II Korinthmite

KORINMITE

KIANG A SAWLTAK PAUL LAIKHAK NIHNA

II Korinthmite 1

Chibaibukna

1 Paul, Pasian deihlam a Jesu Krist sawltak leh, I naupa uh Timothi in-

Korin khua a om Pasian saptuamte leh,Akhaia gam pumpi a misiangthoute jousiah kiang ah:

2 Pasian I pa uh leh I Toupa Jesu Krist kiang a kipan hehpihna leh khamuanna na kiang uah om hen.   

            

Paul in Pasina kiang a kipahthu agenna

3 Pasian I Toupa uh Jesu Krist Pa,zahngaihna Pa leh khamuanna jousiah Pasian pahtawi in om hen! 4 Pasianin kou ahung khamuanna khatpeuh a omte ka khamuan theihna ding un, aman ka thuakgimna jousiah uah a hung khamuan jel hi.5 Ajiak Krist thakgimnate ka tung ua adimlet bang in, Krist jiak a ka kihehnepna uh jong adimlet hi.6 Tuin thuakgimna a ka um un hiam, a hih kei le lungmuang a ka om un hiam in jong, hihpen nou hehnepne ding leh hundamna ding a hi a, huapen thuakgimna ka thuak bang uh na thuakzohna ding uh ahi.Ahihkeileh, khamuan a ka om un zong hihpen nou a ding a hehnepna ding leh hundam a na omna ding uh ahi.7 Tualeh nou gimthuakna tangtute nahih bang un, hehnepna tangtute na hi uh chih theiin kung kinepihna uh a det hi.

8 Ajiak unaute aw, Asia gam a thuakgimna ka tung ua hungtung pen na theih lou uh ka deikei uhi,tuadhah hin zong kinem jou nawnlou khop in nasiatak a thuakzoh guallouh a bawlsiat in ka om uhi.9 Ahi,sihna thupukna muta in ka kingaihsun ua, hinanleh koumah kimuang jawlou a misite kaithoupa Pasian ka muang jawkna ding uh ahi. 10 Aman sihna mulkimhuai lak a pat ahung hunkhiata a, tualeh ahung hunjing a, tualeh ahung hun nalai ding hi chi’n amah a ka kinim uhi, 11 mitampi a pat a silpiak ka muh jiak ua mi tampi’n kou ading a kipahthu agen theina ding un,nou zong kou a dingin thumna in nung na panpih uhi.

                             

Paul in asiltupte akhekna

12 Ajiak kou kasuan uh ahihleh hih ahi,ka sia leh pha theihna uh hung theihpih, siangthouna leh Pasian dikna nei in,taksa pilna a hilou in, Pasian hehpihna a hijaw in, leitung ah, adiak in noulam kung nga uhi. 13 Ajiak,na sim ua, thei zong nathei uh, tualou ngal na kiang uah thudang bangmah ka gelhkei uhi, tualeh atawp dong a na theihjing  uh ka ki nem uhi. 14 Toupa Jesu ni chiang a nou ka kisuanpihte nung hi ding uh bang a, kou zong nou kisuanpihte kung hih ding uh chih theina kichiang nung neih bang un.

15 Tualeh hih gintatna neiin, phattuamna anihveina naneih theina ding un, na kiang uah hungpai masak katum hi.16 Tualeh nou hung tawn malam in Mesidonia gam a paisuk in, tualeh Mesidonia gam a pat na kiang ua hung paikik in, tualeh nou Judea gam lam a kapai nang ah hung  panpih le uchin ka chi hi. 17 Tuajiakin, huachibang  a ka ngaisut laiin, bangmah thak louin ka ngaihtuah maw leh? Ahihkeileh ka lungsim a ka silguante pen taksa thu bang a, “Ahihle hi” tualeh “Ahihkeileh hilou” chi kadiai leh? 18 Hinanleh  Pasian a thutak bang in, noulam a ka thu uh pen, “Ahi,” chih leh, “Hilou,” chih ahi kei hi. 19 Ajiak nalak ua kou, keimah ngei le sila leh Timothi in athu ka gen uh, Pasian Tapa,Jesu Khrist pen,ahihleh “Hilou,”chih ahi kei a, amah pen “Ahi,” chih ahiajw hi. 20 Ajiak Pasian thuchiam jousiah pen amah ah “Ahi,” chih ahi a.Tualeh koujiak a, Pasian thupina dingin amah ah “Amen,” ahi hi. 21 Tuin Krist a noutawh hung hihkiptu leh kou sathau hung nuhtu Pasian ahi, 22 aman chiam zong ahung chiamtehta a, tualeh I lungtang uah khamna kha zong ahung piata hi.

23 Tuathamlou in, ka hinna theihpihtu dingin Pasian ka sam ahi: Korin khuah ah hung painawnlou ding ka hi chih thei un. 24 Na ginna tung ua thu hung neihkhum hilou in; hinanleh, na kipakna uh panpihtu ka hijaw hi, ajiak gimna in na dingdet uh hi.

                

II Korinthmite 2

1 Hinanleh tubansiah lungkham kawm a na kiang ua hung paikiknawnlou ding chih keimah thu in katum hi. 2Ajiak ken nou hung hih lungkham leng, ka hih lungkhamte chihlou  kuan ahia kei hung kipaksak ding? 3Tualeh na kiang uah hihthu mah ahi kung gelh, atuachih keileh kungpei chiang in ka kipakna ding te lak ah lungkhamna kamujaw kha ding hi, ka kipakna pen na un ua na kipakna uh hi dingin kung gintat jiak in.4 Ajiak pen buaina leh lungkhamna nasiatak a pat mittui tampi tawh kung gelh ahi, suk lungkham a na om louhna ding ua, hinanleh natung ua itna tamtak kanei hi chih na theihna ding un kagelh jaw hi.

Hung demte ngaihdamna

          5 Hihnanleh mi kuapeuh in lungkhamna abawl leh, keiguak ahung suk lungkham ahi kei a,(ka hihtakluat louhna dingin na un un ahung hih lungkhamsak riap a hijaw hi.) 6 Huachibang mi a dingin pen mi tamjawten apiak uh hih gawtna ahunta hi. 7 Tuachi’n  na ngaihdam ding ua, na khamuan jawk ding uh ahi, atuachih keileh huachibang mi pen alungkham sengseng na in avalhjou kha ding hi. 8 Tuajiakin amah lam a na itna uh hihkip dingin kung ngen hi. 9 Hihjiak mah in zong sil bangkim a thu na man uleh na manlouh uh theihna  dingin ka gelh ahi.10 Sil khatpeuh a mi na ngaihdam uh tuh ken zong ka ngaihdam hi, ajiak sil khatpeuh a ka ngaihdam leh, hih ka ngaihdamna mi pen noujiak in Khrist ah ka ngaidamta hi. 11 Atuachih keileh setan in ei ah lemtang  amukha ding, ajiak a lungtupte I manghilh kei uhi.

                                 

Troas khua a Paul lung hihmohna

          12 Tuaban ah Troas khua a Krist tangthupha gending a kuan pailai in Pasian in kei a dingin kot khat ahung hawnsak a. 13 Hinanleh ka unaupa Tita ka muhlouh jiakin kakha atawldam theikei a, hinanleh amaute khakhia in, hua a pat in Mesidonia gam ah kapaita hi.

                                          

Khrist jiak a gualzohna

         14 Tuin Khrist a gualzohna hung piajingtu leh,kou zang a munchin a amah theihjingna gimnamtui thehjaktu Pasian kiang ah kipahthu om hen! 15 Ajiak hundam a omte leh mangthangte lak ah Pasian a ding in Krist gimnamtui ka hi uhi. 16 Lawikhat  kiangah sihna ding a sihna gimnamtui ka hi ua, tualeh adang kiangah hinna ding a hinna gimnamtui ka hi uhi. 17 Ajiak mi tampi’n Pasian thu a mi khem a dangka johna a azak bang un kou ka zangkei uhi,tuasangsik in chihtak tak in Pasian mitmuh in thu ka genjaw uhi.

                                                        

II Korinthmite 3

Thukhunthak silate

                                                  

1 Koumah leh koumah kigen phat kik ka hi uh maw leh? Ahikeileh kou midangte bangin na kiang uah, ahihkeileh, nou a pat gen phatna laikhak pawimoh ka hi uh maw leh? 2 Noupen  ka laikhak uh, ka lungtang ua gelh, mi jousiah theih leh sim na hi uhi. 3 Krist laikhak, kou gelh, laitui agelh hilou a, Pasian hing kha a gelh, suangpek agelh hilou a, taksa lungtang pek a gelh na hi uh chih chiantak a suklat na hi uhi.

4 Tualeh huachibang  muanna Khrist  jiakin  Pasian lam ah ka nei  uhi. 5 Bang  ahiam silkhat kou a pat ahi chi dingin kou guakin kachin kei uhi; 6 aman kou Thukhunthak nna semthei dingin ahung bawl a,laimal a hilou in, hinanleh kha a nasem dingin ahijaw, ajiak laimal in athat a, hinanle kha in hinna apia hi.

7 Hinanleh hihbei a om ding thupina a hihthupi a aom jiak a Isrealtate’n Mosi mai tang tangtak a en theilou khop a sihna nasepna suangpek a sut a gelh bawn athupi leh, 8 kha nasepna pen bangding a thupijawk dah ding ahia! 9 Ajiak, siamluh tansakna nasep bawn athupi leh, diktatna nasep pen nasatak in athupi jaw ding hi! 10 Ajiak, thupina nasajaw in a khupkhel jiakin hihlam thu ah thupina anei nawn kei hi.11 Ajiak, sukmng a om bawn athupi leh a om jing pen bngjahta in a thupijaw tazen diai!

        12  Tuajiakin huachibang kinepna kaneih jiak un, hangsan tak a thugen ngamna ka nei uhi. 13 Tualeh avakna kiam hiai hiai atawpna a Isrealtate’n a et gige theihlouna ding ua, amai puan a khuh Mosi bang ka hi kei uh. 14 Hinanleh a lungsim uh hihmial in a om a,ajiak tuhun tan in Thukhunlui asim chiang unha maikhuhna pen hawkkhiat loh in a om jing a, hua maikhuhna pen Krist ah hihbei in a omta hi. 15 Hinanle tunitan pha in Mosi laibu asim chiang un a lungtang uah mai khuhna pen a om na lai hi. 16 Hitalezong Toupa lam a akihei hun hun chiang un hua maikhuhna lakmang ahita ding hi. 17 Tualeh, “Topa pen,”kha ahi a; Topa kha omna teng ah zalenna a om hi.18 Hinanle eipen I un un, mai khhlou in, limlang a muh  bang in Toupa thupina pen enjing in, huatowh kibang a om dingin Toupa kha in thupina a pat thupina hih lam dangta hi.

                        

II Korinthmite 4

Leibelte sung a khalam gou

1 Tuajiakin hehpihna ka muh bang ua hih nasepna katan jiak un, ka lungkia kei uhi. 2 Hihnanleh sil jumhuai kiphualte ka tawpsan ta ua, zulhjauna a hilou in, ahihkeileh, Pasian thu mikhemna a zanglou in. Hinanleh thutak hihlatna a zangjaw in, Pasian mitmuh ah michih sia leh pha theihna ka hihtungjaw uhi. 3 Hinanleh ka tangthupha uh phual a aom leh mangthangte kiangah ahi phual a a om. 4 Pasian mel bakpih Krist tangthupha thupina vak in amauh asalvak theihlouna dingin, huate ah hih leitung pasian in agingta loute lungsim ahihmial sakta hi. 5 Ajiak kou ka kigen thang kei ua, hinanleh Krist Jesu hih Toupa ahi chih leh, koupen na sila uh ka hi uh chih ka gen jaw uhi. 6 Ajiak,Jesu Krist mel a Pasian thupina theihna vak hungpiaa dingin,miallak a kipan a vak hung vakkhia ding a thupiatu Pasian in kka lungtang uh asalhvakta hi.

            7 Hinanleh sil bawltheihna thupina pen kou a pat hilou a, Pasian pen kou a pat hilou a, Paian a pat ahihjawk theihna dingin hua gou penleibel ah kakem uhi. 8 Kimkawt uah nejgawp in ka om ua, hilehjong sukguai in ka um naikei hi,lungkham in ka om ua, hinanleh ka lungkia kei uhi; 9 gawt in ka um ua, hinanleh taisan in ka om kei uh, satgawp in ka om ua,hinanleh ihsiat in ka om naikei uhi. 10 Jesu hinna ka pumpi ua hihlat a a omtheina dingin, bangchiklai peuhin Jesu kapua kawikawi uhi. 11 Ajiak pen Jesu hinna zong ka pumpi uh sithei a hihlat a a omtheihna dingin, kou ahing nalaite pen bangchiklai peuhin Jesu jiak a si dingin piakkhiat in ka om uhi. 12 Tuachi’n kou ah sihna in asem a, hinanleh nou ah hinna in asem hi.

            13 “Ka gingta a, tuachi’n ka gen ta hi,” chih gelh bangin. Hua ginna kha mah nei in, kou zong ka gingta ua, tuajiakin ka gen uh ahi. 14 Ajiak Toupa Jesu kaithou kikpa in, kou zong Jesu tawh ahung kaithou ding a, noutowh amai ah ahung tutding hi, chih ka thei uhi. 15 Ajiak Pasian thupina ding a mi tampite kipahthu gen jiak a hehpihna akhansem theihna dingin sil jousiah nouding jiak a omsiang ahi.

                                         

Ginna a hinna

            16 Tuajiakin ka lungkia kei uh, hinanleh ka pualam mihing uh kiam hiaihiai nanleh, ka sunglam mihing uh niteng a hihhalh in a omjing hi. 17 Ajiak tomnoukhat sung ka gimthuakna uh jangnoukhat in tangtown thupina giktak thupi jawsem in ahung bawlsak h. 18 Sil muhtheihte enlou in, hinanleh sil muhtheihlouhte ka enjaw uhi, ajiak sil muhtheihte tomnoukhat sung a ding ahi a, hinanleh sil muhtheihloute pen tangtawn a ding ahijaw hi

                                                

II Korinthmite 5

1 Ajiak hih puanbuk, ilei inn uh suksiat in om nanleh khut a lam hilou, Pasian lamsa tangtawn inn det van ah inei uh chih ithei uhi.2 Ajiak pen van a kipan a I inn ding uh silhsak a om ut mahmah in hihsan ah ithum jing uhi.3 Tuachibang a silhsak a i om leh saguak in om nawn kei ding uhi. 4 Ajiak ei puanbuak a omte pen puakgik pua in ithum jing uh, silhlou a I omna ding uh hilou in, sithei pen hinna valhzoh a aomtheina ding a silhsak a i om ut jiak uh ahijaw hi. 5  Tuin hihbang ding a hung siamtu Pasian ahi a, khamna kha hung piatu zong ahi hi.

            6 Tuajiakin pumpi inn a i om laisiah uh, Toupa a kiang a omlou ihi uh chih thei in, bangchiklai peuh in muangtak in i om uhi. 7 Ajiak muthei a pai hilou in ginna in ipaijaw uhi. 8 Muangtak in  i om uh, ahi, pumpi a omlou a Toupa kiang a om i utjaw uhi. 9 Tuajiakin, om in om takeilei zong amah kipahpih lam I hihtheina ding uh itum uhi. 10 Ajiak michih in pumpi a asilbawlte asia apha, abawl bangbang a amuhtheihna dingin Krist vaihawmna touna mai ah i un un hihlat in i om ding uhi.

Krist jiak a Pasian tawh kipawlna

            11 Tuajiakin Toupa lauhuaidan thei in mite kajawl teitei uhi, hinanle Pasian kiangah hihlat in ka om ua, tualeh na sia leh pha theihna ua hihlat a ka om uh zong ka kinem uhi. 12 Ajiak na kiang uah hung kigen phat utkik ka hikei a, lungsung lam a hilou a apualam a kisuangte na dawnna ding uh banghiam na neitheina ding un, koulam a kisuanna hung bawlsak in ka gen jaw hi. 13 Ajiak ka mot uleh Pasian a dingin ahi a, kapil uleh nou a dingin ahi hi. 14 Krist itna in ahung sawl teitei hi, ajiak hichi’n ka ngaihtuah uhi, mi jousiah sihtang a mikhat asih leh mi jousiah si ahita hi. 15 Tualeh ahingte zong amauh ading a hing hinawnlou in, hinanle asih tanga si a, tualeh thoukikpa ding a, ahihjakna ding, amah pen mi jousiah a dingin asi hi.

            16 Tuajiakin, tu a pat in taksa lam a, kuamah kathei nawn kei uhi, ahi, taksa dan in Krist nathei mahle ung, tuni kathei nawn kei uhi, 17 Tuajiakin, mi kuapeuh Krist aaom leh, silsiamthak ahita hi,silluite abeita a, ngaiun, sil jousiah ahung thaksiangta hi. 18 Tualeh sil jusiah Pasian a kipan ahi a, aman Jesu Krist in amah tawh kilem in a hungbawl a, tualeh ka kiang uah kilepna nasep a hungpia hi. 19 Tuachi’n Pasian pen Krist a om in, leitung amah tawh kilem in abawl a, akhialnate uh khialhna a simsaklou in, ka kiang uah kilepna thu ahung kemsakta hi.

            20 Tuajiakin, koupen, Krist palaite ka hi ua, Pasian in kou zng a nou a hungnget bang in, Pasian tawh kilem un,chi’n Krist tang in kung ngen uhi! 21 Ajiak amah ah Pasian diktatna ihung hihtheihna dingin, khialhna mawng mang theilou amah pen Pasian in eite jiakin khial in abawlta hi.

II Korinthmite 6

1 Tuachi’n kou amah tawh semkhawmte hi inzong, Pasian hehpihna phattuampih lou a, bangmahlou na suahsak louhna ding un kung ngen uhi. 2 Ajiak aman:

                “Hun kipahhuai ah,

                  Kung ngaikhia a;

                  Hundamna ni ah, 

                  Kung panpih hi.”

Ngaiun! tu hun kipahhuai ahi a; tu hundamna ni ahi, achi hi.

            3 Ka nasep uh dem a a omlouna dingin sil bangmah ah hehna ding ka bawl kei uhi. 4 Hinanleh Pasian nasemte ka hi uh chih sil jousiah ah ka chiansak ua, thuaktheihna ah, haksatna ah, taksapna ah, lungkhamna ah. 5 Jepna ah, thong tangna ah, buaina ah, sepgimna ah, ihmutmohna ah, an ngawlna ah. 6 Siangthouna in, theihna in, thuaktheih na in, lungnemna in, khasiangthou in, itna diktak in,  7 thutak thu in, Pasian sil bawltheihna in, jiat leh vei a diktatna galvan in. 8 Zahbawl leh zahbawl louhna in, gensiatna leh genphatna in, mikhem tute bang in, hita leh jong midiktat hi-ngalin; 9 theihphaklouh bang in, hitalehzhong hoihtak a theih hi-ngal in, si ding bang in ngaiun, ka hing uhi, vaukgawp bang in, thahjaw hilou in; 10 lungkhamtak bangin, hitalehzhong kipak jing ngal in,mijawng bang in, hitahlehzong mi tampi hausasak ngal in, bangmah neilou bangin,hitalehjong sil tamip neingal in.

            11 Aw Korimite! Na kiang uah kakam uh ka kak ua, ka lungtang uh ka hong lian uhi. 12 Kou itna kham a om na hikei ua, na lungsim ua nouma itna in ahing kham na hijaw uhi. 13 tualeh kou hung piak bang nung piak theihna ding un,tate kiang thugen bang in ka gen uhi. Na lungsim uh honglian un, chi in.

Gingloumi thuzoh a omte tung a taihilhna

            14 Gingloute tawh kituakloupi in hakkol puakhawm kei un. Ajiak diktatna leh diktatlouhna in bang ki thuahkhawm na anei a? Tualeh vak leh mial in bang ki pawlkhawm na anei a? 15 Tualeh krist leh Belial in bang kituah na anei ua? Ahihkeileh gingtu leh gingloumi in bang tankhawm anei ua? 16 Tualeh Pasian tempul leh milimte’n bang kilemna anei ua? Ajiak pen nou Pasian hing tempul na hi uhi!

             “Pasian in amau uah ka teng ding

a amau uah kavak ding a;

amauh Pasian ka hi ding a,

tualeh amauh ka mite ahi ding

uh,”

Pasian in achi hi. 17Tuajiakin,

“Amauh a pat in hung pawtkhia

unla

atuam in om un.

Sil sianglou khoih kei un,

tuachi’n kungpom thei ding hi.

18 Na pa uh ka hiding a,

tualeh nou ka tapate ka tanute na

hi ding uh,

Toupa hat tungnung in achi hi.”

II Korinthmite 7

1 Tuajiakin unao ittakte aw, hih thuchiamte ineih jiak un, Pasian launa a siangthouna hihbu kimin, taksa leh kha bawlhoihna jousiah a pat iki hihsiang ding uhi.

                                                 

Paul kipakna

            2 Koulam ah na lungsim uh hong un, kuamah diklou in ka bawl kei ua, kuamah ka hihsia kei ua, kuamah ka khembawl kei uhi. 3 Nou siamlouh tansakna ding a hih ka gen ahi kei, isihleh sikawm a,ihinleh hingkhawm dingin ka lungtang uah nateng uh chih tu-ma in kung gen ta hi. 4 Noulam ah ka hamngam dan athupi a, nou jiak a ka kisuan dan athupi hi! Lungmuanna in kadim ua, ka thuakgimna jousiah uah ka kipak mahmah uhi.

            5 Ajiak Mesidonia gam ka hngtun nasan un, ka taksa un tawlngakna anei kei a,alang alang ah tokbuai in ka omjaw uhi. A pualam ah kihaunate a om a, asunglam ah launate aom hi. 6 Hitalazong pampaih a omte khamuantu Pasian in Tita hung paina in ahung khamuanta hi. 7 Tualeh amah hungpaina guak hilou in, hinanleh aman nou kei nung ngaihdam uh, nung khasiatpeh dan uh, kei ding a na phttuamngaih dan uh a hunghilh takin ahung khamuang sakta hi.

            8 Ajiak ken, ka laikhak in nou hung hih lungkhamsak tamahleng zong ka kisik kei hi, na kisik tamah nanleng zong, ajiak hua laikhak mah in nou tomnoukhat sung bek hinanleh ahung hih lungkham chih ka thei hi. 9 Tuin ahihleh ka kipak hi, hihlungkham a na om jiak un hilou in, kisikna ding a na lungkham jiak un ahijaw, ajiak nou koujiak a siatna bangmah natan louhna ding ua Pasian deihlam bang a hihlungkham a om na hi uhi. 10 Ajiak Pasian deihlam bang a lungkhamna in lungsim khekna leh hundamna lam ah ahung pui a, hua ah kisikna a om kei hi.  11 Ajiak ngaiun, Pasian deihlam bang a hih na lungkhamna uh ngeiin bangzahta a nou a ding a pilvangna hung bawlsak ata! Noumau ki hihsiangnate, hehnate, launate, lunggulhnate, phattuam ngaihnate,puba lak utnate, hih silte jousiah ah nasiang uh chih na muchianta uhi.

            12 Tuajiakin, na kiang uah gelh nanleng zong, adiklou bawlpa jiak a gelh ka hi kei a, diklou tak a athuakpa jiak a zong kahelh ahi tuam kei a, ka tung ua na phattuamngaih dan uh Pasian mitmuh a na kiang ua hihlat a a omtheihna ding a kagelh ahijaw hi. 13 Tuajiakin, na khamuanna uah ka khamuangta uhi.

            Ahi, Tita kipakna jiakin ka kipak tungtuang uhi, na un ua alungsim na suk-halhsak jiak un!   14 Ajiak akiang ah banghiam a hung suanna nei taleng zong, kajum kei hi, hinanleh thetak a sil jousiah na kiang ua ka gen bang un, Tita mai a kungsuanna zong thutak ahi mawng hi. 15 Tualeh nou na un ua na thuman dante uh, lau leh lingkawm a amah na kipahpih dante uh agelkhiat chiangin, alungsung a nou ahung itna alian semsem hi. 16 Tuajiakin, sil jousiah a natung ua muanna kaneih jiakin ka kipak hi!

II Korinthmite 8

                        

1 Tuate ban ah unaute aw, Mesidonia gam a saptuamte tung a pasian hehpihna piak a om pen kung theihsak ding hi. 2 Tuachin haksatna a etkhiatna thupitak a etkhiat a aom ua zong a kipak mahmahna uh leh azawn mahman na uh asilphalna uh ahung hihdan bang. 3 Ajiak ahihzoh bang un, ahi, ahihzoh sang ua thupijaw in amau’n phaltak in apia uhi, chih ka theihpih hi. 4 Hua silpiak sansak dingin leh misiangthoute nna sepna a azauh theihna ding un ka kiang uah ahung ngen ngut ngut uhi. 5 Tualeh hihpen ka kinep bang ua hilou in! Hinanleh Pasian deihlam in amauh mahmah Toupa kiang leh kou kiangah a kipak masa phot uhi. 6 Tuachi’n tu masang a apatsa, hua hehpihna pen nalak ua semjou dingin Tita ka kun uhi. 7 Hinanleh sil bangkim a, ginna ah, thugenna ah, theihna ah, na phattuam ngaihna jousiah uah, tualeh kou nung itna uh na hauhdan bang uh, hih hehpihna ah zong nahauhna ding uh ngihtuah un.

            8 Thupiak bang in ka genkei a, midangte phattuam ngaihna in, na itna uh a kitakna etkhiatna in ka gen ahijaw hi. 9 Ajiak, i Toupa uh Jesu Krist hehpihna pen nathei uhi, a gentheina jiak a nung hauhsat theihna ding un, amah pen hausa nanleh nou jiakin ajawng in ahung kibawl ahijaw hi.

            10 Tualeh hih ah kung hasot hi, ajiak hihpen nou a dingin ahoih hi, kumkhat masang a bawl pankhit nahita ua, napat khit guak uh hilou in, phattuamngaih zong na ut uhi. 11 Hihnanleh utding a mansa a na om bang un! Na neih bang jel ua tangtunna zong a omtheihna dingin tu in sem tangtunta un. 12 Ajiak utna lungsim a om phot leh, mi aneihlouh dan dungjui a hilou in, aneihdan dungjui a pomsak ahi.

            13 Ajiak midang gimlou a nou nagim nang uh kachihna ahi kei hi. 14 Hihnanleh tu leh tu a naneihval uh pen amauh taksap awng hukna ahung hih a, amauh neihval zong nou taksap awng hukna ahung hihtheina dingin kabakgual chiatna dingin kachi ahijaw hi. Tuachi’n kibakgual chiatna ahung om ding hi.

15 “A khawmtam in avl in aneituan kei a, atasam tuankei,” chih gelh bang in.

                                                 

Tita leh a sepkhawmpihte

            16 Hinanleh natung ua huachibang phattuam ngaihna Tita lungtang a omsaktu Pasian kiangah kipahthu om hen! 17 Ajiak kou ngetna jiak guak hilou in, hinanleh amah phattuam ngaihna mawng a, ama utthu a na kiang ua hung pai ahi. 18 Tualeh amah tawh tangthupha lam a ahoihna thu saptuam pawl jousiah a kithang unauoa pen kung sawl uhi. 19 Tualeh hihguak zong hilou in, hinanleh toupa thupina ding leh panpih ka utdan uh etsakna-a a-na kasep uh,hih hehpihna thu a kou tawh jinkhawm jel ding a saptuamte’n atel mawng uh ahi.

            20 Kiphaltak a kipia hih silte ki hawmna uah dembang a ka omlouhna ding un pilvangtak in ka sem uhi. 21 Toupa mitmuh guak a hilou in, mihing mitmuh ah zong sil kilawm ka ngaihtuah uhi.

            22 Tualeh amauh tawh I unaupa uh kasawl ua, amah pen sil tampi a aphattuamngaih dan ka theichianta ua, hinanleh tu takngel in natung ua taksanna liantak aneih jiakin phatuam angaijaw semhi. 23 Tita tungtang thu ahihleh amah pen noulam thu ah kalawi leh ka naseppih ahi, tualeh i unute uh ahihleh saptuam pawlte thu puate leh Krist thupina ahi uhi. 24 Tuajiakin, amauh pawl leh saptuam pawlte mai ah na itna uh theihchianna leh nou kung suanna uh ensak un.

                   

II Korinthmite 9

            1 Tuin misiangthoute ding a nasepna lam thu pen na kiang ua kung gelh angai kei hi. 2 Ajiak na panpih utnate uh ka thei a, Hua thu ah, “Akhaia gam, kipanpihna kumkhat ahita,” chi’n Mesidonia gam a mite kiangah kung kisuanpih mahmah a. Tualeh na phattuam ngaihna un mi tampte atawkthou hi. 3 Hilehzong hichilam thu ah nou kung suanna athawn ahih louhna dingin unaute kungsawl hi. Kagen bang a kimansa a na omtheihna ding un. 4 Atuachih keileh Mesidonia gam a mite ka kiangah hungpai in, nou kiman nailou in hungmu tale uh , kou-nou kung chi kei-nou pen hung taksan a kung suanna lam uah ka mualphou kha ding uhi! 5 Tuajiakin masang a na chiamsa uh silpiak pen itkawm kawm a hilou a, phaltak a piajaw a, mansa diam a na koihna ding un, ahunma a na kiang ua unaute hungpai masa ding a hasot ngaiin ka ngaihtuah hi.

            6 Hinanleh hih ka gen ahi, athehtawm in a attawm ding a, hinanleh atheihtam in a attam ding hi. 7 Michih in a lungtang a atup bang in pia hen, it kawm kawm a, ahihkeileh piaklouh theihlouh a ngaia pialou in, ajiak Pasian in kipaktak a piate a it hi. 8 Tualeh Pasian in hehpihna jousiah natung uah ahung vukthei hi, tuachia nou bangchiklai peuhin silhoih jousiah a bukim a omjing in, nasep hoih jousiah na semthei ding uhi. 9 Laisiangthou a,

             “Athehjiak a migntheite kiangah

apia a;

adiktatna uh tangtawn in a

omjing hi,”

chih gelh bang in.

10 Tualeh athehpa kiang a khaichi piapa in nanek ding uh tanghou ahung pia a, na khaichi theh uh apungsak a, tualeh na diktatna gah uh zong apungsak hi. 11 Silphal ding a bangkim a hihhauhsat a om in, hua in koujiak in pasiam kiangah kipahthu genna a omsak hi. 12 Ajiak hih nasepna in misiangthoute taksap awng ahuksak guak hilou in, Pasian kiang a kipahthu genna tampi a lunglutsak hi. 13 Hih nasepna a pat Krist tangthupha nuaia na kituhna uh leh amauh leh midang jousiah kiang a na silphal dan uh kitak jiakin amau’n Pasian apahtawi uhi. 14 Tualeh amauh un zong nou a ding a ahung thumsakna in, natung ua Pasian hehpihna thupitak jiakin nou ahung ngai mahmah uhi. 15 Asil thawnpiak simsenglouh jiakin Pasian kiangah kipahthu om hen!

                                                  

II Korinthmite 10

Paul in a nasepna ataklang

            1 Tuin nalak ua ki ngiamkhiat tak a om a, na omlouh ua noulam a hahtak keimah Paul in, Krist hoihna leh nunnemna in kung ngen hi. 2 Hinanleh taksa lam a om hi a kou hung ngaihtuah khenkhatte tung a gumtat ding ahi chia ka ngaihtuah pen, huachi a ka gumtat louhna dingin kung ngen hi. 3 Ajiak taksa in om nanle ung zong taksa dou in kadou kei uhi.  4 Ajiak pen ka galdouna uh galvan pen taksa ahi kei a, kulhpi kiptak hihchipna ding a Pasian jal a sil bawltheihna pen ahijaw hi. 5 Saungtuahnate leh Pasian theihna kalh a thupitak a kibawl silsang chintengte paikhia in, ngaihtuahna chinteng Krist thumanna nuaia pui in. 6 Tualeh na thumanna uh hih bukim ahih chiang a, thumanglou jousiah phuba lading a ki mansa a om in.

            7 Nou sil apualam a kilatdan a en nahi uh maw leh? Mi kuapeuh in Krist –a hia amah leh amah akitheih a ahihleh,hihpen aman ngaihtuah kik hen, amah Krist a ahih bangin kou zong Krist a ka hi uhi. 8 Ajiak, nou suksiangna ding hilou in, bawlhoih jawkna dinga Pasian hung piak ka thuneina uh pen hahsuan in suang nanle ung zong ka jum kei ding uhi. 9 Laikhak a nou hung hihlau sawm bang a ka kilatlouhna ding in. 10 Ajiak amau’n, “Alaikhakte agik in, ahat a, hinanleh amun ah ataksa ajawngkhal a, a thugen zong ahawmthawh huai!” achi uhi. 11 Tuachibang mi in hih ngaihtuah hen, na kiang ua ka omlouh lai ua laikhak a ka om bang un, na kiang ua ka om chiang un zong sil bawl in ka om uhi.

            12 Ajiak kou pen a amauh lak ah ka kisiltel ngam kei ua, ahihtheileh amauh tawh zong ka kitehkak ngam kei uhi. Hinanleh amauh pen amauh leh amauh kiteh in, amauh leh amauh kitehkak in lungsim neilou in a om uhi! 13 Ahihhang in kou ka hih uleh pen hunval un ka ki uangsak kei ding uhi, hinanleh Pasian hung hawmsak nou zong huap ding a tehna tuabang jel in ka uang jaw ding uhi. 14 Thuneitu in nou kiang a ahihlet louh mah bangin, nou khupkhel in ka ki hihlian kei uhi, ajiak pen Krist tangthupha gen in noukiang tanpha in kungpai uhi. 15 Ka tehna val uh sil, chih pen midangte sepsa a kisuang ka hi kei ua, hinanleh na ginna uh akhan chiangin le, ka uapchiang bang jel un noujiak in nakpitak a hihlet in ka om ding uh chih ka kinem uhi. 16 Tuachi’n nagam kal lam uh tanpha ah tangthupha gen dingin, tualeh ka khut ua ka bawlsa silte thu-a midangte bialsung a kisuanglou ding in.

            17 “Hinanleh akisuang taphot Toupa ah kisuang hen.” 18 Ajiak amah kiphat peh  pahtat in a om ngaikei a, Toupa’n aphat pen hihhoih ahijaw hi.

                                                   

II Korinthmite 11

Paul leh sawltak takloute

1 Neukhat ka mothuai deuhnate ah nung thuaktheih uh ka deih hi. Tualeh thuakjong nung thuakthei uhi! 2 Ajiak Pasian thansiatna in natung uah ka thangsia hi, ajiak Krist kiang a nungak siangthou bang a kung peitheihna dingin, na pasal ding uh khat kung khamsak hi. 3 Hinanleh gul in ajuanpil a Evi akhim bangin bangin Krist a kitakna leh siangthouna a pat bangchidan hiam khat in na lungsim uh hihsiat in a om kha ding hi. 4 Ajiak ahung paipen in, ka gen ngailouh uh Jesu dang agen a, na muh ngailou uh kha dang na muh ua, ahihkeileh napom ngailouh uh tangthupha dang na pom ua ahihleh, a mah pen na ngaisiam uh ahi hi!

            5 Ajiak, “sawltak” liam penpenpa sang a zong themkhat bek a neujaw in zong ka kingaihtuah kei hi! 6 Hinanleh thugen ah kamsiam lou hinanleng zong theihna lam ah ka huachih kei hi, hinanleh sil bangkim ah nalak uah hihlat in ka om hi.

            7 Na kiang ua Pasian tangthupha athawn a ka gen a, tawisang a na omtheihna ding ua, ka kingiamkhiat in sil bawlkhial ka hi maw leh? 8 Nou nna kung bawlsak theihna dingin, amauh ua pat thaman la in saptuam pawl dangte aneih uh ka lasak hi. 9 Tualeh na kiang ua ka omlai a ka taksap in, kuamah kung hihbuai kei hi, ajiak Mesidonia gam a pat hungpai unaute’n ka taksap awng ahung huksak uhi.Tualeh sil bangkim ah nou hihbuailou ding in kibawl a, huachih bangin ka kibawl jel ding hi! 10 Krist thutak keimah a aom jiakin, Akhaia gamsung a hih kasuanna pen kuaman ahung hihtawp kei ding hi. 11 bang jiakin? Nou kung itlouh jiakin amaw leh? Pasian in athei hi!

            12 Hinanleh lemtanna deihte lamtanna ka sattan theihna ding in, ka bawl pen ka bawljel ding hi, a kisuanna ua kou bang a ahung om theihlouna ding un. 13 Ajiak huachibang mite pen Krist sawltak a kibawl tawm, nasemtu khemhatte, sawltak taklou ahi uhi. 14 Tualeh, hihpen a lamdang kei hi! Ajiak setan zong vak sawltak in ana kibawl tawm hi! 15 Tuajiakin a nasemtute zong diktatna nasemtute in kibawl le uh huapen sil thupi ahikei hi, atawpna uh pen a nasep bang uh ahi ding hi.

                           

Sawltak hihjiak a Paul haksatnate

            16 Ka genkik ahi, kuaman mimaw in hung ngaihtuah kei hen, atuachihlehkei vanglakleh themkhat kei ka kisuan theihna dingin mimaw bangin hung pom un. 17 Ka thugen pen Toupa bangin ka gen kei a. hih kasaktheihna ah mot huaitak bangin ka gen jaw hi. 18 Mi tampi taksalam a akisuan uh ka muh jiakin, keijong ka kisuang ding hi. 19 Ajiak nou mipil na hi ua, mimawte kipahpihtak in na thuakzou jel uhi! 20 Ajiak mi’n sila in hungbawl le uh zong, hung negam le uh zong, sal in hung man nanle uh zong, amauh leh amauh kiliansak nanle uh zong, namai uh hung beng nanle uh zong, na thuajou jel uhi. 21 Hua a dingin ahihleh hatloumah ka hi uhi, keimah kisit in ka gen hi!

            Hinanleh midang hangsanna ah mimaw bangin ka gen a, keizong ka hangsan hi. 22 Hebraimi ahi uh maw? Kei zong ka hi. Isrealte ahi uh maw? Kei zong ka hi. Abraham suante ahi uh maw? Kei zong ka hi. 23 Krist nasemtute ahi uh maw? Mimaw bangin ka gen ahi, kei zong ka hisem hi! Sepgimna bangah atamjawsem in, vawkna bang ah akan aval in, thong tanna ah himun sem in, sihna bang ah tanveipi. 24 Judate lak ah satna sawmli lak a khat kiam ngavei ka tuak a; 25 thumvei chiang a jep in ka um a, khat vei suang a den in ka om hi. Thumvei long siat na ka tuak a , jam khat le sun khat tuipi lai a toh mang in ka um hi. 26 Khualjin na ah tamveipi tuituang ah laohuaima ah, suamhatte lak a lauhuaina ah, ka chihpihte lak a lauhuaina ah, gamdai a lauhuaina ah, tuipi a lauhuaina ah, unau takloute lak a lauhuaina ah, 27 Sepgimna leh haksatna ah, tamveipi ihmut louhna ah, gilkialna leh dangtakna ah, tamveipi anngawlna ah, khuadam thuakna leh guaktang a omna ah. 28 Hih silte chihlou zong saptuam pawlte ka ngaihtuahna niteng a hung nenjing katung ah a om hi. 29 Kua hatlouhna ka hatlouhpih aom ei? Kua pukna ka thangpaih pih louh a om ei?

            30 Kisuang ding ka hih leh ka hatlouh na lam silte ka suangjow ding hi . 31 Pasian leh I Toupa Jesu Krist pa ,tangtawn a pahtawi a om in ka juaulouh athei hi. 32 Damaska ah kumpipa Areta nuai a gam uktupa in kei hung matsak tum in Damaskate khuapi aveng sak a. 33 Hinanleh kotta ah bawm in kulhbang ah ahung khaikhia suk ua, tuachi’n akhut a pat ka suakta ta hi.

                    

II Korinthmite 12

Paul kilakna a Paul haksatnate

1 Kei dingin ki awtsak phatuam kei nanleh, ka mangmuh leh Toupa kalakna kung genlai ding hi. 2 Kum sawmlehli ahita Krist a om mi khat kathei a (pumpi in ahia aom ka thei kei; pumpi lou in ahia a om ka thei kei-Pasian in athei hi). Huachibang mi khat pen van thumna ah laktouh in aom a. 3 Tualeh huachibang mi khat ka thei a (pumpi in ahia, ahihkeileh pumpilou in ahia aom, ka thei kei, Pasian in athei hi). 4 Amah paradis a laktouh a aom dan bang, tualeh mihing ding a genseng louh, gen guallouh thute avaja hi. 5 Huachibang mi pen kasuang ding hi,keimah ka hihleh,ka hatlouhna loungal kasuang kei ding hi. 6 Ajiak kisuang utnanleng, mimaw ka hi kei ding, thutak gen ka hihjiak in. Hinanleh mi kuahiam in ahung muh bang leh kathu ajak bang sang a ahung ngaih thupi louhna dingin ka kidek ding hi.

            7 Tualeh kilaknate a thupu jiak a ka kingaihsang louhna ding in, detan sawltak a hungtum ding ling khat ka taksa ah ahung kipia hi, atuachih keileh ka kingaihsang seng kha ding hi. 8 Kei a pat apaimang nangin, hih sil jiakin Toupa kiangah thumvei ka ngen a. 9 Tualeh aman ka kiangah , “Ka hehpihna nang a dingin ahun hi, ajiak ka hatna pen hatlouhna ah hih bukim in a om hi,” achi a. Tuajiakin, Krist sil bawltheihna katung a a omtheihna dingin, kipak takin ka hatlouhnate ka suangjaw hi. 10 Tuajiakin hatlounate ah, salhnate ah, taksapnate ah, Krist jiakin ka kipak hi, ajiak ka hatlouh huntak chiangin kahat hi.

                             

Paul in Korinte ding a ngaihsakna

            11 Ki uangsakna jiakin mimaw ka suakta hi, nou huachilou theilou in nung bawl uhi, ajiak nung pahtawi jawk ding uh ka hi a, “sawltak” lianpenpa ka phaklahna bangmah a on kei hi. 12 Ataktak a sawltak hihna chiamteh nate ahihleh, kuhkalna chinteng, chiamtehna, sillamdangte, silbawl thupite in nalak uah bawl ahi. 13 Ajiak kei mahmah in nou kung sukbuai chihlou, banglam ah ahia saptuam dangte sang a ngiamjaw a na om uh? Hih bawlkhialhna hung ngaidam un!

            14 Tuin na kiang ua hungpai ding a ka kisakkholhna athumveina ding ahi, kung hihbuai kei ding hi, ajiak na silneih uhjong ka hikei a, nou hung jong ka hijaw hi. Ajiak taten nu leh pa a ding a kholkhawm ding ahi kei a,nu leh pate’n tate a ding a kholkhawm sing ahijaw hi. 15 Tualeh ken nou a dingin kipaktak in ka jangbei ding a, nakha ua dingin ka jangbei ding hi, nou kei hung itmohsem nanle uchin zong, ken nou kung itjawsem hi.

            16 Hinanleh ahi hi hitaleh, ken nou kung hihbuai kei hi, hinanleh zong lungsim siam a ze-khem a kung mat nahi uhi. 17 Na kiang ua kung sawlte lak a kuahiam khat zang in nou a pat punna ka bawlkha ei le?  18 Tita na kiang ua hungpai dingin kana deih ngut a, tualeh amah tawh unaupa khat kung sawl hi. Tita in nou a pat punna a bawlkha maw leh? Kha kibang in ka gamtang kha kei uh maw leh? Kalsuan kebang a pai hilou ka hi uh maw?

            19 Na lak ua kou leh kou kingaihdam tuah ding a hung ngaihtuah nahi uh maw? Krist ah Pasian mai ah thu ka gen uh, hinanleh ittakte aw, sil jousiah nou hoihna singin ka bawl uh hi. 20 Ajiak kungpai chiang a nou kung muh ding bang a kung muhlouh khak ding leh kei nung muh ding bang ua nung muhlouh khak ding uh kalau hi. Atuachih keileh kinialnate, kithangsiat nate, hehnate, kilangkhennate, kegensiatnate, kigukhounate, uanghamnate, tualeh buainate ahung om kha ding hi. 21 Tualeh kung paikik chiangin ka Pasian in nalak uah hung hih mualphou in, tu-masang a nakhialtasa, hinanleh sianlouna leh kingaihna leh huknate ana bawlte uh a pat kisiklou mi tampite ka kahkhum kha ding hi.

II Korinthmite 13

Taihilhna leh chibai bukna

1 Hihpen na kiang ua kungpai a thumveina ding ahi, “Theihpihtu nih leh thum thu jousiah hihkip in a om ding hi.” 2 Tuma in kung hilhta hi, anihveina a na kiang ua ka om lai a ka gen bang in, tu in na kiang ua omlou in, tu-ma lam a sil bawlsuahsate leh midang jousiah kiang ah kung ngen ahi, kung paikik leh ka khoi kei ding hi. 3 Nou, Krist, keimah a thuen pen theihchianna najon jiak un, amah noulam ah ahatmoh kei a, nalak uah silbawl theitak ahijaw hi. 4 Ajiak hatlouhna jiakin kilhden in om mahleh Pasian silbawltheihna in ahingjing hi. Ajiak kou zong amah ah hatlou ka hi ua, hinanleh Pasian sil bawltheihna in nou lam ah amah tawh ka hingkhawm ding uhi.

            5 Ginna ah na om na uh hiam chih noumah leh noumah ki enchian unla, noumah mimal ki enkhia un. Nou ah Jesu Khrist a om chih noumah ngeiin ki theilou na hi uh maw? Deihlou nahih kei ngal uleh. 6 Hinanleh koupen deihlouh ka hikei uh chih hathei ding uh chih ka gingta hi. 7 Tualeh sil gilou na bawllouhna ding un Pasian kiang ah ka ngen hi, huapen kou it-huai a ka kilattheih nang uh ahi kei a. nou, koupen deihlouh hitamah le ung zong, akilawm jousiah na bawltheihna ding uh ahijaw hi. 8 Ajiak thutak a ding chihlou pen, thutak dou ding in bangmah ka bawlthei kei uhi. 9 Ajiak ka hatlouh ua, nou nahat chiang ua ka kipak uhi, tualeh na hoih bukimna ding uh zong ka gen uhi. 10 Tuajiakin bawlsia ding hilou in bawl hoihjaw dingin Toupa hung piak thuneina dungjui a kung vau louhna dingin, na kiang ua ka om louh laiin hih silte kung gelh hi.

            11 Atawp in unaute aw, ki paktak in om un! Hoih bukim in om unla; khamuangtak in om unla; lungsim munkhat pua unla, kituaktak in om un. Tualeh itna leh khamuanna Pasian na kiang uah aom ding hi.

            12 Kitawp siangthou  in khat leh khat chibai kibuk un.

            13 Misiangthoute jousiahin nou chibai ahung buk hi. 14 Toupa Jesu Krist hehpihna leh, Pasian itna leh Khasiangthou pawlna na tung uah omta hen. Amen.