeh sildang khat a lungsim dang naneih uleh, hihzong Pasian in na kiang uah ahung theisak ding hi. 16 Hitaleh zong, i phakna chiangchiang ah huadan mahbang in i kalsuan ding uhi.

17 Unaute aw, ka omdan hungjuite hichiat unla, huchibang a omte etton ding a nung neihte uh chiamteh un. 18 Ajiak mi tampi a om uh, amau omdan tamveipi kung hilhta hi, tuin zong kappum in kung hilh ahi, amauh pen Krist kross  melmate ahi uhi. 19 Atawpna uh pen siatna ahi a, a Pasian uh ahihleh a gilpi uh ahi a, tualeh a thupina uh zong a jumna uh ahi a, leilam silte a ngaihtuah uhi. 20 Ajiak ei khua leh tui hihna pen van ah ahi a, hua a kipan in i Toupa Jesu Krist hundampa i ngak uhi. 21 Aman sil jousiah ama thu thu a a omsak theihna nasepdan dungjuiin i pumpi thulimlou pen amah pumpi thupiak bangin ahung bawl thaksak ding hi.

Philippite 4

Thuhilhnate

1 Tuajiakin, ka unau ittak leh ngaihtakte aw, ka kipahna leh ka lallukhute! Huachi’n Toupa ah dingkip un, ka ittakte aw.

2 Toupa ah lungsim khat hi dingin, Euodia kiangah ka ngen a, tualeh Sintike kiangah ka ngen hi. 3 Tualeh nang, ka sepkhawmpih diktak zong kung ngen ahi, tangthupha a ka seppih numeite leh Klemen zong tualeh hinna laibu a mintuang, ka seppih dangte panpih un.

4 Toupa ah kipak gige un. Ka chikik ding; kipak un!

5 Na migitna uh mi jousiah kiang ah theih hi hen. Toupa anai hi. 6 Bangmahlou ah lunghimoh kei unla, hinanleh sil bangkim ah thumna leh ngetna in kipahthu genna tawh, nasil ngette uh Pasian kiang ah theihsak in om hen. 7 Tualeh Pasian khamuanna theiphak guallouh in, Jesu Krist jiakin na lungtangte uleh na lungsimte uh ahung vensak ding hi.

8 Atawppen in unaute aw, sil dik jousiah, sil zah-om jousiah, thudik jousiah sil siangthou jousiah, sil minhoih jousiah, hoihna bang a om a, pahtawina bang a omleh, hih silte ngaihtuah un. 9 Keimah a na jilsa uh, na tansa uh, na jaksa uh, tualeh na muhsa uh, hua silte bawl un.

Silpiak jiaka kipahthu genna

10 Hinanleh tu atawplam a kei nung ngaihtuahna uh ahung ki latkik jel jiakin Toupa ah ka kipak mahmah hi. Nung ngaihsak mahmah ua, hinanleh hun lemtang na mukei ua ahi. 11 Taksap jiak a hihthu ka gen ding ahikei a, hua ah lungkimtak a omdan ka theikhiata hi. 12 Tasamtak a omdan ka thei a, tualeh kiningching tak a omdan zong ka thei hi. Munchin leh sil jousiah ah, gilvah leh kial a omtheihna leh, ki ningching leh tasam a omdan hilh in ka omta hi. 13 Amah ahung hatsaktu Krist jiakin sil jousiah ka bawlthei hi.

14 Hitaleh zong ka gentheihna a nung lungkhampih jiak un na bawlhoih uhi. 15 Tuin nou Philippite’n tangthupha a hung om tu’ng a, Mesidonia gam a pat ka paikhiat laiin, nou chihlouh, saptuam dang kuamah in piak leh lak lam thu ah bangmah in hung kithuahpih kei uh chih zong nathei uhi. 16 Ajiak, Thessalonika khua ngei ah zong ka taksap panpihna nung khak kik jel uhi. 17 Silpiak deih ka hikei a, hinanleh nou a ding a gah punna jong ka hijaw hi. 18 Sil bangkim ka nei a, ka hau hi, nou a pat hung kikhak silte, gim namtui roma, kithoihna pomtak Pasian lungkimna pen! Epaphrodita khut a pat in ka muta a, Ka kiningching petmah ta hi. 19 Tualeh ka Pasian in Jesu Khrist a thupina a ahauhsatna dungjui in na taksap jousiah uh a hungpia ding hi. 20 Tuin Pasian leh I Pa uh kiang ah tangtawn tangtawn in thupina omta hen! Amen.

Chibai buk tawpna

21 Jesu Khrist a misiangthoute jousiah chibai hung na buksak un. Ka kiang a om unaute’n chibai a hungbuk uhi. 22 Misiangthou jousiahin, hinanleh abiktak in Kaisar innsung miten chibai a hungbuk uhi.

23 I Toupa Jesu Khrist hehpihna na tung uah omta hen. Amen.