Back To Top
TIMOTHI
KIANG A SAWLTAK PAUL LAIKHAK KHATNA
I Timothi 1
Chibai bukna
(1.2: Nst. 16.1)
1 Paul, I hundampa uh Pasian leh, i kinepna uh Toupa Jesu Krist thupiak bang a Jesu Krist sawltak in:
2 Ginna a ka tapa taktak Timothi kiang ah, Pasian I Pa uh leh, I Toupa Jesu Krist kiang a kipan, hehpihna leh, zahngaihna leh, khamuanna omta hen.
Thuhilhna diklou siate vauna
(1.13: Nst. 8.3; 9.4,5)
3 Mesidonia gam a ka pai ding kuan a, Ephesa khua a na omgige uh ka deih a, mi khenkhat in kihilhna diklou a hilhlouhna ding leh, 4 ginna a Pasian ngaihsakna kichilna ompen hilou a, kiselna piangsak tangthu pouh leh tangthu sutsenglouh maimai a ngaihsaklouh na ding ua, hilh ding a kung nget bang un, huachin bawl in. 5 Tualeh thupiak kipiak jiak ahihleh, lungtang siangthou leh, sia leh pha theihna hoih leh, ginna diktak a itna a kipan ahi. 6 Mi khenkhatten hihte pialsan in, thu ginalou genna lam ah a kiheimang santa uhi. 7 A thugen uleh sil ahi a agente uh zong bang ahia chih theichian loupi in, danthu hilhtute hih a ut uhi.
8 Hinanleh mi’n dan ahibangtak a ajak leh, dan pen ahoih chih ithei uhi. 9 Hih thei in, hua dan pen mi diktatte ding a bawl ahi kei a, hinanle thumanglou leh genhakte a ding, Pasian ngaihsaklou leh mi khialte a ding, mi siangloute leh Pasian zahloute a ding, pate thatte leh nute thatte a ding, mihing thatte a ding, 10 kingaihhatte a ding, pasal leh pasal kipawl thanghuaite a ding, mihing gutute a ding, juauhatte a ding, dikloupi a kichiamte ading, tualeh thugin tawh kikalh sildang a omleh huate a dingin ahi. 11 Ka kiang a kepsak a om, pahtawitak Pasian thupitak tangthupha dungjui in.
Pasian zahngaihna jiak a kipahthu genna
12 Tualeh nasemtu a hungkoih a, ginom a ahung sim jiakin, ahung hitheisaktu Jesu Krist, I Toupa uh ka phat ahi, 13 tu masang in Pasian gensiatu, bawl gentheitu leh simmohtu na himahleng zong; hinanleh zahngaihna ka muta hi, ginglou pi a theilou a ka bawl ahihjiak in. 14 Tualeh I Toupa uh hehpihna pen Krist Jesu a om ginna leh itna in adimlet hi. 15 Krist Jesu pen mikhialte tan ding in leitung ah a hungpai hi chihthu gintat om leh, pomtak mahmah ahi. Hua mikhialte lak ah kei alianpen ka hi. 16 Ahihhangin, tunung chiang a tangtawn hinna ding a amah hung ginta dingte etton ding in Jesu Krist in a thuakzoh dan keimah a ahihlat masak theihna dingin hih jiakin zahngaihna ka mu hi. 17 Tuin tangtawn kumpipa sithelou, muhtheihlouh Pasian pil khat guak kiang ah zahna leh thupina tangtawn tangtawn in omta hen! Amen. 18 Ka tapa Timothi aw, tumasang a tangthupha na kianga ka genkholh thute dungjuiin hih thupiakte kung pia hi. Huate a kidouna hoih na doutheina ding in, 19 ginna leh sia leh pha theina hoihpen tukip in, huapen mi khenkhatte in a paikhia ua ginna lam ah longsia bangin a kehgawpta uhi. 20 Amauh lak ah Haimena leh Aleksander ahi uh, Pasian gensiatlouh ajil theihna ding un amauh pen setan ka piata hi.
I Timothi 2
Saptuam biakna
(2.7: 2Tim 1.11. 2.9: Pet 3.3. 2.13: Gen 2.7,2.21,22. 2.14:Gen 3.1-6)
1 Tuajiakin, a masapen in, sil ngetnate, thumnate, thumsaknate tualeh kipahthu gennate mi jousiah bawlsak dingin kung ngen hi; 2 kumpipate leh thuneihna mun a om jousiah a ding in zong, tuachia Pasian limsak leh zah-omtak a hinkhua kituak leh muanhuaitak a i mantheihna ding un hihbang a thumsak ding ahi. 3 Hihpen I hundampa uh Pasian mitmuh in ahoih in apomtak hi, 4 a man mi jousiah hundam a om ding leh thutak hungthei dingin adeih hi. 5 Ajiak Pasian khat a om a, tualeh Pasian leh mihing kikal ah palai khat a om hi, mihing Krist Jesu pen, 6 ahuntak a theihsak a um ding in, amahleh amah mi jousiah tatkhiatna dingin ahung kipiakhia hi, 7 hua ding a thugentu leh sawltak a guat ka hi, Krist ah thutak ka gen ahi. Ginna leh thutak Jentelte hilhtu ka hi!
8 Tuajiakin pasalte’n mun jousiah ah khut siangthou tungtou in, thangpailou leh ginglelllou in thum le uh ka deih hi. 9 Tuachibang mah in numeite pen puansilh kilawm hun leh jumtheihna omtan siam in kijem le uh, sam phekkil hiam, kham hiam, tuikepsuang hiam, ahihkeileh sil mantam a kijemlou in, 10 hinanleh numei Pasian ngaihsak kichite a hungiap in, silbawl hoih in kijem le uh ka deih hi. 11 Numeiin thumang tak in dai khinkhian in jil uhen. 12 Tualeh numei in thu ahilh ka phalkei,tualeh pasal tung a thu aneih zong ka phalkei, hinanleh, dai khinkhian in omjaw uhen. 13 Ajiakpen Adam siam masak ahi a, tuanung in Evi siam ahi. 14 Tualeh Adam khem in a omkei a, hinanleh numei khem in aom a, bawhsiatna ah a pukta hi. 15 Hitaleh zong ginna, itna leh siangthouna nei a mahni kithunun a aomjing uleh nauneihna ah hundam in a om ding uhi.
I Timothi 3
Saptuam lamkaite chinnate
( 3.2-7: Tit 1.6-9 )
1 Kuapeuh saptuam lamkai hi ut in nahoih sep a ut ahi, chih adik hi. 2 Tuachi’n saptuam lamkai ding pen gensiat bei, zi khat nei, kidekthei, chihtakna lungsim nei, gamtat hoih, mi pahtakdan siam, thuhilh siam;
3 uain kham hatlou, mivuak hatlou, dangka duh-amlou, hinanleh migi, misel hatlou, mi enghatlou;
4 ama innsung kizentak a kemsiammi, zah omtak a atate kemsiammi, ahih ding ahi. 5 Ajiak pen miin ama innsung bawn vaihawm dan a theihkeileh, bangchiin Pasian saptuamte a enkol thei dia? 6 Gingthakmi ahihlouh ding ahi, atuachih keileh aki sathei khading a, setan siamlouh tanna ah apuk khading hi. 7 Tualou zong, pulam mite genphat ahih ngeingei ding ahi, atuachih keileh gensiat a om in setan thang ah a awk khading hi
Saptuam upate hihnate
8 Tuachimah bangin, saptuam upate pen mi zah om, kamtam lou; uain hailou, dangka duh-amlou, ahih ding uh ahi; 9 sia leh pha theihna siang a ginna thuguk kemmi ahih ding ahi. 10 Hinanleh hihte ah etchian in om masa uh henla, tuazoh chinagin gensiat bei ahih uleh saptuam upa na sem uh hen. 11 Tuachimah bangin azite uh zong mi zah-om ahih ngeingei ding uh ahi, kamtam lou, kidekthei, sil jousiah a ginom ahih ding uh ahi. 12 Saptuam upate pen zi khat nei, a tate leh a innsung uh kizentak a vaihawm siammi hi hen. 13 Ajiak pen saptuam upa na hoihtak a semten dinmun hoihtak leh Krist Jesu a om ginna lam a hangsanna thupitak amu uhi.
Thugu’k thupitak
14 Tomkhat zoh chiang a na kiang ua hungpai kinem in hihthute na kiang uah kung gelh hi. 15 Hinanleh kung zekai khak leh, Pasian innkuan sung a bang chibang a gamta ding na hia chih na theihna dingin kung gelh ahi, huapen Pasian hing saptuam, thutak khuam leh kingakna ahi uhi. 16 Tualeh Pasian ngaihsakna thugu’k pen nial guallouh in athupi ahi:
Pasian pen taksa in ahung kilang a,
Kha in siam atang a,
vantungmiten amu ua, Jentelte
kiangah tangkoupih in a om a,
leitung ah gintat in a om a,
thupitak a laktouh in a omta hi.
I Timothi 4
Sia takloute
1 Hun nunglam chiangin mi khenkhatten paimangpihna kha leh dawite thuhilhna ngaihsak in; ginna a tawpsan ding uh chih Kha in chiantak in agen a, 2 lepchiahna a juauthu gen in, asia leh pha theihna uh sik-am a bih a om in, 3 kiten kham in, tualeh nek dingte thutak gingta a theite’n kipahthu gen a sanding a Pasian in asiamte nelou dingin thu apia uhi. 4 Pasian silsiam jousiah pen ahoih hi, kipahthu gen a san ahih photleh bangmah nial ding a om kei hi, 5 ajiak Pasian thu leh thumna a hih siangthou ahita hi.
Jesu Krist sila hoih
6 Hih silte unaute na theihsakleh, nang pen Jesu Krist nasemtu hoih, ginna leh thuhilhna hoih tutan a nazop thu-a vakkhang a om na hiding hi. 7 Hinanleh Pasian zahlouhna thu leh pitekte tangthu deihken la, Pasian ngaihsakna lam ah kithunun in. 8 Ajiak taksa kithununna ahihleh themkhat guak a phatuam a, hinanleh Pasian ngiahsakna pen, hinna tu-a umjing leh hung omkik ding piak thuchiam aneih jiakin sil jousiah ah aphatuam hi. 9 Hih pen thu gintat om leh pomtak mahmah ahi. 10 Ajiak hih huntawp lam ah Pasian hing i muan jiakin i semgim a, ipang teitei uh ahi., amah pen mi jousiah hundampa ahi a, agingtate a ding in ahihdeuh diak hi.
11 Hih thute pia inla, tualeh hilh in. 12 Na naupanna kuamah in simmawh kei hen, hinanleh ham kamsuak ah, gamtatdan ah, itna lam thu ah, khalam thu ah, ginna thu ah, siangthouna lam thu ah gingtute etton ding hijaw un. 13 Kungpai masiah laisim leh, hasot leh thugin hilh ngiahsak un. 14 Nangmah a om silpiak, genkholhna a piak, upate khut nga a Pasian in nang ahung piak pen nelhsiah ken. 15 Mi jousiah kiang a na phattuamna a lattheihna ding in hih silte ngaihsun inla, huate ah napum in kipia in. 16 Nangmah leh na thugin hilh ah pilvang in; hua silte ah omjing in; hih silte na bawljiak in nangmah leh na thu jate na hundam ding hi.
I Timothi 5
Gingtute lam a mohpuakna
(5.18; Deut.25.4; Mat. 10.10; Luk. 10.7)
1 Putekte phawk kenla, hinanleh pa bang in, tangval deuh te sanggam bang in, 2 pitekte nu bang in, nungakte sanggamnu kbang in siangthoutak in hasot in.
3 Meithaite, meithai taktakte zahbawl in. 4 Hinanleh meithai kuapeuh in tate hiam, tutte hiam aneihleh, amauh innsung ah Pasian ngahsakdan leh anu leh pate zahdan jil masa uhen; ajiak Pasian muh in huapen ahoih a, tualeh apomtak hi. 5 Tualeh meithai taktak, amahtang a om in pen Pasian ah kinepna anei a, sun leh jan a ngen in a thum gige hi. 6 Hinanleh amah nopsakna a hingnu pen adamlai in zong asi ahi. 7 Tualeh gensiat beia a omtheihna dingin hih thute pia in. 8 Hinanleh kuapeuh in ama mite a ding, adiak a ama innkuante a ding a ngahituahsak keileh ginna ajuausan a, gingloumi sangin a giloujaw ahi.
9 Meithai kum sawm guk nuailam, mikhat zi na hita pen meithai a simlouh ding ahi.
10 Silhoih bawl lam a mi pahtawi a om a, tate vakkhang a, mikhualte na jintun a, misiangthoute keng na silsakta, mi gimthuakte na panpihta, silhoih taphot thanuamtak a na bawljou ahihleh.
11 Hinanleh meithai nungak deuhte pen gelh ken, ajiak Krist deihloulam a ahung beveng chiang un pasal neih a ut paipai uhi. 12 a ginna masa uh apaih jiak un siamlouh tangin a om uhi. 13Tualeh huate ban ah, innchin ah avak kawikawi ua,thadah achi’ng uhi, tualeh thadah guak hilou in,gen louhlouh ding gen in, kamtam leh midemhat ahi uhi. 14 Tuajiakin meithai nungak deuhten pasal nei uhenla, innsung khawsak ngaihtuah uhenla gensiatna ding lemtang mawng mawng melma musak kei le uh ka deih hi.
15 Ajiak tu in zong mi khenkhat setan lam ah apial khiata uhi. 16 Gingtu numei hiam pasal hiam in meithai aneileh panpih uhen, meithai taktakte apanpih theina dingin saptuam hihbuai in omkei hen.
17 Saptuam upa vaihawm hoihte pen alehnih a zahbawl tuak a she hi uhen, adiak in thu leh thuhilhna lam a semgimte. 18 Ajiak Laisiangthou in, “Bawngtal in buh achillai-in amuk kan ken.” tualeh “nasemtu pen thaman mutak ahi,” achi hi. 19 Saptuam upa ahekna uh pen, theihpihtu nih hiam thum hiam lou in pom ken. 20 Mikhialte pen midangten zong alau theihna ding un, mijousiah mai ah taihilh in.
21 Khentuam neia bangmah bawllou a, deihsaktuam neilou a hih thute jui dingin, Pasian leh Toupa Jesu leh vantungmi telte mitmuh ah thu kungpia hi. 22 Mi kuamah tungah khut nga paipai kenla, midangte khialhna ah zong kikum ken; siangtakin kikoih jing in.
23 Na gilpi jiakin leh na damlouh jel jiakin tuiguak dawn nawn kenla, hinanleh uain themkhat khat zangjel in.
24 Mi khenkhat khelnate pen a malat a, vaihawmna ah atung masa jel hi; hinanleh mi khenkhatte a pen anung uah ajui hi. 25 Tuachimah bangin khenkhatte silhoih bawl kilang masa aom a, tuachibang loute zong phualtheih ahikei hi.
I Timothi 6
(6.13: Jhn. 18.37)
1 Pasian min leh thugin gensiat a aom louhna dingin sila hakkol pua jousiahte’n amauh pute bangkim ah zahbawl taak in sim uhen. 2 Tualeh gingtu mi pu a neite’n unau ahihjiak un simmoh kei uhen; hinanleh gin-om leh deihtakte leh, phattuamna mute ahihjiak un a na uh sepsak uhen. Hihthute hilh inla hasot in.
Thuhilh diklou leh hauhna dik
3 Mi kuapeuhin thuhilhna dang ahilh a, thutak I Toupa Jesu Krist thu leh, Pasian ngaihsakna lam thugin hoih a sakkeileh; 4 amah pen a kisathei ahi a, bangmah theilou ahi. Hinanleh theihnak sangin kinial leh thukalh lam ah a mawjawta hi; huachibang a kipan in thangsiatna, kinialna, dalna, kiginmawhna, hoihloute, 5 lungsim gilou nei a, thutak neilou minialhatna bang a hungsuak jaw hi. Tuachibang mite pen Pasian ngaihsak punna a ngai mite ahi uh; tuachibang mite a pat kihemkhia in.
6 Lungkimna tawh Pasian ngaihsak pen punna thupitak ahi. 7 Ajiak pen leitung ah bangmah i pualut kei a, tualeh bangmah i puakhia kei ding uhi! 8 Tuachi’n nek ding leh silh ding nei in huate ah i lungkim ding uhi. 9 Hinanleh hauhsak tumte pen khemna leh tha’ng ah, utna mot-huai leh hihsiathei tampi bang ah a puklut jel ua, huate-in pen siatna leh manthaina ah mi tampite ahihlum jel uhi. 10 Ajiak dangka ngaihnatna pen gilou chinteng bulpi ahi a, huapen khenkhat in adeihgoh ua, ginna a paimangsan uh, tualeh amauh leh amauh lungkhamna in a kisunle’t uhi.
Mimal thuhilhna
11 Hinanleh nang Pasian mipa aw, hih silte taisan inla, diktatna, Pasian ngaihsakna, ginna, itna, thuakzohna, mitgitna hihte delhjui jaw in. 12 Ginna kidouna hoih dou inla, tangtawn hinna pen tutinten in, hua tang ding a sap zong na hi a, tualeh theihpihtu tamtak mitmuh in gupna hoih na gumta hi.
13 Sil bangkim hihhingtu Pasian leh Pontia Pilat mai a gupna hoih gumpa Krist Jesu mitmuh in thu kung pia hi, 14 I Toupa Jesu hung kilat masiah hih thupiak siangthoutak leh gensiatbei a kem dingin. 15 Hua kilatna pen amah huntak ah phattuak thuneipa guak, kumpipate kumpi leh lengte leng Toupa’n a hunglak ding hi. 16 Amah bek in sihtheihlouhna anei a, kuama naihtheihlouh vak anei a, amahpen kuaman a mungaikei a, ahih keileh muzong a muhthiehlouh uh ahi; amah kiangah tangtawn thupina leh silbawltheihna om hen! Amen.
17 Tu-khang a mihausate pen ki satheilou ding leh, hauhsakna diklou a muanna ngalou ding a, sil jousiah i kipakna ding a kiningching tak a hung piatu Pasian tung a ngajaw ding in, 18 silhoih bawl ding in, silbawl hau ding in, sil phal ding in, kihop ut ding in, 19 tangtawn hinna atukdet theihna ding ua hun hungtun chiang a innkip hoihtak amauh ua ding a khawlkhawm dingin hilh in.
20 Timothi aw, na kiang a kepsak a ompen kemhoih in, Pasian zahlouhna thugen mawkmawk leh dikloutak a “Pilna,” kichi kikalhna pen nungngatsan in. 21 Huapen khenkhat in nei akisa ua, ginna lam ah a hihkhialta uhi.
