Jacob

JAKOB

LAIKHAK

Jacob 1

Chibai bukna

1 Jakob, Pasian leh Jesus Krist sila in,nam sawmlehnih kithehjakte: Chibai abuk hi.

Ginna leh pilna

            2 Ka unaute aw, engbawlna na tuahchiang un, kipakna ngen in ngai un, 3 na ginna uh etkhiatna in kuhkalna asiam chih thei in. 4 Hinanleh bangmah tasamlou a chibit leh bukim tak a na omtheihna ding un kuhkalna in semkhia hen. 5 Na lak ua kuapeuhin pilna a taksapleh, mijousiah kiang a tailou leh itlou a piatu Pasian kiangah, ngen hen, tuachi’n a kiang ah piak ahi ding hi. 6 Hinanleh ginglahlou keiin, ngen hen. Ajiak ginglahmi pen tuipi kinawk huih mutleng kawikawi bang ahi. 7 Ajiak, huachibang mi in, Toupa a pat bangmah muh kinem kei hen. 8 Lungsim thuahneimi pen alampi jousiah akipkei hi.

Jawnna leh hauhna

9 Hindan ngiam sanggampa pen pahtawia aom jiakin kipak hen, 10 hinanleh mihausa pen hihngiam a aom jiakin kipak hen, ajiak lou a pak bang a mang ding ahi hi. 11 Ajiak pen ni in asatna tawh ahung suah chiangin ahaivul a, hua pakpen akia a , ahoihnate amangta hi. Tuachimah bangin mihausa zong, apaina ah amang ding hi.

Ze-etna leh khemna

            12 Khemna thuakjoumi ahampha hi. Ajiak pen etkhiat a aomzoh chiangin Toupa’n amah itte kiang a piak achiam hinna lallukhu amu ding hi. 13 Mi kuamah in, khem a aom chiangin,”Pasian khemka hi kichikei hen.”Ajiak Pasian pen gitlouh a khemgual ahikei a, aman zong kuamah a khemngaikei hi. 14 Hinanleh michih amauh utna a puimang leh hip a aom chiangin, khem in aom ahijaw hi. 15 Tuachi’n, utna in nou apai chiangin, khialhna ahung piangkhia a, tua khialhna, ahung pichin chiangin, sihna ahung piangkhia hi.

16 Ka unau ittakte aw, khem in omkei un! 17 Silpiak hoih leh, silpiak bukim jousiah tunglam a kipan ahi a, vakte Pa kiang a kipan a hungpeisuk ahi, amah ah lamdanna leh kiheina lim aom kei hi. 18 A silsiamte lak a gahmasa khat i hihtheihna ding un, ama deihna bang a thutak lak ah ahung lakkhiat ihi uhi.

Thu ja leh sem

19 Tuajiakin ka unau ittakte aw! Michih a ngaikhiat lam ah kin henla, thugen lam ah manlang kei henla, thangpaih lam ah ze-ol hen. 20 Ajiak mihing thangpaihna in Pasian diktatna asiamkhia kei hi. 21 Tuajiak in silnin jousiah gitlouhna dimlet jousiah koihkhia unla, tualeh na hinna uh hundamthei phuhlutsa thu pen nunnemtak in pom un.

22 Hinanleh noumah leh noumah kikhem a thu ngaikhia guak hilou in, thu juitute hijaw un. 23 Ajiak pen mi kuapeuh thu ngaikhia guak ahih a ajuitu ahihkei leh, amah pen mi limlang a apianpih mai ki en tawh kibang ahi. 24 Ajiakpen aki en a, apaikhia a, bangchi bang mi ahih aki manghilhpai hi. 25 Hinanleh kuapeuh zalenna dan bukim en a, tualeh hih juijing a, manghilhhat ngaikhiatu hilou a, hinanleh thu nasemtu hijaw, hua mi pen a nasep ah gualjawl in a om ding hi.

26 Na lak ua mi kuapeuh sahkhuami ka hi chia kingaihsun a, tauleh alei venghoihlou a, hinanleh ama lungtang kikhemjaw tuh, hih mipa biakna pen apanna bei ahi. 27 Pasiam leh Pa mitmuh a biakna siangthou leh ninbanglou ahihleh hih ahi: tagahte leh meithaite buailai a vaveh leh, leitung buahna banglou a mahni kikep jing ahi.

Jakob 2

Langneih thu a taihilhna

1 Ka unaute aw, i Toupa Jesu Krist, thupina Toupa gingta kawm in mi khentuam neikei un. 2 Ajiak pen na kikhawpna uah kham khutsip bulh puanhoih silh hunglut henla, tualeh mijawng khat zong puannin silh in hunglut taleh, 3 tualeh puanhoih silhpa na zahbawl ua a kiang ah, “Nang hih munhoih ah touin,” nachi ua, tualeh mijawngpa kiangah, “Nang huatak ah dingin, ahihkeileh, ka keng koihna ah touin,” nachi uhi, 4 nalak uah khentuam neia, tualeh ngaihtuahna gilou neia thukhentute na hih uh ensaktute hilou ding na hi uh maw.

5 Ngaiun,ka unau ittakte aw, Pasian in hih leitung a mijawngte ginna a hausa ding leh amah itte achiam kumpi gam luah ding a atel hilou amaw? 6 Hinanleh nou mijawngte na simmoh uhi. Mihausate’n nou a hung bawlgenthei ua! Vaihawmna ah ahung kailut kei uh maw? 7 Amauhte’n na kisapna uh min zah-omtak a gensia kei uh maw?

            8 Laisiangthou dungjuia, “Nangmah na ki it mahbang in na innvengte it in,” chih kumpi dan na hihtangtun taktak uleh na bawlhoih uhi. 9 Hinanleh khentuam na neih uleh pen, sil na hihkhial ua, tualeh dan in giloutu na hih uh ahung theisak hi. 10 Ajiak pen mi kuapeuhin dan juikim henla hinanleh munkhat ah kipalpuk taleh aun a khial a sim in aom hi. 11 Ajiak pen, “Angkawm ken,” chipa’n, “Tualthat ken,” zong achi hi. Tuin angkawm kei nanle chin zong hinanleh tual nathahleh,dan bawtsiatu na hi veve hi. 12 Tuajiakin zalenna dan a vaihawmsak a om dingte bangin thu gen unla sil bawl un. 13 Ajiak pen zahngaihna neilou mi pen zahngaihna beia vaihawmsak in a om ding hi; zahngaihna in vaihawmna azou hi.

Ginna leh nasep

            14 Ka unaute aw, min ginna ka nei chi henla nasep neikei taleh, bang a phatuam diai? Huachibang ginna in a hundam theidiai leh? 15 Sanggampa hiam sanggamnu hiam khat guaktang in om henla niteng nek ding tasam taleh. 16 Tualeh nalak ua khat in, “Khamuangtak in om inla! Lumtak leh vahtak in om in!” chi henla hinanleh a pumpi ding a sil poimoh petuan keileh, bang a phatuam diai? 17 Tuachimah bangin ginna ngeizong nasep panglou in asi ahi.

            18 Hinanleh mi khenkhat in, “Nang ginna na nei a ken nasep ka nei ahi, na ginna pen na nasep panglouin hung ensak inla, tualeh ken ka ginna ka nasep in kung ensak ding.” 19 Pasian khat aom chih na gingta maw? Na bawlhoih hi! Dawite’n zong a gingta ua, a kiling hial uhi, achi thei hi. 20 Hinanleh aw mimaw! Nasep pangloua ginna asi ahi chih nathei nuam ei? 21 I pu uh Abraham in a tapa Isak maitam tung a alat laiin silbawl jiak a siamtang hilou amaw le? 22 Ginna in a silbawlte tawh a semkhawm a, tualeh a silbawlte jiakin ginna pen a bukimta hi chih nathei hi. 23 Tualeh Laisiangthou in, “Abraham in Pasian agingta a, tualeh hihpen a diktatna a sim ahi chih a tangtung a,” tualeh amah pen Pasian lawm chia sap in aomta hi. 24 Tuachi’n ginna jiak guak hilouin nasep jiak in mi’n siam atang chih na mu uhi.

            25 Tuachimah bangin, kijuaknu Rahab in zong enkhiatute ana jintun a lamtuam a asawlkhiat jiakin silbawl jiak a siamtang hilou ahi maw.

            26 Kha omloua pumpi asi ahihmah bangin, ginna zong nasep panglouin asi ahi.

Jakob 3

Lei kep-hoihna

            1 Ka unaute aw, mi tampi sia in hung pang kei un, sia in siamlouh tanna lianjaw tang ding ihi uh chih ithei ngal ua. 2 Ajiak pen sil tampi ah iun un i gilou uhi. Mi kuapeuh thugen lam a agitlouh kei leh, hua mi pen piching ahi a, apumpi vengtheimi zong ahi. 3 Ngaiun, ithu uh ajuih theihna ding un sakolte kam ah sikbah ibah ua, tualeh apumpi uh apum in i kaiheithei uhi. 4 En un longpite zong: alian mahmah na ua huih hattak mutleng in aom ua, hinanleh ahektu in ahekna neunoukhat tawh autna lamlam ah akiheisak hi. 5 Huachimah bangin lei zong pumpi hiang neunoukhat ahi a, nasatak in aki uangsak jel hi!

            En in meisi neunoukhat in gammang kang nasathei hina e! 6 Tualeh leipen meikuang ahi. I pumpi lak ah khialhna lawmpi pen lei ahi; tuachi’n leiin pumpi aun in ahihnin a, hinkhua lampi pailehna pen akangsak a, tualeh amah pen gawtmun meidil in akang jel hi. 7 Ajiak pen sa namkim, vasa namkim, gul namkim, tuipi a ganhing namkim khawijual theih ahi a, mite’n a khawijual thei uhi. 8 Hinanleh leipen kuaman a khawijual theikei uhi, gilou omkinken theilou sihna gu a dim ahi. 9 Hua in Pasian leh Pa tuh iphat ua, tualeh huamah in Pasian batpih a siam mihingte i hamsiatjel uhi.10 Kamsung khat mah a kipanin phatna leh hamsiatna apawtkhia jel hi. Ka unaute aw, hih silte pen hichibang ding hilou ahi! 11 Tuisam khat in anak kibang in tuilim leh tuikha a pawtkhawm sak thei hiam? 12 Ka unaute aw, theipi kungah, Olive agahthei ngai ei? Grep guiah zong theipi agahthei ngai ei? Tuachimah bangin chikhuk in zong tui-al leh tuitam a pawtkhiasak theikei hi.

Tunglam a kipan pilna

            13 Na lak uah kua ahia pil a thu theithei om? Kingiamkhiat tak leh piltak in a silbawl hoihte omdan hoih in ensak hen. 14 Hinanleh na lungtang ua thangsiatna nasatak leh mahni angkhualna na neih uleh, uangkei unla thudik juausan kei un. 15 Huachibang pilna pen tunglam a kipan ahikei a, leitung leh, pumpi utna leh, dawia hung kipan ahi. 16 Ajiak pen thangsiatna leh mahni angsung khualna omna taphot ah buaina leh khialhna chiteng aom nak hi. 17 Hinanleh tunglam a hung kipan pilna pen amasapen in asiangthou phot a, tuazoh chiangin kilep aut a, anunnem a, ahounuam a, khuatuahna leh gahhoih in adim a, khentuam aneikei a, alepchiah kei hi. 18 Tualeh adiktatna gah pen kilepna bawlte a pat a kilepna ah ahi.

Jakob 4

Leitung tawh kizolhna

            1 Na lak ua kidounate leh kihaunate, khoia kipan a hungpai ahia? Na pumpi hiangte ua kidoujing na taksa utnate ua kipan a hungpai hilou ahi maw? 2 Na lunggulh ua na neituan kei uhi; tual nathat uhi. Na deigoh ua na neijou tuankei uh; na kidou ua gal na bawl uhi. Hinanleh na ngetlouh jiak un, na nei kei uhi. 3 Na ngen ua, na nget diklouh jiak un na neituan kei uh, na nopsakna ding ua nazak sawm jiak un. 4 Nou angkawmpate leh angkawmnute! Leitung lawm hihna pen Pasian tawh kimelmakna ahi chih theilou na hi uh maw? Tuajiakin kuapeuh leitung lawm hih ut tuh Pasian melma in amah akisiam hi. 5 “Kha eimah sung a tengin thangsiakhop in ahung deih hi,” chih Laisiangthou in amawk gen hiding a gingta na hi uh hiam? 6 Hinanleh hehpihna tamsem ahung pia hi; tuajiakin Laisingthou in, “Pasian in mi kisatheite a doudal a, hinanleh mi kingai-ngiamte kiangah hehpihna apia hi.”

            7 Tuajiakin Pasian kiangah kituhlut un. Dawi doudal un, tuachi’n ahung taimangsan ding hi. 8 Pasian naih un, tuachi’n aman ahung naih ding hi. Mikhialte, na khutte uh silsiang un! Lungsim mumal neiloute, na lungtangte uh hihsiang un! 9 Dah un, sun unla, kap un. Na nuihnate uh dahna suak henla, na nuamnate uh dahna suak hen! 10 Pasian mitmuh in kingaingiam un, tuachi’n aman ahung tawisang ding hi.

Midang thu khensakna thu a vauna

            11 Unaute aw, khat leh khat kigensia kei un, mi asanggam gensia tualeh asanggam vaihawmsak pen, dan gensia a dan vaihawm khum ahi; hinanleh dan na gensiat lehjaw, dan juitu na hikei a vaihawmtu na hita hi. 12 Dan piatu khat aom a aman a hundam thei a a hihsiathei hi. Midang vaihawmsak nang, kua na hia?

Kiletsakna thu a vauna

            13 Tuin hungpai un, nou, “Tuni hiam jingchiang hiam in hua khuapi ah ipai ding ua huamun ah kumkhat i vatam ding a, lei in i vajuak ua ipung ding uh,” chitute. 14 Ahiin, jingchiang a bang hung om ding chih na theikei uhi. Na hinna uh bang ahia? Tuimei tomnoukhat hung kilang a mangkikpai bang leltak ahi. 15 Hua sang in, “Toupa’n pha asakleh i hing ding a, hih ahiam, hua ahiam i bawl ding,” na chi ding uhi. 16 Hinanleh tuin, na kisaktheihnate uah nuam nasa uh; huachibang nopsakna jousiah pen khialhna ahi.

            17 Huajiakin, miin, silhoih bawl ding thei a bawl tuanlou pen, amah a dingin khialhna ahi.

Jacob 5

Mihausate tung a vauna

            1 Nou mihausate, tuin ngaiun! Na tung ua haksatna hungtung dingte jiakin kap unla kikou un, 2 Na hauhsatnate uh asiagawpta a, napuante uh nget in anejouta hi. 3 Na khamte uleh na daan dangkate uh a samek siangta hi, huate siatgawpna pen na khialhna uh theihsakna ahi ding a, na taksa uh pen meikak bangin anejou ding hi. Hun nunung lam a dingin gou na  kholta uhi. 4 Ngaiun! Na lou ua buh at kilawhte thaman, amauh khem a na piaklouh uh. Akikou ua! Tualeh a attute kikou aw pen mipite Pasian bil ah alutta hi. 5 Leitung ah kipaktak leh nuamsatak in na teng ua; gohni a ding bang in na lungtangte uh na thausak uhi. 6 Midik siamlouh na tangsak ua na thatta uh, tualeh amau’n ahung doudal kei uhi.

Thuakzohna leh thumna

            7 Tuajiakin, unaute aw, Toupa hungpai mateng dohjoutak in om un, ngaiun, louneimi in leigah manphatak a ngak a guah masa leh guah nunung amuh masiah dohjoutak in a ngak hi. 8 Nou zong dohjoutak in om un. Na lungtang uh hihkip un, ajiak Toupa hung painang anaita hi.

            9 Unaute aw, khat leh khat kiphunsan kei un, siamlouh tansak in na om khading uhi. Ngaiun vaihawmtu kongkhakbul ah aom hi. 10 Ka unaute aw, Toupa min a thugente pen gimthuakna leh dohzohna lam a etton dingin zang un. 11 Ngaiun, a thuaktute pen ahampha in isep uhi. Job thuaktheih dan naja ua, Toupa’n atawp a abawl dan, Toupa pen zahngaihna leh lainatna a dim ahih zong na mu uhi.

            12 Hinanleh ka unaute aw, sil jousiah sang a athupi pen ahihleh, kichiam kei un, van louin hiam, lei louin hiam, kichiamna dang mawng mawngin kichiam kei un, “Hi” nachih uh hi, “Hilou” nachih uh hilou hisakjaw un, atuachih keileh vaihawmsak in na om kha ding uhi.

            13 Na lak uah haksatna thuak aom hiam? Thum hen.  Kipak aom hiam? Phatnala sa hen. 14 Na lak uah damlou aom hiam? Saptuam upate sam henla amau’n Toupa min a sathau nuh in thum uhen. 15 Tualeh ginna a  thumna in damlou pen ahundam ding a, Toupa’n amah a kaithou ding hi; tualeh khialhna a bawlleh huate pen ngaihdamsak ahi ding hi. 16 Sukdam a na omtheihna ding un, na khialhnate uh thupha ki tawituah unla, khat leh khat ki thumsak un. Midiktat thumna pen a phatuam mahmah hi. 17 Elijah pen eimah bang mihing ahi a, aman guah juklouhna dingin lungluttak in athum a, tualeh kumthum leh khaguk leitungah guah julouin a omta hi. 18 Tualeh athumkik a, van in guah ajusak a leiin agahte ahung piangsakta hi.

            19 Unaute aw, nalak ua mi kuapeuh thutak a kipat namangta henla mikhat in puikik taleh, 20 amah mikhial a lammanna a kipan kiheisaktu in sihna a pat kha khat ahundam ding a, khialhna tampite a khuhmang ding ahi chih kithei hen.