Back To Top
KORINMITE
KIANG A SAWLTAK PAUL LAIKHAK KHATNA
I Korinthmite 1
Chibai bukna
1 Paul, Pasian deihlam a Jesu Krist swltak hiding a sap leh, I sanggampa uh Sosthene in,
2 Korin khua a pasian saptuam omte, Jesu Krist a suksiang, misiangthou hiding a sapte kiangah, gamchin a I Toupa, amah leh eite Toupq Jesu Krist min lou jousiahte kiangah tawh:
3 I Pa uh Pasian leh I Toupa uh Jesu Krist a pat, hehpihna leh lemna nakiang uah om hen.
Krist a gualjawlnate
4 Jesu Krist a Pasian hehpihna na kiang ua hung kipia jiakin natung thu uah Pasian kiangah kipahthu ka gen gige hi. 5 Sil bangkim ah thugen theihna chinteng leh theihna chinteng ah amah vangin hihhauhsat in na om uhi. 6 Tuachimah bangin Krist thu theihsak na pen nou mauh ah hihkip ahita hi. 7 Tuachi’n kha lam silpiak mawng mawng ah na taksapna uh omlou I, I Toupa uh Jesu Krist kilakna ding ngak a omjing na hi uhi. 8 Aman I Toupa Jesu Krist ni chiang a gensiat bei a na omtheihna ding un atawp dongin zong ahung hihkip ding hi. (Pasian amuanhuai hi, aman a Tapa Jesu Krist I Toupa uh tawh kipawlkhawmna ah ahung samlutta hi.
Saptuam sung kikhenna
10 Tualeh unaute aw, na un ua thu khat nagen ua, tualeh nalak ua kikhenna mawngmawng a om louhna dingin lungsim kikhat leh ngaihtuahna kibang ahoihtak a na kizop jawkna ding un Toupa Jesu Krist minin kung ngen hi. 11 Ajiak ka unaute aw, nalak uah kiselna a om chih na tungtang thu uh Kloe innkuanpite genna kaja hi. 12 Kagen hih ahi, noute tengteng in, “Kei Paul pawl ka hi; kei Apollo pawl ka hi; kei Kifa pawl ka hi; kei krist pawl ka hi,” na chi uhi. 13 Krist Hawmkhen in a jom ei le? Paul nou a dingin kilhdenin a om ei le? Ahihkeileh Paul minin baptisma na tang uai le?
14 Krispa leh Gaia chihlouh nalak ua khat bek kung baptis louh jiakin Pasian kiang ah kipahthu ka gen hi. 15 Atuachih keileh, keimah min a ka baptis ahi chi na om kha ding uhi. 16 Ahi, Stephenate innkuan ka baptis a, huate lou midang ka baptislam ka theikei hi. 17 Ajiak Krist in baptis dingin ahung sawl kei a, tangthupha gen ding in ahung sawljaw, pilna a thu genlou in, atuachih keileh Krist kros bangmahlou asuak kha ding.
Krist, Pasian sil bawltheihna leh pilna
18 Ajiak kross thu pen mangthangte dingin motna ahi a, hinanleh ei hundam a omte a dingin jaw Pasian sil bawltheihna ahi. 19 Ajiak,
“ Mipil, pilna ka hihsia ding a,
mi pilvang, pilvan theihna ka
hihmang ding hi,”
chih gelh bang in.
20 Mipil khoi ah ahi? Laigelhmi khoi a awm ahia? Hih leitung a selhatmi khoi a awm ahia? Pasian In hih leitung pilna mothuaina suaksak lou amaw!
21 Ajiak Pasian pilna ah, leitung pilna zang a Pasian a theihlouh nung un, thugen mothuaitak zang a agingtate hundam a om pen Pasian in pha asa hi. 22 Judate’n chiamtehna a ngen ua, Grikte’n pilna azong uh. 23 Hinanleh en Krist kilhden a aom thu igen uhi, huapen Judate a dingin kipalpukna, tualeh Grikte a dingin motna ahi; 24 hinanleh Judahte hi’n Grikte hitaleh kuapeuh akisamte a ding in Krist pen Pasian sil bawltheihna leh Pasian pilna ahi. 25 Ajiak Pasian motna mihing sang in apiljaw a, tualeh Pasian hatlouhna zong mihing sang in ahatjaw hi.
26 Unaute aw, ahung sapna ngaihtuah dih un, taksa lam a mipil tampite, mihat tampite, milian tampite sap ahihlouh dan uh. 27 Hinanleh Pasian in mipilte a zahlaksakna dingin leitung sil mothuaite atel jawta a, tualeh leitung a sil hatte azahlaksak na dingin leitung sil hatloute atel jawta hi. 28 Tualeh leitung silsia leh simmoh huaite Pasian in atel a, sil omte bangmahlou a suahsak theihna dingin, sil omlou tan in atel hi. 29 Tuachi’n Pasian mai ah kuamah aki liansak theikei ding hi. 30 Hinanleh nou pen amah vangin Krist Jesu ah na om uhi, amah pen Pasian a pat ei a ding a pilna, diktatna, hihsiangthouna tualeh tatkhiatna ding a bawl ahi. 31 Tuajiakin Laisiangthou a akigelh bangin, “Asuang taphot in Toua suang hen.”
I Korinthmite 2
Krist kilhden a aom na thu
1 Tualeh unaute aw, kei na kiang ua Pasian thugu’k gen a kung pailai in thugen siam mahmah leh pilna thutak tawh hungpai ka hikei hi. 2 Ajiak ken, Jesu Krist leh amah kilhden a aom thu chih louh nalak uah bangmah dang theih ka sawm kei hi. 3 Tualeh kei hatlou leh lau li’ng kawm in nalak uah ka om a, 4 ka kam suakte leh ka thugente mihing pilna gensiam thu ahi kei a, hinanleh kha leh asil bawltheihna a hihhat in ahijaw hi. 5 Tuachia na ginna uh mihing pilna a ki-nga hijaw louin, Pasian silbawl theihna a ki-nga ahihjawkna ding ahi hi.
Pasian pilna
6 Hinanleh pichingte lak ah pilna thu zong ka gen jel uhi, ahihhang in hih khang hun pilna thu ahi kei a, hih khang hun vaihawmtu mangthang dingte pilna thu zong ahi kei hi. 7 Hinanleh kouten Pasian pilna thu’k I thupina ding a Pasian in leitung om masang a aguatsa pilna kiphual thu ka gen jaw jel uhi. 8 Huapen hih leitung vaihawmtute in a theikei uh, ajiak nathei hitale uh thupina Toupa pen ana kilhden kei ding uhi. 9 Hinanleh Laisiangthou a,
“Mit a muh ngailouh , bil a jak
ngailouh,
tualeh mihing lungtang a zong
lut ngailou,
Pasian in amah itte ding a
abawlsak silte pen,”
chia gelh bang in.
10 Hinanleh Pasian in huate pen ikiang uah ahung theisakta hi, ajiak kha in bangkim a zongkhia a, ahi, Pasian thugilte zong. 11 Mihing thute mihing a om kha loungal in kua ahia athei ding? Tuachimah bangin Pasian thute zong Pasian kha loungal kuamah in a theikei hi. 12 Tuachi’n Pasian in athawn a a hungpiak silte I theihtheihna dingin, eite in leitung kha hilou in, Pasian a kipan kha pen itang uhi.
13 Hua silte pen mihing pilna thuhilhna a genlou in, Khasiangthou thuhilh pen genjaw in, khalam thute khamite kiang a hilhchian in I genjaw uhi. 14 Hinanleh leitungmite in pen khalam thute a sangthei kei uhi, ajiak amauh ngaih in huate pen mothuai ahi a, kha a theih ahihjiak in thei zong a thei thei kei uhi. 15 Hinanleh khamite in pen sil jousiah a theichian jel ua, amah ahihleh kuaman a theichian kei hi. 16 Ajiak Laisiangthou in,
“Amah thuhilh thei ding a,
kuan ahia Toupa lungsim thei
khin?”
hinanleh eite’n Krist lungsim ipua uhi, achi hi.
I Korinthmite 3
Pasian silate
1 Tualeh unaute aw, khamite kiang a thu ka gen bangin na kiang uah thu ka gen theikei a, taksamite kiang a gen bang lel in ka gen ahi. 2 An – gum hilou in nawitui in kungvak a, na nektheih nailouh jiak un, tu-in zong na nethei naikei uhi. 3 Ajiak noun a taksami nalai uhi, ajiak nalak uah kithangsiatna leh, kinialna leh kipawl khenna a omjing jiakin taksami hinalai in mihing bang a om nalai hilou na hi uh hiam? 4 Ajiak khat in, “Kei Paul pawl ka hi,” adang in, “Kei Apollo pawl ka hi,” achih laisiah taksami hilai hilou na hi uh maw?
5 Paul kua ahia? Apollo kua ahia? Amauh nou hung gingtasaktu thu nasemmite ahileltak uhi. Tuazong Toupa’n michih apiak bang jel in ahi. 6 Ken kasuan a, Apollo in tui abuak a, hinanleh Pasian in akhangsak hi. 7 Tuachi’n asuantu zong bangmah ahkei a, atui buaktu zong bangmah ahi kei hi. A khangsaktu Pasian loungal. 8 Tualeh asuantu leh atui buaktu akibang ahi uhi, tualeh michih in asepgim bang jel un nuamman amu ding uhi. 9 Ajiak ahihleh Pasian tawh semkhawmte ka hi uhi, nou pen Pasian louma na hi ua,
Pasian lam inn na hi uhi. 10 Pasian hehpihna kei hung kipia dungjui in inn lamtu piltak bangin ken asuangphum kalemta a, midang in atung ah inn alam uhi. Hinanleh michih hua atung a a innlam dan uah pilvang uhen. 11 Ajiak asuangphum lepsa loungal suangphum dang kuaman alem thei nawnkei uh, huapen Jesu Krista hi. 12 Tualeh hih suangphum tung ah mi kuapeuhin kham in hiam, daan dangka in hiam, hampa in hiam, buhtu in hiam lam taleh. 13 Michih nasep ahung kilang ding hi, ajiak pen ani in aphuangkhia ding hi, mei a suklat hiding ahihjiak in; tualeh meiin michih nasep bang chibang ahia chih achiansak ding hi. 14 Kua nasepahita in zong huatung a alam pen a omjing leh aman nuamman amu ding hi. 15 Hinanleh kua nasep ahita in zong akakleh ataan ding a, hinanleh amah pen meikuang paisuak bangin hundam in aom ding hi.
16 Pasian tempul na hi uh, tualeh nasung uah Pasian kha ateng chih theilou na hi uh maw! 17 Mi kuapeuhin Pasia tempul asukbuah leh amah Pasian in ahihsia ding, ua tempul nou nahi uhi. 18 Mi kuamah amah leh amah kikhem kei hen, nalak ua mi kuahiam hih leitung a pil akisak leh ahung pil theihna ding in mimaw hung suak hen. 19 Ajiak hih leitung pilna pen “Pasian ngaih in motna ahi, ajiak aman mipilte apil apil lepchiahna uah aman hi”. 20 Tualeh Laisiangthou ah :Toupa’n mipilte ngaihtuahna athawn ahi, chih athei hi,” chih gelh ahi. 21 Tuajiakin kuaman mihing suang kei hen, ajiak sil jousiah nou a ahi hi: 22 Paul hi in, Apollo hi in. Kifa hi in, leitung hi in, hinna hi in, sihna hi in, sil om nalaite hi in, sil hung om dingte hitaleh zong, sil jousiah nou a ahi hi, 23 tualeh nou Kris a na hi ua, Krist pen Pasian a ahi hi.
I Korinthmite 4
Krist sawltakte
1 Tuachi’n mi’n kou pen Krist sawltakte leh Pasian thugu’k enkawltute bangin hungthei uhen. 2 Hih ah enkawltu hihna ah pen mi gin-om hih apoimoh hi. 3 Hinanleh nou, nung ze-et uh pen kei a dingin sil neunou khat ahi, keimah leh keimah ngei zong ka ki ze-et kei hi. 4 Ajiak keiman bangmah kimawhsak na ding ka theikei hi. Hinanle ahung enkhiatu Toupa ahi hi. 5 Tuajiakin ahunma in, Toupa ahung paima in bangmah ze-et kei un. Aman mial a sil kiphualte vak ah ahung puakhia ding a, tualeh lungtang a ngaihtuahte zong ahung kilang ding hi, tuachiang inmichih in Pasian phatna atang chiat ding uhi.
6 Tualeh unaute aw, “Akigelh bang val a kuamah ngaihtuah louh ding chih kou a pat na jiltheihna ding uleh,” nalak ua kuamah in khat suang a khat tung aki uangsak ana om louhna ding un, hih thute nou jiakin kei leh Apollo etsak in ka kipia uhi. 7 Ajiak kuan ahia nang midang apat ahung tuamsak? Tualeh ahung kipialou bang ahia naneih? Tualeh mi piak nei nahihleh, bangding a akipialou bang a kisathei na hia?
8 Tuin navahta ua, tuin na hausata uh, kou panglou in kumpipate bangin vai nahawmta uh, kou zong noutawh vai ka hawmtheihna ding un a taktak a vaihawm hile uchin ka ut hi. 9 Pasian in kou sawltakte pen siding a mohpaih mite bangin a nunung pen a ahungkoih hi in ka ngaihtuah hi. Tuajiak in leitung leh, vangtungmite leh, mihingte mitmuh a etnop a bawl in ka om uhi. 10 Koupen Krist jiakin mimaw ka hi ua; hinanleh noupen Krist a mipil na hi uhi! Koupen ka hat kei ua, hinanleh noupen na hat uhi! Noupen na zah-om ua,koupen simmawh inka om uhi! 11 Tu hun mahmah in zong ka gilkial un, ka dangtak ua, saguak in ka om ua; vuak in ka om ua; inn beiin ka omuhi; 12 tualeh kakhut ua na semgim in ka gim mahmah ua; housiat a ka omun ka gualjawl ua, vuak a ka om unka thuak teitei uhi; 13 gensiat a ka om un, ka jawl lungdamua, minsiatsak a ka om un zong kangen ngutngut ua, tunitan in zong leitung silnin, silnin jousiah kipaikhawm bang a bawlin ka om uhi!
14 Na jumna ding un hihthute kagelh ahi kei a, hinanleh kata deihtakte bangin kung taihilh ahijaw hi. 15 Ajiak nou Krist ah hilhtu sangsawm nei nanle uchin pa tampi na neikei uhi. 16 Tuajiakin ka omdan juitute hiding in kung ngen hi. 17 Hih ding jiakin Toupa a ka tapa diehtak leh gin om Timothi na kiang uah kung sawl hi, aman pen gamchin a saptuamte ka hilhjel bangin, Krist a ka omdante nou ahung theikhiasak kik ding hi.
18 Na kiang ua hung painawnlou ding bangin khenkhat na ki uangsak uhi. 19 Hinanleh Toupa’n lem asak leh kung paibaih ding hi, tuachi’n ki uangsakte pen a thugen uh hilouin, hinanleh a silbawl theihna uh ka theita ding hi. 20 Ajiak Pasian gam pen thu ah a om kei a, silbawl theihna ah a omjaw hi. 21 Bang ahia nadeih uh? Na kiang uah chiang tawiin kung pai diam? Ahihkeileh itna leh lungnemna kha tawh kung pai diam?
I Korinthmite 5
Saptuam sung a angkawmna
1 Na lak uah kingaih a om chih thuthang a om hi, tuachibang kingaih Jentelte lak a zong om ngailou, mikhat in apa zi akitenpih chih! 2 Tualeh huachibang sil bawlpa pen nalak uapat nohkhiat ding a lunggel naneihtak sang un, naki uangsak pih jawsop uhi, 3 Ajiak keimah taksa a ka omlouh hangin, ka kha in kung om a, huachibang a gamtapa pen nalak ua om bangin a tung thu vai kahawm khinta hi. 4 I Toupa Jesu Krist min in, ka kha leh I Toupa Jesu Krist sil bawltheihna tawh na kikhop khawm chiang un na kiang uah a om hi, 5 tuachibang lmi pen I Toupa Jesu ni chiang a akha hundam a a omtheihna dingin, ataksa sukmangna dingin setan kiang piakding ka chi ahi.
6 Na kisaktheihna uh ahoih kei hi! “Tol themnoukhat in tanghou beu apum in ajelsuak jel chih theilou na hi uh maw.” 7 Tuajiakin tol sohlouh nahih mahbang un, tanghou beuthak na hihtheihna ding un tol luipen paisiang un, ajiak I paikan kut uh Krist pen goh in a omta hi. 8 Tuajiakin ankuang luini, tol li tawh hilou in, khansia leh gitlouhna tol soh tawh hilou in, hinanleh gin-omna leh thutak tanghou tol sohlouh tawh iluijaw ding uhi.
9 Ka laikhak ah kingaihhatte ki thuah pih lou ding in kung gelh hi. 10 Hih leitlung kingaihhat mite tawh hiam,huaiham mite tawh hiam, lepgute tawh hiam, ahihkeileh mililm biate tawh hiam kithuahpih mawng mawng louh ding chi ka hikei a, ajiak huachi ding hileh hih leitung apat na pawtkhiat uh angai ding hi. 11 Hinanleh tuin kuapeuh unau chih hingal a, kingaihhat hiam, ahihkeileh huaihalm hiam, ahihkeileh milim bia hialm, ahihkeilehl hangsan hiam, ahikeileh uain khamhat hiam, ahihkeileh lepguk-hat hiam, ahihleh kithuahpih louh ding in na kiang uah kung gelh ahi. Huachibang mi tawh nezong nekhawmn lou ding in.
12 Ajiak pualam mite ken ka ngaihkhok nang bang a om ei? Asung a omte hilou maw nou nangaihtuah jel uh. 13 Hinanleh pualam amite Pasian in angaihtuah jel hi. “Tuajiakin nalak ua pat in hua migiloupa notkhia un.”
I Korinthmite 6
Kristiante kihekna
1 Na lak uah kuapeuh in thubuai neile uchin, misiangthoute mai a tutlou in midiktatloute maiah na tutngam ding uai le? 2 Misiangthoute’n leitung vaihawm ding ahi uhl chih theilou na hiumaw? Ahoih, tuachia, leitung vai hawmding nahih uleh, sil neuptente vaihawm ding a chinlou na hi umaw? 3 Vantung mite vaihawm ding ihi uh chih theilou na hi uh maw? Tuachi ahihleh hih damsung silte ivaihawm talua tham ding uhi! 4 Tuachi ahihleh hih damsung silt vaihawm ding naneih un, saptuamte lak a mi simmoh huaipente natousak uai le? 5 Na jumna ding un hih ka gen ahi, nalak uah mipil khatbek omlo na hi umaw le 6 Hinanleh unau in unau dang khat nahek ua, huazong gingloumi maiah ahi nalai hi!
7 Tuajiakin khat leh khat na kihektuah uh pen na khialhna lianpi uh ahi. Bangding a kimohsak jawlou na hi ua? Bangding a khem a om jawmai lou na hi ua? 8 Hilou, noumah in na bawlkhial ua, nakhem uh, huazong na unaute tung ah ahi nabawl uh! 9 Mi diktatloute’n Pasian gam aluah kei ding chihl theilou na hi uh maw? Khem in om kei un, kingaihhatte hiam, milim biate hiam, angkawmte hiam, mihukte hiam, tawkuahukte hiam 10 gutate hiam, huaihamte hiam, uain khamhatte hiam, mi housiathatte hiam ahihkeileh lepgute hiam in Pasian gam aluah kei ding hi. 11 Tualeh nalak ua khenkhat huachibang nana hi uh, hinanleh I Toupa Jesu min leh Pasian kha a sopsiangthou na hita uh, siamtansak na hita uhi.
Na pumpi uh Pasian thupina dingin zang un
12 “Sil jousiah bawl kei dingin asiang a,” hinanleh sil jousiah bawl ahoihkim kei hi, sil jousiah bawl kei ding in asiang a, hinanleh bangmah silbawltheihna nuai ah ka omkei ding hi. 13 “Ante pen gilpi a ding ahi a, tualeh gilte pen ante a ding ahi,” hinanleh anih in Pasian in a hhmang ding hi. Tualeh pumi pen kingaihna ding ahikei a, hinanleh Toupa a ding ahijaw hi, tualeh Toupa pen pumpi a ding ahijaw hi. 14 Pasian in Toupa akaithou a, tualeh eit zong a silbawl theihna in ahung kaithou ding hi.
15 Na pumpi uh Krist hiangte ahi chih theilou na hi umaw? Ahitakleh Krist hiangte la in kijuakte hiang in ka bawl ding adiam le? Bawl deksuai lou e! 16 Ahihtakleh kijuakte tawh kizop peuhlmah pen pumkhat ahi uh chih theilou na hi umaw? Ajiak aman, “Anih un pumkhat ahita ding uh ahi,” achi hi. 17 Hinanleh Toupa tawh kizopte pen kha ah amah tawh pumkhat ahi uhi.
18 Kingaih taisan un, mihing khialhna jousiah pen pumpi pualam ahi; hinanleh kuapeuh angkawmna khialhna bawl in tuh ama pumpi tung ah sil a bawlkhial hi. 19 Ahihtakleh, na pumpi uh na sung ua om, Pasian a pan a namuh uh, Khasiangthou tempul ahi a, nou mauh a na hikei uh chih theilou na hi uh hiam? 20 Ajiak man a lei nahi uhi, tuajiakin na pumpi uh leh na kha un Pasian pahtawi un, hute pen Pasian a ahi.
I Korinthmite 7
Kitenna thu a dokna
1 Tuin ka kiang a nung silgelhte uh thu ah, pasal in numei sukkhaklouh ahoih hi. 2 Hitalehzong, kingaihnate a olouhna dingin pasal teng in amh zi chiat kineih hen, tualeh numei in zong ama pasal chiat kineih hen. 3 Pasal in azi kiangah ama tanding hun pia hen, tuachimah bangin numei in zong apasal kiangah pia hen. 4 Zi in ama pumpi tung ah thu anei kei a, hinanleh apasal in aneijaw hi. Tuachimah bangin pasal in zong a pumpi tung ah thu aneikei a, hinanleh azi in aneijaw hi. 5 Anngawlna leh thumna a na kipumpiak theihna ding ua, hunkhat sung pha satuak nahihkei ngal uleh akuamah kikham kei un. Tualeh na kidek zohlouh jiak ua setan in ahung khemlouhna dingin hung omkhawm jel un.
6 Hinanleh hithu pen thupiak bang a gen hilou in, phalsak thu in ka gen ahijaw hi. 7 Ajiak mi jousiah kei bang le uh ka deih hi, hinanleh michih in Pasian a pat silpiak tuamchiat inei uhi, khat in hihbang in adang in huabang in.
8 HInanleh zinei nailoute leh meithaite hichin kachi hi, keimah bang in omle uh amauh a ding in ahoih ding hi. 9 Hinanleh akidezoh kei ding ua ahihleh kiteng uheh, ajiak huk sang in kiten ahoihjaw hi.
10 Tualeh kitengsate kiang ah thu kapia hi, kei piak hilou in Toupa piak ahijaw: zi in apasal paisan kei hen; 11 Hinanleh apaisan leh pasal neilou in omjing hen. Ahihkeileh apasal tawh kilem kik uhen, tualeh pasal in zi khulkei hen.
12 Hinanleh adangte kiangah (Toupa hilou in, ken): ka gen ahi, unau kuapeuhin ginglou zi a aneih a, amahnu akiang a aom nuam jing leh khulkei hen. 13 Tualeh numei, gingloumi pasal a neiin apasal in akiang a omjing a ut leh khen kei hen. 14 Ajiak ginglou pasal pen azi jiakin suksiangthou in a om a, tualeh ginglou zi zong apasal jiakin suksiangthou in a om hi. Atuachih keileh na tate uh asiang kei ding hi, hinanleh tuin amauhte asiang uhi. 15 Hinanleh aginglou pen in akhen leh, khen mai hen. Sanggampa hiam, sanggamnu hiam pen huachibang thu ah ka’n in a om kei hi. Hinanleh Pasian in eite pen kilem dingin a hungsam hi. 16 Ajiak zi aw, na jpasal na hundam ding leh dinglouh bang nathei a? Ahihkeileh pasal aw, nazi na hundam ding leh dinglouh bang chin’n nathei a?
Pasian hungsap bang a hinding
17 Hinanleh Pasian in michih kilang a a hawmsak taak bangin, tualeh Toupa’n michih asaptak bangin, tuachi’n om hen tualeh lhuachibang in ken zong saptuam chin ah ka namdet hi. 18 Teptansa a asap mi a om ei? Tep tanlou hung hituan kei heh, tep tanlouh a asap mi a om ei? Tep tantuan kei heh. 19 Pasian thupiak juih chihlouh ngal, teptan bangmah ahikei a, teptanlouh zong bangmah ahituan kei hi. 20 Michih sap a aona uah omjing uhen. 21 Sila nahihlai a sap na hiai? Khawk saken, tualeh suahtaksak theih ding nahihleh hua ngamsuk in. 22 Ajiak sila hihlai a Toupa a sap tuh Toupa a zalen ahi, tuachimah bang mi zalen hihlai a sap zong Toupa sila ahi. 23 Man a leisa nahi ua, mi sila in omkei un. 24 Unaute aw, michih sap a aom bang chiat in, hua ah Pasian tawh omjing hen.
Nungak siangthoute leh meithaite thu a dokna
25 Tuachiang in nungak siangthoute tungtang ahihleh Toupa thupiak bangmah ka neikei hi. Hilehzong gin-om a om ding a Toupa hehpihna tang ka hih jiakin ka ngaihdan ka gen ding hi.
26 Tulai haksatna jiakin hih hoih ding in ka ngaihtuah hi, ka chi hi. 27 Zi a hen a om na hiam? Ki sutkhiat sawm ken, zi a henlouh a om na hiam? Zi neih sawm ken. 28 Hinanleh zi naneih leh zong sil na bawlkhial tuan kei hi, tualeh nungak siangthou in zong pasal nei nanleh sil a bawlkhial tuan kei hi. Hitalehzong tuachibang miten taksa ah gilmna a thuak ding uhi. Hinanleh ken na thuaklouh uh ka dieh hi.
29 Hinanleh unaute aw, hih ka gen ahi, hun atomta hi, tuachi’n zineite zong zi neilou bang in; 30 kapte zong kaplou bang in, kipakte zong kipalou bang in, sil leite zong aneilou bang in; 31 tualeh leitung zangte zong azangval lou bang in om hen, ajiak hih leitung omdan pen a beimang jing hi.
32 Hinanleh ken lungkhamna bei a na om uh kung deihsak hi, zi neilou in Toupa akipaksak theihna dingin Toupa lam silte angaihsak nak hi. 33 Hinanleh zi neiin azi a kipaksak theihna dingin, leitung silte a ngaihsak nak hi; 34 numei pasal nei leh nungak siangthou zong aki bang kei hi. Ajiak pasal neilou in pen pumpi leh kha lam siangthou tak a a omtheihna dingin Toupa lam silte a ngaihsak hi, hinanleh numei pasal neiin apasal kipaksak theih nang in leitung lam silte a ngaihsak nak hi.
35 Tualeh hihte nou phattuamna ding a ka gen ahi, nou tung a kham nang a ka gen ahi kei a, hinaomdan kilawm hun a na omtheihna ding un leh, Toupa na buailou a na septheihna ding ua ka gen ahijaw hi.
36 Hinanleh pasal khat peuhin a tanu a pallaini bei dong a aom sak a a tung a bawlkhial akisakleh pha asak bangin bawl hen. A khial kei hi, koppih neisak hen. 37 Hitalehzong lungsim dettak pua a, ki tulmohna taktak neilou a, hinanleh mahni utna thununzou a a tanu kepjing a lungtang a tumpa in a bawl hoih hi. 38 Tuachi’n a tanu koppih neisakpa in a bawlhoih hi, hinanleh koppih neisakloupa in abawlhoih sem hi.
39 Zi pen a pasal damsung teng dan a hen ahi a, hinanleh Toupa a om mi ahihnak leh a pasal asihleh a deihtaphot a kitenpih thei hi. 40 Hinanleh kei ngaihdan in ahihleh a om ngaiin om leh nuam asajaw ding hi, tualeh ken zong Pasian kha neiin zong ka ngaihtuah hi.
I Korinthmite 8
Milim biakna silpiak thu a dokna
1 Tualeh, milimte biakna sil piakte tungtang thu ahihleh. “Kuapeuh in theihna ineichiat uh,” chih itheichiat uhi. Theihna in mi aki satheisak a, hinanleh itna in mi asiamhoih hi. 2 Tualeh mi kuapeuh in banghiam thei a a kingaihtuah leh, atheih ding bang a theinailou ahi hi. 3 Hinanleh mi kuapeuh in Pasian a it leh, hua mipa mahmah theih in aom hi.
4 Tuajiakin milim biakna kithoihna silte neklam thu ahihleh, leitung ah milim kichi bangmah ahikei a, tualeh khatguak loungal Pasian dang a om kei chih ithei uhi. 5 Ajiak van ah hiam, leiah hiam pasiante chia minvohte om nanle uh, huachibang “pasian” tampi leh “toupa” tampi a om uh, 6 hilehzong eiding in Pasian khat guak, Pa a om a, amah a pan in siljousiah a om a, ei zong amah a om ihi uhi. Tualeh Toupa khat guak Jesu Krist a om a, ei zong amah jiak a om ihi uhi.
7 Ahihhang in hua theihna pen mijousiah ah a om kei hi, ajiak khenkhat in tutan in milim biakna pen biakna a ngaiin na nejing ua, asia leh pkha theihna uh ahatlouh jiakin a hihnin veu uhi. 8 Hinanleh nek in Pasian pahtat ahung lawhsak ahikei a, ajiak inek jiak un ihoihjaw uh ahituan kei a, nekei leizong isiajaw tuan kei uhi.
9 Hinanleh pilvang un, atuachih keileh a suahtakna uh bangchi hiam in mihatloute a dingin pukna ahung suak kha ding hi. 10 Ajiak, nang”thiehna neimi,” kuahiam in milim biakna ankuang um a tou hungmu taleh; amah sia leh pha theihna hatloupa pen milim biakna silte neding in hansanlawh talou ding maw? 11 Tualeh, “na theihna!” jiakin unau hatlou asih tang a Krist in asihsak pen a mangthang ding hi. 12 Hinanleh tuachia unau tung a na khialh ua, asia leh pha theihna hatlou nasuk liamsak chiang un, Krist tung ah nakhial uh ahi. 13 Tuajiakin annek in ka unau apuksak leh ka unau a puklouhna ding in sa ka nekik nawn mawng mawng kei ding hi.
I Korinthmite 9
Sawltakte thuneihna leh mohpuakna
1 Sawltak hilou ka hi maw leh? Zalenlou ka hi maw leh? I Toupa Jesu mulou ka hi maw leh? Nou Toupa a ka nasep hilou na hi uh maw leh? 2 Midangte a ding in sawltak hikei mahleng zong, nou a dingin ginmoh omlou takin kahi ahi, ajiak Toupa a ka sawltak hihna chiamtehna noumah nahi uhi.
3 Kei hung ze-ettute kiang a ka dawnna hih ahi: 4 Nek nang leh dawn nang ah thu neilou ka hi hiam? 5 Sawltak dangte leh, Toupa a unaute leh, Kifa bang a unaunu khat kizohpih a, zi a neitheilou ka hi uh hiam? 6 Ahihkeileh na seplouhna dingin keileh Barnaba in thu neilou ka hi uh hiam? 7 Galkapte kua ahia aneihsa seng a galkap a kuanngai? Grep huan bawlngal a agah nelou kua aom ei? Ahihkeileh ganhon khawingal a anawi nelou kua aom ei?
8 Hih thute mihing ngaihdan guak a gen ka hi hiam? Ahihkeileh danthu zong huamah genlou amaw? 9 Ajiak Mosi danbu ah, “Bawngtal in buh a chillai in amuk kanken,” chih gelh ahi. Pasian in bawngtalte ding guak ngaihtuah adiai le? 10 Ahihkeileh aman eite ding jiak mah a agen adiai le? Eite ding jiak a agelh ahi talua hi. Loukaipa’n kinemtak a akaih ding ahi a, tualeh kinemtak a buh veltu in zong akinepna amuh ding ahi. 11 Kou nou a ding a khalam silte tuh ka hih uleh, na taksa lam silte uh at le ung sil thupi ahi diai le? 12 Midangte’n na tung ua hih thuneihna tang ahih uleh, kou zong tangsem jawlou ding ka hi uh maw?
Hitalehzong hih thuneihna ka zongkei uhi, Krist tangthupha kadal louhna ding un bangkim ka thuakjaw uhi. 13 Sil siangthoua biakna nasemten tempul a silte ane uh, tualeh maitam a nasemte’n maitam sillate ah tan anei uh chih thei-lou na hi uh hiam? 14 Tuachimah ang a tangthupha gentute pen tangthupha mah a ahin ding uh ahi chi’n Toupa’n thu apia hi.
15 Hinanleh ken hih silte khatbek ka zangkei hi, tualeh hih silte ka tung kibawl leh zong ka chikei hi. Ajiak kuahiam in ka kisuanna pen bangmah lou a abawl sang in kei dingin sih ahoihjaw hi! 16 Ajiak tangthupha gen nanleng zong suan ding bangmah ka neikei hi. Bawllouh theihlouh ka tung a ki-nga ahihjiak in, tangthupha gen keileng katung agik ding hi! 17 Ajiak hih sil uttak a bawl ka hihleh nuamman muh ding kanei hi, hinanleh ka utthu lou a bawl ka hihleh tangthupha kepna ka khut a piak ka hi ding hi. 18 Tualeh ka nuamman bang ahia le? Tangthupha ka gen hiang a thangthupha a ka thuneihna aval a ka zaklouhna ding a Krist tangthupha athawn a pia ka hihtheihna pen ahi.
19 Mijousiah a pat zalen himah nanleng, mi tamsem kalak theihna dingin mijousiah sila in ka kibawl hi. 20 Judate ka laktheihna dingin Judate kiangah Judami angin ka om a, dan nuai a omte ka laklut theihna dingin, dan nuai a omte kiangah dan nuaia om bangin ka om hi, dannuai a omlou hinan leng zong. 21 Dan neiloute ka laklut theihna dingin, dan neiloute kiang ah dan neilou bangin ka om hi, hinanleh Pasian dan nuaia omlou hituanlou in, Krist dan nuai a omjaw in. 22 Mi hatloute ka laklut theihna dingin, mi hatloute kiangah mi hatlou bangin ka om hi, bangchidan hiam a mi khenkhat bek ka hundam theih nang in mijousiah kiang ah sil bangkim in ka kibawl hi.
23 Noutawh hih ah tan ka neihtheihna dingin tangthupha jiakin hih ka bawl hi. 24 Kitaidemte aun un atai ua, Hinanleh khat guakin nuamman a mujel uhi chih theilou nahi uh hiam? Na gahtheihna ding un tuachimah bangin tai un. 25 Tualeh kuapeuh lohman muhsawm a kidemna a pangmi in sil jousiah ah a kithunun uhi. Amau’n lallukhu sethei muhna ding a bawl ahi ua, hinanleh en lallukhu setheilou dingin I bawl uh ahi. 26 Tuajiakin, huachibang in katai a, ajiakbei hilou in. Huihkhua a leltak tumte bang hilou in kapang hi. 27 Hinanleh ka pumpi ka thunun a, ka thunuai ah ka koih hi, atuachih keileh midangte kiang a tangthupha ka genzoh nungin keimahpi chinglah in ka om kha ding hi.
I Korinthmite 10
Milim biak thu a vauna
1 Tualou zong unaute aw, hite na theihlouh uh ka deihkei hi, ipu ipate’n a un un meipi nuai ah ana om ua, tualeh aun un tuipi ana kan ua. 2 A un ua meipi leh tuipi a Mosi kiang a baptis a aom ua. 3 Tualeh a un ua khalam an kibang anek ua 4 tualeh aun un khalam dawn ding kibang a dawnchiat uhi. Ajiak amauhte juitu khalam suangpi a a dawnchiat uhi; hua suangpi pen Krista hi. 5 HInanleh alak ua mi tampite tung ah Pasian a lungkim takei a, gamdai ah apumpite uh thehjakin aomta uhi.
6 Sil gilou alunggulh bang ua i lunggulh louhna ding a hihte pen eite a ding a etsakna ahih ding ahi, 7 tualeh alak ua mi khenkhat milim biami ahihmah bang un milim biaami hikei un. “Mipite pen neing leh dawn dingin atou ua, tualeh kimawl dingin ading jel uh,” Chih gelh bang in. 8 Alak ua mi khenkhatten nulehpa kal thanghuaina a bawljiak un, nikhat in sangsawmih leh sangthum apuklup lawh bang un eaten huabang mohna I bawlkei ding uhi. 9 Alak ua khenkhat in Toupa a ze-et ua gul a hihmang a aom bang un, enjaw Krist I ze-et kei ding uhi. 10 Tualeh alak ua khenkhat aphun ua, hihmangpa hihmang a aom bang un iphunkei ding uhi.
11 Tuin hihte jousiah etsakna dingin a tung uah ana tung hi, tualeh ei leiung huntawp hung tunnate kiangah thuhilhna ding a gelh ahi.
12 Tuajiakin, ading a kingiahtuahte pilvang hen, atuachih keileh apuk ding hi. 13 Mihing thuakval natung uah khemna atung ngai kei, hinanleh Pasian a gin-om a, aman na thuakzoh val uh khemna natuah ding uh aphalkei ding, hinanleh nathuak zohna ding un khemna jousiah a na taikhiat theih nang lampi ahung bawlsak jaw ding hi.
14 Tuajiakin, ittakte aw, milim biak taisan un. 15 Mipilte bangin thu ka gen ahi, ka thugen ngaihtuah un. 16 Gualjawlna nou a gual kajawl uh, Krist sisan kipawlkhawm pihna hilou amaw leh: Tanghou kabal kek uh Krist pumpi kipawlkhawm pih na hilou amaw leh? 17 Ajiak eite tampi hinanlei zong, tanghou beukhat, pumpi khat ihi uhi.
18 Taksa dan ah Israelte en sin ua, kithoiha sa nete, maitam tawh tan neikhawm hilou ahi uai le. 19 Ahihleh bang ahia ka gen ding? Milim pen sil banghiam khat ahi a, ahihkeileh milim biakna a sil kilante zong sil banghiam khat ahi chi ka hiai le? 20 Jentelte kithoihna pen Pasian kiang a kithoihna hilou in, dawite kiangah akithoih u chi ka hijaw hi. Nou dawite tawsh na kipawlkhawm uh kung deihsak dei hi. 21 Toupa nou leh dawi noun a dawnkhawm thei kei ding uh, Toupa dohkan ah leh dawite dohkan ah na nekhawm thei kei ding uhi. 22 Ahihkeileh Toupa thangsia ding a hantawk sawm ihi uai leh? Eite amah sang a hatjaw ihi uh hiam?
23 “Sil jousiah kei dingin asiang a,” hinanleh sil jousiah kei dingin ahoih kim kei hi. Sil jousiah kei ding in asiang a, hinanleh sil jousiahin mi a bawlhoih kei hi. 24 Mi kuamah in amah guak hoihna ding zjongjaw louin, midangte hoihna ding zongjaw hen.
25 Sa a juakna mun a kijuak taphot sialehpha theihna jiakin bngmah dongse louin ne un. 26 Ajiak, “ Leitung leh asung a om jousiah Toupa a ahi hi.”
27 Ginglou mite lak a kua hiam in an neding a ahung chial a, tualeh pain a ut leh namai a kilui taphot sia leh pha theihna jiak in bangmah dongse louin ne in. 28 Hinanleh mi kuahiam in, “Hih pen milim kiang a kithoihna ahi,” chia ahung hilh leh amah ahung hilhpa jiak leh sia leh pha theihna jiakin nekei un, ajiak leitung leh asung a om jousiah Toupa a ahi hi. 29 Nang mah sia leh pha theihna chi ka hikei a.
Hinanleh midante sia leh pha theihna chi ka hijaw hi. “Achihleh bang ding a midangte sia leh pha theihna in ka zalenna thunun ahia? 30 Hinanleh kipak tak a ka nek leh bangding a kipahthu ka genna tung a gensiat a om ka hia?”
31 Tuajiakin, nane un zong nadawn un zong nabawl taphot uh Pasian thupina ding ngen in bawl un. 32 Judate hiam, Jentelte hiam ahihkeileh Pasian saptuamte hitaleh a thangpaihna ding un bawl kei un. 33 Keimah phattuamna ding zonglou a, hinanleh hundam a a omtheihna ding ua mi tampite phattuamna ding a, sil jousiah a michin teng ka kipaksak mahbang in.
I Korinthmite 11
Puan khuk ding
1 Kei Krist omdan latu ka hih mahbang in nou kei omdan latu hi un. 2 Tualeh unaute aw, sil bangkim a nungtheih ua, dante kunghilh bang jel a nakep jing jiak un kung pahtawi hi. 3 Hinanleh pasal jousiah lutang Krista hi, numei lutang pasal ahi, tualeh Krist lutang Pasian ahi chih natheih uh kung deih hi. 4 Pasal kuapeuh alu khuhsa a thumna nei, ahihkeileh thugen jousiahin alutang a zahbawllou ahi hi. 5 hinanleh numei alu khuhlou a thumna nei hiam ahihkeileh thugen hiam jousiahin alutang a zahbawllou ahi hi. Ajiak huachibang a bawlte pen asam kiheu tawh kibang ahi. 6 Ajiak numei in alu akhuh kei ding leh asam heukiau hen, hinanleh numei ding a sam heu hiam ahihkeileh heukiau a jumhuai leh kikhuh hen. 7 Pasal pen Pasian lim bang leh a tupin ahihjiak in alu akhuhlouh ding mawng ahi, hinanleh numei ahihleh pasal thupina ahi; 8 ajiak pasal pen numei a pat a siam ahikei a, hinanleh numei pen pasal a pat siam ahijaw hi. 9 Pasal pen numei a ding a siam zong ahikei a, hinanleh numei pen pasal a ding a siam ahijaw hi. 10 Hih jiakin numei in pasal thuneihna chiamtehna in leh, vantungmite jiakin alu akhuh ding ahi. 11 Hitalehzong Toupz silgel dan ah pasal lou in numei a omthei kei a, numei louin pasal a omthei kei hi. 12 Ajiak numei pen pasal apat siam ahihmah bangin pasal zong numei jiak a piang ahi. Hinanleh sil jousiah Pasian a kipan ahi.
13 Noumah kingaihtuah uh, numei in alu khuhlou a Pasian kiang a thumna aneih akilawm ei. 14 Pasal in samsau aneih leh amah a dingin ajumhuai hi, chih ngaina dan in zong nou hung theisak hilou amaw, 15 hinanleh numeiin samsau aneihleh amah a dingin a thupin ahijaw hi, ajiak asam pen akhuhna ding a piak ahi. 16 Hinanleh mi kuahiam a selkhahleh huachibang tawndan inei kei uhi, Pasian saptuam pawlten zong anei kei uhi.
Toupa nitak an
(mat.26.26-29; Mrk14.22-25; Luk.22.14-20)
17 Ahihhang in nou hihthu kung hilhna ah kung phatthei kei hi, hoihjawksem nang a kikhawm hilou in, hinanleh siatjawksem nang a na kikhopjel jiak un. 18 Ajiak amasapen a saptuam a na kikhop chiang un nalak uah kilang khenna a om nak chih kaja hi, tualeh ging zong ka gingta hi. 19 Ajiak ataktak a kipomte akilat theihna dingin nalak uah ki langkhenna aom ding mawng ahi. 20 Tuajiakin, munkhat a nung paikhawm chiang un Toupa nitak an nektheihna gual ahi kei hi. 21 Ajiak nanek chiang un michih midangte masang in noumau nitak an na kinek chiat uh, tuachi’n khenkhat agilkial a, adang in akham uhi. 22 Bang chidan ahia? Nekna ding leh dawnna ding inn kineihlou nahi uh maw? Ahihkeileh Pasian saptuamte na simmoh un, bangmah neiloute na zahlaksak uh maw? na kiang uah bang ahia ka gen ding? Kung phat ding a diam? Hih thute ah kung phat kei ding hi!
23 Ajiak Toupa kiang a ka muh pen nou kung hilhsawn ahi, tuachia Toupa Jesu’n matsak a aom ding jan in tanghou ala a, 24 tualeh kipakthu agenzoh in abalkek a, la unla, ne u, “Hih kataksa nou a ding a kipia pen ahi, nung theihjing na ding un hih bawljel un,” achih. 25 Tuachimah bangin, nitak an anek zoh in nou ala a, “hih jnou ka sisan a thukhunthak ahi, na dawn teng un keimah nung theihjing na ding un hih bawljel un,” achih.
26 Ajiak hih tanghou nanek ua, hih nou nadawn teng un a hungpai kik masiah Toupa sihna na phuangjak uh ahi hi. 27 Tuajiakin kuapeuh chinloupi a hih Toupa tanghou ne a anou dawn tuh Toupa taksa leh sisan tung ah siamlouh atang ding hi. 28 Hinanleh mi amah kienchianjaw hen, tuachi’n tanghou ne henle nou dawn hen. 29 Ajiak Toupa taksa in a etsak theiloupi a, kuapeuh netakloupi a ne leh dawntakloupi a dawn in amah siamlouh kitanna dingin ane in adawn ahi. 30 Hihjiakin nalak ua mi tampi na jawngkhal ua, na china ua, tualeh tampi na sihlota uhi. 31 Ajiak eimah leh eimah ki enchain lei vaihawmsak a omlou ding ihi uhi. 32 Hinanleh vaihawmsak a i om un zong leitung tawh siamlouh tang a i omlouhna ding un Toupa taihilh in i om uhi.
33 Tuajiakin, unaute aw, neding a na kikhop chiang un, khat leh khat kingakkhawm chiat un. 34 Hinanleh na kikhopna uh vaihawmna na thuaklohna uh ahihlouh nang in mi kuapeuh agil akial leh a inn ah ne hen, tualeh thudangte pen kung paichiang in kalem siang na ding hi.
I Korinthmite 12
Khasingthou silpiakte
1 Tuin unaute aw, khalam silpiak pen na theilouh ding uh ka deihkei hi. 2 Jentelte nahi ua, pui a na om bangjel un, hih milim hamtheiloute lam ah puakmang in na om jel uh chih nathei uhi. 3 Tuajiakin kuaman Pasian kha a thu gen in, “Jesu pen, hamsia thuak ahi!” achi ngaikei, chih kung theisak hi.
4 Tuachi’n silpiak tuamtuam a om a, hinanleh kha khat ahi. 5 Tualeh nasepdan tuamtuam a om a, hinanleh Toupa khat ahi. 6 Tualeh na septheihna tuamtuam a om a, hinanleh bangkim a bangkim bwltu Pasian khat a om hi. 7 Hinanleh phattuampih chiatna ding in kha kilakna mitng kiang a piak ahi. 8 Ajiak mikhat kiangah kha in pilna apia a, midang kiangah hua kha mah in theihna apia hi. 9 Midang kiangah hua kha mah in ginna apia a, midang kiangah hua kha mah in sukdam theihna silpiakte apia hi. 10 Midang kiangah sillamdang bawl theihnate apia a, midang kiangah thu gentheihna apia hi. Midang kiangah khate theihkhen theihna apia a, midang kiangah ham tuamtuam a thu gentheihna apia hi. Midang kiangah ham tuamtuam lehtheihna apia hi. 11 Hinanleh huate jousiah khakhat mah in michih kiang a adeih bang jel a hawm chiat in asem hi.
Pumpi khat a hiang tampite
12 Ajiak taksa pumpi khat ahi a, hiang tampi anei hi, hinanleh hiang jousiahte tam mahle uh pumpikhat ahi uhi, tuachimah bangin Krist zong khat ahi. 13 Ajiak eite Juda hi in Jentelte hitalei, sila hi’n silalou hitalei, I un ua pumpi khat a om dingin khakhat a baptis in I om uhi, tualeh kha khat dawnsak in I om uhi.
14 Pumpi pen hiangkhat guak ahi kei a, hinanleh hiang tampi ahijaw hi. 15 Keng in, “khut ka hihlouh jiakin pumpi ah ka jpangkei,” chileh, hih jiakin pumpi ah panglou ahithei diai le. 16 Tualeh bil in, “Mit ka hihlouh jiakin pumpi ah ka pangkei,” chileh, hih jiakin pumpi a panglou ahi thei diai le. 17 Pumpi pen apumpi’n mit hitaleh, khuajakna hitaleh gimnam theihna khoiah a om ta dia? 18 Hinanleh Pasian in hiang chinteng pen pha asak bangin pumpi ah akoih hi. 19 Tualeh aun un hiang khat guak hitaleh pumpi khoiah a om tadia! 20 Hinanleh tuin hiang tampi hinanleh uh, pumpi khat guak ahi.
21 Tualeh mit in khut kiangah, “Bangmah in kung poimoh kei!” a chithei kei, lutang in zong keng kiangah, “Bangmah in kung poimoh kei!” a chithei tuan kei hi. 22 Chithei lou, chihnak sangin, pumpi hiang hatlou a kilangte zong apoimoh mahmah hi; 23 tualeh pumpi hiang ngaihsak thamlou a ingaihtuate huate mah izahtak bawljaw ua, tualeh ihiang kilawmloute’n naktak in hoihna aneijaw uhi, 24 hinanleh ihiang kilawmte’n huachibang apoimawh kei uhi. Hinanleh Pasian in poimoh thamlou hiangte pen zahbawl sem in pumpi a lemkhawm hi. 25 Tuachia pumpi a kikhenna aom louh a,hinanleh hiangte khat leh khat a kingaihsak chiat theihna ding un. 26 Tualeh hiang khat in athuak leh hiang tengteng in athuakpih jel a, tualeh hiang khat pahtawi a aom leh hiang dang jousiahin a kipahpih jel uhi.
27 Tuin nou pen Krist pumpi na hi ua, a mimal mal in hiangte na hi uhi. 28 Tualeh Pasian in khenkhat saptuam ah ahung koih a, amasapen in sawltakte, anihna ah Jawlneite, athumna ah siate,huazoh in sillamdang bawltute, huazoh in sukdamtheihna silpiakte, panpih-theihnate, vaihawm siamnate, ham tuamtuam a hamtheihnate. 29 Aun un sawltak ahi uai? Aun un Jawlnei ahi uai? Aun un sia ahi uai? Aun un sillamdang bawltheitute ahi uai? 30 Aun un sukdamtheihna silpiakte anei uai? Aun un hamtheihlouh in thu a genthei uai? Aun un hamtheihlouhte aletthei uai? 31 Hinanleh silpiak hoihpente lunggulhjaw un, tuachi’n lampi hoihjaw kung musak ding hi.
I Korinthmite 13
Itna
1 Mihing hamte leh vantungmite ham in thu gennan leng itna kaneih kei leh dak ging hiam, jam ging hiam ka bang leltak ding hi. 2 Tualeh thugentheih na silpiak nei in, thugu’k jousiah leh theihna jousiah theisiang nanleng, tualeh mual kisuansak theihna khop ginna nei nanleng, itna kaneih keileh bangmah lou ka hi. 3 Tualeh ka neih jousiah migentheite vak nang in piasiang in ka pumpi haltum dingin pia-ngam nanleng, itna kaneih kei leh bangma aphatuam kei hi.
4 Itna in adawhjou a, a migi a, itna in a engsia kei a, itna aki liansak kei a; 5 itna aki lawmlou in a gamta kei a, amah ding guak akhual kei a, sil giloua ngaihtuah kei a; 6 diktatlouhna ah akipak kei a, hinanleh thutak ah akipak hi. 7 Sil jousiah puakdan asiam a, sil jousiah agingta a, sil jousiah alam en a, sil jousiah athuak paisuak hi.
8 Itna bangchik mah in alohsam ngai kei ding. Hinanleh thugen theihnate om nanleh zong a hungbei ding a, ham theihlouhte omnanleh ahung tawp ding a, theihnate om nanleh a hungbei ding hi, bangmahlou ahung suak ding hi. 9 Akimlou in ithei ua, akimlou in igen uhi.10 Hinanleh abukim a hungtun chiangin akimlou pen sukbei ahita ding hi.
11 Ka naupan lain, naupang ham in ka ham a, naupang theih in kathei a, naupang ngaihtuah in ka ngaihtuah hi; hinanleh kungpichin tak in naupang silte ka koihkhiata hi. 12 Ajiak tuin limlang ah chianglou tak in imu ua, hinanleh huahun chiangin kimaituah in I muta ding hi. Tuin akimlou in ka thei a, hinanleh huahun chiangin kei hung kitheih bangin ka theita ding hi.
13 Tualeh tuin ginna tawh, kinepna tawh , itna, hihteng thum a omkhawm uhi, hinanleh hihteng lak a lianpen tuh itna ahi.
I Korinthmite 14
Kha silpiak dangte
1 Itna delhjui jel unla, khalam silpiakte lunggulh un, adiak in thu gentheihna lunggulh un. 2 Ajiak hamtheihlouh a ham in mi kiang a thugen hilou in, Pasian kiang a gen ahijaw hi, kuamah in a thugen a theihlouh jiakin, hinanleh kha a thugu’k gen ahi. 3 Hinanleh thugentu in mihing kiangah siamhoihna thute, hasotna thute, tualeh khamuanna thute agen hi. 4 Hamtheihlouh a thugen in amah guak a kibawlhoih a, hinanleh thugenmi in saptuam asiam hoih hi.
5 Na un ua hamtheihlouh a na ham uh kung deihsak a, hinanleh thu na gentheih uh kung deihsakjaw sem hi. Ajiak saptuam siamhoih nang a alehkhiat kei ngal uleh hamtheihlouh a ham sang in thugenmi ahoihjaw hi. 6 Hinanleh tuin unaute aw, hamtheihlouh a ham in na kiang uah hungpai taleng, kilakna in hiam, theihna in hiam, thugentheihna in hiam, ahihkeileh thuhilhna in hiam in na kiang uah genkei leng, bang in kung hih phatuam dia?
7 Sil hinna neilou gingthei, theile hiam, ahihkeileh kaihging ngei zong omjia neia agin kei leh bang kimut a, bang kitum chih bang a chi ki theihtheih diai? 8 Ajiak pengkul mumal beiin kimutleh, kua ahia galdou a kisa ding? 9 Tuachimah bang a nou zong ham theihbaihlam a nagen kei uleh, bang kigen ahia chih bang achi kitheih dia, ajiak huihkhua a ham na hi giap ding uhi! 10 Leitung ah halm chi tuamtuam om ahi maithei, hinanleh omjia neilou khat bek a om kei hi. 11 Tuajiakin, hua ham in a gen ka theih kei leh hua thugenpa dingin kei pen gamdangmi ka hi a, tualeh kei a dingin agenpa zong gamdangmi ahi ding hi. 12 Tuachimah bangin khalam silpiakte a na phattuam ngaih bang un, saptuamte siamhoihna iding a nung khantheihna ding uh zong un.
13 Tuajiakin, hamtheihlouh a ham in alehdok theihna ding in thum hen. 14 Ajiak hamtheihlouh in thum leng, kakha injaw ka thum a, hinanleh ka theihna aphatuam kei hi. 15 Ahihleh bangchi’n ka bawl tadiai? Kha in thumna ka nei ding a, thiehna in zong ka thum ding hi. Kha in la kasa ding a, theihna in zong la kasa ding hi. 16 Atuachih keileh, kha a na gualjawl chiangin mimawlpa in na kipak thugen ah na thugen theiloupi in bangchi’n “Amen” achi thei dia? 17 Nang kipathu nagen hoihngel a, hinanleh midangte asiamhoih tuan kei hi.
18 Noute jousiah sangin hamthiehlouh a thu ka gen tamjawk jiakin Pasian kiangah kipahthu ka gen hi. 19 Hinanleh saptuam lak ah pen hamtheihlouh a thu singkhat ka gen sang in, ka thugen a midangte ka hilhtheihna ding in ka theihna in thu tengnga ka gen jaw ding hi.
20 Unaute aw, thiehsiamna lam ah naupang kei unla, gitlouhna lam ah naupang un, theihsiamna lam ah piching un. 21 Dan laibu ah,
“Hamdang mite leh gamdang
mite muk leh kam in hih mite kiangah thu ka gen
ding a,
huachi’n zong ka thu a ngaikhia
tuan kei ding uhi,
Toupa’n achi,”
chih gelh bang in.
22 Tuajiakin hamtheilouh pen gingtute ding hilou in, hinanleh gingloute dingin chiamtehna ahi, hinanleh thugen theihna gingloute a ahi kei a, hinanlehl gingteute ding ahijaw hi.
23 Tuajiakin, saptuam pumpi mun khat a na kikhopna uah mijousiah hamtheihlouh ij ham tale uchin, tualeh huasan ah athei nailou leh gingloumi hungpai taleh, nou mimaw hungchi talou ding uh maw? 24 Hinanlehl mijousiah in thu gen tale uchin, gingloumi hiam ahihkeileh atheilou mi khat huasan ah hungpaileh, agitlouh dan na un un theihsak in a omta idng a, na un ua awimoh ahung hita ding hi, 25 tualeh a lungtang a thuguk te hihlat in a om ding a, tualeh khupbok a puk in Pasian abia ding a, nalak uah Pasian a om taktak hi! Chih agen ding hi.
Saptuam sung a thupiak
26 Bang chihding ahi tadiam unaute aw? Nung kikhop chiang un michih I phatna la bang, thuhilhna bang, hamtheihlouh bang, kilakna bang, hamlehna bang nanei chiat uh, sil jousiah bawlhoihna dingin hihen. 27 Mi kuapeuh in hamtheihlouh a thu agen leh, nih in hiam, ahihkeileh atamtawp in thum in gen hen, huazong kikhel jel in hi hen, tualeh mikhat in let khia hen. 28 Tualeh alettu ding a om kei leh saptuam kikhopna ah hamlou in om mai hen, amah leh Pasian kiangah kigen hen. 29 Jawlneite nih hiam thum hiam in gen uhenla, adangte’n agen uh ngaihtuah uhen. 30 Hinanleh akiang a tou midang kiang a banghiam ahung kilakleh, amasapen dai hen. 31 Ajiak mijousiah in atheih a, mijousiah khamuang a a omtheihna dingin na un un khat khat in nagen thei uhi. 32 Tualeh thugentute kha pen thugentute thuthu in aom uhi, 33 Pasian, buaina Pasian ahikei a.
Hinanleh misiangthoute saptuam jousiah a ahih mah bangin khamuanna Pasian ahijaw hi. 34 Na numeite uh saptuam kikhopna ah dai uhen, ajiak amauh a dingin thugen phal ahi kei hi, hinanleh dan laibu in zong agen bangin thumanna nuai ah omjaw uhen. 35 Tualeh banghiam theihnuam aneih uleh innlam ah apasalte uh dong uhen, ajiak saptuam kikhopna a numei thugen pen ajumhuai ahi.
36 Ahihleh Pasian thu nou kiang a hung kipankhia ahi maw leh? Ahihkeileh noukiang guak a hungtung ahi maw leh? 37 Mi kuapeuh in thugentu hiam, ahihkeileh khami hiam a akingaihtuah leh na kialng ua ka thugelhte Toupa thupiak ahi chih thei un. 38 Hinanleh mi kuapeuh atheilou a om leh amah pen theilou in om mail hen.
39 Tuajiakin, unaute aw, thugen lunggulh unla, hamtheihlouh a ham kham kei un. 40 Sil jousiah hoitak leh kituak tak a bawl hi hen.
I Korinthmite 15
Krist thohkikna
1 Huate lou zong unaute aw, na kiang ua ka tangthupha gen, pm zong napom uh, tualeh huamah a na dingna uh kung theisak kik hi. 2 Na kiang ua ka thugen na pomdet uleh huamah ah hundam in na om ding ua, atuachih keileh, na ginna uh mokna asuak ding hi.
3 Ajiak amasapen in ken zong ka muh pen nou kung hilhsawn hi, chih Pasian Laisiangthou dungjjui in Krist in ikhialhnate jiakin asi a; 4 tualeh vuiin a om a, Laisiangthou dungjuiin nithumni in a thoukikta hi. 5 Tualeh Kifa kiangah akilak a, tuazoh in sawm leh nihte kiang ah. 6 Tuanung in unau ja nga sang a tamjaw kiangah khatvei thu I a kilak a, alak ua tamjawte tutan in adam nalai ua, hinanleh khenkhatte a ihmute uh. 7 Tuanung in Jakob kiang ah a kilak a, tuachi’n sawltakte tengteng kiang ah.
8 Tuachi’n a nunung pen I aunlou bang apiang kei kiang ah akilak hi. 9 Ajiak sawltakte lak a neupen ka hi a, saptuamte ka bawl gentheih jiakin sawltak chihtak zong ka hikei hi. 10 Hinanleh Pasian hehpihna jiakin ka hihhih ding ka hita hi, tuleh ahehpihna hung piak a thawn in a omkei a, hinanleh amauhte teng sang in ka semgim jaw hi, hinanleh kei sep hilou in Pasian hehpihna ka kiang a om in asemjaw hi. 11 Tuajiakin, kei hi in, amauh hitaleh, tuachi’n ka gen ua, tuachi’n noun a gingta uhi.
Eite thohkikna
12 Tuin Krist misi lak apat athoukik chih igen ngal leh bangchidan a nalak ua khenkhat in misi thohkikna a omkei chi na hi ua? 13 Atuachihleh misite thohkikna a om keileh Krist zong a thoukik kei ding hi; 14 tualeh Krist a thohkik keileh ka thugen uh zong a thawn ahi ding a, na ginna uh zong athawn ahi ding hi. 15 Ahi, Pasian in Krist akaithou hi chia, Pasian theihpihtu hi a thu ka gen jiak un, kou Pasian theihpitu diklou bangin ka omta uhi, hinanleh misi thohkikna omlou takpi ahihleh, amah zong akaithou kei ding hi. 16 Ajiak misite athohkik kei uleh Krist zong kaithoh in aomkei ding hi. 17 Tualeh Krist kaithoh a aom kei leh, na ginna uh zong athawn ahi ding a, na khialhna uah na om nalai ding uhi. 18 Tuachi’n Krist a ihmute zong a mangthang ahita ding uhi. 19 Tu damsung guak a ding a Krist a kinepna ineih uleh, mi tengteng lak a mi hehpihhuai pen ihi ding uhi.
20 Hinanleh tuin Krist pen misi lak a pat kaihthoh in a omta a, ihmute lak a gah masapen a hunghita hi. 21 Mihing khat jiak a sihna ahung om jiakin, mihing khat jiak mah in lmisi thohkikna zong ahung om hi. 22 Ajiak, Adam a mi tengteng asih mahbang un, Krist ah mi tengteng suk hing in a om ding uhi. 23 Hinanleh michih amauh hun chiat ah, Krist gah masapen ahi a, tuazoh chiangin ahung paikikna ah Krist ate ahi ding hi. 24 Tuachi’n atawp a hungtung ding, huahun chiangin vaihawmna jousiah leh thuneihna jousialh leh silbawltheihnal jousiah sumang in Pasian Pa king ah a kumpi gam apiata ding hi. 25 Ajiak a melmate jousiah akeng nluai akoih masiah aman vai ahawm ding hi. 26 Melma nunung sukmang a om ding pen ahihleh sihna ahi. 27 Ajiak Pasian in sil jousiah akeng nuai ah akoih ta hi. Hinanleh, sil jousiahl a thlunuai ah akoita achih in, a thunuai a sil jousiah koihsakpa Pasian a huamkha kei, chih akilang hi. 28 Tualeh sil jousiah a thunuai a aom cchiangin, Tapa ngei zong sil jousiah a thunuai a koih pa nuai ah a kituhlutta ding hi.
29 Atuachih keileh, misite a ding a baptisma atansak uh bangding ata diam? Misite toukik mawngmawng lou ding ahih uleh, bangding a misite a ding a baptisma atansak uh ahia? 30 Tualeh bangding a eite zongdakkal teng alau aomjing ihi ua? 31 Jesu Krist I Toupa a kung suanna sial in niteng in ka si ahi! 32 Mihing tatdan bang a Ephesa a gamsate kihaupih ka hihleh kei dingin bang aphatuam dia, misi thoukik lou ahihleh? Ne in I dawn ding uh, jing chiang a si ding ihi.
33 Khem in om kei un, “Lawigilou in omdan hoih asusia veu hi.” 34 Diktatna lam ah halh unla, khial kei un, ajiak khenkhat in Pasian theihna a neikei uhi, hih na jumna ding ua ka gen ahi.
Pumpi thohkikna
35 Hinanleh mi kuahiam in, “Misite bangchi’n kaithoh ahi ding ua? Bang chi bang a pumpi nei in ahung pawt ding ua?” achi ding uhi. 36 Nang mimaw! Na khaichi tuh zong asih phot keileh apou kei hi. 37 Tualeh natuh in akung hung om ding natuh kei a, gehu hi’n khaichi tuamtuam hitaleh zong atang mah ahi natuh. 38 Hinanleh Pasian in khaichi jousiah kiangah pha asak bang jelin akung apia hi.
39 Taksa jousiah taksa kibang ahikei a, hinanleh mihing taksa atuam ahi a, gamsate taksa atuam a, ngasate taksa atuam a, tualeh vasate taksa atuam hi.
40 Vanlam pumpi zong a om a, leilam pumpi tuupina atuam a, leilam pumpi thupin atuam hi. 41 Ni in thupin tuam khat anei a, kha in thupin tuam anei, tualeh aksi leh aksi zong athupina uh atuamchiat hi.
42 Tuachimah bangin misi thohkikna zong ahi. Muatthei a tuh in a om a, muattheilou a kaihthoh in a om. 43 Thulimlou tak a tuh in a om a, thupitak a kaihthoh in a om hi, hatlou a tuh in a om a, sil bawltheitak a kaihthoh in a om hi. 44 Salam pumpi nei a tuh in a om a, khalam pumpi nei a kaihthoh in a om, salam pumpi a om a, khalam pumpi zong a om hi. 45 Tualeh, “mi masa, Adam pen, hinna nei mihing a siam ahi hi”; chia gelh bang in, hinanleh Adam nunung pen ahihleh hinna piatu kha ahi hi. 46 Ahihhang in khalam a om masa kei a, salam a om masa jaw hi, tuakhit in khalam ahung aom hi. 47 Mihing masa leivui a siam, leimi ahi a, mihing nihna pen van a kipan Toupa ahi. 48 Lei a siam mite pen lei a kisiampa bang ahi ua, vanlam mite ahihleh van a mite bang ahi uhi. 49 Tualeh lei a kisiam mel ipuak bang un vanmi mel zong ipua ding uhi.
50 Tuin unaute aw, taksa leh sisan in Pasian gam aluah thei kei a, muatthei in zong muattheih louhna aluahthei kei, chih ka gen ahi.
51 Ngai un, thugu’k kung hilh ding hi. I un un I ihmu khin kei ding ua, hinanleh I un un hihlamdang in I omsiang ding uhi. 52 Thakhat in, mitphiatkal louin, pengkul nunung pen dngin, pengkul ahung ging ding a, tulaeh misite pen muattheilou a kaihthoh in a om ding ua, eite zong hihlam dangin a I om ta ding uhi. 53 Ajiak hih muatthei in muattheih louhna asilh ding a, tualeh sithei in sihtheih louhna asilh ding hi. 54 Tuachia hih muatthei in muattheih louhna asilh a, tualeh hih sithei in sihtheih louhna asilh hun chiangin, zohna in sihna valhjouta, chia kigelh ahung tangtung ta ding hi.
55 “Aw sihna, nagu khoiah, om ta?
Aw hankhuk, nazohna, khoiah
omta?”
56 Sihna gu lah khialhna ahi ngal a, tualeh khialhna thuneihna dan ahi. 57 Hinanleh I Toupa Jesu Krist jiak a gualzohna hung piapa Pasian kiang ah kipahthu om hen.
58 Tuajiakin, ka ittak unaute aw, dettak in,hihling gulallouh in, Toupa nasep kuhkaltak in sem gige in om un, nasep gimna uh Toupa ah athawn kei ding chih nathei uhi.
I Korinthmite 16
Misiangthoute a ding a thohlawm
1 Tuin, misiangthoute a ding thohlawm thu pen, Galatia gam a saptuamte thu kakpiak bang in nou zong bawl un. 2 Kungpai chiang a thohlawm donna a om nawnlouhna ding in, ni sagihni nimasa pen in Pasian in agualjawl bang jel in michih in na koih khoolh chiat un. 3 Tualeh kungpai chiangin, pha nasak penpen uh, na itna silpiak uh vapia dingin na laikhak utawh Jerusalem ah kasawl ding hi. 4 Hinanleh kei zong kapai aphamoh leh, keitoh jawk in apai ding hi.
Paul siltupte
5 Mesidonia gam totsuak sawm ka hihman in, Mesidonia gam ka totsuak khat chiangin na kiang uah kungpai ding hi. 6 Tualeh kapai nang khat peuh a nou nungkhak theihna ding un na kiang uah tomkhat, ahihkeileh phalbi sungteng katam aithei hi. 7 Ajiak jinkawm a lampi a hung muh malam ka utkei a, hinanleh Toupa’n lem asak leh na kiang ua sawtdeuh tam ka kinem hi.
8 Hinanleh pentikos dongin Ephesa khua ah katam ding hi. 9 Ajiak kot lianpi leh phatuamtak kei dingin aki hong a, doudaltu zong tampi a om uhi.
10 Tualeh Timothi a hungpai leh laulo a na kiang ua a omtheih nang ngaihtuah un, ajiak kei bangin aman zjong Toupa na asem hi. 11 Tuajiakin, kuaman simmoh kei uhen, hinanleh ka kialng a ahung paitheih nang in hoihtak in khajaw un, ajiak unaute tawh ka kiang a a hungpai uh ka kinem hi.
12 Unaupa Apollo thu ahihleh unaute tawh na kiang ua hungpai dingin ka ngen a, hinanleh tu leh tu a hungpai ding a ut kei a, hinanleh hun lem tang aneih chiangin ahung pai ding hi.
Thukhah tawpna
13 Kiveng unla, ginna ah dingkip un, hangsan unla, hattak in om un. 14 Na silbawl jousiah uh itna a bawl hihen.
15 Unaute aw, Stephena leh a innkuan pite Akhaia gam a Pasian thu a gah masa pen ahi ua, misiangthoute na sepsak dingin akipia uh chih nathei uhi, 16 huachibangte kiangah leh michih koutawh hua na semgimte kiangah kituhlut ding in kung ngen hi.
17 Stephena leh Forchunata leh Akhaika ahung pai uh ka kipak hi, ajiak nou omlouh awng ahu uhi. 18 Ajiak amau’n nou leh kei kha ahung hihhalhsak uhi. Tuajiakin huachibang mite theisiam un.
19 Asia gam a saptuamte’n chibai a hungbuk uhi, Prisila leh Akuila in a inn ua saptuam kikhawmte tawh Toupa ah chibai hoihtak a hungbuk uhi. 20 Unaute jousiahin chibai a hungbuk uhi. Kitawp siangthou in khat leh khat chibai kibuk tuah un.
21 Keimah Paul in keima khut ngei a chibai kung buk na ahi.
22 Mi kuapeuh in Toupa Jesu a it kei leh hamsia thuak in om hen!(anthema)
I Toupa, hung pai! ( Maran-atha)
23 I Toupa hehpihna na kiang uah om hen.
24 Krist Jesu a kung itna na kiang uah om hen. Amen.
