Johan

                                                                            JOHAN

GELH TANGTHUPHA

Johan 1

Thu sa hung suakna

1 Atu’ng in thu a om, Thu hih Pasian kiangah a om, Thu hih Pasian ahi. 2 Amah atu’ng in Pasian kiangah a om. 3 Sil jousiah ama siam ahi a, silsiam tengteng ama siamlouh bangmah aom kei. 4 Amah ah hinna aom a, tua hinna ahihleh mihingte vakna ahi. 5 Vak mial lak ah ahung vak a, mial in amah atheikei hi.

Baptispa Johan vak theihpihtu hihna

            6 Pasian a kipan a sawl mi khat aom a, amin Johan ahi, 7 amah theihpihtu dingin a hungpai a, tua vak theihpih dingin, mi jousiahin amah jiak a agintat theihna ding un. 8 Amah tua vak ahi kei a, hinanleh vak theihpihtu ding a sawl ahijaw hi. 9 Tuapen vak diktak michih tanvak ding a leitung ah a hungpai lellel hi.

10 Amah leitungah aom a, leitung ama siam hi; tualeh leitungin amah atheikei hi. 11 Amah amite kiangah a hungpai a, amah amite’n ana kipahpih kei uhi. 12 Hinanleh amah kipahih jousiahte kiangah Pasian tate hihtheihna ding sil bawltheihna apia hi; amah agingtate kiang ah. 13 Tuate ahihleh sisan a piang ahikei a, taksa deihdan a piang zong ahi kei a, tualeh mihing deihdan a piang zong ahikei a, hinanleh Pasian a piang ahijaw uhi.

14 Tualeh Thu hih sa ahung suak a, eite lak ah ateng hi, hehpihna leh thutak a dim in; a thupina Pa Tapa tang neihsun thupina bangbang, eite’n imuta hi.

15 Johan in amah theihpihna apia a, akikou a, “Ka nung a hungpaipa in ahung makhelhta hi, ‘ka maia ommawng ahihjiak in, chia athu ka genpa amah ahi.’”

16 Ama bukimna itangchiat uh, hehpihna tung a hehpihna sawnsawn tawh.

17 Ajiak danthu Mosi tungtawn a piak ahi a; hinanleh hehpihna leh thutak Jesu Krist a pat hungpai ahi. 18 Kuaman bangchiklai in zong Pasian amu ngaikei; Tapa tang neihsun, Pasian angsung a ompa, amah in atanchin aphuangta hi.

                                                Johan leh a thupuak

(Mat. 3.1-12; Mrk. 1.1-8; Luk.3.1—18)

19 Tualeh hih pen Judate’n Jerusalem a kipan siampute leh Levite kiang a, “Nang kua na hia?” chia dong ding a asawllai ua Johan thu theihsakna ahi hi.

20 Amah panglou in a kiphuang a: “Krist ka hi kei,” ahi hi.

21 Tualeh amau’n, “Ahileh nang kua na hia? Elijah na maw chi’n adong ua. Aman, “Ka hikei,” achi a, “Jawlnei namaw leh?” achi ua, Aman, “Hilou chi’n adawng a.

22 “Tuachi’n amau’n a kiangah, kua na hia, a hungsawlte ka dawntheihna ding un hunghilh in, nang leh nang kua ka hi kichi na hia,” achi ua.

23 Aman Jawlnei Isaiah gen bang a: “Toupa lampi tangsak un, chia gamdai a kikou aw, ‘keimah ka hi!’” achi hi.

24 Amisawlte uh Pharisaite lak a mi ahi ua, 25 tualeh amah adong ua, a kiangah, Krist lah hilou, “Elijah lah hilou, hua Jawlnei lah hilou, nahihleh bangding a na baptis ahia?” achi ua.

26 Johan in amouh adawng a, “Ken tui in ka baptis a, hinanleh na theihlouh khat nalak uah ading hi. 27 A khedap khau sutding in zong ka chingkei, ka nung a hungpiaa hung makhelhpa, amah ahi,” achi hi.

28 Hih silte Jordan gal a, Bethabara, Johan in a baptisna mun a kibawl ahi.

                                                            Pasian belam nou

29 Ajingni-in Johan in Jesu a kiang lam a hungpaiin amu a, “En un Pasian belamnou, leitung khialhna puamang dingpa! 30 Hihpa ahi, mi khat ahung makhelhpa, ‘Ka nung ah a hungpai hi, kama-a omsa mawng ahihjiak in, ‘ chia ka nagenpa. 31 Amah ka theikha kei, hinanleh Israelte kiang a amah suklang a aom theihna dingin tui a baptis in kungpai ahi,” achi hi.

32 Tualeh Johan in athu atheihpih a, “Khasiangthou vakhu bang a van a kipan a hung kumsuk atung a hungtuang den kamu hi. 33 Ken amah ka theikei, hinanleh tui a baptis ding a hungsawlpa amah mah in ka kiangah, ‘Kuahiam tung a Kha hung kumsuk a, atung a tuangden namuh penpen, amah ahi Khasiangthou a baptis dingpa,’ ahung chi hi. 34 Tua chih ka thei hi,” achi hi.

                                                           

                                                        Jesu leh Johan nungjuite

            35 Ajingni in Johan ading a a nungjuite nih tawh, 35 tualeh Jesu vak kawikawi a om amu ua, “En un, Pasian belamnou!” achi hi.

            37 Tua nungjui hihte’n athugen aja ua, Jesu ajuita uhi, 38 Tuachi’n, Jesu akihei a, ahung juih uh amuh in akiang uah, “Bang ahia na zon uh?” achi a. Amau’n akiang ah,

“Rabbi khoiah ahia naten?” achi ua. (huahi “Siapa” chihna ahi.)

            39 Aman akiang uah, “Hungpai unla, en-un,” achi a. Tuachi’n a hungpai ua, atenna a en ua, amu ua, tualeh a kiangah tuani in a om uhi, sunning dak lina vel ahihjiak in.

            40 Johan thugen ja, Jesu jui tegel lak a khat ahihleh Simon Peter sanggampa Andru ahi a. 41 Aman a masapen in ama sanggampa Simon amu a, akiang ah, “Mesiah ka muta uh,” achi a, (huapen “Krist” chihna ahi.) 42 Tuachi’n amah Jesu kiangah azohpih a, Jesu’n amah a en a, nang Jona tapa Simon nahi a; “Kifa ahung kichi ta ding hi,” achi a. (huapen “suang” chihna ahi.)

                                                Jesu’n Philip leh Nathaniel asapna

                      43 Ajingni-in Jesu’n Galili gam ah pai asawm a, Philip amu a, akiang ah, “Hung juiin!” achi hi. 44 Philip zong Andru leh Peter tenna khuapi Bethsaida a teng ahi hi. 45 Philip in Nathanaela amu a, akiang ah, “Mosi in dan laibua a tungtang anagelh leh Jawlneite’n anagelh un Nazareth Jesu Joseph tapa ka muta uhi,” achi hi.

            46 Tuatakin Nathanael in akiang ah, “Nazareth a kipan in silhhoih apawt khiathei ngaia maw? achi a. Philip in akiang ah, “Hung en in,” achi a.

            47 Jesu’n Nathanael akiang juan a pai amu a, akiang ah, “En un, gitlouhna neilou Israelmi chitak hiah a om!” achi hi.

            48 Nathanael in a kiangah, “Bang nung chitheih ahia?” achi a.

Jesu’n adawng a akiang ah, “Philip in nang ahung sap ma in, theipi kung nuaia na om lain kungmu hi,” achi hi.

            49 Nathanael in adawng a akiang ah, “Rabbi, Nang Pasian Tapa na hi! Israelte kumpipa nahi!” achi hi.

            50 Jesu’n adawng a akiang ah, “Theipi kung nuai ah kungmu na kiang a kungchih jiak a gingta nave maw? Hih silte sang a thupijaw namu ding hi!” achi hi.

51 Tualeh Jesu’n akiang ah, “Adiktak in kung hilh ahi: tunung chiangin van kihong a, Pasian vantungmite Mihing Tapa tung a kah leh kum na muta ding uhi,” achi hi.

Johan 2

                                                            Kana khua a kitenna

1 Tualeh nithum ni in Galili gam a Kana khua ah kitenna a om a; huasan ah Jesu nu a om a, 2 Jesu leh a nungjuite zong kitenna ah achial ua. 3 Tualeh uain ahung beitakin, Jesu nu in a kiangah, “Uain anei nawn kei uh,” achi a.

            4 Jesu’n a kiangah, “Numei nang nungtheihsak ding bang om ahia? Ka hun atung naikei,” achi hi.

            5 Anu in silate kiangah, “Na kiang ua agen taphot bawl un,” achi hi.

            6 Tualeh Judate tawndan dungjui a kisiansuahna suang tuibel belguk, gallon sawmnih hiam sawmthum hiam ta a kitung a. 7 Jesu’n akiang uah, “Tuibelte ah tui sungdim un,” achi a. Tuachi’n belgong tan in a sungdim ua. 8 Tualeh aman akiang uah, “Tu in dim unla, nekbawl thusate kiangah tawi un achi a,” amau’n atawi ua, 9 Nek bawl thusate’n tui uain hung suak pen achiam ua, (hinanleh silate tuidimte’n athei ua), nek bawl thusate’n mouneipa asam ua 10 tualeh aman a kiangah, “Miteng in atu’ng in uain hoih atungkhia ua, tualeh tamdeuh ahung dawn nung chiang un ahoihlou jaw atungkhia uh; nang tutanin uain hoih natung nalai hi!” achi uhi.

            11 Hih sillamdang kipatna pen Jesu’n Galili gam a kana khua a abawl ahi a; athupina alangsakta a, tualeh a nungjuite’n amah agingta tau hi.

            12 Tuazoh in Kapernaum ah apaisuk a, amah tawn, anu tawn, a sanggamte tawh, tualeh a nungjuite tawh, huasan ah ni sawtpi atam kei uhi.

                                                Jesu’n Pasian tempul a suksiang

(Mat.21.12, 13; Mrk. 11.15-17; Luk. 19.45,46)

            13 Tualeh Judate paikan kut ahung naita a, Jesu Jerusalem ah apaitou a. 14 Tualeh Pasian tempul a bawng leh belam leh vakhu juakte leh dangka khekte tou amu a. 15 Jepna khauhual a bawlzoh in tempul a kipan belamte bawngte a hawlkhia a, tualeh dangka khekte dangka a sunbuaksak a, a dohkan uh asawnpuk sak hi; 16 tualeh aman vakhu juakte kiangah, “Hih silte hihsan a pat lakhia un; achi hi. 17 Tuachi’n a nungjuite’n “Na inn a ka phattuam ngaihna in ahung negaita,” chih gelh ahung theikhia uhi.

            18 Tualeh Judate’n adong ua a kiangah, “Hih silte nabawl chiamtehna bang ahia nung lahtheih?” achi ua.

            19 Jesu’n adawng a, akiang uah, “Hih tempul hihsia le uchin nithum ni-in ka tungding kik ding,” achi hi.

            20 Tuachi’n Judate’n, “Kum sawmli leh guk hih tempul bawlnan alut a! Nang nithum sung in na tungding ding maw?” achi ua.

            21 Hinanleh aman tuapen a taksa tempul gen ahijaw hi. 22 Tuajiakin misi lak a kipan a athohkik nung in a nungjuite’n, akiang uah hihthute gen ahi chih ahung thei khiata ua; Pasian Laisiangthou leh Jesu thugente agingta tau hi.

                                                Jesu’n mihingte omtan athei

            23 Tualeh paikan ankuang luina a Jerusalem a aom lain a sillamdang bawlte amuh tak un, mi tampite’n amin agingta tau hi. 24 Hinanleh Jesu alak uah aki phumlut nuam nuam kei hi, ajiak aman mi jousiah athei hi. 25 Tualeh mihing sung a om atheih jiakin mihing thu kuamah hilhchet apoimoh kei hi.

Johan  3                                 

Jesu leh Nikodem houlimna

1 Pharisaite lak a mi amin Nikodem kichi Juda vaihawmtu khat a om a. 2 Amah jan in Jesu kiangah a hungpai a, a kiangah, “Rabbi, Pasian akipan a siapa ding a hungpai nahi chih kung thei uhi. Ajiak Pasian akiang a aom keileh na sillamdang bawlte kuaman a bawlthei kei ding,” achi hi.

            3 Jesu’n adawng a akiang ah, “Adiktak in adiktak in, kung hilh ahi: mi kuapeuh apianthak keileh Pasian gam amukei ding hi,” achi a.

            4 Nikodem in a kiangah, “Mi atek nung in bangchi’n a piangthei dia? Anu sung ah nihvei lut in a piangthei ding maw!” achi a.

            5 “Adiktak in, kung hilh ahi, mi kuapeuh tui a leh kha a apianthak keileh Pasian gam alutkei ding hi. 6 Sa-a piang taphot sa-a ahi a, Kha-a piang taphot Kha-a ahi. 7 Na pianthak ngeingei ding ahi na kiang a kungchih lamdang saken. 8 Huih a utna na ah alang a, agin naja hi, hinanleh khoia kipan a hungpai ahia, khoilam a pai ding ahia chih na theikei. Kuapeuh Kha-a piangte tuachi bang ahi,” achi hi.

            9 Nikodem in adawng a, akiang ah, “Hihsilte bangchi’n ahithei dia?” achi a.

            10 Jesu’n adawng a, akiang ah, “ Israelte siapa nahi a hih silte theilou nave maw? 11 Adiktak in kung hilh ahi: kou ka theih uh ka gen ua ka muh uh ka theisak uhi; hinanleh ka thu theisak uh nasang kei uhi. 12 Leitung silte kung hilh bawn gingtalou nahih uleh van lam silte hung hilh leng bang chi’n na gingta ding ua? 13 Van a pat a hung kumsuk Mihing Tapa van a om chihlouh kuamah van ah akah ngai naikei hi.”

            14 Tualeh Mosi-in gamdai a gul akhai kang mahbang in Mihing Tapa zong khaikang in aom ding hi, 15 kuahileh amah gingta in mangthang lou a khantawn a hinna aneih jawkna ding un. 16 Ajiak Pasian in hih leitung a it mahmah a, tuachi’n a Tapa tang neihsun apai hi. Tuachia kuahileh amah gingtate mangthang lou a tangtawn hinna neizawkna ding un. 17 Leitung siamlouh tangsak ding Pasian in a Tapa a sawlkei, leitung amah jiak a hundam a hihtheihna ding a sawljaw hi.

            18 Kuahileh amah gingtate siamlouh tansak in aom kei ding a, hinanleh a gingtaloute pen siamlouh tansak khit ahi ta, Pasian Tapa tangkhat min a gintatlouh jiak in. 19 Tualeh hih siamlouh tanna ahi, vak leitung ah a hungpai a, hinanleh mi’n vak sang in mial a itjaw uh, a silbawlte uh agitlouh jiak in. 20 Ajiak kuahileh silgillou bawl in vak ahua ua, tualeh vak ah zong apai nuam kei uhi; atuachih keileh a silbawl uh alang kha ding. 21 Hinanleh kuahileh sildik bawlte pen vak ah ahung pai ua, a silbawlte uh Pasian jiaka bawl ahi chih alattheihna ding in, achi hi.

                                                            Jesu leh Johan

            22 Hih silte zoh in Jesu a nungjuite tawh Judea gam ah a hungpai ua, huasan ah amauh tawh aom jing a, tualeh a baptis hi. 23 Tualeh Johan in zong Salim gei Ainon ah a baptis a, huasan a tui atamjiak in, tualeh amauh a hungpai ua, baptisma atang uhi. 24 Ajiak huahun lain Johan thong ah aki khum naikei hi.

            25 Tuachi’n Johan nungjuite leh Judate kikal ah ki siansuahna thu ah kinialna ahung omta a. 26 Tualeh amauhte Johan kiangah a hungpai ua, akiang ah, “Rabbi Jordan gal a na kiang a om, a tanchin na theihpih pa’n, ngaiin, huapa’n baptisma a tangsak a, mijousiah a kiangah a hungpai uh!” achi ua.

            27 Johan in adawng a, “Van a kipan apiak ahihkeileh mihing in bangmah a bawlthei kei. 28 ‘Kei Krist ka hikei a, ama-a sawl ka hijaw chih nou mahmah in nung theihpi uhi.’ 29 Mouneipa pen mou pasal ahi a, hinanleh mouneipa lawmpa, akiang a ding a athu ngaikhia tuh mouneipa aw jiakin akipak mahmah ding hi. Tuajiakin hih ka kipahna abukim ta hi. 30 Amah akhangtou semsem ding a keipen ka kiamsuk semsem ding hi.”

                                                Van a kipan a hungpaipa

            31 Tunglam a kipan a hungpaipa pen mi jousiah tung a ahi a; leia piangjaw leimi ahi, tualeh leithu agen hi, van a kipan a hungpaipa pen mijousiah tung a ahi. 32 Tualeh amuh leh ajakte aman a theisak jel hi, kuaman athu theihsak a taksan kei uhi. 33 Kuahileh athu theihsak taksan in Pasian midik ahi chih akipsak hi. 34 Ajiak Pasian sawl in Pasian thu agen hi; Pasian inlah a kiangah Kha the sese in apia kei hi. 35 Pa in Tapa it a, akhut ah sil jousiah apiata hi. 36 Kuapeuh Tapa gingta in tangtawn hinna aneita, kuapeuh Tapa gingta lou in hinna amu kei ding a, Pasian hehna atung ah aom jing jaw ding hi, achi hi.

Johan 4

Jesu leh Samaria numei

1 Tuajiakin Jesu’n Johan sang in nungjui asiam tamjaw a, a baptis chih Pharisaite’n aja uh chih Toupa’n atheihtak in. 2 (Hinanleh Jesu hial in a baptis kei, a nungjuite’n a baptis jawjel uhi). 3 Judea gam nusia in Galili gam ah a paikikta hi; 4 hinanleh Samaria gam tuan a apaingai ahi a.

            5 Tuachi’n Samaria khuapi khat Saikar achih uh, Jakob in atapa Joseph kiang a mun apiakna gei a hungtungta hi.

6 Huasan ah Jakob tuikul aom a, Jesu a khualzinna agim jiakin tuikul geiah atouta a, huahi dakguk tuamtak ding ahi a.

            7 Tualeh Samaria numei khat tuitawi dingin a hungpai a, Jesu’n a kiangah “Dawn ding tui hungpia in,” achi hi. 8 Anungjuite lah nek ding leiin khuapi ah a paikhinta ua.             9 Tuachi’n Samaria numeinu in a kiangah, “Bangchi dan a nang Judami in kei Samaria numei kiang a dawn ding nungnget ahia?” Juda mite’n lah Samariamite bangmah in asim ngal kei ua, achi hi.

            10 Jesu’n adawng a akiang ah, “Pasian silthawn piak leh na kiang a dawn ding tui hungpia in chipa kua ahiam chih theilechin jaw nang a kiang ah ngen ding chin a, aman tuihing hungpia ding hiven,” achi hi.

            11 Numenu’n a kiangah, “Pu, asawkna ding bangmah lah na neikei a, tuikul lah athuk ngal a, khoia kipan in ahia tuihing nalak ding? 12 Ka pu uh Jakob sang a lianjaw nahi maw? Aman hih tuikul a hungpia a, tualeh amah mah in zong adawn a, a tate leh agan hawn in zong adawn uh,” achi hi.

            13 Jesu’n adawng a akiang ah, “Kuapeuh hih tuikul a dawn tuh adangtak kik ding, 14 hinanleh ken akiang a kapiak ding tui dawn jousiah adangtak ngai nawn kei ding. Hinanleh ken akiang a tui kapiak ding pen amah ah tuinak ahung hi ding a, tangtawn hinna dawngin aki khohkhia ding,” achi hi.

            15 Numeinu’n akiang ah, “Pu hua tui hung pia ve! Ka dang atak nawnlouh na ding leh tuitawi a hihsan a kungpai louhna dingin,” achi hi.

            16 Jesu’n akiang ah, “Na pasal vasam inla, hihsan ah hung paikik in,” achi hi.          17 Numeinu’n adawng a, “Pasal ka neikei,” achi hi. Jesu’n akiang ah, “Pasal ka neikei nachih na chikik mahmah hi. 18 Ajiak pasal nga naneita a, tu a nanaih zong na pasal ahi kei. Hua thu nagen dik achi hi.”

19 Numeinu’n akiang ah, “Pu, Jawlnei nahi chih ka thei.” 20 “Ka pu leh pate un hih mual ah Pasian abia jel ua, hinanleh nou mi’n Pasian abiakna mun ding ahih leh Jerusalem ahi, nachi uh,” achi hi.

            21 Jesu’n akiang ah, “Numai hung gingta in, hih mual sese lou ah zong ahihkeileh Jerusalem sese lou ah zong Pa nabiak hun uh hungtung dina ahita. 22 Nou na theihlouh uh nabia uh, kou katheih un kabia uh; ajiak hundamna Judate a hung kipan ahi. 23 Hinanleh ahun tung ding ahita, tu mahmah in zong atung hi, hua hun chiangin abia taktak te Pa tuh Kha leh thutakin abia ding uhi, ajiak Pa in huachibang mi amah bia dingin azong hi. 24 Pasian ahihleh kha ahi a, abia miten Kha leh thutak a abiak ding uh ahi,” achi hi.

25 Numeinu’n akiang ah, “Krist kichi, Mesiah hungpai ding ka thei, amah a hungpai chiangin sil bangkim ahung hilhsiang ding,” achi hi.

26 Jesu’n akiang ah, “Kei, na kiang a thugenpa, amah ka hi,” achi hi.

27 Tualeh huahun laitakin a nungjuite a hungtung ua, numeinu a kihoupih lamdang asa mahmah ua, hinanleh kuaman, “Bang ding numeinu na kihoupih?” achi kei uhi.

            28 Numeinu’n atuibel ataisan a, khuapi ah apai a, mi kiangah, 29” Ka silbawl jousiah hunghilh mikhat aom, hungpai unla, hung en-un, Krist ahithei diam ah?” achi a. 30 Tuachi’n amauh khuapi a pat ahung paikhia ua, akiang ah ahung paita uhi.

31 Tuachih lain a nungjuite’n, “Siapa an ne in!” chi’n asawl ua. 32 Hinanleh aman aking uah, “Nou theihlou nek ding an kanei,” achi hi. 33 Tuajiakin a nungjuite a kihou ua, “Kuahiam in anek ding ahung tawisak adiam?” achi ua.

            34 Jesu’n akiang uah, “Ka an,” ahihleh, “a hungsawlpa deihlam bawl leh a na sepzoh ahi. 35 Nou, ‘Khali zoh chiangin buhlak hun a hungtung ding na chikei ua amah,’ ngaiun kung hilh ahi, dak unla loujaute en-un, lak hun in aminsiangta hi! 36 Tualeh kuahileh ala in thaman amu ding a, tangtawn hinna tan om ding in gah akikhol jel hi; atuhpa leh alapa a kipakkhawn theihna ding un. 37’Ajiak khat in atuh a, adang in ala hi,’ chih hihsan ah adik ngel hi. 38 Na sepgimlouh uh lading in kung sawl ahi, midangte’n anasem ua, nou asepsa uh na sunjom uh ahi,” achi hi.

            39 Tualeh, ka bawl jousiah hih numeinu thugen jiakin hua khuapi a Samaria mi tampi in amah agingta tau hi. 40 Tuachi’n Samariamite Jesu kiang a hungtun tak un akiang ua om dingin akhouh ua; tualeh amah juasan ah ninih atam hi.

            41 Tualeh ama thugen jiakin mi tampi in agintat beh uhi, 42 tuachi’n numeinu kiangah, “Tu injaw nang gen jiak a gingta ka hikei ua, kou mahmah in a thugen kaja ua, tualeh hihpa pen leitung hudampa, Krista hi chih kathei uhi,” achi ua.

                                               

Jesu’n mithupi tapa adamsakna

            43 Tualeh ninih zoh in hua-a kipan in apawt a Galili gam ah apaita hi. 44 Ajiak amah Jesu ngeiin, “Jawlnei amah gam lam ah pahtawiin aom ngaikei chih a theisakta hi.” 45 Tuachi’n Galili gam a hungtung in, Jerusalem a ankuang luilai a a silbawl jousiah amun jiak un Galili mite’n ana kipahpih ua; amauh zong hua ankuang luina ah avapai uhi.

            46 Tuachi’n Jesu tui uain a suahsakna Galili gam a kana khua a hungtung kik a; tualeh huatak ah mithupi khat a tapa Kapernuam khua a china khat aom hi. 47 Jesu Judea gam a pat Galili gam a hungtungpa chih azaktak in, akiang ah apai a tualeh hung paisuk a a tapa damask dingin a ngen a, si dekdek a china ahihjiak in. 48 Tuachi’n Jesu’n akiang ah, “Chiamtehnate leh sillamdangte namuh kei uleh na gingta kei ding uh,” achi hi.

            49 Mithupipa in a kiang ah, “Pu, ka tapa sihma in hung paisuk in,” achi a.

50 Jesu’n akiang ah, “Paita in, na tapa adamta hi,” achi a. Tualeh huapa’n Jesu thugen agingta a, apaita hi. 51 Tualeh apaisuk lain asilate’n ana kituahpih ua, “Na tapa adamta!” chi’n ana hihl ua.

52 Tuachi’n aman ahung dampat lai hun akiang uah adong a, mau’n, “Jani dakkal sagih hunin anattun in amah a nusiata hi,” achi ua. 53 Tuachi’n apa’n Jesu’n akiang a, “Na tapa adamta,” achih leh a innkuanpih teng in agingta tau hi.

            54 Hih pen Jesu’n Judea gam a pat ahung pawt a, Galili gam a ahung pai lai a, a sillamdang bawl nihna ahi.

Johan 5

Bethsaida nawng a mijeng damsakna

1 Hih nungin Judate ankuang luina khat aom a, Jesu Jerusalem ah apaitou a. 2 Tualeh Jerusalem ah belam kongkhak geiah nawng khat Hebrai ham a Bethesda kichi inlim nga nei aom hi. 3 Tuate ah damloute, mittawte, keng baite tualeh jengte tampitak alum au, tui hungtak ngak in, 4 ajiak, hun chih khat chiangin vantungmi hua nawng ah ava paisuk a tui avatok jel a, tualeh kuapeuh tui kitok zoh a lut masa penpen bang chibang natna nei hinanleh zong, sukdam in aom jel hi. 5 Tualeh huasan ah kum sawmthum leh giat damlou mi khat aom hi. 6 Jesu’n amah huasan a lum amuh in, tualeh huachibang in hun sawtpi om ahita chih atheih in akiang ah, “Sukdam na ut hiam?” achi a.

            7 Damlou pa’n, “Pu, tui kitok chiang a nawng a hungkoih ding mi kanei kei a, kapai chiangin mi’n ahung makhelh jel hi,” achi a. 8 Jesu’n akiang ah thou inla, “ Na netphah la inla nakeng in paita in.” achi a. 9 Thakhat in amah ahung damta a, anetphah ala a, kengin apaita hi. Tualeh tuani khawlni ahi a, 10 Tuakiakin Judate’n adampa kiangah, “Khawlni ahi a, na netphah na puak asiang kei,” achi ua.

            11 Aman akiang uah, “A hung damsakpa in na netphah la inla, nakeng in paita in ahung chi hi,” achi a adawng a.

12 Tuachi’n amau’n akiang ah, “Na netphah la inla paita in hungchi kua ahiam?” achi ua, adong ua.

13 Hinanleh adampa in kua ahiam chih ka theikei a, huasan ah mi tampi a om a, Jesu lah apai mangta a.

14 Tuakhit in, Jesu’n amah tempul ah amu a akiang ah, “Nagiin, damask in na omta hi, khialkik nawn ken, atuachih keileh sil hoihloujaw natung ah a hungtung kha ding,” achi hi.

15 Tuachi’n huapa apaita a, a damsakpa Jesu ahi chih Judate ava hilhta hi. 16 Tuajiakin Judate’n Jesu a gawtbawl ua, thah asawmta uhi, hih silte khawlni a abawl jiakin. 17 Hinanleh Jesu’n amauh adawng a, “Ka Pa in tutan in ana asemjing a, tualeh ken zong ana kasem jing,” achi hi.

18 Tuajiakin Judate’n amah thah asawm semsem ua, aman khawlni asuksiat guak hilou a, Pasian ka pa ahi achih a, Pasian tawh kibang a akibawl man in.

                                                            Tapa thuneihna

          19 Tuachi’n Jesu’n adawng a akiang uah, “Adiktak in kung hilh ahi: Tapa in amah thu in bangmah a bawlthei kei, Pa in abawl amuhte loungal, ajiak Amana bawl jousiah, huate Tapa in zong a bawljel hi. 20 Ajiak Pa Tapa a it a, a silbawl jousiah akiang ah a musakjel hi, tualeh lamdang nasak ding uh hihte sang a thupijaw a musak ding hi. 21 Pa in misite akaihthawh a, ahinsak mahbang in, Tapa in zong a ut jousiah a hingsak jel hi. 22 Pa in kuamah vai ahawmsak ngai kei a, hinanleh vaihawmna jousiah Tapa kiangah apiata hi. 23 Mi tengteng in Pa azah bang ua, Tapa zong azah ding uh ahi. Kuapeuh Tapa zahlou in Pa asawlpa zong azah kei uhi.

            24 “ Adiktak in kung hilh ahi: kua hileh ka thu ja a ahung sawlpa gingta in tangtawn hinna aneita; siamlouh tansakin a omnawn kei ding a, hinanleh sihna a pat hinna ah alutjawta hi. 25 Adiktak in adiktak in kung hilh ahi: misite’n Pasian Tapa aw ajakna ding uh hun hungtung ding ahita, tu leh tu in zong a hungtung hi, tualeh aja jousiah ahing ding uhi. 26 Ajiak Pa in amah a hinna akineih mahbang in Tapa in zong amah a hinna akineih na dingin apiata hi. 27 Tualeh Mihing Tapa ahihman in a kiangah vaihawmna apiata hi. 28 Hih lamdang sakei un, ajiak ahun tung ding ahita, huahun chiangin hankhuk a om jousiahin a aw aja ding ua. 29 Tualeh ahung pawtdok ding ua, silhoih bawlte tangtawn hinna tang dingin a thoukhia ding ua; tualeh silgilou bawlte siamlouh tang dingin a thoukik ding uhi.

Jesu tanchin theihpihte

          30 “Ken kathu in bangmah ka bawlthei kei a; ka ja’k bangin vai ka hawmjel hi, tualeh ka vaihawm adik hi, ajiak keima deihdan zonglou in, Pa ahung sawlpa deihdan ka zongjaw hi.

31 “ Keimah tanchin ki theihpih hitaleng, ka thu theihpih adik ahikei ding. 32 Ka tanchin atheihpih pen adik ahi, chih ka thei hi. 33 Nou Johan kiangah mi masawl uh, aman thutak tanchin atheihpih hi. 34 Tua theihsak kasa’n pen mihing a kipan ahi kei a; hinanleh hundam a na omtheina ding un hih silte ka gen ahi. 35 Johan amah ahihleh mekvak kuangtak leh va’ktak ahi a, tualeh nou avak ah tomkhat nopsak tadih na ut uhi. 36 Hinanleh Johan a sang a theihpihna lianjaw ka nei hi: ka Pa’n ka sepjawh ding a ahungpiak ka nasepte amah in, Pa in ahungsawl chih ka tanchin ahung theihpih hi. 37 Tualeh Pa, ahung sawlpa, mah in zong ka tanchin ahung theihpih hi. Nou bangchiklai in zong a aw na jangai kei ua, amel zong na mungaikei uhi, 38 hinanleh athu nasung uah aom kei a, amah ahung sawlpa na gintatlouh jiak un. 39 Laisiangthou na hoihsim ngel ua, ajiak asung ah tangtawn hinna neiin na kingaihsun ua. Haute ahihleh ka tanchin theisakna ahi! 40 Hinanleh hinna naneih na ding un ka kiangah nung painuam kei uhi.

            41 “Mihingte pahtawina ka zongkei hi. 42 Hinanleh Pasian hehpihna na kiang uah a om kei chih kung thei hi. 43 Ka Pa min in kungpai a, hinanleh nou nung ki pahpih kei uh; adang khat, amah min in hungpai lehlah, na kipahpih ding uhi. 44 Nou khat leh khat kipahtawi tuahna ngaina a, Pasian guak a kipan a hungpawt pahtawina zongloute’n, bangchi’n na gingtathei ding ua? 45 Pa kiang a nou hunghek dingin hung ngaihtuah kei un. Nou hunghektu khat aom, amah nataksan uh Mosi ahi. 46 Bang jiakin ahia achihleh Mosi ana gingta hile uchin kei zong nung gingta ding uhi, ajiak aman ka tanchin ahi an gelh. 47 Hinanleh amah thugelh nagintat kei uleh bangchi’n kei thute na gingta ding ua?” achi hi.

                       

Johan 6                                  

Sanga vakna

(Mat. 14.13-21; Mrk. 6.30-44; Luk. 9.10-17)

1 Hih silte khit in Jesu Galili tuipi, (Tiberia tuipi zong kichi) gal lam ah apaita a. 2 Tualeh natna neite tung a sillamdang abawlte amuh man un mipi tampi'n amah ajui ua. 3 Jesu mual ah apaitou a, huasan ah a nungjuite tawh atou a. 4 Tualeh paikan kut ankuang luina ahung naita hi. 5 Tuachi'n Jesu adak a, mi tampi akiang lam juan a hungpai amuah in Philip kiangah, "Hihte nek ding tanghou khoiah ahia ilei ding uh?" achi a. 6 Hinanleh aman Philip ze-etna ding a agen ahi a, ataktak in bang ahia abawl ding chih aman atheikhin hi.

            7 Philip in akiang ah, Michih in themkhat chiat a atan ding uh zong makhai zanih man tanghou in achin kei ding," achi hi.

            8 A nungjuite lak a khat Simon Peter sanggampa Andru in akiang ah, 9 "Hihsan ah barli buh tanghou phelnga leh nga gaw nih naupang khat aom hi. Hinanleh mi hizahpi lak ah bangtham ahi dia," achi ho.

            10 Jesu'n, "Mipite tousak un," achi a. (Tualeh huasan ah loupa tampi aom a.) Tuachi'n mipite atou ua, atam lam uh sangnga bang ahi. 11 Tualeh Jesu'n tanghoute ala a, a gualjawl zoh in a nungjuite kiangah ahawm a, a nungjuite'n a toute kiangah kiangah ahawm a, tuamah bangin ngate zong adeihzah un a hawm uhi. 12 Tualeh akham nung un aman a nungjuite kiangah, "Bangmah manglou dingin anengthem in luak un," achi hi. 13 Tuajiakin aluak khawm ua barli buh tanghou phelnga nete nekval lawh sawmlehnih aluak dim uhi.

            14 Tuachi'n Jesu sillamdang bawl amuh un, "Hih mipite'n hihpa leitung a Jawlnei hung paidingpa ahi taktak hi!" achi uhi.

            15 Jesu'n amah kumpipa a bawl ding a mat teitei tum in a hungpai ding uh chih atheih jiakin amahtang in a paituamta hi.

                                                Jesu tuipi tung a apaina

(Mat. 14.22-33; Mrk.6. 45-52)

            16 Tualeh nitak lam a hunghih in a nungjuite tuipi lam ah apaisuk ua, 17 gunkuang khat ah atuang ua, Kapernaum lam juan in tuipi tung ah apai ua. Tualeh khua amialta a, Jesu lah akiang uah ahung painai kei a. 18 Huihpi hattak alan jiakin tuipi akihawt sang hulhul hi. 19 Tualeh mel thum hiam mel li hiam ajap nung un Jesu tuipi tung a paia gunkuang lam hungnaih in amu ua, alauta uhi. 20 Hinanleh aman akiang uah, "Keimah ka hi! Laukei un," achi hi. 21 Tuachi'n amau'n kilawptak in gunkuang ah a tuangsakta ua, tualeh a gunkuang uh zong apai nang uh a hungtung paita hi.

Mipite’n Jesu azong uh

            22 Ajingni-in tuipi galkhat lam a ding mipite'n a nungjuite tuanna loungal gunkuang dang a omkei chihleh, Jesu a nungjuite dang a omkei chihleh, Jesu a nungjuite tawh gunkuang ah a paikei a, a nungjuite amauh guak apai uh chih atheita ua. 23 Hinanleh Tiberia a kipan in Toupa'n a gualjawl nung a tanghou anekna mun gei ah gunkuang dang ahung tungpai a. 24 Tuachi'n mipite'n Jesu hileh, a nungjuite hileh a om nawn kei uh chih atheihtak un amauh zong gunkuang newte a tuang in Jesu zong in Kapernaum a hungtung ua.

                                                Jesu hinna tanghou

            25 Tualeh amah tuipi gal langkhat lam a amuhtak un akiang ah, "Rabbi, bangchik a hihtak natung na hia?" achi ua.

            26 Jesu'n adawng a akiang uah, "Adiktak in kung hilh ahi: sillamdangte na muh jiak ua hung zong na hikei ua, tanghou nanek ua navah jiak un nung zong uh ahijaw hi. 27 An mangthan ding leltak zong in na semkei un, tangtawn hinna dong a omjing ding an mihing Tapa in a hungpiak ding zong in semjaw un; ajiak Pa Pasian in amah a chiamtehta hi," achi hi.

            28 Tuachi'n amau'n akiang ah, "Pasian na ka septheihna ding un bang ahia ka bawl ding uh?" achi ua,

            29 Jesu'n adawng a akiang uah, "Amah a hungsawlpa na gintat uh, tua ahi Pasian nasep," achi hi.

            30 Tuajiakin amau'n akiang ah, "Ahihleh ka muh ua kung gintat theihna ding un bang chiamtehna nung ensak thei dia? 31 Ka pu leh pate un gamdai ah Manna ane uh; 'Aman van a kipan in nek ding apia, ' " chia kigelh bangin, achi ua.

            32 Tuachi'n Jesu'n akiang uah, "Adiktak in adiktak in kung hilh ahi, Mosi in hua tanghou van a pan in a hungpia kei a, hinanleh ka Pa in van a kipan in tanghou diktak ahung piajaw hi. 33 Pasian tanghou van a kipan a hung kumsuk leitung mite kiang a hinna piapa ahi," achi hi.

            34 Tuachi'n amau'n akiang ah, "Toupa, hua tanghou hungpia gige in," achi ua.

            35 Jesu'n akiang uah, "Kei hinna tanghou ka hi, kuapeuh ka kiang a hungpai a gilkialngai nawn kei ding; tualeh kuapeuh kei hung gingta tuh a dangtakngai nawn kei ding. 36 Hinanleh kung hilh ahi, nou nung muh un zong nung gingta kei uhi. 37 Ka Pa'n a hungpiak jousiah ka kiangah a hungpai ding; tualeh ka kiang a hungpai jousiah bangchileh zong ka nawtdok kei ding hi. 38 Ajiak kei deihlam bawl ding a van a pan a hung paisuk ka hikei a, ahung sawlpa deihlam bawl ding a hung paisuk ka hijaw hi. 39 Tualeh Pa ahung sawlpa deihlam hih ahi, aman a hungpiak jousiah khatbek mansaklou a, hinanleh nitawpni chiangin ka kaihthou jawk ding. 40 Tualeh hih ahung sawlpa deihlam ahi, kuapeuh Tapa mu a gingta in tangtawnhinna aneih a, tualeh ken nitawpni chiangin ka kaithou ding," achi hi.

            41 Tuachi'n Judate atung ah aphun ua, "Kei van a pan a tanghou hung kumsuk ka hi," a kichih jiakin. 42 Tualeh amau'n, "Hihpa hi Jesu, Joseph tapa, apa leh anu zong itheih uh hilou ahi maw? Van a pan a hung kumsuk ka hi, bang chidan a achih ahia? achi ua.

            43 Tuajiakin Jesu'n adawng a, akiang uah, "Phun phun kei un. 44 Pa ahung sawlpa'n a hungpiak kei leh kuamah ka kiangah ahung paithei kei; tualeh ken amah nitawpni chiangin ka kaithou ding hi. 45 Jawlneite laibu ah; Pasian hih in  a omsiang ding uh, chih gelh ahi. Tuajiakin Pa thu ja a thei jousiah ka kiangah ahung paijel uhi. 46 Mi kuamah in Pa amu ngaikei, Pasian a kipan a hingpaipa loungal; aman ahihleh Pa amuta hi. 47 Aditak in, adiktak in kung hilh ahi, kuapeuh kei hung gingta in tangtawn hinna aneita. 48 Keimah hinna tanghou ka hi. 49 Na pu leh pate un gamdai ah manna ane ua, asi uhi. 50 Hih ahihleh van a pat a hung kumsuk tanghou, mi'n anek a asih louhna ding uh ahi. 51 Kei van a pat a tanghou hing hung kumsuk pen ka hi, mi kuapeuhin hih tanghou anek uleh tangtawn in ahing ding uh; tualeh ka tanghou piak ding ahihleh leitung mite hinna ding a ka piak ding ka taksa ahi," achi hi.

            52 Tuajiakin Judate akisel ua, "Bang chidan a hihpan a taksa nek ding a piathei ding adiam?" achi ua.

            53 Tuachi'n Jesu'n akiang uah, "Adiktak in, adiktak in kung hilh ahi: mihing Tapa taksa na nek ua tualeh a sisan na dawn kei ua ahihleh noumauh in hinna neilou hive uchin. 54 Kuapeuh ka taksa ne a, tualeh ka sisan dawn in tangtawn hinna aneita; tualeh ken nitawpni chiangin ka kaithou ding hi. 55 Ajiak ka taksa hi an taktak ahi a, ka sisan zong dawn ding taktak ahi. 56 Kuapeuh ka taksa ne a ka sisan dawn tuh, kei ah aom jing a, tualeh kei amah ah ka omjing hi. 57 Pa hing in a hungsawl a, Pa jiak a ka hin mahbang in, kuahileh kei hung ne tuh kei jiakin amah zong ahing ding. 58 Hihpen van a kipan a tanghou hing hung kumsuk pen ahi. Na pu leh napate un manna anek ua asih bang uh ahikei, kuapeuh hih tanghou ne in tangtawn in ahing ding hi," achi hi. 

59 Hih thute aman Kapernaum khua a aom laia kikhopna inn a agen ahi.

Tangtawn hinna thu

            60 Tuajiakin a nungjuite tampi in hihthu ajak un, "Hihpen thu haksa ahi, kuan ahia ngaithei ding?" achi ua.

61 Tualeh Jesu'n hih thu ah a nungjuite aphun uh chih alungsim a theih in akiang uah, "Hih thu in nou ahung lung himoh sak maw? 62 Mihing Tapa tu-ma a aom na ngai a kahtou mule uchin bang nalawh ding ua? 63 Hinna piajaw kha ahi a, taksajaw bangmah a phatuam kei, na kiang ua ka thugente kha ahi a, tualeh hinna zong ahi. 64 Hinanleh nalak uah gingta lou khenkhat na om uh," achi a, (ajiak Jesu'n atung a pat a agingta loute leh amah mansak dingpa atheihsa ahi.) 65 Tualeh aman, "Tuajiakin ahi, ka Pa'n ahung piak kei leh kuamah ka kiangah ahung paithei kei, chia na kiang ua ka gen," achi hi.

            66 Hua hun a kipan a nungjuite tampi anung paita ua, amah ajui nawn kei uhi.

Peter in Jesu agintat aphuanna

            67 Tuchi'n Jesu'n sawmlehnihte kiangah, "Nou zong na paimang mai ding uh maw?" achi a.

            68 Simon Peter in adawng a akiang ah, "Toupa, kua kiangah ahia ka pai ding uh? Nang tangtawn hinna thute nanei hi. 69 Tualeh nang nahihleh hua Pasian hing Tapa Krist na hi chih ka gingta ua, thei zong kathei uhi," achi hi.

            70 Jesu'n amauh adawng a, "Nou sawmlehnihte kungtel hilou nahi uh maw? tualeh nalak ua khat dawimangpa ahi!" achi hi. 71 Aman Simon tapa Juda Iskariot thu gen ahi; amah zong sawmlenihte lak a pang, amah mansak dingpa ahihman in.

                                               

Johan 7

Jesu leh a sanggamte

             1 Hih silte khit in Jesu Galili gam ah avak a, Judate'n thah asawm jiak un Judea gam a phanuam takei hi. 2 Tualeh Judate bawkta kut ahung naita a, 3 tuajiakin a sanggamte'n akiang ah, "Hihsan a pat Judea gam ah paimang in, na nungjuite'n na nasep amuhtheih na ding un. 4 Aminthan na ding zong ngal in kuaman silasimtham in abawl ngaikei hi. Hih silte bawl nahihleh leitungmite kiangah kimusak in!" achi ua. 5 Ajiak a sanggamte mahmah in zong agingta kei uhi.

            6 Tuachi'n Jesu'n akiang uah, "Ka hun atung naikei hi. Hinanleh nou hun ahihleh bangchiklai peuhin atung gige hi. 7 Leitungmite'n nou ahung haukei a, hinanleh kei ahung hua uhi, a lampite uh ahoihkei chih ka theihsak jiakin. 8 Nou ankuang luina ah na paitau un, kei pen ankuang luina ah kung paitou naikei ding hi. Ajiak ka hun atung bukim naikei hi," achi hi. 9 Hih thute agenkhit in amah Galili gam ah a omden lai hi.

Jesu ankuang luina ah

            10 Hinanleh a sanggamte ankuang luina a paitouh nung un, amah zong vantang theihlouh in, aguk a pai bangin ahawhtou hi. 11 Tuachi'n Judate'n ankuang luina ah amah azong ua, "Khoi a om ahia?" achi ua.

12 Tuachi'n amah tungtang ah mipite lak ah phunna nasatak a omta a. "Ajiak khenkhat in mihoih ahi," achi ua, khenkhat in, "Hilou, mikhem ahijaw," achi ua. 13 Hinanleh Judate alau jiak un kuaman a tungthu ahahgen ngam kei uhi.

14 Tualeh ankuanglui kimlaitak in Jesu Pasian tempul ah apaitou a, thu ahilh a. 15 Tualeh Judate'n lamdang asa ua, "Hihpa'n zilngailou pi a bang chidan a laithei ahia?" achi ua.

16 Tuachi'n Jesu'n amauh adawng a, "Ka thuhilh hi keimah a hung kipan ahikei a, ahung sawlpa a hung kipan ahijaw hi. 17 Kuahileh ama deihlam bawlnuam in thuhilhna pen Pasian a kipan ahia, chih athei ding uhi. 18 Kuahileh amah phuahtawm thu gen amah kipahtawinading zong tuh amah pen midik ahi a, amah ah diktatlouhna mawng mawng aom kei hi. 19 Mosi-in nou dan hungpia hilou amaw? Hinanleh nalak uah kuaman dan najui kei uh, bangding a thah hung sawm na hi ua?" achi a.

20 Mipite'n adawng ua "Dawi pai nahi ve! Kuan ahia nang thah hung sawm?" achi ua.

            21 Jesu'n adawng a, akiang uah, "Na lamdang khat kasem a, na un un lamdang nasa uhi. 22 Tualeh Mosi-in teptan thu nou hungpia a, (Mosi a kipan ahi kei a, pulehpate a kipan ahijaw hi), khawlni in zong mi tep natan uhi. 23 Mosi dan bawhsiat louhna ding a mi'n khawlni a tep atan uleh, ken khawlni a mi khat ka damsiangsak jiakin katung ah naheh tuam umaw? 24 A kilang bangin thu khen kei unla, diktat takin thu khenjaw un," achi hi.

Messiah ahihna thu a dokna

            25 Tualeh Jesusalem a pat mi khenkhat in, "Hihpa thah asawmpa uh hilou amaw le? 26 Hinanleh ensin ua! Hangsan takin thu agen a, amau'n lah akiang ah bang mah agen kei uh! Amah hi Krist ahi chih vaihawmtute'n athei taktak na uh adiam? 27 Hinanleh enlah hihpa khoi a hung kipan chih ithei ngal ua, hinanleh Krist a hungpai chiangin kuaman athei kei ding hi," achi ua.

            28 Tuachi'n Jesu Pasian tempul ah thu hilh in akikou a, "Nou kei nung thei ua, tualeh khoi a hung kipan chih zong nungthei uh, keimah thu a hungpai ka hikei a. Hinanleh ahung sawlpa adik ahi, nou amah na theikei uh, 29 hinanleh ken amah ka thei hi, ajiak amah a kipan ka hi a, tualeh ama hung sawl ka hi," achi hi.

30 Tuajiakin amah mat asawm ua, hinanleh ahun atun nailouh jiakin kuaman atung ah khut akha mat asawm ua, hinanleh ahun atun nailouh jiakin kuaman atung ah khut akha kei uhi. 31 Tualeh mipi tamtakin amah agingta ua, "Krist a hungpai chiangin, hihpa bawl sang a sillamdang abawl diam? achi ua.

Vengtute Jesu man ding a sawlna

            32 Pharisaite'n atung thu ah mipite huachi bang a aphun uh aja ua, tualeh Pharisaite leh siampute'n amah man dingin lamkaite asawl ua. 33 Jesu'n akiang uah, "Tomnou khat ka om ding a, tuazoh chiangin ahung sawlpa kiang ah ka pai ding hi. 34 Nou nung zong ding ua, nung mukei ding uh; tualeh ka omna ah nung paithei kei ding uh," achi hi.

35 Tuachi'n Judate akihou ua, "I muhlouh ding ua khoi a pai ding adiam aw? jentelte lak a i mi kithehthangte kiang a pai a Jentelte thu vahilh ding adiam? 36 Nung zong ding ua nung mukei ding uh, tualeh ka omna ah nung paithei kei ding uh, achih bang achihna adiam?" achi ua.

Hinna tuihing piakna

37 Tualeh ankuanglui nithupi ni nunung pen ah Jesu ading a, akikou a, "Kuapeuh adang atak leh ka kiangah hungpai henla, dawn hen, 38 kuapeuh kei hung gingta in Pasian Laisiangthou in agen mah bangin 'Asung a kipan in tuihing luite a luangkhia ding, ' " achi hi. 39 Hinanleh hihpen aman amah gingtate'n amuh ding uh Khasiangthou agenna ahi a; hua hun ah Jesu pahtawi a aom nailouh jiakin Khasiangthou piak ahi naikei hi.

                                               

Mipite lak a kikhenna

            40 Tuajiakin mipi tamtakte'n hihthu ajak tak un, "Hihpa Jawlnei taktak ahi!" achi ua.

41 Khenkhatte'n "Krist ahi!" achi ua, hinanleh khenkhatte'n "Krist Galili gam ah ahung piang ngap ding amah! 42 Pasian Laisiangthou in, Krist ahihleh David suante lak a leh David tenna khua Bethlehem ah a hungpiang khia ding, chilou amaw? achi ua. 43 Tuachi'n amah jiakin mipite lak ah kikhenna a omta hi. 44 Tualeh alak ua khenkhat in amah mat asawm ua, hinanleh kuaman atung ah khat akha kei uhi.

                                                A gingtalou Judah lamkaite

            45 Tuachi'n lamkaite, siampite leh Pharisaite kiangah ahung pai ua, amau'n akiang uah, "Bangding a amah hung paipih lou anachi ua?"

            46 "Lamkaite'n hihpa thugen bangin kuaman agen ngai mawng mawng kei hi!" achi ua, adawng ua.

            47 Tuachi'n Pharisaite'n "Nou zong khem a om na hita uh maw?" 48 "Vaihawmtute ahihkeh Pharisaite lak ah amah gingta aom khatai leh? 49 Hinanleh dan theilou hih mite ahileh hamsia thuak ahi uh!"achi uam adawng ua.

            50 Nikoden, jan a Jesu kiang a hungpaipa alak uah aom a, akiang uah, 51 "I danthu un mi amah kam a thu jak leh a silbawlte atheihma in siamlouh a tangsak ngai maw," achi a.

            52 Amau'n adawng a akiang ah, "Nang zong Galili mi na maw? Zong inla en in apiang ngai kei hi," achi ua. 53 Tuachi'n mi jousiah a innlam uah apaita uhi.

Johan 8                                              

Numei angkawmlai a matna

1 Jesu Olive mual ah apaitou a. 2 Tualeh jingsang matak in temple ah a hungpai kik a, mipi jousiah akiang ah a hungpai ua, tualeh amauh atousak a, thu ahilh hi. 3 Tuachi'n Laigelhmite leh Pharisaite'n numei khat a angkawmlai a amat uh, akiang ah ahung paipih ua, alai ua adinsak zoh un. 4 A kiangah, "Siapa, hih numeinu a angkawm laitak a kiman ahi a, 5 Dan laibu ah Mosi-in hichibang mi suang a denlik ding thu a hungpia hi; hinanleh nang bang chiding nachi a?" achi ua.  6 Hihpen amah mohmatna ding a muhtheihma ding ua a zi-etna a agen uh ahi a. Hinanleh Jisu akun a, amauh gen jalou hileh kilawm in, akhutmuk in leilak agelh a. 7Tuachi'n adok lailaijiak un a dingkhia a, akiang uah, "Na lak ua khialna nei kingkeng lou penpen in amahnu ding masa hen," achi a.8 Tualeh akun kik a, leilak agelh jel a.9 Tuachi'n amau'n hih thu ajak un asia leh pha theihna un siamlouh tangsak in, a upapen apat in atawptan in khat khat in a paimangta ua; Jesu guak aom a alai a ding numeinu tawh.10 Tualeh Jesu a ding khia a, numeinu tawh. chihlouh kuamah amuh louh takin akiang ah, "Numei nang hung hekte khoi a om ahita ua? Kuaman siamlouh hung tangsak lou maw?" achi a.

11 Amahnu'n, "Kuaman hung tangsak lou, Toupa," achi a. Jesu'n akiang ah, "Ken zong siamlouh kung tangsak kei hi. Pai inla, khialkik nawn ken," achi hi.

                                                            Jesu leitung vak

            12 Tuachi'n Jesu'n akiang uah, "Kei leitung vak ka hi, kuapeuh kei hungjui tuh mial ah akhuasa kei ding a, hinanleh hinna vak aneijaw ding hi," achi hi.

13 Tuajiakin Pharisaite'n akiang ah, "Nangmah leh nangmah thu na kitheihpih hi, na thu theihpih adik kei," achi ua.

            14 Jesu'n adawng a akiang uah, "Keimah leh keimah thu kitheihpih hinanleng zong ka thu theihpih adik hi; ajiak khoi a kipan a hungpai ka hih leh, khoi a pai ding ka hia chih ka thei hi; hinanleh nou khoi a kipan a hung pai ka hih leh khoi a pai ding ka hia chih nathei kei uhi. 15 Nou taksa dan in vai nahawm uh; ken kuamah vai ka hawmsak kei. 16 Tualeh vai hawmsak hitaleng zong ka vaihawm adik hi, ajiak kei guak ka hikei a, kei leh ka Pa, ahung sawlpa ka hijaw uhi, 17 Na dan laibu uah zong minih thu theihpih pen adik ahi, chih gelh ahi. 18 Keipen keima thu theihpih khat ka hi a, tualeh Pa ahung sawlpa'n ka thu ahung theihpih hi," achi hi.

            19 Tuachi'n mau'n akiang ah, "Na pa khoi ah aom ei?" achi ua. Jesu'n adawng a, "Nou kei nung thei kei ua, kapa zong nathei kei uh, kei hungthei hile uchin kapa zong nathei ding uh achi hi.

20 Hih thute Jesu'n tempul a thu ahilhlai in dangka koihna mun a agen ahi a; tualeh ahun atun nailouh jiakin kuaman atung ah khut akha kei uhi.

Ka paining ah noun a paithei kei ding uh

            21 Tuachi'n Jesu'n akiang uah, "Ka paimang ding a, nou nungzong ding uh. Ka paina ah nung paithei kei ding uh," achi a.

22 Tualeh Judate'n, "Aman, kapaina ah nung paithei kei ding uh, achih jiakin amah leh amah kithat ding amaw le" achi ua.

            23 Tualeh aman akiang uah, "Nou pen nuailam a kipan na hi ua, kei kahihleh tunglam a kipan ka hi, nou leitung a nahi ua, kei leitung a ka hikei hi. 24 tuajiakin na kiang uah, na khialhna uah na si ding uh; ajiak 'Kei Amah ka hi'," chih nagintat kei uleh na khialhna uah na si ding uhi, kungchi ahi.

            25 Tuachi'n amau'n akiang ah, "Nang kua na hia?" achi ua. Jesu'n akiang uah, "A tu'ng a kipat a na kiang ua ka gen huamah ka hi. 26 Na tung thu uah gen ding leh vaihawmsak ding tampi kanei hi; hinanleh ahung sawlpa adik hi; tualeh amah a pat a ka jakte pen leitung mite kiangah ka genjel hi," achi hi.

            27 Aman Pa thu akiang uah agen ahi chih amau'n athei kei uhi. 28 Tuachi'n Jesu'n akiang uah, "Mihing Tapa na khaikang zoh chiang un 'Amah ka hi'; chih leh keimah thu in bangmah ka bawlkei a, hinanleh ka Pa'n a hunghilh bangin hihthute ka genjaw ahi chih nathei ding uhi. 29 Amah ahung sawlpa ka kiangah aom hi; Pa in kei guakin ahung nusia kei; ajiak ama deihlam silte ka bawljing hi," achi hi.

            30 Hih thute aja mi tampite'n amah agingta uhi.

Thutak in nou ahung suakta sak ding

            31 Tuachi'n Jesu'n amah gingta Judate kiangah, "Ka thu a na omjing uleh ka nungjuite nahi taktak ding uhi; 32 Tualeh thutak nathei ding ua, thutak in nou ahung suaktasak ding hi," achi a.

            33 Amau'n, "Abraham suante ka hi ua," bangmah chik in kuamah sal-ah ka tangngai kei uh; " 'bang chidan a na suakta ding uh nachih ahia'? chi'n adawng ua.

34 Jesu'n amauh adawng a, "Adiktak in adiktak in kung hilh ahi: kuahileh khialhna bawl tuh khialhna suak ahi. 35 Suak ahihleh tangtawn in inn ah aom ngaikei a, hinanleh Tapa ahihleh tangtawn in a omjing hi. 36 Tuajiakin Tapa in ahung suahtak sak leh na suakta taktak ding uhi. 37 Abraham suante nahi uh chih kungthei hi, hinanleh nou kei thah nung sawm uh, ka thu nou a aomlouh jiakin. 38 Ken kapa kiang a ka muhte ka gen a, nou napa kiang ua namuhte na bawl uhi," achi hi.

39 Amau'n adawng ua, akiang ah, "Abraham kapa uh ahi," achi ua. Jesu'n akiang uah, "Abraham tate hile uchin, Abraham nasapte nasem ding uhi. 40 Hinanleh tuin kei, Pasian kiang a pat a kajak thutak na kiang ua hunghilhpa thah nung sawm uh; Abraham in hichi bangin a bawlngai kei hi! 41 Nou napa uh silbawlte nabawl uhi," achi a. Tuachi'n amau'n akiang ah, "Ang kikawm a piang ka hikei uh, pa khat guak kanei uh, Pasian, " achi ua.

42 Jesu'n akiang uah, "Pasian napa uh hileh pen keimah nung it ding uhi; ajiak Pasian a kipan a hungpawt ka hi a, keimah thu in kung paikei a, aman a hungsawl ahijaw hi. 43 Bang chidan a ka ham omdan theisiam lou nahi ua? Ka thu na ngaihlouh jiak uh ahi. 44 Tualeh noupen napa uh dawi a hung kipan nahi ua, tualeh napa uh deihlam nabawl ut uhi. Amah ahihleh atung a kipan-a tualthat ahi a, tualeh thutak ah aom kei, amah ah thutak a omlouh jiakin. Juauthu agen in amah a kipan in ahi agen, ajiak amah mijuau ahi a, tualeh juaupa zong ahi. 45 Thutak ka gen jiakin nou nung gingta kei uhi. 46 Na lak uah kua nahi ua siamlouh hung tangsak? Thutak ka gen leh bangding a hung gingtalou nahi ua? 47 Mi Pasian a hung kipan in Pasian thu a ngaikhia; tuajiakin na ngaikhia kei uhi; Pasian a hung kipan na hihlouh jiak un," achi hi.

                                                Jesu leh Abraham

            48 Tuachi'n Judate'n adawng ua, akiang ah, "Samariami nahi a, tualeh dawipai nahi kungchih uh ka chidik mahmah uh hilou maw?" achi ua.

            49 Jesu'n adawng a, "Dawipai ka hikei a, Ka Pa ka pahtawi ahijaw hi, nou kei nung pahtawi kei uhi. 50 Keimah guak thupi na ding zong ka hikei a; azong leh vaihawmtu khat aom hi. 51 Adiktak in, adiktak in kung hilh ahi: mi kuapeuh in ka thu azop leh sihna amu ngai mawng mawng kei ding," achi a.

52 Tuachi'n Judate'n akiang ah, "Tuin dawipai nahi chih kung theita uhi! Abraham asita a, tualeh Jawlneite zong asita uhi; hinanleh nang mi kuapeuhin ka thu azop leh sihna amu ngai mawng mawng kei ding, nachi hi. 53 Ka pu uh Abraham sang a thupijaw nahi maw? Tualeh Jawlneite zong asita ua; nang leh nang kua a kibawl nahia?" achi ua.

54 Jesu'n "Kei leh kei ka kipahtawi leh ka kipahtawina bangmah ahikei ding. Ahung pahtawitu ahihleh ka Pa, nou ka Pasian uh ahi nachih pen uh ahi. 55 Hinanleh nou amah na theikei uh; hinanleh ken amah ka thei hi; amah ka thei kei chileng nou bang a mi juau ka hi ding hi. Hinanleh amah ka thei a, tualeh athu zong kazop hi. 56 Na pa uh Abraham in ka ni muh ding a ut mahmah a, tualeh a mungei a, akipak mahmah hi." achi hi.

            57 Tuachi'n Judate'n akiang ah, "Nang kum sawmnga zong ching nailou chin a, Abraham na mukha a maw?" achi ua.

58 Jesu'n akiang uah, "Adiktak in, adiktak in kung hilh ahi, Abraham omma in, Ka om hi,'" achi a.

59 Tuachi'n mau'n adenna ding suang ala ua, hinanleh Jesu akibu a, tempul a pat apawt a, alak uah paisuak in apaita hi.

Johan 9

Apian a pat mittaw damsakna

            1 Tualeh Jesu a paikawm in apian a pat mittaw khat amu a. 2 A nungjuite'n akiang ah, "Rabbi, hihpa mittaw a apian kuan ahia sil a bawlkhialh? Hihpa'n maw, ahihkeileh anu leh apa'n?" chi'n adong ua.

            3 Jesu'n adawng a, "Hihpa'n zong a bawlkhial kei, anu leh apa'n zong a bawlkhial kei uh, hinanleh Pasian nasepte atung a a kilattheihna dingin ahijaw hi. 4 Sun ahihlai in a hungsawlpa na kasep ngeingei ding ahi; jan hungtung ding ahita, hua hun chiangin kuaman na asemthei nawn kei ding uhi. 5 Kei leitung a ka om sungteng leitung vak ka hi," achi a.

            6 Tuachia agenzoh in lei ah chil asia a, tua chil in tungman abawl a, tua tungman mittawpa mit ah anuh a 7 tualeh akiang ah, "Pai inla Siloam nawng ah vasil in," achi a. (Siloam ahihleh "Sawl" chihna ahi.) Tuachi'n amah apai a, asil a, muthei in ahung paikikta hi.

8 Tuajiakin a innvengte leh ama a amittawt lai a amusate'n, "Hihpa khut doh a toujelpa hilow amaw le?" achi ua.

9 Khenkhatte'n, "Amah ahi," achi ua, "khenkhatte'n a kibakpih ahi," achi uhi. Hinanleh aman, "Keimah ka hi," achi hi.

            10 Tuajiakin amau'n akiang ah, "Bangchi'n ahia namit ahung vak?" achi ua. 11 Aman adawng a, "Jesu kichi mi khat in tungman abawl a, ka mit ahung nuhsak a, tualeh ka kiangah, Siloam nawng ah pai inla, vasil in, a hungchi a. Tuachi'n kapai a, kasil a, tuachi'n ka mutheita hi," achi a.

            12 Tuatakin amau'n akiang ah, "Amah khoitak ah aom ta?" achi ua. Aman, "Ka theihkei," achi hi.

Pharisaite’n adamna thu akanchian uh

            13 Tuachi'n amau'n mittawsa a piangpa pen Pharisaite kiangah ahung paipih pen Pharisaite kiangah ahung paipih ua. 14 Jesu'n tungman bawl a amit avaksakni pen khawlni ahi hi. 15 Tuachi'n Pharisaite'n zong amit ahung vakdan akiang ah adong kik ua. Aman akiang uah, "Ka mit ah tungman akoih a; ka vasil a, tuachi'n ka muta hi," achi hi.

16 Tuajiakin Pharisaite khenkhat in, "Hihpa Pasian a hungkipan ahi kei, ajiak khawlni atangkei," achi ua.

            Adangte'n, "Bang chi'n mikhial in hichibang sillamdang a bawlthei dia?" achi ua. Tuachi'n alak uah kikhenna ahung omta hi.

17 Amau'n mittawpa kiangah, "Na mit ahung sukvak sakpa, amah tungtang nang bang nachi ngaihtuah ei?" achi ua, aman Jawlnei ahi achi hi.

18 Hinanleh Judate'n amit hungvakpa nu leh pa asap masiah uh mittaw ana hi a, ahung vakta ahi chih a tungtang thu agingta kei uhi. 19 Tualeh amau'n anu leh pa kiangah, "Hihpa na tapa uh mittaw a piang achihpa uh ahi maw; bangchi'n ahia tua ahung muhtheih?" achi ua.

            20 Anu leh apa'n amauh adawng ua, "Hih ka tapa uh ahi a, tualeh mittaw in apiang chih ka thei uhi. 21 hinanleh bangchi'n ahia tua ahung muhtheihtak chih ka theikei uh, tualeh kau'n amit abawl vaksak ahia chihzong ka theikei uhi. Mi piching ahina; amah dong un, ama thu aman akigen na ding;" chi'n adawng ua. 22 Hihthu anu leh apa'n Judate alaujiak ua agen uh ahi, ajiak Judate'n masang a pat in amah Krist ahi chia phuang aom leh kikhopna inn a pat nohkhiat ding chi'n lem ana sakhinta uhi. 23 Tuajiakin ahi anu leh pa'n, "Mi piching ahina, amah dong un achih ua!"

            24 Tuachi'n Judate'n mittawpa a samkik ua akiang ah, "Pasian pahtawi in! Hihpa pen mikhial ahi chih ka thei uh," achi ua.

            25 Aman adawng a, "Mikhial ahihleh hihlouh ka theikei, silkhat ka thei hi: Mittaw ka hi a, tuin ka mutheita hi," achi hi.

26 Tuachi'n amau'n akiang ah, "Aman natung ah bang ahia abawl? Na mit bang ahung chibawl vaksak ahia?" chi'n adong kik ua.

27 Aman, "Kunghilhta a, hinanleh na januam kei uh. Bang ding a januam kik nahi ua? Nou zong a nungjui hih ut nahi uh maw?" chi'n adawng hi.

            28 Tuachi'n amah atai ua, "Nang amah nungjui nahi a; kou Mosi nungjui ka hi uh, achi uhi. 29 Pasian in Mosi kiangah thu agen chih ka thei uh; hihpa ahihleh khoi a kipan a hungpai ahia chih ka theikei uh!" achi ua.

            30 Amahpa'n adawng a akiang uah, "Ahuachih natak mah ahi a lamdanna! Khoi a kipan a hungpai ahih na theihlouh uh! Amanlah ka mit a hungbawl vaksak ngal a. 31 Pasian in mikhialte thu a ngaikhia ngaikei chih ithei uhi; hinanleh mi kuahileh Pasian ngaihsak a, adeihlam bawlte Pasian in a ngaikhiajel hi. 32 Leitung pianchil a kipan kuaman mittaw a piang mit abawl vaksak chih ka ja ngai kei. 33 Hihpa Pasian a kipan ahihkeileh bangmah a bawlthei kei ding," achi hi.

34 Amau'n adawng ua akiangh ah, "Nang mikhialsa a piang in kou nung hilhvial maw?" achi ua. Tuachi'n amah kikhopna inn a pat a notdokta uhi.

Khalam mittawtna

            35 Jesu'n amah anotkok uh chih ajak in, tualeh amah amuh in akiang ah, "Pasian Tapa na gingta hiam?" achi a. 36 Aman adawng a, akiang ah, "Toupa, amah kua ahia, hunghilh in ka gintat theihna dingin!" achi a. 37 Jesu'n akiang ah, "Amah na muta a, tualeh nang hung houpihpa ahi," achi a. 38 Tuachi'n aman,"Toupa, ka gingta hi," achi a, tuachi'n amah abiata hi. 39 Tualeh Jesu'n, "Mutheiloute'n ahung muhtheihna dingin leh mit vakte mit ahung tawtna dingin leitung ah hungpai ka hi," achi hi.

            40 Akiang a om Pharisai khenkhatte'n hihthute ajak un, akiang ah, "Kou zong mittaw ka hi uh hiam?" achi ua. 41 Jesu'n akiang uah, "Mittaw hile uchin khialhna neilou ding hi uchin a; hinanleh tuin ka muthei uh, nachi ua; tuajiakin na khialhna uh a omjing hi," achi hi.

Johan 10

                                                Belampu gentehna thu

1 "Adiktak in kung hilh ahi: kua hileh kong a lutlou a, lamtuam a kah a belam huang a lut pen guta leh suamhat ahi. 2 Hinanleh kuapeuh kong a lut pen belampu ahi. 3 Amah kong ngakpa'n ana honsak a; belamte'n a aw aja uh, tualeh a belamte amin un asam a, a pawtkhiatpih jel hi. 4 Tualeh belamte apawtkhiat sak chiangin amai uah apai a, belamte'n anung ajui uh, a aw atheih jiak un. 5 Midang ahihleh ajuikei ding ua; a taimangsan jaw ding uh; midangte aw atheihlouh jiak un," achi hi.

            6 Hih gentehna thu Jesu'n akiang uah agen a; hinanleh amau'n akiang ua bangthu ahia agen chih atheikei uhi.

Jesu Belampu hoih

            7 Tuachi'n Jesu'n akiang uah, "Adiktak in kung hilh ahi: Kei belam kongkhak ka hi. 8 Ka maia hungpai jousiah gutate leh suamhatte ahi uh; hinanleh belamte'n athu uh angai kei uh. 9 Kei kongkhak ka hi; kuapeuh keimah a alut leh hundam in a om ding, tualeh lut in apawt ding a, nek ding amu ding hi. 10 Guta ahihleh gu ding leh that ding leh bawlsia ding loungal in a hungpai kei; kei ka hih leh amau'n hinna aneihna ding uleh tampitak a aneihna ding ua hungpai ka hi.

            11 "Kei belampu hoih ka hi; belampu hoih in a belamte dingin ahinna apia hi. 12 Hinanleh kilawh, belampu taklou, belamte amah a hilouin ngia hungpai amuh in belamte a nusia a, ataisan jel; tualeh ngia in amauh aman a, athehjak hi. 13 Kilawh ahi a, belamte a ding a deihsakna mawng mawng aneihlouh jiakin a taimangsan jel hi. 14 Kei belampu hoih ka hi, ka belamte ka thei a, amau'n zong kei ahung thei uhi. 15 Pa in kei a hungtheih mahbang in, ken zong Pa ka thei hi; tualeh belamte dingin ka hinna ka pia hi. 16 Tualeh hih belam huang a hilou belam dang ka nei hi; amauh zong kung paipih ding a ka aw aja ding uh; tualeh honkhat in aom ding ua belampu khat tawh.

            17"Tuajiakin ka Pa in ahung it hi, lakkik ding a ka hinna ka piak jiakin. 18 Kei a pat kuaman ahung laksak ahi kei a, hinanleh ka thu in kapia ahijaw hi. Piak theihna leh lakkik theihna thu ka nei hi. Hih thupiak ka Pa a pat kamuta hi," achi hi.

            19 Hih thute jiakin Judate lak ah kikhennate a omkik ta hi.

20 Tualeh alak ua mi tampite'n, "Dawipai ahi! Dawi in mittaw mit a vaksakthei ngel ei?" achi ua.

Jesu nial a aom na

            22 Tualeh Jerusalem a kipum apna ankuang luilai ahi a, phalbilai ahi. 23 Jesu hih innlim ah Solomon inlim ah avak kawikawi a, 24 tuachi'n Judate'n a im ua akiang ah, "Bangtan ahia lung awpkai a nung koih ding? Krist nahihleh chiantakin hunghilh in?" achi ua.

25 Jesu'n amauh adawng a, "Kunghilhta a nagingta kei uh; ka Pa min a ka nasepte'n ahung theipih uhi; 26 hinanleh na kiang ua ka genta'k mah bangin ka belam lak a mi na hihlouh jiak un na gingtakei uhi. 27 Ka belamte'n ka aw aja uh, ken amauh ka thei hi; tualeh amau'n ahung jui uhi. 28 Tualeh ken akiang uah tangtawn hinna kapia hi, tangtawn in a mangthang kei ding ua, kuaman ka khut a pat ahung tuhkhiatthei kei ding uhi. 29 Ka Pa amauh hung piapa mi jousiah sang in alianjaw hi, kuaman ka Pa khut a pat ahung tuhkhiathei kei ding uhi. 30 Kei leh ka Pa khat ka hi uh," achi a.

            31 Tuachi'n Judate'n adenna ding suang ala ua. 32 Jesu'n akiang uah, "Nasep hoih tampi ka Pa a kipan nou kung musak a, hua nate lak ah khoipen jiakin ahia suang a nungden sawm uh?" achi a, a dong a.

            33 Judate'n adawng ua, "Nasep hoih jiakin suang in den kungsawm uh ahikei a; hinanleh Pasian nagensiat jiak leh nang mihing hi chin a Pasian bang a na kibawl manin ahijaw!" achi ua.

            34 Jesu'n akiang uah, "Pasian in, 'pasiante nahi uh,' achi, chih gelh hilou maw? 35 Pasian thu tunnate bawn pasiante chih ahihleh, Pasian Laisiangthou lah suksiat theih hilou a. 36 Pa in nasepte kasep kei leh hung gingta kei un. 38 Hinanleh kasep a ahihleh kei hung gingta kei nanle uchin zong ka nasepte bek gingta un," achi hi.

39 Tuajiakin amah mat asawm kik ua, hinanleh akhutte apat apawt a.

            40 Tuachi'n Jesu Johan in baptis abawlna mun Jordan gal ah a paikik a, huasan ah ava omta hi. 41 Tuachi'n mipi tampi a hungpai ua, "Jordan in sillamdang bangmah bawl anei kei a, hinanleh hihpa tungtang Johan in agen adiksiang hi," achi ua. 42 Tuachiah huasan ah mi tampi'n amah agingta uhi.

Johan 11                    

Lazar sihna

1 Tualeh mi khat, Mari leh a sanggamnu Martha tenna khua Bethani khua a om, amin Lazar kichi achii ana a. 2 A sanggampa Lazar chi-na nu pen Toupa sathau namtui nuh a, asam a akeng siaknu Mari ahi. 3 Tuajiakin a sanggamnute'n Jesu kiangah, "Toupa, ngaiin, na itpa achina hi," chi'n kamtai mi asawl ua.

4 Jesu'n hihthu ajaktak in, "Hih natna pen sihna ding hial ahi kei a, hinanleh hihjiak a Pasian thupina ding ahijaw, Pasian Tapa hihjiak a bawlthupi ahihtheihna dingin," achi hi.

5 Jesu'n Martha leh a sanggamnu leh Lazar a it a. Tuajiakin a chi-na chih ajak in, a omna mun mah ah ninih aom nalai hi. 7 Tuachi'n a nungjuite kiangah, "Judea gam ah i paikik ding uh," achi a.

8 A nungjuite'n a kiangah, "Rabbi, tu madeuh in Judate'n suang in ahung den sawm ua, huasan a pai nasawm kik maw?" achi ua.

            9 Jesu'n adawng a, "Sun khat sung a dakkal sawmlehnih a om hilou maw? Mi kuapeuh sun a avak leh a kisuihkha ngai kei, hih leitung vak amuh jiakin achi hi. 10 Hinanleh mi kuapeuh jan a avak leh a kisuihkha jel hi, amah a vak a omlouh jiakin." Hih thute aman agen a, tuazoh in akiang uah," I lawmpa Lazar a ihmuta, hinanleh a ihmutna a pan thousak dingin ka pai ding," achi hi.

            12 Tuachi'n a nungjuite'n, "Toupa, a ihmu ahihleh adam kik na ding," achi ua.

13 Jesu'n asih thu agen ahi a, hinanleh amau'n ihmu a tawldam thu gen hi in a ngaihtuah uhi. 14 Tuachi'n Jesu'n chiantakin akiang uah ahilh a,"Lazar asita hi. 15 Tualeh nou jiak a huasan a ka omlouh ka kipak hi, na gintak theihna ding un, hitaleh zong a kiangah ipai ding uh," achi a.

16 Tuachi'n Thoma, (Didum) kichipa'n a nungjui hihpihte kiangah, "Amah tawh isihkhawm theihna dingin ei zong ipai ding uh!" achi hi.

Jesu thohkikna leh hinna ahi

            17 Tuachi'n Jesu hungtun in amah han ah nili ana omta chih ahung thei a. 18 Bethani hi Jerusalam khuagei naih, melnih a gamla ahi a, 19 tualeh Judate tampi Mari leh Martha kiangah, a sanggampa uh sihna tung a amauh hehnem dingin a hungpai ua.

20 Tualeh Martha in Jesu hungpai chih ajak takin, apai a, amah ana dawn a, hinanleh Mari innsung ah atou nalai hi. 21 Tualeh Martha in Jesu kiangah, "Toupa hihsan a om hilechin ka sanggampa silou ding hi a! 22 Hinanleh tu in zong Pasian kiang a nanget taphot Pasian in ahung pia ding chih ka thei hi," achi hi.

23 Jesu'n amahnu kiangah, "Na sanggampa athoukik ding hi," achi hi.

24 Martha in a kiangah, "Nitawpni chiang a misite thohkikni chiangin a thoukik ding chih ka thei hi," achi a.

            25 Jesu'n amahnu kiangah, "Kei thohkikna leh hinna ka hi. Kuapeuh kei hung gingta tuh sinanleh zong ahing ding hi; 26 tualeh hing a hung gingta jousiah bangmah chik in asi ngai nawn kei ding hi, hih nagingta ei?" achi a.

            27 Amahnu'n a kiangah, "Hi, Toupa! Nang Krist, Pasian Tapa, leitung a hungpai dingpa nahi chih ka gingta hi," achi hi.

                                                            Jesu kahna

            28 Martha in hih agenkhit in apai a, a sanggamnu Mari aguk in ava sam a. "Siapa a hungpai a, ahung sam hi," achi a. 29 Amahnu'n tua ajaktak in kintakin athou a, akiang ah a hungpai a. 30 Jesu khuasung a hungtung naikei a, Martha in ava dawnna mun ah aom nalai hi. 31 Tuachi'n Judate innsung a amah hehnem a amah tawh omten Mari kintak a thou a pawtkhia amuh un, han a kap dingin apai chi'n anung ajui ua.

32 Tuachi'n Mari-in Jesu omna mun a hungtun a, amah amuh in, akengbul ah apuk a, akiang ah, "Toupa, hihsan a om hilechin ka sanggampa silou ding hi a!" achi a.

33 Tualeh Jesu'n Mari kap leh amah tawh hungpai Judate zong kap a om amuh takin a lungtang akhoih mahmah a, a mangbangta a. 34 Tualeh aman,"Amah khoia nasial uh ahia?" achi a.

Amau'n akiang ah, "Toupa hungpai inla en in," achi ua.

35 Jesu akapta.

            36 Tuachi'n Judate'n, "En un, it na tazen e!" achi ua.

37 Khenkhat in, "Hihpa mittaw mit hihvak sakpa'n silousak theilou adiai?" achi ua.

Lazar kaihthohna

            38 Tuachi'n Jesu a lungsim a na sakik kawm in han ah a hungpai a, han pen suanghawm ahi a, suang a net ahi. 39 Jesu'n "Asuang lakhia un!" achi a. Misipa sanggamnu Martha in, akiang ah, "Toupa tu injaw a uihta ding ajiak asihna nili ahita hi!" achi a.

40 Jesu'n amahnu kiangah, "Na gintat a ahihleh Pasian thupina namu ding, na kiangah chilou ka hi hiam?" achi hi. 41 Tuachi'n amau'n misi omna pat suang alakhia ua, tualeh Jesu'n vanlam a entou a, "Pa, ka thu na ngaihkhiat jiakin natung ah ka kipak hi. 42 Tualeh nung ngaikhia gige chih zong kathei hi, hinanleh kakim a ding mipite jiakin hih kachi ahi, Nangman nungsawl chih agintat na ding un," achi a. 43 Tuachia agenzoh in aw ngaihtak in, "Lazar hung pawtkhia in!" chi'n a kikou a. 44 Tuatakin misi pen akhut akeng hanpuan a kituam in ahung pawtdok a; amai kinawtna puan a tuam ahi a. Jesu'n akiang uah, "Phel unla, paisak un," achi hi.

Jesu thah a sawm uh

(Mat. 26.1-5; Mrk. 14.1,2; Luk.22.1,2)

            45 Tualeh Mari kiang a hungpai leh Jesu sillamdang bawl mu Judate tampi in Jesu agingta ta uhi. 46 Hinanleh khenkhat Pharisaite kiang ah apai ua, Jesu silbawlte avahilh uhi. 47 Tuachi'n siampite leh Pharisaite'n vaihawmtute a samkhawm ua, "Bang ilawh ding uai? Hihpa'n sillamdang tampi abawl hi! 48 Hih bang a amah guak i omsak uleh, mi jousiahin amah agingta ding ua, tualeh Rommite a hung pai ding ua, imun leh ichi leh namte ahung laksak ding uh!" achi ua.

            49 Tualeh alak ua mi khat Kaiapha achih un, hua kum a siampi ahi a, akiang uah, "Bangmah na theikei uh! 50 Inam pumpi amanlouh na ding a mipi tang a mikhat sih ei a dingin ahoih chih zong na ngaihtuah kei uh?" achi a. 51 Hihpen aman ama phuahtawm a agen ahikei a, hua kum a siampi ahi a, hua namte tang a Jesu asih ding agen kholhna ahi hi. 52 Tualeh hua namte guak hilou in, Pasian ta kitheh jakte jousiah pawlkhat a kaihtheihna dingin zong ahi.

53 Tuachi'n huani a pat in amah thahna ding ngaihtuah in a kihou jingta uhi. 54 Tuajiakin Jesu Judate lak ah a langtang in avak nawn kei a, hinanleh hua a kipan in gamdai naihlam ah Ephraim kichi khuapi khat ah apai a, huasan ah a nungjuite tawh a omjingta uhi.

            55 Tualeh Judate paikan ankuang luina ahung naita a, mi tampite gam a kipan in a kisiansuah dingin Jerusalem ah paikan ankuang luima in apai tou ua. 56 Tuachi'n amau'n jesu azong ua, Pasian tempul ah dingkawm in aki hou ua, "Bangchi'n na ngaihtuah ua? Ankuang luina a hungpailou ding adiam?" achi ua. 57 Siampite leh Pharisaite'n amah amat theihna ding un, mi kuapeuh in a omna atheileh agenkhiat ding ahi, chih thu apiata uhi.

Johan 12

Bethani a Mari-in Jesu sathau anuhna

(Mat.26.6-13; Mrk. 14.3-9)

1 Tuachi'n paikan kut ni masang niguk in Jesu'n misi lak a akaihhou Lazar omna Bethani khua a hungtung a. 2 Huasan ah amah a ding in nitak an abawl ua, Martha in nek abawl a, hinanleh Lazar amah tawh ankuang umpihte lak a khat ahi. 3 Tuachi'n Mariin spaiknard sathau namtui man tamtak bawm kimkhat ahung tawi a, Jesu keng anuh a, asam in akengte asiak a, tualeh sathau gim in innsung a dimta hi. 4 Hinanleh nungjuite lak a khat amah mansak dingpa Juda Iskariot Simon tapa in, 5"Bangding a hih sathau namtui makhai zathum a juak a, mi gentheite kiang a piajaw lou uh ahi?" achi a. 6 Hihpen aman mi gentheite a khuatuah jiak a hihthu gen ahi kei a, guta ahi a, dangkaip a kem a, tualeh asung a kikhoih a lak jel jiakin agen ahijaw hi.

            7 Hinanleh Jesu'n, "Amah guak in nusia un! Ka kivuini chiang a dingin aman hih akoih ahi. 8 Mi gentheite ahihleh na kiang uah a omjing ua, kei pen na kiang uah ka om gige kei ding," achi hi.

Lazar thah asawm uh

            9 Tuachi'n Judate'n amah huasan ah aom chih atheita ua; Jesu guak hilou in misi lak a pat akaihthoh Lazar zong amuh nuam jiak un a hungpai ua. 10 Hinanleh siampite'n Lazar zong athah theihna ding un akihou ua, 11 ajiak amah jiakin Judate tampi a paimang ua, Jesu agingta uhi.

Jesu Jerusalem a gualjou a alutna

(Mat.21.1-11; Mrk.11.1-11; Luk.19.28-40)

            12 Ajingni in ankuang luina a hungpai mi tampi in Jesu Jerusalem ah hungpai ding ahi chih ajaktak un. 13 Tumnahte atawi ua amah dawn dingin apawtkhia ua, tualeh, "Hosanna! Toupa min a hungpai Israel kumpipa a hampha hi!" chi'n aki kou ua. 14 Tuachi'n Jesu'n sabiltung nou khat amu a, atung ah atuang a, hichi a gelh bangin:

            15 "Lauken, Zion tanu!

ngaiin, na kumpipa sabiltung nou

tung a tuangin a hungpai hi,"

 chih.

            16 Hih silte nungjuite'n atu'ng in atheikei uh, hinanleh pahtawi a aom nungin hih thute amah tungtang a kigelh ahi ah, tualeh atung ah hih silte abawl uhi chih ahung theikhiata uhi.

17 Tuajiakin hihsan a pat Lazar asap khiat leh misi lak a pat akaihthoh lai a akiang a omte athu a theihpih uhi. 18 Hih jiakin mipite'n zong hih sillamdang abawl chih ajak jiak un amah ana lamtuah uhi. 19 Tuachi'n Pharisaite a kikou ua, "Bangmah nalawh theikei uh chih nathei uai! En un, leitung mite'n amah ajuita uh!" achi uhi.

Grikte ngetna

            20 Tualeh ankuang luina a hungpaite lak ah Grikmi kuate hiam zong a om uh a. 21 Amauh (Galili gam a Bethsaida khua a om) Philip kiang ah a hungpai ua, "Pu, Jesu muh ka ut uh chi'n a ngen ua."

            22 Philip a hungpai a, Andru a hunghilh a, tualeh Andru leh Philip in Jesu ahilh ua. 23 Hinanleh Jesu'n amauh adawng a, " Mihing Tapa pahtawi a aom na'ng hun a tungta hi. 24 Adiktak in kung hilh ahi: buh tangkhat leia akiat a, asih kei leh amahtang in a omjing hi; hinanleh asihleh tampi in agah jel hi. 25 Kuapeuh hinna it in ata'n ding a, tualeh kuapeuh hih leitung a ahinna hua in tangtawn hinna dongin akembit ding hi. 26 Kuapeuh in kana asep ut leh hung jui hen; ka omna ah ka silapa zong a om ding ahi; mi kuapeuh in kana asep leh ka Pa in a kipahpih ding hi.

Jesu’n asih ding agenkholh

            27" Tu in ka kha a mangbang hi; tualeh bang ahia ka gen ding? 'Pa, hihhun lak ah hung hundam in ka chiding hiam'? Hinanleh hihding a hungpai lah ka hi ngal a. 28 Pa, na min pahtawi na!" achi a. Tuachi'n van a pan in aw khat a hungsuak a, "Ka pahtawita a, tualeh ka pahtawi kik ding hi," chi in.

29 Tuajiakin mipi akiang a ding leh hih jate'n, "Van ging ahi!" achi ua.

30 Hinanleh Jesu'n adawng a akiang uah, "Hih aw pen kei jiak a hungsuak ahi kei a, hinanleh nou a ding a hung suak ahijaw hi. 31 Tu in hih leitung vaihawm lai ahi a, tu in hih leitung vaihawmtu paihkhiat ahi ding hi. 32 Tualeh kei pen leia pat a khaikang a ka om leh mi jousiah ka kiangah ka hip ding hi," achi hi. 33 Hihpen aman bangchi bang sihna in ahia asih ding chih theihsakna a agen ahi.

            34 Mipite'n adawng ua, "Krist ahihleh tangtawn in a omjing ding chih ka dan uapat kaja uh, bang chidan a nang Mihing Tapa khaikang a om ding ahi, nachih ahia? Hih Mihing Tapa kua ahia?" achi ua.

            35 Tuachi'n Jesu'n akiang uah, "Hun tomnou khat vak nalak uah aom ding hi, vak naneih laiun vak ah khuasa un, atuachih keileh mial in ahunglap ding hi. Kuapeuh mial a khuasa in khoilam a pai chih atheikei hi. 36 Vak naneih laiun vak gingta un, vak tate na hung hihtheihna ding un," achi a. Hih thute Jesu'n agen a, tualeh apawt a, amauh ua pat a kibuta hi.

Judea gam a ginlouhna

            37 Hinanleh amai uah sillamdang tampi bawl nanleh amah agingta tuan kei uhi. 38 Jawlnei Isaiah in:

"Toupa, ka thugen uh kua ahia agingta?

Tualeh Toupa khut zong kua kiangah ahia a kilak?" chia agen ahung

tangtun theihna ding in.

39 Tuajiakin agingta thei kei uh, ajiak Isaiah in:

            40 "Aman amit ua amuh theihlouh na ding un amit uh asuk tawtsak a,

tualeh a lungtang ua a theihsiam theihlouh na ding un, a lungtang uh asuk khauhsak hi; ahung kihei kik ua, kana sukdam kik louhna dingin,"

achi kik hi.

            41 Hih thute pen Isaiah in a thupina a muhlai a agen ahi a, tualeh a tungtang thu agenna ahi.

            42 Ahihhang in vaihawmtu lamkaite lak ah zong tampi in amah agingta ua, hinanleh Pharisaite jiakin amah aphuang khia ngam kei ua, atuachih keileh kikhopna inn a pat nawhdok in a omkha ding uhi. 43 Ajiak amau'n Pasian kipahpih a om sang in mihingte phat a om adeih jaw uhi.

Jesu thugente jiak a vaihawmna

            44 Tuachi'n Jesu a kikoukhia a, "Kuahileh kei hung gingta tuh kei hung gingta ahikei a, a hungsawlpa gingta ahijaw hi. 45 Tualeh kuahileh kei hung mu tuh kei hungsawlpa mu ahi. 46 Vak ding a leitung a hungpai ka hi a, kuahileh kei hung gingta te miala a omlouh na dingin. 47 Mi kuapeuhin ka thugente ja in gingta kei nanle uh zong, ken siamlouh ka tangsak kei; ajiak leitung siamlouh tangsak ding a hungpai ka hikei a, leitung hundam ding a hungpai ka hijaw hi. 48 Kuapeuh kei hung deihlou a, ka thugente zong sanglou in siamlouh tangsak khat anei hi, ka thugente mahmah in nitawp ni chiangin amah siamlouh a tangsak ding hi! 49 Ajiak keima phuahtawm in ka gen kei a, hinanleh Pa, a hungsawlpa'n ka gen ding leh ka hilh ding thu a hungpia hi. 50 Tualeh a thupiak ahihleh tangtawn hinna ahi chih ka thei hi; tuajiakin ka gen ding jousiah Pa in ka kianga agen bangin ka genjel hi," achi hi.

Johan 13

                                    Jesu’n nungjuite keng asilna

1 Tualeh paikan kut ankuang luima in, Jesu'n hih leitung a pat paimang a Pa kiang a apai ding hung hungtungta chih athei a, leitung a amite a it ngutngutta a, atawptan in a it hi. 2 Tualeh nitak annek laiin setan in Simon tapa Juda Iskariot lungtang ah Jesu matsak ding a ngaihtuah sak a. 3 Jesu'n Pa in sil bangkim a khut ah apiata chih leh, Pasian a kipan a hungpai a, Pasian kiang a paikik ding ahihdan thei in. 4 Nitak an imlai ading a, apuansilh akoih a; tualeh kinawtna puan ala a, ateng a, 5 Kisilna kuang a tui asunzoh in a nungjuite keng asilsak a, kinawtna puan aten in anawtjel hi. 6 Tuachi'n Simon Peter kiangah a hungtung a, Peter in akiang ah, "Toupa nangmaw ka keng nasil ding?" achi a.

7 Jesu'n adawng a, akiang ah, "Ka silbawl tu in na theikei, hinanleh tunung chiangin nung thei ding hi," achi hi.

8 Peter in akiang ah, "Ka keng nasil ngaikei ding!" achi a.

Jesu'n adawng a, "Kasil kei a ahihleh, ka kiang ah tan bangmah nanei kei ding hi," achi hi.

            9 Simon Peter in akiang ah, "Toupa ka keng guak hilou in! ka khut leh ka luvum zong hungsil in!" achi a.

            10 Jesu'n akiang ah, "Kuapeuh silsa in a kengguak lousiah sil apoimoh kei, hinanleh apum in asiang hi, na un un hilou in," achi hi. 11 Ajiak aman a mansak dingpa athei a; tuajiakin, "Na un un nasiang kim kei uh," achi hi.

            12 Tuachi'n a keng uh asil zoh a, apuansilh la a atoukik zoh in akiang uah, "Na tung ua ka silbawl bang ahih nathei uh hiam?" 13 "Nou kei Siapa leh Toupa nungchi ua, nung chidik ngut uh, ajiak ka hi him ahi. 14 Tuachi a kei na Toupa uleh Siapa-un bawn nakeng uh kasil a ahihleh nou zong khat leh khat nakeng uh na kisilsak ding uh ahi. 15 Na tung ua ka bawl bang a na bawlna ding un na etton ding uh kung pia ahi. 16 Adiktak in kung hilh ahi; sila au sangin alianjaw kei a, a kisawlpa zong asawltu sangin alianjaw kei hi. 17 Hih silte natheih uleh, bawl le uchin mi hampha na hi ding uhi!

            18 "Na un ua thu ka genkei a; katelte ken kathei hi. 'Hinanleh tua ka tanghou nekpihpa in ka tungah a khetul a khangtouta,' chih Pasian Laisiangthou a tangtun theihna ding ahi. 19 A hungtunma in tuin hih kung hilh ahi, a hungtun chiang a 'Amah ka hi,' chih na gintat theihna ding un. 20 Adiktak in kung hilh ahi: kuahileh kasawl taphot ki pahpih, kei kung kipahpih ahi; tualeh kuahileh kei hung kipahpih in a hungsawlpa a kipahpih ahi," achi hi.

Jesu’n amansak dingpa agenkholh

            21 Jesu'n hichibang a agenzoh in a lungsim a mangbangta a, "Adiktak in kung hilh ahi: nalak ua khat in ahung mansak ding," chi'n atheisak hi.

22 Nungjuite'n kuapen ahia agen chih theilou in aki entuah ua. 23 Tualeh a nungjuite lak a khat Jesu'n a itpa jesu ang ah kingam in a om a. 24 Tuajiakin Simon Peter in, "Kua thu ahia agen chih dong ding in mit in a houpih a."

            25 Tuachi'n Jesu awm a kingam in akiang ah, "Toupa, kuapen ahia?" achi a.

26 Jesu'n adawng a, "Tanghou them kadiah a, kapiak penpen amah ahi," achi a. Tualeh tanghou them a diahzoh in Simon tapa Juda Iskariot kiang ah apia hi. 27 Tualeh tanghou them apiak zoh in setan asung ah a lutta a, Jesu'n akiang ah, "Na bawl bawl ding kintak in bawl in!" achi hi. 28 Hinanleh dohkan kim a toute kuamah in bang chihna a hihthu akiang a agen ahia chih a theikei uhi. 29 Ajiak alak ua khenkhat in, Juda in dangka-ip akep jiak a Jesu'n akiang a, ankuang luina a i silpoimoh dingte lei in, chi ahia, ahihkeileh migentheite kiang a banghiam khat piak ding ahiam in a ngaihtuah uhi.

            30 Tualeh aman tanghou them ala a, tuachi'n a pawtkhia pai a, tuahun pen janlai ahi.

Thupiak thak

            31 Tuachi'n apawt nungin Jesu'n, "Tu in jaw Mihing Tapa pahtawi in a omta, tualeh Pasian zong amah ah pahtawi in aom hi. 32 Amah a Pasian pahtawi a aom leh Pasian in zong amah ah amah apahtawi ding a, apahtawi paingal ding hi. 33 Naute aw, tomnou khat nalak uah ka om tadih hi. Nou nungjong ding ua, Judate kiang a, 'Ka paina ah nungthei kei ding uh,' ka chihmah bangin, tuin na kiang uah ka chi ahi. 34 Thuchiam thak kungpia ahi, nou khat leh khat ki it un, ken nou kung it bangin, nou khat leh khat ki it pelmoh un. 35 Khat leh khat na ki it uleh mi jousiahin ka nungjuite na hi uh chih tua-ah athei ding uhi," achi hi.

Peter kitheihmoh bawl ding Jesu’n a genkholhna

(Mat. 26.31-35; Mrk. 14.27-31; Luk. 22.31-34)

            36 Simon Peter in akiang ah, "Toupa khoi ah ahia napai ding?" achi a. Jesu'n amah adawng a, "Ka painang ah tuin nung juithei naikei ding," achi hi.

            37 Peter in a kiangah, "Toupa bangjiak ahia tu a kung juihtheih louh ding? Nang jiakin ka hinna ka piakhia ding," achi a.

38 Jesu'n amah adawng a, "Keimah jiakin na hinna na piakhia ding maw? Adiktak in kung hilh ahi: nang thumvei nung kitheihmoh bawlma in ak akhuang kei ding hi." achi hi.

Johan 14        

Pa kiang zotna lampi

1"Na lungtang uh mangbang kei hen, Pasian na gingta ua kei zong hung gingta un. 2 Ka Pa inn ah tenna ding mun tampi a om, omlou hileh kung hilh ta ding hi. Nou ding a mun bawl a pai ding ka hi. 3 Tualeh kapai a, nou a ding a mun ka vabawlleh, kung paikik ding a, ka kiangah nou kung la ding; ka omna a nou zong na omtheihna ding un. 4 Khoi a kapai ding nathei ua, ka lampi zong nathei uh," achi hi.

            5 Thoma in akiang ah, "Toupa, khoi a napai ding ka theikei uh; a lampi bangchi'n kathei ding ua?" achi a.

            6 Jesu'n akiang ah, "Keimah lampi leh, thutak leh, hinna ka hi; keimah a pailou kuamah Pa kiang a tungthei kei hi. 7 Kei hungthei hile uchin ka Pa zong nathei ding uh, tu a kipan amah nathei ua, mu zong namuta uhi," achi hi.

            8 Philip in a kiangah, "Toupa, Pa kou hung musak in tuachi'n kou a dingin a hun ding," achi a.

9 Jesu'n akiang ah, "Tamveipi na kiang uah ka om a, tuachi'n zong hungthei nailou lai maw, Philip? Kuahileh kei hungmu in Pa mu ahi; 'Bang chidan a Pa kou hung musak in nachih ahia'? 10 Kei Pa ah ka om a, tualeh Pa kei a om in, aman sil a bawljel hi. 11 Kei Pa ah ka om a, tualeh Pa kei ah aom chih gingta un; ahihkeileh silbawlte jiak be'k in hung gingta un. 12 Adiktak in kung hilh ahi, kuahileh kei hung gingta in, ka silbawlte aman zong abawl ding a, tualeh hihte sang a thupijaw zong abawl ding, ka Pa kiang a kapai ding jiakin. 13 Tualeh ka min a nanget jousiah uh, ka bawljel ding, Pa Tapa-a pahtawi a aom theihna ding in. 14 Ka min a banghiam khat peuh nanget uh, ka bawljel ding.

Kha piak ding chiamna

            15 "Kei nung it uleh ka thupiakte jui un. 16 Tualeh Pa ka ngen ding a, Aman nou khamuantu ahung pia ding, na kiang ua tangtawn a om ding in. 17 Tuapen thutak kha ahi; leitung taksa dan a hingten aneithei kei, ajiak amah amu kei ua, thei zong atheikei uh; hinanleh nou amah nathei uh; ajiak na kiang uah a om a, na sung uah a om ding hi.

18 "Tagah dingin kung nusia kei ding, na kiang uah kung pai ding hi. 19 Tomkhat zoh chiang in leitung in kei ahung munawn kei ding a; hinanleh nou nung mu ding uh; ajiak kei ka hing a nou zong nahing ding uhi. 20 Tuani chiangin kei ka Pa ah ka om a, nou kei ah na om ua, tualeh kei nou ah ka om chih nathei ding uhi.

            21 "Kuahileh ka thupiakte neia jui tuh, kei hung it ahi a; tualeh kuapeuh kei hung it tuh ka Pa it in aom ding a, ken amah ka it ding a, akiang ah ka kilak ding," achi hi.

22 Iskariot hiloupen Juda in akiang ah, "Toupa koukiang a kilak a, leitung mite kiang a na kilaklouh ding bang chidan ahia?" achi a.

            23 Jesu'n adawng a akiang ah, "Mi kuapeuh in ahung it leh ka thu ajui ding a. Tualeh ka Pa'n amah a it ding a, akiang uah kung pai ding ua, amauh tawh ka tengkhawm jing ding uhi. 24 Kuapeuh ahung it lou in ka thute ajui kei a, thu najakte uh keimah a ahikei a, Pa a hungsawlpa a ahijaw hi.

            25 "Na kiang ua ka om tadih sungin hih thute na kiang uah ka gen ahi. 26 Hinanleh Khamuanpa, Khasiangthou Pa in ka min a ahung sawl ding in, aman siljousiah nou a hunghilh ding a, tualeh thu na kiang ua ka gensa jousiah nou ahung theisak ding hi.

27 "Khamuanna kung nutsiat hi, keimah khamuanna kungpia hi; leitung in apiak bangin ken nou kung piakei a, na lungtang uh mangbang sak kei unla, lau zong lausak kei un. 28'Ka paimang ding a, na kiang uah kung paikik ding,' chia na kiang ua ka gen na jata uhi. Kei hung it hile uchin Pa kiangah ka pai ding kachih jiakin na kipak ding uhi, ajiak ka Pa kei sangin alianjaw hi. 29 Tuin ahung tunma in kung hilhta hi, ahun a hungtun chiang a na gintattheih na ding un. 30 Tubansiah na kiang uah thu tampi ka gen nawn kei ding hi; ajiak leitung vaihawmpa hungpai pai ding ahi a, aman keimah ah bangmah aneikei hi, 31 hinanleh Pa ka it a, a hungpiak bangin ka bawljek hi chih leitung in atheihna ding un ahi.

"Thou un, hihsan a kipan ipai ding uhi.

Johan 15

Grepgui leh abate

1 "Kei grepgui diktak ka hi, ka Pa ahuan neipa ahi. 2 Keimah a om ba gahneilou jousiah a paimang jel a; tualeh agah jousiah a hahsiang a; agah tamsemna dingin. 3 Tuin nou na kiang ua thu ka gen jiakin na siangthou uhi. 4 Keimah ah omgige un, kei zong nou mauh ah ka omgige ding, aba grepgui a aom gige keileh amah guak a agah theihlouh mahbang in, nou zong keimah a na omgige kei uleh na gahthei kei ding uhi.

            5 "Kei grepgui ka hi a, nou abate na hi uh, kuahileh keimah a aom gige uleh kei amauh a ka omgige nate tampi in agah jel hi; ajiak keimahlou in bangmah a bawlthei kei uhi.

6 Mi keimah a aom gige keileh ba bangin paikhiat in a om a, avuljel hi, tualeh mi'n amauh a tomkhawm a, mei ah apai ua, a kangtum hi. 7 Keimah a na omgige ua tualeh ka thu zong noumauh a aom gige leh na ut ut uh ngen un, nou a dingin bawl a omjel ding hi. 8 Hi-ah ka Pa pahtawi in a om hi, tampi nagah na uah; tuachi'n ka nungjuite na hi ding uhi. 9 Pa'n kei ahung it mahbang in, ken zong nou kung it hi; ka itna ah omgige un. 10 Nou ka thupiakte najuih uleh ka itna ah na omgige ding uhi. Ken ka Pa thupiakte ka juih a a itna a ka omgige mahbang in.

11 "Ka kipakna nou a aom gige theihna ding leh, ka kipakna uh a bukim theihna dingin hih thute na kiang uah kung gen ahi. 12 Ken nou kung it bangin nou zong khat leh khat ki it un chih ka thupiak ahi. 13 Mi'n a lawmte ding a ahinna apiak sang a lianjaw itna kuaman anei kei hi. 14 Thu kung piak taphot nabawl uleh ka lawmte na hi ding uhi. 15 Tu a kipat in sila kung chinawn kei ding, ajiak sila in apu in bang abawl atheikei hi; lawmte kung chijaw ta ding, ajiak ka pa kiang a kazak jousiah nou kung hilhta hi. 16 Nou kei nung teljaw hi; pai a gah ding leh nagah uh omjing dingin, tualeh ka min a Pa kiang a nanget peuh uh a hung piak theihna dingin nou kungguat ahi. 17 Hih thute nou kungpia hi, khat leh khat ki it un.

Leitungmite huatna

            18 "Leitungmite'n nou ahung huat leh nou ahung huat ma in kei ahung huakhinta chih thei un. 19 Leitung a hile uchin leitung in amah a it ding hi; hinanleh leitung a hilou-a, leitung a kipan a kungtel khiatte na hihzawk jiak un leitung in nou ahung hua ahi. 20 'Sila apu sangin alianjaw kei chih na kiang ua kunggen theijing un.' Amau'n kei ahung thuaksak uleh, nou zong ahung thuaksak ding uhi; ka thugente ajuih uleh nou thugente zong ajui ding uhi. 21 Hinanleh ka min jiakin hih silte jousiah natung uah a bawl ding uhi, ahung sawlpa atheihlouh jiak un. 22 Kei hung pailou a akiang ua thu genlou hileng, khialhna neilou ding hi uh a, hinanleh tun a khialhna uh paulap ding aneita kei uhi. 23 Kuapeuh kei hung hua-in, Ka Pa zong ahua uh ahi. 24 Midang kuamah bawl ngailouh alak uah bawllou hileng, khialhna neilou ding hi ua, hinanleh tuin mu zong a hungmu ua, tualeh keileh ka Pa kanih un hua zong ahung hua uhi. 25 'Hinanleh hihpen amau'n ajiak bei in ahung hua uh,' chih a danbu ua kigelh thu a tangtunna ding a hung om ahi.

26 "Hinanleh Pa kiang a pat na kiang ua kung sawl ding, khamuantu, Pa a pat hungpawt, thutak Kha a hungtun chiangin, aman ka tanchin atheisak ding hi. 27 Tualeh atung a kipan a ka kiang a om nahih man un, nou zong na theisak ding uhi.

Johan 16

1 "Lungkia a na om louhna ding un hih thute na kiang uah ka gen ahi. 2 Kikhopna innte ah ahung notpot ding ua; ahi, kuapeuh nou hung that in Pasian tung a silhoih bawl in aki ngaihtuah ding uh, huachibang hun a hungtung ding hi. 3 Tualeh Pa leh kei ahung theihlouh man un, hih silte natung uah a bawl ding uhi. 4 Hinanleh ahun a hungtun chiang a huate kung hilhta chih na theihdokna ding un hih silte nou kung hilh ahi. Na kiang ua ka om jiakin hih thute atungin na kiang uah ka gen kei hi.

Khasiangthou nasep

            5 " Hinanleh tuin pen a hungsawlpa kiang a pai ding ka hi a; hinanleh kuamah in khoi a pai ding na hi? chi'n nung dong kei uhi. 6 Hinanleh hih thute na kiang ua ka gen jiakin na lungtang uh lunggimna in adimta hi. 7 Hinanleh thutak kung hilh ahi; ka paimang nou a dingin ahoih hi; ajiak ka paimang keileh Khamuantu na kiang uah a hungpai kei ding hi; ka pai leh na kiang uah kung sawl ding hi. 8 Amah a hungpai chiangin khialhna thu ah, diktatna thu ah tualeh vaihawmna thu ah leitung adiklouh dan atheisak ding hi. 9 Khialhna thu ah siamlouh a tangsak ding, kei a hung gintatlouh jiak un; 10 diktatna thu ah siamlouh a tangsak ding, ka Pa kiang a pai a nungmuh nawnlouh ding jiak un; 11 vaihawmna thu ah siamlouh a tangsak ding, hih leitung lal vaihawm sak a aom tak jiak in.

            12" Na kiang uah gen ding thu tampi kanei nalai a, hinanleh tuin na puajou naikei uh. 13 Bangteng hileh thutak Kha a hungtun chiangin, aman nou thutak tengteng ah ahung lamkaih ding; ajiak ama phuah thu in thu a genkei ding, a, hinanleh ajak taphot agenjaw ding; tualeh sil hungtung dingte ahung musak ding hi. 14 Aman kei a hung pahtawi ding; ajiak keimah a ala ding a, nou ahung musak ding hi. 15 Pa silneih jousiah kei a ahi; tuajiakin keimah a ala ding a, nou ahung musak ding, ka chi ahi.

Dahhuaina leh kipak-huaina

            16 "Tomkhat nou kei nung mukei ding ua a, tualeh tomkhat zoh in nou kei nung mukik ding uh, Pa kiang a kapai ding jiakin," achi hi.

            17 Tuachi'n a nungjuite khenkhat in, "Tomkhat nou nung mukei ding uh, tualeh tomkhat zoh in nou kei nung mukik ding uh, 'Pa kiang a kapai ding jiakin,' ikiang a achih bang achihna ahia? chi'n aki hou ua. 18 Tuajiakin amau'n hih a thugen 'tomkhat,' achih bang achihna ahia!" achi ua.

            19 Tualeh amah a dong nuam uh chih Jesu'n athei a, akiang uah, " 'Tomkhat nou kei nung mukei ding ua, tualeh tomkhat zoh chiang nou kei nung mukik ding uh,' chi-a ka gen naki dongtuah uh maw? 20 Adiktak in, adiktak in kung hilh ahi: nou nakap ding ua na sun ding uh; hinanleh leitung a kipak ding; nou na lungkham ding ua; na lungkhamna uh kipakna asuak ding hi. 21 Numei anau in apehlai in a lungkham a, ahun atuntak jiakin; hinanleh nau asuahzoh takin a lungkhamnate athei nawn kei hi, mihing khat leitung a ahung pian kipakna jiakin. 22 Tuajiakin tulaitak in lungkhamna nanei uhi, hinanleh nou kung mukik ding a, na lungtang uh akipak ding; tualeh na kipahna uh kuaman ahung laksak kei ding hi.

            23 "Tualeh huani chiangin nou bangmah nung ngen kei ding uh, adiktak in kung hilh ahi, kamin a Pa kiang a na nget uh khat peuh Aman ahung pia ding hi. 24 Tutan in kamin in nou bangmah na ngen naikei uh; ngen un, namu ding uh, na kipak uh a kimna ding in.

Leitung zohna

            25 "Hih thute ahem in na kiang uah ka gen hi; hinanleh ahem a na kiang ua thu gennawnlou a, Pa tungtang chiantak a kung theihsak ding hun tung ding ahi ta. 26 Huani chiangin kamin in nung ngen ding uh; nou dingin Pa ka ngen ding chi ka hikei hi, 27 ajiak nou kei nung it ua, tualeh Pa a kipan a hungpai ka hih na gintak jiak un Pa amah in zong nou ahung it hi. 28 Pa a kipan a hung paikhia a, leitung a hungpai ka hi, tualeh leitung nusia a Pa kiang a paikik ding ka hi," achi hi.

            29 Anungjuite'n akiang ah, "Ngaiin tuin ahem in nagen kei a, chiantak in nagenta hi. 30 Tualeh tuin pen sil bangkim nathei a, kuamah in ahung dok na kiphamoh kei chih ka theichianta uh; hih jiakin Pasian a kipan a hungpai nahi chih ka gingta uhi," achi ua.

            31 Jesu'n amauh adawng a, "Tuin na gingta uh maw? 32 Ngai-un, a hun a hungtung ding; ahi, tuin zong a tungta, michih na inn chiat uah na kikhenthang ding ua; keiguak in nung nusia ding uh; hinanleh Pa ka kiang a aom jiakin keiguak ka hikei hi. 33 Keimah a khamuanna naneih na ding un hih thute na kiang uah ka gen ahi. Leitung ah thuakgimna nanei ding uh; hinanleh kipaktak in om un ken leitung ka zouta hi!" achi hi.

Johan 17

Jesu’n nungjuite a dingin a thumsak

1 Hih thute Jesu'n agen a, tualeh vanlam nga in adak a, "Pa, ahun a tungta, na Tapa pahtawi in, na Tapa in zong nangmah ahung pahtawi theihna dingin. 2 Tualeh nangmah in akiang a napiak jousiahte tangtawn hinna apiak theihna ding a mi jousiah tung a thuneihna napiak bangin. 3 Tualeh hih ahi tangtawn hinna, nang Pasian diktak guak leh nasawl Jesu Krist atheih uh. 4 Leitung ah namin ka pahtawita, bawl ding a nung piak na kasem jouta hi. 5 Pa aw! Tuin leitung omma a na kiang a kaneih pahtawina in nang mah kiang ah hung pahtawi in.

            6 "Leitung a kipan a nung piakte kiang ah namin ka langsakta hi. Amauh nang a ahi a, nang kei nungpiak ahi; tualeh nathu ajuita uhi. 7 Nang ka kiang a nungpiak jousiah nangmah a kipan ahi chih atheita uhi. 8 Ajiak nang thu nung piakte akiang uah ka pia a, amau'n zong asangta uh, tualeh chiantak in nang a kipan a pawt ka hi chih atheita ua, nung sawl ahi chih agingta ta uhi.

            9 " Amauh a dingin ka ngetsak hi. Leitung a ding ka ngetsak kei a, nang nungpiakte a dingin ka ngetsakjaw hi; ajiak amauh nang a ahi uhi. 10 Tualeh keia jousiah nang a ahi a; nang a jousiah kei a ahi; tualeh amau uah pahtawiin ka om hi. 11 Tuin kei leitung ah ka omsawt nawn kei ding, hinanleh hihte leitung ah a om ding uh, kei na kiangah hung pai ding ka hi. Pa siangthou! Ei pumkhat ihih mahbang a amauh zong pumkhat a hihtheihna ding un, nang nungpiakte na min in kem in. 12 Leitung a amauh tawn ka omsung in na min in amauh kakem a, Pasian Laisiangthou tangtun theihna dingin mangthang tapa loungal khatbek a mangthang kei uhi. 13 Tuin na kiang ah hungpai ding ka hita, tualeh amau ua ka kipahna abukim theihna dingin hih silte leitung ah ka gen ahi. 14 Na thu leitung ah ka piata a, leitung in amauh ahua hi; kei leitung a ka hihlouhjiak a amauh zong leitung a ahihlouh jiak u. 15 Amauh leitung a kipan a lamang dingin kung ngen kei a, hinanleh migiloupa a pat a veng ding in kung ngen ahijaw hi. 16 Amauh leitung a ahi kei uh, kei leitung a ka hihlouh mahbang in. 17 Na thu in amauh susiangthou inla; na thu thutak ahi. 18 Kei leitung a nungsawl mahbang in ken zong amauh leitung ah kasawl hi. 19 Amauh jiakin kaki hihsiangthou hi.

            20 "Hihte guak a dingin kungngen kei a, hinanleh athujiak ua kei hung gingta dingte a dingin zong kung ngen hi. 21 Pumkhat ahihtheihna ding un; Pa, nang keimah a na om a, kei nangmah a ka om mahbang a amauh zong eimah a pumkhat ahihtheihna ding un; tualeh nang nungsawl chih leitung in agintat theihna ding un. 22 Tualeh nang nung piak thupina amauh ka piata hi; ei pumkhat ihih bang a amauh zong pumkhat ahih theihna ding un: 23 Kei amauh ah, nang kei ah, pumkhat a mauh hih bukim a aom theihna ding un; tualeh nang nungsawl a, kei nung it bangin amauh na it chih leitung in athiehna ding un.

24 "Pa aw! Nang kei nung piakte zong ka omna a kei tawh om dingin ka deih hi; nung piak thupina a muhtheihna ding un; ajiak nang leitung pianma pek in kei nung it hi. 25 Pa diktak aw! Leitung in nang ahung theikei a, hinanleh ken kungthei hi; tualeh nang nungsawl ahih hihte'n atheita uhi. 26 Tualeh akiang uah namin ka theisakta a, ka theisakjel ding; keimah nung itna akiang uah a omtheihna ding leh, kei amauh ua ka omtheihna dingin," achi hi.

Johan 18

Jesu mat a omna

(Mat. 26.47-56; Mrk.14.43-50’ Luk. 22.47-53)

1 Jesu'n hih thute agen khat in a hungjuite tawh apawt ua, Kidron luiguam akan ua; huasan ah huan khat aom a, hua-ah a nungjuite tawh alut uhi. 2 Tualeh Jesu a nungjuite tawh hualam a avakjel jiakin, a mansakpa Juda in zong huamun athei a. 3 Tuachi'n Juda in siampite leh Pharisaite a pat galkap pawl leh miman lamkaite zohpih in, maivakte leh meiselte leh galvante tawiin huasan ah a hungtungta hi. 4 Tuajiakin Jesu'n atung a sil tung ding jousiah thei in apawtkhia a, akiang uah, "Kua ahia nazon uh?" achi hi.

            5 Amau'n adawng ua, "Nazareth Jesu", achi ua. Jesu'n akiang uah, "Kei ka hi", achi a.

            Tualeh a mansakpa Juda zong akiang uah ading hi. 6 Tualeh akiang ua keimah ka hi achih takin anungtawn ua, leiah apuk uh hi. 7 Tuachi'n aman, "Kua ahia nazon uh?" chi'n adong kik a.

            Amau'n, "Nazareth Jesu," achi ua.

            8 "Jesu'n adawng a, keimah ka hi chi'n kung hilhta; tuajiakin kei hung zong nahih uleh hihte paisak un," achi a. 9 "Nang nung piakte khat zong ka mansuah kei,"chia aman agen a tangtun theihna dingin.

            10 Tuachi'n Simon Peter in namsau khat aneih adokkhia a, siampi silapa asat a, abil jiatlam a satkhiat sak hi. Silapa min Marka ahi. 11 Tuachi'n Jesu'n Peter kiangah, "Na namsau apaiah siat in! Ka Pa'n nou a hungpiak pen dawnlou ding ka hi hiam?" achi hi.

Jesu Anna mai ah

            12 Tuachi'n galkap pawlte leh a lamkaite ulah Judah lamkaite'n Jesu a man ua, ahen uh a, 13 a masapen in Anna kiang ah a zohpih ua, amah huakum a siampi a pang Kaiapha sungpa ahih jiakin. 14 Tualeh Kaiapha pen mipite tang a mikhat sih ahoih hi, chia Judahte kiang a hilhpa ahi.

Peter kitheihmoh bawlna

(Mat. 26.69,70; Mrk.14.66-68; Luk.22.55-57)

            15 Tualeh Simon Peter in Jesu ajui a, tuachimah bangin nungjui dangte'n zong ajui hi; tua nungjuipa pen siampi meltheih ahi a, siampi huang sung ah Jesu tawh alut khawm a, 16 hinanleh Peter apulam ah kong khat bul ah ading hi. Tuachi'n nungjui dang siampi meltheihpa ava pawt a, kongkhak ngaknu kiang ah agen a, Peter ahung lutpih hi. 17 Tuachi'n sila kongkhak ngak nungaknu in Peter kiang ah, "Nang zong hihpa nungjuite lak a khat hilou na maw?" achi hi.

Aman ka hikei achi hi.

            18 Tualeh silate leh lamkaite huasan ah ading ua, avot jiakin suang meihol atoh ua a awi uhi. Tualeh Peter zong amauh tawh ding khawm in mei a awi hi.

Siampi-in Jesu adokna

(Mat. 26.59-66; Mrk. 14.55-56; Luk.22.66-71)

            19 Tualah siampi-in a nungjuite tungtang leh a thuhilhna tungtang adong a. 20 Jesu'n adawng a, "A langtang in leitung ah thu ka gen a, Judahte omkhawm jingna kikhopna inn leh tempul ah thu ka hilh jing hi. Aguk in bangmah ka gen kei hi. 21 Bangding a kei hungdong nahia? Akiang ah dongin, amau'n ka gen athei uhi," achi hi.

            22 Tualeh hihbang thute agenzoh in akiang a ding lamkai khat in akhut in Jesu abena a, "Siampi huachi bangin na dawng maw!" achi a. 23 Jesu'n adawng a, "Thu gilou ka genleh, agitlouhna hung theisak in; hinanleh ahoih ka genleh bangding a hung beng nahia?" achi a.

            24 Tuachi'n Anna in amah kansa in siampi Kaiapha kiang ah asawlta hi.

Peter in Jesu a kitheihmoh bawl nihveina

(Mat. 26.71-75; Mrk.14.69-72; Luk.22.58-62)

            25 Simon Peter in dingin mei a awi a, tuajiakin amau'n akiang ah, "Nang zong nungjuite lak a khat hilou namaw?" achi ua.

            Aman aki theihmoh bawl a, "Ka hikei," achi a.

            26 Tualeh Peter in abil asatkhiat sakpa sanggam siampi silate khat in, "Huan ah amah tawh na omkhawm uh hungmu hilou ka maw?" achi a.

            27 Tuachi'n Peter in, "Ka hikei," chi'n a kitheihmoh bawl kik a, tuachi'n ak akhuang paita hi.

Jesu Pilat mai ah

(Mat. 27.1,2,11-14; Mrk.15.1-5; Luk. 23.1-5)

            28 Tuachi'n amau'n Jesu Kaiapha inn a pat in vaihawmna inn ah apaipih ua; jingsang matak ahi a; hinanleh amauh vaihawmna innsung ah alutkei uhi; atuachih keileh aki hihnin kha ding ua, paikan ankuang a umthei kei kha ding uhi. 29 Pilat akiang uah a hungpawt a, "Hih hekna bang ahia naneih uh," achi a. 30 "Amah mi gilou hikeileh na kiang ah hung piakhialou ding ka hi uh," achi ua.

            31 Tuachi'n Pilat in akiang uah, "Paipih unla, nadan dungjui un athu vaihawmsak un," achi hi.

            Tuajiakin Judahte'n akiang ah, "Kou kuamah thahtheihna ding dan ka neikei uhi," achi ua. 32 Hih ahihleh bangchi bang a asih ding thu Jesu'n agen a tangtun theihna dingin ahi.

            33 Tuachi'n Pilat vaihawmna innsung ah alut kik a, Jesu asam a akiang ah, "Judate kumpipa namaw?" achi a.

34 Jesu'n adawng a, "Hih nangmah lungsim a hungsuak nagen ahia ahihkeileh midang in ka tungtang thu ahih a hunghilh ahia?" achi a.

            35 Pilat in adawng a, "Kei Judami ka hi hiam? Na chipihte leh siampite'n nang ka kiangah ahung piakhia ahi; bang ahia nabawl tak?" achi hi.

            36 Jesu'n adawng a, "Ka kumpi gam hih leitung ah ahikei, ka kumpi gam hih leitung ah hitaleh Judahte khut ah piakkhiat ka hihlouhna dingin ka silate'n adou ding uhi. Hinanleh ka gam pen hih ahi naikei hi!" achi hi.

            37 Tuajiakin Pilat in akiang ah, "Ahihleh kumpipa na hi hiam?" achi a.

            Jesu'n adawng a, "Kumpipa, na chihpen mah ka hi. Tualeh hih ding a piang ka hi a, tualeh thutak theihpih ding a leitung a hungpai ka hi. Kuapeuh thutak a om taphot in ka aw aja uhi," achi hi.

Jesu siding a thutanna

(Mat.27.15-31; Mrk. 15.6-20; Luk.23.13-25)

            38 Pilat in akiang ah, "Thutak bang ahia?" achi a.

            Tualeh hihthu agenzoh in Judate kiangah apawt kik a, akiang uah, "Amah ah diklouhna bangmah ka mukei hi. 39 Hinanleh paikan ankuang luini a mikhat kung khahsak ding ahi chih tawndan khat nanei uh; tuajiakin Judate kumpipa hung khahkhia leng na ut uai?" achi a.

            40 Tuachi'n aun un akikou ua, "Hihpa hilou in! Barbara pen!" chi in. (Barabba ahihleh suamhatmi ahi.)

      

Johan 19

Pilat in Judate thu ajui

1 Tuachi'n Pilat in Jesu a paipih a, ajepta a. 2 Tualeh galkapte'n linglukhu a pan ua, puan sandup asilhsak uhi. 3 Tuachi'n, "Chibai Judate kumpipa!" achi ua, akhut un aben uhi.

            4 Tuachi'n Pilat a pawt kik a akiang uah, "Ngaiun, amah ah diklouhna ka mukei chih na theihna ding un na kiang uah kung paipih hi," achi hi. 5 Tuachi'n Jesu linglukhu khu-in leh puan sandup silh in ahung pawtkhia a, Pilat in akiang uah, "En un! Mihing!" achi a.

            6 Tuajiakin siampite leh lamkaite'n amah amuhtak un, "Kross ah kilhden in! kross ah kilhden in!" achi ua. Pilat in akiang uah, "Nou paipih unla, kilhden un, ajiak ken amah ah diklouhna ka mukei hi," achi hi.

            7 Judate'n amah adawng ua, "Dan khat kanei uh, Pasian Tapa a akibawl jiakin ka dan dungjui un sitak ahi," achi ua. 8 Tuajiakin Pilat in hua thu ajaktak in alau semsem ta a. 9 Tualeh vaihawmna innsung ah alut kik a, Jesu kiangah, "Khoisan a hung kipan nahia?" achi a.

Hinanleh Jesu'n adawng kei hi.

10 Tuachi'n Pilat in akiang ah, "Ka kiangah thu genlou ding maw? Kross ah kilhden theihna leh khahkhiat theihna nei ka hi chih theilou namaw?" achi hi.

            11 Jesu'n adawng a, "Tunglam a kipan a piak hikei lechin ka tungah bangmah bawltheih na neikei ding hi. Tuajiakin na kiang a hung piakhia pa'n khialhna alian neihjaw hi," achi hi.

            12 Tuanung siah Pilat in Khahkhiat asawm a, hinanleh Judate'n, "Hihpa na paisak leh Kaisar lawm na hikei ding! Kuahileh amah leh amah kumpipa a kibawl tuh Kaisar dou ahi!" chi'n aki kou ua.

            13 Tuajiakin Pilat in huathu ajaktak in Jesu ahung paikhiatpih a, tualeh "Vaihawmna suanglep" (Hebrai ham a "Gabbatha") kichi tungah atou a. 14 Tualeh tuani pen paikan kut kigin kholhni ahi a, dak gukna tuam ahi; tualeh aman Judate kiang ah, "En-un, na kumpipa uh!" achi a.

            15 Hinanleh amauh aki kou ua, "Paimangpih in! Paimangpih in! Kross ah kilhden in!" achi uhi.

            Pilat in akiang uah, "Na kumpipa uh ka kilhden ding maw?" achi a. Siampite'n, "Kaisar loungal kumpipa dang ka neikei uh!" chi'n adawng uhi.

            16 Tuachi'n aman amah kross a kilhden dingin akiang uah a piakhiata a, tuachi'n amau'n Jesu atu ua, a paipihta uhi.

Jesu kross a kilhdenna

(Mat. 27.32-44; Mrk.15.21-32; Luk.23.26-43)

            17 Tualeh aman a kross kipuak in "Luguh mun," kichi (Hebrai ham in "Golgotha" kichi) mun ah apai a. 18 Huasan ah amah midang nih tawh kross ah a kilhdenta ua, ageiah khattuak, Jesu alai ah. 19 Tualeh Pilat in lai agelh a, kross tung ah atak a, a laigelh ahihleh: "NAZARETH JESU, JUDATE KUMPIPA," chih ahi. 20 Tuachi'n hih lai Judate tampi'n asim ua; Jesu akilhden na uh khuapi gei ahihjiak in. Tualeh hihpen Hebrai ham, Grik ham leh Latin ham a kigelh ahi. 21 Tuajiakin Judate siampite'n Pilat kiang ah, " 'Judate kumpipa ka hi achi, chi'n gelhjaw in, ' " achi ua.

            22 Pilat in adawng a, "Ka gelhkhitsa, ka gelhkhitsa ahi," achi hi.

23 Tuachi'n Jesu kross a a kilhden zoh un galkapte'n apuan silhte ala ua, khatchiat a atan ding un phelli asuah ua, tualeh apuan-ak zong ala uh; apuanak akhuina bei ahi a, a ngawng a pat apum a gat ahi. 24 Tuajiakin amau'n, "I botkek kei ding a; kuatan ding chih ai isan ding uh," chi'n a kihou ua. Pasian Laisiangthou in,

            "Ka puansilhte aki hawm ua,

Ka puan-ak dingin ai asan uh,"

chih ahung tangtunna dingin.

Tuajiakin hih silte galkapte'n abawl uhi.

            25 Tualeh Jesu kross gei ah anu leh anu sanggamnu Mari Kleopa zi leh Mari Magdalini ading ua. 26 Tuajiakin Jesu in anu leh a nungjui a itpa akiang a ding amuh in anu kiang ah, "Numei, en-in na tapa," achi hi.

            27 Tuachi'n nungjuipa kiangah, "En in nanu," achi a. Hua a kipan in tua nungjuipa'n a inn ah apuita hi.

Jesu sihna

(Mat. 27.45-56; Mrk. 15.33-41; Luk. 23.44-49)

            28 Hih nungin Jesu'n sil bangkim tuin zohsiang ahita chih thei in Pasian Laisiangthou thu a tangtun na dingin, "ka dang atak," achi a.

            29 Huasan ah bel uain thuk a dim khat akitung a, sponzi khat uain thuk in adiah dim ua, tualeh hussop chiangah atak ua, akam ah akoihtou uhi. 30 Tuachi'n Jesu'n uain thuk adawn zoh in, "Zoh ahita!" achi a.

            Tuachi'n alu akun a, a Kha akhahta hi.

            31 Tuajiakin Judate'n, kiginni ahih jiakin aluangte uh khawlni a kross dawn a aom louhna dingin, ajiak khawlni pen ni thupi ahi a. Pilat kiangah a kengte uh hihtansak a, aluang uh lakmang dingin a ngen ua. 32 Tuachi'n galkapte a hungpai ua, aki kilhdenpih tuak masakpen leh khat pen akeng ahih tansak ua. 33 Hinanleh Jesu kiang ahung phak un ana sikhinta chih ahung mu ua, akeng ahihtansak kei uhi. 34 Hinanleh galkapte lak a khat in teipi-in anak adawt a, tuachi'n sisan leh tui ahung pawtkhia hi. 35 Tualeh hih mupa'n atheihpihta a, athu theihsak adik ahi; tualeh na gintat theihna ding un agendik hi chih atheita hi. 36 Ajiak Pasian Laisiangthou ah: "Aguh khat zong suktan ahi kei ding," chih a tangtun theihna dingin, hih silte a hung omta hi. 37 Tualeh Pasian Laisiangthou dang in, "Amau'n adawtpa uh a en ding uh," achi hi.

Jesu vuina

(Mat. 27.57-61; Mrk . 15.42-47; Luk. 23.50-56)

            38 Hih nungin, (Joseph, Arimathai khua a mi, Judate lau jiaka aguk a Jesu nungjui in Jesu luang alak theihna dingin Pilat kiangah ava ngen a.) Pilat in ana phal a, tuajiakin amah a hungpai a, Jesu luang alata hi. 39 Tualeh Nikodem, atu'ng a jan a Jesu kiang a hungpaipa zong ahung pai a, murah leh aloe bawm sawmnga vel a hungtawi a. 40 Jesu luang ala ua, Judate kivui ngaina bangin sil namtui leh puan malngat in atuam uhi. 41 Tualeh kross a akilhden na mun uah huan khat a um a. 42 Tuajiakin Judate kiginni ahih jiakin huasan ah Jesu asialta uh, han naitak ahih jiakin.

Johan 20        

Han guak

(Mat. 28.1-8; Mrk. 16.1-8; Luk. 24.1-12)

1 Nipikal ni masapen in, jingsang baihtak khuamial nalai in, Mari Magdalini han ah avapai a, tualeh han a kipat suang ki lakhia in amuta a. 2 Tuachi'n atai a Simon Peter leh nungjui dang Jesu'n a itpa kiangah a hungpai a, akiang uah, "Han a kipat in Toupa a lamangta ua, khoisan a akoih uh ka theikei uh!" achi hi.

            3 Tuachi'n Peter a pawtkhia a, nungjui dang tawh han lam juanin a hungpai ua. 4 Tuachi'n ataituak ua, nungjui dang in Peter a makhelh a han a hungtung masa hi. 5 Tualeh aman kun in a en a, puan malngat om amu a, ahihhang in asung ah alut kei hi. 6 Tuachi'n Simon Peter in a nung ah ahungjui a, hansung ah alut a, puan malngatte amu hi. 7 Tualeh a lutuamna kinawtna puan pen puanmalngat tawh omkhawm lou a atuam a munkhat a kijial a om amu hi. 8 Tuachi'n nungjui dang hantung masapen zong asung ah alut a, tualeh amu a, ataksanta hi. 9 Ajiak amau'n misi lak a kipan a thoukik ding ahi chih Laisiangthou athei naikei uhi. 10 Tuachi'n nungjuite amauh inn lam ah a paikikta uhi.

Jesu Mari Magdalini kiang a kilakna

(Mat. 28.9,10; Mrk. 16.9-11)

            11 Hinanleh Mari pen han pualam ah ading a; tualeh akah pum in akum a, hansung a en a. 12 Tualeh Jesu luang kisialna mun ah puanngou silh vantungmi nih khat alukhung ah khat a khekhuantaw ah tou in amu hi. 13 Tuachi'n amau'n akiang ah, "Numei bangding a kap nahia?" achi ua. Amahnu'n akiang uah, "Ka Toupa a lamangta ua, tualeh a koihna uh ka theihlouh jiakin!" achi hi.

            14 Tuachia agenzoh in a kinunghei a, Jesu ding amu a, hinanleh Jesu ahi chih atheikei hi. 15 Jesu'n amahnu kiang ah, "Numei bangding a kap nahia? Kua ahia nazon?" achia hi.

            Amahnu'n huan vengpa sa in akiang ah, "Hihsan a pat amah na puakmang ahihleh na koihna hunghilh in, tuachi'n amah ka la ding," achi hi.

            16 Jesu'n amahnu kiangah, "Mari!" achi a.

            Amahnu akihei a akiang ah Hebrai ham in "Rabboni!" achi a, (Huapen "Siapa" chihna ahi hi.)

            17 Jesu'n amahnu kiang ah, "Hungtu ken, ajiak ka Pa kiangah ka paitou nai kei hi, hinanleh ka sanggamte kiangah pai inla, akiang uah ka Pa, na Pa uh, tualeh ka Pasian, na Pasian uh kiangah paitou ding ka hi chi in vahilh in," achi hi.

            18 Mari Magdalini a hungpai a, Toupa amuh thu leh hih silte akiang ah agen hi chih ahilhta hi.

Nungjuite kiang a Jesu kilakna

(Mat. 28.16-20; Mrk. 16.14-18; Luk. 24.36-49)

            19 Tuachi'n tuani mah nipikal ni masapen nitak in Judate lau jiak a nungjuite omna kongte kikhak nungin Jesu ahung pai a, akiang uah, "Nakiang uah khamuannaom hen," achi a. 20 Tuachia achih zoh in akhutte leh anak akiang uah alah a. Tuachi'n nungjuite'n Toupa amuh tak un a kipakta uhi. 21 Tuachi'n Jesu'n akiang uah, "Na kiang uah khamuanna om hen. Ka pa'n kei a hungsawl mahbang in ken zong nou kungsawl hi." 22 Tuachi'n hih thu aman agen zoh in, atung uah ahu akhahkhum a, akiang uah, "Khasiangthou tangta un. 23 Kua khialhna zong na ngaihdam taphot uh ngaihdam louh taphot uh ngaihdam louh ahi ding," achi hi.

Jesu leh Thoma

            24 Hinanleh Thoma, Didum a kichi, sawmlehnihte lak a khat, Jesu hungpai laiin akiang uah a om kei a, 25 Tuajiakin nungjui dangten aking ah, "Toupa ka muta uh!" achi ua.

            Hinanleh aman akiang uah, "Akhut a sikkilhna mapawnte ka muh a, sikkilhna sunga ka khutzung ka guan a, tualeh anak a ka khut ka guan keileh ka gingta kei ding," achi hi.

            26 Tualeh nigiat nungin nungjuite innsung ah aom kik ua, Thoma zong akiang uah a om a; kongkhakte khak hinapi'n Jesu a hungpai a, alai uah ahung ding a, "Na kiang uah khamuanna om hen," achi a. 27 Tuachi'n aman Thoma kiangah, "Na khutzung in hungsawk inla, ka nak sawk in; gingta lou in om kenla, gingta mai in!" achi hi.

            28 Thoma in adawng a akiang ah, "Ka Toupa leh ka Pasian!" achi a.

            29 Jesu'n akiang ah, "Thoma, nang nungmuh jiak a na gintat ahi a; mulou a gingtate ahampha uhi!" achi hi.

Johan tangthupha kigelhna jiak

            30 Tualeh hih laibu a kigelhlou sillamdang tampi Jesu'n a nungjuite maiah abawl hi. 31 Hinanleh hihte nou Jesu pen Krist, Pasian Tapa ahi chih na gintat na ding uleh na gintat jiak ua amin a hinna naneih na ding ua kigelh ahi.

Johan 21

Tiberia tuippi a nungjuite kiangah Jesu kilakna

1 Hih silte khit in Jesu Tiberia tuipi a nungjuite kiangah a kilakkik a; hichi bangin akilak hi. 2 Simon Peter tawh, Thoma, (Apeng kichipa) tawh (Galili gam a Kana khua a om) Nathanael tawh Zebedi tapate tawh, tualeh a nungjui nihte om khawm ahi ua. 3 Simon Peter in akiang uah, "Nga man in ka pai ding," achi a.

            Amau'n akiang ah, "Kou zong kungjui ding uh," achi ua. A paikhia ua, gunkuang sung khat ah atoupai ua; tuajan in bangmah aman kei uhi. 4 Hinanleh jingsang ahunghih in Jesu tuipi piau ah ading a; ahih hangin nungjuite'n Jesu ahih atheikei uhi. 5 Tuachi'n Jesu'n akiang uah, "Naute, nek ding banghiam khat nanei uhiam?" achi a.

            Amau'n, "Neilou," chi'n adawng ua.

6 Aman akiang uah, "Gungkuang jiatlam pang ah nangen uh khuh un," tamlou na man ding uh, achi a. Tuajiakin amau'n akhuh ua, nga atam mahmah jiakin a kaikhia jou nawn kei uhi.

            7 Tuajiakin Jesu'n a it nungjuipa'n Peter kiangah, "Toupa ahi!" achi a. Tualeh Simon Peter in Toupa ahi chih ajaktak in apuan-ak asilh a (puan silhlou a om ahih jiakin). 8 Hinanleh nungjui dangte ngen a ngasa kaikawm in, gunkuang new khat in a hungpai ua, ajiak piaugei a pat a gamla kei ua, tong janih vel ahi. 9 Tualeh piaugaw a hungtun un suang meihol a mei kitawh leh atung a ngasa leh tanghou kikoih amu ua. 10 Jesu'n akiang uah, "Tua a na ngasa matte uh hungtawi un," achi a.

            11 Simon Peter a paitou a ngasa lianpipi ja leh sawmnga leh thum a dim ngen pen piaugaw ah ahung kaikhia a, tam mahmah nanleh a ngen a kek kei hi. 12 Jesu'n akiang uah, "Hungpai unla jing an hungne un," achi a. A nungjuiten Toupa ahi chih theih jiak un kuaman, "Kua nahia?" achi ngam kei uhi. 13 Tuachi'n Jesu a hungpai a, tanghou ala a, akiang uah apia a, tuachimah bangin ngasate zong apia hi.

14 Hih pen Jesu'n sihna a pan a athohkik nung a a nungjuite kiang a akilak a thumveina ahi.

Jesu leh Peter kihouna

            15 Tuachi'n ajing an uh anek zoh un Jesu'n Simon Peter kiangah, "Simon, Jona tapa, nang hihte sangin kei nung itjaw hiam?" achi a.

            Aman akiang ah, "Hi, Toupa, kung it hi chih nathei hi", achi a. Aman akiang ah, "Ka belam noute vak in," achi hi. 16 Aman anihveina in akiang ah, "Simon, Jona tapa, nang kei nung it hiam?" achi a.

            Aman akiang ah, "Hi, Toupa, kung it hi chih nathei hi," achi a.

            Aman akiang ah, "Ka belamte chingin," achi hi. 17 Aman a thumveina in akiang ah, "Simon, Jona tapa, nang kei nung it hiam?" achi a.

            Aman a kiang a a thumveina, nang kei nung it hiam achih jiakin Peter a lungkham a. Tuachi'n aman akiang ah, "Toupa nang siljousiah nathei a; kung it hi chih nathei hi!" achi a.

            Jesu'n akiang ah, "Ka belamte vak in, achi a. 18 Adiktak in kung hilh ahi, na naupan laiin nang leh nang nakawng na kigak a, na utna lamlam ah na paijel; hinanleh nung upat chiangin na khut najak ding a, mi'n nakong ahung gaksak ding a na utlouhna lamlam ah a hungkai ding hi," achi hi. 19 (Hih pen aman bang chibang sihna in ahia Pasian apahtawi chih theihsakna ding a agen ahi.) Tualeh hih agen zoh in aman a kiangah, "Hungjuiin!" achi hi.

            20 Tuachi'n Peter aki nunghei a, nung jui Jesu'n a it, nitak an nekna a zong a awm a ki-ngam a, "Toupa, kua ahia nang hung mansak ding?" chipa in hungjui in amu a. 21 Peter in amah amuh in Jesu kiangah, "Hinanleh Toupa, hihpa la bangchi?" achi hi.

            22 Jesu'n akiang ah, "Kungpai masiah dam a aom ka deihleh hua nang a dingin bang ahia? Nang hungjui in!" achi hi.

23 Tuachi'n hua nungjuipa a sikei ding chi'n hihthu kigen a sanggamte lak ah athang vengvungta a; Jesu'n lah akiang ah asikei ding achi kei a, "Hinanleh kungpai masiah om dingin deihleng hua nang a dingin bang ahia?" a chijaw ahi.

            24 Hih silte theisak leh gelh nungjui pen hihpa ahi; tualeh ath theisak adik ahi chih ithei uhi.

Thukhitna

            25 Tualeh Jesu'n abawl sildang tampi zong aom a, tuate aban ban a gelh khitsiang ding hitaleh laibu kigelh dingte jousiah leitungin zong dawllou dingin ka ngaihtuah hi, Amen.