Kilakna

KILAKNA

JOHAN

KIANG A KILAKNA

Kilakna 1

Chibai bukna

1 Jesu Krist kilakna, Pasian in akiang a sil hungtung pai ngeingei dingte a silate a theihsak ding a apiak pen; aman huapen a sila Johan kiangah vantungmi sawl in chiamtehna in a theisakta hi, 2 tualeh aman Pasian thu leh Jesu Krist theihpihna thu leh a silmuh jousiah a theisakta hi. 3 Hih genkholhna thute simleh ngaikhiate leh, asung a thu kigelh jui mipen ahampha hi; ahun anaitak jiak in.

Saptuam saighte kiang a achibai bukna

            4 Johan in Asia gam a om saptuam sagihte kiangah:

            Amah a omjing leh a omsa leh hung paidingpa a pat leh, a laltouna mai a om Kha sagihte a pat, 5 tualeh theihpihtu gin-om, misi lak a piang masa, leh leia kumpipate vaihawmtu Jesu Krist a kipan,

            Hehpihna leh khamuanna na kiang uah om hen. Amah ei hung it a I khialhna apat ama sisan mahmah a hung silsiangtu leh, 6 Pasian a Pa kiang a lalte leh siampute a hungsiamtu kiagah, thupina leh thuneihnatangtawn tangtawn in omjingta hen! Amen.

            7 En in! meipi tawh a hungpai hi;

                        Mit jousiahin amah amu ding hi,

                        Amah su’ntute mahmah in zong;

                        Tualeh leitung anam jousiah

                                    Amah jiakin akap ding uhi.

                        Huachi hihen! Amen.

            8 “Kei Alpha leh Omega, Abul leh Atawp ka hi,” Toupa, omjing leh omsa leh hungpai ding pa, hat tungnung in, achi hi.

Krist muhna

            9 kei, Johan, na sanggampa uleh Jesu Krist a gimthuakna leh kumpi gam leh thuakzohna a natanpih uh, Pasian thu leh Jesu Krist thu theihpihna jiakin Patmos kichi tuikulh gam ah ka om a. 10 Toupa ni in kha in ka om a, tualeh ka nunglam ah pengkul gingbang aw ngaihtak kaja hi. 11 Kei, Alpha leh Omega, Amasapen leh Anunungpen ka hi, tualeh, “Na silmuhte laibu ah gelh inla, Asia gam a om saptuam sagih kiangah khak in: Ephesa khua ah, Smarna khua ah, Pergamos khua ah, Thiatira khua ah, Sardi khua ah, Philadelphia khua ah, tualeh Laudisia khua ah,” chi in.

            12 Tuachi’n hua ahung houpih aw pen muh tum in ka kihei a, tualeh ka kiheileh kham a kibawl meivak tuna sagih kamu a, 13 tualeh hua meivak tunna sagihte laiah Mihing Tapa tawh kibang, mi khat a kengpheang dong apuansilh, a awm kham kawnggak a kigak ka mu hi, 14 Alu leh asam samul bangin akang a, vuk bangin angou a, tualeh amit pen keikuang bang ahi; 15 a kengphang pen dangka san taak tak meia halsan bang ahi a, tualeh a aw pen tui tampi luang gingbang ahi. 16 Aman akhut jiatlam ah aksi sagih atawi a, akam a pat in namsau alangnih a hiamtuah apawt a, tualeh amel pen ni hahsat a asat laitak bang ahi. 17 tualeh amah ka muhtakin, asi bangin a kengbul ah ka puta hi. Hinanleh aman a khut jiatlam ka tungah nga in, ka kiangah, “ Lauken! Kei amasapen leh anunung pen ka hi. 18 Kei a hingjingpa kahi. Tualeh kasi a, tualeh ngaiin, tangtawn in ka hing ahi. Amen. Tualeh misikhua leh sihna chabi kanei hi. 19 Na silmuhsate leh, sil omlaite leh tunung a sil hung om dingte gelh in. 20 Ka khut jiatlam a aksi sagih na muhte leh, kham meivak sagih na muhte thugu’k ahihleh, aksi sagihte pen saptuam sagihte vantungmite ahi uh: tualeh meivak tunna sagih na muhte ahihleh saptuam sagihte ahi uhi, achi hi.

Kilakna 2

Ephesa saptuamte kiang a laikhak

            1“ Ephesa khua a saptuam vantungmi kiang ah hichin gelh in:                                   

“ Akhut jiatlam a aksi sagih tawipa, kham meivak sagih lak a vak kawikawipa in hih thute agen hi. 2 Na nasep, na sepgimnate, na thuakzohnate, tualeh migiloute na thuaktheihlouh dante. Tualeh hiloupia sawltak ka hi uh chite na theihkhiat a, mijuau ahihdan uh na matkhiat leh. 3 Tualeh na thuakjou a, na dohzou a, tualeh kamin jiak a na gimdan leh na gimlouhdan ka thei hi. 4 Hitalehzong demna khat kungnei hi, na itna masa na nutsiattak jiak in. 5 Tuajiakin na pukna laitak theigige inla; kisik inla, tualeh nasep masakpen bawlkik in. Atuachih keileh, kintak in na kiangah kungpia ding a na kisik keileh na meivak tunna pen amun a kipan ka suan ding hi. 6 Hinanleh hihthu ah nahoih hi: Nikolaitan pawlte nasep na huatna ah, huapen ken zong ka hua hi.                                                         

7 “Kuahileh bilnei jousiahin saptuamte kiang a kha thugen ja hen!                                         “ A gualjoupa kiangah Pasian paradis laijang a om hinna sing a pat nek ding ka pia ding hi.

Smarna saptuamte kiang a laikhak

8 “Tualeh Smarna  khua saptuam vantungmi kiangah hichin gelh in:                                     

“Amasa pen leh anunung pen,si-a hingkikpa in hihthu agen hi. 9 Na nasepte leh gimthuaknate leh na jawndan, hinanleh na hausa hi, ka thei hi. Tualeh Judami hiloupia ka hi chi, setan kikhopna inn hingal, huate gensiatna ka thei hi! 10 Nung thuak ding silte lauken. Ngaiin, etkhiat a na omtheihna ding un dawiin nalak ua khenkhatte thong ah ahung khum ding a, nsawm sung gimthuakna na nei ding un. Hinanleh sihtanpha in gin-om un, tuachi’n hinna lallukhu kung pia ding hi.                              

11 “ Kuahileh, bilnei juousiahin, saptuamte kiang a kha thugen ja hen!                                 

“ A gualjoupa pen sihnihna a natsak in a omkei ding hi.

Pergamos saptuamte kiang a laikhak

            12 “Tualeh Pergamos khua a saptuam vantungmi kiangah hichin gelh in: “ Amah namsau alangnih a tat-hiam tuak neipan hihthu agen hi: 13 Na nasep leh na tenna mun, setan touna ngeizong khoisan ahia chih ka thei hi. Tualeh kamin na pomkip a, tualeh ka martal ginom Antipa, setan tenna nalak ua thah a aomlai in zong nung ginna na tukip hi. 14 Hinanleh demna sil themkhat kung nei hi: ajiak pen Balaam thugin juite huaah na ompiha, aman Israeltate maia pukna bawl ding leh, milim biakna sa ne ding leh angkawmna khialna bawl ding in Balak a thuhilh hi. 15 Huachimah bangin Nikolaitan pawlte thugin jui mi khenkhat zong nanei a, huapen ka hua hi. 16 kisiik in! Atuachih keileh, kintak in na kiang ah kungpai ding a ka kam a pawt namsau in amauh ka dou ding hi.                                                                                 17 “Kuahileh bilnei juousiahin saptuamte kiang a kha thugen ja hen!                                     “ A gualjoupa kiangah manna kiphualgu anek ding ka pia ding a, suangkang khat, hua suangtung a minthak atangtu loungal kuaman a theihlouh kigelh ka pia ding hi.

Thiatira saptuamte kiang a laikhak

18 “Tualeh Thiatira khua a saptuam vantungmi kiangah hichin gelh in:

“ Pasian Tapa meikuang bang mitnei a, dangka san tawhbang keng neipa in hihthu agen hi. 19 Na nasepte, na itnate, na nasepnate, nag innate, tualeh na dohzohnate ka thei hi. Tualeh na silbawl a masapen sang in a nunung pen a thupijaw hi. 20 Hitalehzong demna sil themkhat kung nei hi: hua numei Jezebel na phal jiakin, aman amah leh amah Jawlnei kahi kichi in ka silate angkawmna khialhna bawl ding leh milim biakna sa ne ding in angkawmna apat kisik dingin hun ka pia a, hinanleh a kisik kei hi. 22 Ngaiin, mahnu pen damlouhna lupna ah ka gimthuakna thupi ah ka puilut ding , a silbawl uh a kisik kei uleh. 23 A tate sihna in ka that ding hi. Tualeh saptuamjousiahin keipen lungsim gill eh lungtang jongpa ka hi chih athei ding uh, tualeh na-un un na nasep dungjui un kung pia ding hi.                                                                                 24 “ Tuin nang leh Thiatira khua a om, hih thugin neilou leh, agen uh bang a ‘setan thuthukte theilo,’ midang jousiah kiangah kagen ahi. Tunggikna dang mawng mawng natung uah ka koihkei ding hi. 25 Hinaleh hua na neihsa uh kungpai masiah tukip un. 26 \tualeh agualjoupa leh atawp dong a thuneihna ka pia ding hi; 27 ken zong ka Pa a kipat ka muh bang ngeiin, aman zong atung uah bel khengpan bel ahal a akek bangin sikchiang invai ahawm ding hi,28 tualeh amah pen jingsol aksi kapia ding hi.                                                   

29 “ Kuahileh bilnei jousiahin saptuamte kiang a kha thugen ja hen!

Kilakna 3

Sardis saptuamte kiang a laikhak

1 “Tualeh Sardis saptuam vantungmi kiangah hichi’n gelh in: “ Psaian kha sagih leh aksi sagih neipa in hihthute agen hi. Na nasep ka thei hi; hing min napua a, hinanleh asi na hi! 2 Kiveng inla, tualeh sil omnalai siding a kisate hatsak in, ajiak pen na nasep Pasian maiah a bukim in kathei kei hi. 3 Tuajiakin na muhdan leh na jakdan theigige inla; tukip in, tualeh kisik in. Huachia na kiveng kei leh guta bangin na kiang ah kungpai ding a, tualeh bangchik hun a na kiang kungtun ding na theikei ding hi. 4 Sardis khua ah a puante uh ninsaklou min tawmnou khat nanei a; tualeh amauhte pen kei tawh, puankang silh in aleng ding uh, chitna aneih jiak un. 5 Kuahileh agualjoupa pen puankang silhsak ahi ding a, tualeh amin uh pen hinna laibu a pat ka thaimang kei ding; ka Pa mail eh a vantungmite mai ah kagum ding hi.                         6 “Kuahileh bilnei jousiahin saptuamte kiang a kha thugen ja hen! Chi in.

Philadelphia khua a saptuamte kiang a laikhak

7 “ Tualeh Philadelphia khua a vantungmi kianga hichin gelh in: “ Amah siangthou leh dik, amah David chabi neipa, ahon chiang a kuaman a khaktheihlouh, a khak chiang a kuaman a hontheihloupa in hih thute agen hi. 8 Na nasep kathei hi, en in, na maiah kuaman a kahktheihlouh, kong kihong ka koih hi. Ajiak pen thahatna neunou khat nanei a, tualeh kamin na kitheihmoh bawl ngaikei hi. 9 Ngaiin! Setan kikhopna inn a mi Judami hilou pia ka hi chia juau gente, ngaiin huate kungpia a, amauhte pen hungpaiin na kengbul ah kung biasak ding hi. Nang kung it chih atheihna ding un. 10 Ka kuhkalna thu na kepjiak in, leitung a teng mite etkhiat ding a leitung pumpi a hungtung ding ze-etna hun a kipan in ken zong kung vengbit ding hi. 11 Ngaiin,kintakin kungpai hi, kuaman na lallukhu ahung laksak louhna dingin na silneihsa pen tukip in. 12 Kuahileh agualjoupa pen, ka Pasian timpul ah khuam-in ka pangsak ding a ; tualeh a pawtkhia ngai atung ah ka Pasian min leh, ka Pasain khuapi thak Jerusalem, ka Pasian a kipan a van a pat a hung kumsuk min ka gelh ding a, atung ah kamin thak ka gelh ding hi.                                 

13 “Kuahileh bilnei jousiahin saptuamte kiang a kha thugen ja hen!

           

Laudisia khua a saptuamte kiang a laikhak

14 “Tualeh Laudisia saptuam vantungmi kiangah hichin gelh in:

“ Amen, theihpihtu gin-om leh diktat, Pasian silsiam bul in hihthute agen hi.                                      15 “ Na nasep ka thei hi; lum lah lumlou, votlah votlou in na om hi. Na vot hiam na sat hiam a na om ka deih hi! 16 Tuachia, lum pelhpulh a, sat lah salou vot lah votlou a na om jiakin, ka kam a pat kung siakhia ding hi! 17 Ajiak pen nangman, ka hausa a , hauhsatna ka neita, bangmah ka tasam nawnkei, nachi a,tualeh  migenthei, haksa-thuakmi, mijawng, mittaw leh guaktang na hihlam na kithei kei hi. 18 Nung hauhsat theihna dingin kham meia halchim leh na guaktang jumhuaina a kilaklouhna dingin nasilh ding puankang leh, na muhtheihna ding a namit na nuh ding mitnalou ka kiang a pat lei dingin kung deishak hi. 19 Ka it mahmahte pen katai a, ka soisa hi. Tuajiakin, thathou inla, kisik in. 20 Ngaiin! Kotbulah dingin, ka kiu hi; mi khatpeuhin ka aw ajak a kot ahon leh, amah kiangah ka lut ding a amah tawh nitak an kane dinga, tualeh amah zong keitoh ane ding hi. 21 A gualjoupa pen ka kiangah ka laltouna ah ka tousak ding a, kei zong ka gualzoh a ka Pa tawh a laltouna a katou mahbang in.                         22 “ Kuahileh bilnei jousiahin saptuamte kiang a kha thugen ja hen!”

Kilakna 4

Tunglam a biakna

1 Hih silte zoh in ka en a, tualeh ngaiin, van ah kong honsa khat a om hi.                             

Tualeh aw ka jak masak pen, pengkul gingbang in kei hng houpih ahi a, “ Hihlam ah hung paitou in, tunung a sil om dingte kung musak ding,” achi hi. 2 Thakhat in keipen kha in ka omta a, tualeh ngaiin, van ah laltouna khat akitung a, hua laltouna tungah mikhat atou hi.3 Tualeh hua a tou-pa pen jasper leh sardia suang bang in a kilang a, tualeh hua laltouna kimkot ah sakhituihup, emerald suang bang a kilang aom hi. 4 Laltouna kimkot ah touna swmnih leh li a om a, tualeh touna tungah upa sawmnih leh li puankang silh a tou kamu a, amau’n alu uah kham lukhu akhu uhi.5 Tualeh hua laltouna a pat in tunphete,van gingte ,tua leh awte ahung suak a, hua laltouna maiah mei meivak sagih akuang a, huate pen Pasian kha sagihte ahi uhi. 6 laltouna maiah Kristal suang toh kibang, limlang tuipi a om hi.                              Tualeh laltouna lailak leh kimkual ah a mailam leh a nunglam mit a dim ganhing li aom a. 7 Ganhing masapen ahihleh humpinelkai bang ahi a, ganhing nihna pen ahihleh bawngnou bang ahi a, ganhing thumna pen in ahihleh mihing melbang apua a, tualeh ganhing lina pen muvanlai lenglai bang ahi. 8 Hua ganhing li, kha gukchiat neite pen akimkual leh asunglam ua mit a dim ahi ua,tualeh amau’s sun leh jan in tawlngalou in:                          

“siangthou, siangthou, siangthou,                                                                                                        Toupa Pasian bangkim bawlthei,                                                                                                        omsa leh omjing leh hung om ding,”                                                                    

achi uhi.                                                                                                                      

9 Hua ganhing lite’n laltouna tung a tou-pa tangtawn a hingjingpa kiangah thupina leh zahna pia a kipahthu agentak un, 10 upa sawmnih leh lite pen laltouna tung a tou-pa maiah khupbok in tangtawn tangtawn a hingjingpa abia ua; tualeh hua laltouna maiah a lalukhute uh koihkhia in,                                           11 “ Aw Toupa nang pen,                                                                                                                    thupinat, zahnate, leh thuneihna                                                                                                                            tangtaak na hi,                                                                                                                  

ajiak nangman sil jousiah                                                                                                                                 nabawl a,                                                                                                                                 tualeh nagma deihna bang a                                                                                                                     siam ahi uh,”                                                                                                       

achi uhi.

Kilakna 5

Laibujial leh Belamnou

1 Tualeh amah laltouna tung a tou-pa jiatlam ah asunglam leh a nunglam a kigelh chiamtehna sagih a kichiamteh laibujial khat kamu hi.2 Tuachi’n vantungmi khat aw ngaihtak a kikou a, “Kua ahia laibujial pen hong a hua a chiamtehna omte phel ding a taak?” chi kamu hi. 3Tualeh van a hin leiah hileh, tualouin leinuaiah hitaleh hua laibujial hongthei leh atung enthei mi kuamah aom takei hi. 4Tuachi’n hua liabujial hong ding leh sim ding hiam ahihkeileh atung entaak mi kuamah ka muhlouh jiakin hahkah in ka kapta hi. 5 Hinanleh upate lak a khat in ka kiangah, “Kap ken. Ngaiin! Juda nam a humpinelkai, David jung in, hua laibujial pen, hong ding leh hua chiamtehna sagihte phel ding in ajouta hi,” achi hi.                                    6 Tualeh ka etleh, ngaiin, laltouna leh ganhinglite laiah leh upate laiah thahsa hileh kilawm Belamnou, kii sagih leh mit sagih nei ding kamu a. Huate pen Pasian kha sagih leitung pumpi a sawlkhiatte ahi uhi. 7 Tuachi’n amah a hungpai a laltouna tung a tou-pa khut jiatlam a pat in laibujial pen alata a. 8Tualeh laibujial pen alaktak in, ganhing lite leh upa sawmnih leh lite pen Belamnou maiah akhupbok ua, kaihging leh gimnamtui a dim kham vaan atawi chiat ua, huapen misiangthoute thumna ahi. 9Tualeh amau’n lathak khat asa ua:                                                                                                                                                            “Nang pen laibujial la a,                                                                                                                  hua chiamtehna pheltaak                                                                                                                                 na hi,                                                                                                                                       ajiak pen thah in na om a,                                                                                                                    chichin hamchin, michin leh                                                                                                                namchin a pat mite na sisan                                                                                                                 in Pasian a dingin nungtanta hi.                                                                                       10 Tualeh i Pasian kiangah lalte leh                                                                                                                siampute in nung bawlta hi,                                                                                                        tualeh leitung ah vai ahawm ding                                                                                                                     uhi,” chi in.                                                                                                                  11 Tuachia kaetleh, laltouna leh ganhing lite leh upate kimkot ah vantungmite aw tampi kaja a! Atamdan uh pen sangsawm mun sangsawm leh asang asang a timpi ahi uh, 12 tualeh,

 “Thah a om Belamnou pen                                                                                                                 thuneihnate, hausatnate,                                                                                                                      pilnate, thahatnate zahnate,                                                                                                                  thupinate leh gualjawlnate                                                                                                                        tangtaak ahi!”                                                                                                 

13Tualeh van a om, leia om, leinuaia om leh, tuipi sung a om ganhing jousiahin:                               “Laltouna tung a tou-pa leh                                                                                                                    Belamnou kiangah,                                                                                                                  gualjawlnate, zahnate, thupinate                                                                                                                      leh thuneihnate,                                                                                                                       tangtawn tangtawn in omjingta                                                                                                                         hen!”

achih uh kaja hi.                                                                                                                     

14 Tuachi’n ganhing lite’n, “Amen!” achi ua. Tualeh upa sawmnih leh liten khupbok in amah tangtawn tangtawn a hingjingpa pen abiata uhi.

Kilakna 6

Chiamtehna sagihte

            1 Tuin Belamnou in chiamtehna sagihte lak a khat aphel kamu a, tualeh aw vanpi ging banghial in ganhing lite lak a khat in, “Hungpai in!” En in achih kaja a. 2Ka etleh, ngaiin, sakolkang kang khat kamu a. Atung atuangpa in thal atawi a; tualeh a kiang ah lallukhu khat a kipia a amah pen gualjou leh gualjoujel dingin a kuankhiata hi.                            

3 Chiamtehna nihna aphel zoh in, ganhing nihna in, “Jungpai inla hung en in!” achih kaja hi. 4Tualeh sakol dang, mei bang a san khat ahung pawtkhia a; atung a tuangpa kiangah leitung a lemna laksak theihna leh , mite khat leh khat a kithahtuah theihna ding uh thuneihna a kipia a; tualeh a kiang ah namsau liantak piak ahi.                                                     

5Tualeh chiamtehna thumna aphelzoh in, ganhing thumna in, “Hungpai in,” hun en in! achih kaja a,tuachia ka etleh, ngaiin, sakol vom khat kamu a. Atung a tuangpa in a khut in tehna a tawi. 6Tualeh ganhing lite laia pat in aw khat in, “Makhai khat in gehu tehna khat, makhai khat in barli buh tehna thum, tualeh sathau leh uain pen hihsia ken!” achih kaja hi.                                                                         7Tualeh chiamtehna lina aphelzoh in, ganhing lina in, “Hungpai inla hung ngaiin!” achih kaja a. 8Tuachia ka etleh, ngaiin, sakol daang khat kamu a. Atung a tuangpa min ahihleh sihna ahi, tualeh misikhua in amah ajui a. Tualeh amauh kiangah  namsau tawh, kialtawh, sihna tawn, tualeh leitung a gamsate that dingin amauh leitung dehli suah sehkhat piak ahi.                                                                                   9 Tualeh chiamtehna ngana aphelzoh in, maitam nuaiah Pasian thu jiak leh a theihpihna apom jiak ua thah a omte kha kamu hi. 10 Tualeh amauh aw ngaihtak in a kikoukhia ua, “ Aw Toupa, siangthou leh dik, bangtan ahia leitung a tengte tung a vaihawmlou leh ka sisan phuba uh lalou a na um ding?” achi uhi. 11 Tuachi’n amauhte puankang a kipiachiat a, a sila hihpihte uleh a unaute uh amauh mahbang a thah a om dingte ahung kim masiah uh, tomkhat na khawl tadih ding a akiang ua hilh ahi uhi.                                   12 Tualeh chiamtehna gukna aphelzoh in , ka en a, ngaiin, jin nasatak in akiling a; tualeh ni pen samul la-ip bangin ahung vomta a, tualeh kha pen sisan bangin ahung omta hi. 13 Tualeh van aksite pen theikung huihpi hattak in amut a agah puamte apulh bangin leiah akia hi. 14 Tuachi’n van pen laibujial kijialbei bangin amangta a, tualeh mual leh tuikulh gam jousiah a omna ua kipan in suanmang in a omta uhi. 15 Tualeh leitung a lengte, miliante, mihausat, galkap liante, mihatte, silate leh zalente mi jousiah pen lei kawhawm leh mual a suangpite ah a kibuta uhi. 16 Mualte leh suangpite kiangah, “Hung netkhum unla amah laltouna tung a tou-pa maia pat leh Belamnou thangpaihna a pat hungphual un! 17 Ajiak a thangpaihna ni thupi hungtung ahita, kua ahia dingjou ding?” achi uhi.

Kilakna 7

Israelmi 144,000 te chiamtehna

1 Tualeh hih silte nungin vantungmi li leitung ah hi-in, tuipi tungah hi-in, singkung bangmah in amut ling ngailouhna leitung huih lite tawia lei ningli a ding damu hi. 2Tuachi’n vangtungmi dang suahlam a pat a hungkipan, Pasian hing chiamtehna nei khat kamu a. Tualeh aman akiang ua leitung leh tuipi suksiatna ding kipia vantungmi lite kiangah aw ngaihtak in a kikou a. 3 “I Pasian silate atal ua i chiamteh zoh masiah leitung hi-in tuipi leh singte hileh, hihsiakei un,” chi in.                                                    4 Tualeh chiamteh a omte phazah kaja a, Israeltate nam jousiah a pat nuaikhat leh sangsawmli leh sangli a chiamteh ahi uhi. 5Judah nam a pat sangsawm leh sangnih, Reuben nam a pat sangsawm leh sangnih, Gad nam a pat sangsawm leh sangnih,6 Asher nam a pat sangsawm leh sangnih, Manaseh nam a pat sangsawm leh sagnh, 7 Simeon nam apat sangsawm leh sangnih, Levi nam a pat sangsawm leh sangnih, Joseph nam a pat sangsawm leh sangsawm leh sangnih.

Namchin a pat mipite

9 Hih silte nung a ka etleh, ngaiin, mipi nasatak kuamah simzohlouh! Namchin, phungchin michih leh hamchin a pat puankang silh a, tualeh tumnah tawia laltouna leh Belamnou maia ding kamu hi. 10 Tualeh amau aw ngaihtak in a kikou ua, “Hundamna pen laltouna tung atou i Pasian uleh Belamnou a ahi!” chi in. 11 Tualeh vangtungmi jousiah laltouna kimkual ah upate leh ganhing lite kimkual ah adding ua, tualeh laltouna mai ah khupbok in amai uh tawh tual si-in, 12 tuachi’n, “ Amen! Gualjawlnate, thupinate, pilnate kipahthu gennate leh sil bawltheihnate i Pasain kiangah tangtawn tangtawn in omjingta hen! Amen!” chi in Pasian abia uhi.                                                                                                                13 Tuachi’n upate lak a khat in ahung houpih a, ka kiangah , “ Hih puankang a kijemte kuate ahi ua, tualeh khoia kipat a hungpai ahi ua?” a hungchi a.                                         

14 Tualeh ken a kiangah, “Pu aw, nang natheihi,” kachi hi.                                                    Tuachi’n aman ka kiangah, “Hihte pen gimthuakna nasatak a pat hung pawtkhiate ahi ua. Tuleh apuante uh Belamnou sisan a sawp in a kangsakta uhi. 15 Tuajiakin amauh pen Pasian laltouna maiah om in, sun leh jan in a tempul ah a nna asem uhi, tualeh amah laltouna tung a tou-pa pen alak uah ateng ding hi. 16Agil uh akialngai nawn kei ding a, adang uh atakngai nawn kei ding; tualeh nisa in amauh akangngai nawn kei ding a,ni asatna in zong ahihgim nawn kei ding hi, 17 ajiak Belamnou laltouna lai a ompa pen a belamchingpa uh ahi ding a, tualeh amau hinna tuikhuk ah apaipih ding a. Tualeh Pasian in amit ua pat khitui jousiah a nawtsiang sak ding hi,” chi in.

Kilakna 8

Chiamtehna sagihna

1 Tualeh aman chiamtehna sagihna aphelzoh in, dakkal lang sung ding bang vantung asip dingdeng hi. 2 Tualeh vantungmi sagih Pasian mai a ding kamu a, akiang uah pengkul sagih piak ahita uhi.                                                                                                                                    

3 Tuachi’n vangtungmi dang khat a hungpai a gimnamtui halna kham bawm tawiin maitam bul ah adding hi. Tualeh a kiang ah laltouna  mai akham maitam tung a misiangthoute thumna tawn alatkhawm dingin gimnamtui tampi piak ahi hi. 4 Tualeh gimnamtui khu pen misiangthoute thumna tawh kijawk in vangtungmi khut a pat in Pasian maiah ajamtouta hi. 5 Tuaci’n vantungmi in gimnamtui halna ala a maitam meiin a thundim a leitung ah a paikhiata hi; tualeh huasan ah awte, vanpi gingte, tunphete leh jinlingte ahung omta hi.                                                                                                                                       

Pengkul sagihte

6 Tuachi’n vangtungmi sagih pengkul sagih neaten mut ding in a kisata uhi.                                       7 vangtungmi khatna in amut a. Gial leh mei, sisan tawh kihal ahung omta a, huate leitung ah paihkhiat in aom a. Singkung sehthum suah sehkhat akangtum a, tualeh hampa hing jousiah a kangtumta hi.                                                                                                                  

8 Tuachi’n vantungmi nihna in amut a. Mei a kang, mual liangpi hileh kilawm, tuipi ah paih in aom a. Tualeh tuipi sehthum suah sehkhat sisan ahung suakta hi, 9 tualeh tuipi a om hinna nei ganhingte pen sehthum suah sehkhat asita ua, tualeh longpi zong sehthum suah sehkhat asiata hi.                                       10 Tuachi’n vangtungmi athumna in amut a. Tualeh aksi lianpi khat meisel bang a kuang, van a pat in ahung kiasuk a, luidungte sehthum suah sehkhat leh tuinakte tungah atu a. 11 (Hua aksi min pen “Gamsai” ahi.) Tualeh tuipi sehthum suah sehkhat gimsai ahug suakta a, tualeh hua tui khatsak ahihjiak in mi tampi asita hi.                                                

12 Tuachi’n vantungmi alina in amut a. Ni sehthum suah sehkhat, kha sehthum suah sehkhat, aksi sehthum suah sehkhat suksiat in a omta a, tuachi’n sehthum suah sehkhat mialsak a aom ta’k mah bang in, sun pen sehthum suah sehkhat vaklouin a om a; jan zong huachimah bang in.                                                   13 Tualeh ka etleh, vantungmi khat vanlaijawl a leng a aw ngaihtak a, vantungmi thum in amut ding, hua pengkul gin hung om nalai dingte jiak in, “ Leia omte tung agik, agik, agik  hi! Achih kaja hi.

Kilakna 9

1 Tuachi’n vangtungmi ngana in amut a. Aksi khat van a pat a leia kiasuk kamu a, tualeh a kiang ah kuakhuk tawbei chabi piak in a om hi. 2 Tualeh aman kuakhuk tawbei pen a hong a,tualeh hua kuakhuk a pat in haltuina mei nasatak khu bangin meikhu ahung pawtkhia a, tualeh hua kuakhuk a meikhu jiakin nil eh vanlaijawl ahung mialta hi. 3 Tuachi’n hua meikhu lak a pat in kauphe leitung ah ahung pawtkhia a, lei a mom-aite hanta bang hanta aiang uah piak ahi uhi. 4 Amauh pen a taltang ua Pasian chiamtehna neiloute guak chihlouh leia hampa hiam silhing hiam, ahihkeileh singkung mawng mawng susialou ding a thupiak ahi uhi. 5 Tualeh amauh pen huate that ding ahatna piak ahikei ua, hinanleh kha nga sung bawlgnthei ding a piak ahi uhi. Tualeh a bawl gentheihna uh pen mom-ai in mi apeh chiang a anat bang ahi. 6Huani chiangin mi’n sihna ajong ding ua hinanleh amukei ding uhi, sih a utding ua hinanleh sihna in amauh a taimangsan ding hi.               

7 Kauphe mel pen gal kuan ding a mansa a om sakolte bang ahi uh. A lutung uah kham tawh kibang lallukhu hileh kilawm aom a; amaite uh mihing mai abang hi. 8Amau’n numei sam bang sam anei ua, tualeh aha uh humpinelkai ha bang ahi. 9Tualeh amau’n sik awmphaw bang awmphaw anei ua, akhajap gin uh galdou ding a kuan sakolleng tampi ging bang ahi. 10 Amau’n mom-ai bangin mei anei ua, ameiah gu aom a, tualeh agu hatdan pen mihingte kha nga sung ahihna thei hi. 11 Tualeh amau’n kuakhuk tawbei vantungmi pen kumpipa in anei ua; Amin Hebrai hamin Abaddon ahi a, Grik hamin Appolion ahi,(“Hihsiapa chihna ahi”).                                                                                                                    12 Tunggikna khat abeita. Tunggikna hih hungpai ding aomlai hi.                                          13 Tuachi’n vantungmi gukna in amut a. Tualeh Pasian maia om kham maitam ki lite a pat aw kaja a. 14 Pengkul nei vantungmi kiangah, “Euphrate luipi lian a vantungmi li hen a omte sut in!” chi in. 15 Tuachi’n adakkal leh, ani leh, akha leh, akum, huntak a mihing sehthum suah sehkhat that ding a masa a kikoih vantungmi lite khah in a omta hi. 16 Tualeh hua sakol tungtuang galkkap mite tamdan maktaduai zanih ahi uh: aphakzah uh kigen kaja hi. 17 Tualeh hichibang in mangmuhna in: sakolte leh atung a tuang mei bang a san engdup leh kaat bang a eng awmphaw neite kamu a. Tualeh hua sakolte lutang pen humpinelkai lutang bang ahi a,tualeh akamsung ua pat in mei leh meikhu leh kaat apawtkhia hi. 18 Hih gawtnathumte akam ua pat a hung pawtkhia mei leh meikhu leh kaat in mihinge sehthum suah sehkhat thah in a omta hi. 19 Ajiak ahatnate uh pen akam uh leh ameidawn ua om ahi a. Amei uh pen gul tawh kibang ai a, lutang anei ua; huate a mi a suknat uh ahi.                                                                                                20 Hinanleh hih gawtnate-a silou midangte pen dawite leh mu lah  mutheilou, ja lah jatheilou, pail ah paitheilou, kham milimte, daan, sumsan, suang leh sing milimte a baiklouhna ding ua a khut ua a silbawlte uh tawpsan dingin a kisik tuankei uhi. 21 Tualeh a tualthahna uleh, a guktatna uapan a kisik tuankei uhi.            

Kilakna 10

Vantungmi leh laibujial neu

1 Tualeh vantungmi hat dang khat meilum a kituam, van a kipan ahung kumsuk kamu a, tualeh alu ah sakhituihup a om a; amai pen ni bang ahi a, tualeh akeng pen keikhuam bang ahi. 2 Akeng jiatlam tuipi tungah a nga a, akeng veilam leitung ah a nga hi, 3 tualeh amah pen, humpinelkai hawk bangin a kikou a. A kikouzoh in van ging sagihten a aw uh asuah tak un, gelh dingin ka kisata a, tualeh van akipan aw khat in ka kiangah, “Van ging sagihte sil gen imchip inla, gelh ken!” chi in kaja hi.

            5 Vantungmi tuipi tung leh lei tung a ding ka muh in akhut vanlam ah a tungtou a 6 tualeh tangtawn tangtawn a hingjingpa, van leh sung a sil omte, lei leh asung a sil omte, tuipileh saung a sil omte min in ka kichiam a, “Zekaina om nawnlou ding in! 7 hinanleh vantungmi sagihte aw ginlai nite a amut ding kuan chiangin, Pasian thugu’k kiphual pen a sila Jawlneite kiang a anagensa bangin zohsiang ahita ding hi,” chi in.                                                           

8 Tuachi’n van a kipan aw kajak in, “Pai inla, Tuipi tung lehlei tung a ding vantungmi khut a laibujial neu phensa om pen vala in,” ahung chikik a.                                            

9 Tuachi’n vantungmi kiangah ka vapai a akiang ah, laibujial neupen hungpia in, kava chi a; tualeh aman ka kiangah, “La inla, nekhin siangin; hih in nagil akhasak ding a, hinanleh na kam ah khuaiju bangin akhum ding hi,” achi hi.                                                                   

10 Tuachi’n vantungmi khut a pat in laibujial neupen kala a, ka nesiang a, tualeh hih pen ka kam ah khuaiju bangin akhum a, hinanleh kanekzoh in kagil pen akhata hi. 11 Tualeh aman ka kiangah, “Mi tampite leh, nam tampite leh, ham tampi leh, kumpipate maiah Pasaian thu nagen sawn ngeingei ding ahi,” ahung chi hi.

Kilakna 11

Theihpihtu nihte

1 Tuachi’n pumpeng chiang tehna bang khat ahung kipia a, tualeh vantungmi ading a, ka kiangah, “Thou inla Pasian tempul leh maitam leh asung a biatute the in. 2 Hinanleh huangsung tempul puanlam tehken; nusia in, ajiak huapen Jentelte kiang apiak ahita hi, tualeh khuapi siangthou pen amau’n kha sawmli leh nih a tuanden ding uhi. 3 Tualeh ka theihpihtu nihte kiangah silbawltheihna ka pia ding a, amau’n la-ip silh in ni sangkhat leh zanih leh sawmguk sung thu agen ding uhi,” achi hi.                                              4 Hihte pen Olive sing nihte leh leitung a Pasian maia ding meivak tunna nihte ahi uhi. 5 Tualeh mi khatpeuhin amauh ahihnatleh, akam uapat mei hung pawtkhia in a melmate uh a kangmang a; tualeh mi khatpeuhin amauh ahihnatleh, huachimah bang a thah in aom ding hi. 6 Hihte’n a thugen hunsung ua guah juklouhna dingin van khaktheihna sil bawltheihna anei ua. Tualeh tui sisan suaksak theihna leh, a ut dandan ua leitung gawtna chinteng a gawttheihna, silbawltheihna anei uhi.                                                     7 Tualeh atheihpihna thugen uh azoh chiang un, kuakhuk tawbei a pat hung pawtkhia gamsa in adou ding a. Ajou ding, tualeh athat ding hi, 8 tualeh aluang uh pen kha lam a Sodom leh Izipt kichi, i Toupa uh zong kilhden a om na khuapi thupitak kongjing ah alum ding hi. 9 Tuachi’n mipite leh, phungchin leh, hamchin leh, namchin a miten nithum le hakim aluang uh a en ding ua, aluang uh hankhuk a vuiding aphal kei ding uhi. Tualeh leitung a tengte a kipak ding ua gualnop a bawl ding ua. Tualeh silpiakte a kikhaktuah ding uhi, ajiak pen hih Jawlnei nihten leitung a tengte ana bawlgenthei mahmah uhi. 11 Tuin nithum le hakim zoh in, Pasian a kipan hinna kha asung uah alut a, akeng un ading uhi, tualeh amauh mute tungah launa thuitak a tungta hi. 12 Tualeh amau’n van a kipan a aw ngaihtak in, “ Hihlam ah hungpaitou un!” Akiang ua achih aja ua, tualeh amauh meilum lak ah van ah akahtouta ua a melmate un amauh amu uhi. 13 huahun laitak mah in jin nasatak in aling a, tualeh hua jinling ah mi sangsagih thah in a om hi. Avalteng pen alau mahmah ua van Pasian kiangah thupina apiata uhi.                             14 Tunggikna nihna abeita a. Ngaiin, tunggikna thumna ahung paipah ding hi!

                       

Pengkul sagihna

15 Tuachi’n vangtungmi sagihna in a pengkul amut a, van ah aw ngaihtak aging a, “ Hih leitung kumpi gamte pen i Toupa uleh krist kumpi gam ahung hita, amah pen tangtawn tangtawn in kumpi in atou ding hi!” chi in. 16 Tualeh Pasian maia a laltuna ua tou upa sawmnih leh lite pen khupbok in Pasian abia ua, 17 amau’n:                                                                                                                                                           “Na kiang ah kipahthu kunggen uhi,                                                                                        aw Toupa Pasian hattungnung, omjing leh, omsa leh,                                                              hung om ding!                                                                                                                         Ajiak nangman na thahatn                                                                                                                               thupitak na lata a tualeh vai                                                                                         nahawmta hi!                                                                                                                           18 Namte aheh ua,                                                                                                                                           tualeh na thangpaihna a                                                                                                           hungtungta,                                                                                                                                                      tualeh misite vaihawmsakna ding leh,                                                                          na silate, Jawlneite leh                                                                                                                              misiangthoute leh, na min laute,                                                                                       

milian leh mineu kiang a,                                                                                                                     nuamman piakna ding hun leh,                                                                                                                leitung susiate na suksiatna ding                                                                                                                 hun pen a hungtungta hi!”                                                                              

chi in.                                                                                                                                     

19 Tuachi’n van ah Pasian tempul a kihonta a, a tempul sung a thukhun bawm ahung kimu a; tualeh tunphe bang, awging bang, van ging bang, jinling bang, tualeh gialkia thupitak bang ahung omta hi.

Kilakna 12

Numei leh gulpi

1 Tualeh van ah chiamtehna thupitak khat ahung kilang a. Numei khat ni a kithuam, akengnuai ah khapi, tualeh a lutung ah lallukhu aksi sawmlehnih ahung om a. 2 Tuachi’n amahnu pen naupai ahi a, nauvei leh nau suakkhia ding natna in akapta hi.                                          

3 Tualeh chiamtehna dang van ah ahung kilang kik a. Ngaiin, mei bang a san gulpi, lutang sagih leh kisaawm nei, alutung a manglukhu sagin khu ahung om hi. 4 Amei in van a aksi sehthum suah sehkhat akai a leiah apaikhiata a. Tualeh anau asuahkhiat phetleh ana valhjoupai dingin gulpi pen numei nausuak dingnu maiah ading hi. 5 Amahnu in ta pasal, namjousiah tung a sikchiang a vaihawmtu ding khat ahung neikhiata a. Tualeh ata pen kipelkhia in Pasian leh a laltouna ah laktouh in a omta hi. 6Tuachi’n numeinu pen ni sangkhat leh zanih leh sawmguk avaaktheihna ding un gamdaiah Pasian in abawlsa mun a taimangta hi.                                                                                                                     7 Tualeh van ah kidouna aom a, Michael leh a vangtungmite’n gulpi adou ua. Tualeh gulpi leh a vantungmiten zong adou uhi; 8 hinanleh a joutakei ua, amun uh zong van ah muh in a omnawn takei hi. 9 Tuaci’n gulpi lian pen paihkhiat in a omta a, hua gulpite pen Dawi leh setan zong a kichi hi, leitung pumpi khemtu, amah pen leitung ah paihkhiat in a omta a, a vantungmite zong amah tawh paihkhiat in a om uhi.                                     

10 Tuachi’n van ah aw ngaihtak khat in “Tuinjaw i Pasian uh hutdamna leh! Thahatna leh! Kumpi gam leh Krist thuneihna a hungtungta hi! Ajiak pen i unaute uh hektu pen paihkhiat in a omta hi, aman asun ajan in i Pasian maiah amau ahek hi. 11 Tualeh  amau’n Belamnou sisan jiak leh atheihpihnathu uh jiakin amah pen ajouta ua, tualeh sihtanpha in ahinna uh a itkei uhi. 12 Tuajiakin nou vanleh asung a tengte kipak un! Hinanleh leitung leh tuipi a tengte tung agik hi! Ajiak pen hun tomnoukhat aneita chih a theihjiak in, dawipen heh mahmah in, na kiang uah ahung paisukta hi”.

Gulpi in leitung adou kik na

13 Tuin gulpi in leitung a paihkhiat ahi chih atheihtak in hua numei ta pasal neunu pen agawtta hi. 14 Hinnanleh numeinu pen gulpi mai a kipan hunkhat leh, hunte leh, hun kimkhat khawia a omna ding mun a alenlut theihna dingin, muvanlai liantak kha piak ahi a. 15 Tuachi’n gulpi in numeinu tui a tawhmangsak theihna dingin, anung ah tuikhanglian banghial in akam a pat tui a siakhia hi. 16 Hinanleh leiin numeinu apanpih a; leiin akam akak a hua gulpi in akam a pat a siatkhiat tuikhanglian pen valhbeita hi. 17 Tualeh gulpi pen numeinu tungah aheh mahmah a, a chikhak omsun Pasian thupiak juite leh, Jesu Krist theihpihna pomtute douding in a kuanta hi. 18 Tuachi’n gulpi pen tuipi piau sehnel tungah a dingta hi.

Kilakna 13

Gamsa masa

            1 Tuachi’n tuipi sehnel tungah ka ding a, tuipi-a kipanin gamsa khat lu sagih leh kisawm nei; a kite tung a lallukhu sawm nei, tualeh a lutungte a Pasian gensiatna min nei hung pawtkhia kamuta hi. 2 Tualeh hua ka gamsa muh pen gialbem tawh kibang ahi a, akeng vompi keng abang a, akam pen humpinelkai kam bang ahi. Tualeh amah pen gulpi in a silbawltheihna leh atouna leh thuneihna thupitak apia hi. 3Tualeh alutang lak a khat pen sihpih ding khop hial a liam hileh kilawm in kamu a, tualeh sihna khop hial a aliamna pen ahung damta a, leitung pumpi in ajuita uhi. 4 Tuachi’n gamsa kiang a thuneihna pia pulpi pen abiata ua, tualeh amau’n, “Gamsa tawh kibang kua aom a?” chi’n gamsa pen abia uhi.

            5Tualeh amah pen sil thupitakte genna ding leh Pasian gensiatna ding kam a kiang ah piak ahi a, kha sawmli leh nih sung thuneihna piak ahita hi. 6Tuachi’n aman Pasian gensiatna leh, amin leh atenna inn leh van a tengte gensiatna in akam akakta hi. 7 Akiang ah misiangthoute tawh kidou ding leh amauh zoh ding thupiak ahita a. Tualeh phungchin leh, namchin leh, hamchin tung a thuneihna piak ahita hi. 8 Tualeh leitung a teng jousiah leitung kisiamchil a pat a gohsa Belamnou hinna laibu a amin uh ki gelhkhalouten amah abia ding uhi.

            9 “Mi khatpeuhin bil aneihleh ja hen! 10 Mi kuahileh sal a puiluttu, sal in atang ding a; mi kuahileh namsau a that tuh, namsau a thah in aom ding hi. Hihsan ah misiangthoute dohzohna leh ginna a kilang hi”

Gamsa nihna

11 Tuachi’n gamsa dang leitung a kipan a hung pawtkhia khat ka mu a; tualeh belam bang ki nih anei a, gulpi bangin thu agen. 12 Tualeh aman gamsa masapen thuneihna jousiah amaiah ajang a,leitung leh asung a tengte gamsa masapen  sihna khop hial a liam hungdamkik pen a biasakta hi. 13 Aman mihingte mitmuh in van a pat leitung ah meibang samkhia hial in, chiamtehna thupi taktakte abawl a. 14 Tualeh hua gamsa mitmuh a sillamdang nna bawltheihna akiang a piak a omte zang in, leitung a omte kiangah, namsau a satna maliam neia hing nalai hua gamsa lim nabawl ding uh ahi, chin leitung a tengte a khem hi. 15 Tualeh gamsa lim a hamtheihna ding leh gamsa lim bialou jousiah a thahtheihna ding a gamsa lim kiang a hunakna piaktheihna silbawltheihna aman anei hi. 16 Aman mijousiah, aneu leh alian, hausa leh jawng, saltang leh tanglou hitaleh, akhut jiatlam uah ahihkeileh atal uah chiamtehna aneisak chiat a, 17 tualeh chiamtehna hiam, gamsa min hiam, ahihkeileh amin nambar neite chihlouh mi kuamah in leizong a leithei kei ding u, juak zong a juaktheih kei ding uhi.

            18 Hihsan ah pilna akilang hi: Kuapeuh theihsiamna neiin gamsa nambar pen sim hen, ajiak pen hihpen mihing nambar ahi. Ama nambar pen 666 ahi.

Kilakna 14

Belamnou leh mi 144,000

1 Tuachi’n ka en a, ngaiin, Belamnou Zion mual a ding leh; atal ua a Pa uh min kigelh chiat nuaikhat leh sangsawmli leh sangli kamu hi. 2 Tualeh van a pat aw khat, tui tampi luang ging leh van ging ngaihtak bang kaja a, tualeh kaihging tumte kaihging tumging bang kaja hi. 3 Amau’n laltouna mail eh ganhing lite mail eh upate maiah lathak hileh kilawm asa ua. Leitung a pat a tatkhiat hua nuaikhat leh sangsawmli leh sanglite chihlouh hua la kuaman ajilthei kei uhi. 4 Hihte pen numeia kisubuah loute ahi uh, nungak siangthou bang ahijiak un; hihte pen apaina teng a Belamnou juitute ahi uhi. Hihte pen Pasian leh Belamnou ding a gah masapen hi ding a mite lak a kipan a tatkhiat ahi uhi. 5 Tualeh akam uah juauthu aom kei a; Pasian laltouna maiah gensiat beiin aom uhi.

Vantungmi thumte

6 Tuachi’n vantungmi dang khat leitung a teng namchin, phungchin, hamchin leh hamchin kiang a tangkoupih ding tangtawn tangthupha neia vanlaijawl a leng kamu a. 7 Aw ngaihtak a kikouin, “Pasian lalu unla, a kiang ah thupina pia un! Ajiak pen a viahawmna a huntungta hi. Tualeh amah pen van leh lei leh tuipi leh tuinakte siamtu pen bia un!” achi hi.                                                                                                 8 Tualeh vantungmi dang, anihna in ajui a, “Hua khuapi thupitak Babilon tuh achimta hi, achimta hi! A angkawmhat thangpaihna uain nam jousiah adawnsak jiakin!” chi in.                                                  9 Tuachi’n vantungmi, athumna in, amauh a jui a, “Mi khatpeuhin gamsa leh alim abiak a, ataltang hiam, akhut hiam a a chiamtehna aneih leh 10 Pasian thangpaihna uain, ahehna nou kisung dimlet pen adawn ding a, tualeh vantungmi siangthou mail eh Belamnou maiah mei leh kat a gawt in aom ding hi, chi in. 11 Tualeh a gawtna uh meikhu pen tangtawn tangtawn in a jamtou a. Gamsa leh alim biate leh akhut a chiamtehna nei jousiahten sun hiin jan hitleh khawl tawldamna amukei ding uhi.”                                          12 hihsa ah, Pasian thupiak juite leh jesu gingta misiangthoute thuakzohna akilang hi.                   13 Tuachi’n van akipan aw khat in ka kiangah, “ Gelh in: Tu-a pat misi Toupa a site pen ahampha uhi!”                                                                                                                                  

“Ahi, kha in! Asep gimnate uh khawlsan a, asilbawlte un hungjui ding ahihjiak in, achi hi,” chih kaja hi.

                       

Leitung khaichi lak hun

14 Tuachin ka en a, ngaiin , meilum kang leh, hua meilum tung a Mihing Tapa hileh kilawn, a lutung a kham lallukhu khu a, akhut a kawite hiam tawi kamu a. 15 Tualeh vantungmi dang khat tempul a pat a hung pawtkhia, aw ngaihtak a kikou in meilum tung a toupa kiangah, “ Na kawite jang inla at in, nang dingin a at hun tunta hi, ajiak pen leitung buh te akuaita hi!” achi hi. 16 Tuachi’n hua meilum tung a toupan akawite leitung ah ajangkhiata a, leibuhte at in aomta hi.                                                                              17 Tuachi’n vantungmi dang khat van a tempul a kipat in ahung pawtkhia a, aman zong kawite hiam khat atawi hi.                                                                                                                   

18 Tualeh meitung a thunei vantungmi dang khat, maitam a pat in ahung pawt a. A ngaihtak a kikouin kawite hiam neipa kiangah, “ Na kawite hiam jang inla lei grepgah bomte khawm in, ajiak pen grepte aminsiangta hi!” achi hi. 19tuachi’n vantungmi in a kawite leitung ah ajangta a lei grepte akhawm a, tualeh huate pasian thangpaihna uain hekna ah apailutta hi. 20 Tualeh uain hekna pen khuap pualam ah keng a totchil in a omta a, tualeh uain hekna a kipat sisan pen sakol kamkaih tanpha in farlong sangkhat leh zaguk sung ahung luangkhiata hi.

           

Kilakna 15

Vantungmite leh gawtna nunungte

1 Tuachi’n van ah, chiamtehna thupi leh lamdang. Vantungmi dang sagih gawtna sagih nei kamu a, huate ah Pasian thangpaihna bukimta ahihjiak in, gawtna nunung ahita uhi.                 

2 Tualeh meitawh kihel tuipi limlang hileh kilawm leh gamsa tung leh alim tung a gualjoute, achiamtehna leh amin nambar tung a gualzohna tangte. Pasain kaihging tum a tuipi limlang tung a ding kamu hi. 3 Tualeh amau’n Pasian sila Mosi leh Belamnou la asa ua:                                                                                “Na silbawlte a thupi in a                                                                                                                                 lamdang hi,                                                                                                                              Toupa Pasian hattungnung!                                                                                                                  Na lampite adik in atak hi,                                                                                                                   Aw Nang misiangthoute                                                                                                                                   kimpipa!                                                                                                                                  4 Kuan ahia nang hung laulou in?                                                                                                               Aw Toupa na min a pahtawi louh                                                                                        ngam ding uh?                                                                                                                         Ajiak nangguak siangthou na hi.                                                                                                          Ajiak nam jousiah a hungpai ding                                                                                                                    ua namai ah ahung bia ding hi,                                                                                                ajiak na vaihawmna dikte suklat in a omta hi.”                                                                                   

5 Hih silte zoh in ka etleh, ngaiin, van ah theihpihna tempul dantan sungnung pen aki hong a. 6 Tualeh vantungmi sagihte gawtna sagih te tawiin puan siangthou leh vam a kithuam in, tualeh a awm un kham kawnggak a gak in Pasian tempul a pat ahung pawtkhia ua. 7 Tuachi’n ganhing lite lak a khat in hua vantungmi sagihte kiangah, tangtawn tangtawn a hungjing Pasian thangpaihna a dim kham vaan sagih a piata hi. 8 Tualeh tempul pen Pasian thupina leh a silbawltheihna a kipan meikhu in adimta a, tualeh hua vantungmi sagihte gawtna sagih pen a kizoh masiah in tempul sung a kuamah a lutthei takei uhi.

Kilakna 16

Pasian thangpaihna vaante

1 Tuachi’n tempul sung a pat in aw ngaihtak khat in vantungmi sagihte kiangah, “Pai unla Pasian thangpaihna vaante leitung ah va buakhia un!” achih kaja hi.                                            

2 Tuachi’n akhatna pen apai a a vaan leitung ah a buakhai a. Tualeh gamsa chiamtehna nei leh alim biate tungah buahna leh meima huaisia hahnat a na ahung suakta hi.                                                                      3 Tuachi’n vantungmi anihna in a vaan tuipi tungah a buakhia a. Tualeh hihpen misi sisan bangin ahung omta a, tualeh tuipi sung a om hinna nei jousiah asita uhi.                                   

4 Tuachi’ n vantungmi thumna in a vaan luidungte leh tuinakte ah asungbua a, tualeh tuite tung a thunei vantungmi in, “Aw Toupa, hih silte a vai nahawm jiakin, Nang omjing leh omkhin leh hung om dingpa na diktat hi! 6 Ajiak pen amau’n misiangthoute leh Jawlneite sisan anasuah ua, tualeh nang a dawn ding un amau sisan na piata hi. Dawntaak mawng ahihjiak un!” achih kaja hi. 7 Tualeh maitam a kipat adang khat in, Ahi, “Toupa Pasian hattungnung, na vaihawmte atak in adiktat hi!” achih kaja hi.                                  8 Tuachi’n vantungmi alina in a vaan Ni tungah asungbua a, tualeh amah kiangah mite meia halkak theihna silbawltheihna piak ahi. 9 Tualeh mite pen mei samah mah a halkak in aom ua, tualeh hih hiite a gawtna tung a thuneipa Pasian min agensia ua, tualeh amah kiang a thupina pia ding in a kisik nuamkei uhi.                                                                            

10 Tuachi’n vantungmi angina in a vaan gamsa laltouna tungah asungbua a, tualeh a kumpi lalgam pen mialna in a pumdimta a; tualeh amau’n na asak jiak un alei uh a themthem in apetkiamta uhi, 11 anatnate uh leh a meimate uh jiakin van Pasian agensia ua, asilbawlte uh akisik tuankei uhi.                                    12 Tuachi’n vantungmi gukna in a vaan Euphrate luipi ah a sungbua a, tualeh suahlam kumpipate a ding lampi bawl ahihtheihna dingin atuipen a kangsiangta hi. 13 Tualeh ukeng tawh kibang khanin thum gulpi kam a kipan leh, Jawlnei taklou kam a kipan a hungpawt kamu a. 14 Amauh pen hattungnung Pasian nithupi a kidouna a kaikhawm ding a leitung kumpi leh leitung pumpi paikhia, sillamdang bawl dawite kha ahi uhi.                                                                                                                                        15 “Ngaiin! Guta bangin kungpai hi! Kigingjing leh puan silhsa a om tuh a hampha hi, atuachih keileh guaktang in avak ding a ajumhuaina a mukha ding uhi!”                                             

16 Tualeh amau’n amauhte mun khat, Hebrai ham a Armageddon kichi ah apuikhawmta uhi.                       17 Tuachi’n vantungmi sagihna in a vaan huikhua ah asungbua a, tualeh van a tempul a pat leh, laltouna a kipanin aw ngaihtak ahung suakkhiata a, “Bawlzoh ahita!” achi hi. 18 Tualeh awte, sil gingte, vanpi gingte leh tunphete ahung om ua. Tualeh jin nasatak aling a, huachibang jinling nasia leh thupi leitung a mihing om a kipat a omkha naikei hi! 19 tualeh khuapi thupi pen sehthum in kikhen a, tualeh namte khuapite pen achimta hi. Tualeh a thangpaihna nou pen akiang a piak dingin Babilon khuapi thupi tuh Pasian maiah theihkhiat in ahung omta hi. 20 Tuachi’n tuikulh gam jousiah a taimangta a, mualte zong muh in aom nawn takei hi. 21 Tualeh gial thupitak atang khat talent khat a gik van a pat in mite tungah akia a, tualeh miten hua gial a gawtna jiakin Pasian agensia uhi, ajiak pen hua gawtna pen ahuaisia mahmah hi.

Kilakna 17

Kijuaknu leh gamsa

1 Tuachi’n vaan sagih tawi vantungmi sagihte lak a khat hungpaiin ahung houpih a ka kiangah, “Hungpaiin, tui tampi tung a tuou kijuaknu thupitak tung a vaihawmna kung ensak ding. 2 leitung a kumpipate’n amahnu a angkawmpih ua, tualeh a angkawm hanta uain in leitung a tengte dawnkhamsak in a om uhi,” achi hi.                                                                     

3 Tuachi’n aman keipen kha in gamdaih ahung puamangta hi. Tualeh numei khat Pasian gensiatna min a pumdim, lutang sagih leh kisawm nei gamsa sandup tung a tou kamu a. 4 Hua numeinu pen puan sandup leh sandaang in akijem a, kham leh suangmantam leh, tuikepsuang in akijem a, a angkawm hanta kihdak om leh buahna a dim kham nou pen akhut in atawi hi. 5 Tualeh a taltang ah min khat, Thuguk kiphual: “Babilon thupi, kijuakte leitung a kihdak huai n,” chi’n a kigelh hi. 6 Hua numeinu pen misiangthoute sisan leh Jesu martarte sisan dawnkham in kamu a.                                                     Tualeh amahnu ka muhtak in ken lamdang kasa a tualeh chijat-huai kasa mahmah hi. 7 Hinanleh vantungmi in ka kiangah, “Bang ding a lamdang sa nahia? Hua numei leh atuanna lutang sagih leh kisawm nei gamsa thugu’k kung hilh ding hi. 8Hua na gamsa muh pen a omkhin a, aom kei a, tualeh kuakhuk tawbei a pat ahung pawtkhia ding a manthaina ah apai ding hi. Tualeh leitung siamchil a pat leitung a teng hinna laibu amin uh kigelhlouten hua gamsa omkhin leh omnawnlou leh hung om ding pen amuh chiang un lamdang asa mahmah ding uhi.                                                                                                   9 “Hihsan ah pilna lungsim aom hi. Lutang sagihte pen, numeinu touna mual sagihte ahi uhi:10 kumpi sagih aom a, ngate apu’kta a, khat aom a, tualeh adang ahung omnai kei hi; tualeh a hungpai chiangin tomnoukhat sung aom ding hi. 11Hua gamsa omkhin leh omlou pen amah mah zong agiatna ahi a, tualeh sagihte lak a ahi a, tualeh manthaina ah apai hi.                                                                                                12 “Hua kisawm namuhte pen kumpi lalagam neinailoute ahi uhi, hinanleh amau’n gamsa tawh dakkal khat sung kumpipate bang a thuneihna anei uhi. 13 Hihte lungsim khat in a om ua, tualeh gamsa kiangah a thuneihna uleh ahatna uh apia ding uhi. 14 Hihte’n Belamnou a kidoupih ding ua, tualeh belamnou in amauh ajou ding hi, ajiak amah pen toupate Toupa leh kumpite Kumpipa ahi, tualeh amah tawh omte pen sapte, telte, tualeh gin-omte ahi uhi,” achi hi.                                                                         15 Tuachi’n aman ka kiangah, kijuaknu touna a na tui muhte pen, mite leh, mipite leh namte leh, hamte ahi uhi. 16 Tualeh gamsa tung a kisawm namuhte, hihte’n kijuaknu ahua ding ua; asa ane ding ua tualeh meiin ahalmang ding uhi. 17 Ajiak pen Pasian thute suktangtung a aom masiah amah deihlam a bawltheihna ding uleh, lungsim khat aneihna ding uleh, alalgam uh gamsa kiang a a piaktheihna ding un Pasian in a lungtang uah akoihta hi.                                                                                                                       18 Tualeh, “Hua na numei muhnu pen hua khuapi thupi leitung a kumpipate tung a vaihawmtu pen ahi,” achi hi.

Kilakna 18

Babilon khuapi pukna

1 Hih silte zoh in vantungmi dang khat silbawltheihna thupitak neia van a pat hung kumsuk kamu a, tualeh athupina in leitung ataan vaak a. 2 Tualeh amah aw ngaihtak in hahkou in akikou a: “Babilon thupi achimta hi! Achimta hi! Dawite tenna leh, kha buah chinteng kulh, vasa sianglou leh, kihdak omchinteng bawm ahung hita hi. 3 Ajiak nam jusiahin a angkawm hanta thangpaihna uain adawnta ua. Tualeh leitng a jumpipate’n amah a angkawmpih ua, amah noptatseng jiakin leitung a summet bawlte a hausagawpta uhi,” achi hi.                                                                                                       4 Tualeh van a pat aw dang khat kaja a,                                                                                                          “ka mite a khialhna a na                                                                                                                                  jauhlouhna ding un leh!                                                                                                           Amahnu tawh agawtna na                                                                                                                                  tankhawm louhna ding un;                                                                                                           amah a pat hung pawtkhia un!                                                                                    

5 Ajiak a khialhnate van atungta a, tualeh a gitlouhnate Pasian in atheigige hi.                       

6 Aman ahung piak bangbang in                                                                                                                     amah pia unla;                                                                                                                         asilbawl bang jelin alehnih in thuk un,                                                                                           ahalna nou ah amah dingin                                                                                                                  aleh nihin halsak un.                                                                                                                7 A kithupisakna zah leh a noptatna zahzah in,                                                                                               amah bawlgim un.                                                                                                                   Ajiak aman a lungtang in,                                                                                                                                ‘kumpinu in katou a! meithai kahi kei a,                                                                                             kalungkham ngaikei ding, achi hi.                                                                                           8 Tuajiakin nikhat thu in amah                                                                                                                  gawtna sihna leh kialna leh                                                                                                                  su’nna ahung tung ding a,                                                                                                        amahnu pen huaisiatak in meiin akangtum ding hi,                                                                             ajiak pen amah tung a                                                                                                              vaihawmtu Toupa Pasian pen ahat ahi,”                                                                                 

achi hi.                                                                                                                                     9 Leitung a kumpipate, amah na angkawmpih a amah tawh nuamtak a na omten, amahnu kakna meikhu amuh chiang un akah ding uhi. 10 Amahnu kibawlgim jiak a lau a gamla pia dingin, “Tajang aw! Tajang aw! Babilon khuapi thupi, khuapi hat! Dakkal khat sung a natung a vaihawmna a hungtunta’k a maw!” achi ding uhi.                                                         

11 Tualeh leitung a summet bawlte’n amahnu kah in asu’n ding uh, ajiak mi kuamah in asummet bawlna uh alei nawnlouh ding jiak in; 12 asummet bawlnate-uh pen kham leh dangka-eng, suangmantamte, tuikepsuangte, puan malngatte, puan sandupte, puan nemte, puan sandaangte , saiha a kibawl bel chi tuam tuamte, sing mantampente, daante, sikte leh suangkaang bel chituam tuamte; 13 tualeh singthakte, sil namtuite, sathau namtuite, begawte, uainte, annelte, gehute, gante tualeh mite hinnate bang ahi. 14 “Silgah na lunggulhte’n nang ahung nusiata ua, sil limtuak leh hoih jousiahin nang ahung paimangsanta hi, hihte pen na mungai nawnkei ding hi!” 15 Hih silte a summet bawl amahnu jiak a hung hausate pen amahnu ki bawlgimna laujiakin gamlapi a dingin. Kap in asu’n ding ua,                              16 tualeh, “Tajang aw! Tajang aw                                                                                                                    khuapi thupi!                                                                                                                           Puan malngat leh, puan sandup leh                                                                                                          puan sandaang,                                                                                                                       

kham leh suangmantam leh                                                                                                                 tuikepsuang a kijempi!                                                                                                       

17 Dakkal khat sung maimai in                                                                                                                       hihbang a hauhsatna thupi                                                                                                                       bangmahlou ahung suakta’k                                                                                                           mai!”                                                                                                                                       chi in.                                                                                                                                                              Tualeh longpu jousiah leh long a tuangte jousiah leh long mite leh tuipi tung a summet bawl jousiahte gamlapi ah ading ua, 18 akakna meikhu amuh un a kikoukhia ua, “Hih khuapi thupi bang khoiah aom a!” achi uhi. 19 Amau’n a lutung ua leivui kitheh in a kikoukhia ua, kap leh mau pum in, “Tajang aw! Tajang aw! Amah manphat jiak a tuipi a long neite hihhauhsat a omna khuapi thupi! Dakkal khat sungin suksiat ahung hita hi!”            

20 Nang van leh sawltak siangthoute leh Jawlneite! Amahnu tung ah nuam un! Ajiak Pasian in amahnu tungah na phuba uh ahung laksakta hi!                                                          

21 Tuachi’n vantungmi hattak khat in buhgawina suang liantak hileh kilawm suang lian khat ala a tuipi ah apailut a, “Hichibang a nasatak in Babilon khuapi thupi pen paihkhiat in aom ding a, muhkik in a omngai nawn kei ding hi. 22 Kaihging tumte, lasiamte, theile mutte, leh pengkul mutte a pan ging kilawm nasung ah a kijangai nawn kei ding hi! Khutsiammi, banglampeuh a khutsiam mawng mawng nasung ah aki munawnkei ding a; tualeh buhgawina gin mawng mawng zong jaak in aom ngainawn kei ding hi! 23 Meivak vaak zong nasung ah ataang nawn kei ding a; mou leh mouneitu aw zong akijangai nawnkei ding. Ajiak na summet bawlte hih leitung miliante ahi ua, na bumsiamna-a nam jousiah khem a aom ta’k jiak in!”                                                                                                                       

24 Tualeh amahnu sungah jawlneite leh, misiangthoute leh, leitung a thah a omjousiahte sisan muh in a omta hi, achi hi.

Kilakna 19

Vantung a kipahna thupi

1 Hih silte nungin van ah mi tampitak aw kaja a, “Halleluijah Hundamna leh thupina leh zah-omna leh thuneihna pen Toupa i Pasian uh a ahi! 2 Ajiak pen a vaihawmna athutak in adik hi! Ajiak aman kijuaknu thupitak a-angkawm hat jiak a leitung hihthanghuai nu pen vai ahawmkhum a. Tualeh asilate phuba pen atung ah a laksakta hi.” 3 Amau’n, “Halleluijah! Achi kik ua. Amahnu halna meikhu tangtawn tangtawn in ajamtouta hi!” 4 Tualeh upa sawmnih leh lite leh ganhing lite pen khupbok in, “Amen! Halleluijah!” chi in laltouna tung a tou-pa Pasian abiata uhi.

Belamnou kitenna ankuang

5 Tuachi’n laltouna a pat aw khat ahung gingkhia a, “Nou a silate jousiah leh, nou amah lau, aneu alian in i Pasian pahtawi un!” 6 Tualeh mi tampite awging bang, tui tampite luan-ging bang, vanpi ging thupitak bangin kaja a. “Halleluijah! Toupa Pasian sil jousiah neipa in vai a hawm hi! 7 Kipak in i nuam  ding uh tualeh akiang ah pahtawina ipia ding uhi. Ajiak pen Belamnou zineih hun ahungtungta a, azi zong kisakhinsa in a omta hi.” 8 Tualeh amahnu puan malngat leh puannem a kijep ding phal ahi a. (Hua puan malngat pen misiangthoute diktatna ahi,) chi in.                                                                                                      9 Tuachi’n aman kakiangah, “Gelh in: Belamnou ankuang umding a sapte ahampha uhi.” Tualeh aman ka kiangah, “Hihte pen Pasian thugen diktakte ahi,” achi hi.                

10 Tualeh amah bia-in akengbul ah ka khupbok a, hinanleh aman ka kiangah, “En in, huate bawlken! Kei pen na sila tanpih leh Jesu theihpihna thu nei naunaute lak a khat kahi. Pasian bia in!” Ajiak pen Jesu theihpihna pen thu genkholhna kha ahi, achi hi.

Sakol kang leh atung tuangpa

11 Tuachi’n van kihong kamu a, tualeh ngaiin, sakol ka’ng khat leh atung a tuangpa gin-om leh thutak kichi kamu a. Aman a diktatna in vai ahawm a, tualeh gal abawl hi. 12 Amitte pen meikuang bang ahi a, a lutung ah lallukhu tampi aom hi; tualeh amah loungal kuaman atheih theihlouh min anei hi. 13 Aman sisan a kidiah puan asilh a, amin pen “Pasian thu” a kichi hi. 14 Tualeh van a om galkap hon in, puan malngat, vaam leh siangthou a kivon in, sakol kang tung a tuang in amah ajui uhi. 15 Tualeh namte athahtheih na’ngin akam a pat namsau hiamtak apawt hi. Tualeh aman amauhte sikchiang in vai ahawmkhum ding a; hattungnung Pasian lauhhuaina leh thangpaihna uain hekna pen a tuanchil tading hi. 16 Tualeh aman apuantung leh amalpi tung ah, “Kumpite Kumpi toupate Toupa chia kigelh min anei hi.”                  17 tuachi’n vantungmi khat Ni sung a ding ka mu a, tualeh amah aw ngaihtak a kikou in, vanlaijawl a leng vasate kiangah: “Hungpai unla, Pasian ankuang luina thupitak ah hung kikhawm khawm un! 18 Kumpipate sa, galkap sapte sa, mihatte sa, sakolte sa, leh atung a tuangte sa, tualeh mi jousiah zalen leh saltang, aneu leh aliante sa, nanek theihna ding un!” achi hi.                                                          19 Tualeh hua gamsa leitung kumpipate leh a galkap honte uh, hua sakol tung atuangpa leh a galkapte tawh kidou ding a a kikhop khawm uh kamu hi. 20 Tuachi’n gamsa pen mat in a omta a, tualeh Jawlnei taklou gamsa chiamtehna neite leh, alim biate akhemna amai a sillamdang bawltu zong amah tawh matkhawm in a omta hi. (Hih tegel pen kaat a kang meidil ah ahingtang san a paihlut in a omta uhi.) 21 Tualeh avalteng pen sakol tung a tuangpa namsau, akam a hungpawtkhia pen in thah in aomta ua, tualeh amauh sa in tungleng vasa jousiah agilvahta uhi.

Kilakna 20

Kumsang lenggam

1 Tuachi’n vantungmi khat van a kipan a hung kumsuk, akhut a kuakhuk tawbei chabi leh sikkhau lianpi tawi kamu hi. 2 Aman hua gulpi, gulpitek, dawi leh setan pen aman a, kum sangkhat sung dingin amah akanta hi. 3 Tualeh kum sangkhat achin masiah a namte akhemkik louhna dingin, kuakhuk tawbei ah apailut a, a khakkhum a, asindetta hi. Hinanleh hih silte zoh chiangin amah pen tomkhat khahkhiat ahi ding hi.                                          

4 Tualeh laltounate leh atung a toute kamu a, akiang uah vaihawmna piak ahi ua. Tuachi’n Jesu thu theihpihna leh Pasian thu jiak a alu uh tan a om gamsa leh alim biangailou a, atal uh hiam, akhut uh hiam a zong chiamtehna neingailoute khate kamu hi. Amauhte ahung hing ua, Krist tawh kum sangkhat vai ahawmta uhi. 5 (Hinanleh misidangte pen kum sangkhat abei masiah ahingkik kei ding uhi.) Hih pen thohkikna masa ahi. 6 Thohkikna masa a pangte a hampha uhi, a siangthou uhi. Huate tungah sihnihna in thu aneikei a, hinanleh amauh pen Pasian leh Krist siampute ahi ding ua, amah tawh kum sangkhat vai ahawm ding uhi.                                    

                       

Setan zoh a omna

7 Tualeh kum sangkhat abeichiang in, setan pen khum a aomna a pan khahkhiat in aom ding a, 8 tualeh leitung lite a om namte leh, Gog leh Magog, khem a kidouna a puikhawm dingin apaikhia ding hi. A tamdan uh pen tuipi a sehnel bang ahi. 9 Amauh uh leitung vailam khaksuak in apaitou ua, misiangthoute giahphual khuape deih-om pen a kualkhumta uhi. Tualeh Pasian a hung kipan van a pannin mei ahung kiasuk a, amauh a kangmangta hi. 10 Amauh khemtu dawi gen gamsa leh Jawlnei taklou omna mei leh kaat dil ah paihlut in a omta a, tangtawn tangtawn in thuakgimsak in aom ding uhi.

Vaihawmna nunung

11 Tualeh laltouna kaang thupita leh atung a toupa; amai a pat lei leh van taimangnapa kamu a, amauh a dingin mun mawng mawng muh in aom takei hi. 12 Tualeh misite alian aneu Pasian mai a ding kamu a. Tualeh laibute akihong a, tualeh laibu dang hinna laibu zong akihong hi. Tualeh misite pen hua laibu a akigelh bangin  anasep uh dungjui un vaihawmsak in a omta uhi. 13 Tuipi in asung a misi omte ahung pawtkhiasakta, tualeh sihna leh misikhua in asung a misi omte ahung puakhiata ua, tualeh amauh asilbawlte uh dungjui a vaihawmsak in a omta uhi. 14 Tuachi’n sihna leh misikhua pen meidil ah paihlut in a omta uhi. (Huapen sihnihna ahi.) 15 Tualeh kuapeuh hinna laibu a kigelh amuhlouh jousiah meidil ah paihlut in a omta uhi.

Kilakna 21

Van thak leh leithak

1 Tualeh ken vanthak leh leithak kamu a. Ajiak van masa leh lei masa apaimangta a, tuipi zong a omnawn kei hi. 2 Tuachi’n kei Johan in khuapi siangthou, Jerusalem thak pen, mou apasal a ding a kijem bang a bawlzohsa-a Pasian a kipan a van a pat a hung kumsuk kamu hi. 3 Tualeh van a pat in aw ngaihtak khat in, “Ngaiin, Pasian biakbuk mihingte lak ah a omta hi! Amah pen alak uah ateng ding a; amauh pen amite ahi ding ua, Pasian  amah mah akiang uah a om ding a, tualeh a Pasian uh ahi ding hi. Sihna a omnawn kei dinga; lungkhamna leh kahna leh natna zong a omnawn kei ding hi, ajiak sil masa tengteng a paimanta hi,” achih kaja hi.                                                                                                                             5 Tualeh laltouna tung a tou-pa in, “Nagiin, sil jousiah ka siamthakta hi!” achi hi. Tualeh aman ka kiangah, “Gelh in, ajiak hih thute adik in agin-om ahi,” achi hi. 6 Tuachi’n aman ka kiangah, “Hih bawlkhit ahita! Kei
Alpha leh Omega, abul leh atawp ka hi. Dangtak jousiah kiangah hinna tui luikhuk a om amawknan ka pia ding hi. 7 Kuahileh agualjoutu in sil jousiah aluah ding a: Tualeh a Pasian ka hi ding a, amah zong ka tapa ahi ding hi. 8 Hinanleh meipuahte, gingtaloute, kihdak omte, tualthatte, nu leh pa kal a thangtatte, bumsiamte, milim biate leh juau hatte jousiah tanding pen mei leh kaat a kang meidil ahi, huapen sihnihna ahi.”

Jerusalem thak muhna

9 Tuachi’n gawtna nunung sagihte a dim vaan sagih nei vantungmi sagihte lak a khat ka kiangah hungpai in ahung houpih a, “Hungpaiin, Mou, Belamnou zi kung ensak ding hi,” achi a. 10 Tualeh aman Kha in mualsang leh liantak khat tungah ahung paipihta a, tualeh hua khuapi thupitak, Jerusalem siangthou, Pasian a kipan a van a pat a hung kumsuk ahung ensak hi. 11 Pasian thupina nei a avaak pen suangmantam pen bang, jasper suang bang ahi a, Kristal suang bang a siang ahi. 12 Tualeh aman kulhbang thupitak leh sangtak zong anei a. Kong swmlehnih anei a, tualeh hua kong sawmlehnihte ah vantungmi sawmlehnih aom hi, tualeh hua kongte tungah min kigelh a om a, huate pen Israel nam sawmlehnihte min ahi. 13 suahlam ah kongpi thum, mallam ah kongpi thum, simlam ah kongpi thum, tumlam ah kongpi thum aom hi. 14 Tualeh kulhbang in nuaiphah sawmlehnih anei a, tualeh huate tungah Belamnou sawltak sawmlehnihte min atuang hi. 15 Tualeh amah kei hunghoupihpa’n khuapi a kotte leh akulhbang tehna dingin tehna kham pumpeng chiang atawi hi. 16 Tualeh hih khuapi in ningli anei a, adunglam pen availam chia ahi a. Tualeh aman hua pumpeng chiangin hua khuapi pen ateh a: farlong sangswm elh sangnih; adunglam leh availam leh asandan akibang hi. 17 Tuachi’n aman kulhbang ateh a, mihing tehna a the in,(huapen vantungmi tehna ahi a) “tong jakhat leh tong sawmli leh li ahi.” 18 kulhbang pen jesper suang a kibawl ahi a, akhuapi pen kham siang a kibsawl limlang siang bang ahi. 19 Tualeh kulhbang nuaiphah pen suangmantam chiteng a kijem ahi. Nuaiphah masapen tuh jesper suang ahi a, anihna sapphire suang ahi a, athumna kalsidonia suang ahi a, alina emerald suang ahi a, 20 a ngana sardonic suang ahi, a gukna sardia suang ahi a, a sagihna krisolit suang ahi a, a giatna beril suang ahi a, a kuana topaz suang ahi a, a sawmna krisoprase suang ahi a, a sawm leh khatna jasinth suang ahi a, a sawm leh nihna amethist suang ahi. 21 A kot sawm leh nihte pen tuikepsuang sawm leh nihte ahia, akotteng pen tuikepsuang khatchiat a bawl ahi a. Tualeh khuapi lamlian pen limlang etpailet theih bang kham siang set a kibawl ahi.                                                                          

22 Hihnanleh huasan ah tempul kamu kei a, ajiak pen Toupa Pasian hattungnung leh Belamnou pen a tempul uh ahimai hi. 23 Hua khuapi in Ni apoimoh kei a, kha zong apoimoh kei hi. Pasian thupina in hih pen ataanvak a, Belamnou pen ameivak ahimai hi. 24 Tualeh hundam a om namte pen hua vak ah avak ding ua, tualeh leitung kumpipate’n athupina uh leh azah omna uh apualut ding uhi. 25 A kotte pen sun in a kikhak ngaikei ding hi; ajiak pen huamun ah jan aom ngaikei ding hi. 26 Tualeh amau’n huasung ah namte thupina leh zah-omna ahung pualut ding uhi. 27 Hinanleh huasung ah bangchik mah in silsianglou, ahihkeileh kihdakhuai leh juaubawl mawn mawng alutkei ding a. Hinanleh Belamnou laibu a min kigelhte guak alut ding uhi.              

Kilakna 22

Hinna lui

1 Tualeh aman Hinna tui lui chimtak, Kristal suang bang a siang, Pasian leh Belamnou laltouna a pat a hung luangkhia ahung ensak a 2 kongjing laijang leh luiningtuak ah agah chituam tuam sawm leh nih nei, tualeh khateng a gah hinna singkung a om a, tualeh hua singgah pen namte sukdamna ding ahi. 3 Tualeh huasan ah hamsia mawng mawng a om nawnkei ding a.                                                                          Hinanleh Pasian leh Belamnou laltouna a omjawta ding hi, tualeh a silate’n a nna asem ding uhi. 4 Aamau’n amah a mu ding ua, amin pen atal uah atuang ding hi. 5 huasan ah jan a om nawn kei ding a, meivak leh nivak zong a ngainawn kei ding uhi, ajiak Toupa Pasian in amuah a salhvak ding a, tualeh mau’n tangtawn tangtawn in vai ahawmta ding uhi.

Jesu hung paina

6 Tuachi’n aman ka kiangah, “Hih thute agin-om in adik ahi, tualeh Jawlnei siangthou Toupa Pasian in sil hung ompai dingte a silate musak dingin a vantungmi asawlta hi.”                                                   7 “Ngaiin! Kung paipah ding hi! Hih laibu a genkholhna juitaphot ahampha uhi!”                   

8 Tualeh kei, Johan in, hih silte ka mu a, kaja hi. Tualeh kaja’k a ka muhtak in, hih silte hung musaktu vantungmi kengbul ah bia dingin ka pukta hi. 9 Tualci’n aman ka kiangah, “En in hihbang na bawlthei kei ding hi! Keipen nang leh na unau Jawlneite leh hih laibu a thu kigente juite na sila tanpih ka hi; Pasian bia in!” achi hi. 10 Tualeh aman ka kiangah, “Hih laibu a genkholhna thute khakkhum ken, ajiak ahun atung ding ahita hi. 11 kuahileh midiklou pen diklou in omden hen, kuahileh abuah pen abuah in omden hen, kuahileh midiktat pen diktatjing hen, kuahileh a siangthou pen siangthou jing hen.”                         12 Tualeh, “Ngaiin! Kung paipah ding hi! Tualeh michih a nasep bangbang ua piak ding ka nuamman ka kiangah a om hi. 13 kei Alpha leh Omega, apatna leh atawp amasapen leh anunung pen ka hi.”

14 Hinna singkung a tan aneihtheihna ding un hih thupiak bawlte pen ahampha uhi. 15 Hinanleh apualam ah uite, bumhaate, nu leh pa kal a thangtatte, tualthatte, milim biate, tualeh kuapeuh juau ngaina leh bawlte a om uhi.                                                                          

16 “Kei Jesu in Saptuamte ding a hih thute na kiang ua hungtheisak dingin ka vantungmi kungsawl hi. Kei David jungjam leh a suan; tualeh Jingsol aksi taang pen kahi,” achi hi.                                               17 Tualeh tua Kha leh tua Mou in, “Hungpai in!” achi uhi.                                                           Tualeh aja taphot in, “Hungpai in!” chi uhen.                                                                           Tualeh kuapeuh a dangtak tuh hungpai hen. Tualeh a ut taphot in hinna tui amawkna in la hen.  

Thukhitna

18 Ajiak kuapeuh hih genkholhna laibu a thute ja taphot kiangah ka theisak ahi: mi kuapeuh in hih thute abehlap leh, Pasian in hi laibua kigelh gawtnate atung ah abehlap ding hi. 19 Tualeh mi kuapeuh in hih genkholhna laibu thute a pat alakmang leh hinna laibu leh khuapi siangthou, tualeh hih laibu a kigelh silte a pat atan ding pen Pasian in a lakmangsak ding hi.                                                                                  20 Hih thute theisaktu in, “Pellou in!                                                                          

Kung paipah ding!” achi hi.                                                                                                    

Amen. Hungpai in Toupa Jesu aw!                                                                             

21 I Toupa Jesu krist hehpihna na kiang uah omta hen. Amen.