Back To Top
JUDA
LAIKHAK
Chibai Bukna
Juda
1 Juda, Jesu Krist sila leh Jakob sanggam in,
Pa Pasian sianthousak, Jesu Krist a ding a kep-hoih leh sapte kiangah:
2 Zahngaihna, khamuanna leh itna na kiang uah sukpung in omta hen.
Sia takloute
3 Ka ittakte aw, i hundamna thutangpi na kiang ua gelh ding ka hahngaihsut lai in, khatvei misiangthoute kipiasa ginna thu a na hahkat ding uh deihna tilkhouhna thu gelh ding kei dingin a poimoh hi. 4 Ajiak masanglai pek a hih siamlouhna tang ding a guatsa, Pasian ngaihsaklou leh i Pa Pasian hehpihna thu pen hukna suaksak a, tualeh Toupa Pasian khat guak om leh i Toupa uh Jesu Krist, gingtalou agu’k a hunglut mi kuate hiam aom uhi.
5 Hinanleh hih khatvei na theitamah nanle uchin, kung theisakkik ding hi, tuapen Toupa’n, amite Izipt gam a pat a hutkhiat zoh nung a, agingtaloute a hihmangthang hi, chih. 6 Tualeh vantungmite atanvou uh hoihtak a kemlou a, hinanleh atenna mun uh nusia pen tangtawn a gakna sikkol bulh in mialnuai ah nithupi vaihawmni a dingin a koihhoihta hi. 7 Sodom leh Gomorrah tualeh akim a khuapi omte, tuachimah bang a, kingaihna a kipumpiak leh, taksa tuamdangna delhte pen tangtawn gawtna thuak a ettawn ding a taklat a aom bang un.
8 Huachimah bangin hih mang manten zong taksa ahihnin ua, thuneihna anial ua, thupinate agensia veu uhi. 9 Hilehzong Michael vantungmi tungnung pen in Mosi luang thu ah dawi tawh kihau a a kinial laiun, gensia in a mohpaih ngam kei a, “Toupa’n hungtai heh!” a chijaw hi. 10 Hinanleh huate in sil a theihlouhte uh a gensia ua, tualeh ngaihtuahna neilou gamsate bang a, pianken theihtheihna a atheih uh, hua silte ah amauh leh amauh aki hihsia uhi. 11 Atung uh agik hi! Ajiak pen Kaina lampi ajui ua, duhgawlna in Balaam khialhna ah lawptak in atai ua, tualeh Korah helna ah a mangthangta uhi. 12 Hihte ahi uh na itna ankuang hoihlousaktute, noutawh an anek chiang ua launa dan theilou, amauh guak kivakte ahi uh. Amauh pen tuipailou meilum huih in apuakkawi lehlehte, phavang a sing gahlou, nihvei sisa, ajung tawh bawhkhiatte ahi uhi. 13 Amauh leh amauh jumnang kipuakdok tawm,tuipi kinawk vonvon, aksi leng kawikawi, tangtawn a mialna vom ngingngeng a ding a koihhoihte ahi uhi.
14 Tuin Enok, Adam a pat sagihnapa in zong, hihte tungthu ana genkholh hi. En in, “Toupa a misiangthou sangsawm tawh a hungpai hi 15 mi jousiah tung a vaihawm ding leh, alak ua Pasian ngaihsaklou a nna asep uh Pasian ngaihsaklouhna nna juosiah leh Pasian ngaihsaklou mikhialten atung a a hamsiatna jousiah jiak a Pasian ngaihsaklou jousiah siamlouh tangsak ding in! chi in.
16 Hihte pen phunhatte leh nial hatte; amauh sa utna a gamtangte ahi uh; akam un ki-uangsakna thu thupi taktak agen ua, punna deihman a mi pahtawi chi’ngmi ahi uhi.
Vauna leh hilhna
17 Hinanleh nou, ittakte aw, noujaw i Toupa Jesu Krist sawltakte jang a masanglai a thu kigente theigige un; 18 “Hun nunung chiangin Pasian ngaihsak louhna lam a amauh sa utna bang a om, simmohhatte ahung om ding uh,” chia ahung hilhte uh. 19 Hichibang mite pen pawltuam bawlhat mi, taksa utna a kinga mi, kha neiloute ahi uhi. 20 Hinanleh nou, ittakte aw, noupen na ginna siangthou uh tungah kilamtou in; Khasiangthou ah thum un, 21 tangtawn hinna a hung puilut ding i Toupa Jesu Krist zahngaihna pen ngakjingin Pasian itna ah noumah kikemsak un.
22 Tualeh khenkhat kituamkoihte lainat unla; 23 hinanleh khenkhatte meikuang a pat kaidok in; a taksa thanghuai uh banna puansilh tanpha kihdak in laukawm in hundam un.
Gualjawlna
24 Tuin na puklouhna ding ua nou hung vengbitthei leh, a thupina maia nasatak a nuamsa a mohsakna beia nou hung koihtheipa 25 i hundampa uh Pasian pil amah guak kiangah, thupinate, pahtawinate, vaihawmnate, leh sil bawltheihnate, tu leh tangtawn in omjingta hen! Amen.
