Back To Top
THESSALONIKATE
KIANG A SAWLTAK PAUL LAIKHAK KHATNA
I Thessalonikate 1
Chibai bukna
1 Paul, Sila leh Timothi in,
Pa uh Pasian leh Toupa Jesu Krist a Thessalonika khua a om saptuamte kiangah:
Pasian i Pa uh leh i Toupa Jesu Krist a pat hehpihna leh khamuanna na kiang uah om hen.
Thessalonika ginna leh hinkhua
2 Ka thumna ua na min uh louin, noute tengteng jiakin Pasian kiang ah kipahthu ka gen jinh uhi. 3 I Pasian leh Pa mai ah na ginna nasepte uh, itna a nasepgimte uh, tualeh i Toupa Jesu Krist a kinepna jiak a na thuakzohnate uh manghilhlou a theijing in, 4 unau ittakte aw, Pasian tel na hih uh thei in. 5 Ajiak ka tangthupha uh athu guak a na kiang ua hungpai hilouin, sil bawltheihna leh Khasiangthou leh theihchianna thupitak tawh hungtung ahi a. Noute jiakin nalak ua bang chibnag mi ka hi ua chih na theih bang un. 6 Tualeh haksatna thuak pum in, Khasiangthou a kipak kawm in thu pen pom in, kou leh Toupa juite na hi uhi. 7 Tuachi’n Mesidonia leh Akhai gam a gingtu tengteng ding in etton na hita uhi. 8 Ajiak pen nou a kipan Toupa thu a thankhiata a, Mesidonia leh Akhaia gam guak ah hilouin, munchin teng ah Pasian lam a na gindan uh athangta hi. Kou bangmah ka gen uh angai nawn kei hi. 9 Ajiak pen amauh ngeiin nalak ua bnag chibang lutna ahia ka muh uh, ka tanchin uleh, Pasian hing leh dik bia ding a milimte a pat Pasian lam na ngat dan uh a hung theisak uhi. 10 Tualeh a Tapa misi laka kipan a akaihthawh thangpaihna hungtung ding lak a hung suaktasakpa Jesu van a pat na ngak ding in.
I Thessalonikate 2
Thessalonika khua a Paul nasep
1 Ajiak pen unaute aw, nalak ua kung paina uh athawn ahikei chih noumau ngeiin nathei uhi. 2 Hinanleh hua masang a na theihsa uh mahbang un, Philipi khua a ka thuakgimna uh leh jumhuaitak a bawlgawp a ka om nung un, bua pumpum in zong Pasian tangthupha na kiang ua gen ddingin ka Pasian ua ka hangsanjaw sem uhi. 3 Ajiak, ka thugen uh juau a kipan ahikei a, tualeh khembawlna pawt zong ahikei hi. 4 Tangthupha kepsak a om ding a, Pasian phatsak mi ka hih mahbang un mihing kipaksak ding bang hilou ka lungtang uh endiktu Pasian kipaksak hijaw in, thu ka genjel ding uh aahijaw hi. 5 Ajiak bangmah chik in zong kimaitang phatna leh duh-amna thu hiam ka jangngai kei uh chih nathei uh, pahtawina ka jong ngaikei uhi! 6 Krist sawltakte ka hihjiak un thuneihna zangthei himmah nanle ung, mihing tung ah zong pahtawina ka zong ngaikei uhi. 7 Hinanleh nu in tate a duat bawl bangin nalak uah migitak in ka omjaw uhi. 8 Tuachi’n, ka deihtakte uh nung hihtak jiak un nou hung ngaina mahmah in Pasian tangthupha guak hilou in, kou hinna tan hung piak ka ut uhi. 9 Ajiak unaute aw, ka sepgim dan uleh ka gimdan uh na theigige uhi, nalak ua kuamah ka sukbuai louhna ding un sun leh jan a sem in Pasian tangthupha nou kung hilh uhi.
10 Nou gingtute lak a siangthoutak leh, diktak leh, gensiat bei a ka gamtat dan uh ahung theihpihtute na hi uhi, Pasian zong. 11 Pa in tate tung a abawl bangin, nou hung hasot in, hung khamuan in, tualeh hunghilh in na tung ua ka bawl dan uh nathei uhi. 12 Ama kumpi gam leh athupina-a nou hung samlutpa Pasianmi ding a chinna nei a na om theihna ding un.
13 Hih jiakin Pasian kiang ah tawplou in kipahthu ka gen uhi. Ajiak Pasian thu kou a pat a na jak uh na pom lai un, mihing thu bang a pom hilou in, hinanleh thutak, nou a gingtate a zong thupitak a nasemthei Pasian thu bangin na pomjaw uhi. 14 Ajiak, unaute aw, Judea gam a Pasian saptuam pawl Krist Jesu a omte juitute na hi ua, amau’n Judate lak a athuak bang un, nou zong na gammite lak ah na thuak uhi. 15 Hua Judate’n Toupa Jesu lah a Jawlneite uh athat ua, kou zong ahung bawlgenthei ua, tualeh Pasian a lungkimsak kei ua, mijousiah akalh uhi! 16 Hundam a hihtheihhna ding ua Jentelte kiang a thugen a hung kham ua, a khialhnate uh a hihdim gige na dingin, hinanleh Pasian thangpaihna pen ahuaisia theitawp in atunguah a tungta hi.
Paul in amau vehkik a utna
17 Hinanleh kou pen, unaute aw, tomnou khat sung lungtang lam hilou a, mellam guak kikhen a i om jiakin, kilawptak a namel uh muding in ka hahpan sem uhi! 18 Tuajiakin, na kiang uah hungpai ka sawm ua, kei Paul ngeiin zong nihveijen hungpai ka sawmta a, hinanleh setan in hung dal nak hi. 19 Ajiak, ka kinepna uh hiam, ka kipahna uh hiam, ahihkeileh ka kipahna lallukhu uh bang ahi! A hungpai chiang a i Toupa Jesu Krist mai ah nou mahmah hilou ding na hi maw leh? 20 Ajiak noupen ka suan uh leh ka kipahna na hi uhi.
I Thessalonikate 3
1 Tuachi’n ka thuakzoh nawnlouh tak un Athen khua ah kouguak in nutsiat in omle ung hoih kasa ua, 2 tualeh i sanggampa uh Timothi Pasian nasemtu, Krist tangthupha lam a ka seppih uh, nou hung hihkip ding leh na ginna lam ua hung khamuan dingin kung sawl uhi, 3 hua gimthuaknate jiak a kuamah a kilinglouhna dingin, ajiak hih silte thuak ding mawng a guat i hi uh chih noumah ngeiin nathei uhi. 4 Ajiak, adiktak in, na kiang ua ka omlai un gimthuakna thuak ding ihi uh chih kung hilhkholhta uhi; huachibang ngeiin a tungta hi, huapen nathei uhi. 5 Hihjiakin ka thuakzoh nawnlouh tak un, khemtu in nou ahung khem khading, ka sepgimna uh athawn khading chiin na gindan uh thei dingin mi kung sawl hi!
6 Hinanleh Timothi tuin na kiang ua pat ka kiang uh a hungtun in na ginna uh leh na itna uh, tualeh kou nou kung muh nuam mahmah bang un nou zong kou hung munuam mahmah in nung theijing uh chih thu tanchin kipahhuaitak ahung puak hi. 7 Tuajiakin, unaute aw, ka thuakgimna uh ka haksatna jousiah uh na ginna jiak un na tung uah khamuangtak in ka om uhi. 8 Ajiak tuin ka hingta uh, Toupa a na dinkip phot uleh. 9 I Pasian uh maiah na tung ua ka kipakna jousiah uh jiakin noulam thu ah Pasian kiangah bang chibang kipahthu ka gen tazen ding uai maw. 10 na mel uh kung muhtheihna ding uleh, na ginna la ua na taksap uh kung hihbukimsak theihna ding un sun leh jan in hah thum in ka thum uhi.
11 Tuin Pasian ngei leh i Pa un, Toupa Jesu Krist in na kiang lam uah hung paipih hen! 12 Tualeh noulam a itna ka hauh bang, Toupa’n nou khat leh khat ki-it tuahna leh mi jousiah itna in hung khangsak in, hung hausakta hen. 13 Tuachi’n i Toupa Jesu Krist, a misiangthoute jousiah tawh a hungpai chiangin Pasian, i Pa uh maiah na lungtangte uh siangthouna lam a dembeiin ahung hihkip thei ding hi.
I Thessalonikate 4
Pasian kipaksak hinkhua
1 Tuachi’n unaute aw, atawppen in, na omdan ding uleh Pasian na kipahsak dan ding uh. Ka kiang ua kipan a nalak bang un na hauhsem na ding un. Toupa Jesu min in kung ngen un, kung hasot uhi. 2 ajiak pen Toupa Jesu jiakin bang chibang thute ahia kungpiak uh chih nathei uhi. 3 Ajiak Pasian deihdan, na siangthouna ding uh ahihleh hih ahi, kingaih tawpsan un. 4 Michih in siangthou leh zahtak tak a abel chiat uh kepdan atheih ding uh ahi. 5 Pasian theilou Jentelte bang a huk lam a kipai lou in. 6 Hualam thu ah kuamah aval a gamtang in a unau ze-khem in sil gilou bawl kei hen, Toupa, huachibang sil bawlte jousiah phu latu ahihjiak in, kou zong kung hilhkholh un, kung theisak khinta uhi. 7 Ajiak pen Pasian in sianglou dingin ahungsam kei a, hinanleh singthou dingin a hungsam jaw hi. 8 Tuajiakin kuapeuh hih nial mihing nial ahikei a, Pasian, a Khasiangthou hungpiapa nial ahijaw hi.
9 Hinanleh sanggam ki itna lam thu ah kung gelhsak na ngaikei uhi, ajiak pen ki-it tuah chiat ding in noumah ngei Pasian hilh in na om uhi. 10 Mesidonia gam pumpi a unau om jousiah tung ah huapen na bawl ngutngei uhi, hinanleh unaute aw, hung khang semsem ding in kung ngen uhi. 11 Thu kung piak bang ua kamtawm deuh a om sawm a, na nna chiat uh ngaihsak a, tualeh na khut mahmah ua nasep sawm in, 12 tuachia pualam mite lam a kilawmtak a na omtheihna ding un leh, bangmah taksap na neihlouhna ding un.
Toupa hungpaina
13 Hinanleh unaute aw, midang kinepna mawng mawng neiloute bang a na lungkham louhna ding un ihmute tungtang na theihlouh uh ka deih kei hi. 14 Ajiak, Jesu asi a, athoukik chih i gintat leh, tuachimah bangin Jesu-a ihmute zong Pasian in amah tawh ahung puikhawm ding hi.
15 Hih pen Toupa thu in na kiang uah ka gen hi, eite Toupa hungpai dong a hing a na omlaite in ihmute i makhelh kei ding hi. 16 Ajiak pen Toupa mahmah kikou aw tawh, vantungmi tungnung pen aw tawh, tualeh Pasian pengkul ging tawh van a kipat hung kumsuk ding ahi a, tualeh Krist a sisate a thoumasa ding ua; 17 tuazoh chiangin ei hing a na omlaite huihkhua ah Toupa tuakding in amauh tawh meipi lak ah laktouh in i om ding a, tuachi’n tangtawn in Toupa kiang ah i omta ding hi. 18 Tuajiakin, hih thute in khat leh khat ki khamuan tuah chiat un.
I Thessalonikate 5
Toupa hungpai na’ng a mansa a om ding
1 Hinanleh unaute aw, ahun leh ani lam thu ah kung gelhsak na ngaikei uhi. 2 Ajiak nou mahmah in Toupa ni pen jan a guta bangin a hungtung ding hi chih chiantak in nathei uhi. 3 “Muanna leh bitna,” chia agen laitak un numei nauvei bangin thakhat in manthaina atung uah a hungtung ding a, a suakta mawng mawng kei ding uhi. 4 Hinanleh unaute aw, nou pen hua ni a guta bang a ahung bingphawn dingin mial ah na omkei uhi. 5 Na un un vak tate leh sun tate na hi ua, jan a mi i hikei ua, mial a mi zong i hi kei uhi. 6 Tuajiakin midangte bangin i ihmu kei ding uh, kiging in i ngaihsakjaw ding uhi. 7 Ihmute pen janin ahi a a ihmut uh, tualeh uain khamte zong janin ahi a kham uh. 8 Hinanleh ei sun a miten ginna leh itna awmphaw silh in, hundamna kinepna pen lukhu a khu in i ngaihsakjaw ding uhi. 9 Ajiak Pasian in thangpaihna tuakding in ahungguat kei a, hinanleh i Toupa Jesu Krist jiakin hundamna ngahdingin a hungguat ahijaw hi, 10 amah pen i tangin si a, i thoh in zong i ihmut in zong, amah tawh i hinkhawm theih na ding in. 11 Tuajiakin nana bawljel mahbang un ki khamuan tuah chiat unla, ki hihhattuah chiat un.
Thuhilhna leh chibaibuk tawpna
12 Tualeh unaute aw, nalak ua semgimte leh, Toupa a na lamkaite uleh, nou hung hilhtute theijing un. 13 Tualeh a nasep jiak un amauh thupitak a itna a ngaisang ding in kung ngen uhi. Kituak chiat in om un.
14 Tuin unaute aw, kung hasot uhi, dan banglou a omte hilh unla, lungkiate khamuan unla, hatloute panpih unla, mi tengteng lak ah thuakjoutak in om un. 15 Kuamah in kua gitlouh zong gitlouh a thuklou dingin pilvang un, hinanleh noulak hi in mi tengteng lak ah hitaleh ahoih taphot jui un.
16 Nuam gige un, 17 tawplou in thum un, 18 sil bangkim ah kipahthu genjing un. Ajiak noulam thu ah Jesu Krist ah hih pen Pasian deihlam ahi.
19 Kha sumit kei un; 20 Pasian thu kigen simmawh kei un. 21 Sil jousiah enchian unla, ahoihlam taphot tu tinten un. 22 Giloulam jousiah a pat kihemkhia un.
23 Khamuanna Pasian ngeiin napum un hung hih siangthou hen, tualeh na kha uleh na lungsim uleh na taksa uh i Toupa Jesu Krist hungpai chiang a gensiatbei ding in hummbit in om hen. 24 Nou hungsampa a gin-om bnagin, bawl zong abawl ding hi.
25 Unaute aw hung thumsak un
26 Unaute jousiah tawp siangthou in chibai kibuk un.
27 Hih laikhak unau siangthoute jousiah kiang ah simsak ding in Toupa min in thu kung pia hi.
28 I Toupa Jesu Krist hehpihna na kiang uah om hen. Amen.
