Kolossate

KOLOSSATE

KIANG A SAWLTAK PAUL LAIKHAK

 Kolosate 1

Chibai bukna

1 Paul, Pasian deihna bang a Jesu Krist sawltak leh i sanggampa uh Timothi in, 2 Kolossa khua a om, Jesu Krist a misiangthoute leh unau gin-omte kiang ah: I pa uh pasian leh i Toupa Jesu Krist a kipan hehpihna leh khamuanna na kiang uah om hen.

Kipahthu genna thumna

3 Nou a ding a thumjing in, Pasian i Toupa uh Jesu Krist pa kiang ah kipahthu ka gen uhi. 4 Jesu Krist a na ginna uh leh, misiangthoute jousiah tung a itna na neih na ua pat in. 5 Van a nou a ding a kinepna hung kikoihsak jiakin, hua kinepna thu pen tangthupha thutak thu ah tu masang laiin na jata uhi. 6 Hua tangthupha pen leitung pumpi a gah a akhan mahbang in, na jak ua thutak a Pasian hehpihna nung theihni ua pat in nalak ua gah a pungjel in na kiang uah a hung tungta hi. 7 Epaphra, ka sila tanpih uh deihtak, nou a ding a Krist nasem ginomtak a pat zong na theihta’k mahbang un. 8 Aman kha a nung itdan uh zong a phuangkhia hi. 9 Hih jiak in kou zong, hih ka jakni ua pat in, nou a ding a thum leh, pilna leh khalam theihchianna jousiah a amah deihdan theihna a nungdimna ding uh ngetsak ka tawp kei uhi. 10 Tuachia Toupa ding a kilawm leh sil jousiah a deihhuai a na gamtat ua, nasep hoih jousiah a nunggah ua, tualeh Pasian theihsiamna lam a nung khangtouna ding uleh; 11 asil bawltheihna thupitak dungjui a kipahna tawh kuhkalna leh thuak-hatna lam a hatna jousiah a hihhat a om in; 12 vak a misiangthoute gou tankhawmpih ding a hung bawltu Pa kiang ah kipahthu gen in. 13 Aman mial sil bawltheihna a pan ahung tankhiata a, Tapa a ittak gam ah ahung lutsakta hi. 14 Aman ah a sisan jiakin tatkhiatna imu uhi, i khialhnate uh ngaihdamna pen.

Krist mi hihna leh a nasep

15 Amah pen muhtheihlouh Pasian mel pua a, silsiam jousiah lak a piang masapen ahi. 16 Ajiak pen amah pansan a sil jousiah siam ahi a, van a omte leh lei a omte, mutheih leh mutheihlouh, laltouna hi in lalgam hitaleh, vaihawmnate leh thuneihnate hitaleh zong. Sil jousiah ama siam ahi a, amah ding a siam ahi. 17 Tualeh amah pen sil jousiah omma in a om a, amah ah sil jousiah a omkhawm hi. 18 Tualeh amah pumpi, chihpen, saptuam lutang ahi, sil bangkim a hihna mun a tantheihna dingin, bulpi pen misi lak a piang masa pen ahi. 19 Ajiak amah a bukimna jousiah ompen Pasian deihlam ahi. 20 Tualeh a kross sisan jiakin lemna bawlkhin in, amah in sil jousiah amah tawh a kilemsak hi; amah mah in lei a sil omte hiin van asil omte hitaleh amah tawh akilemsak hi. 21 Tualeh nou, nidanglai a ana nasep uh gilou a amah a pat khen a om a, na lungsim ua melma na hi uhi. 22 Hinanleh tuin aman a taksa pumpi ah a sihna jiakin a hung kilemsakta hi. A mitmuh a siangthou leh gensiatbei leh phawkna ding beia a hung dinsak theihna ding in. 23 Ginna a na omjing ua, kingakna nei a na kip ua, tualeh tangthupha na jak uh kinepna a pat na ki khinmang kei uhleh, hua tangthupha pen vannuai a silsiam jousiah kiang a tangkou pih ahi a, kei Paul hua thu nasem ding a siam ka hi.

Saptuamte sila bang a Paul nasep

24 Nou a ding a ka gimthuakna ah tuin ka kipak hi, tualeh Krist gimthuakna  ban  pen a pumpi jiakin kasa ah ka sunjomjel hi, hua pumpi pen saptuam ahi. 25 Pasian thu hihbukim ding in, nou a ding a ka kiang a hung kipia Pasian hunbi khenna dungjuiin thu nasemtu ding a siam ka hi, 26 hua Pasian thu pen tangtawn a akhang akhang a thugu’k kiphual ana hi a, hinanleh tuinjaw a misiangthoute kiang ah hihlat in a omta hi. 27 Huate kiang ah Pasian in Jentelte lak ah hua thugu’k thupina hauhdan a theisak nuam mawng ahi, hihpen nou a Krist om, thupina kinepna ahi. 28 Michih Jesu Krist hoih bukim a a kipiak theihna ding ua, michih kiveng ding a hilh a, pilna chinteng  a jilsak a, a tanchin ka genpa uh ahi. 29 Hichibang ding in ken zong, keimah a thupitak a sem, hua nasepna dungjui in hahpan a pang in ka semgim hi.

Kolosate 2

1 Ajiak nou leh Laudisia khua a omte leh taksa a kamel munailou jousiahte ding a ka hahbawl da thei le uchin ka ut hi. 2 Pasian, Pa leh Krist thugu’k theikhia ding a theihsiamna kichiantak hauhsakna jousiah lam a itna a khuikhawm a aom ua, a lungtangte uh khamuanga a omtheihna ding in. 3 Hua Krist a pilna leh theihna gou jousiah phual in a om hi. 4 Tualeh kuamah in kamsiam thu a hung khemlouhna ding un, hih ka gen ahi. 5 Ajiak taksa in na kiang uah omkei nanleng zong, kipaktak in, na hoihdan uleh, Krist a na dinkip dan uh en in, kha in na kiang uah ka om hi.

Krist a hin bukimna

6 Tuajiakin Jesu Krist, Toupa pen na pomkip ta’k mahbang un, amah ah om un. 7 Amah ah jungkha leh lamtouh a om in, ahung kihilhtak mahbang a ginna a kiptak a om in, hua ah kipahthu genna a dim in om un. 8 Pilvang un, atuachih kei leh mi kua hiam in Krist thu bang hilou in, mihing dan leh leitung thubulte bangjaw in, leitung pilna leh khemna in a hungkhem kha ding uhi. 9 Ajiak amah ah Pasian hihna bukimna jousiah pumpi nei in a om hi; 10 tualeh nou amah ah na bukimta uhi, amah pen lalna leh thuneihna jousiah lutang ahi. 11 Amah ah nou zong khut a tan hilou in, taksa khialna paikhia a Krist teptanna a teptan na hi uhi. 12 Baptisma ah amah tawh vui na hita ua, huamah ah misi lak a amah kaithoutu Pasian nasep gintat jiakin amah tawh kaihthou na hita uhi. 13 Tualeh nou, na khialhnate uleh na taksa ua teptan louhna jiak a si na hih ua, na bohsiat na jousiah uh hung ngaidam in, aman Krist tawh ahung hih hing kikta hi; 14 danthu, ei hungdou leh eitawh kikalh lam a khut a gelh pen a nawtmangta a, tualeh kross dawn ah kilhden in a lamangta hi. 15 Lalnate leh thuneihnate suahkhia in, kross ah huate jouin, alangtang in etsakna in abawlta hi. 16 Tuajiakin mi kuamah in, nek thu in hiam, dawn thu in hiam, misiangthou thu in hiam, khathak thu in hiam ahihkeileh khawlni thu in hiam ahita in zong nou hung dem kei uhen. 17 Huate pen sil hungtung dingte lim ahi a, hinanleh ataktak pen Krist ahi. 18 Mi kuamah in, a silmuh ngailouhte, a taksa lungsim a thulimlou in, mahni siamthuh ki ngiamkhiat na leh vantungmite biakna zangin na nuamman muhding uh hung laksak kei hen. 19 Tualeh, taksa jousiahin ki vakkhangna nei a, ki zopkhawm leh ki hankhawm a nna sem a, tualeh ki khuikhawm a Pasian khanna a a khanletna lutang a tudet kei hi.

Krist tawh sihna leh hinna

20 Tuajiakin, leitung thubulte a pat Krist tawh si na hihtak uleh, bangding a, leitung a hing bang a dan thupiakte nuai a kituhlut na hi ua, 21 “khoihkha ken, chiamken, thamkha ken”? chihte. 22 Hihte pen jakkawm a mangthang ding ahi a, hihte bawl pen mihing thupiak leh thuhilhna jui ahi. 23 Hih silte pen utthu a biak leh kingaingiam leh taksa ngaihsaklou a silbawl ah pilhuai abang na a, hinanleh sa deihlam khamna lam ah bangmah aphatuam kei hi.

Kolosate 3

1 Tuachia Krist tawh kaihthoh a om na hihtak uleh, tunglam a Pasian jiatlam a tou Krist omna a sil omte jong un. 2 Tunglam a sil omte ah na lungsim uh nga unla, leitung a sil omte ah hilou in. 3 Ajiak, na sita ua, na hinna uh Krist tawh Pasian ah phual ahita hi. 4 Krist i hinna uh ahung kilak chiangin, tuachi’n nou zong thupitak in na kilang ding uhi!

Hinna lui leh hinna thak

5 Tuajiakin na taksa hiang uh lei a omte hihlum un, kingaihnate, nitnate, ki etlahnate, hoihloute, utna giloute, tualeh duhgawlnate, (duhgawlna pen milim biakna ahi). 6 Hua silte jiakin Pasian thangpaihna thumanglou tate tung ah atung nak hi. 7 Nou zong tu masangin hua silte a na hinlai un, huate ah na om uhi. 8 Hinanleh tuinjaw noujong hehnate, thangpaihnate, huatnate, gensiatnate, houlimna thanghuaite, hihte jousiah na kam uapat koihmang un. 9 Mihing luipen asilbawl tawh na koihkhiata uh chih thei in, khat leh khat kikhemtuah kei un. 10 Mihing thak in na kivonta ua, huapen theihsiamna nei a, asiamtu batpi a siamthak in a omta hi. 11 Hua ah Grikmi leh Judami, teptan leh tanlou, melmami leh Skithiami, tualeh saltang leh zalen zong a om tuankei hi; hinanleh Krist pen bangkim ahi a, bangkim ah a om hi. 12 Tuajiakin, Pasian mitel, misiangthou leh ittakte bangin lainatna lungtangte, chitnate, kingiamkhiatnate lungsimte, nunnamnate, tualeh thuak-hatnate in kivon un. 13 Khat leh khat kithuakjou tuah unla, ki ngaihdam tuah un, khat in khat tung a thubuai bang aneih leh Krist in nou ahung ngaihdam bangin nou zong ki ngaidam un. 14 Hinanleh hih silte jousiah tung ah itna silhthuah un, huapen bukimna kankhawmna ahi. 15 Tualeh Pasian khamuanna na lungtang uah vaihawmsak un, huachi bang hi dingin pumpi khat asap na hi uhi, kipakdan zong thei un. 16 Krist thu pen pilna jousiahin nou ah tampi in omsak un, ki thuhilhtuah unla, na lungtang ua hehpihna nei in Toupa ah la sa un. 17 Tualeh na bawljousiah uh, thugen hi in nasep hitaleh, aun in Toupa Jesu min in, amah jiak a Pa Pasian kiang a kipahthu genkawm in bawl un.

Hinna thak a mimal hinkhua

18 Zite aw, Toupa ah a kilawm hun bangjel in na pasalte uh kiang ah kituhlut un. 19 Pasalte aw, na zite uh it unla, atung uah gilou kei un. 20 Tate aw, siljousiah ah na nulepate uh thu mang un, ajiak hihpen Toupa kipaksakna ahi. 21 Pate aw, na tate uh hih thangpai kei un, atuachih keileh a lungkia khading uhi. 22 Silate aw, sil bangkim ah taksa a na pute uh thu mang un, mitmei veng a mihing kipaksak ding giap hilou in, lungsim a ginomtak in leh Pasian laukawm jaw in. 23 Tualeh na bawl taphot uh mihingte ding a bawl bang hilou in, Toupa ding bang in lungsim a chihtak tak in bawl un. 24 Toupa kiang a pat innuamman ding gou na mu ding uh chih thei in. Ajiak pen Krist Toupa nna sepsak na hi uhi. 25 Hinanleh sil diklou bawltu in a sildiklou bawlman a mukik ding hi, kideihsak tuamna bangmah a om kei hi.

Kolosate 4

1 Pute aw, nou zong van ah pu khat nanei uh chih thei in na silate uh tung ah adik leh akilawm hun bawl un.

Thuhilhnate

2 Lungluttak in thum jomjel unla, hua ah kipahthu gen kawm in kiveng jing un. 3 Kolbulh a ka omna pen, Krist thugu’k gen ding a Pasian in kou ding a thugenna kot ahung honsak theihna dingin kou ding in zong hung thumsak un. 4 Ka gen ding bangtak a ka genkhiat theihna ding in. 5 Hun lemtang lei in, pualam mite lak ah pilvangtak in om un. 6 Michih bang chibang a dawnding ahia chih na theihtheihna ding un na ham kansuak uh chisoh hehpihna jau hi gige hen.

Chibai buk tawpna

7 Ka tanchin jousiah pen sanggam ittak Tikikia nasemtu gin-om leh Toupa a ka sila hihpih in nou ahung theisak siang ding hi. 8 Hua ding mah in amah na kiang uah kung sawl ahi, na tanchin uh atheih a, tualeh na lungtang uh a khamuansak theihna ding in. 9 Onesima, snaggam gin-om leh it omtak, noulak a mi mah tawh, amau’n hihlam sil omdan jousiah ahung theisak ding uhi.

10 Aristarkha, ka thong tanpih in chibai a hungbuk hi, Marka, Barnaba tupa in zong chibai a hungbuk hi, (amah tungtang ah thupiak na mu uh; na kiang ua a hungpaileh kipaktak in na pom un.) 11 Tualeh Jesu, Jasta zong achih uh, teptanmi in nou chibai a hungbuk hi. Hihte guak Pasian gam thu lam a ka naseppih ahung khamuantute ahi uhi.

12 Epaphra, nalak ua mi, Krist sila in nou chibai a hungbuk hi. Pasian deihlam jousiah a hoihkim leh bukim a na dingdet theuhna ding un amah pen thumna ah theihtawp suah in apang hi. 13 Ajiak aman nou ading leh, Laudisia leh Hirapoli khua a omte ding in phattuam angai mahmah chih kana theihpih hi. 14 Luka, daktor ittak leh Dema in nou chibai ahungbuk hi.

15 Laudisia khua a unau omte leh, Nimpha leh a inn a saptuam omte chibai hung buksak in. 16 Tualeh hih laikhak nalak uah na simzoh chiang un, Laudisia saptuamte lak ah zong na simsak un. 17 Tualeh Arkippa kiang ah, “Toupa a nasepna na muhpen hihbukim ding in pilvang in,” nachi un.

18 Keimah Paul in, keimah khut a chibai kungbukna ahi, ka kolhbulhte thei gige un! Hehpihna na kiang uah om hen. Amen.