Ephasate

EPHASATE

KIANG A SAWLTAK PAUL LAIKHAK

Ephasate 1

Chibai Bukna

1 Paul, Pasian deihdan a Jesu Krist sawltak, Ephasa khua a om misiangthoute leh Jesu Krist a mi gin-omte kiangah:

2 Pasian I Pa uleh Toupa Jesu kiang a kipan hehpihna leh khamuanna na kiang uah om hen.

Krist a khalam gualjawlna

3 Van munte a Krist a khalam gualjawlna a hung gualjawlpa i Toupa Jesu Krist Pa leh Pasian phat in om hen! 4 Ama mai a siangthou leh dembei a i omtheihna ding a, leitung kisiam masang a, itna a Krist a ahung natel dungjui in. 5 Ama kipakna leh deihlam bang in, Jesu Krist jiak a amah a ding a ta a bawl dingin ahung na guatkholhta hi. 6 Ahehpihna thupidan pahtawi dingin, hua hehpihna a a it mahmahpa ah ahung bawlta hi! 7 Amah ah a sisan jiakin tatkhiakna inei a, ahehpihna hauhdan dungjui a I khialhnate ngaihdamna, 8 hua hehpihna ah aman, pilna jousiah leh lam-etna jousiahin ahung vukta hi! 9 Aman a kipakna bang a amah a bawl atup a lunggel thugu’k i kiang a hungtheisak hi. 10 Hunbi khenna ahung tunkim chiang a amah ngeiin van a sil omte leh, leitung a sil omte a un a Krist a akhopkhawm chiang in.

            11 Ama deihdan thuhilhna bangjel a sil jousiah bawlpa tup bang a guatkholhsa in, amah ah gouluah ding a siam i hi uhi. 12 Ei Krist na gingta masate, athupina pahtawina I hihtheihna ding in !

            13 Amah ah nou zong thutak thu na hundamna thu uh na ngaihkhiat ua, na gintat nung un, amah a chiamsa Khasiangthou a chiamteh in na om uhi. 14 Khasiangthou pen Pasian thupidan pahtawina ding a, gou leisa tatkhiatna hun masang a ding a i gouluah ding uh khamna ahi!

Paul Thumna

            15 Tuajiakin Toupa Jesu a na ginna uh leh misiangthoute tung a na itna uh ka najak in, 16  ka thumna ah na minte uh lou in, noujiak a kipahthu gen ka tawp kei hi 17 i Toupa uh Jesu Krist Pasian, thupina Pa in amah theihna lam thu ah pilna leh kilakna kha nou a hungpiak theihna ding in. 18 Na lungsim mitte uh hihvak a ahung om a, asapna kinepna bang, misiangthoute a agoutan ding thupina hauhdan bang, 19 tualeh asil bawltheihna hatna nasep dungjui a ei a gingtate lam a asil bawltheihna a thupidan nung theihtheihna ding un. 20 Misi lak a kipan a kaihthoh lai, tualeh van munte a ajiatlam a atou lai, 21 lalnate, sil bawl theihnate, thuneihnate leh, hih leitung guak hilou a, leitung hung tung ding ah zong min kiphuah jousiah tunglam pek a atousak lai a Krist a abawl pen.22 Tualeh aman sil jousiah akeng nuaiah a koihta a, amahpen sil jousiah tung a lutang hiding in, saptuam kiang ah apia hi. 23 Tuapen a pumpi ahi, a bukimna, bangkim jousiah dimsakpa ahi.

Ephasate 2

Sihna a pan hinna

1 Tualeh nou na bawhsiatnate uleh na khialhnate uh jiak a sisa pen ahung hundam a. 2 Hua-ah, tu masang in hih leitung dan bang in na om ua, huihkhua a thuneitu lal, tu a thumang loutate sung a nasemjingtu kha dan bang in na vak ua. 3 Huate lak ah eite zong tu masang in i taksa utna ah, i taksa leh i lungsim utna hih bukim in i om ua. Tualeh midangte bangin piandan mawng a thangpaihna tate i hi uhi.

4 Hinanleh Pasian, hehpihna haupa in, a itna thupitak a eite ahung it jiak in, 5 khialhna a si i hihlai un zong Krist tawh ahung hingsakta a, hehpihna jiak a hundam na hi uhi. 6 Tualeh Jesu Krist tawh ahung kaithou khawmta a, van munte ah ahung toukhawmsak ta hi. 7 Tuachi’n hun hungtung dingte ah Jesu Krist jiak in itung a achitna a ahehpihna hauhdan ahung ensak ding hi. 8 Ginna jiak a hehpihna a hundam na hi uhi, huazong noumau a suak hikei a, Pasian silthawnpiak ahi. 9 Nasep jiak ahikei a, atuachih keileh miin a suangkha ding uhi. 10 Ajiak Pasian in masanglai pek a i omna ding a ana guatkholh, Krist Jesu a nna hoih semding a siam, ama khutsuak i hi uhi.

Krist a pumkhat hihna

11 Tuajiakin, “Nou masang laia Jentel, teptanlou ahung chihte uh,” (taksa khut a tan teptan achihte un.) 12 Huachihlai a Krist neilou a, Israel khua leh tui tawh kimatlou a, leitung a kinepna bei leh Pasian neilou a na om ua, thuchiam thukhunte lak a mikhual a na om nahih uh theijing un. 13 Hinanleh tuin pen Krist Jesu ah, nou nidanglai a gamlapi a omte, Krist sisan jiakin suknai in na omta uhi. 14 Ajiak amah pen i kilemna uh ahi a, i kikal a ki aidanna bang pen hihchim in, nihte pen pumkhat in a bawlta hi. 15 Biakna silbawlte a thupiak dan omte ki melmaknate pen a taksa a hihmang in, amah ah nihte pen mihing thak khat a siam dingin kilemna abawlta hi. 16 Ki melmaknate pen kross a hihlum in, huamah in nihte pen pumpi khat a Pasian tawh a kilepsak theihna ding in. 17 Tualeh amah hungpai in, nou gamlapi a omte kiangah lemna thu hung gen in, tualeh naitak a omte kiang ah zong ahung gen hi. 18 Ajiak, amah jiakin eiten khat khat in Pa kiang a luttheihna inei tuakta uhi.

19 Tuajiakin tuinjaw zin leh gamtuammi na hinawn kei ua, hinanle misiangthoute tawh tualsung khat leh Pasian innkuante na hijawta uhi. 20 Tualeh Jesu Krist pen aning a suang poimoh pen hung hi in, sawltakte leh Jawlneite suangphum lepsa tung a lam nahi uhi. 21 Ama inn lam jousiah kituaktak a leptuak in, Toupa ah tempul siangthou in a khangtou hi. 22 Amah ah nou zong kha a Pasian tenna ding a lamkhawm na hi uhi.

Ephasate 3

Paul in Jentelte dingin asem

1 Hih jiakin kei Paul, nou Jentelte ding a Jesu Krist a thongkia in. 2 Nou ding a Pasian hehpihna kepna piak kahih na jata ding ua. 3 Tuachia kilakna thugu’k kiphual ka kiang a ahung theihsak. (Tuma a tomnou khat a ka gelh, 4 huapen na sim chiang un Krist thugu’k kiphual ka theihdan na theisiam ding uhi.) 5 Huapen tulai a sawltak siangthoute leh Jawlneite kiang a kha a theihsak a aom bangin, nidanglai in mihing tate kiangah theihsak in a om ngaikei hi. 6 Hua ahi, tangthupha jiakin Krist ah Jentelte pen gouluah pihte, taksa khat a omte, thuchiam tanpihte ahi ding uh.

7 Asil bawltheihna nasepna a athawn a Pasian hehpihna hung kipia dungjuiin, hua tangthupha nna sem ding a siam ka hi hi. 8 Jentelte kiang a Krist hauhsak dan zonkhiat gualloh thute gen ding a, kei misiangthoute lak a neupen sanga neijaw kiang ah hih hehpihna pen piak ahi,  9 tualeh tangtawn a kipahna Jesu Krist mang a siljousiah siamtu atu’ng a pat Pasian a phual a om thugu’k kiphual ki pawlkhawmna pen bang ahia chih mi jousiah musak ding in,  10 tu-a van munte a lalnate leh thuneihnate kiangah Pasian pilna chinteng saptuamte mang a tua theihsak a aom theihna ding in. 11 I Toupa uh Jesu Krist a bawl atup, a tangtawn silguat bang ngei in, 12 amah ginna jiakin eiten amah ah hansanna leh maingal tak a luttheihna inei uhi. 13 Tuajiakin nou a ding a ka gimthuaknate jiak a lungkia lou dingin kung ngen hi; huapen na thupina uh ahi.

Krist itna

14 Hih jiakin i Toupa Jesu Pa mai ah ka khupdin a, 15 lei leh van a min jousiah phuah khiatnapa mai ah. 16 A thupina hauhdan bangjel a akha jiak a mihing sungtawng lam a silbawltheihna a hatsak a ahung omsak theihna ding in, 17 Krist pen ginna a na lungtang ua a tentheihna dingin, nou itna a thaguinei leh kiptak a om a, 18 misiangthoute jousiah tawh aletdan, asaudan, asandan tualeh athukdante na theihchian nang uleh, 19 Krist itna theihphak guallouh nung theih ua, Pasian a bukimna jousiah a sukdim a na omtheihna ding un ahi. 20 Tuin eimah a semjel sil bawltheihna dungjui a i nget leh, i ngaihtuah sang a sangjaw leh tamjaw a bawltheitu kiangah: 21 Jesu Krist jiakin saptuam ah tangtawn in, thupina omta hen! Amen.

Ephasate 4

Pumpi kimpumkhatna

1 Tuajiakin, kei, Toupa a thongkia in, sap a na omna utawh kituak a gamta dingin kung ngen hi. 2 Ki ngaingiamna leh migitna tengteng, thuakzohna tawh itna in na kithuakjou chiat un. 3 Lemna guia kankhawm a kha a ki pumkhatna pen vom tinten dingin hahpan in pang un.  4 Sap a na omna pen uh kinepna, munkhat a sap na hih mahbang un pumpi khat leh kha khat. 5 Toupa khat, ginna khat, baptisma khat; 6 Pasian khat leh mi jousiah Pa, bangkim tung a om leh bangkim a om, tualeh noute jousiah ah a om hi.

7 Hinanleh Krist sil thawnpiak tehna bangjel in hehpihna pen i kiang chiat uah piak in i om uhi.  8  Tuajiakin Laisiangthou in aman,

“Tunglama a kahtouhlai in,

sal a matte sal in apui a;

tualeh mihingte kiangah sil piakte apia hi,”

chi’n agen hi. 9 Tuin, hih ahi, “a kahtouh chih pen,” amasa in leimun ngiampen ah a kumsuk chihlouh bangdang chihna ahi diai leh? 10 A kumsuk pen ahihleh sil jousiah a sukbukim theihna ding a van jousiah tunglam pek a kahtoupa mah ahi. 11 Tualeh aman “khenkhatte sawltak, khenkhatte Jawlnei, khenkhatte tangthupha gentu, khenkhatte Pastor dingin, tualeh khenkhatte thuhilh sia dingin apia hi.” 12 Ajiak misiangthoute kithuamna ding, nasepna ding leh Krist pumpi bawlhoihna ding in. 13 Ginna leh Pasian Tapa theihna lam a ki thutuak a, piching a Krist bukimna tehna dungtan I phakchiat masiah un. 14 Tuachi’n diklouhna khemna bangin, lepchiah pil a mihing khem a om a, thugin huih chinteng a alang alang a mutleng kawikawi naupangte i hi nawm kei ding ua.

15 Hinanleh itna a thutak gen in, sil jousiah ah amah ah i khangtou thei jawding hi, Krist, amah pen lutang ahih jiak in. 16 Amah a pat pumpi kituaktak a zopkhawm a om in, guhtuah chinteng in sa hiang dang chinteng nasepna apiakdan dungjui chiat a, pumpi itna a ki bawlhoih in a khangtousak hi.

Krist a hinna thak

17 Tuajiakin hih ka gen ahi, tualeh Toupa ah kung theisak hi, Jentelte alungsim ginatlouh jiak uh pua a aom bang un omnawn mawng mawng kei un. 18 A theihsiamna uh sukmial a om in, asung ua bangmah theih theihlouhna a om jiakin, a lungtang uh atak jiakin Pasian hinna a pat puaseh in a om uhi. 19 Amau’n theihtehihna mawng mawng aneih nawnlou jiak un sil sianglou chinteng duhgawltak a bawl ding in hukna ah a ki pialutta uhi.

20 Hinanleh nou Krist thu huachibang in na jil kei uhi! 21 Jesu a om, thutak dungjui a amah thu ja a amah thuhilhna a om taktak na hih ua ahihleh; 22 Na nidanglai omdan ua mihing lui, khemna duhgawlna hoihloute koihkhia unla, 23 na lungsim kha uah athak in hung om un, 24 mihing thak, diktatna leh siangthouna Pasian bakpih a siam pen silh un.

25 Tuajiakin, juaugen tawpsan in! Michih in avengte kiang ah thudik genchiat hen, ajiak eite khat leh khat ki hiangtuah chiat I hi uhi. 26 Heh unla, hinanleh khial kei un, na hehna uh ni in tumpih kei hen. 27 Setan mun awn kei un.  28 Guta in gu nawnkei henla, hinanleh tasam kiang a piak ding a neihtheina dingin, a khut a silhoih bawl in semgimjaw hen. 29 Na kam ua pat thusia pawtkei henla, hinanleh a ngaikhiatute kiang a hehpihna a piaktheihna dingin, bawlhoihna dingin thuhoih pawtjaw hen. 30 Tualeh Pasian  Khasiangthou dahsak kei un, tatnani a ding a amah a chiamteh na hi uhi. 31 Kha’tnate, thangpaihnate, hehnate, husangnate, kigensiatnate, hihte jousiah nalak uapat koihmang in omta hen, gitlouhna jousiah tawh. 32 Khat leh khat kingaina tuah chiat unla, lungnem unla, Pasian in Krist a nou ahung ngaihdam bangin, nou zong khat leh khat ki ngaihdam tuah chiat un.

Ephasate 5

Vak a hinna

1 Tuajiakin ta deihtakte bangin Pasian omdan juitute hi un. 2 Krist in ahung it a, ei a ding a Pasian kiang a silpiak leh kithoihna namtui ding a a kipiak bangin, itna ah om un.

3 Hinaneh misiangthoute omdan ding a kilawm him in, kingaihnate leh sianglou chiteng huaihamna tawh nalak uah lawhkhak in om kei hen. 4 Zahmoh thute, thu namanlouh a houlimnate, chiamnuih thute bang zong kilawm lou ahi, huate sangin Pasian kiang ah kipahthu genjaw un. 5 Ajiak, kingaihhat leh, mi thanghuai leh mi duhgawl in, (duhgawlna pen milim biakna ahi). Krist leh Pasian gam ah goutan mawng mawng a neikei chih nathei uhi.

6 Mi kuamah in thu ginalou peuhin hungkhem kei uhen, ajiak hih silte jiakin Pasian thangpaihna thumanglou tate tungah atung nak hi. 7 Tuajiakin, amauhte kipawlpih kei un. 8 Ajiak nou masanglai in mial na hi ua, hinanleh tunjaw Toupa ah vak na hita ua, vaktate ombang in om un, 9 Ajiak, khagah ahihleh hoihnate, diktatnate leh thutak ah ahi.

10 Toupa pomtak bang ahiam chih zongkhia unla, 11 tualeh mial nasep gah neiloute tawh ki pawlkhawmna neikei unla, hinanleh a diklouhdan theihsakjaw un. 12 Ajiak aguk a silbawlte agen zong ajumhuai hi. 13 Hinanleh sil jousiah adiklouh dan theihsak a aom pen vak hihlat ahi, ajiak sil khatpeuh hihlangtu vak ahi hi.

14 Tuajiakin Laisiangthou in, aman;

“Nang ihmu, khanglou inla,

misi lak a kipan thou in,

 thuachi’n Krist in vak a hungpia ding hi,”

achi hi.

15 Tuachi’n na omdan uah pilvang un, mimawte bang a omlou in, hinanleh mipilte bangin om un. 16 Nite ahoihlouh jiakin hun lemtang kilei un. 17 Tuajiakin mawkei unla, Toupa deihlam bang ahia chih thei un.

18 Tualeh uain kham in om kei unla, hua ah kideklouhna a om hi; hinanleh, kha ah omjaw un. 19 Phatna late, Biakna late, tualeh khalam late ah noumauh khat leh khat kihoutuah in, Toupa kiangah na lungtang ua aging kilawm leh la sa in om un. 20 Bangkim tung ah i Toupa Jesu Krist min in Pasian leh i Pa kiang ah kipahthu gen gige un.

Zite leh pasalte

21 Pasian lauhdan siamna ah khat leh khat kituhlut tuah chiat un.

22 Zite aw, Toupa kiang a bangin noumauh pasalte chiat kiangah kituhlut un. 23 Ajiak Krist saptuamte lutang ahih a, pumpi hundampa ahih bangin, pasal pen zi lutang ahi. 24 Tuajiakin saptuamte Krist kianga a kituhlut mahbang in, zite zong sil bangkim ah a pasalte uh kiangah kituhlut uh hen.

25 Pasalte aw, Krist in saptuamte a it a, a ta’ng ua a kipiak bangin nou zong na zite uh it un. 26 Amauh tui a sil a, thu a ahihsiang a asawpsiang theihna ding in,             27 tuachia amauh pen nin banglou, vuailou leh huachibang sil mawng mawng omlou, hinanleh siangthou leh dembei a omjaw a, saptuam thupitak a amah akipiak theihna ding in. 28 Tuajiakin pasalte’n amauh pumpi mahbang in aziite uh a it ding uh ahi. A zi itpa pen amah ki it ahi. 29 Ajiak kuamah in ama taksa ahua ngai kei. Hinanleh Toupa’n saptuamte abawl mahbang in avak in adeihthoh jaw ding hi; 30 ajiak eite pen a pumpi hiangte i hi ua, a taksa leh aguhte hiangte i hi uhi. 31 “Hihjiakin pasal in anu leh apa a nusia ding a, azi atu ding, tuachi’n anih un taksa pumkhat a hung hita ding uhi.” 32 Hihpen thugu’k kiphual thupitak ahi, hinanleh ken Krist leh saptuam thu ahi ka gen. 39 Hitalehzong nalak ua kuapeuh in amah a ki it bangin a zi it hen, tualeh zi pen apasal zahtak ding in pilvang hen.

Ephasate 6

Naupangte leh pate

1 Naupangte aw, Toupa ah na nulehpate uh thu mang un, ajiak hihpen sildik ahi. 2 “Na nu leh na pa zahtak in,” hih pen thupiak chiamnei masa pen ahi; 3 “tuachi’n nang a dingin ahoih ding a, leiah zong na damsawt ding hi.” 4 Tualeh nou pate aw, na tate uh thangpaisak kei unla, Toupa thununna leh thuhilhna ah kemjaw un.

Sila leh apu

5 Silate aw, Krist thu na man bang un, lauhdan siam leh kithing pum in; lungsim a chitak in, taksa dan a napute uh thu mang un. 6 Mihing kipaksak ding a mitmei guak veng hilou a, Krist sila bang a lungtang a Pasian deihlam bawl ding in. 7 Mihing kiang a hilou in, Toupa kiang a silhoih deih a nasem in. 8 Michih in, sila hiin zalen hitaleh silhoih abawl taphot uh Toupa kiang a pat huamah amukik ding uh chih thei in bawl hen. 9 Tualeh nou pute aw, tuachimah bangin akiang uah bawl un, amauh leh nou pu pen van ah a om chih leh, aman mi deihsak tuam aneikei chih thei in, vaubawl kei un.

Pasian galvan bukim

10 Atawppen in, ka unaute aw, Toupa ah leh ahatna silbawltheihna ah hattak in om un. 11 Setan ze-khemna na douzohna ding un Pasian galvan bukim in kithuam un.

12 Ajiak i doute pen taksa leh sisan ahikei a, mialtung a vaihawmtute leh, van munte a kha gilou omte ahijaw uhi. 13 Tuajiakin ni hoihloute a na douzohna ding uleh, na bawlzoh siang nung ua zong na dintheihna ding un, Pasian galvan bukim la un!

14 Tuajiakin, na kawng uh thutak a gak in, diktatna awmphaw gak in, 15 lemna tangthupha ki sakkholhna pen na keng uah bulh in ding un. 16 Hihte tengteng tung ah ginna lum la un, hua tawh giloupa thal kuangthei na sumitthei ding uhi. 17 Tualeh hundamna sik lukhu leh, kha namsau Pasian thu la un, hua tawh giloupa thal kuangthei na sumitthei ding uhi. 17 Tualeh hundamna sik lukhu leh, kha namsau Pasian thu la un. 18 Thumna leh ngetna chinteng in bangchiklai peuh in kha a thumjing a om in, hih atawpna lam ah misiangthoute ding in thuak hatna leh ngetsakna tawh pilvang tak in omjing un. 19 Tualeh kei dingin zong tangthupha thu kiphual theisak ding a hangsan tak a kakam ka kak a, thugen theihna piak a ka omtheihna ding in, 20 Hua a ding a sik kolbulh palai ka hi hi, hualam pang ka gen ding bang a hangsan tak a ka gentheihna ding in hung thumsak un.

Chibai buk tawpna

21 Hinanleh nou zong bang chibang a ka om ka tanchin na theihtheihna ding un, Taikika, Toupa a sanggam ittak leh Pasian nasemtu muanhuai in, bangkim a hunghilh pai ding hi. 22 Ka tanchin uh na theihna ding uleh, na lungtang uh a khamuan theihna ding chi in amah na kiang ua kungsawl ahi.

23 Pa Pasian leh i Toupa Jesu Krist kianga kipan khamuanna, tualeh ginna tawh kijui itna unaute kiang ah om hen. 24 Chih taktak a i Toupa uh Jesu Krist itte jousiah kiang ah hehpihna om hen. Amen.