Back To Top
THESSALONIKATE
KIANG A SAWLTAK PAUL LAIKHAK NIHNA
II Thessalonikate 1
Chibai bukna
1 Paul, Sila leh Timothi in, i Pa uh Pasian leh Toupa Jesu Krist-a Thessalonika khua a saptuamte kiang ah:
2 I Pa uh Pasian leh i Toupa Jesu Krist a kipan hehpihna leh khamuanna na kiang uah om hen.
Krist hungpai chiang a vaihawmna
3 Unaute aw, na ginna uh nasatak a akhanleh a, na un ua na ki-it tuahna uh akhansem jiakin, na tungthu uah bawltuak ahihma bangin Pasian kiang ah kipahthu genjing ding mawng ahi. 4 Tuachi’n miin ahung abawl gentheihnate uleh, na thuakgimna jousiah ua na thuakzoh dan uleh na gindan jousiah un jiakin Pasian saptuam pawlte lak ah kung suang mahmah hi.
5 Hihpen Pasian gam mi hitak a guat na hih theihna ding ua Pasian vaihawmna diktak chiamtehna chiantak ahi a, huading mah a zong thuak na hi uhi. 6 Nou hung hihbuaite gimthuakna a thuk pen Pasian a ding a sil diktat-huai chih thei in, 7 tualeh nou hihgim a omte pen, Toupa Jesu van a kipan a a vantungmi hattak tawh a hung kilak chiangin, kou tawh khawlna a piakthuk kik a om in, 8 meikuang ahung kilak chiangin, Pasian theiloute leh i Toupa Jesu krsit tangthupha thu mangloute tung ah phuba la in. 9 Hihte jousiah Toupa maiah leh asil bawltheihna thupitak a kipan in tangtawn manthaina ah gawt in aom ding uhi, 10 huani a a misiangthoute a hihthupi a om ding leh na lak ua kung thutheihsak un agintat jiak ua agingta jousiahte a lamdang sak a om ding a ahung pai chiang i.
11 Tuajiakin, i Pasian un nou ahung sapna a saptaak him ahung sakna ding in. tualeh hoih utna jousiah leh ginna nasep jousiah asil bawltheihna tawh ahung bukimmsak theihna dingin, nou a dingin zong ka thum gige uhi. 12 I Pasian uleh Toupa Jesu hehpihna dungjui a, i Toupa uh Jesu min pen nou a, tualeh noumah a hihthupia aom theihna ding in ka thum uhi.
II Thessalonikate 2
Mi giloupa
1 Tuin unaute aw, i Toupa uh Jesu Krist hung pai na’ng leh akiang a i va kikhopna ding thu ah, kung ngen uhi, 2 Toupa ni pen a hungtung khinta chih na kha hiam, thu in hiam, tualeh kou a kipat laikhak in hiam na lungtang uh hihling a ompai a, ahihkeileh buailou ding in. 3 Kuaman bangmah in hungkhem kei hen. Ajiak puksanna a hungtun masak a, khialhna mipa, mangthang tapa. Ahung kilak phot keileh huani hung tung ding ahi. 4 Aman Pasian chih a om jousiah leh a kibia jousiah dou a atung om sawm in aki hihthupi ding a, Pasian tempul ah touin Pasian in a kibawl ding hi.
5 Na kiang ua ka um laiin hihthute kung hilhta hi chih theilou na hi umaw? 6 Tualeh tuin amah pen ama huntak a ahung kilat ding, bang in ahia adal ding chih nathei uhi. 7 Ajiak dan juihlouhna thugu’k in asem panta hi, adaltu lampi a pat lakmang ahih masiah in adal jing ding hi. 8 Tuachi’n lakmang ahih chiangin migiloupa pen ahung kilang ding a, Toupa Jesu’n amah pen akam ahu in a kangtumsak ding a, ahung kilakna vak in ahihmang ding hi. 9 Dan botsiapa hung paina pen setan nasep dunjui a sil bawltheihnate, chiamtehnate, sillamdang juautheite, 10 tualeh mangthangte adingin diktatlouhna khemna jousiiah tawh ahi ding hi.. Hundam a a omtheihlouh na ding ua thutak itna apomlouh jiak un. 11 Tualeh hih jiakin juauthu a gintatna ding un Pasian in diklouhna nasep hattak a kiang uah asawl ding hi. 12 Thutak gingtalou a, diktatlouhna kipahpih jawte a un ua siamlouh tansak a a omtheihna ding in ahi.
Hundam ding a tel na hi uh
13 Hinanleh unaute aw, Toupa ittakte, kha hihsiangthouna leh thutak gintatna jiak a hundam a om ding a atu’ng a kipat Pasian in nou a hungtel jiak in, koupen na tungthu uah Pasian kiang a kipahthu genjing ding mawng ka hi uhi.. 14 Huachibnag ding in aman i Toupa Jesu Krsit thupina tang ding in ka tangthupha un nou a hungsam hi. 15 Tuajiakin, unaute aw, dingkip unla, thugen in hi in, ka laikhak un hitaleh, thugousiah nou hung kihilhte tukip un.
16 Tuin i Toupa uh Jesu Krist leh Pasian i Pa uh ngei eite hung it a, hehpihna jiak a tangtawn khamuanna hungpiapa’n, 17 na lungtang uh hih khamuang in, thugen leh nasephoih chinteng ah hung hihkipta hen.
II Thessalonikate 3
Thumpih ding a ngetna
1 Atawppen in unaute aw, Toupa thu noumauh a aom bang a kintak a khang a hihthupi a a omtheihna ding leh, 2 tualeh mi genhakte leh mi giloute lak a ka bitna ding un hung thumsak un, ajiak pen mi jousiahin ginna a neisiangkei uhi.
3 Hinanleh Toupa a gin-om a, aman nou ahung hihkip ding a silgilou lak ah a hungveng ding hi. 4 Tualeh kung thupiakte uh na bawl ua, na bawljel ding uh chih Toupa ah kung muang uhi.
5 Tuin Toupa’n na lungtangte uh Pasian itna ah leh Krsit ding a thuakzohna ah hung kailut hen.
Sep ngeingei ding nna
6 Hinanleh unaute aw, kou a pat na muh uh thugousiah bang a omlou a, dan banglou a gamtang unaute jousiah lak ah ki hemkhia ding in i Toupa Jesu min thu kung pia uhi. 7 Ajiak pen noumah ngeiin nungjuih danding uh nathei uhi, ajiak na lak uah dan banglou in ka gamtang kei uhi. 8 Kuamah tanghou zong athawn in ka nekei ua, hinanleh nalak ua kuamah kung hihbuai louhna ding un sun leh janin ka semgimjaw uhi. 9 Thuneihna ka neihlouh jiak uh ahikei a, hinanleh nung juih ding ua etton ding ka bawl uh ahijaw hi. 10 na kiang ua ka omlai un zong, “Kuapeuh in nna asep nuam keileh nek zong nekdah hen, chih thu kung pia uhi.”
11 Ajiak nalak ua dan banglou a gamta, nna mawngmawng semlou a, hinanleh mi nasepna va gensiatsak mi khenkhat aom uh chih kaja uhi. 12 Huachibang mite pen hamtamlou a nna sem kinken ding leh, amauh tanghou kinek dingin Toupa Jesu Krist minin thu pia in ka hasot uhi. 13 Hinanleh unaute aw, noujaw silhoih bawl chimtak kei un
14 Tualeh kuapeuh in hih laikhak a ka thu uh ajuih keileh, huami pen chiamtehna unla. Kithuahpih kei un, ajumtheihna dingin. 15 Hitalehzong melma bangin bawl kei unla, unau bangin taihilhjaw un.
Gualjawlna
16 Tuin khamuanna Toupa amah mah in bangkim ah, bangchiklai peuh in nou khamuanna hung pia jing hen, Toupa’n na un un hung ompih jingta hen.
17 Hih ka chibai bukna laikhak pen kei Paul in ka khut ngei a ka gelh ahi, ka laikhak tengah chiamtehna ahi, hichibanga ka gelhjel ahi.
18 I Toupa Jesu Krist hehpihna na kiang uah om hen. Amen.
